(1)

Skont ir-Regolament tal-Kunsill (UE) Nru 1386/2011 (3), is-sospensjoni tad-dazju għal ċerti oġġetti kapitali għall-użu kummerċjali jew industrijali, importati fil-Gżejjer Kanarji, tiskadi fil-31 ta’ Diċembru 2021.

(2)

F’April 2021, il-Gvern ta’ Spanja talab l-estensjoni tas-sospensjoni tad-dazji awtonomi tat-Tariffa Doganali Komuni għal għadd ta’ prodotti f’konformità mal-Artikolu 349 tat-Trattat. Il-miżuri stabbiliti bir-Regolament (UE) Nru 1386/2011 ikkontribwew b’mod pożittiv għall-iżvilupp tal-ekonomija tal-Gżejjer Kanarji, b’mod partikolari fl-industrija u l-kostruzzjoni, u b’hekk naqqsu l-impatt qawwi tal-iżvantaġġi ekonomiċi u kummerċjali kkawżati mid-distanza, l-insularità u ċ-ċokon ta’ dawk il-gżejjer.

(3)

L-ekonomija tal-Gżejjer Kanarji għadha affettwata b’mod negattiv miċ-ċokon tas-suq tal-gżejjer, mill-frammentazzjoni u l-bogħod tiegħu mill-Ewropa kontinentali, minn livell partikolarment għoli ta’ qgħad u ta’ spejjeż għall-produzzjoni u d-distribuzzjoni ogħla minn dawk tal-operaturi ekonomiċi fl-Ewropa kontinentali. Filwaqt li r-rata tal-qgħad tal-Gżejjer Kanarji wriet xi titjib sal-2019, il-qgħad żdied minn 20,5 % fl-2019 għal 22,6 % fl-2020, ferm ogħla mir-rata ta’ qgħad medja fl-2020 ta’ 15,5 % fi Spanja u ta’ 7,1 % fl-Istati Membri b’mod kollettiv (Eurostat, 2021).

(4)

Barra minn hekk, il-pandemija tal-COVID-19 waqqfet l-attività turistika fil-Gżejjer Kanarji li, fl-2020, wasslet għal tnaqqis stmat ta’ madwar 20 % tal-PDG. Barra minn hekk, kien hemm reċessjoni fl-attività tal-kostruzzjoni u industrijali bi tnaqqis stmat ta’ 13 %, meta mqabbel mal-2019.

(5)

Huwa għalhekk xieraq li tiġi estiża s-sospensjoni tad-dazji tat-Tariffa Doganali Komuni għal ċerti oġġetti kif elenkati fl-Annessi I u II għar-Regolament (UE) Nru 1386/2011 sabiex tiġi żgurata s-sostenibbiltà tal-effetti pożittivi tar-Regolament (UE) Nru 1386/2011, jingħata kontribu għad-diversifikazzjoni tal-ekonomija, jiġu żgurati tkabbir kostanti u l-ħolqien ta’ impjiegi fl-industrija u l-kostruzzjoni, tiġi msaħħa l-innovazzjoni, titnaqqas id-dipendenza tal-ekonomija lokali fuq is-settur tas-servizzi u jiġu kkomplementati miżuri oħrajn iddedikati għall-istabbilizzazzjoni tal-ambjent ekonomiku u soċjali fil-Gżejjer Kanarji.

(6)

Minbarra l-kategoriji tal-prodotti koperti mir-Regolament (UE) Nru 1386/2011, il-Gvern ta’ Spanja talab is-sospensjoni tad-dazji tat-Tariffa Doganali Komuni għal seba’ kategoriji ġodda ta’ prodotti li jaqgħu taħt il-kodiċijiet NM 3903 19, 5603 94, 5604 10, 7326 90, 7607 20, 8441 40 u 8479 90. Jenħtieġ li dik it-talba tiġi aċċettata peress li dawk is-sospensjonijiet, li jinkludu sospensjonijiet għal magni għal skopijiet industrijali u materja prima, isaħħu l-ekonomija tal-Gżejjer Kanarji.

(7)

Sabiex jiġi żgurat li l-operaturi ekonomiċi li jinsabu fit-territorju tal-Gżejjer Kanarji biss jibbenefikaw minn dawk il-miżuri tariffarji, jenħtieġ li s-sospensjonijiet isiru kundizzjonali fuq l-użu aħħari tal-prodotti, f’konformità mar-Regolament (UE) Nru 952/2013 tal-Parlament Ewropew u tal-Kunsill (4) u r-Regolament ta’ Implimentazzjoni tal-Kummissjoni (UE) 2015/2447 (5).

(8)

F’każ ta’ devjazzjoni tat-traffiku kummerċjali u sabiex jiġu żgurati kundizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni li jippermettulha tirtira temporanjament is-sospensjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (6).

(9)

Sabiex tiġi żgurata l-kontinwità wara l-iskadenza tad-dispożizzjonijiet tar-Regolament (UE) Nru 1386/2011, huwa xieraq li jiġu applikati l-miżuri previsti f’dan ir-Regolament mill-1 ta’ Jannar 2022 sal-31 ta’ Diċembru 2031,