(1)

Cabo Verde huwa pajjiż li jibbenefika mill-arranġament speċjali ta’ inċentivi għal żvilupp sostenibbli u governanza tajba previst fl-Artikolu 1(2)(b) tar-Regolament (UE) Nru 978/2012 tal-Parlament Ewropew u tal-Kunsill (2), imsejjaħ is-Sistema Ġeneralizzata ta’ Preferenzi (SĠP+). Ir-regoli dwar l-oriġini preferenzjali għall-finijiet tas-Sistema Ġeneralizzata ta’ Preferenzi (SĠP), minbarra r-regoli proċedurali, huma stabbiliti fir-Regolament Delegat tal-Kummissjoni (UE) 2015/2446 (3).

(2)

B’ittra ddatata t-18 ta’ Marzu 2020, Cabo Verde ppreżenta talba għal estensjoni tad-derogi temporanji mir-regoli dwar l-oriġini preferenzjali stabbiliti fir-Regolament Delegat (UE) 2015/2446, li kienu ngħataw permezz tar-Regolamenti ta’ Implimentazzjoni tal-Kummissjoni (UE) 2019/561 (4) u (UE) 2019/620 (5). It-talba kienet tikkonċerna volum annwali ta’ 5 000 tunnellata ta’ fletti tat-tonn ippreparati jew ippreservati, 3 000 tunnellata ta’ fletti tal-kavalli ppreparati jew ippreservati u 1 000 tunnellata ta’ fletti tat-tumbrell ippreparati jew ippreservati. Skont id-deroga mitluba, dawn il-prodotti jitqiesu li joriġinaw f’Cabo Verde anki jekk ikunu pprokurati minn ħut mhux oriġinarju.

(3)

Cabo Verde sostna t-talba tiegħu għall-estensjoni ta’ dawn id-derogi billi bbaża fuq l-argumenti ppreżentati f’talbiet preċedenti, li skont huwa għadhom rilevanti, jiġifieri kwantitajiet baxxi ta’ tonn u kavalli maqbuda fl-ilmijiet territorjali tiegħu, opportunitajiet tas-sajd skarsi barra mill-ilmijiet territorjali tiegħu u perjodu limitat tal-istaġun tas-sajd. Element ieħor enfasizzat fit-talba huwa li Cabo Verde dan l-aħħar żviluppa l-infrastruttura portwarja tiegħu. B’riżultat ta’ dan, jistgħu jiġu mmaniġġjati kwantitajiet akbar ta’ ħut biex ifornu lill-industrija lokali tal-ipproċessar tal-ħut il-provvista biex iżżomm il-kapaċitajiet ta’ produzzjoni tagħha. Fl-aħħar nett, it-talba enfasizzat id-diffikultajiet li jħabbat wiċċu magħhom Cabo Verde minħabba d-dewmien biex jiġi applikat il-Ftehim ta’ Sħubija Ekonomika bejn l-Unjoni Ewropea u l-Afrika tal-Punent. Fl-argument tiegħu Cabo Verde jenfasizza l-ħtieġa tiegħu għal deroga mir-regoli SĠP dwar l-oriġini preferenzjali sabiex jikkumpensa għall-fatt li għadu mhux possibbli li wieħed jiddependi fuq il-kwoti tal-oriġini jew ir-regoli tal-akkumulazzjoni skont il-Ftehim ta’ Sħubija Ekonomika li għadu mhux applikat b’mod provviżorju.

(4)

Id-deroga prevista fl-Artikolu 64(6) tar-Regolament (UE) Nru 952/2013 (Kodiċi Doganali tal-Unjoni) hija ta’ natura temporanja u soġġetta għal konformità mtejba mar-regoli tal-oriġini għall-prodotti kkonċernati u mar-rekwiżit dwar il-kooperazzjoni amministrattiva. Sabiex ikun jista’ jimmaniġġja tali deroga mir-regoli dwar l-oriġini preferenzjali, il-pajjiż li jagħmel it-talba jrid jikkonforma mar-regoli tal-oriġini għall-prodotti kkonċernati u mal-proċeduri relatati magħhom u jrid jiggarantixxi kooperazzjoni amministrattiva tajba.

(5)

F’dan ir-rigward, l-azzjonijiet ta’ monitoraġġ imwettqa mill-Kummissjoni Ewropea matul dawn l-aħħar ftit snin fil-kuntest tad-deroga mogħtija skont l-Artikolu 64(6) tar-Regolament (UE) Nru 952/2013 żvelaw ċerti nuqqasijiet fir-rigward tal-kooperazzjoni amministrattiva ta’ Cabo Verde mal-awtoritajiet doganali tal-Istati Membri fil-verifika tal-provi tal-oriġini. Nuqqasijiet bħal dawn setgħu rriżultaw f’ċaħda tad-deroga mitluba għar-raġunijiet imressqa minn Cabo Verde. Madankollu, wara l-preżentazzjoni ta’ dik it-talba, Cabo Verde u b’mod partikolari l-industrija tas-sajd tiegħu, kellhom jiffaċċjaw kriżi kbira minħabba telf ta’ dħul ikkawżat mill-pandemija tal-COVID-19. Il-Kummissjoni hija intitolata, permezz tal-Artikolu 64(6) tal-kodiċi, li tqis din is-sitwazzjoni ġdida, biex tiddeċiedi dwar l-għoti ta’ deroga fuq inizjattiva proprja.

(6)

Għalhekk, jenħtieġ li Cabo Verde jingħata deroga temporanja mir-rekwiżit skont ir-regoli dwar l-oriġini preferenzjali li l-prodotti jitqiesu li joriġinaw fil-pajjiż benefiċjarju biss meta materjali inkorporati fil-Kapitoli 3 u 16 tan-Nomenklatura Magħquda jinkisbu għalkollox f’dak il-pajjiż. Fl-ewwel sena tal-applikazzjoni tagħha, jenħtieġ li d-deroga tingħata għal volum annwali ta’ 5 000 tunnellata ta’ fletti tat-tonn ippreparati jew ippreservati, 3 000 tunnellata ta’ fletti tal-kavalli ppreparati jew ippreservati u għal volum annwali ta’ 1 000 tunnellata ta’ fletti tat-tumbrell ippreparati jew ippreservati. Sabiex jitqiesu l-interessi kummerċjali tal-Unjoni Ewropea u tinżamm kompetizzjoni ġusta bejn l-industrija domestika tas-sajd tagħha u dik ta’ pajjiżi terzi, jenħtieġ li l-volum annwali jonqos fis-snin ta’ wara skont il-volumi previsti fl-Annessi I u II, ħlief għall-fletti tat-tumbrell ippreparati jew ippreservati. Jenħtieġ li d-deroga tkun limitata għal perjodu ta’ tliet snin sabiex Cabo Verde jkun jista’ jirkupra mill-kriżi tal-COVID-19 u jagħmel ħiltu biex ilesti l-aġġustamenti strutturali meħtieġa fis-settur tas-sajd, bil-ħsieb li jikkonforma mar-regoli tal-oriġini għall-prodotti kkonċernati. Jenħtieġ li d-deroga tingħata bil-kundizzjoni li l-awtoritajiet doganali ta’ Cabo Verde jwettqu kontrolli kwantitattivi fuq l-esportazzjonijiet tal-prodotti soġġetti għad-deroga, u li dawn jibagħtu lill-Kummissjoni dikjarazzjoni tal-kwantitajiet li għalihom ikunu nħarġu dikjarazzjonijiet tal-oriġini skont dan ir-Regolament u n-numri tas-serje ta’ dawn id-dikjarazzjonijiet.

(7)

Barra minn hekk, jenħtieġ li Cabo Verde jibbenefika minn deroga prevista mir-regoli preferenzjali tal-oriġini tas-SĠP għat-tonn u l-kavalli bil-kundizzjoni li jirrapporta regolarment lis-servizzi kompetenti tal-Kummissjoni dwar il-miżuri li jkun ħa sabiex itejjeb il-konformità mar-regoli dwar l-oriġini tal-prodotti u mal-proċeduri relatati u biex jipprovdi kooperazzjoni amministrattiva kif meħtieġ għall-implimentazzjoni tal-arranġamenti preferenzjali skont is-SĠP imsemmija fl-Artikolu 1(2) tar-Regolament (UE) Nru 978/2012. Jenħtieġ li dawn ir-rapporti jiġu ppreżentati skont skeda ta’ żmien preċiża, fejn kull dewmien biex jintlaħqu l-iskadenzi stabbiliti jwassal għas-sospensjoni tad-deroga li tkun trid tiġi nnotifikata lill-awtoritajiet kompetenti ta’ Cabo Verde wara tfakkira u stedina biex jippreżenta r-rapporti fi żmien għaxart ijiem ta’ xogħol. Kull tali sospensjoni ma għandhiex ittawwal il-perjodu ta’ żmien previst fir-Regolament u fl-Annessi 1 u 2 tiegħu. L-elementi li għandhom jiġu inklużi f’dawn ir-rapporti jenħtieġ li jiġu elenkati f’anness ta’ dan ir-Regolament.

(8)

Jenħtieġ li l-kwantitajiet stabbiliti fl-Anness ta’ dan ir-Regolament ikunu ġestiti skont l-Artikoli minn 49 sa 54 tar-Regolament ta’ Implimentazzjoni tal-Kummissjoni (UE) 2015/2447 (6) li jirregolaw il-ġestjoni tal-kwoti tariffarji.

(9)

Jenħtieġ li l-miżuri previsti f’dan ir-Regolament jidħlu fis-seħħ fil-jum wara dak tal-pubblikazzjoni tiegħu u jiġu applikati b’mod retroattiv mill-1 ta’ Jannar 2021, sabiex titqies is-sitwazzjoni diffiċli ta’ Cabo Verde u biex dan il-pajjiż ikun jista’ japplika d-deroga għall-prodotti importati fl-UE minn dik id-data ’l hawn.

(10)

Il-miżuri previsti f’dan ir-Regolament huma skont l-opinjoni tal-Kumitat tal-Kodiċi Doganali,

1.

L-awtoritajiet doganali ta’ Cabo Verde għandhom jieħdu l-passi neċessarji biex iwettqu kontrolli kwantitattivi fuq l-esportazzjonijiet tal-prodotti msemmijin fl-Artikolu 1.

2.

Ir-referenza segwenti għandha tiddaħħal fid-dikjarazzjonijiet dwar l-oriġini magħmula mill-esportaturi rreġistrati: “Deroga — Regolament ta’ Implimentazzjoni tal-Kummissjoni (UE) 2021/966”.

3.

L-awtoritajiet kompetenti ta’ Cabo Verde għandhom jibagħtu lill-Kummissjoni dikjarazzjoni tal-kwantitajiet li għalihom ikunu nħarġu jew saru dikjarazzjonijiet dwar l-oriġini skont dan ir-Regolament u kopji ta’ dawn il-provi. Dawn ir-rapporti għandhom jiġu kkomunikati lill-Kummissjoni sitt (6) xhur, 18-il xahar u 30 xahar wara d-dħul fis-seħħ ta’ dan ir-Regolament.

4.

Flimkien mar-rapporti msemmijin fil-paragrafu 3, l-awtoritajiet kompetenti ta’ Cabo Verde għandhom jibagħtu lill-Kummissjoni rapport li jkun fih informazzjoni dettaljata dwar il-miżuri li jkunu ħadu sabiex: