1.   Dan l-Artikolu għandu japplika għall-opinjonijiet u rakkomandazzjonijiet imsemmija fl-Artikolu 1(2)(a).

2.   Meta tiġi rċevuta notifika skont l-Artikoli 131 jew 133 tad-Direttiva 2013/36/UE jew l-Artikoli 124, 164 jew 458 tar-Regolament (UE) Nru 575/2013, is-Segretarjat tal-BERS għandu jissottomettiha minnufih, iżda mhux aktar tard mit-tmiem tal-jum ta’ xogħol segwenti tal-BĊE, lill-membri tal-Bord Ġenerali u lit-Tim ta’ Valutazzjoni permezz ta’ Darwin.

3.   Fi żmien ħamest ijiem tax-xogħol tal-BĊE wara li tiġi rċevuta n-notifika skont il-paragrafu 2, il-membri tal-Bord Ġenerali jistgħu jqajmu tħassib materjali rigward kwalunkwe riperkussjoni negattiva bħal effetti konsegwenzjali transfruntiera negattivi ulterjuri tal-miżura tal-politika makroprudenzjali notifikata. Sabiex jiġi żgurat proċess bla xkiel u effiċjenti, il-membri għandhom iqajmu, sa fejn huwa possibbli, dan it-tħassib materjali bl-Ingliż.

4.   It-Tim ta’ Valutazzjoni għandu jħejji valutazzjoni ta’, u abbozz ta’ opinjoni jew rakkomandazzjoni dwar, l-adegwatezza tal-miżura ta’ politika makroprudenzjali notifikata filwaqt li jqis ir-rekwiżiti rilevanti skont id-Direttiva 2013/36/UE u r-Regolament (UE) Nru 575/2013 minn perspettiva makroprudenzjali u ta’ stabbiltà finanzjarja kif ukoll filwaqt li jqis kwalunkwe tħassib materjali li jqajmu l-membri tal-Bord Ġenerali skont il-paragrafu 3.

5.   Hekk kif jiġi ffinalizzat mit-Tim ta’ Valutazzjoni, is-Segretarjat tal-BERS għandu jissottometti minnufih l-abbozz ta’ opinjoni jew rakkomandazzjoni, permezz ta’ Darwin, lill-membri tal-Bord Ġenerali.

6.   Il-Bord Ġenerali, fuq il-bażi tal-valutazzjoni u l-abbozz ippreparat mit-Tim ta’ Valutazzjoni, għandu jieħu deċiżjoni dwar l-abbozz ta’ opinjoni jew rakkomandazzjoni. Sakemm ma jitlaqqax il-Bord Ġenerali f’laqgħa skont ir-Regoli ta’ Proċedura tal-BERS, id-deċiżjoni tal-Bord Ġenerali għandha tittieħed bi proċedura bil-miktub. Id-deċiżjoni tal-Bord Ġenerali għandha tittieħed mill-inqas jum wieħed tax-xogħol tal-BĊE qabel l-iskadenza tal-perijodu rilevanti speċifikat fl-Artikoli 131 jew 133 tad-Direttiva 2013/36/UE jew l-Artikolu 124, 164 jew 458 tar-Regolament (UE) Nru 575/2013.

7.   Jekk wara talba mill-BERS lill-awtoritajiet ta’ notifika għal iktar informazzjoni, l-informazzjoni li tiġi rċevuta xorta ma jkollhiex l-informazzjoni rilevanti kollha meħtieġa biex tiġi vvalutata kemm hija xierqa l-miżura maħsuba, inkluża l-konformità tagħha mar-rekwiżiti rilevanti skont id-Direttiva 2013/36/UE u r-Regolament (UE) Nru 575/2013, il-BERS jista’ jipprovdi opinjoni li tgħid li ma kienx possibbli li tiġi vvalutata l-konformità mar-rekwiżiti tad-Direttiva 2013/36/UE u r-Regolament (UE) Nru 575/2013. Il-BERS jista’ joħroġ ukoll opinjoni jew rakkomandazzjoni negattiva, kif ikun xieraq.”;

1.   Dan l-Artikolu għandu japplika għall-emendi għar-Rakkomandazzjoni BERS/2015/2 fit-tifsira tal-Artikolu 1(2)(b).

2   Fi żmien ħamest ijiem tax-xogħol tal-BĊE wara li tiġi rċevuta mill-BERS talba għar-reċiprokazzjoni minn Stat Membru, f’konformità ma’, iżda mhux biss, l-Artikolu 134(5) tad-Direttiva 2013/36/UE jew l-Artikolu 458(8) tar-Regolament (UE) Nru 575/2013, is-Segretarjat tal-BERS għandu jissottomettiha lill-membri tal-Kumitat Tekniku Konsultattiv (ATC), lill-Bord Ġenerali u lit-Tim ta’ Valutazzjoni, permezz ta’ Darwin.

3.   Fi żmien ħamest ijiem tax-xogħol tal-BĊE wara t-trażmissjoni tal-informazzjoni msemmija fil-paragrafu 2, il-membri tal-Bord Ġenerali jistgħu juru lill-BERS li l-miżura tal-politika makroprudenzjali jkollha effetti konsegwenzjali transfruntiera negattivi ulterjuri sinifikanti fil-ġuriżdizzjoni tagħhom. Sabiex jiġi żgurat proċess bla xkiel u effiċjenti, il-membri tal-Bord Ġenerali għandhom, sakemm ikun possibbli, jipprovdu informazzjoni rilevanti lill-BERS bl-Ingliż.

4.   It-Tim ta’ Valutazzjoni għandu jħejji valutazzjoni tal-ħtieġa li tiġi adottata rakkomandazzjoni dwar ir-reċiprokazzjoni flimkien ma’ abbozz ta’ emenda tar-Rakkomandazzjoni BERS/2015/2, fejn meħtieġ. It-Tim ta’ Valutazzjoni għandu jagħmel proposta lill-ATC dwar ir-reċiprokazzjoni tal-miżura nnotifikata u dwar il-mezzi kif tista’ tinkiseb ir-reċiprokazzjoni f’konformità mar-Rakkomandazzjoni BERS/2015/2.

5.   It-Tim ta’ Valutazzjoni għandu jikkunsidra jekk l-abbozz ta’ emenda tar-Rakkomandazzjoni BERS/2015/2 għandux jiġi rivedut fid-dawl tal-kummenti li jaslu mingħand membri tal-ATC u, permezz tas-Segretarjat tal-BERS, għandu jissottometti l-abbozz ta’ emenda tar-Rakkomandazzjoni BERS/2015/2 lill-Bord Ġenerali permezz ta’ Darwin.

6.   Il-Bord Ġenerali, fuq il-bażi tal-valutazzjoni u l-abbozz ippreparat mit-Tim ta’ Valutazzjoni, għandu jieħu deċiżjoni dwar l-abbozz ta’ emenda tar-Rakkomandazzjoni BERS/2015/2. Sakemm ma jitlaqqax il-Bord Ġenerali f’laqgħa f’konformità mar-Regoli ta’ Proċedura tal-BERS, id-deċiżjoni tal-Bord Ġenerali għandha tittieħed bi proċedura bil-miktub.”;

1.   It-Tim ta’ Valutazzjoni għandu jipprepara valutazzjonijiet ta’, u abbozzi ta’ opinjoni jew rakkomandazzjoni dwar, il-miżuri ta’ politika makroprudenzjali, dwar ir-reċiproċità ta’ miżuri makroprudenzjali u dwar ir-rati CCB ta’ pajjiżi terzi. Il-membri tat-Tim ta’ Valutazzjoni, kif ukoll kwalunkwe osservatur, għandu jkollhom livell għoli biżżejjed ta’ anzjanità, kemm minn perspettiva teknika kif ukoll ta’ politika.

2.   Il-President tat-Tim ta’ Valutazzjoni għandu jkun il-Kap tas-Segretarjat tal-BERS jew is-sostitut tiegħu jew tagħha. Il-President tat-Tim ta’ Valutazzjoni għandu jkun responsabbli għat-tħejjija tal-ħidma tat-Tim ta’ Valutazzjoni, inkluż l-istabbiliment tal-aġenda, is-sejħa tal-laqgħat u t-tressiq ta’ punti għad-diskussjoni u għandu jippresjedi l-laqgħat tat-Tim ta’ Valutazzjoni.

3.   It-Tim ta’ Valutazzjoni għandu jikkonsisti minn:

Id-disa’ rappreżentanti fis-subparagrafu (f) għandhom jinkludu mill-inqas żewġ rappreżentanti minn dawk l-awtoritajiet nazzjonali li minnhom ikun ġie elett membru nazzjonali tal-Kumitat tat-Tmexxija skont l-Artikolu 11(1)(c) tar-Regolament (UE) Nru 1092/2010, kif ukoll rappreżentant tal-awtorità li minnha jkun ġie elett l-ewwel Viċi President tal-BERS skont l-Artikolu 5(2) tar-Regolament (UE) Nru 1092/2010, u rappreżentant mill-awtorità li minnha jkun inħatar il-President tal-ATC skont l-Artikolu 13(2) tar-Regolament (UE) Nru 1092/2010 jekk dik l-awtorità tkun awtorità tat-tip imsemmi fis-subparagrafu (f) hawn fuq.

4.   Fuq il-bażi tan-nomini mill-awtoritajiet nazzjonali li minnhom il-BERS jieħu l-membri tiegħu tal-Bord Ġenerali bid-drittijiet tal-vot, il-Bord Ġenerali għandu jaħtar id-disa’ rappreżentanti msemmija fil-paragrafu 3, wara li jqis il-ħtieġa għal rappreżentanza bilanċjata tal-Istati Membri bejn dawk li huma Stati Membri parteċipanti kif definit fl-Artikolu 2(1) tar-Regolament tal-Kunsill (UE) Nru 1024/2013 (*1) u dawk li ma humiex. Għandhom jinħatru għall-istess perijodu bħall-membru nazzjonali rispettiv tal-Kumitat tat-Tmexxija jew inkella għal perijodu ta’ tliet snin. Ir-rappreżentanti tat-Tim ta’ Valutazzjoni mill-awtoritajiet nazzjonali li minnhom ma jkunx intgħażel membru nazzjonali tal-Kumitat tat-Tmexxija jistgħu jerġgħu jinħatru.

5.   Il-membri kollha l-oħrajn tat-Tim ta’ Valutazzjoni għandhom jinħatru għal perijodu illimitat.

6.   L-awtoritajiet rappreżentati fit-Tim ta’ Valutazzjoni jistgħu jibdlu lir-rappreżentant tagħhom skont il-kompetenza teknika meħtieġa u t-tip ta’ valutazzjoni li trid ssir mit-Tim ta’ Valutazzjoni skont l-Artikolu 1(2). Dan it-tibdil irid jiġi approvat mill-President tat-Tim ta’ Valutazzjoni.

7.   L-osservaturi jistgħu jitolbu li jiġu mistiedna jipparteċipaw fit-Tim ta’ Valutazzjoni sabiex jikkontribwixxu għad-diskussjoni. L-osservaturi jistgħu jinkludu rappreżentanti tal-awtoritajiet imsemmija fl-Artikolu 6(1) u (2) u fl-Artikolu 13(1) tar-Regolament (UE) Nru 1092/2010. Meta rakkomandazzjoni jew opinjoni titħejja skont l-Artikoli 131(5a) u 133(11) u (12) tad-Direttiva 2013/36/UE u l-Artikolu 458(4) tar-Regolament (UE) Nru 575/2013, ir-rappreżentanti mill-Kummissjoni u l-EBA għandhom jipparteċipaw bħala osservaturi. Meta titħejja opinjoni f’konformità mal-Artikoli 124(2) jew 164(6) tar-Regolament (UE) Nru 575/2013, ir-rappreżentanti mill-EBA għandhom jipparteċipaw bħala osservaturi. Ir-rappreżentanti mill-awtoritajiet rilevanti f’pajjiżi terzi kkonċernati jistgħu jiġu mistiedna bħala osservaturi wkoll, f’liema każ dawn għandhom ikunu suġġetti għal ftehimiet ta’ kunfidenzjalità.

8.   Meta, skont l-Artikolu 5(2) tar-Regolament (UE) Nru 1024/2013, il-BĊE, minflok awtorità nazzjonali, jinnotifika miżura ta’ politika makroprudenzjali fil-livell nazzjonali, il-BĊE għandu jkun rappreżentat minn żewġ osservaturi u kull Stat Membru kkonċernat għandu jkun rappreżentat minn żewġ osservaturi.

9.   Sabiex jiġu evitati kunflitti ta’ interess fil-valutazzjoni tal-miżuri ta’ politika makroprudenzjali skont l-Artikolu 1(2)(a), l-istatus tal-membri tat-Tim ta’ Valutazzjoni għandu jieqaf temporanjament, mingħajr ma dawk il-membri jiġu ssostitwiti, għar-rappreżentanti ta’ Stati Membri jew tal-BĊE fil-każijiet kollha fejn l-awtoritajiet rilevanti tal-Istat Membru kkonċernat jew il-BĊE jkunu nnotifikaw miżura ta’ politika makoprudenzjali jew qajmu tħassib materjali dwar il-miżura ta’ politika makroprudenzjali jew talbu r-reċiproċità ta’ miżura ta’ politika makroprudenzjali li trid tiġi vvalutata mit-Tim ta’ Valutazzjoni.

10.   Membri tat-Tim ta’ Valutazzjoni għandhom jippreparaw abbozzi ta’ opinjonijiet jew rakkomandazzjonijiet skont l-Artikoli 4(4), 5(4) u 6(5) li fuqhom jista’ jivvota l-Bord Ġenerali. It-Tim ta’ Valutazzjoni għandu jagħmel sforz biex isib il-kunsens fost il-membri tiegħu. Meta ċ-ċirkustanzi jkunu jeħtieġu hekk, jista’ jipprovdi fehma maġġoritarja jew minoritarja fil-valutazzjoni li jissottometti lill-Bord Ġenerali.