ANNESS III

LIVELLI TA' SENSITTIVITÀ U STRUZZJONIJIET DWAR IL-ĠESTJONI

Il-Partijiet għandhom jagħmlu użu mil-livelli ta' sensittività li ġejjin biex tiġi identifikata l-informazzjoni sensittiva li tkun ġestita u skambjata f'dan il-Ftehim.

Għal dan l-għan, dawk il-marki stabbiliti fl-Artikolu 9(2) ta' dan il-Ftehim għandhom jiġu applikati kif ġej:

—	"ETS Limitata" għandha tiġi applikata fl-Unjoni bħala ''SENSITIVE: ETS Joint Procurement''; fl-Iżvizzera bħala ''LIMITED: ETS''

—	"ETS Sensittiva" għandha tiġi applikata fl-Unjoni u fl-Iżvizzera bħala ''SENSITIVE: ETS''

—	"ETS Kritika" għandha tiġi applikata fl-Unjoni u fl-Iżvizzera bħala ''SPECIAL HANDLING: ETS Critical''

Informazzjoni li hija mmarkata bħala ''SPECIAL HANDLING: ETS Critical'' hija aktar sensittiva minn informazzjoni li hija mmarkata bħala ''SENSITIVE: ETS'', li min-naħa tagħha hija aktar sensittiva minn informazzjoni li hija mmarkata bħala ''SENSITIVE: ETS Joint Procurement'' fl-Unjoni jew ''LIMITED: ETS'' fl-Iżvizzera.

Il-Partijiet jaqblu li jiżviluppaw struzzjonijiet dwar il-ġestjoni abbażi tal-politika eżistenti tal-Unjoni dwar il-klassifikazzjoni tal-informazzjoni tal-ETS u abbażi tal-Ordinanza dwar il-Protezzjoni tal-Informazzjoni u l-Att Federali dwar il-Protezzjoni tad-Data tal-Iżvizzera. L-istruzzjonijiet dwar il-ġestjoni għandhom jiġu sottomessi lill-Kumitat Konġunt għall-approvazzjoni. Wara l-approvazzjoni, l-informazzjoni kollha għandha tiġi ġestita skont il-livell ta' sensittività tagħha f'konformità mal-istruzzjonijiet dwar il-ġestjoni.

Fil-każ li l-Partijiet jagħtu valutazzjonijiet differenti dwar il-livell, għandu jiġi applikat l-ogħla livell.

Il-leġiżlazzjoni ta' kull Parti għandha tinkludi rekwiżiti ekwivalenti ta' sigurtà essenzjali għall-passi dwar il-ġestjoni li ġejjin, filwaqt li jitqiesu l-livelli ta' sensittività tal-ETS:

—	Ġenerazzjoni ta' dokument — Riżorsi — Livell ta' Sensittività

—	Ħżin — Dokument elettroniku fuq network — Dokument elettroniku f'ambjent lokali — Dokument fiżiku

—	Trażmissjoni elettronika — Telefon u mowbajl — Fax — Email — Trażmissjoni tad-data

—	Trażmissjoni Fiżika — Orali — Trasferiment personali — Sistema postali

—	Użu — Ipproċessar b'applikazzjonijiet tal-IT — Stampar — Ikkupjar — Tneħħija minn post permanenti

—	Immaniġġjar tal-informazzjoni — Evalwazzjoni regolari tal-klassifikazzjoni u tar-riċevituri — Arkivjar — Tħassir u qerda

ANNESS IV

DEFINIZZJONI TA' LIVELLI TA' SENSITTIVITÀ TAL-ETS

A.1 –   Klassifikazzjoni tal-Kunfidenzjalità u tal-Integrità

"Kunfidenzjalità" tfisser in-natura riżervata tal-informazzjoni jew ta' sistema ta' informazzjoni kollha jew parti minnha (bħal algoritmi, programmi u dokumentazzjoni) li l-aċċess għaliha jkun limitat għal persuni, korpi u proċeduri awtorizzati.

"Integrità" tfisser il-garanzija li s-sistema ta' informazzjoni u l-informazzjoni pproċessata jistgħu jiġu alterati biss b'azzjoni intenzjonata u leġittima u li s-sistema ser tipproduċi r-riżultat mistenni b'mod preċiż u b'mod sħiħ.

Għal kull element ta' informazzjoni tal-ETS li jitqies bħala sensittiv, l-aspett ta' kunfidenzjalità għandu jitqies mill-impatt potenzjali fil-livell ta' negozju fejn din l-informazzjoni tiġi żvelata u l-aspett ta' integrità għandu jitqies mill-impatt potenzjali fil-livell ta' negozju fejn din l-informazzjoni fir-rigward ta' modifikazzjoni, qerda parzjali jew kompleta mhux intenzjonata.

Il-livell ta' kunfidenzjalità tal-informazzjoni u l-livell ta' integrità ta' sistema ta' informazzjoni għandhom ikunu klassifikati wara valutazzjoni abbażi tal-kriterji li jinsabu fit-taqsima A.2. Dawk il-klassifikazzjonijiet jippermettu li l-livell ta' sensittività globali tal-informazzjoni jiġi evalwat permezz tat-tabella skematika mogħtija fit-taqsima A.3.

A.2 –   Klassifikazzjoni tal-Kunfidenzjalità u tal-Integrità

A.2.1 –   "Klassifikazzjoni baxxa"

Għandha tingħata klassifikazzjoni baxxa lil kwalunkwe informazzjoni relatata mal-ETS li l-iżvelar tagħha lil persuni mhux awtorizzati, u/jew li t-telf ta' integrità tagħha jikkawżaw ħsara moderata lill-Partijiet jew lil istituzzjonijiet oħrajn li min-naħa tagħha tista':

—	taffettwa moderatament ir-relazzjonijiet politiċi jew diplomatiċi;

—	tikkawża pubbliċità lokali negattiva għall-immaġni jew għar-reputazzjoni tal-Partijiet jew ta' istituzzjonijiet oħra;

—	tikkawża imbarazzament lill-individwi;

—	taffettwa l-moral/produttività tal-persunal;

—	tikkawża telf finanzjarju limitat jew tiffaċilita moderatament qligħ jew vantaġġ mhux xieraq għall-individwi jew għall-kumpaniji;

—	taffettwa moderatament l-iżvilupp jew l-operat effettiv tal-politiki tal-Partijiet;

—	taffettwa moderatament l-immaniġġjar xieraq tal-Partijiet u tal-operazzjonijiet tagħhom.

A.2.2 –   "Klassifikazzjoni medja"

Għandha tingħata klassifikazzjoni medja lil kwalunkwe informazzjoni relatata mal-ETS li l-iżvelar tagħha lil persuni mhux awtorizzati, u/jew li t-telf ta' integrità tagħha jikkawżaw ħsara lill-Partijiet jew lil istituzzjonijiet oħrajn li min-naħa tagħha tista':

—	tikkawża imbarazzament lir-relazzjonijiet politiċi jew diplomatiċi;

—	tikkawża ħsara lill-immaġni jew lir-reputazzjoni tal-Partijiet jew ta' istituzzjonijiet oħra;

—	tikkawża tbatija għall-individwi;

—	tikkawża tnaqqis konsegwenzjali fil-moral/produttività tal-persunal;

—	timbarazza lill-Partijiet jew lil istituzzjonijiet oħrajn f'negozjati kummerċjali jew ta' politika ma' oħrajn;

—	tikkawża telf finanzjarju jew tiffaċilita qligħ jew vantaġġ mhux xieraq għall-individwi jew għall-kumpaniji;

—	taffettwa l-investigazzjoni ta' reat;

—	tikser l-obbligi legali jew kuntrattwali dwar il-kunfidenzjalità tal-informazzjoni;

—	taffettwa l-iżvilupp jew l-operat tal-politiki tal-Partijiet;

—	taffettwa l-immaniġġjar xieraq tal-Partijiet u tal-operazzjonijiet tagħhom.

A.2.3 –   "Klassifikazzjoni għolja"

Għandha tingħata klassifikazzjoni għolja lil kwalunkwe informazzjoni relatata mal-ETS li l-iżvelar tagħha lil persuni mhux awtorizzati, u/jew li t-telf ta' integrità tagħha jikkawżaw ħsara katastrofika u/jew ħsara mhux aċċettabbli lill-Partijiet jew lil istituzzjonijiet oħrajn li min-naħa tagħha tista':

—	taffettwa b'mod avvers ir-relazzjonijiet diplomatiċi;

—	tikkawża tbatija sostanzjali lill-individwi;

—	tagħmilha aktar diffiċli li tinżamm l-effettività jew is-sigurtà operattiva tal-Partijiet jew ta' forzi ta' kontributuri oħra;

—	tikkawża telf finanzjarju jew tiffaċilita qligħ jew vantaġġ mhux xieraq għall-individwi jew għall-kumpaniji;

—	tikser l-impenji xierqa għaż-żamma tal-kunfidenzjalità tal-informazzjoni pprovduta minn partijiet terzi;

—	tikser restrizzjonijiet statutorji dwar l-iżvelar tal-informazzjoni;

—	tippreġudika l-investigazzjoni jew tiffaċilita t-twettiq ta' reat kriminali;

—	tpoġġi lill-Partijiet fi żvantaġġ f'negozjati kummerċjali jew ta' politika ma' oħrajn;

—	timpedixxi l-iżvilupp jew l-operat effettiv tal-politiki tal-Partijiet;

—	tfixkel l-immaniġġjar xieraq tal-Partijiet u tal-operazzjonijiet tagħhom.

A.3 –   Valutazzjoni tal-livell ta' informazzjoni sensittiva tal-ETS

Abbażi tal-klassifikazzjonijiet għall-Kunfidenzjalità u għall-Integrità skont it-taqsima A.2, u f'konformità mal-livelli ta' sensittività skont l-Anness III ta' dan il-Ftehim, il-livell ta' sensittività globali tal-informazzjoni jiġi determinat permezz tat-tabella skematika li ġejja:

Klassifikazzjoni tal-kunfidenzjalità Klassifikazzjoni tal-integrità	Baxxa	Medja	Għolja
Baxxa	Markatura tal-UE: SENSITIVE: ETS Joint Procurement Markatura CH : LIMITED: ETS	Markatura tal-UE/CH: SENSITIVE: ETS (jew  (*1) Markatura tal-UE: SENSITIVE: ETS Joint Procurement Markatura CH: LIMITED: ETS)	Markatura tal-UE/CH: SPECIAL HANDLING: ETS Critical
Medja	Markatura tal-UE/CH: SENSITIVE: ETS (jew  (*1) Markatura tal-UE: SENSITIVE: ETS Joint Procurement Markatura CH: LIMITED: ETS)	Markatura tal-UE/CH: SENSITIVE: ETS (jew  (*1) Markatura tal-UE/CH: SPECIAL HANDLING: ETS Critical)	Markatura tal-UE/CH: SPECIAL HANDLING: ETS Critical
Għolja	Markatura tal-UE/CH: SPECIAL HANDLING: ETS Critical	Markatura tal-UE/CH: SPECIAL HANDLING: ETS Critical	Markatura tal-UE/CH: SPECIAL HANDLING: ETS Critical