(1)

L-Artikoli 9 u 10 tad-Direttiva (UE) 2021/555 jipprevedu l-għoti ta’ awtorizzazzjonijiet għall-akkwist jew il-pussess ta’ armi tan-nar ikklassifikati fil-kategorija A jew fil-kategorija B, inklużi għotjiet magħmula bil-konferma, it-tiġdid jew it-titwil ta’ awtorizzazzjoni eżistenti. Il-Kapitolu 2 ta’ dik id-Direttiva jipprevedi wkoll għar-rieżami perjodiku u l-irtirar ta’ tali awtorizzazzjonijiet.

(2)

L-Artikolu 18(4) tad-Direttiva (UE) 2021/555 jirrikjedi li l-awtoritajiet kompetenti tal-Istati Membri jiskambjaw informazzjoni rigward ir-rifjuti li jingħataw awtorizzazzjonijiet kif previst fl-Artikoli 9 u 10 ta’ dik id-Direttiva, għal raġunijiet ta’ sigurtà jew ta’ affidabbiltà tal-persuna kkonċernata. Peress li d-Direttiva (UE) 2021/555 ma tiddefinix il-kunċetti ta’ “raġunijiet ta’ sigurtà jew b’rabta mal-affidabbiltà tal-persuna kkonċernata”, jenħtieġ li l-Istati Membri jqisu l-objettivi tad-Direttiva (UE) 2021/555, b’mod partikolari tal-Artikolu 6(1)(b) tagħha huma u jinterpretaw dawk il-kunċetti.

(3)

L-obbligu skont l-Artikolu 18(4) tad-Direttiva (UE) 2021/555 fir-rigward tar-rifjuti li jingħataw awtorizzazzjonijiet huwa mifhum li jkopri kwalunkwe deċiżjoni amministrattiva jew ġudizzjarja meħuda minn awtorità pubblika ta’ Stat Membru, li l-għan jew l-effett tagħha jkun li persuna tiġi prekluża milli takkwista jew ikollha arma tan-nar li taqa’ fil-kamp ta’ applikazzjoni tal-Artikolu 9 jew 10 ta’ dik id-Direttiva, kemm jekk bħala segwitu għal talba għall-awtorizzazzjoni kif ukoll jekk le, kemm jekk relatata ma’ armi tan-nar speċifiċi kif ukoll jekk le u kemm jekk tittieħed skont is-setgħat li jirriżultaw taħt dik id-Direttiva speċifikament kif ukoll jekk le. Pereżempju, l-obbligu jkopri projbizzjoni ġenerali fuq l-akkwist jew il-pussess ta’ armi tan-nar minn persuna partikolari, irrispettivament minn jekk dik il-persuna tkunx applikat qabel għal awtorizzazzjoni. Huwa jkopri wkoll kwalunkwe deċiżjoni amministrattiva jew ġudizzjarja li tirtira awtorizzazzjoni eżistenti jew li tirrifjuta li tikkonferma, iġġedded jew ittawwal awtorizzazzjoni eżistenti. L-Artikolu 18(4) tad-Direttiva (UE) 2021/555 jirrikjedi li l-awtoritajiet kompetenti jiskambjaw informazzjoni dwar dawn id-diversi tipi kollha ta’ deċiżjoni, bil-kundizzjoni li d-deċiżjoni tkun ittieħdet għal raġunijiet ta’ sigurtà jew ta’ affidabbiltà tal-persuna.

(4)

L-Artikolu 18(5) tad-Direttiva (UE) 2021/555 jirrikjedi li l-Kummissjoni tipprevedi sistema għall-iskambju ta’ kwalunkwe informazzjoni msemmija f’dak l-Artikolu. Dan għalhekk jinkludi sistema għall-iskambju tal-informazzjoni msemmija fil-paragrafu 4 ta’ dak l-Artikolu dwar ir-rifjuti li jingħataw awtorizzazzjonijiet.

(5)

Id-dispożizzjonijiet dwar il-kooperazzjoni amministrattiva fl-Artikolu 18 tad-Direttiva (UE) 2021/555 rigward it-trasferiment ta’ armi tan-nar minn Stat Membru għall-ieħor huma s-suġġett ta’ proġett pilota skont l-Artikolu 4 tar-Regolament (UE) Nru 1024/2012 tal-Parlament Ewropew u tal-Kunsill (2). Is-Sistema ta’ Informazzjoni tas-Suq Intern stabbilita b’dak ir-Regolament tista’ tkun ukoll għodda effettiva biex tiġi implimentata d-dispożizzjoni dwar il-kooperazzjoni amministrattiva stabbilita fl-Artikolu 18(4) tad-Direttiva (UE) 2021/555 dwar ir-rifjuti li jingħataw awtorizzazzjonijiet. Għaldaqstant, id-Deċiżjoni ta’ Implimentazzjoni tal-Kummissjoni (UE) 2021/1427 (3)tagħmel dik id-dispożizzjoni soġġetta għal proġett pilota skont l-Artikolu 4 tar-Regolament (UE) Nru 1024/2012. Sabiex tipproteġi d-data personali tal-individwi u d-drittijiet tagħhom għall-privatezza, dik id-Deċiżjoni ta’ Implimentazzjoni tispeċifika li s-Sistema ta’ Informazzjoni tas-Suq Intern se tippermetti biss lill-awtoritajiet nazzjonali jiċċekkjaw jekk tkunx inkluża informazzjoni dwar individwi speċifiċi fis-Sistema ta’ Informazzjoni tas-Suq Intern, u mhux li jfittxu b’referenza għal kriterji aktar ġenerali. Ir-Regolament (UE) Nru 1024/2012 jinkludi wkoll salvagwardji speċifiċi li jirregolaw l-aċċess għad-data personali fis-Sistema ta’ Informazzjoni tas-Suq Intern u l-ipproċessar tagħha, pereżempju r-regoli skont l-Artikolu 9(4) li jippermettu biss l-aċċess fuq bażi tal-ħtieġa ta’ għarfien. Għalhekk huwa xieraq li s-Sistema ta’ Informazzjoni tas-Suq Intern tiġi identifikata bħala s-sistema li għandha tintuża mill-awtoritajiet kompetenti tal-Istati Membri għall-finijiet tal-iskambju ta’ informazzjoni dwar ir-rifjuti li jingħataw awtorizzazzjonijiet, u li jiġu stabbiliti l-arranġamenti dettaljati għal dawn l-iskambji.

(6)

Sabiex jiġi evitat piż amministrattiv sproporzjonat fuq l-Istati Membri, l-arranġamenti dettaljati stabbiliti minn dan ir-Regolament għall-iskambju tal-informazzjoni permezz tas-Sistema ta’ Informazzjoni tas-Suq Intern jenħtieġ li japplikaw biss għad-deċiżjonijiet ta’ rifjut meħuda mill-awtoritajiet amministrattivi jew ġudizzjarji nazzjonali fid-data tal-applikazzjoni ta’ dan ir-Regolament jew wara.

(7)

Sabiex jiġu rrispettati d-drittijiet tal-protezzjoni tad-data tal-individwi kkonċernati, l-informazzjoni li għandha tiddaħħal fis-Sistema ta’ Informazzjoni tas-Suq Intern minn awtorità kompetenti jenħtieġ li tkun limitata għall-minimu neċessarju li jippermetti lill-awtoritajiet kompetenti ta’ Stati Membri oħra jivverifikaw jekk persuna partikolari tkunx jew kinitx is-suġġett ta’ deċiżjoni ta’ rifjut meħuda għal raġunijiet ta’ sigurtà jew tal-affidabbiltà tagħha. L-informazzjoni għalhekk jenħtieġ li tinkludi biss data personali bħall-isem tal-persuna, il-post u l-pajjiż tat-twelid tagħha u n-nazzjonalità tagħha.

(8)

Bl-istess mod, sabiex jiġu protetti d-data personali tal-individwi u d-drittijiet tagħhom għall-privatezza, l-informazzjoni dwar ir-raġunijiet speċifiċi għaliex tkun ittieħdet deċiżjoni ta’ rifjut jenħtieġ li ma jiġux irreġistrati fis-Sistema ta’ Informazzjoni tas-Suq Intern. B’mod partikolari, jenħtieġ li fis-Sistema ta’ Informazzjoni tas-Suq Intern ma tiġix irreġistrata informazzjoni dwar ir-rekord kriminali ta’ persuna jew dwar l-istatus mediku jew psikoloġiku tagħha. Meta awtorità kompetenti fi Stat Membru tkun teħtieġ aktar informazzjoni dwar ir-raġunijiet għal deċiżjoni ta’ rifjut meħuda fi Stat Membru ieħor, dik l-awtorità kompetenti tkun tista’ tikkuntattja lill-awtorità rilevanti fl-Istat Membru l-ieħor barra mis-Sistema ta’ Informazzjoni tas-Suq Intern billi tuża mezz xieraq ta’ komunikazzjoni u f’konformità mal-leġiżlazzjoni rilevanti dwar il-protezzjoni tad-data. Għal dak il-għan, meta jirreġistraw deċiżjoni ta’ rifjut fis-Sistema ta’ Informazzjoni tas-Suq Intern, l-Istati Membri jenħtieġ li jindikaw l-isem u d-dettalji ta’ kuntatt tal-awtorità amministrattiva jew ġudizzjarja li tkun ħadet id-deċiżjoni ta’ rifjut u, meta tkun differenti, l-isem u d-dettalji ta’ kuntatt tal-awtorità li tkun tista’ tiġi kkuntattjata mill-awtoritajiet kompetenti ta’ Stati Membri oħra meta jkunu qegħdin ifittxu aktar informazzjoni dwar id-deċiżjoni ta’ rifjut.

(9)

Ir-rifjuti jenħtieġ li jiġu rreġistrati fis-Sistema ta’ Informazzjoni tas-Suq Intern anki jekk jistgħu jkunu soġġetti għal appell amministrattiv jew ġudizzjarju. Jekk deċiżjoni ta’ rifjut tiġi annullata jew inkella titqies bħala invalida wara li tkun iddaħħlet informazzjoni dwarha fiss-Sistema ta’ Informazzjoni tas-Suq Intern, jenħtieġ li l-awtorità rilevanti jkollha tkun meħtieġa tneħħi l-entrata relatata ma’ dak ir-rifjut sa mhux aktar tard minn 30 jum tal-kalendarju wara li d-deċiżjoni ta’ rifjut tkun ġiet annullata jew instabet li hija invalida.

(10)

Sabiex jiġi żgurat li l-informazzjoni kontenuta fis-Sistema ta’ Informazzjoni tas-Suq Intern tibqa’ preċiża u kompleta, jenħtieġ li l-Istati Membri jkollhom jaġġornaw l-entrati tagħhom kull meta sseħħ bidla rilevanti. Pereżempju, jekk projbizzjoni ta’ 5 snin suċċessivament titnaqqas għal 3 snin, l-Istat Membru jkun irid jaġġorna l-entrata biex jirreġistra d-data tat-tmiem ġdida tal-projbizzjoni. Fil-każ ta’ projbizzjonijiet ta’ aktar minn 10 snin, inklużi l-projbizzjonijiet indefiniti, jenħtieġ li l-Istati Membri jkollhom ukoll jirrieżaminaw l-entrata mill-anqas darba kull 10 snin u jikkonfermaw li din tkun għadha valida (jew jaġġornawha kif meħtieġ).

(11)

Huwa neċessarju li jiġi stabbilit il-perjodu taż-żmien li l-informazzjoni dwar rifjut partikolari mistennija tibqa’ aċċessibbli mill-Istati Membri fis-Sistema ta’ Informazzjoni tas-Suq Intern. Dak il-perjodu jrid jilħaq bilanċ bejn il-ħtieġa li s-sistema ta’ skambju tal-informazzjoni tkun kemm jista’ jkun effettiva u utli għall-Istati Membri u l-ħtieġa li jiġu protetti d-data personali tal-individwi u d-drittijiet tagħhom għall-privatezza. Rifjut jista’ jkun deċiżjoni sempliċi, ta’ darba, li tirrifjuta talba għall-awtorizzazzjoni u tħalli lill-applikant liberu li jerġa’ japplika għall-awtorizzazzjoni fi kwalunkwe ħin fil-ġejjieni, jew jista’ jkun deċiżjoni b’effett kontinwu, bħal deċiżjoni ta’ rifjut li jkollha l-effett, direttament jew indirettament, li tipprojbixxi lill-applikant milli jerġa’ japplika għall-awtorizzazzjoni għal perjodu ta’ żmien jew deċiżjoni li tipprojbixxi persuna milli jkollha armi tan-nar għal perjodu fiss jew indefinit. Fid-dawl tal-prattiki attwali fl-Istati Membri għad-diversi tipi ta’ rifjut li jistgħu jseħħu, huwa xieraq li f’dan ir-Regolament jiġi stipulat li l-informazzjoni dwar deċiżjoni ta’ rifjut tibqa’ aċċessibbli fis-Sistema ta’ Informazzjoni tas-Suq Intern għal perjodu ta’ 10 snin wara li tkun ittieħdet id-deċiżjoni ta’ rifjut, fil-każ ta’ deċiżjonijiet sempliċi ta’ darba, jew għal perjodu ta’ 10 snin wara li d-deċiżjoni ta’ rifjut tkun waqfet milli jkollha effett, fil-każ ta’ deċiżjonijiet b’effett kontinwu.

(12)

Jenħtieġ li l-Kummissjoni tirrieżamina dan ir-Regolament fi żmien sentejn mid-data tad-dħul fis-seħħ tiegħu biex tqis kwistjonijiet ta’ implimentazzjoni li jistgħu jitqajmu mill-Istati Membri.

(13)

L-applikazzjoni ta’ dan ir-Regolament jenħtieġ li tiġi differita sabiex l-Istati Membri jkollhom żmien suffiċjenti biex idaħħlu fis-seħħ il-proċeduri neċessarji,