(1)

Bid-Deċiżjoni ta’ Implimentazzjoni tal-Kunsill (UE) 2018/1904 (2), in-Netherlands kienu awtorizzati jintroduċu miżura speċjali li tidderoga mill-Artikolu 285 tad-Direttiva 2006/112/KE biex teżenta mit-taxxa fuq il-valur miżjud (VAT) lill-persuni taxxabbli li l-fatturat annwali tagħhom ma jaqbiżx l-EUR 25 000 (il-“miżura speċjali”).

(2)

Id-Deċiżjoni ta’ Implimentazzjoni (UE) 2018/1904 ser tiskadi fil-31 ta’ Diċembru 2022. Permezz ta’ ittra datata t-23 ta’ Awwissu 2022, in-Netherlands talbu awtorizzazzjoni biex ikomplu japplikaw il-miżura speċjali għal perjodu ulterjuri sal-31 ta’ Diċembru 2024, id-data sa meta l-Istati Membri jridu jittrasponu d-Direttiva tal-Kunsill (UE) 2020/285 (3). Minn dik id-Direttiva jirriżulta li mill-1 ta’ Jannar 2025, l-Istati Membri ser jitħallew jeżentaw mill-VAT il-provvista ta’ merkanzija u servizzi magħmula minn persuni taxxabbli li l-fatturat annwali tagħhom fi Stat Membru partikolari ma jaqbiżx il-limitu ta’ EUR 85 000 jew l-ekwivalenti fil-munita nazzjonali.

(3)

Skont l-Artikolu 395(2), it-tieni subparagrafu, tad-Direttiva 2006/112/KE, il-Kummissjoni bagħtet it-talba magħmula min-Netherlands lill-Istati Membri l-oħra, minbarra lil Spanja, permezz ta’ ittra datata l-25 ta’ Awwissu 2022. Permezz ta’ ittra datata s-26 ta’ Awwissu, il-Kummissjoni bagħtet dik it-talba lil Spanja. Permezz ta’ ittra datata d-29 ta’ Awwissu 2022, il-Kummissjoni nnotifikat lin-Netherlands li kellha l-informazzjoni kollha neċessarja biex tivvaluta t-talba.

(4)

Il-miżura speċjali hija konformi mad-Direttiva 2006/112/KE, kif emendata bid-Direttiva (UE) 2020/285, li tfittex li tnaqqas il-piż tal-konformità tal-impriżi ż-żgħar u tevita d-distorsjonijiet tal-kompetizzjoni fis-suq intern.

(5)

Il-miżura speċjali ser tibqa’ fakultattiva għall-persuni taxxabbli peress li xorta jistgħu jagħżlu l-arranġamenti normali tal-VAT skont l-Artikolu 290 tad-Direttiva 2006/112/KE.

(6)

Skont l-informazzjoni pprovduta min-Netherlands, il-miżura speċjali ser ikollha effett negliġibbli biss fuq l-ammont kumplessiv tad-dħul mit-taxxa miġbur min-Netherlands fl-istadju tal-konsum finali.

(7)

Wara d-dħul fis-seħħ tar-Regolament tal-Kunsill (UE, Euratom) 2021/769 (4), ma għandu jsir l-ebda kalkolu ta’ kumpens min-Netherlands fir-rigward tad-dikjarazzjoni tar-riżorsa proprja bbażata fuq il-VAT mis-sena finanzjarja 2022 ’il quddiem.

(8)

Minħabba l-fatt li ll-miżura speċjali kellha impatt pożittiv fuq is-simplifikazzjoni tal-obbligi relatati mal-VAT, peress li naqqset il-piż amministrattiv u l-kostijiet tal-konformità kemm għall-impriżi żgħar kif ukoll għall-awtoritajiet tat-taxxa, u peress li ma jistax ikollha impatt kbir fuq id-dħul totali ġġenerat mill-VAT, jixraq li n-Netherlands jitħallew japplikaw il-miżura speċjali stabbilita fid-Deċiżjoni ta’ Implimentazzjoni (UE) 2018/1904.

(9)

Jenħtieġ li l-applikazzjoni tal-miżura speċjali tkun limitata fiż-żmien. Jenħtieġ li l-limitu ta’ żmien ikun biżżejjed biex jippermetti lill-Kummissjoni tevalwa l-effettività u l-adegwatezza tal-livell limitu attwali. Barra minn hekk, skont l-Artikolu 3(1) tad-Direttiva (UE) 2020/285, l-Istati Membri jridu jadottaw u jippubblikaw, sal-31 ta’ Diċembru 2024, il-liġijiet, ir-regolamenti u d-dispożizzjonijiet amministrattivi neċessarji biex jikkonformaw mal-Artikolu 1 ta’ dik id-Direttiva, u jridu japplikaw dawk id-dispożizzjonijiet mill-1 ta’ Jannar 2025. Għalhekk, jixraq li n-Netherlands jiġu awtorizzati japplikaw il-miżura speċjali sal-31 ta’ Diċembru 2024.

(10)

Għalhekk, id-Deċiżjoni ta’ Implimentazzjoni (UE) 2018/1904 jenħtieġ li tiġi emendata skont dan,