(1)

Jenħtieġ li l-għan tal-azzjoni tal-Unjoni fis-settur tat-trasport marittimu jkun li tittejjeb is-sikurezza marittima u li jiġi protett l-ambjent tal-baħar u saħħet il-bniedem.

(2)

Il-Kumitat tas-Sikurezza Marittima tal-Organizzazzjoni Marittima Internazzjonali (OMI) huwa mistenni jadotta, matul il-106 sessjoni tiegħu (“MSC 106”) mit-2 sal-11 ta’ Novembru 2022, emendi għall-Kapitolu II-2 tal-Konvenzjoni Internazzjonali għas-Salvagwardja tal-Ħajja Umana fuq il-Baħar (SOLAS) u għall-Kodiċi Internazzjonali dwar il-programm imtejjeb ta’ spezzjonijiet waqt il-kontrolli ta’ Bastimenti ta’ tagħbija bl-ingrossa u Tankers taż-żejt, 2011 (il-“Kodiċi ESP 2011”).

(3)

Il-Kumitat tal-Protezzjoni tal-Ambjent tal-Baħar tal-OMI huwa mistenni jadotta, matul id-79 sessjoni tiegħu (“MEPC 79”) mit-12 sas-16 ta’ Diċembru 2022, emendi għar-Regolament 14 tal-Konvenzjoni Internazzjonali għall-Prevenzjoni tat-Tniġġis minn Bastimenti (MARPOL) u għall-Appendiċi VII u IX tal-Anness VI tal-MARPOL.

(4)

Huwa xieraq li tiġi stabbilita l-pożizzjoni li għandha tittieħed f’isem l-Unjoni matul l-MSC 106, peress li l-emendi għall-Kapitolu II-2 tas-SOLAS u għall-Kodiċi ESP 2011 jistgħu jinfluwenzaw b’mod deċiżiv il-kontenut tal-liġi tal-Unjoni, jiġifieri d-Direttiva 2009/45/KE tal-Parlament Ewropew u tal-Kunsill (1) u r-Regolament (UE) Nru 530/2012 tal-Parlament Ewropew u tal-Kunsill (2).

(5)

L-emendi għall-Kapitolu II-2 tas-SOLAS ser iqisu l-fornituri tal-fjuwil taż-żejt li naqsu milli jissodisfaw ir-rekwiżiti tal-punt tal-fjammabbiltà, l-azzjonijiet kontra l-fornituri tal-fjuwil taż-żejt li nstabu li jipprovdu fjuwil taż-żejt li ma jikkonformax mar-rekwiżiti minimi tal-punt tal-fjammabbiltà, u d-dokumentazzjoni tal-punt ta’ fjammabbiltà tal-lott tal-fjuwil attwali waqt il-bunkering. L-Unjoni jenħtieġ li tappoġġa dawk l-emendi peress li ser itejbu s-sikurezza ta’ bastimenti.

(6)

L-emendi għall-Kodiċi ESP 2011 huma bil-għan li jiġu implimentati rekwiżiti aktar stretti għall-istħarriġ tat-tankijiet tas-saborra u tal-ispazji vojta sabiex jiġu indirizzati l-kwistjonijiet ta’ sikurezza li ġew identifikati matul l-investigazzjoni tas-sikurezza marittima tal-Istat tal-bandiera tat-telf tal-bastimenti ta’ tagħbija bl-ingrossa MV Stellar Daisy fl-2017. L-Unjoni jenħtieġ li tappoġġa dawk l-emendi peress li ser itejbu s-sikurezza ta’ bastimenti.

(7)

Huwa xieraq li tiġi stabbilita l-pożizzjoni li trid tittieħed f’isem l-Unjoni matul l-MEPC 79, peress li l-emendi għar-Regolament 14 tal-MARPOL u għall-Appendiċi VII u IX tal-Anness VI tal-MARPOL jistgħu jinfluwenzaw b’mod deċiżiv il-kontenut tal-liġi tal-Unjoni, jiġifieri r-Regolament (UE) 2015/757 tal-Parlament Ewropew u tal-Kunsill (3) u d-Direttiva (UE) 2016/802 tal-Parlament Ewropew u tal-Kunsill (4).

(8)

L-emendi għar-Regolament 14 tal-MARPOL u l-Appendiċi VII tal-Anness VI tal-MARPOL jikkonċernaw id-deżinjazzjoni tal-Baħar Mediterran, kollu kemm hu, bħala Żona ta’ Kontroll tal-Emissjonijiet tal-Ossidi tal-Kubrit (Med SOX ECA). Jenħtieġ li l-Unjoni tappoġġa dawk l-emendi peress li dik id-deżinjazzjoni ser tirriżulta fi tnaqqis sinifikanti fil-livelli ambjentali tat-tniġġis tal-arja fil-Baħar Mediterran kollu kemm hu u fl-Istati kostali tal-Mediterran, li ser iwassal għal benefiċċji sostanzjali għas-saħħa tal-bniedem u għall-ambjent.

(9)

L-emendi għall-Appendiċi IX tal-Anness VI tal-MARPOL ser itejbu informazzjoni dwar il-prestazzjoni tal-intensità tal-karbonju tal-bastiment fis-Sistema ta’ Ġbir tad-Data dwar il-Konsum taż-Żejt Fjuwil mill-Bastimenti tal-OMI (DCS). L-Unjoni jenħtieġ li tappoġġa dawk l-emendi peress li l-informazzjoni mtejba dwar l-intensità tal-karbonju tal-bastimenti ser tipprovdi data essenzjali dwar l-effiċjenza enerġetika u l-prestazzjoni tal-intensità tal-karbonju tal-flotta globali. Għalhekk, tali informazzjoni jenħtieġ li tiġi rrapportata lid-DCS tal-OMI.

(10)

L-Unjoni la hija membru tal-OMI, u lanqas ma hija parti kontraenti fis-SOLAS, fil-Kodiċi ESP 2011 jew fil-MARPOL. Għaldaqstant jenħtieġ li l-Kunsill jawtorizza lill-Istati Membri jesprimu l-pożizzjoni tal-Unjoni.

(11)

Jenħtieġ li l-kamp ta’ applikazzjoni ta’ din id-deċiżjoni jkun limitat għall-kontenut tal-emendi proposti, sa fejn dawk l-emendi jkunu kapaċi jaffettwaw ir-regoli komuni tal-Unjoni u jaqgħu fil-kompetenza esklużiva tal-Unjoni. Jenħtieġ li din id-Deċiżjoni ma taffettwax id-diviżjoni tal-kompetenzi bejn l-Unjoni u l-Istati Membri,