(1)

Dazju anti-dumping japplika fuq l-importazzjonijiet ta’ partijiet essenzjali tar-roti li joriġinaw mir-Repubblika tal-Poplu taċ-Ċina (“iċ-Ċina”) (“id-dazju estiż”) bħala riżultat tal-estensjoni tad-dazju anti-dumping impost fuq l-importazzjonijiet ta’ roti li joriġinaw miċ-Ċina permezz tar-Regolament tal-Kunsill (KE) Nru 71/97 (4).

(2)

Skont l-Artikolu 3 tar-Regolament (KE) Nru 71/97, il-Kummissjoni tingħata s-setgħa tadotta l-miżuri meħtieġa biex tawtorizza l-eżenzjoni tal-importazzjonijiet ta’ partijiet essenzjali tar-roti li ma jevitawx id-dazju anti-dumping.

(3)

Dawn il-miżuri ta’ implimentazzjoni huma stabbiliti fir-Regolament tal-Kummissjoni (KE) Nru 88/97 (“ir-Regolament ta’ eżenzjoni”) li jistabbilixxi s-sistema ta’ eżenzjoni speċifika.

(4)

Fuq din il-bażi, il-Kummissjoni eżentat mid-dazju estiż għadd ta’ impriżi tal-assemblaġġ tar-roti.

(5)

Kif previst fl-Artikolu 16(2) tar-Regolament ta’ eżenzjoni, il-Kummissjoni ppubblikat f’Il-Ġurnal Uffiċjali tal-Unjoni Ewropea listi sussegwenti tal-partijiet eżentati (5).

(6)

Id-Deċiżjoni ta’ Implimentazzjoni tal-Kummissjoni l-aktar reċenti dwar l-eżenzjonijiet skont ir-Regolament ta’ eżenzjoni kienet adottata fil-15 ta’ April 2021 (6).

(7)

Għall-finijiet ta’ din id-Deċiżjoni, japplikaw id-definizzjonijiet stabbiliti fl-Artikolu 1 tar-Regolament (KE) Nru 88/97.

(8)

Fil-25 ta’ Awwissu 2019, il-Kummissjoni rċeviet mingħand il-kumpanija Pollakka Rowerland Piotr Tokarz (“Rowerland”) (“il-kumpanija”) talba għal eżenzjoni bl-informazzjoni meħtieġa biex jiġi ddeterminat jekk din it-talba kinitx ammissibbli skont l-Artikolu 4 tar-Regolament ta’ eżenzjoni.

(9)

Skont l-Artikolu 5(1) tar-Regolament ta’ eżenzjoni sakemm tittieħed deċiżjoni dwar il-mertu tat-talba, il-ħlas tad-dazju estiż fir-rigward ta’ kull importazzjoni ta’ partijiet essenzjali tar-roti ddikjarati għaċ-ċirkolazzjoni libera minn Rowerland ġie sospiż mill-jum li fih il-Kummissjoni rċeviet it-talba debitament sostanzjata għal eżenzjoni.

(10)

Il-kodiċi addizzjonali TARIC C529 ġie assenjat lill-Parti elenkata fit-Tabella 1, sabiex jidentifika l-importazzjonijiet ta’ partijiet essenzjali tar-roti ddikjarati għaċ-ċirkolazzjoni libera u soġġett għas-sospensjoni tal-ħlas tad-dazju estiż.

Tabella 1

(11)

F’konformità mal-Artikolu 6 tar-Regolament ta’ eżenzjoni, il-Kummissjoni identifikat il-perjodu mill-1 ta’ Novembru 2019 sal-31 ta’ Ottubru 2020 bħala l-perjodu li jrid jiġi investigat sabiex jiġu vverifikati l-attivitajiet ta’ Rowerland matul il-perjodu ta’ sospensjoni u tiddeċiedi jekk tagħtix eżenzjoni (“il-perjodu ta’ investigazzjoni”).

(12)

F’Jannar 2021, kif ukoll f’Mejju 2021 b’mod komplementari, Rowerland ipprovdiet id-data u ċ-ċifri lill-Kummissjoni li skonthom, matul il-perjodu ta’ investigazzjoni, il-kumpanija kienet tikkonforma mal-kundizzjonijiet stabbiliti fir-Regolament ta’ eżenzjoni sabiex tiġi eżentata.

(13)

B’mod partikolari, Rowerland allegat a) li hi użat partijiet essenzjali tar-roti għall-assemblaġġ tar-roti fi kwantitajiet ’il fuq mil-limitu ta’ 299 unità għal kull tip ta’ parti essenzjali tar-roti fuq bażi ta’ kull xahar (“ir-regola de minimis”) u b) li l-valur miżjud għall-partijiet inkorporati matul l-operazzjonijiet ta’ assemblaġġ tagħha jikkorrispondi għal aktar minn 25 % tal-kost tal-manifattura (“il-kriterju tal-valur miżjud ta’ 25 %”). Għalhekk, l-operazzjonijiet ta’ assemblaġġ tagħha ma kinux jaqgħu fil-kamp ta’ applikazzjoni tal-Artikolu 13(2) tar-Regolament bażiku. Barra minn hekk, Rowerland ma ddikjaratx li l-partijiet miġjuba miċ-Ċina kienu jikkostitwixxu inqas minn 60 % tal-valur totali tal-partijiet użati fl-operazzjonijiet ta’ assemblaġġ matul il-perjodu ta’ investigazzjoni skont l-Artikolu 13(2) tar-Regolament bażiku (“il-kriterju 60–40 %”).

(14)

F’Novembru 2021, il-Kummissjoni għamlet żjara ta’ verifika fl-impjant tal-kumpanija biex teżamina l-merti tat-talba għal eżenzjoni.

(15)

Matul l-eżami tagħhom, is-servizzi tal-Kummissjoni stabbilew li:

(16)

B’riżultat ta’ dan, il-kumpanija ma kinitx tissodisfa l-kriterji għal eżenzjoni. B’mod partikolari, matul il-perjodu ta’ investigazzjoni Rowerland kienet taqa’ fil-kamp ta’ applikazzjoni tal-Artikolu 13(2) tar-Regolament bażiku.

(17)

Għal dawn ir-raġunijiet u skont l-Artikolu 7(3) tar-Regolament ta’ eżenzjoni, it-talba għal eżenzjoni għandha tiġi miċħuda u għandha titneħħa s-sospensjoni tal-ħlas tad-dazju estiż skont l-Artikolu 5 tal-istess Regolament.

(18)

Konsegwentement, id-dazju estiż għandu jinġabar b’mod retroattiv mid-data li fiha daħlet fis-seħħ is-sospensjoni, jiġifieri s-17 ta’ Ottubru 2019.

(19)

Fil-25 ta’ Jannar 2022, il-kumpanija ġiet infurmata bis-sejbiet ta’ hawn fuq li fuq il-bażi tagħhom il-Kummissjoni kellha l-ħsieb li tipproponi ċ-ċaħda tat-talba tagħha għal eżenzjoni, u ngħatat l-opportunità li tikkummenta. Il-kumpanija ngħatat ukoll l-opportunità ta’ smigħ, u sar smigħ mal-kumpanija.

(20)

Fil-kummenti tagħha wara d-divulgazzjoni, Rowerland ikkontestat ir-reviżjoni tal-kostijiet tagħha magħmula mill-Kummissjoni kif iddikjarat fil-premessa (15). B’mod partikolari, Rowerland sostniet li l-ammont ta’ deprezzament inkluż fil-kalkolu tal-valur miżjud għandu jinkludi wkoll l-ispejjeż ta’ deprezzament għal faċilitajiet addizzjonali bħall-pjazza pavimentata, is-sala tat-tinda u l-bini kummerċjali bil-maħżen, peress li dawn il-faċilitajiet kienu allegatament marbuta direttament ma’ operazzjonijiet ta’ assemblaġġ tar-roti u/jew kienu jikkostitwixxu parti integrali mill-faċilità sħiħa.

(21)

Bħala nota ġenerali, ta’ min jinnota li meta jiġi kkalkulat, skont l-Artikolu 13(2) tar-Regolament bażiku, jekk il-valur miżjud tal-parts li ntużaw matul l-operazzjoni ta’ assemblaġġ kienx ikbar minn 25 % tal-kost tal-manifattura, il-kostijiet inklużi fil-kalkolu tal-valur miżjud huma kostijiet imġarrba fil-proċess ta’ manifattura li jwasslu għal żieda fil-valur tal-prodott lest, minbarra l-ispejjeż tal-bidu (pereżempju l-kostijiet lavorattivi tal-manifattura, l-ispejjeż ġenerali, id-deprezzament tal-faċilitajiet tal-assemblaġġ, il-parts immanifatturati internament). Dawn il-kostijiet għandhom għalhekk jiġu speċifikament imġarrba fil-proċess tal-manifattura u tat-tlestija tar-roti. Il-kostijiet imġarrba mill-kumpanija li ma jistgħux ikunu marbuta mal-proċess tal-manifattura matul il-perjodu ta’ investigazzjoni mhumiex inklużi sabiex jiġi kkalkulat il-valur miżjud. Għalhekk, it-tipi l-oħra tal-ispejjeż tal-bejgħ, ġenerali u amministrattivi mhumiex inklużi fil-kalkolu tal-valur miżjud billi dawn il-kostijiet ma ġġarrbux mill-kumpanija fil-proċess tal-manifattura u ma jżidux il-valur miżjud tal-prodott.

(22)

Barra minn hekk, għandu jiġi mfakkar li, kif iddikjarat fil-premessa (15)(d), Rowerland ma mmanifatturatx partijiet tal-biċikletti, ħlief ir-roti tal-biċikletti. L-ispejjeż ta’ deprezzament irrapportati kienu primarjament għal diversi binjiet. L-investigazzjoni żvelat li minn April 2020 Rowerland kellha wkoll binja li kienet tintuża għall-bejgħ tar-roti. Id-deprezzament ta’ dan il-bini għalhekk ma kienx inkluż fil-kalkolu tal-valur miżjud. Madankollu, id-deprezzament tal-binjiet fejn saru l-operazzjonijiet ta’ assemblaġġ jew li kienu marbuta mal-operazzjonijiet ta’ assemblaġġ ġew inklużi fil-kalkolu tal-valur miżjud. Barra minn hekk, il-Kummissjoni inkludiet ukoll il-kera ta’ żewġ imħażen fejn kienu maħżuna l-partijiet tar-roti, peress li dawn il-kostijiet huma marbuta mal-proċess tal-manifattura. Fir-rigward tal-pjazza pavimentata u tat-tinda, ma ġietx ipprovduta biżżejjed evidenza li kien hemm rabta diretta mal-operazzjoni ta’ assemblaġġ. Fi kwalunkwe każ, l-impatt ta’ din il-kwistjoni huwa marġinali fil-prattika, peress li l-valur miżjud xorta jkun inqas minn 25 %. Għalhekk, l-affermazzjoni ġiet miċħuda.

(23)

Barra minn hekk, Rowerland ma qablitx mar-reviżjoni tal-kostijiet tal-elettriku mill-Kummissjoni skont il-premessi (15)(e)(i) u 15(e)(iii). Hija sostniet li l-koeffiċjent tal-allokazzjoni tagħha użat għall-elettriku ntgħażel minn awditur ċertifikat. Ma ġiet ippreżentata l-ebda evidenza f’dan ir-rigward. Għalhekk, l-affermazzjoni ġiet miċħuda.

(24)

Rowerland sostniet ukoll li l-ispejjeż marbuta mal-ilma pprovdut lill-impjegati u r-rimi tal-iskart għandhom jiġu inklużi fil-kalkolu tal-valur miżjud. Madankollu, dawn l-ispejjeż kienu tant baxxi li ma kellhom l-ebda impatt materjali fuq il-kalkolu tal-valur miżjud.

(25)

Finalment, Rowerland sostniet li matul iż-żjara ta’ verifika, hija għarrfet ħażin b’mod mhux intenzjonat lit-tim tal-każ tal-Kummissjoni dwar il-perjodu tal-użu ta’ ċerti partijiet tar-roti li kkawżaw kostijiet ta’ tiżbigħ. Hija sostniet li dawn il-parts intużaw għall-assemblaġġ tar-roti fil-perjodu ta’ investigazzjoni u għalhekk il-kostijiet taż-żebgħa għandhom jiġu inklużi fil-kalkolu tal-valur miżjud.

(26)

Il-Kummissjoni tinnota li ma ġiet ippreżentata l-ebda evidenza f’dan ir-rigward u li għalhekk l-argument ġie miċħud bħala mhux sostanzjat,