(1)

Fit-8 ta’ Settembru 2021, il-Belġju talab lill-Kummissjoni tiddeċiedi jekk prodott li jkun fih, kif indikat mill-manifattur, “l-oleoreżina tal-Capsicum ippressata bl-espellent” u li jiġi kkummerċjalizzat fil-Belġju mill-manifattur bħala repellent kontra l-qtates u l-klieb (“il-prodott”), huwiex prodott bijoċidali kif iddefinit fil-punt (a) tal-Artikolu 3(1) tar-Regolament (UE) Nru 528/2012.

(2)

Skont l-informazzjoni pprovduta mill-Belġju, il-prodott huwa sprej għall-użu fuq uċuħ esterni (bħal setaħ, mogħdijiet, ħitan, ċnut, eċċ.) sabiex il-qtates u l-klieb jitgerrxu minn dawk l-uċuħ. L-użu maħsub tal-prodott huwa differenti minn dak ta’ sprejs li fihom l-istess ingredjenti jew ingredjenti simili u maħsuba sabiex jintużaw kontra annimali aggressivi għall-iskop ta’ difiża personali.

(3)

F’konformità mal-Artikolu 3(2) tar-Regolament (UE) Nru 528/2012, id-definizzjoni ta’ “sustanza” għall-finijiet ta’ dak ir-Regolament hija dik stabbilita fl-Artikolu 3(1) tar-Regolament (KE) Nru 1907/2006 tal-Parlament Ewropew u tal-Kunsill (2), li jiddefinixxi sustanza bħala element kimiku u l-komposti tagħha fl-istat naturali jew miksuba bi kwalunkwe proċess ta’ manifattura.

(4)

Skont il-gwida tal-Aġenzija Ewropea għas-Sustanzi Kimiċi (3), l-organiżmi ħajjin sħaħ jew mejtin u mhux ipproċessati, jew partijiet minnhom (pereżempju, friegħi, frott jew fjuri eċċ.), ma jitqisux bħala sustanzi fit-tifsira tar-Regolament (KE) Nru 1907/2006.

(5)

“L-oleoreżina tal-Capsicum ippressata bl-espellent” hija reżina organika żejtnija miksuba bl-ippressar permezz ta’ espellent mill-frott tal-pjanti tal-ġeneru Capsicum. B’hekk, “l-oleoreżina tal-Capsicum ippressata bl-espellent” hija magħmula minn komposti ta’ elementi kimiċi fl-istat naturali, iżda mhix organiżmu ħaj sħiħ jew organiżmu mejjet u mhux ipproċessat jew partijiet minn tali organiżmu.

(6)

Jenħtieġ għalhekk li “l-oleoreżina tal-Capsicum ippressata bl-espellent” titqies bħala sustanza fit-tifsira tal-Artikolu 3(1) tar-Regolament (KE) Nru 1907/2006, u konsegwentement, f’konformità mal-punt (a) tal-Artikolu 3(2) tar-Regolament (UE) Nru 528/2012, jenħtieġ li titqies ukoll bħala sustanza fit-tifsira ta’ dak ir-Regolament.

(7)

F’ċerti ċirkostanzi, il-qtates u l-klieb jista’ jkollhom preżenza mhux mixtieqa jew effett ta’ detriment fuq il-bnedmin, l-attivitajiet tagħhom jew il-prodotti li jużaw jew li jipproduċu u, għalhekk, jistgħu jidħlu fid-definizzjoni ta’ organiżmu ta’ ħsara fit-tifsira tal-punt (g) tal-Artikolu 3(1) tar-Regolament (UE) Nru 528/2012. Peress li “l-oleoreżina tal-Capsicum ippressata bl-espellent” li jinsab fil-prodott huwa maħsub li jsarraf f’azzjoni kontra tali organiżmi ta’ ħsara, huwa sustanza attiva fit-tifsira tal-punt (c) tal-Artikolu 3(1) ta’ dak ir-Regolament.

(8)

Minħabba li l-prodott fih sustanza attiva u huwa maħsub biex igerrex organiżmi ta’ ħsara b’azzjoni li mhijiex sempliċiment fiżika jew mekkanika, jenħtieġ li l-prodott jitqies bħala prodott bijoċidali kif iddefinit fil-punt (a) tal-Artikolu 3(1) tar-Regolament (UE) Nru 528/2012.

(9)

It-tip 19 tal-prodotti, kif definit fl-Anness V tar-Regolament (UE) Nru 528/2012, jinkludi prodotti li jintużaw biex jikkontrollaw l-organiżmi ta’ ħsara billi jbegħduhom jew jattirawhom. Peress li l-prodott jintuża bl-intenzjoni li jiġu mbegħdin il-qtates u l-klieb, użu bħal dan jaqa’ taħt id-deskrizzjoni tat-tip 19 tal-prodotti.

(10)

Il-miżuri previsti f’din id-Deċiżjoni jikkonformaw mal-opinjoni tal-Kumitat Permanenti dwar il-Prodotti Bijoċidali,