(1)

L-Artikolu 8b(1) tad-Direttiva 2008/105/KE jipprevedi l-istabbiliment ta’ lista ta’ sorveljanza ta’ sustanzi li għalihom għandha tinġabar data tal-monitoraġġ minn madwar l-Unjoni kollha għall-finijiet ta’ appoġġ ta’ eżerċizzji futuri ta’ prijoritizzazzjoni f’konformità mal-Artikolu 16(2) tad-Direttiva 2000/60/KE tal-Parlament Ewropew u tal-Kunsill (2). L-ewwel lista ta’ sorveljanza ta’ dan it-tip kellha tinkludi indikazzjoni tal-matriċijiet ta’ monitoraġġ u metodi possibbli ta’ analiżi li ma jinvolvux kostijiet eċċessivi għal kull sustanza.

(2)

Is-sustanzi fil-lista ta’ sorveljanza jridu jintgħażlu minn fost dawk li għalihom l-informazzjoni disponibbli tindika li jistgħu joħolqu riskju sinifikanti, fil-livell tal-Unjoni, għall-ambjent akkwatiku jew permezz tiegħu, iżda li għalihom id-data tal-monitoraġġ ma tkunx biżżejjed biex wieħed jasal għal konklużjoni dwar ir-riskju reali maħluq. Jenħtieġ li s-sustanzi ta’ tossiċità kbira, li jintużaw f’ħafna Stati Membri u li jintremew fl-ambjent akkwatiku iżda li rari jew qatt ma jsirilhom monitoraġġ, jiġu kkunsidrati biex jiġu inklużi fil-lista ta’ sorveljanza. Dak il-proċess tal-għażla jenħtieġ li jqis l-informazzjoni elenkata fl-Artikolu 8b(1), il-punti (a) sa (e), tad-Direttiva 2008/105/KE, filwaqt li jiġu kkunsidrati b’mod partikolari s-sustanzi niġġiesa emerġenti.

(3)

Il-monitoraġġ tas-sustanzi fil-lista ta’ sorveljanza jenħtieġ li jiġġenera data ta’ kwalità għolja dwar il-konċentrazzjonijiet tagħhom fl-ambjent akkwatiku, li tkun tajba biex, f’eżerċizzju separat ta’ rieżami skont l-Artikolu 16(4) tad-Direttiva 2000/60/KE, tappoġġa l-valutazzjonijiet tar-riskju li fuqhom tistrieħ l-identifikazzjoni tas-sustanzi ta’ prijorità. F’dak ir-rieżami, jenħtieġ li jiġu kkunsidrati s-sustanzi li jinstab li joħolqu riskju sinifikanti biex jiġu inklużi fil-lista tas-sustanzi ta’ prijorità. Imbagħad, jiġi stabbilit ukoll standard tal-kwalità ambjentali li l-Istati Membri jridu jilħqu. Il-proposti biex sustanza tiġi inkluża fil-lista tas-sustanzi ta’ prijorità huma soġġetti għal valutazzjoni tal-impatt.

(4)

L-ewwel lista ta’ sorveljanza ta’ sustanzi ġiet stabbilita fid-Deċiżjoni ta’ Implimentazzjoni tal-Kummissjoni (UE) 2015/495 (3) u kienet tinkludi għaxar sustanzi jew gruppi ta’ sustanzi, flimkien ma’ indikazzjoni tal-matriċi tal-monitoraġġ, metodi analitiċi possibbli li ma jinvolvux kostijiet eċċessivi, u limiti massimi aċċettabbli ta’ detezzjoni tal-metodu.

(5)

Skont l-Artikolu 8b(2) tad-Direttiva 2008/105/KE, il-Kummissjoni trid taġġorna l-lista ta’ sorveljanza kull sentejn. Meta taġġorna l-lista, il-Kummissjoni trid tneħħi kwalunkwe sustanza li għaliha tista’ tiġi konkluża valutazzjoni bbażata fuq ir-riskju kif imsemmi fl-Artikolu 16(2) tad-Direttiva 2000/60/KE mingħajr data tal-monitoraġġ addizzjonali.

(6)

Il-lista ta’ sorveljanza ġiet aġġornata fl-2018 kif stabbilit fid-Deċiżjoni ta’ Implimentazzjoni tal-Kummissjoni (UE) 2018/840 (4) bit-tneħħija ta’ ħames sustanzi u biż-żieda ta’ tliet sustanzi, b’tali mod li l-lista kien fiha tmien sustanzi jew gruppi ta’ sustanzi.

(7)

Il-lista ta’ sorveljanza kompliet tiġi aġġornata fl-2020 kif stabbilit fid-Deċiżjoni ta’ Implimentazzjoni tal-Kummissjoni (UE) 2020/1161 (5) bit-tneħħija ta’ ħames sustanzi jew gruppi ta’ sustanzi u biż-żieda ta’ sitt sustanzi, b’tali mod li l-lista kien fiha disa’ sustanzi jew gruppi ta’ sustanzi.

(8)

Skont l-Artikolu 8b(2) tad-Direttiva 2008/105/KE, it-tul ta’ żmien ta’ perjodu ta’ monitoraġġ kontinwu ta’ lista ta’ sorveljanza għal xi sustanza individwali ma għandux jaqbeż l-erba’ snin. Għalhekk, l-obbligu ta’ monitoraġġ tal-lista ta’ sorveljanza għat-tliet sustanzi jew gruppi ta’ sustanzi li kien ilhom fil-lista mill-2018, jiġifieri l-metaflumiżon, l-amoksiċillina u ċ-ċiprofloksaċina, spiċċa fl-2022. Id-data tal-monitoraġġ miksuba se tiġi kkunsidrata fil-kuntest tal-eżerċizzju ta’ prijoritizzazzjoni msemmi fl-Artikolu 16(2) tad-Direttiva 2000/60/KE.

(9)

Abbażi tad-data tal-monitoraġġ miksuba għas-sitt sustanzi jew gruppi ta’ sustanzi l-oħra mill-2020, jiġifieri s-sulfametoksażol, it-trimetoprim, il-venlafaksina u l-metabolita tagħha O-desmetilvenlafaksina, il-grupp ta’ għaxar komposti ażoliċi (il-farmaċewtiċi klotrimażolu, flukonażol u mikonażol u l-pestiċidi imażalil, ipkonażol, metkonażol, penkonażol, prokloraż, tebukonażol u tetrakonażol) u l-fungiċidi famoksadon u dimossistrobina, il-Kummissjoni kkonkludiet li ma nkisbitx biżżejjed data tal-monitoraġġ ta’ kwalità għolja u li għalhekk jenħtieġ li dawk is-sustanzi jew gruppi ta’ sustanzi jibqgħu fil-lista ta’ sorveljanza.

(10)

Matul l-2021, il-Kummissjoni ġabret data dwar firxa ta’ sustanzi oħra li jistgħu jiġu inklużi fil-lista ta’ sorveljanza. Qieset it-tipi differenti ta’ informazzjoni rilevanti msemmija fl-Artikolu 8b(1) tad-Direttiva 2008/105/KE, u kkonsultat lil esperti mill-Istati Membri u lil gruppi tal-partijiet ikkonċernati. Meta jkun hemm dubju dwar it-tossiċità ta’ xi sustanzi, jew meta s-sensittività, l-affidabbiltà jew il-komparabbiltà tal-metodi tal-monitoraġġ disponibbli ma jkunux adegwati, jenħtieġ li dawk is-sustanzi ma jiġux inklużi fil-lista ta’ sorveljanza. Il-fungiċida ażossistrobina, l-erbiċida diflufenikan, l-insettiċida u l-farmaċewtiku veterinarju fipronil, l-antibijotiċi klindamiċina u ofloksaċina, il-farmaċewtiku uman metformina u l-metabolita tiegħu gwanilurea, u grupp ta’ tliet aġenti għall-protezzjoni mix-xemx (il-metossidibenżojlmetan tal-butil, magħruf ukoll bħala l-avobenżon; l-ottokrilen; u l-benżofenon-3, magħruf ukoll bħala l-ossibenżon) ġew identifikati bħala kandidati xierqa. Iż-żieda tal-farmaċewtiċi hija konsistenti mal-Approċċ Strateġiku tal-UE għall-Farmaċewtiċi fl-Ambjent (6), u l-inklużjoni taż-żewġ antibijotiċi hija konsistenti wkoll mal-Pjan ta’ Azzjoni Ewropew “Saħħa Waħda” kontra r-Reżistenza għall-Antimikrobiċi (AMR) (7), li jappoġġa l-użu tal-lista ta’ sorveljanza biex “jittejjeb l-għarfien dwar l-okkorrenza u t-tixrid tal-antimikrobiċi fl-ambjent”.

(11)

F’konformità mal-Artikolu 8b(1) tad-Direttiva 2008/105/KE, il-Kummissjoni identifikat xi metodi possibbli ta’ analiżi għas-sustanzi proposti. Fir-rigward tas-sustanzi miżmuma fil-lista, jenħtieġ li għal kull sustanza, inkluż kull sustanza individwali fi grupp, il-limitu ta’ detezzjoni tal-metodu jkun baxx mill-inqas daqs il-konċentrazzjoni mingħajr effett prevista u speċifika għas-sustanza fil-matriċi rilevanti. Fir-rigward tas-sustanzi l-ġodda miżjuda, għal kull sustanza, inkluż kull sustanza individwali fi grupp, jenħtieġ li l-limitu ta’ kwantifikazzjoni tal-metodu jkun baxx mill-inqas daqs il-konċentrazzjoni mingħajr effett prevista u speċifika għas-sustanza fil-matriċi rilevanti.

(12)

Is-sulfametoksażol u t-trimetoprim, spiss iżda mhux dejjem, jintużaw f’kombinament minħabba l-effetti sinerġistiċi ddikjarati tagħhom; dawn jistgħu u jenħtieġ li jkomplu jiġu analizzati flimkien anki jekk ma jiġux raggruppati flimkien fil-lista. Il-venlafaksina u l-metabolita tagħha huma raggruppati minħabba l-effetti potenzjalment addittivi tagħhom; dawn jistgħu u jenħtieġ li jkomplu jiġu analizzati flimkien. Is-sustanzi ażoliċi huma raggruppati minħabba li għandhom l-istess mod ta’ azzjoni u jista’ jkollhom ukoll effetti addittivi; dawn jistgħu u jenħtieġ li wkoll ikomplu jiġu analizzati flimkien.

(13)

L-ażossistrobina huwa inkluż flimkien mad-dimossistrobina minħabba li għandu l-istess mod ta’ azzjoni; dawn is-sustanzi jistgħu u jenħtieġ li jiġu analizzati flimkien. Il-metformina u l-metabolita tagħha jista’ jkollhom effetti addittivi; dawn jistgħu u jenħtieġ li jiġu analizzati flimkien. It-tliet aġenti għall-protezzjoni mix-xemx huma raggruppati minħabba li għandhom l-istess mod ta’ azzjoni u jista’ jkollhom ukoll effetti addittivi, u għalhekk jistgħu u jenħtieġ li jiġu analizzati flimkien ukoll.

(14)

Il-metodi analitiċi speċifikati fil-lista ta’ sorveljanza mhumiex ikkunsidrati li jinvolvu kostijiet eċċessivi. Jekk fil-ġejjieni ikun hemm xi informazzjoni ġdida li twassal għal tnaqqis fil-konċentrazzjoni mingħajr effett prevista għal xi waħda mis-sustanzi l-ġodda miżjuda, il-limitu massimu aċċettabbli ta’ kwantifikazzjoni tal-metodu għal dawk is-sustanzi jaf ikollu jitnaqqas sakemm dawn jibqgħu fil-lista.

(15)

L-Artikolu 8b tad-Direttiva 2008/105/KE jispeċifika, inter alia, il-kundizzjonijiet u l-modalitajiet għall-monitoraġġ tas-sustanzi inklużi fil-lista ta’ sorveljanza u għar-rappurtar tar-riżultati tal-monitoraġġ mill-Istati Membri. Dan jispeċifika b’mod partikolari li, fl-għażla tal-istazzjonijiet ta’ monitoraġġ rappreżentattivi, il-frekwenza tal-monitoraġġ u l-ħin għal kull sustanza, l-Istati Membri jridu jqisu x-xejriet tal-użu u l-okkorrenza possibbli tas-sustanza. Għalkemm il-frekwenza minima ta’ monitoraġġ hija darba fis-sena, jenħtieġ li l-Istati Membri jikkunsidraw, għas-sustanzi kollha, frekwenza ta’ monitoraġġ ta’ mill-inqas darbtejn fis-sena biex jitqies l-użu varjabbli tagħhom, biex jiġi żgurat li tinġabar data ta’ kwalità għolja biżżejjed, u biex b’hekk il-mekkaniżmu tal-lista ta’ sorveljanza jkun jista’ jipprovdi appoġġ effettiv kif xieraq għall-proċessi sussegwenti ta’ valutazzjoni tar-riskju.

(16)

Għall-komparabbiltà, jenħtieġ li jsir monitoraġġ tas-sustanzi kollha f’kampjuni sħaħ tal-ilma.

(17)

Għal raġunijiet ta’ ċarezza legali, jenħtieġ li l-Anness tad-Deċiżjoni ta’ Implimentazzjoni (UE) 2020/1161 jiġi sostitwit fl-intier tiegħu. Għalhekk, jenħtieġ li d-Deċiżjoni ta’ Implimentazzjoni (UE) 2020/1161 titħassar.

(18)

Il-miżuri previsti f’din id-Deċiżjoni huma f’konformità mal-opinjoni tal-Kumitat stabbilit bl-Artikolu 21(1) tad-Direttiva 2000/60/KE,