(1)

Fil-31 ta’ Mejju 2021, permezz tad-deċiżjoni tagħha l-WHA74(16), l-74 Assemblea Dinjija tas-Saħħa (WHA) appellat li ssir sessjoni speċjali sabiex jiġu kkunsidrati l-benefiċċji li tiġi żviluppata konvenzjoni, ftehim jew strument internazzjonali ieħor tal-Organizzazzjoni Dinjija tas-Saħħa (WHO) dwar it-tħejjija u r-rispons għall-pandemiji bil-ħsieb li jiġi stabbilit proċess intergovernattiv biex tiġi abbozzata u nnegozjata tali konvenzjoni, ftehim jew strument;

(2)

Fl-1 ta’ Diċembru 2021, permezz tad-deċiżjoni tagħha SSA2(5), it-tieni sessjoni speċjali tad-WHA iddeċidiet li tistabbilixxi korp intergovernattiv tan-negozjati li jkun miftuħ għall-Istati Membri, il-Membri Assoċjati u l-organizzazzjonijiet reġjonali għall-integrazzjoni ekonomika kollha tad-WHO biex tiġi abbozzata u nnegozjata konvenzjoni, ftehim jew strument internazzjonali ieħor dwar il-prevenzjoni, it-tħejjija u r-rispons għall-pandemiji bil-ħsieb ta’ adozzjoni skont l-Artikolu 19, jew skont dispożizzjonijiet oħra tal-Kostituzzjoni tad-WHO kif jitqies xieraq mill- korp intergovernattiv tan-negozjati.

(3)

Fl-20 ta’ Jannar 2022 id-Direttur Ġenerali tad-WHO kkomunika lill-Istati Parti t-test ta’ proposta għall-emenda tar-Regolamenti Internazzjonali tas-Saħħa (2005) (IHR) propost mill-Istati Uniti tal-Amerka skont l-Artikolu 55(1) tal-IHR.

(4)

Il-150 sessjoni tal-Bord Eżekuttiv tad-WHA li saret mill-24 sad-29 ta’ Jannar 2022, iddeċidiet li tħeġġeġ lill-Istati Membri tal-WHO u, fejn applikabbli, l-organizzazzjonijiet reġjonali għall-integrazzjoni ekonomika, biex jieħdu l-miżuri kollha xierqa biex jiġu kkunsidrati emendi potenzjali għall-IHR.

(5)

L-Unjoni, fir-rigward ta’ kwistjonijiet li jaqgħu fil-kompetenza tagħha, jenħtieġ li tipparteċipa, flimkien mal-Istati Membri tagħha, fir-rigward ta’ kwistjonijiet li jaqgħu fil-kompetenza tagħhom, fin-negozjati għal tali konvenzjoni, ftehim jew strument ieħor dwar il-prevenzjoni, it-tħejjija u r-rispons għall-pandemiji, kif ukoll emendi komplementari għall-IHR, kif previst fit-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea (TFUE).

(6)

F’konformità mal-Artikolu 6 u l-Artikolu 168(5) TFUE, fil-qasam tal-protezzjoni u t-titjib tas-saħħa tal-bniedem, inkluż fir-rigward tal-ġlieda kontra l-flaġelli ewlenin tas-saħħa transfruntiera kif ukoll il-monitoraġġ, it-twissija bikrija ta’ u l-ġlieda kontra theddid transfruntier serju għas-saħħa, l-azzjoni tal-Unjoni jenħtieġ li tappoġġa, tikkoordina jew tissupplimenta l-azzjonijiet tal-Istati Membri.

(7)

F’konformità mal-Artikolu 168(7) TFUE, ir-responsabbiltajiet tal-Istati Membri għad-definizzjoni tal-politika tas-saħħa tagħhom u għall-organizzazzjoni u t-twassil tas-servizzi tas-saħħa u l-kura medika, inkluż il-ġestjoni tas-servizzi tas-saħħa u l-kura medika u l-allokazzjoni tar-riżorsi assenjati lilhom, jenħtieġ li jiġu rrispettati bis-sħiħ matul il-proċess ta’ negozjati.

(8)

Din id-Deċiżjoni hija mingħajr preġudizzju għat-tqassim tal-kompetenzi bejn l-Unjoni u l-Istati Membri tagħha jew għall-parteċipazzjoni tal-Istati Membri fin-negozjati f’konformità mat-Trattati.

(9)

F’konformità mal-prinċipju tal-kooperazzjoni leali, il-Kummissjoni u l-Istati Membri jenħtieġ li jikkooperaw mill-qrib matul il-proċess ta’ negozjati, inkluż permezz ta’ kuntatti regolari mal-esperti tekniċi u r-rappreżentanti tal-Istati Membri f’Ġinevra.

(10)

Għal dan il-għan, l-arranġamenti prattiċi li ser japplikaw fit-tmexxija tan-negozjati jenħtieġ li jiġu definiti kemm jista’ jkun malajr, b’mod partikolari bil-ħsieb li tiġi żgurata kooperazzjoni effettiva bejn in-negozjatur tal-Unjoni u l-Istati Membri, mingħajr preġudizzju għar-rwol tal-kumitat speċjali skont it-tifsira tal-Artikolu 218(4) TFUE.

(11)

Il-Kunsill jenħtieġ li jirrevedi u jiżviluppa aktar id-direttivi ta’ negozjati stabbiliti fl-addendum għal din id-deċiżjoni kif xieraq skont l-iżvilupp tan-negozjati.

(12)

In-negozjati ser isiru fil-kuntest tad-WHO,