(1)

Ir-Regolament (UE) 2020/852 jistabbilixxi l-qafas ġenerali għad-determinazzjoni ta’ jekk attività ekonomika tikkwalifikax bħala attività ambjentalment sostenibbli għall-finijiet li jiġi stabbilit sa liema punt investiment ikun ambjentalment sostenibbli. Dak ir-Regolament japplika għall-miżuri adottati mill-Unjoni jew mill-Istati Membri li jistabbilixxu r-rekwiżiti għall-parteċipanti fis-swieq finanzjarji jew għall-emittenti fir-rigward ta’ prodotti finanzjarji jew ta’ bonds korporattivi li jitqiegħdu għad-dispożizzjoni bħala ambjentalment sostenibbli, għall-parteċipanti fis-swieq finanzjarji li jagħmlu disponibbli prodotti finanzjarji, u għall-impriżi li jkunu soġġetti għall-obbligu li jippubblikaw dikjarazzjoni mhux finanzjarja skont l-Artikolu 19a tad-Direttiva 2013/34/UE tal-Parlament Ewropew u tal-Kunsill (2) jew dikjarazzjoni mhux finanzjarja konsolidata skont l-Artikolu 29a ta’ din id-Direttiva. L-operaturi ekonomiċi jew l-awtoritajiet pubbliċi li mhumiex koperti bir-Regolament (UE) 2020/852 jistgħu japplikaw ukoll dak ir-Regolament fuq bażi volontarja.

(2)

L-Artikoli 10(3) u 11(3) tar-Regolament (UE) 2020/852 jirrikjedu li l-Kummissjoni tadotta atti delegati li jistabbilixxu l-kriterji tekniċi ta’ skrinjar sabiex jiġu ddeterminati l-kundizzjonijiet li fihom attività ekonomika speċifika tikkwalifika bħala attività li tikkontribwixxi sostanzjalment għall-mitigazzjoni tat-tibdil fil-klima jew għall-adattament għat-tibdil fil-klima, rispettivament, u sabiex jiġu stabbiliti, għal kull objettiv ambjentali rilevanti stabbilit fl-Artikolu 9 ta’ dan ir-Regolament, kriterji tekniċi ta’ skrinjar sabiex jiġi ddeterminat jekk dik l-attività ekonomika tikkawżax ħsara sinifikanti lil xi wieħed jew aktar minn fost dawk l-objettivi ambjentali.

(3)

Skont il-punt (h) tal-Artikolu 19(1) tar-Regolament (UE) 2020/852, il-kriterji tekniċi ta’ skrinjar għandhom iqisu n-natura u l-iskala tal-attività ekonomika u tas-settur li jirreferu għalihom, u jekk l-attività ekonomika hijiex attività ekonomika ta’ tranżizzjoni kif imsemmija fl-Artikolu 10(2) tar-Regolament (UE) 2020/852, jew attività ta’ faċilitazzjoni kif imsemmija fl-Artikolu 16 ta’ dan ir-Regolament. Biex il-kriterji tekniċi ta’ skrinjar jissodisfaw ir-rekwiżiti tal-Artikolu 19 tar-Regolament (UE) 2020/852 b’mod effettiv u bbilanċjat, jenħtieġ li dawn jiġu stabbiliti bħala limitu kwantitattiv jew rekwiżit minimu, bħala titjib relattiv, bħala sett ta’ rekwiżiti kwalitattivi tal-prestazzjoni, bħala rekwiżiti bbażati fuq proċess jew prattika, jew bħala deskrizzjoni preċiża tan-natura tal-attività ekonomika nnifisha fejn dik l-attività min-natura tagħha tista’ tikkontribwixxi b’mod sostanzjali għall-mitigazzjoni tat-tibdil fil-klima.

(4)

Il-kriterji tekniċi ta’ skrinjar sabiex jiġi ddeterminat jekk attività ekonomika tikkontribwixxix sostanzjalment għall-mitigazzjoni tat-tibdil fil-klima jew għall-adattament għat-tibdil fil-klima jenħtieġ li jiżguraw li l-attività ekonomika tħalli impatt pożittiv fuq l-objettiv klimatiku jew tnaqqas l-impatt negattiv fuq l-objettiv klimatiku. Għalhekk, jenħtieġ li dawk il-kriterji tekniċi ta’ skrinjar jirreferu għal-limiti jew għal-livelli ta’ prestazzjoni li l-attività ekonomika jenħtieġ li tilħaq sabiex tikkwalifika bħala attività li tikkontribwixxi sostanzjalment għal wieħed minn dawk l-objettivi klimatiċi. Il-kriterji tekniċi ta’ skrinjar għal “la tagħmilx ħsara sinifikanti” jenħtieġ li jiżguraw li l-attività ekonomika ma jkollha l-ebda impatt ambjentali negattiv sinifikanti. Konsegwentement, dawk il-kriterji tekniċi ta’ skrinjar jenħtieġ li jispeċifikaw ir-rekwiżiti minimi li l-attività ekonomika jenħtieġ li tissodisfa sabiex tikkwalifika bħala attività ambjentalment sostenibbli.

(5)

Il-kriterji tekniċi ta’ skrinjar biex jiġi ddeterminat jekk attività ekonomika tikkontribwixxix b’mod sostanzjali għall-mitigazzjoni tat-tibdil fil-klima jew għall-adattament għat-tibdil fil-klima u ma tagħmilx ħsara sinifikanti lil xi wieħed mill-objettivi ambjentali jenħtieġ li jibnu, fejn rilevanti, fuq il-liġi eżistenti tal-Unjoni, l-aħjar prattiki, l-istandards u l-metodoloġiji, kif ukoll fuq standards, prattiki u metodoloġiji stabbiliti sew żviluppati minn entitajiet pubbliċi b’reputazzjoni internazzjonali. Fejn oġġettivament ma jkunx hemm alternattivi vijabbli għal qasam ta’ politika speċifiku, il-kriterji tekniċi ta’ skrinjar jistgħu jibnu wkoll fuq standards stabbiliti sew żviluppati minn korpi privati b’reputazzjoni internazzjonali.

(6)

Sabiex jiġu żgurati kundizzjonijiet ekwi, l-istess kategoriji ta’ attivitajiet ekonomiċi jenħtieġ li jkunu soġġetti għall-istess kriterji tekniċi ta’ skrinjar għal kull objettiv klimatiku. Għalhekk, huwa meħtieġ li l-kriterji tekniċi ta’ skrinjar, fejn possibbli, isegwu l-klassifikazzjoni tal-attivitajiet ekonomiċi stipulati fis-sistema ta’ klassifikazzjoni tal-attivitajiet ekonomiċi tal-NACE Reviżjoni 2 stabbilita bir-Regolament (KE) Nru 1893/2006 tal-Parlament Ewropew u tal-Kunsill (3). Sabiex tiġi ffaċilitata l-identifikazzjoni mill-impriżi u l-parteċipanti fis-swieq finanzjarji tal-attivitajiet ekonomiċi rilevanti li għalihom jenħtieġ li jiġu stabbiliti kriterji tekniċi ta’ skrinjar, jenħtieġ li d-deskrizzjoni speċifika ta’ attività ekonomika tinkludi wkoll ir-referenzi għall-kodiċijiet NACE li jistgħu jiġu assoċjati ma’ dik l-attività. Dawk ir-referenzi għandhom jinftiehmu bħala indikattivi u m’għandhomx jipprevalu fuq id-definizzjoni speċifika tal-attività pprovduta fid-deskrizzjoni tagħha.

(7)

Il-kriterji tekniċi ta’ skrinjar sabiex jiġi ddeterminat f’liema kundizzjonijiet attività ekonomika tikkwalifika bħala attività li tikkontribwixxi sostanzjalment għall-mitigazzjoni tat-tibdil fil-klima jenħtieġ li jirriflettu l-ħtieġa li tiġi evitata l-produzzjoni ta’ emissjonijiet ta’ gassijiet serra, li jitnaqqsu tali emissjonijiet jew li jiżdiedu l-assorbimenti ta’ gassijiet serra u l-ħżin ta’ karbonju fit-tul. Għalhekk, huwa xieraq li l-ewwel jiffoka fuq dawk l-attivitajiet u s-setturi ekonomiċi li għandhom l-akbar potenzjal sabiex jilħqu dawk l-għanijiet. L-għażla ta’ dawk l-attivitajiet u s-setturi ekonomiċi jenħtieġ li tkun ibbażata fuq is-sehem tagħhom tal-emissjonijiet kumplessivi ta’ gassijiet serra, u fuq evidenza dwar il-potenzjal tagħhom li jikkontribwixxu sabiex jevitaw il-produzzjoni ta’ emissjonijiet ta’ gassijiet serra, li jnaqqsu tali emissjonijiet jew li jikkontribwixxu għall-assorbiment ta’ gassijiet serra, jew li jippermettu dan l-evitar, it-tnaqqis, it-tneħħija jew il-ħażna fuq terminu twil għal attivitajiet oħra.

(8)

Il-metodoloġija biex jiġu kkalkulati l-emissjonijiet tal-gassijiet b’effett ta’ serra tul iċ-ċiklu tal-ħajja għandha tkun robusta u applikabbli b’mod wiesa’ u b’hekk tippromwovi l-komparabbiltà tal-kalkoli tal-emissjonijiet tal-gassijiet serra fis-setturi u bejniethom. Għalhekk huwa xieraq li tintalab l-istess metodoloġija ta’ kalkolu fl-attivitajiet kollha, fejn ikun meħtieġ kalkolu bħal dan, filwaqt li tiġi pprovduta biżżejjed flessibbiltà għall-entitajiet li japplikaw ir-Regolament (UE) 2020/852. Għaldaqstant, ir-Rakkomandazzjoni tal-Kummissjoni 2013/179/UE hija utli għall-kalkolu tal-emissjonijiet tal-gassijiet b’effett ta’ serra tul iċ-ċiklu tal-ħajja, bil-possibbiltà, bħala alternattiva, li jintużaw l-istandards ISO 14067 jew ISO 14064-1. Fejn għodod jew standards alternattivi stabbiliti sew ikunu partikolarment adatti biex jipprovdu informazzjoni eżatta u komparabbli dwar il-kalkolu tal-emissjonijiet tal-gassijiet serra tul iċ-ċiklu tal-ħajja għal settur speċifiku, bħall-għodda G-res għas-settur tal-enerġija idroelettrika u l-istandard tal-ETSI ES 203 199 għas-settur tal-informazzjoni u l-komunikazzjoni, huwa xieraq li tali għodda jew standards jiġu inklużi bħala alternattivi addizzjonali għal dak is-settur.

(9)

Il-metodoloġija għall-kalkolu tal-emissjonijiet tal-gassijiet b’effett ta’ serra tul iċ-ċiklu tal-ħajja għall-attivitajiet fis-settur tal-enerġija idroelettrika għandha tirrifletti l-ispeċifiċitajiet ta’ dak is-settur, inklużi metodoloġiji ġodda ta’ mudellar, għarfien xjentifiku u kejl empiriku minn ġibjuni madwar id-dinja. Sabiex ikun jista’ jsir rappurtar preċiż dwar l-impatt nett fuq l-emissjonijiet tal-gassijiet serra għas-settur tal-enerġija idroelettrika, huwa għalhekk xieraq li jiġi permess l-użu tal-għodda G-res li hija disponibbli għall-pubbliku mingħajr ħlas u li ġiet żviluppata mill-Assoċjazzjoni Internazzjonali tal-Idroenerġija f’kollaborazzjoni mal-President tal-UNESCO għall-Bidla Ambjentali Globali.

(10)

Il-metodoloġija għall-kalkolu tal-emissjonijiet tal-gassijiet b’effett ta’ serra tul iċ-ċiklu tal-ħajja għall-attivitajiet fis-settur tal-informazzjoni u l-komunikazzjoni għandha tirrifletti l-ispeċifiċitajiet ta’ dak is-settur, b’mod partikolari l-ħidma speċjalizzata u l-gwida li ġiet ipprovduta mill-Istitut Ewropew tal-Istandards tat-Telekomunikazzjoni (ETSI) għat-tħaddim tal-valutazzjonijiet taċ-ċiklu tal-ħajja fis-settur tal-informazzjoni u l-komunikazzjoni. Għalhekk huwa xieraq li jiġi permess l-użu tal-istandard tal-ETSI ES 203 199 bħala metodoloġija biex jiġu kkalkulati b’mod preċiż l-emissjonijiet tal-gassijiet serra għal dak is-settur.

(11)

Il-kriterji tekniċi ta’ skrinjar għal ċerti attivitajiet jiddependu fuq elementi ta’ kumplessità teknika konsiderevoli u l-valutazzjoni dwar jekk kienx hemm konformità ma’ dawk il-kriterji tista’ tirrikjedi għarfien espert u tista’ ma tkunx fattibbli għall-investituri. Sabiex tiġi ffaċilitata dik il-valutazzjoni, jenħtieġ li l-konformità ma’ tali kriterji tekniċi ta’ skrinjar għal tali attivitajiet tiġi vverifikata minn parti terza indipendenti.

(12)

L-attivitajiet ekonomiċi abilitanti kif imsemmi fl-Artikolu 10(1), il-punt (i) tar-Regolament (UE) 2020/852 ma jikkontribwixxux b’mod sostanzjali għall-mitigazzjoni tat-tibdil fil-klima permezz tal-prestazzjoni tagħhom stess. Attivitajiet bħal dawn għandhom rwol kruċjali fid-dekarbonizzazzjoni tal-ekonomija billi jippermettu direttament li attivitajiet oħra jitwettqu f’livell baxx ta’ karbonju ta’ prestazzjoni ambjentali. Għalhekk jenħtieġ li jiġu stabbiliti kriterji tekniċi ta’ skrinjar għal dawk l-attivitajiet ekonomiċi li għandhom rwol essenzjali biex jippermettu li l-attivitajiet fil-mira jsiru b’livell baxx ta’ emissjonijiet ta’ karbonju jew li jwasslu għal tnaqqis fil-gassijiet serra. Jenħtieġ li dawk il-kriterji tekniċi ta’ skrinjar jiżguraw li attività li tikkonforma magħhom tirrispetta s-salvagwardji tal-Artikolu 16 tar-Regolament (UE) 2020/852, b’mod partikolari li l-attività ma twassalx għal lock-in tal-assi u jkollha impatt ambjentali pożittiv sostanzjali.

(13)

L-attivitajiet ekonomiċi tranżizzjonali kif imsemmija fl-Artikolu 10(2) tar-Regolament (UE) 2020/852 għadhom ma jistgħux jiġu sostitwiti b’alternattivi teknoloġikament u ekonomikament vijabbli b’livell baxx ta’ emissjonijiet tal-karbonju iżda jappoġġaw it-tranżizzjoni lejn ekonomija newtrali għall-klima. Dawk l-attivitajiet jista’ jkollhom rwol kruċjali fil-mitigazzjoni tat-tibdil fil-klima billi jnaqqsu b’mod sostanzjali l-marka tal-karbonju għolja attwali tagħhom, inkluż billi jgħinu biex gradwalment titneħħa d-dipendenza fuq il-fjuwils fossili. Għalhekk jenħtieġ li jiġu stabbiliti kriterji tekniċi ta’ skrinjar għal dawk l-attivitajiet ekonomiċi, fejn soluzzjonijiet ta’ kważi żero emissjonijiet tal-karbonju għadhom mhumiex vijabbli jew fejn jeżistu attivitajiet ta’ kważi żero emissjonijiet tal-karbonju, iżda għadhom mhumiex prattikabbli fuq skala, li għandhom l-ogħla potenzjal għal tnaqqis sinifikanti ta’ gassijiet serra. Jenħtieġ li dawk il-kriterji tekniċi ta’ skrinjar jiżguraw li attività li tikkonforma magħhom tirrispetta s-salvagwardji tal-Artikolu 10(2) tar-Regolament (UE) 2020/852, b’mod partikolari li l-attività jkollha l-emissjonijiet ta’ gassijiet serra li jikkorrispondu għall-aħjar prestazzjoni fis-settur jew fl-industrija, ma tfixkilx l-iżvilupp u l-użu ta’ alternattivi b’livell baxx ta’ emissjonijiet tal-karbonju u ma twassalx għal intrappolament ta’ assi b’intensità qawwija ta’ karbonju.

(14)

Fid-dawl tan-negozjati li għaddejjin bħalissa dwar il-Politika Agrikola Komuni (PAK), u sabiex tinkiseb koerenza akbar fl-istrumenti differenti biex jinkisbu l-ambizzjonijiet ambjentali u klimatiċi tal-Patt Ekoloġiku, l-istabbiliment tal-kriterji tekniċi ta’ skrinjar għall-agrikoltura jenħtieġ li jiddewwem.

(15)

Il-foresti jinsabu taħt pressjoni dejjem akbar minħabba t-tibdil fil-klima, li jaggrava fatturi ewlenin oħra ta’ pressjonijiet bħall-pesti, il-mard, l-avvenimenti estremi tat-temp u n-nirien fil-foresti. Pressjonijiet oħra jiġu mill-abbandun rurali, min-nuqqas ta’ ġestjoni u mill-frammentazzjoni minħabba tibdiliet fl-użu tal-art, miż-żieda fl-intensità tal-ġestjoni minħabba domanda dejjem akbar għall-injam, għall-prodotti tal-foresti u għall-enerġija, mill-iżvilupp tal-infrastruttura, mill-urbanizzazzjoni u mit-teħid tal-art. Fl-istess ħin, il-foresti għandhom rwol kruċjali sabiex jintlaħqu l-objettivi tal-Unjoni ta’ treġġigħ lura tat-telf tal-bijodiversità u ta’ tisħiħ tal-ambizzjoni dwar il-mitigazzjoni u l-adattament għat-tibdil fil-klima, ta’ tnaqqis u ta’ kontroll tar-riskju ta’ diżastri b’mod partikolari dak dovut għal għargħar, għal nixfiet u għal nirien mhux ikkontrollati u ta’ promozzjoni ta’ bijoekonomija ċirkolari. Sabiex tintlaħaq in-newtralità klimatika u ambjent b’saħħtu, huwa meħtieġ li titjieb kemm il-kwalità kif ukoll il-kwantità ta’ żoni tal-foresti, li huma l-akbar bir ta’ karbonju fis-settur tal-użu tal-art, tat-tibdil fl-użu tal-art u tal-forestrija (“LULUCF”). Attivitajiet relatati mal-foresti jistgħu jikkontribwixxu għall-mitigazzjoni tat-tibdil fil-klima billi jżidu l-assorbimenti netti tad-diossidu tal-karbonju, billi jippreservaw il-ħażniet ta’ karbonju, u billi jipprovdu materjali u enerġija rinnovabbli, jiġġeneraw kobenefiċċji għall-adattament għat-tibdil fil-klima, għall-bijodiversità, għall-ekonomija ċirkolari, għall-użu sostenibbli u għall-protezzjoni tar-riżorsi tal-ilma u tal-baħar, u għall-prevenzjoni u għall-kontroll tat-tniġġis. Għalhekk, jenħtieġ li jiġu stabbiliti kriterji tekniċi ta’ skrinjar għat-tisġir, għar-restawr tal-foresti, għall-ġestjoni mtejba tal-foresti u għall-attivitajiet ta’ konservazzjoni tal-foresti. Dawn il-kriterji tekniċi ta’ skrinjar jenħtieġ li jkunu kompletament konformi mal-objettivi tal-Unjoni fir-rigward tal-adattament għat-tibdil fil-klima, tal-bijodiversità u l-ekonomija ċirkolari.

(16)

Sabiex titkejjel l-evoluzzjoni tal-iffrankar tal-emissjonijiet ta’ gassijiet serra u tal-ħażna tal-karbonju fl-ekosistemi tal-foresti, huwa xieraq li s-sidien tal-foresti jwettqu analiżi tal-benefiċċji għall-klima. Sabiex tiġi riflessa l-proporzjonalità u jiġi minimizzat il-piż amministrattiv b’mod partikolari għas-sidien ta’ foresti fuq skala żgħira, jenħtieġ li l-azjendi forestali ta’ inqas minn 13-il ettari ma jkunux meħtieġa jwettqu analiżi tal-benefiċċji għall-klima. Sabiex ikomplu jitnaqqsu l-ispejjeż amministrattivi, is-sidien iżgħar tal-foresti għandhom jitħallew iwettqu valutazzjoni tal-grupp ma’ azjendi oħra biex jiċċertifikaw il-kalkoli tagħhom, imwettqa kull 10 snin. Għodod adegwati mingħajr ħlas, bħal għodod ipprovduti mill-Organizzazzjoni tal-Ikel u l-Agrikoltura tan-Nazzjonijiet Uniti (FAO), ibbażati fuq data tal-Grupp Intergovernattiv ta’ Esperti dwar it-Tibdil fil-Klima (IPCC) (4), huma disponibbli biex jiġi stmat il-kobor tal-ispejjeż u jiġu mminimizzati l-ispejjeż u l-piżijiet għall-forestiera fuq skala żgħira. L-għodda tista’ tiġi adattata b’mod partikolari għal livelli differenti ta’ analiżi, bħal valuri speċifiċi u kalkolu dettaljat għal azjendi kbar, valuri prestabbiliti u kalkolu simplifikat għal sidien iżgħar.

(17)

Fis-segwitu għall-komunikazzjonijiet mill-Kummissjoni tal-11 ta’ Diċembru 2019“Il-Patt Ekoloġiku Ewropew” (5), tal-20 ta’ Mejju 2020 dwar “L-Istrateġija tal-UE għall-Bijodiversità għall-2030” (6) u tas-17 ta’ Settembru 2020“Inżidu l-ambizzjoni klimatika tal-Ewropa għall-2030 — Ninvestu f’futur newtrali għall-klima għall-benefiċċju tal-poplu tagħna” (7), f’konformità mal-ambizzjonijiet usa’ tal-Unjoni għall-bijodiversità u n-newtralità klimatika, bil-komunikazzjoni mill-Kummissjoni tal-24 ta’ Frar 2021 “Nibnu Ewropa reżiljenti għall-klima — l-Istrateġija l-ġdida tal-UE dwar l-Adattament għat-Tibdil fil-Klima (8), u bl-Istrateġija l-ġdida għall-Foresti ppjanata fl-2021, il-kriterji tekniċi ta’ skrinjar għall-attivitajiet tal-foresti għandhom jiġu kkomplementati, riveduti u fejn meħtieġ riveduti fil-mument tal-adozzjoni tal-att delegat imsemmi fl-Artikolu 15(2) tar-Regolament (UE) 2020/852. Dawk il-kriterji tekniċi ta’ skrinjar jenħtieġ li jiġu rieżaminati biex iqisu aħjar il-prattiki favur il-bijodiversità li qed jiġu żviluppati bħal pereżempju l-forestrija qrib in-natura.

(18)

Minħabba l-importanza tiegħu għat-tnaqqis tal-emissjonijiet ta’ gassijiet serra u għat-tisħiħ tal-bjar ta’ karbonju fl-art, ir-restawr tal-artijiet mistagħdra għandu potenzjal li jikkontribwixxi sostanzjalment għall-mitigazzjoni tat-tibdil fil-klima. Ir-restawr tal-artijiet mistagħdra jista’ jġib ukoll benefiċċji għall-adattament għat-tibdil fil-klima, inkluż permezz ta’ lqugħ kontra l-impatti tat-tibdil fil-klima, u jgħin sabiex ireġġa’ lura t-telf tal-bijodiversità u sabiex jiġu ppreservati l-kwantità u l-kwalità tal-ilma. Sabiex tiġi żgurata l-koerenza mal-“Patt Ekoloġiku Ewropew”, mal-komunikazzjoni “It-tisħiħ tal-ambizzjoni klimatika tal-Ewropa għall-2030” u mal-Istrateġija tal-UE għall-Bijodiversità għall-2030, il-kriterji tekniċi ta’ skrinjar jenħtieġ li jkopru wkoll ir-restawr tal-artijiet mistagħdra.

(19)

Is-settur tal-manifattura jipproduċi madwar 21 % tal-emissjonijiet diretti tal-gassijiet serra fl-Unjoni (9). Huwa t-tielet l-akbar sors ta’ dawk l-emissjonijiet fl-Unjoni u għalhekk jista’ jkollu rwol ċentrali fil-mitigazzjoni tat-tibdil fil-klima. Fl-istess ħin, il-manifattura tista’ tkun settur importanti li jippermetti l-evitar u t-tnaqqis tal-emissjonijiet ta’ gassijiet serra f’setturi oħra tal-ekonomija billi jimmanifattura l-prodotti u t-teknoloġiji li dawk is-setturi l-oħra jeħtieġu sabiex isiru jew jibqgħu setturi b’livell baxx ta’ emissjonijiet ta’ karbonju. Għalhekk, jenħtieġ li l-kriterji tekniċi ta’ skrinjar għas-settur tal-manifattura jiġu speċifikati kemm għall-attivitajiet ta’ manifattura assoċjati mal-ogħla livelli ta’ emissjonijiet ta’ gassijiet serra kif ukoll għall-manifattura ta’ prodotti u ta’ teknoloġiji b’livell baxx ta’ emissjonijiet ta’ karbonju.

(20)

L-attivitajiet ta’ manifattura li għalihom ma hemm l-ebda alternattiva teknoloġikament u ekonomikament fattibbli b’livell baxx ta’ emissjonijiet tal-karbonju iżda li jappoġġaw it-tranżizzjoni lejn ekonomija newtrali għall-klima jenħtieġ li jitqiesu bħala attivitajiet ekonomiċi tranżizzjonali, kif imsemmi fl-Artikolu 10(2) tar-Regolament (UE) 2020/852. Sabiex jitħeġġeġ it-tnaqqis tal-emissjonijiet ta’ gassijiet serra, il-limiti tal-kriterji tekniċi ta’ skrinjar għal dawk l-attivitajiet jenħtieġ li jiġu stabbiliti f’livell li jista’ jinkiseb biss minn dawk bl-aqwa prestazzjoni f’kull settur, fil-biċċa l-kbira tal-każijiet fuq il-bażi tal-emissjonijiet ta’ gassijiet serra għal kull unità ta’ output prodotta.

(21)

Sabiex jiġi żgurat li l-attivitajiet ta’ manifattura tranżizzjonali kif imsemmi fl-Artikolu 10(2) tar-Regolament (UE) 2020/852 jibqgħu fuq perkors kredibbli lejn id-dekarbonizzazzjoni u f’konformità mal-Artikolu 19(5) ta’ dak ir-Regolament, jenħtieġ li l-kriterji tekniċi ta’ skrinjar għal dawk l-attivitajiet ekonomiċi jiġu rieżaminati mill-inqas, kull tliet snin. Dak ir-rieżami jenħtieġ li jinkludi analiżi ta’ jekk il-kriterji tekniċi ta’ skrinjar humiex mirfuda mill-istandards l-aktar rilevanti u jekk l-emissjonijiet tul iċ-ċiklu tal-ħajja minn dawk l-attivitajiet humiex ikkunsidrati b’mod suffiċjenti. Dik ir-reviżjoni għandha tivvaluta wkoll l-użu potenzjali tal-karbonju maqbud, fid-dawl tal-iżvilupp teknoloġiku. Għall-manifattura tal-ħadid u l-azzar, data u evidenzi ġodda minn proċessi pilota tal-azzar b’livell baxx ta’ karbonju li jużaw l-idroġenu għandhom jiġu kkunsidrati aktar u l-użu tal-iskema tal-UE għall-iskambju ta’ kwoti tal-emissjonijiet u ta’ punti ta’ riferiment possibbli oħra fil-kriterji tekniċi ta’ skrinjar għandhom jiġu vvalutati aktar.

(22)

Għall-attivitajiet tal-manifattura li għandhom jitqiesu bħala l-attivitajiet ta’ faċilitazzjoni msemmija fil-punt (i) tal-Artikolu 10(1) tar-Regolament (UE) 2020/852, il-kriterji tekniċi ta’ skrinjar jenħtieġ li jkunu bbażati b’mod predominanti fuq in-natura tal-prodotti manifatturati, flimkien, fejn xieraq, ma’ limiti kwantitattivi addizzjonali sabiex jiġi żgurat li dawk il-prodotti jkunu jistgħu jagħtu kontribut sostanzjali sabiex jiġu evitati jew jitnaqqsu l-emissjonijiet ta’ gassijiet serra f’setturi oħra. Sabiex jiġi rifless il-fatt li tingħata prijorità lill-attivitajiet li għandhom l-akbar potenzjal li jevitaw il-produzzjoni ta’ emissjonijiet ta’ gassijiet serra, li jnaqqsu tali emissjonijiet jew li jżidu l-assorbimenti ta’ gassijiet serra u l-ħżin ta’ karbonju fit-tul, l-attivitajiet tal-manifattura ta’ faċilitazzjoni jenħtieġ li jiffokaw fuq il-manifattura ta’ prodotti li huma meħtieġa għat-twettiq tal-attivitajiet ekonomiċi.

(23)

Il-manifattura tat-tagħmir elettriku għall-elettriku għandha rwol importanti għat-titjib, l-użu u l-kumpens tal-fluttwazzjonijiet tal-elettriku pprovduti mis-sorsi tal-enerġija rinnovabbli fil-grilji elettriċi tal-Unjoni, l-iċċarġjar mill-ġdid tal-vetturi b’emissjonijiet żero u l-użu ta’ applikazzjonijiet intelliġenti u ekoloġiċi. Fl-istess ħin, il-manifattura tat-tagħmir elettriku għall-elettriku tista’ tippermetti l-iżvilupp tal-kunċett ta’ akkomodazzjoni intelliġenti bil-għan li jiġi promoss aktar l-użu ta’ sorsi ta’ enerġija rinnovabbli u l-ġestjoni tajba tat-tagħmir domestiku. Għalhekk jista’ jkun meħtieġ li jiġu kkomplementati l-kriterji tekniċi ta’ skrinjar fis-settur tal-manifattura u li jiġi vvalutat il-potenzjal tal-manifattura tat-tagħmir elettriku biex jingħata kontribut sostanzjali għall-mitigazzjoni tat-tibdil fil-klima u l-adattament għat-tibdil fil-klima.

(24)

Miżuri ta’ effiċjenza enerġetika u miżuri oħra ta’ mitigazzjoni tat-tibdil fil-klima, bħall-użu ta’ teknoloġiji tal-enerġija rinnovabbli fuq il-post, u teknoloġiji tal-ogħla livell eżistenti jistgħu jwasslu għal tnaqqis sinifikanti fl-emissjonijiet ta’ gassijiet serra fis-settur tal-manifattura. Għalhekk, dawk il-miżuri jista’ jkollhom rwol importanti biex jgħinu l-attivitajiet ekonomiċi fis-settur tal-manifattura li għalihom jenħtieġ li jiġu stabbiliti kriterji tekniċi ta’ skrinjar, biex jilħqu l-istandards ta’ prestazzjoni u l-livelli limitu rispettivi tagħhom għal kontribut sostanzjali għall-mitigazzjoni tat-tibdil fil-klima.

(25)

Is-settur tal-enerġija jirrappreżenta madwar 22 % tal-emissjonijiet diretti tal-gassijiet serra fl-Unjoni u għal madwar 75 % ta’ dawk l-emissjonijiet meta jitqies l-użu tal-enerġija f’setturi oħra. Għalhekk, għandu rwol importanti fil-mitigazzjoni tat-tibdil fil-klima. Is-settur tal-enerġija għandu potenzjal sinifikanti sabiex inaqqas l-emissjonijiet ta’ gassijiet serra, u diversi attivitajiet f’dak is-settur jaġixxu bħala attivitajiet li jiffaċilitaw it-tranżizzjoni tas-settur tal-enerġija lejn elettriku jew sħana rinnovabbli jew b’livell baxx ta’ emissjonijiet ta’ karbonju. Għalhekk, huwa xieraq li jiġu stabbiliti kriterji tekniċi ta’ skrinjar għal firxa wiesgħa ta’ attivitajiet relatati mal-katina tal-provvista tal-enerġija, li jvarjaw mill-ġenerazzjoni tal-elettriku jew tas-sħana minn sorsi differenti, permezz ta’ networks ta’ trażmissjoni u ta’ distribuzzjoni sal-ħżin, kif ukoll pompi tas-sħana u l-manifattura tal-bijogass u tal-bijofjuwils.

(26)

Il-kriterji tekniċi ta’ skrinjar biex jiġi ddeterminat jekk l-attivitajiet ta’ ġenerazzjoni tal-elettriku jew tas-sħana, li jinkludu l-attivitajiet ta’ koġenerazzjoni, jikkontribwixxux sostanzjalment għall-mitigazzjoni tat-tibdil fil-klima jenħtieġ li jiżguraw li jitnaqqsu jew jiġu evitati l-emissjonijiet ta’ gassijiet serra. Il-kriterji tekniċi ta’ skrinjar ibbażati fuq l-emissjonijiet ta’ gassijiet serra jenħtieġ li jindikaw it-triq lejn id-dekarbonizzazzjoni għal dawk l-attivitajiet. Il-kriterji tekniċi ta’ skrinjar għall-attivitajiet li jiffaċilitaw id-dekarbonizzazzjoni fit-tul jenħtieġ li jkunu bbażati l-aktar fuq in-natura tal-attività jew fuq l-aħjar teknoloġiji disponibbli.

(27)

Ir-Regolament (UE) 2020/852 jirrikonoxxi l-importanza ta’ “enerġija newtrali għall-klima” u jirrikjedi li l-Kummissjoni tivvaluta l-kontribut potenzjali u l-fattibbiltà tat-teknoloġiji eżistenti rilevanti kollha. Għall-enerġija nukleari, dik il-valutazzjoni għadha għaddejja u, hekk kif jitlesta l-proċess iddedikat, il-Kummissjoni se ssegwi abbażi tar-riżultati tagħha fil-kuntest ta’ dan ir-Regolament.

(28)

Il-limiti legali għall-attivitajiet tranżizzjonali stabbiliti fl-Artikolu 10(2) tar-Regolament (UE) 2020/852 jipprovdu restrizzjonijiet fir-rigward ta’ attivitajiet b’emissjonijiet għoljin ta’ gassijiet serra b’potenzjal kbir għat-tnaqqis tal-emissjonijiet. Tali attivitajiet tranżizzjonali jenħtieġ li jagħtu kontribut sostanzjali għall-mitigazzjoni tat-tibdil fil-klima fejn ma teżisti l-ebda alternattiva teknoloġikament u ekonomikament fattibbli b’livell baxx ta’ karbonju, dment li jkunu kompatibbli ma’ perkors biex iż-żieda fit-temperatura tiġi limitata għal 1,5 °C ogħla mil-livelli preindustrijali, jirriflettu l-aħjar prestazzjoni fil-klassi, ma jfixklux l-iżvilupp u l-użu ta’ alternattivi b’livell baxx ta’ karbonju u ma jwasslux għal intrappolament ta’ assi b’intensità qawwija ta’ karbonju. Barra minn hekk, l-Artikolu 19 tal-istess Regolament jirrikjedi, b’mod partikolari, li l-kriterji tekniċi ta’ skrinjar jenħtieġ li jkunu bbażati fuq evidenza xjentifika konklużiva. Meta l-attivitajiet tal-gass naturali jissodisfaw dawk ir-rekwiżiti, dawn se jiġu inklużi f’att delegat futur. Għal dawn l-attivitajiet, il-kriterji tekniċi ta’ skrinjar għall-valutazzjoni tal-kontribut sostanzjali għall-mitigazzjoni tat-tibdil fil-klima u “tagħmilx ħsara sinifikanti” lil objettivi ambjentali oħra se jiġu speċifikati f’dak l-att delegat futur. L-attivitajiet li ma jissodisfawx dawn ir-rekwiżiti ma jistgħux jiġu rikonoxxuti skont ir-Regolament (UE) 2020/852. Sabiex jiġi rikonoxxut ir-rwol tal-gass naturali bħala teknoloġija importanti fit-tnaqqis tal-emissjonijiet tal-gassijiet serra, il-Kummissjoni se tikkunsidra leġiżlazzjoni speċifika biex tiżgura li l-attivitajiet li jikkontribwixxu għat-tnaqqis tal-emissjonijiet ma jiġux imċaħħda minn finanzjament xieraq.

(29)

Il-kriterji tekniċi ta’ skrinjar għall-attivitajiet tal-ġenerazzjoni tal-elettriku jew tas-sħana kif ukoll għan-networks tat-trażmissjoni u tad-distribuzzjoni jenħtieġ li jiżguraw koerenza mal-Komunikazzjoni mill-Kummissjoni tal-14 ta’ Ottubru 2020 dwar strateġija tal-UE biex jitnaqqsu l-emissjonijiet tal-metan (10). Għalhekk, jista’ jkun meħtieġ li dawk il-kriterji tekniċi ta’ skrinjar jiġu rieżaminati, ikkomplementati u, fejn meħtieġ, riveduti sabiex jirriflettu kwalunkwe metrika u rekwiżit futuri stabbiliti bħala segwitu għal dik l-istrateġija.

(30)

Il-kriterji tekniċi ta’ skrinjar għall-produzzjoni tat-tisħin, tat-tkessiħ u tal-enerġija mill-bijoenerġija u għall-produzzjoni ta’ bijofjuwils u ta’ bijogass għat-trasport jenħtieġ li jkunu konsistenti mal-qafas komprensiv ta’ sostenibbiltà għal dawk is-setturi stabbiliti skont id-Direttiva (UE) 2018/2001 tal-Parlament Ewropew u tal-Kunsill (11), li tistabbilixxi r-rekwiżiti għal ħsad sostenibbli, għal kontabbiltà tal-karbonju u għal iffrankar tal-emissjonijiet ta’ gassijiet serra.

(31)

Fis-segwitu tal-Patt Ekoloġiku Ewropew, il-proposta dwar il-Liġi Ewropea dwar il-Klima (12), l-Istrateġija tal-UE għall-Bijodiversità għall-2030, u f’konformità mal-ambizzjonijiet tal-Unjoni dwar il-bijodiversità u n-newtralità klimatika, il-kriterji tekniċi ta’ skrinjar għall-attivitajiet tal-bijoenerġija jenħtieġ li jiġu kkomplementati, rieżaminati u fejn meħtieġ riveduti biex iqisu l-aħħar bażi ta’ evidenza u l-iżviluppi tal-politika fiż-żmien tal-adozzjoni tal-att delegat imsemmi fl-Artikolu 15(2) tar-Regolament 2020/852 u b’kont meħud tad-dritt rilevanti tal-Unjoni, inkluż id-Direttiva (UE) 2018/2001 u r-reviżjonijiet futuri tagħha.

(32)

L-emissjonijiet ta’ gassijiet serra fl-Unjoni li ġejjin mis-settur tal-ilma, tad-drenaġġ, tal-iskart u tar-rimedju huma relattivament żgħar. Madankollu, dan is-settur xorta għandu potenzjal kbir li jikkontribwixxi għat-tnaqqis tal-emissjonijiet ta’ gassijiet serra f’setturi oħra, b’mod partikolari permezz tal-provvista ta’ materja prima sekondarja li tissostitwixxi materja prima verġni, permezz tas-sostituzzjoni ta’ prodotti, ta’ fertilizzanti u ta’ enerġija bbażati fuq il-fossili, u permezz tat-trasport u tal-ħżin permanenti tad-diossidu tal-karbonju maqbud. Barra minn hekk, l-attivitajiet li jinvolvu d-diġestjoni anaerobika kif ukoll l-ikkompostjar ta’ bijoskart miġbur separatament li jevitaw ir-rimi f’landfills ta’ bijoskart huma partikolarment importanti għat-tnaqqis tal-emissjonijiet tal-metan. Għalhekk, jenħtieġ li l-kriterji tekniċi ta’ skrinjar għall-attivitajiet tal-iskart jirrikonoxxu dawn l-attivitajiet bħala attivitajiet li jikkontribwixxu sostanzjalment għall-mitigazzjoni tat-tibdil fil-klima, dment li dawn l-attivitajiet japplikaw uħud mill-aħjar prattiki għal dan is-settur. Dawn il-kriterji tekniċi ta’ skrinjar jenħtieġ li jiżguraw ukoll li l-għażliet għat-trattament tal-iskart ikunu konformi ma’ livelli ogħla tal-ġerarkija tal-iskart. Jenħtieġ li l-kriterji tekniċi ta’ skrinjar jirrikonoxxu bħala li jikkontribwixxu b’mod sostanzjali għall-mitigazzjoni tat-tibdil fil-klima dawk l-attivitajiet li jipproċessaw sehem minimu stabbilit b’mod uniformi ta’ skart mhux perikoluż separat miġbur separatament f’materja prima sekondarja. Madankollu, f’dan l-istadju mhuwiex possibbli li l-kriterji tekniċi ta’ skrinjar ibbażati fuq mira stabbilita b’mod uniformi għar-riproċessar tal-iskart jindirizzaw bis-sħiħ il-potenzjal ta’ mitigazzjoni tat-tibdil fil-klima ta’ flussi ta’ materjal individwali. Għalhekk, jista’ jkun meħtieġ li dawk il-kriterji tekniċi ta’ skrinjar jiġu vvalutati u rieżaminati ulterjorment. Il-mira stabbilita b’mod uniformi jenħtieġ li tkun mingħajr preġudizzju għall-miri tal-immaniġġjar tal-iskart indirizzati lill-Istati Membri fil-leġiżlazzjoni tal-Unjoni dwar l-iskart. Għal attivitajiet relatati mal-ġbir, it-trattament u l-provvista tal-ilma kif ukoll sistemi ċentralizzati tat-trattament tal-ilma mormi, dawk il-kriterji tekniċi ta’ skrinjar jenħtieġ li jqisu l-prestazzjoni assoluta u l-miri ta’ titjib tal-prestazzjoni relattivi fir-rigward tal-konsum tal-enerġija u metriċi alternattivi, fejn rilevanti, bħal-livelli ta’ tnixxija fis-sistemi tal-provvista tal-ilma.

(33)

L-operazzjonijiet tat-trasport jikkunsmaw terz tal-enerġija kollha fl-Unjoni u jammontaw għal madwar 23 % tal-emissjonijiet diretti totali ta’ gassijiet serra fl-Unjoni. Għalhekk, id-dekarbonizzazzjoni tal-flotta u tal-infrastruttura tat-trasport jista’ jkollha rwol ċentrali fil-mitigazzjoni tat-tibdil fil-klima. Il-kriterji tekniċi ta’ skrinjar għas-settur tat-trasport jenħtieġ li jiffokaw fuq it-tnaqqis tas-sorsi ewlenin ta’ emissjonijiet minn dak is-settur, filwaqt li jikkunsidraw ukoll il-ħtieġa li t-trasport tal-persuni u tal-oġġetti jiġi spustat lejn modi b’livelli aktar baxxi ta’ emissjonijiet u għall-ħolqien ta’ infrastruttura li tippermetti mobbiltà nadifa. Għalhekk, jenħtieġ li l-kriterji tekniċi ta’ skrinjar għas-settur tat-trasport jiffokaw fuq il-prestazzjoni f'mezz wieħed tat-trasport, filwaqt li jqisu wkoll il-prestazzjoni ta’ dan il-mod tat-trasport meta mqabbel ma’ modi oħra tat-trasport.

(34)

Minħabba l-potenzjal tagħhom li jnaqqsu l-emissjonijiet ta’ gassijiet serra tagħhom u, b’hekk, jikkontribwixxu sabiex is-settur tat-trasport isir aktar ekoloġiku, it-trasport marittimu u l-avjazzjoni jikkostitwixxu modi importanti tat-trasport għat-tranżizzjoni lejn ekonomija b’livell baxx ta’ emissjonijiet ta’ karbonju. Skont il-komunikazzjoni mill-Kummissjoni tad-9 ta’ Diċembru 2020“Strateġiji ta’ Mobbiltà Sostenibbli u Intelliġenti - li jqiegħdu t-trasport Ewropew fit-triq it-tajba għall-futur” (13), il-bastimenti b’emissjonijiet żero huma mistennija li jkunu lesti għas-suq sal-2030. Skont dik l-istrateġija, inġenji tal-ajru kbar b’emissjonijiet żero huma mistennija li jkunu lesti għas-suq sal-2035 għal distanzi qosra, filwaqt li għal distanzi itwal id-dekarbonizzazzjoni hija mistennija li tiddependi fuq fjuwils rinnovabbli u b’livell baxx ta’ karbonju. Saru wkoll studji separati dwar kriterji ta’ finanzjament sostenibbli għal dawk is-setturi. Għalhekk, it-trasport marittimu għandu jiġi kkunsidrat bħala attività ekonomika tranżitorja kif imsemmija fl-Artikolu 10(2) tar-Regolament (UE) 2020/852. It-trasport marittimu huwa wieħed mill-mezzi l-inqas intensivi ta’ karbonju għat-trasport tal-merkanzija. Sabiex jiġi żgurat trattament ugwali tat-trasport marittimu meta mqabbel ma’ modi oħra ta’ trasport, jenħtieġ li jiġu stabbiliti kriterji tekniċi ta’ skrinjar għat-trasport marittimu u jenħtieġ li dawn ikunu applikabbli sa tmiem l-2025. Madankollu jista’ jkun meħtieġ li t-tbaħħir marittimu jiġi vvalutat aktar u, fejn xieraq, li jiġu stabbiliti kriterji tekniċi ta’ skrinjar għat-trasport marittimu applikabbli mill-2026. Jista’ jkun meħtieġ ukoll li tkompli tiġi vvalutata l-avjazzjoni u, fejn xieraq, li jiġu stabbiliti kriterji tekniċi ta’ skrinjar rilevanti. Barra minn hekk, jenħtieġ li jiġu stabbiliti l-kriterji tekniċi ta’ skrinjar għall-infrastruttura tat-trasport b’livell baxx ta’ karbonju għal ċerti modi ta’ trasport. Madankollu, fid-dawl tal-potenzjal ta’ dik l-infrastruttura tat-trasport li tikkontribwixxi għall-bidla modali, jista’ jkun meħtieġ li jiġu vvalutati u fejn xieraq jiġu stabbiliti kriterji tekniċi ta’ skrinjar rilevanti għall-infrastruttura ġenerali li hija essenzjali għall-modi tat-trasport b’livell baxx ta’ karbonju, b’mod partikolari l-passaġġi fuq l-ilma interni. Skont l-eżitu tal-valutazzjoni teknika, jenħtieġ li jiġu stabbiliti wkoll kriterji tekniċi ta’ skrinjar rilevanti għall-attivitajiet ekonomiċi msemmija f’din il-premessa fiż-żmien tal-adozzjoni tal-att delegat imsemmi fl-Artikoli 12(2), 13(2), 14(2) u 15(2) tar-Regolament (UE) 2020/852.

(35)

Sabiex jiġi żgurat li l-attivitajiet tat-trasport meqjusa bħala sostenibbli ma jiffaċilitawx l-użu tal-fjuwils fossili, il-kriterji tekniċi ta’ skrinjar għall-attivitajiet rilevanti jenħtieġ li jeskludu l-assi, l-operazzjonijiet u l-infrastruttura ddedikati għat-trasport tal-fjuwils fossili. Filwaqt li jiġi applikat dan il-kriterju, huwa meħtieġ li jiġu rikonoxxuti l-użi multipli, is-sjieda differenti, l-arranġamenti tal-utenti u r-rati ta’ taħlit tal-fjuwils, f’konformità mal-prattiki tas-suq eżistenti rilevanti. Il-pjattaforma dwar il-Finanzi Sostenibbli għandha tivvaluta l-użu ta’ dan il-kriterju fil-kuntest tat-twettiq tal-mandat tagħha.

(36)

Il-bini fis-setturi kollha fl-Unjoni huwa responsabbli għal 40 % tal-konsum tal-enerġija u għal 36 % tal-emissjonijiet ta’ karbonju. Għalhekk, il-bini jistgħu jkollhom rwol importanti fil-mitigazzjoni tat-tibdil fil-klima. Għalhekk, jenħtieġ li jiġu stabbiliti kriterji tekniċi ta’ skrinjar għall-kostruzzjoni ta’ bini ġdid, għar-rinnovazzjoni ta’ bini, għall-installazzjoni ta’ tagħmir differenti tal-effiċjenza enerġetika, għal sorsi rinnovabbli fuq il-post, għall-forniment ta’ servizzi tal-enerġija, u għall-akkwist u għas-sjieda ta’ bini. Dawk il-kriterji tekniċi ta’ skrinjar jenħtieġ li jkunu bbażati fuq l-impatt potenzjali ta’ dawk l-attivitajiet, fuq ir-rendiment tal-bini fl-użu tal-enerġija u fuq l-emissjonijiet ta’ gassijiet serra relatati u fuq il-karbonju inkorporat. Għal bini ġdid, jista’ jkun meħtieġ li jiġu rieżaminati l-kriterji tekniċi ta’ skrinjar biex jiġi żgurat li dawk il-kriterji jibqgħu allinjati mal-miri tal-Unjoni dwar il-klima u l-enerġija.

(37)

Il-kostruzzjoni ta’ assi jew ta’ faċilità li tkun parti integrali minn attività, li għaliha jenħtieġ li jiġu stabbiliti kriterji tekniċi ta’ skrinjar li jiddeterminaw taħt liema kundizzjonijiet dik l-attività tikkwalifika bħala li tikkontribwixxi sostanzjalment għall-mitigazzjoni tat-tibdil fil-klima, tista’ tirrappreżenta kundizzjoni importanti għat-twettiq ta’ dik l-attività ekonomika. Għalhekk, xieraq li l-kostruzzjoni ta’ tali assi jew faċilitajiet tiġi inkluża bħala parti mill-attività li għaliha tkun rilevanti din il-kostruzzjoni, b’mod partikolari għall-attivitajiet fis-settur tal-enerġija, fis-settur tal-ilma, tad-drenaġġ, tal-iskart u tas-settur tar-rimedju kif ukoll fis-settur tat-trasport.

(38)

Is-settur tal-informazzjoni u tal-komunikazzjoni huwa settur li qed jikber b’mod kostanti u jirrappreżenta sehem dejjem akbar fl-emissjonijiet ta’ gassijiet serra. Fl-istess ħin, it-teknoloġiji tal-informazzjoni u tal-komunikazzjoni għandhom il-potenzjal li jikkontribwixxu għall-mitigazzjoni tat-tibdil fil-klima u li jnaqqsu l-emissjonijiet ta’ gassijiet serra f’setturi oħra, fosthom billi jipprovdu soluzzjonijiet li jistgħu jgħinu fit-teħid ta’ deċiżjonijiet li jippermettu tnaqqis fl-emissjonijiet ta’ gassijiet serra. Għalhekk, jenħtieġ li jiġu stabbiliti kriterji tekniċi ta’ skrinjar għall-attivitajiet ta’ proċessar u ta’ hosting tad-data li jeħilsu volumi kbar ta’ gassijiet serra, u għal soluzzjonijiet msejsa fuq id-data li jippermettu tnaqqis fl-emissjonijiet ta’ gassijiet serra f’setturi oħra. Il-kriterji tekniċi ta’ skrinjar għal dawk l-attivitajiet jenħtieġ li jkunu bbażati fuq l-aħjar prattiki u standards f’dak is-settur. Jista’ jkun li jkollhom bżonn jiġu rieżaminati u aġġornati fil-futur sabiex iqisu l-potenzjal ta’ tnaqqis ta’ gassijiet serra minn durabilità akbar tas-soluzzjonijiet tal-hardware tat-teknoloġiji tal-informazzjoni u tal-komunikazzjoni u l-potenzjal li t-teknoloġiji diġitali jiġu varati f’kull settur direttament sabiex jippermettu t-tnaqqis tal-emissjonijiet ta’ gassijiet serra. Barra minn hekk, l-introduzzjoni u t-tħaddim tan-netwerks tal-komunikazzjonijiet elettroniċi jużaw ammonti konsiderevoli ta’ enerġija u għandhom il-potenzjal li jġibu tnaqqis sinifikanti fl-emissjonijiet tal-gassijiet serra. Għalhekk jista’ jkun meħtieġ li dawk l-attivitajiet jiġu vvalutati u li jiġu stabbiliti kriterji tekniċi ta’ skrinjar rilevanti, fejn xieraq.

(39)

Barra minn hekk, is-soluzzjonijiet tat-teknoloġija tal-informazzjoni u tal-komunikazzjoni li huma parti integrali minn dawk l-attivitajiet ekonomiċi li għalihom jenħtieġ li jiġu stabbiliti kriterji tekniċi ta’ skrinjar għall-mitigazzjoni tat-tibdil fil-klima għall-prestazzjoni rispettiva tagħhom, jistgħu jkunu wkoll ta’ importanza partikolari biex jassistu lil dawk l-attivitajiet differenti biex jilħqu l-istandards u l-limiti stabbiliti skont dawk il-kriterji.

(40)

Ir-riċerka, l-iżvilupp u l-innovazzjoni għandhom il-potenzjal li jippermettu lil setturi oħra jilħqu l-miri rispettivi tagħhom ta’ mitigazzjoni tat-tibdil fil-klima. Għalhekk, jenħtieġ li l-kriterji tekniċi ta’ skrinjar għall-attivitajiet ta’ riċerka, ta’ żvilupp u ta’ innovazzjoni jiffokaw fuq il-potenzjal ta’ soluzzjonijiet, ta’ proċessi, ta’ teknoloġiji u ta’ prodotti oħra għat-tnaqqis tal-emissjonijiet ta’ gassijiet serra. Ir-riċerka ddedikata għal attivitajiet abilitanti kif imsemmi fl-Artikolu 10(1), il-punt (i) tar-Regolament (UE) 2020/852 jista’ jkollha wkoll rwol importanti biex dawk l-attivitajiet ekonomiċi u l-attivitajiet fil-mira tagħhom ikunu jistgħu jnaqqsu b’mod sostanzjali l-emissjonijiet tagħhom ta’ gassijiet serra jew itejbu l-fattibbiltà teknoloġika u ekonomika tagħhom u fl-aħħar mill-aħħar jiffaċilitaw iż-żieda tagħhom. Ir-riċerka jista’ jkollha wkoll rwol importanti fid-dekarbonizzazzjoni ulterjuri tal-attivitajiet tranżizzjonali kif imsemmi fl-Artikolu 10(2) tar-Regolament (UE) 2020/852, billi tippermetti li dawk l-attivitajiet jitwettqu b’livelli ta’ emissjonijiet ta’ gassijiet serra sostanzjalment aktar baxxi meta mqabbla mal-livelli limitu speċifikati fil-kriterji tekniċi ta’ skrinjar għal kontribuzzjoni sostanzjali għall-mitigazzjoni tat-tibdil fil-klima għal dawk l-attivitajiet.

(41)

Barra minn hekk, ir-riċerka, l-iżvilupp u l-innovazzjoni li huma parti integrali minn dawn l-attivitajiet ekonomiċi li għalihom ġew stabbiliti kriterji tekniċi ta’ skrinjar għal kontribut sostanzjali għall-mitigazzjoni tat-tibdil fil-klima għall-prestazzjoni rispettiva tagħhom, għandhom ikunu wkoll ta’ importanza partikolari fl-għoti ta’ assistenza f’dawk l-attivitajiet differenti sabiex jintlaħqu l-istandards u l-limiti stabbiliti taħt dawn il-kriterji.

(42)

Il-kriterji tekniċi ta’ skrinjar sabiex jiġi ddeterminat f’liema kundizzjonijiet attività ekonomika tikkwalifika bħala attività li tikkontribwixxi sostanzjalment għall-adattament għat-tibdil fil-klima jenħtieġ li jirriflettu l-fatt li t-tibdil fil-klima x’aktarx li jaffettwa s-setturi kollha tal-ekonomija. B’riżultat ta’ dan, is-setturi kollha se jkollhom bżonn jiġu adattati għall-impatt negattiv tal-klima attwali u l-klima futura mistennija. Madankollu, jeħtieġ li jiġi żgurat li attività ekonomika li tikkontribwixxi b’mod sostanzjali għall-adattament għat-tibdil fil-klima ma tikkawża l-ebda ħsara sinifikanti lil ebda wieħed mill-objettivi ambjentali l-oħra stabbiliti fl-Artikolu 9 tar-Regolament (UE) 2020/852. Għalhekk huwa xieraq li l-ewwel jiġu stabbiliti kriterji tekniċi ta’ skrinjar għall-adattament għat-tibdil fil-klima għal dawk is-setturi u l-attivitajiet ekonomiċi li huma koperti mill-kriterji tekniċi ta’ skrinjar għall-mitigazzjoni tat-tibdil fil-klima, inklużi l-kriterji rilevanti “tagħmilx ħsara sinifikanti” għall-objettivi ambjentali. Id-deskrizzjonijiet tal-attivitajiet ekonomiċi meqjusa bħala li jikkontribwixxu b’mod sostanzjali għall-adattament għat-tibdil fil-klima għandhom jikkorrispondu mal-kamp ta’ applikazzjoni li għalih jistgħu jiġu ddeterminati l-kriterji xierqa “tagħmilx ħsara sinifikanti”. Fid-dawl tal-ħtieġa li tiżdied ir-reżiljenza ġenerali tal-ekonomija għall-klima, jenħtieġ li fil-futur jiġu żviluppati kriterji tekniċi ta’ skrinjar, inklużi kriterji rilevanti “tagħmilx ħsara sinifikanti” għal attivitajiet ekonomiċi addizzjonali.

(43)

Jenħtieġ li l-kriterji tekniċi ta’ skrinjar jiżguraw li l-firxa l-aktar wiesgħa possibbli ta’ infrastrutturi kritiċi, inkluż b’mod partikolari l-infrastruttura tat-trażmissjoni jew tal-ħżin tal-enerġija, jew l-infrastruttura tat-trasport tiġi adattata għall-impatt negattiv tal-klima attwali u l-klima futura mistennija, u b’hekk jiġu evitati impatti negattivi serji fuq is-saħħa, is-sikurezza, is-sigurtà jew il-benesseri ekonomiku taċ-ċittadini jew il-funzjonament effettiv tal-gvernijiet fl-Istati Membri. Madankollu jista’ jkun meħtieġ li jiġu riveduti dawk il-kriterji tekniċi ta’ skrinjar biex jitqiesu aħjar l-ispeċifiċitajiet tal-infrastruttura għad-difiża kontra l-għargħar.

(44)

Barra minn hekk, jenħtieġ li jiġu stabbiliti wkoll kriterji tekniċi ta’ skrinjar għall-attivitajiet tal-edukazzjoni, tas-saħħa tal-bniedem, tal-ħidma soċjali, tal-arti, tad-divertiment u tar-rikreazzjoni. Dawn l-attivitajiet jipprovdu servizzi u soluzzjonijiet essenzjali għaż-żieda tar-reżiljenza kollettiva tas-soċjetà kollha, jistgħu jżidu l-litteriżmu u s-sensibilizzazzjoni klimatiċi.

(45)

Il-kriterji tekniċi ta’ skrinjar biex jiġi ddeterminat jekk attività ekonomika tikkwalifikax bħala li tikkontribwixxi b’mod sostanzjali għall-adattament għat-tibdil fil-klima billi jiġu inklużi soluzzjonijiet ta’ adattament f’konformità mal-Artikolu 11(1), il-punt (a) tar-Regolament (UE) 2020/852 jenħtieġ li jkollhom l-għan li jżidu r-reżiljenza tal-attivitajiet ekonomiċi kontra r-riskji klimatiċi identifikati li huma materjali għal dawk l-attivitajiet. Il-kriterji tekniċi ta’ skrinjar jenħtieġ li jirrikjedu li l-operaturi ekonomiċi konċernati jwettqu valutazzjoni tar-riskju tat-tibdil fil-klima u jimplimentaw soluzzjonijiet ta’ adattament li jnaqqsu r-riskji l-aktar importanti identifikati f’din il-valutazzjoni. Il-kriterji tekniċi ta’ skrinjar jenħtieġ li jqisu wkoll in-natura speċifika għall-kuntest u għall-post tal-ħtiġijiet u tas-soluzzjonijiet ta’ adattament. Barra minn hekk, il-kriterji tekniċi ta’ skrinjar jenħtieġ li jiżguraw l-integrità tal-objettivi ambjentali u klimatiċi u jenħtieġ li ma jkunux preskrittivi b’mod sproporzjonat fir-rigward tat-tip ta’ soluzzjonijiet implimentati. Dawk il-kriterji tekniċi ta’ skrinjar jenħtieġ li jqisu l-ħtieġa li jiġu evitati diżastri relatati mal-klima u mat-temp u li jiġi ġestit ir-riskju ta’ tali diżastri u li tiġi żgurata r-reżiljenza tal-infrastruttura kritika, f’konformità mad-dritt rilevanti tal-Unjoni relatat mal-valutazzjoni tar-riskju u mal-mitigazzjoni tal-effetti ta’ tali diżastri.

(46)

Il-kriterji tekniċi ta’ skrinjar biex jiġi ddeterminat jekk attività ekonomika tikkwalifikax bħala li tikkontribwixxi b’mod sostanzjali għall-adattament għat-tibdil fil-klima billi jiġu pprovduti soluzzjonijiet ta’ adattament skont l-Artikolu 11(1), il-punt (b) tar-Regolament (UE) 2020/852 jenħtieġ li jiġu stabbiliti għal attivitajiet ta’ inġinerija u konsulenza teknika relatata ddedikata għall-adattament għat-tibdil fil-klima, ir-riċerka, l-iżvilupp u l-innovazzjoni, assigurazzjoni mhux tal-ħajja li tikkonsisti f’sottoskrizzjoni ta’ perikli relatati mal-klima, u riassigurazzjoni. Dawk l-attivitajiet għandhom il-potenzjal li jipprovdu soluzzjonijiet ta’ adattament li jikkontribwixxu sostanzjalment għall-prevenzjoni jew it-tnaqqis tar-riskju tal-impatt negattiv tal-klima attwali u l-klima futura mistennija fuq in-nies, in-natura jew l-assi, mingħajr ma jiżdied ir-riskju ta’ impatt negattiv.

(47)

Jenħtieġ li l-kriterji tekniċi ta’ skrinjar jirrikonoxxu li ċerti attivitajiet ekonomiċi jistgħu jikkontribwixxu b’mod sostanzjali għall-adattament għat-tibdil fil-klima billi jipprovdu soluzzjonijiet ta’ adattament f’konformità mal-Artikolu 11(1), il-punt (b) tar-Regolament (UE) 2020/852, jew billi jinkludu soluzzjonijiet ta’ adattament f’konformità mal-Artikolu 11(1), il-punt (a), ta’ dak ir-Regolament. Il-kriterji tekniċi ta’ skrinjar għall-attivitajiet tal-forestrija, ir-restawr tal-artijiet mistagħdra, l-ipprogrammar u x-xandir, kif ukoll għall-edukazzjoni, l-attivitajiet kreattivi, tal-arti u tad-divertiment jenħtieġ li jirrikonoxxu dik il-possibbiltà. Dawk l-attivitajiet, filwaqt li għandhom jiġu adattati għall-impatt negattiv tal-klima attwali u l-klima futura mistennija, għandhom ukoll il-potenzjal li jipprovdu soluzzjonijiet ta’ adattament li jikkontribwixxu sostanzjalment għall-prevenzjoni jew it-tnaqqis tar-riskju ta’ dak l-impatt negattiv fuq in-nies, in-natura jew l-assi.

(48)

Il-kriterji tekniċi ta’ skrinjar biex jiġi ddeterminat jekk attività ekonomika tikkontribwixxix b’mod sostanzjali għall-adattament għat-tibdil fil-klima jenħtieġ li jiżguraw li l-attività ekonomika ssir reżiljenti għall-klima jew tipprovdi soluzzjonijiet għal attivitajiet oħra biex issir reżiljenti għall-klima. Fejn attività ekonomika ssir reżiljenti għall-klima, l-implimentazzjoni ta’ soluzzjonijiet fiżiċi u mhux fiżiċi li jnaqqsu b’mod sostanzjali r-riskji klimatiċi fiżiċi l-aktar importanti li huma materjali għal dik l-attività tirrappreżenta l-kontribut sostanzjali ta’ dik l-attività lejn l-adattament għat-tibdil fil-klima. Għalhekk huwa xieraq li n-nefqiet kapitali mġarrba għall-passi kollha meħtieġa biex l-attività tkun reżiljenti għat-tibdil fil-klima biss jenħtieġ li jitqiesu bħala l-proporzjon ta’ nefqa kapitali u operattiva relatata ma’ assi jew proċessi assoċjati ma’ attivitajiet ekonomiċi li jikkwalifikaw bħala ambjentalment sostenibbli u dak il-fatturat minn dik l-attività ekonomika li jkun sar reżiljenti jenħtieġ li ma jingħaddx bħala derivat minn prodotti jew servizzi assoċjati ma’ attivitajiet ekonomiċi li jikkwalifikaw bħala ambjentalment sostenibbli. Madankollu, meta n-negozju ewlieni tal-attivitajiet ekonomiċi li jippermettu l-adattament skont l-Artikolu 11(1)(b) tar-Regolament (UE) 2020/852 ikun li jipprovdi teknoloġiji, prodotti, servizzi, informazzjoni, jew prattiki bl-objettivi li jiżdied il-livell ta’ reżiljenza għar-riskji klimatiċi fiżiċi ta’ persuni oħra, in-natura, il-wirt kulturali, l-assi jew ta’ attivitajiet ekonomiċi oħra, minbarra n-nefqa kapitali, il-fatturat derivat minn prodotti jew servizzi assoċjati ma’ dawk l-attivitajiet ekonomiċi jenħtieġ li jitqies bħala proporzjon tal-fatturat derivat minn prodotti jew servizzi assoċjati ma’ attivitajiet ekonomiċi li jikkwalifikaw bħala ambjentalment sostenibbli.

(49)

Il-kriterji tekniċi ta’ skrinjar biex jiġi ddeterminat jekk l-attivitajiet ekonomiċi li jikkontribwixxu sostanzjalment għall-mitigazzjoni tat-tibdil fil-klima jew għall-adattament għat-tibdil fil-klima jikkawżawx ħsara sinifikanti lil xi wieħed mill-objettivi ambjentali l-oħra jenħtieġ li jimmiraw li jiżguraw li l-kontribut għal wieħed mill-objettivi ambjentali ma jsirx a skapitu ta’ objettivi ambjentali oħra. Għalhekk, il-kriterji ta’ “la tagħmilx ħsara sinifikanti” għandhom rwol essenzjali fl-iżgurar tal-integrità ambjentali tal-klassifikazzjoni ta’ attivitajiet ambjentalment sostenibbli. Il-kriterji ta’ “la tagħmilx ħsara sinifikanti” għal objettiv ambjentali partikolari jenħtieġ li jiġu speċifikati għal dawk l-attivitajiet li jippreżentaw riskju li jikkawżaw ħsara sinifikanti lil dan l-objettiv. Il-kriterji “la tagħmilx ħsara sinifikanti” jenħtieġ li jqisu r-rekwiżiti rilevanti u jibnu fuq id-dritt eżistenti tal-Unjoni.

(50)

Jenħtieġ li l-kriterji tekniċi ta’ skrinjar biex jiġi żgurat li l-attivitajiet li jikkontribwixxu b’mod sostanzjali għall-adattament għat-tibdil fil-klima ma jikkawżawx ħsara sinifikanti lill-mitigazzjoni tat-tibdil fil-klima, jiġu stabbiliti għal dawk l-attivitajiet li jippreżentaw riskju li jipproduċu emissjonijiet sinifikanti ta’ gassijiet serra filwaqt li jkollhom il-potenzjal li jikkontribwixxu b’mod sostanzjali għall-adattament għat-tibdil fil-klima.

(51)

It-tibdil fil-klima x’aktarx li jaffettwa s-setturi kollha tal-ekonomija. Għalhekk, jenħtieġ li l-kriterji tekniċi ta’ skrinjar biex jiġi żgurat li l-attivitajiet ekonomiċi li jikkontribwixxu b’mod sostanzjali għall-mitigazzjoni tat-tibdil fil-klima ma jikkawżawx ħsara sinifikanti lill-adattament għat-tibdil fil-klima, japplikaw għal dawk l-attivitajiet ekonomiċi kollha. Dawk il-kriterji għandhom jiżguraw li r-riskji eżistenti u futuri li huma materjali għall-attività jiġu identifikati u li jiġu implimentati soluzzjonijiet ta’ adattament biex jimminimizzaw jew jevitaw telf jew impatti possibbli fuq il-kontinwità tan-negozju.

(52)

Il-kriterji tekniċi ta’ skrinjar għal “la tagħmilx ħsara sinifikanti” għall-użu sostenibbli u għall-protezzjoni tar-riżorsi tal-ilma u tal-baħar jenħtieġ li jiġu speċifikati għall-attivitajiet kollha li jistgħu joħolqu riskju għal tali użu sostenibbli u protezzjoni. Jenħtieġ li l-għan ta' dawn il-kriterji jkun li jevitaw li l-attivitajiet ikunu ta’ detriment għall-istat tajjeb jew għall-potenzjal ekoloġiku tajjeb ta’ korpi tal-ilma, inklużi l-ilma tal-wiċċ u l-ilma ta’ taħt l-art, jew għall-istatus ambjentali tajjeb tal-ilmijiet tal-baħar, billi jkunu jeħtieġu li r-riskji ta’ degradazzjoni ambjentali jiġu identifikati u indirizzati, f’konformità ma’ pjan ta’ ġestjoni tal-użu u tal-protezzjoni tal-ilma.

(53)

Il-kriterji tekniċi ta’ skrinjar għal “la tagħmilx ħsara sinifikanti” lit-tranżizzjoni lejn ekonomija ċirkolari jenħtieġ li jitfasslu skont is-setturi speċifiċi sabiex jiġi żgurat li l-attivitajiet ekonomiċi ma jwasslux għal ineffiċjenzi fl-użu tar-riżorsi jew għal mudelli ta’ produzzjoni lineari ta’ intrappolament, dan l-iskart jiġi evitat u jitnaqqas u, fejn dan ma jkunx jista’ jiġi evitat, ġestit f’konformità mal-ġerarkija tal-iskart. Dawk il-kriterji jenħtieġ li jiżguraw ukoll li l-attivitajiet ekonomiċi ma jfixklux l-objettiv ta’ tranżizzjoni lejn ekonomija ċirkolari.

(54)

Il-kriterji tekniċi ta’ skrinjar għal “la tagħmilx ħsara sinifikanti” lill-prevenzjoni u lill-kontroll tat-tniġġis jenħtieġ li jirriflettu l-ispeċifiċitajiet tas-settur sabiex jindirizzaw is-sorsi u t-tipi rilevanti ta’ tniġġis fl-arja, fl-ilma jew fl-art, b’riferiment, fejn rilevanti, għall-konklużjonijiet dwar l-aqwa tekniki disponibbli stabbiliti skont id-Direttiva 2010/75/UE tal-Parlament Ewropew u tal-Kunsill (14).

(55)

Il-kriterji għal “la tagħmilx ħsara sinifikanti” lill-protezzjoni u lir-restawr tal-bijodiversità u tal-ekosistemi jenħtieġ li jiġu speċifikati għall-attivitajiet kollha li jistgħu joħolqu riskji għall-istat jew għall-kundizzjoni tal-ħabitats, tal-ispeċijiet jew tal-ekosistemi u jenħtieġ li dawn jirrikjedu li, fejn rilevanti, isiru valutazzjonijiet tal-impatt ambjentali jew valutazzjonijiet xierqa u li jiġu implimentati l-konklużjonijiet mit-tali valutazzjonijiet. Dawk il-kriterji jenħtieġ li jiżguraw li anke fin-nuqqas ta’ rekwiżit sabiex titwettaq valutazzjoni tal-impatt ambjentali jew valutazzjoni xierqa oħra, l-attivitajiet ma jwasslux għad-disturb, għall-qbid jew għall-qtil ta’ speċijiet protetti legalment jew għad-deterjorament ta’ ħabitats protetti legalment.

(56)

Jenħtieġ li l-kriterji tekniċi ta’ skrinjar ikunu mingħajr preġudizzju għar-rekwiżit ta’ konformità mad-dispożizzjonijiet relatati mal-ambjent, is-saħħa, is-sikurezza u s-sostenibbiltà soċjali stabbiliti fil-liġi tal-Unjoni u dik nazzjonali, u għall-adozzjoni ta’ miżuri ta’ mitigazzjoni xierqa f’dak ir-rigward fejn applikabbli.

(57)

Id-dispożizzjonijiet f’dan ir-Regolament huma marbuta mill-qrib, peress li jittrattaw kriterji biex jiġi ddeterminat jekk attività ekonomika tikkontribwixxix sostanzjalment għall-mitigazzjoni tat-tibdil fil-klima jew għall-adattament għat-tibdil fil-klima, u jekk tali attività ekonomika tikkawżax ħsara sinifikanti lil wieħed jew aktar mill-objettivi ambjentali l-oħra stabbiliti fl-Artikolu 9 tar-Regolament (UE) 2020/852. Sabiex tiġi żgurata l-koerenza bejn dawn id-dispożizzjonijiet, li jenħtieġ li jidħlu fis-seħħ fl-istess ħin, biex tiġi ffaċilitata perspettiva komprensiva tal-qafas legali għall-partijiet konċernati u biex tiġi ffaċilitata l-applikazzjoni tar-Regolament (UE) 2020/852, huwa meħtieġ li dawn id-dispożizzjonijiet jiġu inklużi f’Regolament uniku.

(58)

Sabiex jiġi żgurat li l-applikazzjoni tar-Regolament (UE) 2020/852 tevolvi mal-iżviluppi teknoloġiċi, tas-suq u tal-politika, jenħtieġ li dan ir-Regolament jiġi rivedut b’mod regolari u, fejn xieraq, emendat, fir-rigward tal-attivitajiet meqjusa li jikkontribwixxu b’mod sostanzjali għall-mitigazzjoni tat-tibdil fil-klima jew għall-adattament għat-tibdil fil-klima u tal-kriterji tekniċi ta’ skrinjar korrispondenti.

(59)

Sabiex tinżamm konformità mal-Artikoli 10(6) u 11(6) tar-Regolament (UE) 2020/852, dan ir-Regolament jenħtieġ li japplika mill-1 ta’ Jannar 2022,