“ Appendiċi 3

Proċedura għall-approvazzjoni u l-awtorizzazzjoni ta’ operaturi indipendenti għall-aċċess għall-karatteristiċi tas-sigurtà tal-vettura (*5)

1.   Kamp ta’ applikazzjoni

Dan l-Appendiċi fih ir-rekwiżiti għall-finijiet ta’ approvazzjoni u awtorizzazzjoni ta’ operaturi indipendenti li jeħtieġu aċċess għal informazzjoni dwar it-tiswija u l-manutenzjoni tal-vetturi relatata mas-sigurtà (RMI).

Dan jispeċifika fid-dettall il-proċess u l-korpi meħtieġa biex japprovaw u jawtorizzaw lil operaturi indipendenti sabiex jingħataw aċċess għal informazzjoni dwar it-tiswija u l-manutenzjoni tal-vetturi relatata mas-sigurtà għal vetturi ħfief għall-passiġġieri u dawk kummerċjali u vetturi heavy-duty.

2.   Definizzjonijiet u termini mqassra

2.1.   Definizzjonijiet

Għall-finijiet ta’ dan l-Appendiċi, għandhom japplikaw id-definizzjonijiet li ġejjin:

2.1.1.   “Akkreditazzjoni”

“akkreditazzjoni” għandha tfisser akkreditazzjoni kif definit fl-Artikolu 2(10) tar-Regolament (KE) Nru 765/2008

2.1.2.   “Impjegat tal-OI”

“impjegat tal-OI” għandha tfisser l-impjegat ta’ operatur indipendenti (OI) approvat li, wara awtorizzazzjoni mill-korp ta’ valutazzjoni tal-konformità (CAB) tiegħu jew tagħha, ikollu aċċess għal RMI relatata mas-sigurtà

2.1.3.   “Informazzjoni dwar it-tiswija u l-manutenzjoni relatata mas-sigurtà” jew “RMI relatata mas-sigurtà”

“informazzjoni dwar it-tiswija u l-manutenzjoni relatata mas-sigurtà” jew “RMI relatata mas-sigurtà” għandha tfisser l-informazzjoni, is-software, il-funzjonijiet u s-servizzi meħtieġa għat-tiswija u l-manutenzjoni tal-karatteristiċi li huma inklużi f’vettura mill-manifattur bħala prevenzjoni biex il-vettura ma tinsteraqx jew ma tinstaqx ’l hemm u biex il-vettura tkun tista’ tiġi traċċata u rkuprata.

2.1.4.   “Ċertifikat ta’ spezzjoni tal-approvazzjoni”

“ċertifikat ta’ spezzjoni tal-approvazzjoni” għandha tfisser iċ-ċertifikat maħruġ mis-CAB lill-OI li jikkonformaw mal-kriterji tal-approvazzjoni stabbiliti f’dan l-Appendiċi u li jikkonferma li dawk l-OI huma approvati u li l-impjegati tal-OI jistgħu jitolbu lill-awtorizzazzjoni biex taċċessa RMI relatata mas-sigurtà.

2.1.5.   “Ċertifikat ta’ spezzjoni tal-awtorizzazzjoni”

“ċertifikat ta’ spezzjoni tal-awtorizzazzjoni” għandha tfisser iċ-ċertifikat maħruġ mis-CAB lill-impjegati tal-OI li jikkonformaw mal-kriterji ta’ awtorizzazzjoni stabbiliti f’dan l-Appendiċi u li jikkonferma li dawk l-impjegati huma awtorizzati jaċċessaw RMI relatata mas-sigurtà fuq is-sit web ta’ manifattur tal-vetturi.

2.1.6.   “Ċentru ta’ fiduċja” jew “TC”

“ċentru ta’ fiduċja” jew “TC” għandha tfisser il-korp maħtur minn SERMI u approvat mill-Kummissjoni u li huwa responsabbli:

(a)	għall-ġestjoni taċ-ċertifikati diġitali u l-istatus ta’ awtorizzazzjoni tal-impjegati tal-OI u għall-provvista lis-CAB tat-tokens tas-sigurtà meħtieġa u ċ-ċertifikati diġitali għall-impjegati awtorizzati tal-OI;

(b)	għall-għoti ta’ informazzjoni lill-manifattur tal-vetturi dwar l-istatus tal-awtorizzazzjoni ta’ impjegat tal-OI.

2.1.7.   “Token tas-sigurtà”

“token tas-sigurtà” għandha tfisser apparat li jippermetti awtentikazzjoni sigura ta’ OI.

2.1.8.   “Ċertifikat diġitali”

“ċertifikat diġitali” għandha tfisser ċertifikat diġitali li jirrikjedi firma diġitali taċ-ċentru ta’ fiduċja tal-ħruġ biex jgħaqqad ċavetta pubblika mal-identità tal-impjegat tal-OI f’konformità mal-istandard ISO 9594.

2.1.9.   “Bażi tad-data tal-awtorizzazzjoni”

“bażi tad-data tal-awtorizzazzjoni” għandha tfisser bażi tad-data miżmuma miċ-ċentru ta’ fiduċja u li fiha d-dettalji ta’ awtorizzazzjoni tal-impjegati anonimizzati awtorizzati tal-OI u r-reġistrazzjoni tal-OI approvati.

2.1.10.   “Bażi tad-data taċ-ċertifikazzjoni”

“bażi tad-data taċ-ċertifikazzjoni” għandha tfisser bażi tad-data miżmuma miċ-ċentru ta’ fiduċja għall-ġestjoni tal-validità taċ-ċertifikat diġitali u l-identifikaturi tal-impjegati awtorizzati tal-OI.

2.1.11.   “Kooperazzjoni Ewropea għall-Akkreditazzjoni” jew “EA”

“Kooperazzjoni Ewropea għall-Akkreditazzjoni” jew “EA” għandha tfisser il-korp rikonoxxut mill-Kummissjoni f’konformità mal-Artikolu 14 tar-Regolament (KE) Nru 765/2008 u li huwa responsabbli għall-iżvilupp, il-manutenzjoni u l-implimentazzjoni tal-akkreditazzjoni fl-Unjoni.

2.1.12.   “Forum għall-Aċċess għall-RMI tal-Vetturi Relatata mas-Sigurtà” jew “SERMI”

Il-“Forum għall-Aċċess għall-RMI tal-Vetturi Relatata mas-Sigurtà” jew “SERMI” tfisser l-entità li hija inkarigata mill-koordinazzjoni u mill-għoti ta’ pariri lill-Kummissjoni dwar l-implimentazzjoni tal-proċeduri ta’ akkreditazzjoni, approvazzjoni u awtorizzazzjoni għall-fini ta’ aċċess ta’ RMI relatata mas-sigurtà.

2.1.13.   “Awtoritajiet rilevanti”

“awtoritajiet rilevanti” għandha tfisser dawk l-awtoritajiet pubbliċi li għandhom mandat legali biex jaġixxu fil-qasam tal-protezzjoni, l-investigazzjoni u l-prosekuzzjoni ta’ reati relatati mas-sigurtà tal-vetturi.

3.   Akkreditazzjoni tas-CABs, approvazzjoni tal-OI u awtorizzazzjoni tal-impjegati tal-OI

Is-CABs li huma akkreditati mill-korp nazzjonali ta’ akkreditazzjoni (“NAB”) biss, kif definit fl-Artikolu 2(11) tar-Regolament (KE) Nru 765/2008, tal-Istat Membru li fih huma stabbiliti għandhom joħorġu ċertifikati ta’ spezzjoni tal-approvazzjoni li jiċċertifikaw li jkun ġie approvat OI u ċertifikati ta’ spezzjoni tal-awtorizzazzjoni li jiċċertifikaw li impjegat tal-OI għandu jkollu aċċess għal RMI relatata mas-sigurtà.

L-approvazzjoni tal-OI u l-awtorizzazzjoni tal-impjegat tal-OI għandhom jingħataw għal perjodu ta’ 60 xahar li jibda mid-data tal-ħruġ taċ-ċertifikati ta’ spezzjoni rilevanti.

L-OI li jkunu jixtiequ jirċievu RMI relatata mas-sigurtà għandhom jiksbu ċertifikat ta’ spezzjoni tal-approvazzjoni minn CAB akkreditat mill-NAB tal-Istat Membru fejn huwa stabbilit l-OI.

L-impjegati tal-OI li għandhom jittrattaw RMI relatata mas-sigurtà għandhom jiksbu ċertifikat ta’ spezzjoni tal-awtorizzazzjoni minn CAB akkreditat mill-NAB tal-Istat Membru fejn jirresjedi l-impjegat tal-OI.

Is-CABs għandhom jinfurmaw lit-TCs dwar kwalunkwe ċertifikat ta’ spezzjoni tal-approvazzjoni jew ċertifikat ta’ spezzjoni tal-awtorizzazzjoni maħruġ, li fuqu t-TCs għandhom joħolqu rekord ta’ awtorizzazzjoni u joħorġu token tas-sigurtà u ċertifikat diġitali li jkun fih dettalji li jippermettu lill-impjegati tal-OI jkunu identifikabbli b’mod uniku għas-sit web tal-RMI tal-manifattur tal-vettura. Is-CABs għandhom jipprovdu lill-impjegati individwali tal-OI token tas-sigurtà u ċ-ċertifikat diġitali.

Il-manifatturi tal-vetturi jistgħu jitolbu ħlas għar-reġistrazzjoni tal-impjegati tal-OI fuq is-siti web tal-RMI tal-manifatturi tal-vetturi u għall-aċċess għal RMI relatata mas-sigurtà. Tali ħlas għandu jkun proporzjonat għall-ispiża għal tali reġistrazzjoni u l-għoti ta’ aċċess. Il-ħlasijiet dovuti għandhom jiġu speċifikati fuq is-siti web tal-RMI tal-manifatturi tal-vetturi. It-trasferimenti diġitali kollha tad-data bejn l-OI, it-TCs u s-CABs għandhom jitwettqu permezz ta’ tranżazzjonijiet minn negozju għal negozju (B2B) bl-użu ta’ protokolli siguri u f’waqthom.

Dikjarazzjoni li tiċċertifika li l-OI jsegwi attività leġittima ta’ negozju kif imsemmi fil-punt 6.3 ta’ dan l-Anness għandha tiġi ffirmata mill-OI li jitlob li jiġi awtorizzat mis-CAB. OI għandu jiġi approvat biss wara spezzjoni mis-CAB li għandu jivverifika li din id-dikjarazzjoni ġiet iffirmata u li għandu jivvaluta jekk l-OI u l-impjegati individwali tiegħu jikkonformawx mar-rekwiżiti stabbiliti f’dan l-Appendiċi.

L-impjegati individwali tal-OI għandhom jiġu awtorizzati biss wara spezzjoni minn CAB. Is-CABs għandhom jivverifikaw id-dokumenti sottomessi u għandhom jivverifikaw jekk l-impjegat tal-OI kkonċernat għamilx talba preċedenti għal awtorizzazzjoni li ġiet miċħuda mis-CAB ikkonċernat jew minn kwalunkwe CAB ieħor fil-livell tal-Unjoni.

Is-CABs għandhom jibagħtu d-data kollha li hija meħtieġa lit-TC biex it-TC jipproduċi ċ-ċertifikat diġitali u t-token tas-sigurtà, li s-CAB għandu jibgħat lill-impjegati tal-OI.

L-impjegati tal-OI li jkunu ġew awtorizzati għandhom jirċievu mingħand is-CABs tagħhom il-PIN assoċjat maċ-ċertifikat diġitali.

3.1.   Ħarsa ġenerali lejn l-aċċess għal RMI relatata mas-sigurtà

Il-manifatturi tal-vetturi għandhom jipprovdu aċċess għal RMI relatata mas-sigurtà permezz tas-sit web tagħhom tal-RMI, diment li l-impjegati tal-OI jkunu awtorizzati u jkunu jistgħu jipproduċu ċ-ċertifikat ta’ spezzjoni tal-awtorizzazzjoni, u li l-OI li f’ismu l-impjegati tal-OI jkunu qed jaħdmu jkollu ċertifikat ta’ spezzjoni tal-approvazzjoni.

Il-manifatturi jistgħu joffru aċċess għal faċilità ta’ ordni online għal partijiet relatati mas-sigurtà bl-użu ta’ applikazzjoni speċjalizzata marbuta mas-sit web tal-RMI lil impjegati awtorizzati tal-OI li jaħdmu għal OI approvati.

Malli jirċievu talba għal aċċess għal sit web tal-RMI, is-siti web tal-manifatturi tal-vetturi għandhom jirrikjedu identifikazzjoni permezz tal-identifikatur uniku tal-impjegat tal-OI u jitolbu awtentikazzjoni. L-awtentikazzjoni tal-impjegati tal-OI għandha titwettaq esklużivament bl-użu ta’ ċertifikati diġitali. Malli jirċievu ċertifikat diġitali, is-siti web tal-RMI tal-manifatturi tal-vetturi għandhom jivverifikaw l-identifikatur uniku tal-impjegat tal-OI u l-istatus attwali taċ-ċertifikat u l-awtorizzazzjoni diġitali, billi jikkomunikaw mat-TC identifikat fiċ-ċertifikat diġitali.

It-trasferimenti diġitali kollha tad-data bejn l-OI, il-manifatturi tal-vetturi, it-TCs u s-CABs għandhom jitwettqu permezz ta’ tranżazzjonijiet minn negozju għal negozju (B2B), bl-użu ta’ protokolli siguri u f’waqthom. Ladarba l-identifikatur uniku tal-impjegat tal-OI u l-istatus tal-awtorizzazzjoni tal-impjegat tal-OI jkunu ġew ivverifikati, l-aċċess għall-RMI relatata mas-sigurtà meħtieġa għandu jiġi pprovdut mill-manifattur tal-vettura permezz tas-sit web tiegħu.

4.   Regoli dettaljati dwar l-aċċess għal RMI relatata mas-sigurtà

4.1.   Ir-rwol ta’ SERMI

4.1.1.   Responsabbiltajiet u obbligi

SERMI għandha timmonitorja l-implimentazzjoni tal-proċess ta’ akkreditazzjoni fl-Istati Membri kollha u tinforma lill-Kummissjoni kif xieraq. SERMI għandha tagħti pariri lill-Kummissjoni dwar talbiet għal bidliet fil-proċess ta’ akkreditazzjoni.

(a)	SERMI għandha tagħti pariri lill-Kummissjoni dwar talbiet għal bidliet fil-proċess ta’ akkreditazzjoni. SERMI għandha timmonitorja l-implimentazzjoni tal-proċess ta’ akkreditazzjoni fl-Istati Membri kollha u tinforma lill-Kummissjoni kif xieraq;

(b)	SERMI għandha tikkonsulta lill-Kummissjoni dwar il-ħolqien tal-kriterji tal-għażla tat-TC;

(c)	SERMI għandha tagħti pariri lill-Kummissjoni dwar l-introduzzjoni ta’ linji gwida tekniċi ta’ implimentazzjoni għall-interazzjoni bejn l-entitajiet involuti fil-proċess;

(d)	SERMI għandha ssegwi r-regoli tal-EA dwar is-sjieda tal-iskema;

(e)	il-membri ta’ SERMI għandhom ikunu rrappreżentati mill-partijiet ikkonċernati involuti fil-proċess ta’ akkreditazzjoni, approvazzjoni u awtorizzazzjoni għall-fini ta’ aċċess għal RMI relatata mas-sigurtà.

4.1.2.   Għażla taċ-ċentru ta’ fiduċja

It-TC għandu jintgħażel minn SERMI u jiġi nnotifikat lill-Kummissjoni għall-approvazzjoni.

It-TC magħżul għandu jikkonforma mal-istandard ETSI TS 319 411-3, jissodisfa r-rekwiżiti dwar il-firem elettroniċi stabbiliti fir-Regolament (UE) Nru 910/2014 tal-Parlament Ewropew u tal-Kunsill (*6) u r-rekwiżiti stabbiliti fil-punt 4.6 ta’ dan l-Appendiċi.

Barra minn hekk, it-TC għandu:

—	ikollu l-kompetenza teknika u maniġerjali, u l-vijabbiltà finanzjarja u l-esperjenza rilevanti għall-proċess ta’ akkreditazzjoni;

—	ikollu persunal ewlieni li jkollu l-ħiliet, l-esperjenza u d-disponibbiltà meħtieġa għall-proċess ta’ akkreditazzjoni;

—	ikun jista’ jopera fl-Istati Membri kollha;

—	ikollu fis-seħħ proċess ta’ assigurazzjoni tal-kwalità fil-livell operattiv.

4.2.   Ir-rwol tal-NABs

L-NAB għandu jkun responsabbli għall-akkreditazzjoni tas-CABs għall-finijiet tal-approvazzjoni tal-OI u l-awtorizzazzjoni tal-impjegati tal-OI għall-aċċess għal RMI relatata mas-sigurtà.

4.2.1.   Responsabbiltajiet u rekwiżiti

Ir-responsabbiltajiet u r-rekwiżiti tal-NAB huma stabbiliti fl-Artikoli 8 sa 12 tar-Regolament (KE) Nru 765/2008.

4.2.2.   Kriterji għall-akkreditazzjoni tas-CAB

Is-CABs għandhom jiġu akkreditati bħala korpi ta’ spezzjoni tat-tip A f’konformità mal-ISO/IEC 17020:2012. Is-CABs għandhom jikkonformaw mar-rekwiżiti li jikkonċernaw l-ogħla livell ta’ indipendenza.

Barra minn hekk, l-NAB għandu jivvaluta l-kapaċità tas-CABs li jikkonformaw mar-rekwiżiti stabbiliti fil-punti 4.3.1 sa 4.3.4.

Il-persunal inkarigat mill-ispezzjonijiet tal-OI għandu jkollu livell ta’ għarfien fin-negozju tat-tiswija u l-manutenzjoni tal-vetturi awtomotivi u tal-ispeċifiċitajiet tas-suq ta’ wara l-bejgħ tal-vetturi awtomotivi li jkun xieraq għall-kompiti li jkunu qed iwettqu.

4.3.   Ir-rwol tas-CABs

Is-CAB għandu jkun responsabbli għall-ispezzjoni tal-OI u l-impjegati tal-OI rispettivi tagħhom u għall-ħruġ ta’ ċertifikati ta’ approvazzjoni u ta’ spezzjoni tal-awtorizzazzjoni f’konformità ma’ dan l-Appendiċi, u għar-revoka ta’ dawn iċ-ċertifikati.

4.3.1.   Responsabbiltajiet u rekwiżiti

(a)	Is-CABs għandhom iżommu d-data sottomessa għall-approvazzjoni ta’ OI;

(b)	Is-CABs għandhom jistabbilixxu kanal ta’ komunikazzjoni sigur mat-TC u għandhom jipprovdu r-riżultati tal-ispezzjoni lit-TC sabiex jinħareġ it-token tas-sigurtà b’ċertifikat diġitali;

(c)	Is-CABs għandhom jinnotifikaw lill-impjegati tal-OI sitt xhur qabel ma tiskadi l-awtorizzazzjoni tagħhom;

(d)	Is-CABs għandhom iżommu bażi tad-data li jkun fiha d-data sottomessa għall-awtorizzazzjoni tal-impjegati tal-OI;

(e)	Is-CABs li jirrifjutaw li japprovaw OI jew li jawtorizzaw lil impjegat tal-OI għandhom jikkomunikaw ir-riżultati tal-ispezzjoni dwar dak l-OI jew dak l-impjegat lit-TC;

(f)	Is-CABs għandhom jiġbru u jużaw biss id-data meħtieġa għall-proċess ta’ approvazzjoni jew ta’ awtorizzazzjoni;

(g)	Is-CABs għandhom iżommu d-data kollha relatata mal-OI u mal-impjegati tal-OI kunfidenzjali u għandhom jiżguraw li l-impjegati awtorizzati biss ikollhom aċċess għal tali data;

(h)	Is-CABs għandhom jipprovdu statistika ta’ darba fis-sena dwar in-numru ta’ approvazzjonijiet u ta’ awtorizzazzjonijiet maħruġa kif ukoll dwar in-numru ta’ rifjuti lil SERMI u lill-Kummissjoni;

(i)	Is-CABs għandhom iżommu rekords siguri tal-ispezzjonijiet ta’ approvazzjoni u ta’ awtorizzazzjoni għal perjodu ta’ ħames snin;

(j)	Is-CABs għandhom jinfurmaw lis-CABs l-oħrajn kollha fl-Istat Membru li fih ikun stabbilit dwar ir-riżultati negattivi tal-ispezzjoni ta’ OI;

(k)

L-OI u l-impjegati tal-OI li jkunu rċevew riżultat negattiv ta’ spezzjoni jistgħu jipprovdu lis-CAB b’informazzjoni addizzjonali li tikkoreġi nuqqasijiet minuri fi żmien 15-il jum ta’ xogħol minn meta jirċievu r-riżultat negattiv ta’ spezzjoni. Is-CABs għandhom għalhekk jiddeterminaw jekk ir-riżultat tal-ispezzjoni għandux jinbidel;

(l)	Is-CABs għandhom jinnotifikaw lill-OI sitt xhur qabel ma tiskadi l-approvazzjoni tagħhom;

(m)	is-CABs għandhom jagħmlu spezzjonijiet aleatorji u mhux imħabbra fuq il-post tal-OI fi żmien il-perjodu ta’ validità tal-approvazzjoni ta’ 60 xahar, u jissoġġettaw kull OI approvat għal mill-inqas spezzjoni waħda aleatorja fuq il-post matul il-perjodu ta’ validità tal-approvazzjoni ta’ 60 xahar;

(n)

Abbażi ta’ lment kontra IO approvat jew impjegat awtorizzat tal-OI, is-CABs għandhom jivverifikaw li l-IO kkonċernat jew l-impjegat tal-OI jkunu konformi mal-kriterji li magħhom ikunu ġew approvati jew awtorizzati rispettivament. Matul l-investigazzjoni tiegħu, is-CAB għandu jiddetermina jekk hijiex meħtieġa spezzjoni fuq il-post;

(o)	għall-finijiet ta’ spezzjonijiet fuq il-post, is-CABs jistgħu jitolbu l-assistenza tal-awtoritajiet tas-sorveljanza tas-suq mill-Istat Membru li huma stabbiliti fih;

(p)

is-CABs għandhom jirrevokaw l-approvazzjonijiet tal-OI u l-awtorizzazzjonijiet tal-impjegati tal-OI meta ma jibqgħux jikkonformaw mal-kriterji li magħhom ikunu ġew approvati jew awtorizzati rispettivament. Is-CABs għandhom għalhekk jitolbu lit-TC jissospendi u jirrevoka ċ-ċertifikat diġitali tal-impjegati tal-OI kkonċernati.

4.3.2.   Tiġdid tal-approvazzjoni

Is-CABs għandhom, fuq talba minn OI jew sitt xhur qabel l-iskadenza tal-validità tal-approvazzjoni, jagħmlu spezzjoni fuq il-post, u f’każ ta’ riżultat pożittiv tal-ispezzjoni, iġeddu l-approvazzjoni.

Is-CABs għandhom joħorġu ċertifikat ta’ spezzjoni tal-approvazzjoni ġdid għall-OI li jissodisfa l-kriterji tal-approvazzjoni.

Is-CABs għandhom jivvalutaw l-applikazzjonijiet għat-tiġdid tal-awtorizzazzjonijiet u joħorġu ċertifikat ta’ spezzjoni tal-awtorizzazzjoni lill-impjegati tal-OI li jissodisfaw il-kriterji ta’ awtorizzazzjoni.

4.3.3.   Kriterji għall-approvazzjoni tal-OI mis-CAB

Qabel ma japprovaw OI u matul kwalunkwe spezzjoni fuq il-post matul il-perjodu ta’ validità tal-approvazzjoni, is-CABs għandhom jivverifikaw dan li ġej:

(a)	sjieda dokumentata tal-OI, isem id-direttur maniġerjali;

(b)	il-lista pprovduta mill-OI tal-impjegati li għandha tiġi awtorizzata;

(c)	informazzjoni dwar ir-responsabbiltà u l-funzjoni tal-impjegati msemmija fil-punt (a);

(d)	jekk l-OI għandux assigurazzjoni ta’ responsabbiltà b’ammont minimu ta’ kopertura ta’ EUR 1 miljun għal korriment fuq il-persuna u EUR 0,5 miljun għal ħsara fuq il-proprjetà;

(e)	jekk l-approvazzjoni tal-OI ġietx revokata għal raġunijiet ta’ użu ħażin;

(f)	jekk l-OI pprovdiex prova tal-attività fil-qasam awtomativ;

(g)	jekk id-dikjarazzjoni li tiċċertifika li l-OI jwettaq attività leġittima ta’ negozju kif imsemmi fil-punt 6.3 ġietx iffirmata mill-OI u matul spezzjoni fuq il-post jekk l-OI effettivament iwettaqx attività leġittima ta’ negozju;

(h)	jekk l-OI jew l-impjegati tal-OI għandhomx rekord kriminali nadif;

(i)	jekk hemmx dikjarazzjoni ffirmata mir-rappreżentant legali tal-OI li l-konformità mar-rekwiżiti proċedurali stabbiliti fil-punt 4.3.4 hija żgurata għall-operazzjonijiet kollha relatati mas-sigurtà tal-vetturi.

4.3.4.   Kriterji għall-awtorizzazzjoni tal-impjegati tal-OI mis-CAB

Qabel ma tawtorizza impjegat bħala impjegat tal-OI, u matul kwalunkwe spezzjoni fuq il-post matul il-perjodu ta’ validità tal-approvazzjoni, is-CABs għandhom jivverifikaw dan li ġej:

(a)	li l-impjegat ikkonċernat ma kellux awtorizzazzjoni preċedenti li ġiet revokata minħabba użu ħażin ta’ dik l-awtorizzazzjoni;

(b)	li l-impjegat għandu rekord kriminali nadif;

(c)	li hemm ftehim dwar l-impjieg bejn l-impjegat ikkonċernat u OI approvat;

(d)	li l-impjegat ikkonċernat għandu karta tal-identità valida speċifika għall-pajjiż jew dokument ekwivalenti.

4.4.   Ir-rwol tal-OI

4.4.1.   Responsabbiltajiet u rekwiżiti

(a)	L-OI għandhom jitolbu spezzjoni mingħand is-CAB tagħhom biex jiksbu l-approvazzjoni;

(b)	l-OI għandhom jinfurmaw lis-CAB tagħhom dwar il-bidliet fid-dettalji ta’ kuntatt tagħhom;

(c)	l-OI għandhom jinfurmaw lis-CAB tagħhom meta n-negozju tagħhom jiġi xolt;

(d)	l-OI għandhom jirreġistraw kull tranżazzjoni u operazzjoni tal-RMI relatata mas-sigurtà;

(e)	l-OI għandhom jinfurmaw lis-CAB tagħhom bi kwalunkwe terminazzjoni tal-impjieg ta’ kwalunkwe wieħed mill-impjegati awtorizzati tagħhom;

(f)	l-OI għandhom jirrapportaw lill-awtoritajiet rilevanti kwalunkwe reat jew imġiba ħażina li jkunu saru mill-impjegati awtorizzati tagħhom u li jikkonċernaw RMI relatata mas-sigurtà;

(g)	l-OI għandhom jiżguraw li l-impjegati awtorizzati tagħhom jużaw biss iċ-ċertifikati ta’ spezzjoni tal-awtorizzazzjoni tagħhom stess;

(h)	l-OI għandhom jiżguraw li l-ħlasijiet kollha relatati mal-awtorizzazzjoni tal-impjegat tal-OI tagħhom ikunu tħallsu;

(i)	l-OI għandhom jiżguraw li l-impjegati tal-OI tagħhom ikunu mħarrġa għal attivitajiet ta’ tiswija li jikkonċernaw il-manutenzjoni, il-programmazzjoni mill-ġdid u l-funzjonijiet tas-sigurtà u tas-sikurezza awtomativi;

(j)	l-OI għandhom jitolbu lis-CAB tagħhom għal spezzjoni fuq il-post fis-sitt xhur qabel ma jiskadi ċ-ċertifikat ta’ spezzjoni tal-approvazzjoni tagħhom.

4.5.   Ir-rwol tal-impjegati tal-OI

4.5.1.   Responsabbiltajiet u rekwiżiti

(a)	L-impjegati tal-OI għandhom jitolbu lis-CAB tagħhom għal awtorizzazzjoni;

(b)	l-impjegati tal-OI għandhom jirreġistraw lilhom infushom fuq is-sistema tal-RMI tal-manifattur tal-vettura;

(c)	l-impjegati tal-OI għandhom jaċċessaw RMI relatata mas-sigurtà f’konformità mal-istandard EN ISO 18541 – 2014;

(d)	l-impjegati tal-OI għandhom jiżguraw li r-rekords kollha tal-RMI relatata mas-sigurtà li jitniżżlu mis-sistema tal-RMI tal-manifattur tal-vettura ma għandhomx jinħażnu aktar milli meħtieġ biex titwettaq l-operazzjoni li għaliha tkun meħtieġa l-informazzjoni;

(e)	fejn applikabbli, l-impjegati tal-OI għandhom jinnotifikaw lill-impjegatur tal-OI tagħhom li ċ-ċertifikat diġitali tagħhom ma għadux meħtieġ;

(f)	l-impjegat tal-OI ma għandu jikkondividi ma’ ebda parti terza t-token tas-sigurtà, iċ-ċertifikat diġitali jew il-PIN;

(g)	l-impjegati tal-OI għandhom ikunu responsabbli għall-użu korrett tat-token tas-sigurtà personali u tal-PIN;

(h)	l-impjegati tal-OI għandhom jinfurmaw lill-OI u lit-TC tagħhom dwar kwalunkwe telf jew użu ħażin tat-token tas-sigurtà tagħhom fi żmien 24 siegħa minn tali telf jew użu ħażin;

(i)	l-impjegati tal-OI għandhom jirrapportaw lill-awtoritajiet rilevanti kwalunkwe talba jew att minn impjegati oħra tal-OI relatati mal-RMI relatata mas-sigurtà li ma jikkostitwixxix attività leġittima ta’ negozju kif imsemmi fil-punt 6.3 ta’ dan l-Anness.

4.6.   Ir-rwol taċ-ċentru ta’ fiduċja

It-TCs għandhom joħolqu u jibagħtu ċ-ċertifikati diġitali lill-OI permezz tas-CABs rispettivi lill-OI u lill-impjegati tal-OI. It-TCs għandhom iżommu bażi tad-data taċ-ċertifikati ta’ spezzjoni tal-awtorizzazzjoni maħruġa. It-TCs għandhom jipprovdu lill-manifatturi tal-vetturi aċċess għal interfaċċa biex jivverifikaw l-istatus taċ-ċertifikati diġitali u ċ-ċertifikati ta’ ta’ spezzjoni tal-awtorizzazzjoni.

It-TCs għandhom iżommu l-informazzjoni rigward l-impjegati tal-OI fil-bażi tad-data tal-awtorizzazzjoni għal perjodu addizzjonali ta’ massimu ta’ 60 xahar. Dak il-perjodu ma għandux ikun itwal mill-perjodu ta’ validità li jifdal tal-approvazzjoni mogħtija lill-OI fejn ikun qed jaħdem l-impjegat tal-OI.

4.6.1.   Responsabbiltajiet u rekwiżiti

(a)	It-TCs jistgħu jissospendu u jirrevokaw iċ-ċertifikati diġitali fuq talba mis-CAB;

(b)	It-TCs għandhom jipprovdu s-software biex jużaw iċ-ċertifikati diġitali lill-OI u lill-impjegati tal-OI;

(c)	It-TCs għandhom joperaw 24 siegħa kuljum, sebat ijiem fil-ġimgħa.

4.7.   Ir-rwol tal-manifatturi tal-vetturi

Il-manifatturi tal-vetturi għandhom jipprovdu lill-OI approvati u lill-impjegati awtorizzati kollha tal-OI aċċess għall-informazzjoni dwar it-tiswija u l-manutenzjoni relatata mas-sigurtà. Il-manifatturi tal-vetturi għandhom jikkomunikaw mat-TCs biex jivverifikaw l-istatus tal-awtorizzazzjoni u tal-awtentikazzjoni tal-impjegati tal-OI li jkunu qed ifittxu aċċess għal tali informazzjoni.

4.7.1.   Responsabbiltajiet u rekwiżiti

(a)	il-manifatturi tal-vetturi għandhom jiżguraw li s-siti web tagħhom jiġu adattati biex jappoġġaw l-aċċess tal-OI għal RMI relatata mas-sigurtà;

(b)	il-manifatturi tal-vetturi għandhom jiżguraw li jniżżlu l-ispeċifikazzjonijiet tekniċi disponibbli fuq is-sit web ta’ SERMI.

4.7.2.   Rekwiżiti proċedurali għall-manifatturi tal-vetturi

Il-manifatturi tal-vetturi ma għandhomx jagħtu aċċess għal RMI relatata mas-sigurtà, sakemm ma jkunux ġew irrispettati r-rekwiżiti proċedurali kollha li ġejjin:

(1)

Rekwiżiti proċedurali għal vetturi misruqa Il-manifatturi tal-vetturi għandhom iżommu rekord tal-vetturi kollha tad-ditta tagħhom irrapportati mill-awtoritajiet bħala misruqa. Il-manifatturi tal-vetturi għandhom jistabbilixxu proċess li jipprovdi traċċabbiltà u responsabbiltà ċari u li jippermetti lill-awtoritajiet rilevanti jintraċċaw id-data pprovduta mill-manifattur tal-vettura lill-impjegat tal-OI li jkun ingħata aċċess għall-informazzjoni relatata mal-vettura misruqa.

(2)

Rekwiżiti proċedurali għall-ħżin tal-informazzjoni Il-manifatturi tal-vetturi għandhom jaħżnu l-informazzjoni li ġejja għal kull aċċess mogħti għal informazzjoni dwar it-tiswija u l-manutenzjoni relatata mas-sigurtà: (a) in-Numru ta’ Identifikazzjoni tal-Vettura (VIN) tal-vettura li għaliha ntalbet l-informazzjoni; (b) id-data li fiha saret it-talba; (c) in-numru tar-reġistrazzjoni tal-vettura li għaliha ntalbet l-informazzjoni, fejn disponibbli; (d) il-varjant tat-tip tal-vettura li għaliha ntalbet l-informazzjoni u l-verżjoni ta’ dik il-vettura, fejn disponibbli. Il-manifatturi tal-vetturi għandhom jaħżnu dik id-data għal ħames snin.