(1)

L-Artikolu 11(3) tar-Regolament (UE) 2019/787 jistabbilixxi regoli dwar id-deskrizzjoni, il-preżentazzjoni u t-tikkettar ta’ xorb alkoħoliku miksub permezz tal-kombinazzjoni ta’ kategorija ta’ xorb spirituż jew Indikazzjoni Ġeografika għal xarba spirituża ma’ oġġetti tal-ikel oħra. Tali xarbiet alkoħoliċi huma deskritti b’termini komposti li jikkombinaw jew isem ġuridiku previst fil-kategoriji ta’ xorb spirituż stabbiliti fl-Anness I ta’ dak ir-Regolament jew l-Indikazzjoni Ġeografika għal xarba spirituża mal-isem ta’ oġġetti tal-ikel oħrajn.

(2)

L-Artikolu 11(3) tar-Regolament (UE) 2019/787 ma jirrikjedix li l-isem tax-xarba alkoħolika li tirriżulta jintwera fil-kamp viżiv bħat-terminu kompost. Dan jista’ jwassal lill-konsumaturi biex jemmnu li t-terminu kompost huwa l-isem proprju tax-xarba alkoħolika billi jabbuża bla bżonn mir-reputazzjoni tal-kategoriji tax-xorb spirituż jew tal-indikazzjonijiet ġeografiċi, partikolarment fil-każijiet fejn ix-xarba alkoħolika li tirriżulta tkun xarba spirituża.

(3)

L-Artikolu 7(1), il-punt (a), tar-Regolament (UE) Nru 1169/2011 tal-Parlament Ewropew u tal-Kunsill (2) jirrikjedi li l-informazzjoni dwar l-ikel ma tiżgwidax, partikolarment fir-rigward tan-natura u l-identità tal-ikel. L-Artikolu 9 ta’ dak ir-Regolament jistipula li għandha tingħata informazzjoni obbligatorja dwar l-ikel, inkluż l-isem tal-oġġett tal-ikel, u l-Artikolu 13 ta’ dak ir-Regolament jirrikjedi li l-informazzjoni obbligatorja dwar l-ikel għandha tiġi mmarkata f’post li jidher b’tali mod li tkun tidher faċilment, tinqara sew u, fejn adegwat, ma titħassarx.

(4)

F’konformità mal-Artikolu 9 tar-Regolament (UE) 2019/787, ir-rekwiżiti tal-preżentazzjoni u tat-tikkettar stabbiliti fir-Regolament (UE) Nru 1169/2011 japplikaw għax-xorb alkoħoliku li jirriżulta mill-kombinazzjoni ta’ xorb spirituż ma’ oġġetti tal-ikel oħra. Sabiex jiġi żgurat li dawk ir-rekwiżiti jiġu ssodisfati bl-aħjar mod, b’mod partikolari għax-xorb spirituż li jirriżulta minn tali kombinazzjoni, huwa xieraq li jkun rikjest li l-isem ġuridiku tax-xarba spirituża li tirriżulta jintwera fl-istess kamp viżiv bħat-terminu kompost li jiddeskrivi dik il-kombinazzjoni. Jenħtieġ li dan iseħħ kull darba li t-terminu kompost ikun indikat fid-deskrizzjoni, fil-preżentazzjoni jew fit-tikkettar ta’ xarba spirituża. Dan jevita prattiki li jiżgwidaw u jiżgura li l-konsumaturi jkunu infurmati kif xieraq dwar in-natura attwali tax-xorb spirituż li jirriżulta mill-kombinazzjoni ta’ xorb spirituż ma’ oġġetti tal-ikel oħra.

(5)

Madankollu, jenħtieġ li dan l-obbligu ma japplikax meta, f’konformità mal-Artikolu 10(5), il-punt (b), tar-Regolament (UE) 2019/787, l-isem ġuridiku tax-xarba spirituża jkun sostitwit b’terminu kompost li jinkludi l-kliem “likur” jew “krema”, sakemm il-prodott finali jkun jikkonforma mar-rekwiżiti tal-kategorija 33 tal-Anness I ta’ dak ir-Regolament.

(6)

Għaldaqstant, jenħtieġ li r-Regolament (UE) 2019/787 jiġi emendat skont dan.

(7)

Jenħtieġ li jiġi previst perjodu tranżitorju għall-applikazzjoni tad-dispożizzjonijiet dwar it-tikkettar stabbiliti f’dan ir-Regolament biex ix-xorb spirituż ittikkettat qabel il-31 ta’ Diċembru 2022 f’konformità mad-dispożizzjonijiet tar-Regolament (KE) Nru 110/2008 tal-Parlament Ewropew u tal-Kunsill (3) ikun jista’ jkompli jitqiegħed fis-suq mingħajr ma jkun rikjest li dawn jiġu ttikkettati mill-ġdid.

(8)

F’konformità mal-Artikolu 51(3) tar-Regolament (UE) 2019/787 u sabiex jiġi evitat kwalunkwe tip ta’ vojt regolatorju, jenħtieġ li dan ir-Regolament japplika retroattivament mill-25 ta’ Mejju 2021,