ANNESS

Mudell għall-għoti ta’ informazzjoni lil ċittadini ta’ pajjiżi terzi dwar l-ipproċessar ta’ data personali fis-Sistema ta’ Dħul/Ħruġ

Is-sistema ta’ Dħul/Ħruġ (1) fiha rekords ta’ data personali dwar ċittadini ta’ pajjiżi terzi li jkunu deħlin fit-territorju tal-Istati Membri (2) għal soġġorn qasir (massimu ta’ 90 jum fi kwalunkwe perjodu ta’ 180 jum). Is-sistema bdiet topera fi [data]. Minn din id-data, l-informazzjoni dwar id-dħul u l-ħruġ tiegħek mit-territorju tal-Istati Membri, u, jekk applikabbli, informazzjoni dwar jekk iċċaħħadtx minn dħul, tiġi rreġistrata fis-Sistema ta’ Dħul/Ħruġ.

Għal dan il-għan, id-data tiegħek tinġabar u tiġi pproċessata f’isem [Awtorità tal-Istat Membru responsabbli għall-ipproċessar] (kontrollur(i)). Jekk jogħġbok ara hawn taħt id-dettalji ta’ kuntatt. Id-data personali tiegħek tiġi pproċessata għall-finijiet tal-ġestjoni tal-fruntieri, il-prevenzjoni tal-immigrazzjoni irregolari u l-iffaċilitar tal-ġestjoni tal-flussi migratorji. Dan huwa meħtieġ skont ir-Regolament (UE) 2017/2226 (3), speċifikament l-Artikoli 14, 16 sa 19 u 23 tal-Kapitolu II u l-Kapitolu III tar-Regolament.

Liema data tinġabar, tiġi rreġistrata u pproċessata?

Matul il-kontrolli fil-fruntieri esterni tal-Istati Membri, il-ġbir tad-data personali tiegħek huwa obbligatorju għall-eżami tal-kundizzjonijiet tad-dħul. Tinġabar u tiġi rreġistrata d-data personali li ġejja:

(1)	id-data elenkata fid-dokument tal-ivvjaġġar tiegħek; kif ukoll

(2)	id-data bijometrika: mix-xbieha tal-wiċċ u l-marki tas-swaba’ tiegħek (4).

Id-data dwarek tinġabar ukoll minn sorsi oħra, skont is-sitwazzjoni tiegħek:

(1)	is-Sistema ta’ Informazzjoni dwar il-Viża; id-data li tinsab fil-fajl personali tiegħek; kif ukoll

(2)	is-sistema Ewropea ta’ Informazzjoni u ta’ Awtorizzazzjoni għall-Ivvjaġġar, b’mod partikolari l-istatus tal-awtorizzazzjoni għall-ivvjaġġar tiegħek u l-istatus ta’ membru tal-familja tiegħek, jekk applikabbli.

X’jiġri jekk ma tipprovdix id-data bijometrika mitluba?

Jekk ma tipprovdix id-data bijometrika mitluba għar-reġistrazzjoni, il-verifika jew l-identifikazzjoni fis-Sistema ta’ Dħul/Ħruġ, ma titħalliex tidħol fil-fruntieri esterni.

Min għandu aċċess għad-data tiegħek?

L-Istati Membri jistgħu jaċċessaw id-data tiegħek għall-finijiet tal-ġestjoni tal-fruntieri, il-faċilitazzjoni tal-qsim tal-fruntieri, l-immigrazzjoni, u l-infurzar tal-liġi. L-Europol jista’ jaċċessa wkoll id-data tiegħek għal skopijiet ta’ infurzar tal-liġi. Taħt kundizzjonijiet stretti, id-data tiegħek tista’ tiġi ttrasferita wkoll lil Stat Membru, pajjiż terz jew organizzazzjoni internazzjonali elenkata fl-Anness I tar-Regolament (UE) 2017/2226 (5) għall-finijiet ta’ ritorn (6) jew infurzar tal-liġi (7).

Id-data tiegħek se tinħażen fis-Sistema ta’ Dħul/Ħruġ għat-tul ta’ żmien li ġej, u wara dan titħassar awtomatikament  (8):

(1)	ir-rekords ta’ kull rekord ta’ dħul, ħruġ jew ċaħda ta’ dħul jinħażnu għal tliet snin li jibdew mid-data tar-rekord tad-dħul, tal-ħruġ, taċ-ċaħda tad-dħul (9);

(2)	il-fajl individwali li fih id-data personali tiegħek jinħażen għal tliet snin u jum wieħed li jibda mid-data tal-aħħar rekord tal-ħruġ jew tar-rekord taċ-ċaħda tad-dħul fejn ma jiġi rreġistrat l-ebda dħul matul dak il-perjodu;

(3)	meta ma jkunx hemm rekord tal-ħruġ, id-data tiegħek tinħażen għal ħames snin li jibdew mid-data tal-iskadenza tas-soġġorn awtorizzat tiegħek.

Is-soġġorn awtorizzat li jifdal u s-soġġorn b’awtorizzazzjoni skaduta

Għandek id-dritt li tirċievi mingħand il-gwardja tal-fruntiera informazzjoni dwar it-tul massimu li jifdal tas-soġġorn awtorizzat tiegħek fit-territorju tal-Istati Membri. Tista’ tikkonsulta wkoll is-sit web li ġej [link għas-sit web pubbliku tal-EES] jew, fejn disponibbli, it-tagħmir installat fil-fruntieri biex tivverifika int stess kemm fadallek soġġorn awtorizzat.

Jekk taqbeż il-perjodu tas-soġġorn awtorizzat tiegħek, id-data tiegħek tiżdied awtomatikament ma’ lista ta’ persuni identifikati (lista ta’ persuni b’permanenza b’awtorizzazzjoni skaduta). Il-lista tista’ tiġi aċċessata mill-awtoritajiet nazzjonali kompetenti. Jekk tinsab fuq din il-lista ta’ persuni b’permanenza b’awtorizzazzjoni skaduta [il-konsegwenzi ta’ persuni b’permanenza b’awtorizzazzjoni skaduta għandhom jiżdiedu mill-Istati Membri] (10). Madankollu, jekk tista’ tipprovdi evidenza kredibbli lill-awtoritajiet kompetenti li inti qbiżt it-tul awtorizzat tas-soġġorn tiegħek minħabba ċirkostanzi imprevedibbli u serji, id-data personali tiegħek tista’ tiġi rettifikata jew ikkompletata fis-Sistema ta’ Dħul/Ħruġ u tista’ titneħħa mil-lista ta’ persuni b’permanenza b’awtorizzazzjoni skaduta.

Id-drittijiet tiegħek fir-rigward tal-ipproċessar ta’ data personali

Inti għandek id-drittijiet li ġejjin:

(1)	li titlob mingħand il-kontrollur aċċess għal data relatata miegħek;

(2)	li titlob li data mhux preċiża jew mhux kompluta relatata miegħek tiġi rettifikata jew tkun kompluta; kif ukoll

(3)	biex titlob li data personali pproċessata illegalment li tikkonċernak titħassar jew li l-ipproċessar tagħha jkun ristrett.

Jekk tixtieq teżerċita xi wieħed minn dawn id-drittijiet elenkati fil-punti minn (1) sa (3), għandek tikkuntattja lill-kontrollur tad-data jew lill-uffiċjal tal-protezzjoni tad-data indikat hawn taħt.

Dettalji ta’ kuntatt

Kontrollur(i) tad-data: [l-indirizz u d-dettalji ta’ kuntatt għandhom jimtlew mill-Istat Membru – il-kontrollur tad-data].

Uffiċjal(i) tal-protezzjoni tad-data: [l-indirizz u d-dettalji ta’ kuntatt għandhom jimtlew mill-Istat Membru].

F’konformità mat-tqassim tal-kompiti bejn l-awtoritajiet tal-Istati Membri u l-aġenziji Ewropej involuti, tista’ tressaq ilment quddiem:

Awtorità superviżorja tal-[Istat Membru] li hija responsabbli mill-ipproċessar tad-data tiegħek (eż. jekk inti tallega li rreġistraw id-data tiegħek b’mod skorrett): [Informazzjoni speċifika għall-Istat Membru li għandha tiġi speċifikata – l-indirizz u d-dettalji ta’ kuntatt]

Il-kontrollur Ewropew għall-Protezzjoni tad-Data għal kwistjonijiet ta’ pproċessar tad-data mill-Aġenziji Ewropej: [id-dettalji ta’ kuntatt għandhom jiġu speċifikati – l-indirizz u d-dettalji ta’ kuntatt]

[Aktar informazzjoni mill-Istati Membri dwar id-drittijiet tas-suġġetti tad-data jew il-possibbiltà ta’ assistenza mill-awtoritajiet superviżorji]. Għal aktar informazzjoni jekk jogħġbok ikkonsulta s-sit web pubbliku tas-Sistema ta’ Dħul/Ħruġ [żid il-link/l-isem].

---

(1)  Ir-Regolament (UE) 2017/2226 li jistabbilixxi Sistema ta’ Dħul/Ħruġ (EES) biex tiġi rreġistrata data dwar id-dħul u l-ħruġ u data dwar iċ-ċaħda tad-dħul ta’ ċittadini ta’ pajjiżi terzi li jaqsmu l-fruntieri esterni tal-Istati Membri u li jiddetermina l-kondizzjonijiet għall-aċċess għall-EES għal raġunijiet ta’ infurzar tal-liġi, u li jemenda l-Konvenzjoni li timplimenta l-Ftehim ta’ Schengen u r-Regolamenti (KE) Nru 767/2008 u (UE) Nru 1077/2011

(2)  L-Awstrija, il-Belġju, ir-Repubblika Ċeka, id-Danimarka, l-Estonja, il-Finlandja, Franza, il-Ġermanja, il-Greċja, l-Ungerija, l-Iżlanda, l-Italja, il-Latvja, il-Liechtenstein, il-Litwanja, il-Lussemburgu, Malta, in-Netherlands, in-Norveġja, il-Polonja, il-Portugall, is-Slovakkja, is-Slovenja, Spanja, l-Iżvezja, u l-Iżvizzera.

(3)  Ir-Regolament (UE) 2017/2226 tal-Parlament Ewropew u tal-Kunsill tat-30 ta’ Novembru 2017 li jistabbilixxi Sistema ta’ Dħul/Ħruġ (EES) biex tiġi rreġistrata data dwar id-dħul u l-ħruġ u data dwar iċ-ċaħda tad-dħul ta’ ċittadini ta’ pajjiżi terzi li jaqsmu l-fruntieri esterni tal-Istati Membri u li jiddetermina l-kundizzjonijiet għall-aċċess għall-EES għal raġunijiet ta’ infurzar tal-liġi, u li jemenda l-Konvenzjoni li timplimenta l-Ftehim ta’ Schengen u r-Regolamenti (KE) Nru 767/2008 u (UE) Nru 1077/2011 (ĠU L 327, 9.12.2017, p. 20).

(4)  Jekk jogħġbok innota li d-data tal-marki tas-swaba’ ta’ ċittadini ta’ pajjiżi terzi li ma għandhomx bżonn viża biex jidħlu fiż-żona Schengen u d-detenturi ta’ Dokumenti ta’ Tranżitu Faċilitati se tinħażen ukoll fis-Sistema ta’ Dħul/Ħruġ. Jekk teħtieġ viża biex tidħol fiż-żona Schengen, il-marki tas-swaba’ tiegħek diġà se jinħażnu fis-Sistema ta’ Informazzjoni dwar il-Viża bħala parti mill-fajl tiegħek hemmhekk u mhux se jerġgħu jinħażnu fis-Sistema ta’ Dħul/Ħruġ.

(5)  L-organizzazzjoni tan-NU, l-Organizzazzjoni Internazzjonali għall-Migrazzjoni (Organization for Migration, IOM) jew il-Kumitat Internazzjonali tas-Salib l-Aħmar.

(6)  L-Artikolu 41(1) u (2) u l-Artikolu 42

(7)  L-Artikolu 41(6).

(8)  Jekk int soġġett għal ħtieġa ta’ viża, il-marki tas-swaba’ tiegħek ma jinħażnux fis-sistema ta’ Dħul/Ħruġ peress li huma diġà maħżuna fis-Sistema ta’ Informazzjoni dwar il-Viża.

(9)  Fil-każ ta’ ċittadini ta’ pajjiżi terzi li huma membri tal-familja ta’ ċittadini mobbli tal-UE, taż-ŻEE jew tal-Iżvizzera (jiġifieri ċittadini tal-UE, taż-ŻEE jew Żvizzeri li jivvjaġġaw lejn Stat li mhuwiex l-Istat tan-nazzjonalità tagħhom jew li diġà jirrisjedu fih), u li qed jakkumpanjaw jew jingħaqdu ma’ ċittadin tal-UE, taż-ŻEE jew tal-Iżvizzera, kull rekord ta’ dħul, ħruġ jew ċaħda tad-dħul jinħażen għal sena wara d-data tar-rekord tal-ħruġ jew tar-rekord taċ-ċaħda tad-dħul.

(10)  Il-kalkolu tat-tul tas-soġġorn awtorizzat u l-ħolqien ta’ twissijiet lill-Istati Membri meta jkun skada s-soġġorn awtorizzat ma japplikawx għal ċittadini ta’ pajjiżi terzi li huma membri tal-familja ta’ ċittadini mobbli tal-UE, taż-ŻEE jew tal-Iżvizzera (jiġifieri ċittadini tal-UE, taż-ŻEE jew Żvizzeri li jivvjaġġaw lejn Stat ieħor li ma jkunx l-Istat tan-nazzjonalità tagħhom jew li diġà jirrisjedu fih) u qed jakkumpanjaw jew jingħaqdu ma’ ċittadin tal-UE, taż-ŻEE jew Żvizzeru