(1)

Ir-Regolament ta’ Delega tal-Kummissjoni (UE) Nru 1062/2014 (2) jistabbilixxi lista ta’ sustanzi attivi eżistenti li jridu jiġu evalwati biex possibbilment jiġu approvati għall-użu fil-prodotti bijoċidali. Dik il-lista tinkludi d-diossidu tal-karbonju ġġenerat minn propan, butan jew taħlita tat-tnejn permezz tal-kombustjoni.

(2)

Id-diossidu tal-karbonju ġġenerat mill-propan, mill-butan jew minn taħlita tat-tnejn permezz tal-kombustjoni ġie evalwat għall-użu fil-prodotti bijoċidali tal-prodott tat-tip 19, ripellanti u attrattanti, kif deskritt fl-Anness V tar-Regolament (UE) Nru 528/2012.

(3)

Franza nħatret l-Istat Membru relatur u l-awtorità kompetenti tagħha ssottomettiet ir-rapport tal-valutazzjoni flimkien mal-konklużjonijiet tagħha lill-Aġenzija Ewropea għas-Sustanzi Kimiċi (“l-Aġenzija”) fit-18 ta’ Settembru 2019.

(4)

F’konformità mal-Artikolu 7(2) tar-Regolament Delegat (UE) Nru 1062/2014, il-Kumitat dwar il-Prodotti Bijoċidali adotta l-opinjonijiet tal-Aġenzija fis-16 ta’ Ġunju 2020 (3), wara li kkunsidra l-konklużjonijiet tal-awtorità kompetenti li wettqet l-evalwazzjoni.

(5)

Skont dik l-opinjoni, il-prodotti bijoċidali għall-prodotti tat-tip 19 li jużaw id-diossidu tal-karbonju ġġenerat mill-propan, mill-butan jew minn taħlita tat-tnejn permezz tal-kombustjoni jistgħu jkunu mistennija li jissodisfaw ir-rekwiżiti tal-Artikolu 19(1)(b) tar-Regolament (UE) Nru 528/2012. L-opinjoni tal-ECHA kkonkludiet ukoll li din is-sustanza attiva ma tagħtix lok għal tħassib u għalhekk hija eliġibbli għall-inklużjoni fl-Anness I tar-Regolament (UE) Nru 528/2012.

(6)

B’kont meħud tal-opinjoni tal-Aġenzija, huwa għalhekk xieraq li d-diossidu tal-karbonju ġġenerat mill-propan, mill-butan jew minn taħlita tat-tnejn li huma permezz tal-kombustjoni jiġi inkluż fl-Anness I tar-Regolament (UE) Nru 528/2012. Peress li d-diossidu tal-karbonju ġġenerat mill-propan, mill-butan jew minn taħlita tat-tnejn permezz tal-kombustjoni ġie vvalutat abbażi ta’ dossier tas-sustanza attiva li jikkonforma mar-rekwiżiti stabbiliti fl-Artikolu 11(1) tad-Direttiva 98/8/KE tal-Parlament Ewropew u tal-Kunsill (4), id-diossidu tal-karbonju ġġenerat mill-propan, mill-butan jew minn taħlita tat-tnejn permezz tal-kombustjoni jenħtieġ li jiġi inkluż fil-kategorija 6 tal-Anness I tar-Regolament (UE) Nru 528/2012, “Sustanzi li għalihom Stat Membru jkun ikkonvalida dossier dwar is-sustanza attiva skont l-Artikolu 7(3) ta’ dan ir-Regolament jew li jkun aċċetta dan id-dossier skont l-Artikolu 11(1) tad-Direttiva 98/8/KE”.

(7)

L-Artikolu 89(3) tar-Regolament (UE) Nru 528/2012 fih miżuri tranżizzjonali fejn sustanza attiva eżistenti inkluża fil-programm ta’ ħidma għall-eżami sistematiku ta’ sustanzi attivi eżistenti tiġi approvata f’konformità ma’ dak ir-Regolament. Fir-rigward tad-diossidu tal-karbonju ġġenerat mill-propan, mill-butan jew minn taħlit tat-tnejn permezz tal-kombustjoni għall-prodotti tat-tip 19, id-data tal-approvazzjoni għall-finijiet tal-Artikolu 89(3) ta’ dak ir-Regolament jenħtieġ li tiġi stabbilita bħala dik tal-1 ta’ Lulju 2022, sabiex ikun hemm biżżejjed żmien biex l-applikazzjonijiet għall-awtorizzazzjoni jitressqu f’konformità mat-tieni subparagrafu tal-Artikolu 89(3) ta’ dak ir-Regolament,