|
22.2.2021 |
MT |
Il-Ġurnal Uffiċjali tal-Unjoni Ewropea |
L 60/21 |
REGOLAMENT DELEGAT TAL-KUMMISSJONI (UE) 2021/268
tat-28 ta’ Ottubru 2020
li jemenda l-Anness IV tar-Regolament (UE) 2018/841 tal-Parlament Ewropew u tal-Kunsill fir-rigward tal-livelli ta’ referenza għall-foresti li jeħtieġ jiġu applikati mill-Istati Membri għall-perjodu 2021–2025
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2018/841 tal-Parlament Ewropew u tal-Kunsill tat-30 ta’ Mejju 2018 dwar l-inklużjoni tal-emissjonijiet u l-assorbimenti ta’ gassijiet serra minn użu tal-art, tibdil fl-użu tal-art u l-forestrija fil-qafas ta’ politika għall-klima u l-enerġija għall-2030, u li jemenda r-Regolament (UE) Nru 525/2013 u d-Deċiżjoni (UE) Nru 529/2013/UE (1), u b’mod partikolari l-Artikolu 8(8) tiegħu,
Billi:
|
(1) |
L-Istati Membri ppreżentaw lill-Kummissjoni l-pjanijiet nazzjonali tal-kontabbiltà għall-forestrija, inkluż il-livelli ta’ referenza għall-foresti proposti għall-perjodu mill-2021 sal-2025. |
|
(2) |
F’konformità mal-Artikolu 8(6) tar-Regolament (UE) 2018/841, il-Kummissjoni wettqet valutazzjoni teknika tal-pjanijiet nazzjonali tal-kontabbiltà għall-forestrija ppreżentati mill-Istati Membri, bil-ħsieb li tivvaluta kemm il-livelli ta’ referenza għall-foresti proposti ġew iddeterminati f’konformità mal-prinċipji u r-rekwiżiti stabbiliti fil-paragrafi 4 u 5 tal-Artikolu 8 u fl-Artikolu 5(1) ta’ dak ir-Regolament. |
|
(3) |
Kif meħtieġ mill-Artikolu 8(6) tar-Regolament (UE) 2018/841 u f’konformità mal-impenn meħud matul in-negozjati ta’ dak ir-Regolament, kif stabbilit fid-Dikjarazzjoni dwar l-involviment ta’ esperti indirizzata lill-Parlament Ewropew, il-Kummissjoni, fit-30 ta’ Ottubru 2018 stabbiliet grupp ta’ esperti tal-Kummissjoni (2) (“il-grupp ta’ esperti”) inkarigat li jassisti lill-Kummissjoni fit-twettiq tal-valutazzjoni teknika. Il-grupp ta’ esperti kien jinkludi, fost l-oħrajn, esperti maħtura mill-Istati Membri u individwi maħtura fil-kapaċità personali tagħhom, li jaġixxu b’mod indipendenti u fl-interess tal-pubbliku, rappreżentanti tal-organizzazzjonijiet tar-riċerka u dawk nongovernattivi, u partijiet ikkonċernati. |
|
(4) |
Abbażi tal-fehmiet tal-grupp ta’ esperti u l-valutazzjoni teknika, il-Kummissjoni ħarġet rakkomandazzjonijiet tekniċi lill-Istati Membri, bil-ħsieb li tiffaċilita r-reviżjoni teknika tal-livelli ta’ referenza għall-foresti proposti. Il-Kummissjoni ppubblikat ir-rakkomandazzjonijiet tekniċi fit-18 ta’ Ġunju 2019 (3). |
|
(5) |
Kif meħtieġ mill-Artikolu 8(7) tar-Regolament (UE) 2018/841, abbażi tal-valutazzjoni teknika u tar-rakkomandazzjonijiet tekniċi, l-Istati Membri rrevedew il-pjanijiet nazzjonali tal-kontabbiltà għall-foresti tagħhom u f’xi każijiet, ipproponew livelli ta’ referenza, u kkomunikaw l-informazzjoni lill-Kummissjoni. Fil-25 ta’ Frar 2020, il-Kummissjoni ppubblikat il-livelli ta’ referenza proposti u meta applikabbli, riveduti. |
|
(6) |
Il-grupp ta’ esperti qabel li l-livelli ta’ referenza għall-foresti li l-Kummissjoni qed tipproponi li jiġu inklużi fl-Anness IV tar-Regolament (UE) 2018/841, kienu ddeterminati f’konformità mal-prinċipji u r-rekwiżiti stabbiliti fil-paragrafi 4 u 5 tal-Artikolu 8 u fl-Artikolu 5(1) tar-Regolament (UE) 2018/841. |
|
(7) |
Għalhekk, jenħtieġ li l-Kummissjoni tistabbilixxi l-livelli ta’ referenza għall-foresti li jeħtieġ jiġu applikati mill-Istati Membri għall-perjodu mill-2021 sal-2025. |
|
(8) |
Dan ir-Regolament huwa konformi mal-opinjoni tal-grupp ta’ esperti għall-użu tal-art, it-tibdil fl-użu tal-art u l-forestrija tal-Kummissjoni, |
ADOTTAT DAN IR-REGOLAMENT:
Artikolu 1
L-Anness IV tar-Regolament (UE) 2018/841 huwa emendat kif stabbilit fl-Anness ta’ dan ir-Regolament.
Artikolu 2
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-28 ta’ Ottubru 2020.
Għall-Kummissjoni
Il-President
Ursula VON DER LEYEN
(1) ĠU L 156, 19.6.2018, p. 1.
(2) Il-grupp ta’ esperti tal-Kummissjoni għall-użu tal-art, it-tibdil fl-użu tal-art u l-forestrija (LULUCF) (E03638).
(3) Id-Dokument ta’ Ħidma tal-Persunal tal-Kummissjoni SWD(2019) 213 final tat-18 ta’ Ġunju 2019 dwar il-Valutazzjoni tal-pjanijiet Nazzjonali tal-Kontabbiltà għall-Forestrija.
ANNESS
Fl-Anness IV tar-Regolament (UE) 2018/841, tiżdied it-Taqsima C li ġejja:
“C. Il-livelli ta’ referenza għall-foresti li jeħtieġ jiġu applikati mill-Istati Membri għall-perjodu mill-2021 sal-2025
|
Stat Membru |
Il-livell ta’ referenza għall-foresti għall-perjodu mill-2021 sal-2025 f’tunnellati ta’ ekwivalenti ta’ CO2 kull sena |
|
Il-Belġju |
– 1 369 009 |
|
Il-Bulgarija |
– 5 105 986 |
|
Iċ-Ċekja |
– 6 137 189 |
|
Id-Danimarka |
+ 354 000 |
|
Il-Ġermanja |
– 34 366 906 |
|
L-Estonja |
– 1 750 000 |
|
L-Irlanda |
+ 112 670 |
|
Il-Greċja |
– 2 337 640 |
|
Spanja |
– 32 833 000 |
|
Franza |
– 55 399 290 |
|
Il-Kroazja |
– 4 368 000 |
|
L-Italja |
– 19 656 100 |
|
Ċipru |
– 155 779 |
|
Il-Latvja |
– 1 709 000 |
|
Il-Litwanja |
– 5 164 640 |
|
Il-Lussemburgu |
– 426 000 |
|
L-Ungerija |
– 48 000 |
|
Malta |
-38 |
|
In-Netherlands |
– 1 531 397 |
|
L-Awstrija |
– 4 533 000 |
|
Il-Polonja |
– 28 400 000 |
|
Il-Portugall |
– 11 165 000 |
|
Ir-Rumanija |
– 24 068 200 |
|
Is-Slovenja |
– 3 270 200 |
|
Is-Slovakkja |
– 4 827 630 |
|
Il-Finlandja |
– 29 386 695 |
|
L-Iżvezja |
– 38 721 000 |
|
Ir-Renju Unit |
– 20 701 550 ” |