(1)

Fl-10 ta’ Diċembru 2021, f’konformità mal-Artikolu 7(4) tad-Direttiva (UE) 2016/797, Franza ssottomettiet talba lill-Kummissjoni għan-nuqqas ta’ applikazzjoni ta’ ċerti dispożizzjonijiet stabbiliti fl-ispeċifikazzjonijiet tekniċi tal-interoperabbiltà (“TSI”) li tinsab fl-Anness tar-Regolament tal-Kummissjoni (UE) Nru 1302/2014 (2) (“LOC&PAS TSI”), fit-TSI li tinsab fl-Anness tar-Regolament tal-Kummissjoni (UE) Nru 1300/2014 (3) (“PRM TSI”) u fit-TSI li tinsab fl-Anness tar-Regolament tal-Kummissjoni (UE) Nru 1304/2014 (4) (“NOI TSI”), għal proġett ta’ titjib ta’ materjal mobbli, fir-rigward ta’ 19-il trainset iddisinjati biex jitħaddmu fuq in-network ferrovjarju Franċiż.

(2)

It-talba ġiet sottomessa abbażi tal-Artikolu 7(1), il-punt (c) tad-Direttiva (UE) 2016/797, jiġifieri n-nuqqas ta’ vijabbiltà ekonomika tal-proġett meta jitwettaq it-titjib tat-trainsets ikkonċernati.

(3)

It-talba tikkonċerna r-rikostruzzjoni ta’ 19-il trainset li l-magni u l-kowċis tagħhom kienu ġew separati meta ġew prodotti fl-2006. Minħabba d-domanda tas-suq f’dak iż-żmien, il-lokomottivi ta’ dawk it-trainsets tħaddmu, u għadhom qed jitħaddmu, bħala kowċ koakkopjat tat-tip “Réseau 1N” u l-kowċis ta’ dawk it-trainsets tħaddmu bħala lokomottivi koakkopjati tat-tip “Réseau”.

(4)

Illum, dawk it-trainsets qed joqorbu għall-waqfa ta’ manutenzjoni ta’ nofs ħajja tagħhom. Huwa ppjanat intervent ta’ manutenzjoni biex jiġi żgurat it-tħaddim sikur tagħhom għal 16-il sena oħra. L-intervent ta’ manutenzjoni jipprevedi l-akkoppjament mill-ġdid tal-lokomottivi u l-kowċis oriġinali. Il-fażi ta’ ħidma tat-titjib għandha sseħħ bejn l-2022 u l-2025 u l-ewwel trainsets ikunu daħlu fil-workshops fi Frar 2022. L-għan huwa li sa Diċembru 2023 tinkiseb l-awtorizzazzjoni tat-tip għad-19-il trainset koperti mit-titjib. Din se tkun segwita minn awtorizzazzjoni dwar il-konformità mat-tip għal kull trainset.

(5)

L-istrateġija ta’ awtorizzazzjoni għall-proċess ta’ konfigurazzjoni mill-ġdid hija bbażata fuq awtorizzazzjoni “ġdida”, bħala varjant tat-tip TGV Duplex, li diġà kien awtorizzat qabel. F’tali kundizzjonijiet, il-partijiet modifikati biss tal-kowċis se jkollhom jinġiebu f’konformità mat-TSI. Il-lokomottivi mhuma soġġetti għall-ebda bidla, iżda huma meqjusa bħala elementi ġodda għat-tip TGV Duplex u l-awtorizzazzjoni tagħhom għandha titqies bħala “l-ewwel” awtorizzazzjoni li teħtieġ demostrazzjoni ta’ konformità sħiħa mat-TSIs attwali LOC&PAS, NOI u PRM.

(6)

Il-lokomottivi u l-kowċis tad-19-il trainset soġġetti għat-titjib u għall-konfigurazzjoni mill-ġdid jikkonformaw mal-istandards u mat-TSIs applikabbli fiż-żmien tal-produzzjoni tagħhom. Mill-2006, it-TSI rilevanti kienu soġġetti għal żvilupp u għal rekwiżiti msaħħa. In-nuqqas ta’ applikazzjoni hija mitluba bil-ħsieb li fejn it-TSIs attwali jiġu applikati għal trainsets eżistenti, dawn ikunu jimplikaw kostijiet sinifikanti addizzjonali ta’ titjib u konfigurazzjoni mill-ġdid, kif ukoll dewmien konsiderevoli biex it-trainsets jerġgħu jibdew jitħaddmu.

(7)

Barra minn hekk, l-applikazzjoni tal-punti 4.2.3.1, 4.2.8.2.6, 4.2.10.4.4, 4.2.3.3.2, 4.2.3.7. u 4.2.8.2.9 tal-Anness tar-Regolament (UE) Nru 1302/2014, il-punti 4.2.1, 4.2.2 u 4.2.3 tal-Anness tar-Regolament (UE) Nru 1304/2014 u l-punt 4.2.2.1. tal-Anness tar-Regolament (UE) Nru 1300/2014 tirrikjedi li l-fornitur iwettaq studji kbar dwar l-iżvilupp, l-allokazzjoni tar-riżorsi u kostijiet materjali addizzjonali li jixħtu dubju fuq il-vijabbiltà ekonomika tal-proġett, fid-dawl li l-kost unitarju stmat tal-proġett jiżdied b’aktar minn 60 %.

(8)

Il-kost supplimentari ma jistax jiġi assorbit mid-19-il trainset mingħajr ma jiġu ddubitati r-rilevanza u l-vijabbiltà ekonomiċi tal-proġett ta’ titjib u konfigurazzjoni mill-ġdid.

(9)

Fil-qafas tal-proġett, il-konformità ma’ dispożizzjonijiet oħra tat-TSIs attwali se tiġi żgurata, inkluż il-modifika tat-tidwil fuq ġewwa, tal-pjattaforma fuq ġewwa u tal-ispazji tal-passiġġieri, tat-twieqi ta’ quddiem, tal-lampi u tal-lampi ta’ kontroll, tal-couplings ta’ emerġenza, tal-apparati ta’ twissija li tinstema’, tas-sinjalar fuq ġewwa, tal-pittogrammi u tal-informazzjoni tattili u tal-ġeneratur tal-ħoss tal-kabina f’konformità mal-punti 4.2.9.1.8, 4.2.9.2.1, 4.2.7.1.1 sa 4.2.7.1.4, 4.2.7.2.1 u 4.2.2.7.2 tal-Anness tar-Regolament (UE) Nru 1302/2014 u mal-punt 4.2.2.4 tal-Anness tar-Regolament (UE) Nru 1300/2014.

(10)

Il-proġett se jiżgura wkoll li d-19-il trainset jikkonformaw bis-sħiħ mar-Regolament tal-Kummissjoni (UE) 2016/919 (5), inkluż titjib għal-Linja Bażi 3 tal-ERTMS.

(11)

Jekk it-talba għan-nuqqas ta’ applikazzjoni ma tiġix aċċettata, hemm riskju li l-kapaċità tat-trasport fiż-żona tal-użu futur tad-19-il trainset tiġi affettwata għad-detriment tal-passiġġieri tal-ferrovija. Il-proġett jista’ jdum tliet snin oħra biex jitlesta. Jekk il-proġett jitwaqqaf il-ferroviji jitneħħew mis-servizz, u dan ikollu effett fuq l-interessi kummerċjali tal-operatur fl-2023, matul l-irkupru ta’ wara l-COVID-19 tas-settur ferrovjarju. Huwa stmat li dak it-telf fid-dħul għall-operatur huwa aktar minn EUR 100 miljun.

(12)

Ir-rappreżentanti Franċiżi kkondividew informazzjoni dwar it-talba għan-nuqqas ta’ applikazzjoni mal-membri tal-Kumitat imsemmi fl-Artikolu 51(1) tad-Direttiva (UE) 2016/797 matul it-93 laqgħa tiegħu.

(13)

Kwalunkwe impatt potenzjali fuq is-sikurezza tan-nuqqas ta’ applikazzjoni ta’ ċerti dispożizzjonijiet tat-TSIs LOC & PAS, PRM u NOI huwa mmitigat mill-fatt li d-19-il trainset kkonfigurati mill-ġdid diġà wrew konformità mar-rekwiżiti ta’ sikurezza rispettivi applikabbli fiż-żmien tal-awtorizzazzjoni oriġinali tagħhom fl-2006 u minn dak iż-żmien tħaddmu b’mod sikur.

(14)

Fid-dawl ta’ dak li ntqal hawn fuq, il-Kummissjoni tqis li l-kundizzjonijiet stabbiliti fl-Artikolu 7(1)(c) u fl-Artikolu 7(4) tad-Direttiva (UE) 2016/797 jenħtieġ li jitqiesu ssodisfati għall-magni u l-kowċis tad-19-il trainset ikkonċernati. Għalhekk, it-talba sottomessa minn Franza għan-nuqqas ta’ applikazzjoni tal-punti 4.2.3.1, 4.2.8.2.6, 4.2.10.4.4, 4.2.3.3.2, 4.2.3.7 u 4.2.8.2.9 tal-Anness tar-Regolament (UE) Nru 1302/2014, tal-punti 4.2.1, 4.2.2. u 4.2.3 tal-Anness tar-Regolament (UE) Nru 1304/2014 u tal-punt 4.2.2.1 tal-Anness tar-Regolament (UE) Nru 1300/2014, filwaqt li jiġi mmitigat in-nuqqas ta’ applikazzjoni ta’ dawk il-punti bl-applikazzjoni tad-dispożizzjonijiet fis-seħħ fiż-żmien tal-awtorizzazzjoni oriġinali tagħhom bħala dispożizzjonijiet alternattivi, jenħtieġ li tiġi aċċettata.

(15)

Il-miżuri previsti f’din id-Deċiżjoni huma skont l-opinjoni tal-Kumitat imsemmi fl-Artikolu 51(1) tad-Direttiva (UE) 2016/797,