(1)

Il-proċedura għar-rikonoxximent ta’ kontropartijiet ċentrali (central counterparties, “CCPs”) stabbiliti f’pajjiżi terzi, stipulata fl-Artikolu 25 tar-Regolament (UE) Nru 648/2012, għandha l-għan li tippermetti lis-CCPs stabbiliti u awtorizzati f’pajjiżi terzi li għandhom standards regolatorji ekwivalenti għal dawk stabbiliti f’dak ir-Regolament, li jipprovdu servizzi ta’ kklirjar lill-membri tal-ikklirjar jew liċ-ċentri tan-negozjar stabbiliti fl-Unjoni. Għalhekk, din il-proċedura ta’ rikonoxximent u d-deċiżjonijiet ta’ ekwivalenza previsti fiha jikkontribwixxu biex jintlaħaq l-għan ġenerali tar-Regolament (UE) Nru 648/2012 li jitnaqqas ir-riskju sistemiku billi jiġi estiż l-użu ta’ CCPs sikuri u sodi biex jikklerjaw il-kuntratti tad-derivattivi barra l-borża (“OTC”), inkluż fejn dawk is-CCPs ikunu stabbiliti u awtorizzati f’pajjiż terz.

(2)

Sabiex reġim legali ta’ pajjiż terz jitqies bħala ekwivalenti għar-reġim legali tal-Unjoni fir-rigward ta’ CCPs, jenħtieġ li l-eżitu sostantiv tal-arranġamenti legali u superviżorji applikabbli jkun ekwivalenti għar-rekwiżiti tal-Unjoni rigward l-objettivi regolatorji li jiksbu. L-għan ta’ tali valutazzjoni tal-ekwivalenza huwa għalhekk li jiġi vverifikat jekk l-arranġamenti legali u superviżorji tal-pajjiż terz ikkonċernat jiżgurawx li s-CCPs stabbiliti u awtorizzati f’dak il-pajjiż terz ma jesponux lill-membri tal-ikklirjar u liċ-ċentri tan-negozjar stabbiliti fl-Unjoni għal livell ogħla ta’ riskju milli dawn tal-aħħar jistgħu jkunu esposti għalih mis-CCPs awtorizzati fl-Unjoni u, konsegwentement, ma joħolqux livelli inaċċettabbli ta’ riskju sistemiku fl-Unjoni. Jenħtieġ li r-riskji ferm aktar baxxi inerenti f’attivitajiet ta’ kklirjar imwettqa fis-swieq finanzjarji li huma iżgħar mis-suq finanzjarju tal-Unjoni jiġu kkunsidrati b’mod partikolari.

(3)

Jenħtieġ li l-valutazzjoni ta’ jekk l-arranġamenti legali u superviżorji tal-Kolombja humiex ekwivalenti għal dawk tal-Unjoni ma tkunx ibbażata biss fuq analiżi komparattiva tar-rekwiżiti legalment vinkolanti applikabbli għas-CCPs fil-Kolombja, iżda wkoll fuq valutazzjoni tal-eżitu ta’ dawk ir-rekwiżiti. Jenħtieġ li l-Kummissjoni tivvaluta wkoll l-adegwatezza ta’ dawk ir-rekwiżiti biex ittaffi r-riskji li l-membri ta’ kklirjar u ċ-ċentri ta’ negozjar stabbiliti fl-Unjoni jistgħu jkunu esposti għalihom, meta jitqies id-daqs tas-suq finanzjarju li fih joperaw is-CCPs fil-Kolombja. Rekwiżiti ta’ mitigazzjoni tar-riskju aktar stretti huma neċessarji għas-CCPs li jeżerċitaw l-attivitajiet tagħhom fi swieq finanzjarji ikbar li għandhom livell ta’ riskju inerenti ogħla, minn dawk ta’ CCPs li jeżerċitaw l-attivitajiet tagħhom fi swieq finanzjarji iżgħar li għandhom livell ta’ riskju inerenti iktar baxx.

(4)

L-Artikolu 25(6), il-punti (a), (b), (c), tar-Regolament (UE) Nru 648/2012, iridu jintlaħqu tliet kundizzjonijiet biex jiġi determinat li l-arranġamenti legali u superviżorji ta’ pajjiż terz rigward is-CCPs awtorizzati hemmhekk huma ekwivalenti għal dawk stabbiliti f’dak ir-Regolament.

(5)

Skont l-Artikolu 25(6), il-punt (a), tar-Regolament (UE) Nru 648/2012, is-CCPs awtorizzati f’pajjiż terz iridu jikkonformaw mar-rekwiżiti legalment vinkolanti li huma ekwivalenti għar-rekwiżiti stipulati fit-Titolu IV ta’ dak ir-Regolament.

(6)

Ir-rekwiżiti legalment vinkolanti applikabbli għas-CCPs awtorizzati fil-Kolombja huma stabbiliti fil-Liġi Nru 964 tal-2005 li tirregola l-ikklerjar u s-saldu ta’ strumenti finanzjarji (“ir-regoli primarji”) kif ukoll fir-regoli ġenerali stabbiliti fid-Digriet 2555 tal-2010 fil-Ktieb 13 tal-Parti 2 u fiċ-ċirkulari maħruġa mis-Supreintendencia Financiera (“SFC”) (“ir-regoli sekondarji”). Dawk ir-regoli flimkien jistabbilixxu l-istandards u r-rekwiżiti li s-CCPs awtorizzati fil-Kolombja jridu jikkonformaw magħhom fuq bażi kontinwa.

(7)

Ir-regoli primarji jistabbilixxu, fost l-oħrajn, regoli dwar l-arranġamenti ta’ governanza, l-azzjonisti u l-membri b’parteċipazzjonijiet kwalifikanti, il-fond tal-inadempjenza u s-saldu, u jistabbilixxu r-rekwiżiti minimi li r-regoli operattivi jridu jikkonformaw magħhom is-CCPs. Barra minn hekk, skont iċ-Ċirkolari Básica Jurídica - CE 29 tal-2014, is-CCPs awtorizzati jridu japplikaw u jimplimentaw l-istandards internazzjonali rilevanti dwar is-sistemi tal-ikklerjar u tas-saldu, b’mod partikolari l-Prinċipji għall-infrastrutturi tas-swieq finanzjarji (“PFMIs”) maħruġa mill-Kumitat dwar is-Sistemi ta’ Pagament u Saldu u l-Kumitat Tekniku tal-Organizzazzjoni Internazzjonali tal-Kummissjonijiet tat-Titoli (2).

(8)

Biex tkun awtorizzata fil-Kolombja, CCP trid tissottometti lis-SFC ir-regoli operattivi tagħha, kif ukoll studju dwar l-adegwatezza ta’ kull waħda mis-sistemi li timmaniġġja. Ir-regoli operattivi ta’ CCP iridu jipprovdu dettall preskrittiv dwar il-mod li bih is-CCP għandha tissodisfa l-istandards u r-rekwiżiti ta’ livell għoli stabbiliti fir-regoli primarji kif ukoll fil-PFMIs. Ir-regoli operattivi għandhom jinkludu dispożizzjonijiet dwar rekwiżiti ta’ parteċipazzjoni, sistemi ta’ komunikazzjoni, it-tip ta’ strumenti finanzjarji li jistgħu jiġu kklerjati, proċeduri ta’ ġestjoni tar-riskju, proċeduri għal saldu f’waqtu, kollateral li għandu jiġi pprovdut mill-parteċipanti, miżuri li għandhom jittieħdu f’każ ta’ ksur mill-parteċipanti tal-obbligi tagħhom, organizzazzjoni u operazzjoni tal-awditjar, kumitati tar-riskju u kontinwità operattiva. Ladarba r-regoli operattivi jiġu approvati mill-SFC, din tal-aħħar tivvaluta l-kapaċità tas-CCP li tibda l-operazzjonijiet, f’termini ta’ faċilitajiet, riżorsi professjonali u teknoloġiċi, proċeduri u kontrolli. Ladarba s-CCP tkun ġiet awtorizzata, ir-regoli operattivi tagħha jsiru legalment vinkolanti fuqha. Kwalunkwe emenda għar-regoli operattivi għandha tiġi approvata mis-SFC.

(9)

Ir-rekwiżiti legalment vinkolanti applikabbli għas-CCPs awtorizzati fil-Kolombja għalhekk jikkonsistu fi struttura fuq żewġ saffi. L-ewwel livell jikkonsisti fil-Liġi nru 964 tal-2005, kif ukoll ir-regoli ġenerali u ċ-ċirkulari maħruġa mis-SFC, li flimkien jistabbilixxu l-istandards u r-rekwiżiti ta’ livell għoli, inklużi l-PFMIs, li s-CCPs awtorizzati għandhom jikkonformaw magħhom u dettalji preskrittivi dwar il-mod li bih is-CCP għandha tissodisfa dawk l-istandards u r-rekwiżiti ta’ livell għoli. It-tieni livell jikkonsisti fir-regoli ta’ operazzjoni tas-CCPs.

(10)

Is-suq finanzjarju tal-Kolombja huwa ferm iżgħar minn dak li fih huma attivi s-CCPs stabbiliti fl-Unjoni. Tul l-aħħar tliet (3) snin, il-valur totali tat-tranżazzjonijiet derivattivi kklerjati fil-Kolombja irrappreżenta inqas minn 1 % tal-valur totali tat-tranżazzjonijiet ikklerjati fl-Unjoni. Għalhekk, il-parteċipazzjoni tas-CCPs awtorizzati fil-Kolombja tesponi lill-membri tal-ikklirjar u liċ-ċentri tan-negozjar stabbiliti fl-Unjoni għal riskji ferm iktar baxxi mill-parteċipazzjoni tagħhom f’CCPs awtorizzati fl-Unjoni. Ir-regoli primarji u sekondarji applikabbli għas-CCPs awtorizzati fil-Kolombja, ikkumplimentati mir-regoli u l-proċeduri interni tagħhom, li jirrikjedu konformità mal-PFMIs, jimmitigaw b’mod adegwat il-livell aktar baxx ta’ riskju li l-membri tal-ikklirjar u ċ-ċentri tan-negozjar stabbiliti fl-Unjoni jistgħu jkunu esposti għalih u għalhekk jistgħu jitqiesu li jiksbu eżitu ta’ mitigazzjoni tar-riskju ekwivalenti għal dak segwit mir-Regolament (UE) Nru 648/2012.

(11)

Il-Kummissjoni għalhekk tikkonkludi li l-arranġamenti legali u superviżorji tal-Kolombja jiżguraw li s-CCPs awtorizzati fil-Kolombja jikkonformaw ma’ rekwiżiti legalment vinkolanti li huma ekwivalenti għar-rekwiżiti stipulati fit-Titolu IV tar-Regolament (UE) Nru 648/2012.

(12)

L-Artikolu 25(6), il-punt (b), tar-Regolament (UE) Nru 648/2012, jeħtieġ li l-arranġamenti legali u superviżorji fir-rigward ta’ CCPs awtorizzati f’pajjiż terz iridu jipprevedu wkoll superviżjoni u infurzar effettivi tas-CCPs fuq bażi kontinwa.

(13)

Skont l-Artikolu 6 tal-Liġi Nru 964 tal-2005, l-SFC għandha s-setgħa li tissorvelja l-operazzjonijiet tas-CCPs fil-Kolombja u li timmonitorja dawk is-CCPs biex tiżgura l-konformità fuq bażi kontinwa mar-regoli primarji u mar-regoli u l-proċeduri interni tas-CCPs. L-SFC għandha sett komprensiv ta’ setgħat biex tikkontrolla u tippenalizza CCP awtorizzata, inkluż, fost l-oħrajn, is-setgħa li titlob informazzjoni u data, twettaq spezzjonijiet fuq il-post u mhux fuq il-post u titlob CCP awtorizzata biex tagħmel korrezzjonijiet, toħroġ ordnijiet u struzzjonijiet. Skont l-Artikolu 53 tal-Liġi Nru 964 tal-2005, l-SFC tista’ timponi twissijiet, multi, sospensjoni jew skwalifika tal-maniġers maħtura ta’ CCP awtorizzata. Tista’ wkoll tissospendi l-operazzjonijiet ta’ CCP jew tirtira l-awtorizzazzjoni ta’ CCP f’każ ta’ ksur ta’ rekwiżit legali obbligatorju. Barra minn hekk, is-CCPs għandhom jagħmlu awtovalutazzjoni tal-konformità tagħhom mal-PFMIs mill-inqas kull tliet snin u jippreżentaw rapport li jiġi ppubblikat u rieżaminat perjodikament mill-SFC skont il-pjan ta’ superviżjoni tagħha.

(14)

Għalhekk il-Kummissjoni tikkonkludi li l-arranġamenti legali u superviżorji fir-rigward ta’ CCPs awtorizzati fil-Kolombja jipprovdu għal superviżjoni u infurzar effettivi fuq bażi kontinwa.

(15)

Skont l-Artikolu 25(6), il-punt (c), tar-Regolament (UE) Nru 648/2012, il-qafas legali ta’ pajjiż terz huwa li jipprovdi għal sistema ekwivalenti effettiva għar-rikonoxximent ta’ CCPs awtorizzati taħt reġimi legali ta’ pajjiżi terzi (‘CCPs ta’ pajjiżi terzi’).

(16)

Fil-Kolombja, skont iċ-Ċirkolari Esterna Nru 019 tal-2022, “CCP ekwivalenti ta’ pajjiż terz” huwa CCP li jopera f’ġurisdizzjoni fejn l-SFC tosserva l-osservanza materjali tal-PFMIs, huwa suġġett għal superviżjoni effettiva u li miegħu jeżisti ftehim ta’ kooperazzjoni bejn il-kontrollur ta’ pajjiż terz u l-SFC. CCPs ta’ pajjiżi terzi rikonoxxuti bħala ekwivalenti mill-SFC huma elenkati f’rekord pubbliku li jiġi vvalutat sabiex tiġi vverifikata l-konformità mal-PFMIs. Skont iċ-Ċirkolari Esterna Nru 019 tal-2022, l-iskoperturi tal-banek Kolombjani għal CCPs ekwivalenti ta’ pajjiżi terzi jibbenefikaw minn trattament kapitali preferenzjali, filwaqt li skoperturi għal CCPs ta’ pajjiżi terzi li mhumiex meqjusa ekwivalenti huma soġġetti għal piż tar-riskju punittiv. Fil-prattika, tali piż tar-riskju għoli għal CCPs ta’ pajjiżi terzi mhux ekwivalenti huwa projbittiv u ftit ħafna, jekk ikun hemm, mill-banek tal-Kolombja jistgħu jkunu mistennija jikklerjaw f’CCPs ta’ pajjiżi terzi mhux ekwivalenti. Barra minn hekk, jekk il-banek tal-Kolombja jiddeċiedu xorta waħda li jikklerjaw f’CCP ta’ pajjiż terz mhux ekwivalenti, il-piż tar-riskju għoli jimmitiga kwalunkwe riskju relatat mal-iskoperturi tiegħu. Fid-dawl tat-trattament kapitali applikabbli għal skoperturi għal CCPs mhux ekwivalenti skont iċ-Ċirkolari Esterna Nru 019 tal-2022, ir-reġim tal-Kolombja jista’ jitqies li jipprovdi sistema ekwivalenti effettiva għar-rikonoxximent ta’ CCPs ta’ pajjiżi terzi.

(17)

Il-Kummissjoni tikkonkludi li l-arranġamenti legali u superviżorji tal-Kolombja jipprevedu għal sistema ekwivalenti effettiva għar-rikonoxximent ta’ CCPs ta’ pajjiż terz.

(18)

Il-Kummissjoni tqis li l-arranġamenti legali u superviżorji tal-Kolombja applikabbli għas-CCPs jissodisfaw il-kundizzjonijiet stabbiliti fl-Artikolu 25(6) tar-Regolament (UE) Nru 648/2012. Konsegwentement, jenħtieġ li dawk l-arranġamenti legali u superviżorji jitqiesu ekwivalenti għar-rekwiżiti stabbiliti f’dak ir-Regolament.

(19)

Din id-Deċiżjoni hija bbażata fuq ir-rekwiżiti legalment vinkolanti applikabbli għal CCPs fil-Kolombja fiż-żmien tal-adozzjoni tagħha. Il-Kummissjoni, abbażi, fost l-oħrajn, tal-informazzjoni pprovduta mill-Awtorità Ewropea tat-Titoli u s-Swieq (ESMA) skont l-Artikolu 25(6b) tar-Regolament (UE) Nru 648/2012, se tkompli timmonitorja fuq bażi regolari l-evoluzzjoni tal-qafas legali u superviżorju applikabbli għas-CCPs fil-Kolombja u l-issodisfar tal-kundizzjonijiet li abbażi tagħhom tiġi adottata din id-Deċiżjoni.

(20)

Abbażi tas-sejbiet li jirriżultaw minn rieżami regolari jew speċifiku, il-Kummissjoni tista’ tiddeċiedi li temenda, jew tħassar din id-Deċiżjoni fi kwalunkwe ħin, b’mod partikolari meta l-iżviluppi jaffettwaw il-kundizzjonijiet li abbażi tagħhom tiġi adottata din id-Deċiżjoni.

(21)

Sabiex jiġi żgurat li l-ESMA tkun tista’ tibda l-proċedura ta’ rikonoxximent għas-CCPs awtorizzati fil-Kolombja mingħajr dewmien, jenħtieġ li din id-Deċiżjoni tidħol fis-seħħ b’urġenza.

(22)

Il-miżuri previsti f’din id-Deċiżjoni huma f’konformità mal-opinjoni tal-Kumitat Ewropew tat-Titoli,