17.2.2022 |
MT |
Il-Ġurnal Uffiċjali tal-Unjoni Ewropea |
L 35/17 |
RAKKOMANDAZZJONI TAL-KUMMISSJONI (UE) 2022/210
tat-8 ta’ Frar 2022
dwar sett ta’ għodod komuni tal-Unjoni biex jiġu indirizzati l-iskarsezzi ta’ semikondutturi u mekkaniżmu tal-UE għall-monitoraġġ tal-ekosistema tas-semikondutturi
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea, u b’mod partikolari l-Artikolu 292 tiegħu,
Billi:
(1) |
Is-semikondutturi huma essenzjali għall-funzjonament tal-ekonomija u tas-soċjetà moderni tagħna. Matul l-aħħar sena, l-Unjoni esperjenzat tfixkil bla preċedent fil-provvista tagħhom li wassal għal dewmien serju u effetti negattivi fir-rigward ta’ setturi ekonomiċi importanti u li wassal għal dewmien fit-tiswija u fil-manutenzjoni ta’ prodotti essenzjali għal setturi kritiċi, bħat-tagħmir mediku u dijanjostiku. |
(2) |
Għalhekk, il-kriżi attwali tal-iskarsezza ta’ semikondutturi u l-effetti sekondarji tagħha jwasslu biex setturi kritiċi bħas-saħħa, it-trasport, l-enerġija, id-difiża, is-sigurtà u l-ispazju jissograw li jiġu affettwati. It-tranżizzjoni ekoloġika u diġitali tal-Unjoni qed tissogra li tiġi mdewma. |
(3) |
F’dak l-isfond, il-Proposta tal-Kummissjoni għal Regolament tal-Parlament Ewropew u tal-Kunsill li jistabbilixxi qafas ta’ miżuri għat-tisħiħ tal-ekosistema tas-semikondutturi tal-Ewropa (l-Att dwar iċ-Ċipep) (1) għandha l-għan li tindirizza r-reżiljenza tal-Unjoni għat-tfixkil fil-katina tal-provvista tas-semikondutturi, li trawwem l-iżvilupp tal-kapaċitajiet fil-manifattura avvanzata, fid-disinn u fl-integrazzjoni tas-sistema kif ukoll fil-manifattura industrijali mill-iktar avvanzata fl-Unjoni, li tindirizza l-iskarsezza kbira ta’ ħiliet, li żżid il-forza tax-xogħol kwalifikata u li tikkontribwixxi għall-ħolqien ta’ ekosistema tas-semikondutturi reżiljenti u dinamika fl-Unjoni. L-Unjoni hija impenjata li tilħaq l-għan strateġiku tagħha ta’ sehem ta’ mill-inqas 20 % tal-produzzjoni dinjija bħala valur ta’ semikondutturi mill-iktar avvanzati, innovattivi u sostenibbli sal-2030, kif stabbilit fil-Programm ta’ Politika tad-Deċennju Diġitali (2). |
(4) |
Din ir-Rakkomandazzjoni takkumpanja r-Regolament propost bħala għodda b’effett immedjat li tippermetti rispons rapidu u kkoordinat tal-Unjoni għall-iskarsezza attwali. Għal dak l-għan, tipproponi li jiġi stabbilit mekkaniżmu ta’ koordinazzjoni biex jiġu diskussi u jiġu deċiżi miżuri ta’ rispons għall-kriżi li jkunu f’waqthom u proporzjonati. |
(5) |
Fid-dawl tan-nuqqasijiet strutturali tal-katina tal-provvista tas-semikondutturi, tirrakkomanda wkoll miżuri li jippermettu monitoraġġ ikkoordinat tal-katina tal-valur tas-semikondutturi, b’enfasi fuq ir-riskji li jistgħu jfixklu, jikkompromettu jew jaffettwaw b’mod negattiv il-provvista tas-semikondutturi. Dawk il-miżuri jenħtieġ li jħejju u jiffaċilitaw il-mekkaniżmu permanenti għall-monitoraġġ tal-katina tal-provvista tas-semikondutturi propost skont ir-Regolament. |
(6) |
Il-Kummissjoni stabbiliet il-Grupp ta’ Esperti Ewropej dwar is-Semikondutturi, bl-iskop li tiġi implimentata din ir-Rakkomandazzjoni. Il-Grupp ta’ Esperti Ewropej dwar is-Semikondutturi se jservi bħala pjattaforma għall-koordinazzjoni bejn l-Istati Membri u se jagħti pariri u assistenza lill-Kummissjoni fl-implimentazzjoni tar-Regolament imminenti. Il-kompiti tal-Grupp ta’ Esperti Ewropej dwar is-Semikondutturi għandhom jitwettqu mill-Bord Ewropew dwar is-Semikondutturi li għandu jiġi stabbilit fir-Regolament. |
(7) |
Il-Grupp ta’ Esperti Ewropej dwar is-Semikondutturi jenħtieġ li jiffaċilita l-iskambju rapidu u effettiv tal-informazzjoni bejn l-Istati Membri u l-Kummissjoni fir-rigward tal-iżviluppi tas-suq li jqiegħdu l-provvisti tal-Unjoni f’riskju tanġibbli, u jenħtieġ li jrawwem rispons uniformi u kkoordinat għall-kriżi. |
(8) |
Bħala l-ewwel miżura, huwa rrakkomandat li l-Istati Membri jitolbu l-informazzjoni mingħand l-organizzazzjonijiet rappreżentattivi tal-impriżi jew, jekk ikun meħtieġ, mingħand il-manifatturi individwali tas-semikondutturi u tat-tagħmir. B’hekk il-Grupp ta’ Esperti Ewropej dwar is-Semikondutturi jkun iktar kapaċi jidentifika u jfassal miżuri ta’ rispons għal kriżi potenzjali. Id-data miġbura jenħtieġ li tikkonċerna l-ħila tal-produzzjoni, il-kapaċità tal-produzzjoni u t-tfixkil u l-konġestjonijiet primarji attwali. Kwalunkwe ġbir jew skambju ta’ informazzjoni jenħtieġ li jkun konformi mar-regoli applikabbli dwar il-kondiviżjoni tad-data u l-kunfidenzjalità tal-informazzjoni u tad-data. |
(9) |
Din ir-Rakkomandazzjoni tinkludi suġġerimenti għal miżuri ta’ rispons għall-kriżi li l-Istati Membri mistiedna jiddiskutu u jikkunsidraw li jimplimentaw fejn ikun rilevanti u proporzjonat. |
(10) |
Jekk il-valutazzjoni tal-kriżi inkwistjoni tkun tirrikjedi dan, l-Istati Membri jistgħu jikkunsidraw li jidħlu fi djalogu biex jitolbu lill-manifatturi tas-semikondutturi stabbiliti fl-Unjoni biex jagħtu prijorità lill-kuntratti ma’ kumpaniji li jipprovdu l-prodotti lil setturi kritiċi, bil-ħsieb li jiġi żgurat li dawn is-setturi jkomplu joperaw. |
(11) |
Barra minn hekk, jekk ikun rilevanti u xieraq skont il-valutazzjoni tal-kriżi inkwistjoni, l-Istati Membri jistgħu jikkunsidraw li jagħtu mandat lill-Kummissjoni biex takkwista ċerti prodotti f’isimhom, sabiex jinħoloq effett ta’ ingranaġġ permezz tal-kapaċità tal-akkwist tagħha u sabiex tiġi żgurata l-provvista lil setturi kritiċi fl-interess pubbliku. |
(12) |
Fl-aħħar nett, l-Istati Membri mħeġġa jivvalutaw jekk l-Unjoni jenħtieġx li teżerċita sorveljanza fuq ċerti esportazzjonijiet biex tiżgura l-provvista għas-suq intern. Jekk jaraw li tali miżuri protettivi jkunu xierqa, meħtieġa u proporzjonati, huma jistgħu jiddiskutu u jitolbu lill-Kummissjoni tivvaluta jekk il-kundizzjonijiet għal miżuri protettivi fir-rigward tal-esportazzjoni skont ir-Regolament (UE) 2015/479 tal-Parlament Ewropew u tal-Kunsill (3) humiex issodisfati. |
(13) |
L-azzjoni ta’ monitoraġġ rakkomandata jenħtieġ li ssegwi l-prinċipji ta’ antiċipazzjoni, ta’ koordinazzjoni u ta’ tħejjija bil-ħsieb li tiġi stabbilita sistema ta’ twissija bikrija sabiex jiġu evitati kriżijiet fil-qasam tas-semikondutturi u sabiex tissaħħaħ l-ekosistema tas-semikondutturi tal-Unjoni. Għal dak l-għan, fil-Grupp ta’ Esperti Ewropej dwar is-Semikondutturi l-Istati Membri mitluba jiddiskutu indikaturi xierqa ta’ twissija bikrija biex jantiċipaw skarsezzi futuri fil-katina tal-provvista tas-semikondutturi. |
(14) |
Hija meħtieġa valutazzjoni iktar fil-fond fir-rigward tar-riskji li jistgħu jfixklu, jikkompromettu jew jaffettwaw b’mod negattiv il-katina tal-valur, inkluż fir-rigward tal-oriġini u s-sorsi tal-provvisti lil hinn mill-Unjoni. Għalhekk, huwa rrakkomandat li l-Istati Membri jiġbru l-informazzjoni rilevanti u jikkooperaw bil-ħsieb li l-Kummissjoni tkun tista’ tħejji valutazzjoni tar-riskju komuni għall-katina tal-valur tas-semikondutturi fl-Unjoni. Il-fatturi li għandhom jitqiesu fit-tħejjija tal-valutazzjonijiet tar-riskju jenħtieġ li jiġu indikati. |
(15) |
Fir-Regolament propost tagħha l-Kummissjoni tistabbilixxi mekkaniżmu permanenti u vinkolanti għal monitoraġġ u rispons għall-kriżi kkoordinat, li jibni fuq il-miżuri ssuġġeriti f’din ir-Rakkomandazzjoni. Ladarba r-Regolament jidħol fis-seħħ, din ir-Rakkomandazzjoni tista’ titħassar. |
ADOTTAT DIN IR-RAKKOMANDAZZJONI:
1. SKOP TA’ DIN IR-RAKKOMANDAZZJONI
(1) |
L-iskop ta’ din ir-Rakkomandazzjoni huwa li jiġi ffaċilitat rispons rapidu, effettiv u kkoordinat tal-Unjoni għall-iskarsezza attwali ta’ semikondutturi u għal każijiet simili fil-futur. |
(2) |
Għalhekk, din ir-Rakkomandazzjoni se tiffaċilita mekkaniżmu ta’ monitoraġġ fid-dawl tan-nuqqasijiet strutturali tal-provvista tas-semikondutturi u r-riskju prevalenti li jfeġġu skarsezzi futuri jew xokkijiet notevoli oħra tas-suq. |
(3) |
Għal dak l-għan, huwa rrakkomandat li l-Istati Membri jaħdmu flimkien mal-Kummissjoni permezz tal-qafas tal-Grupp ta’ Esperti Ewropej dwar is-Semikondutturi, li se jikkoordina miżuri ta’ rispons għall-kriżi b’effett immedjat u se jiffunzjona bħala pjattaforma għall-monitoraġġ tal-katina tal-valur tas-semikondutturi, filwaqt li jiffoka fuq ir-riskji li jistgħu jfixklu, jikkompromettu jew jaffettwaw b’mod negattiv il-provvista tas-semikondutturi. |
2. DEFINIZZJONIJIET
(4) |
Għall-iskop ta’ din ir-Rakkomandazzjoni, japplikaw id-definizzjonijiet stabbiliti fir-Regolament propost. |
3. GRUPP TA’ ESPERTI EWROPEJ DWAR IS-SEMIKONDUTTURI
(5) |
Huwa rrakkomandat li l-Istati Membri jimplimentaw din ir-Rakkomandazzjoni permezz tal-Grupp ta’ Esperti Ewropej dwar is-Semikondutturi. Japplikaw ir-regoli ta’ proċedura ġenerali ta’ dan il-grupp ta’ esperti. |
4. RISPONS GĦALL-KRIŻI B’EFFETT IMMEDJAT
(6) |
Bħala kwistjoni ta’ urġenza, l-Istati Membri jenħtieġ li jiltaqgħu fil-Grupp ta’ Esperti Ewropej dwar is-Semikondutturi sabiex jiskambjaw l-informazzjoni dwar il-qagħda attwali tal-kriżi tas-semikondutturi fis-swieq nazzjonali tagħhom. B’mod partikolari, jenħtieġ li jivvalutaw il-prodotti u s-swieq konkreti affettwati mill-iskarsezza, kif ukoll jenħtieġ li jiddiskutu kwalunkwe miżura ta’ kontinġenza li tkun ġiet implimentata fil-livell nazzjonali. |
(7) |
L-Istati Membri jenħtieġ li jitolbu l-informazzjoni mingħand l-organizzazzjonijiet rappreżentattivi tal-impriżi jew, jekk ikun meħtieġ, mingħand il-manifatturi individwali tas-semikondutturi u tat-tagħmir fir-rigward tal-ħiliet tal-provvista, li tista’ tinkludi l-informazzjoni rigward il-ħila tal-produzzjoni, il-kapaċità tal-produzzjoni u t-tfixkil primarju attwali, bil-ħsieb li jiġu identifikati u mfassla miżuri ta’ rispons għal kriżi potenzjali. Kwalunkwe ġbir jew skambju ta’ informazzjoni jenħtieġ li jkun konformi mar-regoli applikabbli dwar il-kondiviżjoni tad-data u l-kunfidenzjalità tal-informazzjoni u tad-data. |
(8) |
Abbażi ta’ din l-informazzjoni, l-Istati Membri mistiedna jivvalutaw miżuri ta’ rispons għall-kriżi li jkunu xierqa, effettivi u proporzjonati fil-livell nazzjonali u tal-Unjoni (sett ta’ għodod għall-kriżi). Dawn il-miżuri jistgħu jinkludu waħda jew iktar minn dawn li ġejjin:
|
(9) |
Sabiex jiġi żgurat approċċ ikkoordinat, jenħtieġ li l-Istati Membri jinfurmaw lill-Kummissjoni fil-ħin dwar il-miżuri nazzjonali kollha li jkunu ħadu fir-rigward tal-katina tal-provvista tas-semikondutturi. |
5. MONITORAĠĠ
(10) |
L-Istati Membri jenħtieġ li jwettqu monitoraġġ regolari tal-katina tal-valur tas-semikondutturi, b’enfasi fuq ir-riskji li jistgħu jfixklu, jikkompromettu jew jaffettwaw b’mod negattiv il-provvista tas-semikondutturi. |
(11) |
Għal dak l-għan, l-Istati Membri jenħtieġ li jidentifikaw indikaturi xierqa ta’ twissija bikrija bil-ħsieb li jantiċipaw xi tfixkil futur fil-katina tal-provvista tas-semikondutturi. |
(12) |
L-Istati Membri jenħtieġ li jipprovdu lill-Kummissjoni b’informazzjoni bl-iskop li jiġu mmappjati l-fatturi, ix-xejriet u l-avvenimenti li jistgħu jwasslu għal tfixkil sinifikanti fil-katina tal-valur globali tas-semikondutturi b’riperkussjonijiet fl-Unjoni (valutazzjoni tar-riskju tal-Unjoni). Il-fatturi rilevanti li għandhom jitqiesu jistgħu jinkludu:
|
(13) |
L-Istati Membri jenħtieġ li jidentifikaw il-kategoriji ewlenin ta’ utenti tas-semikondutturi, speċjalment dawk minn setturi kritiċi. Jenħtieġ li jistiednu lill-organizzazzjonijiet tal-partijiet ikkonċernati rilevanti, inkluż l-assoċjazzjonijiet tal-industrija u r-rappreżentanti tal-kategoriji ewlenin ta’ utenti, sabiex jipprovdu l-informazzjoni rigward żidiet atipiċi fid-domanda u tfixkil magħruf fil-katina tal-provvista tagħhom, inkluż in-nuqqas ta’ disponibbiltà ta’ semikondutturi kritiċi jew ta’ materja prima kritika, żmien ta’ adattament itwal mill-medja, dewmien fil-konsenja u żidiet eċċezzjonali fil-prezzijiet. |
(14) |
Jenħtieġ li l-Istati Membri javżaw minnufih lill-Kummissjoni meta jsiru jafu dwar xi tfixkil potenzjali fil-provvista tas-semikondutturi, żieda atipika fid-domanda jew ikollhom informazzjoni konkreta u affidabbli li jista’ jimmaterjalizza kwalunkwe fattur ta’ riskju jew avveniment ieħor. |
6. RIEŻAMI
(15) |
Ir-Rakkomandazzjoni tista’ titħassar wara d-dħul fis-seħħ tar-Regolament propost. |
Magħmul fi Brussell, it-8 ta’ Frar 2022.
Għall-Kummissjoni
Thierry BRETON
Membru tal-Kummissjoni
(1) COM(2022) 46, 8.2.2022.
(2) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni, Il-Kumpass Diġitali tal-2030: l-approċċ Ewropew għad-Deċennju Diġitali, 9.3.2021 COM(2021) 118 final.
(3) Ir-Regolament (UE) 2015/479 tal-Parlament Ewropew u tal-Kunsill tal-11 ta’ Marzu 2015 dwar ir-regoli komuni għall-esportazzjoni (ĠU L 83, 27.3.2015, p. 34).