(1)

Skont l-Artikolu 24 tar-Regolament (UE) 2021/1139, il-Fond Ewropew għall-Affarijiet Marittimi, is-Sajd u l-Akkwakultura (il-FEMSA) jista’ jappoġġa l-kumpens tal-ispejjeż addizzjonali li jġarrbu l-operaturi mis-sajd, mit-trobbija, mill-ipproċessar u mill-kummerċjalizzazzjoni ta’ ċerti prodotti tas-sajd u tal-akkwakultura fir-reġjuni ultraperifiċi msemmija fl-Artikolu 349 tat-Trattat.

(2)

Skont l-Artikolu 35 tar-Regolament (UE) 2021/1139, jenħtieġ li fil-pjan ta’ azzjoni msemmi f’dak l-Artikolu, l-Istat Membru kkonċernat jiddeskrivi l-metodoloġija li tintuża biex jiġi kkalkulat il-kumpens tal-ispejjeż addizzjonali għal kull reġjun ultraperifiku.

(3)

Skont l-Artikolu 36(6) tar-Regolament (UE) 2021/1139, il-Kummissjoni għandha s-setgħa li tadotta l-atti delegati li jistabbilixxu l-kriterji biex jiġu kkalkulati l-ispejjeż addizzjonali li jirriżultaw mill-iżvantaġġi speċifiċi tar-reġjuni ultraperifiċi.

(4)

Sabiex jiġi previst trattament armonizzat u ugwali tar-reġjuni kollha kkonċernati, u biex jiġi evitat li jingħata kumpens żejjed tal-ispejjeż addizzjonali, jeħtieġ li jiġu stabbiliti l-kriterji għall-kalkolu tal-ispejjeż addizzjonali li jirriżultaw mill-iżvantaġġi speċifiċi tar-reġjuni ultraperifiċi tal-Unjoni. Il-kriterji komuni li jridu jintużaw jenħtieġ li jiżguraw li jintuża metodu omoġenju għall-kalkolu tal-ispejjeż addizzjonali għar-reġjuni kollha kkonċernati.

(5)

Sabiex jiġi evitat il-kumpens żejjed, jenħtieġ li jiġu stmati b’reqqa partikolari l-ispejjeż ta’ referenza għall-prodotti jew għall-kategoriji ta’ prodotti li jġarrbu l-operaturi fil-parti kontinentali tal-Istat Membru jew tat-territorju tal-Unjoni, li fuqhom jiġu kkalkulati l-ispejjeż addizzjonali.

(6)

Jeżistu prodotti jew kategoriji ta’ prodotti li għalihom ma hemmx kriterji ta’ tqabbil jew unitajiet ta’ kejl fil-parti kontinentali tat-territorju tal-Istat Membru kkonċernat. F’dawn il-każijiet, ir-referenza għall-kalkolu tal-ispejjeż addizzjonali għandha tiġi stabbilita skont l-ispejjeż imġarrba mill-operaturi fil-parti kontinentali tat-territorju tal-Unjoni għall-prodotti jew għall-kategoriji ta’ prodotti ekwivalenti.

(7)

Fid-dawl tal-kundizzjonijiet differenti tal-kummerċjalizzazzjoni fir-reġjuni ultraperifiċi, il-fluttwazzjonijiet fil-qbid u l-istokkijiet u d-domanda tas-suq, jenħtieġ li l-Istati Membri kkonċernati jitħallew jiddeterminaw il-prodotti jew il-kategoriji ta’ prodotti tas-sajd u l-akkwakultura eliġibbli għall-kumpens, il-kwantitajiet massimi rispettivi tagħhom u l-livelli tal-ammonti ta’ kumpens fl-allokazzjoni kumplessiva għal kull Stat Membru.

(8)

Jenħtieġ li l-Istati Membri jistabbilixxu l-ammonti tal-kumpens f’livell li jippermetti t-tpaċija xierqa tal-ispejjeż addizzjonali li jirriżultaw mill-iżvantaġġi speċifiċi tar-reġjuni ultraperifiċi u li jevita l-kumpens żejjed. Għal dak il-għan, jenħtieġ li l-ammont tal-kumpens iqis ukoll tipi oħra ta’ interventi pubbliċi li għandhom impatt fuq l-ispejjeż addizzjonali, inkluż kull għajnuna mill-Istat innotifikata skont l-Artikolu 108(3) tat-Trattat u l-Artikolu 37 tar-Regolament (UE) 2021/1139.

(9)

Sabiex tiġi prevista preżentazzjoni armonizzata tal-ispejjeż addizzjonali, jeħtieġ li dawn l-ispejjeż addizzjonali jiġu espressi f’tunnellati ta’ piż ħaj, iddeterminati f’konformità mar-Regolament tal-Kunsill (KE) Nru 1224/2009 (2) u mar-Regolament ta’ Implimentazzjoni tal-Kummissjoni (UE) Nru 404/2011 (3), li jistabbilixxi l-kodiċijiet għall-preżentazzjoni tal-prodott għall-ħut ipproċessat u fatturi ta’ konverżjoni tal-Unjoni Ewropea għall-ħut frisk u għall-ħut frisk immellaħ sabiex il-piż tal-ħut maħżun jew ipproċessat jiġi kkonvertit f’piż ta’ ħut ħaj għall-finijiet tal-monitoraġġ tal-qabdiet.

(10)

Sabiex tkun tista’ ssir fil-pront l-applikazzjoni tal-miżuri previsti f’dan ir-Regolament, billi n-nefqa diġà ilha eliġibbli għall-FEMSA mill-1 ta’ Jannar 2021, f’konformità mal-Artikolu 63(2) tar-Regolament (UE) 2021/1060 tal-Parlament Ewropew u tal-Kunsill (4), jenħtieġ li dan ir-Regolament jidħol fis-seħħ fil-jum ta’ wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,