(1)

Id-Deċiżjoni tal-Kummissjoni 2011/278/UE (2) ddeterminat 54 parametru referenzjarju li jservu bħala bażi għall-allokazzjoni bla ħlas (il-“parametri referenzjarji”) u l-valuri għal dawk il-parametri referenzjarji għall-perjodu mill-2013 sal-2020. Ir-Regolament Delegat tal-Kummissjoni (UE) Nru 2019/331 (3) ħassar u ssostitwixxa d-Deċiżjoni 2011/278/UE mill-1 ta’ Jannar 2021 u stabbilixxa punti ta’ tluq identiċi għad-determinazzjoni tar-rati ta’ tnaqqis annwali għal kull aġġornament tal-valur tal-parametru referenzjarju għall-perjodu mill-2021 sal-2030.

(2)

Sa fejn ikun fattibbli, il-54 valur tal-parametri referenzjarji fid-Deċiżjoni 2011/278/UE ġew iddeterminati abbażi tad-data dwar l-effiċjenza tal-gassijiet serra ta’ installazzjonijiet individwali pprovduta mill-assoċjazzjonijiet settorjali Ewropej rispettivi skont ir-regoli ddefiniti mill-Kummissjoni permezz ta’ dokument ta’ gwida u l-hekk imsejħa “kotba tar-regoli settorjali”. Minħabba n-natura volontarja tal-ġbir tad-data, is-sett tad-data ma kopriex l-installazzjonijiet kollha kkonċernati. L-14-il valur tal-parametri referenzjarji tal-prodotti kienu bbażati fuq data minn installazzjonijiet ta’ prodott wieħed, peress li l-assenjazzjoni tal-emissjonijiet lil prodotti individwali fl-installazzjonijiet ta’ diversi prodotti kkonċernati ma kinitx meqjusa fattibbli fil-perjodu ta’ żmien partikolari. Minħabba nuqqas ta’ data minn installazzjonijiet individwali, ħames valuri ta’ parametri referenzjarji ta’ prodott kif ukoll il-valuri tal-parametru referenzjarju tas-sħana u tal-fjuwil kienu bbażati fuq informazzjoni mid-Dokumenti ta’ Referenza dwar l-Aqwa Tekniki Disponibbli (BREFs) jew letteratura oħra. Erba’ valuri ta’ parametri referenzjarji ta’ prodott kienu bbażati fuq valuri oħra ta’ parametri referenzjarji ta’ prodott biex jiġu żgurati kundizzjonijiet ekwi għall-produtturi tal-istess prodotti jew prodotti simili.

(3)

Il-valuri tal-parametri referenzjarji riveduti għandhom jiġu ddeterminati abbażi ta’ informazzjoni vverifikata dwar l-effiċjenza tal-gassijiet serra tal-installazzjonijiet irrapportati skont l-Artikolu 11 tad-Direttiva 2003/87/KE għas-snin 2016 u 2017. Għal kull parametru referenzjarju, għandha tiġi kkalkulata l-prestazzjoni medja fl-2016 u fl-2017 tal-aktar 10 % installazzjonijiet effiċjenti. Abbażi ta’ tqabbil ta’ dawk il-valuri mal-parametri referenzjarji stabbiliti fid-Deċiżjoni 2011/278/UE li kienu bbażati fuq data tal-prestazzjoni għas-snin 2007 u 2008, ir-rati ta’ tnaqqis annwali għandhom jiġu ddeterminati għal kull parametru referenzjarju għall-perjodu ta’ disa’ (9) snin mill-2007/2008 sal-2016/2017. Dawk ir-rati ta’ tnaqqis annwali mbagħad jintużaw biex jiġi kkalkulat, permezz ta’ estrapolazzjoni, it-tnaqqis korrispondenti tal-valuri tal-parametri referenzjarji għall-perjodu ta’ 15-il sena mill-2007/2008 sal-2022/2023. F’konformità mal-Artikolu 10a(2) tad-Direttiva 2003/87/KE, it-tnaqqis applikat tul il-perjodu ta’ 15-il sena jenħtieġ li ma jkunx inqas minn 3 % u ma jkunx ogħla minn 24 %. Dispożizzjonijiet speċifiċi japplikaw għall-aġġornament tal-valuri tal-parametri referenzjarji għall-aromatiċi, l-idroġenu, il-gass sintetiku u l-metall jaħraq.

(4)

Il-lista ta’ installazzjonijiet li fihom informazzjoni rilevanti għall-allokazzjoni bla ħlas tal-kwoti tal-emissjonijiet ġiet ippreżentata lill-Kummissjoni mill-Istati Membri sat-30 ta’ Settembru 2019 f’konformità mal-Artikolu 11(1) tad-Direttiva 2003/87/KE. Sabiex jiġi żgurat li l-valuri tal-parametri referenzjarji jkunu bbażati fuq data korretta, il-Kummissjoni wettqet kontrolli fil-fond tal-kompletezza u l-konsistenza tad-data rilevanti għall-allokazzjoni mingħajr ħlas tal-kwoti tal-emissjonijiet, bl-użu wkoll ta’ għodod awtomatizzati. Fejn xieraq, il-Kummissjoni talbet lill-awtoritajiet kompetenti kkonċernati għal kjarifiki u korrezzjonijiet. Bħala riżultat ta’ din il-proċedura, il-Kummissjoni kisbet sett preċiż, konsistenti u komparabbli ta’ data dwar l-effiċjenzi tal-gassijiet serra tal-installazzjonijiet stazzjonarji kollha koperti mid-Direttiva 2003/87/KE. Dak is-sett ta’ data ta’ kwalità għolja ntuża biex jiġu ddeterminati l-valuri tal-parametri referenzjarji riveduti għall-perjodu mill-2021 sal-2025 għal kull wieħed mill-54 parametru referenzjarju. Id-data mis-subinstallazzjonijiet kollha li jaqgħu taħt id-definizzjoni ta’ parametru referenzjarju speċifiku, kif stabbilit fl-Anness I tar-Regolament Delegat (UE) 2019/331, intużat biex tiġi ddeterminata l-prestazzjoni medja tal-aktar 10 % installazzjonijiet effiċjenti fis-snin 2016 u 2017, kif stabbilit fl-Artikolu 10a(2) tad-Direttiva 2003/87/KE u fil-premessa (11) tad-Direttiva (UE) 2018/410 tal-Parlament Ewropew u tal-Kunsill (4).

(5)

L-Artikolu 27 tad-Direttiva 2003/87/KE jistabbilixxi li l-Istati Membri huma permessi taħt ċerti kundizzjonijiet li jeskludu mill-EU ETS installazzjonijiet li rrappurtaw emissjonijiet ta’ inqas minn 25 000 tunnellata ekwivalenti ta’ diossidu tal-karbonju u, fejn iwettqu attivitajiet ta’ kombustjoni, għandhom kapaċità termali kklassifikata ta’ inqas minn 35 MW, esklużi l-emissjonijiet mill-bijomassa. L-Artikolu 27a tad-Direttiva 2003/87/KE jistabbilixxi li l-Istati Membri jistgħu wkoll jeskludu mill-EU ETS installazzjonijiet li rrappurtaw emissjonijiet ta’ inqas minn 2 500 tunnellata ekwivalenti ta’ diossidu tal-karbonju, mingħajr ma jitqiesu l-emissjonijiet mill-bijomassa. Diversi Stati Membri ddeċidew li jeskludu installazzjonijiet mill-EU ETS għall-perjodu mill-2021 sal-2025 abbażi ta’ dawk id-dispożizzjonijiet. Jenħtieġ li dawk l-installazzjonijiet ma jitqisux meta jiġu ddeterminati l-valuri riveduti tal-parametri referenzjarji.

(6)

Ir-Regolament Delegat (UE) 2019/331 jinkludi regoli għad-determinazzjoni tal-emissjonijiet fil-livell tas-subinstallazzjoni biex jiġi żgurat it-trattament konsistenti tal-emissjonijiet relatati mal-importazzjonijiet, l-esportazzjonijiet u l-produzzjoni interna ta’ sħana li titkejjel, ta’ gassijiet ta’ skart li fihom il-karbonju u ta’ CO2 ittrasferit. Għal dak il-għan, il-fatturi ta’ emissjoni rilevanti ġew iddeterminati bl-użu tal-valuri referenzjarji tas-sħana u tal-fjuwil li min-naħa tagħhom kienu ġew aġġornati billi ġew applikati r-rati ta’ tnaqqis annwali ddeterminati. Għall-importazzjonijiet tas-sħana b’fatturi ta’ emissjoni mhux magħrufa jew mhux definiti b’mod ċar u għall-esportazzjonijiet tas-sħana, intuża valur ta’ 53.3 t ekwivalenti ta’ CO2/TJ. Dak il-valur inkiseb bl-applikazzjoni ta’ rata annwali ta’ tnaqqis ta’ 1.6 % għall-valur referenzjarju tas-sħana għall-perjodu ta’ disa’ (9) snin mill-2007/2008 sal-2016/2017. Għall-esportazzjonijiet tal-gass ta’ skart, il-valur ta’ 37.4 t ta’ ekwivalenti ta’ CO2/TJ tnaqqas mill-fattur attwali ta’ emissjoni tal-gass ta’ skart. Dak il-valur jikkorrispondi għall-fattur ta’ emissjoni tal-gass naturali (56.1 t ekwivalenti ta’ CO2/TJ) immultiplikat b’fattur ta’ 0,667 li jirrappreżenta d-differenza fl-effiċjenza bejn l-użu tal-gass ta’ skart u l-użu tal-gass naturali tal-fjuwil ta’ referenza. Għall-importazzjonijiet tal-gass ta’ skart, intuża valur ta’ 48.0 t ta’ ekwivalenti ta’ CO2/TJ. Dak il-valur inkiseb bl-applikazzjoni ta’ rata ta’ tnaqqis annwali ta’ 1.6 % għall-valur referenzjarju tal-fjuwil għall-perjodu ta’ disa’ (9) snin mill-2007/2008 sal-2016/2017.

(7)

Fil-każ ta’ subinstallazzjonijiet li jimportaw prodotti intermedji li l-produzzjoni tagħhom hija koperta mill-konfini tas-sistema tal-parametru referenzjarju ta’ prodott rilevanti u fejn ma kienx fattibbli li jiġu ddeterminati l-emissjonijiet ta’ gassijiet serra assoċjati mal-produzzjoni ta’ dawk il-prodotti intermedji abbażi tad-data ppreżentata, jenħtieġ li l-effiċjenzi tal-gassijiet serra tas-subinstallazzjonijiet ikkonċernati ma jiġux ikkunsidrati meta jiġu ddeterminati l-valuri riveduti tal-parametri referenzjarji. Dan jikkonċerna l-aġġornamenti tal-valur referenzjarju għall-prodotti tar-raffineriji, il-metall jaħraq, il-ġir dolomitiku sinterizzat, l-ammonijaka, l-idroġenu u l-karbonat tas-sodju. Fil-każ ta’ subinstallazzjonijiet li jesportaw prodotti intermedji u fejn ma kienx fattibbli li jiġu ddeterminati l-emissjonijiet ta’ gassijiet serra assoċjati mal-proċessi sussegwenti abbażi tad-data ppreżentata, jenħtieġ li l-effiċjenzi tal-gassijiet serra tas-subinstallazzjonijiet ikkonċernati ma jiġux ikkunsidrati meta jiġu ddeterminati l-valuri riveduti tal-parametri referenzjarji. Dan jikkonċerna l-aġġornament tal-valur referenzjarju għall-prodotti tar-raffineriji u l-metalli jaħarqu.

(8)

Il-metodoloġija għall-attribuzzjoni tal-emissjonijiet lil subinstallazzjonijiet differenti li hija stabbilita fir-Regolament Delegat (UE) 2019/331 tista’ twassal għal effiċjenzi negattivi tal-gassijiet serra f’każijiet fejn is-sħana prodotta bl-użu ta’ fjuwil b’fattur ta’ emissjoni baxx tiġi esportata lejn subinstallazzjonijiet jew installazzjonijiet oħra. F’każijiet bħal dawn, l-effiċjenza tal-gassijiet serra tas-subinstallazzjoni kkonċernata jenħtieġ li tiġi stabbilita għal żero għall-fini tad-determinazzjoni tal-valuri riveduti tal-parametri referenzjarji.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat dwar it-Tibdil fil-Klima,