(1)

Skont l-Artikolu 50(2)(a) tar-Regolament (UE) Nru 1151/2012, l-applikazzjoni tar-Rumanija biex l-isem “Caşcaval de Săveni” jiġi rreġistrat fir-reġistru bħala Indikazzjoni Ġeografika Protetta (IĠP) ġiet ippubblikata f’Il-Ġurnal Uffiċjali tal-Unjoni Ewropea (2).

(2)

Fit-30 ta’ Marzu 2020, il-Kummissjoni rċeviet avviż ta’ oppożizzjoni u d-dikjarazzjoni motivata ta’ oppożizzjoni relatata mill-Bulgarija. Fit-2 ta’ April 2020, il-Kummissjoni għaddiet lir-Rumanija l-avviż ta’ oppożizzjoni u d-dikjarazzjoni motivata ta’ oppożizzjoni li rċeviet mir-Rumanija.

(3)

Il-Kummissjoni eżaminat l-oppożizzjoni li bagħtet il-Bulgarija u sabitha ammissibbli. Il-kelma “кашкавал”, li ġiet ippreżentata fid-dikjarazzjoni tar-Rumanija bit-traskrizzjonijiet “kashkaval” jew “kaschaval”, hija omonima mal-isem “caşcaval” li jifforma parti mill-isem kompost “Caşcaval de Săveni”. It-terminu “кашкавал” huwa l-isem użat fil-Bulgarija għal prodotti bażiċi tal-ħalib li huma prodotti u kummerċjalizzati fil-Bulgarija fuq skala kummerċjali. Id-dikjarazzjoni ta’ oppożizzjoni sostniet li r-reġistrazzjoni tal-isem propost tipperikola l-eżistenza tal-isem “кашкавал” jew ta’ trademarks li jinkludu t-terminu “кашкавал” u l-eżistenza ta’ prodotti li ilhom legalment fis-suq Bulgaru għal mill-inqas ħames snin qabel id-data tal-pubblikazzjoni tal-applikazzjoni għar-reġistrazzjoni tal-isem “Caşcaval de Săveni”.

(4)

B’ittra datata t-28 ta’ Mejju 2020, il-Kummissjoni stiednet lill-partijiet interessati biex jinvolvu ruħhom fil-konsultazzjonijiet rilevanti biex jilħqu ftehim bejniethom f’konformità mal-proċeduri interni tagħhom.

(5)

Ir-Rumanija u l-Bulgarija laħqu ftehim, li ġie nnotifikat mir-Rumanija lill-Kummissjoni fit-28 ta’ Awwissu 2020, fi ħdan l-iskadenza stipulata.

(6)

Ir-Rumanija u l-Bulgarija kkonkludew li jenħtieġ li r-reġistrazzjoni tal-isem “Caşcaval de Săveni” fir-reġistru tad-Denominazzjonijiet tal-Oriġini Protetti u tal-Indikazzjonijiet Ġeografiċi Protetti ma tkunx ta’ detriment għat-talbiet futuri tal-Bulgarija għar-reġistrazzjoni ta’ isem kompost inkluż it-terminu “кашкавал” fil-qafas tal-iskemi tal-kwalità tal-UE.

(7)

Il-kontenut tal-ftehim konkluż bejn ir-Rumanija u l-Bulgarija jenħtieġ li jitqies billi jikkonforma mad-dispożizzjonijiet tar-Regolament (UE) Nru 1151/2012 u mal-leġiżlazzjoni tal-Unjoni.

(8)

Fit-8 ta’ April 2020, il-Kummissjoni rċeviet avviż ta’ oppożizzjoni u d-dikjarazzjoni motivata relatata mill-Greċja. Il-Kummissjoni għaddiet l-avviż ta’ oppożizzjoni lir-Rumanija fis-16 ta’ April 2020.

(9)

Il-Kummissjoni eżaminat l-oppożizzjoni li bagħtet il-Greċja u sabitha ammissibbli. Id-dikjarazzjoni ta’ oppożizzjoni ssotni li r-reġistrazzjoni tal-isem propost tipperikola l-eżistenza tal-isem “кашкавал” jew ta’ trademarks li jinkludu t-terminu “кашкавал” u l-eżistenza ta’ prodotti li ilhom legalment fis-suq Grieg għal mill-inqas ħames snin qabel id-data tal-pubblikazzjoni tal-applikazzjoni għar-reġistrazzjoni tal-isem “Caşcaval de Săveni”.

(10)

B’ittra datata t-2 ta’ Ġunju 2020, il-Kummissjoni stiednet lill-partijiet interessati biex jinvolvu ruħhom fil-konsultazzjonijiet rilevanti biex jilħqu ftehim bejniethom f’konformità mal-proċeduri interni tagħhom.

(11)

Fit-28 ta’ Awwissu 2020, skont l-aħħar subparagrafu tal-Artikolu 51(3) tar-Regolament (UE) Nru 1151/2012, ir-Rumanija ressqet talba għall-estensjoni tal-iskadenza għall-konsultazzjonijiet mal-Greċja fil-proċedura ta’ oppożizzjoni li tikkonċerna l-applikazzjoni msemmija hawn fuq li ntlaqgħet mill-Kummissjoni.

(12)

Ir-Rumanija u l-Greċja laħqu ftehim, li ġie nnotifikat mir-Rumanija lill-Kummissjoni fis-27 ta’ Novembru 2020, fi ħdan l-iskadenza stipulata.

(13)

Ir-Rumanija u l-Greċja qablu li jenħtieġ li l-protezzjoni tal-isem “Caşcaval de Săveni” ma tkoprix l-isem waħdu “caşcaval” iżda biss l-isem kompost “Caşcaval de Săveni” bħala tali. Barra minn hekk, huma kkonkludew li jenħtieġ li r-Regolament li jirreġistra l-isem “Caşcaval de Săveni” fir-reġistru tad-Denominazzjonijiet tal-Oriġini Protetti u tal-Indikazzjonijiet Ġeografiċi Protetti jiċċara l-ambitu għall-użu kontinwu tat-terminu “caşcaval”.

(14)

Il-kontenut tal-ftehim konkluż bejn ir-Rumanija u l-Greċja jenħtieġ li jitqies billi jikkonforma mad-dispożizzjonijiet tar-Regolament (UE) Nru 1151/2012 u mal-leġiżlazzjoni tal-UE.

(15)

Għaldaqstant, jenħtieġ li l-isem “Caşcaval de Săveni” (IĠP) jiġi protett bħala tali, filwaqt li t-terminu “caşcaval” jista’ jkompli jiġi użat fit-tikkettar u fil-preżentazzjonijiet fi ħdan it-territorju tal-Unjoni dment li jitħarsu l-prinċipji u r-regoli applikabbli fl-ordni ġuridiku tagħha,