(1)

Ir-Regolament (UE) Nru 648/2012 ġie emendat bir-Regolament (UE) 2019/834 tal-Parlament Ewropew u tal-Kunsill (2). Dawn l-emendi, daħħlu, fost l-oħrajn, obbligu fuq il-membri tal-ikklerjar u l-klijenti li jipprovdu servizzi tal-ikklerjar, sew hux direttament jew indirettament (“fornituri tas-servizzi tal-ikklerjar”) li jipprovdu dawn is-servizzi skont termini kummerċjali ġusti, raġonevoli, mhux diskriminatorji u trasparenti (“FRANDT”). Sabiex tingħata ċ-ċertezza tad-dritt lill-fornituri tas-servizzi tal-ikklerjar u għall-klijenti prospettivi jew eżistenti tagħhom, huwa meħtieġ li jiġu speċifikati l-kundizzjonijiet skont liema t-termini kummerċjali għandhom jitqiesu bħala FRANDT.

(2)

Filwaqt li jitqies li l-objettiv tal-Artikolu 4(3a) tar-Regolament (UE) Nru 648/2012 huwa li jiffaċilita l-aċċess għall-ikklerjar lill-klijenti li għandhom volum ta’ attività limitat fis-suq tad-derivattivi OTC u li jaffaċċaw diffikultajiet biex jaċċessaw l-ikklerjar ċentrali, u minħabba l-importanza tal-aċċess għall-ikklerjar ċentrali għal kontropartijiet soġġetti għall-obbligu tal-ikklerjar, jenħtieġ li dan ir-Regolament japplika għall-forniment ta’ servizzi tal-ikklerjar b’relazzjoni mal-kuntratt tad-derivattivi OTC li huma soġġetti għall-obbligu tal-ikklerjar skont l-Artikolu 4(1) tar-Regolament (UE) Nru 648/2012. Sabiex jiġu żgurati kondizzjonijiet ekwivalenti ta’ kompetizzjoni u li l-klijenti fl-Unjoni jibbenefikaw minn termini kummerċjali FRANDT, jenħtieġ li dan ir-Regolament japplika meta dawk is-servizzi tal-ikklerjar jiġu pprovduti fl-Unjoni.

(3)

Sabiex tiġi żgurata t-trasparenza, jenħtieġ li l-fornituri tas-servizzi tal-ikklerjar jiddeskrivu l-proċess li jwassal għall-ftehim dwar it-termini kuntrattwali u jistabbilixxu proċessi operazzjonali għas-servizzi tal-ikklerjar (“proċess ta’ on-boarding”) u jipprovdu formola għal talba għal proposta fuq is-siti web tagħhom. Għall-istess raġuni, jenħtieġ li l-fornituri kollha tas-servizzi tal-ikklerjar jiżvelaw informazzjoni dwar termini kummerċjali ewlenin lill-klijenti prospettivi.

(4)

Filwaqt li l-fornituri ta’ servizzi tal-ikklerjar jenħtieġ li jkunu jistgħu jikkontrollaw ir-riskji involuti fil-forniment tas-servizzi tal-ikklerjar, valutazzjoni tar-riskju armonizzata tal-klijenti prospettivi u eżistenti jenħtieġ li tiżgura li t-termini kummerċjali jkunu ġusti u mhux diskriminatorji, filwaqt li jitqiesu l-ispejjeż u r-riskji. Xi fornituri tas-servizzi tal-ikklerjar diġà huma soġġetti għal obbligu li jivvalutaw ir-riskju ppreżentat mill-klijenti f’konformità mal-kriterji stipulati fl-Artikolu 25 tar-Regolament Delegat tal-Kummissjoni (UE) 2017/589 (3). Sabiex tiġi żgurata valutazzjoni tar-riskju armonizzata tal-klijenti, huwa u jitnaqqas il-piż regolatorju fuq il-fornituri tas-servizzi tal-ikklerjar u jiġu evitati regoli duplikati u kunfliġġenti, jenħtieġ li l-fornituri kollha tas-servizzi tal-ikklerjar jivvalutaw lill-klijenti fuq il-bażi tal-kriterji stipulati fl-Artikolu 25 ta’ dan ir-Regolament Delegat.

(5)

Sabiex jiġi żgurat li t-termini kummerċjali jkunu raġonevoli, u jiżguraw arranġamenti kuntrattwali imparzjali u razzjonali, jenħtieġ li t-tariffi, il-prezzijiet u l-iskontijiet ikunu bbażati fuq kriterji oġġettivi, inklużi l-volumi kklerjati, ix-xejriet tal-ikklerjar u l-bżonnijiet u r-rekwiżiti ta’ klijent. Sabiex jiġu evitati strutturi ta’ pprezzar żbilanċjati u kunflitti ta’ interess, jenħtieġ li t-tariffi, il-prezzijiet u l-iskontijiet jitfasslu bir-reqqa. Jenħtieġ li t-tariffi li jżommu l-ispejjeż lill-klijenti jiddistingwu b’mod ċar bejn il-kostijiet direttament relatati mal-forniment tas-servizzi tal-ikklerjar lill-klijent ikkonċernat u l-kostijiet relatati mal-forniment tas-servizzi tal-ikklerjar inġenerali, b’mod separat għal kull entrata tal-ispejjeż, inklużi l-ispejjeż tal-IT, spejjeż tal-liċenzjar u spejjeż għall-ġestjoni tal-kollateral.

(6)

Jenħtieġ li t-termini kuntrattwali jispeċifikaw il-kundizzjonijiet u l-kriterji għall-aċċettazzjoni ta’ tranżazzjonijiet sottomessi mill-klijenti għall-ikklerjar u għad-dritt tal-fornitur tas-servizzi tal-ikklerjar li jissospendi s-servizzi tal-ikklerjar u li jillikwida jew jagħlaq il-pożizzjonijiet tal-klijenti. Jenħtieġ li tkun possibbli deroga minn dawk il-kundizzjonijiet u l-kriterji meta tkun raġonevoli u debitament ġustifikata, inkluż biex jiġu kkontrollati r-riskji involuti fil-forniment ta’ servizzi tal-ikklerjar.

(7)

Sabiex tiġi żgurata l-prevedibbiltà u l-kontinwità tas-servizzi tal-ikklerjar, jenħtieġ li l-fornituri tas-servizzi tal-ikklerjar japplikaw perjodu ta’ avviż ta’ mhux anqas minn sitt xhur għat-terminazzjoni tal-kuntratti jew għal tibdil li jaffettwa materjalment it-termini u kundizzjonijiet miftiehma. Jenħtieġ li jkun possibbli perjodu iqsar ta’ terminazzjoni meta jkun raġonevoli u debitament ġustifikat, inkluż biex jikkontrolla r-riskji involuti fil-forniment ta’ servizz tal-ikklirjar.

(8)

Kemm il-klijenti prospettivi kif ukoll dawk eżistenti jenħtieġ li jibbenefikaw minn termini kummerċjali FRANDT. Filwaqt li l-klijenti prospettivi se jibbenefikaw mill-kundizzjonijiet il-ġodda mid-data tal-applikazzjoni ta’ dan ir-Regolament, jenħtieġ li l-fornituri tas-servizzi tal-ikklerjar u l-klijenti eżistenti jingħataw biżżejjed żmien li jirrieżaminaw u, fejn xieraq, jadattaw it-termini kummerċjali maqbula qabel id-dħul fis-seħħ ta’ dan ir-Regolament.

(9)

L-Artikolu 4(3a) tar-Regolament (UE) Nru 648/2012 diġà daħal fis-seħħ u japplika mill-18 ta’ Ġunju 2021. Sabiex tiġi żgurata ċ-ċertezza tad-dritt dwar il-kundizzjonijiet skont liem it-termini kummerċjali għandhom jitqiesu bħala FRANDT, jenħtieġ li dan ir-Regolament jidħol fis-seħħ b’urġenza. Madankollu, sabiex il-fornituri tas-servizzi tal-ikklerjar ikollhom biżżejjed żmien biex iħejju għall-applikazzjoni ta’ dan ir-Regolament, jenħtieġ li l-applikazzjoni tiegħu tiġi differita,