(1)

Ir-Regolament ta’ Implimentazzjoni tal-Kummissjoni (UE) 2015/1368 (2) jistabbilixxi r-regoli għan-notifika, l-approvazzjoni u l-emenda tal-programmi nazzjonali tal-apikultura.

(2)

Skont ir-Regolament (UE) 2020/2220 tal-Parlament Ewropew u tal-Kunsill (3), il-programmi nazzjonali mfassla għall-perjodu mill-1 ta’ Awwissu 2019 sal-31 ta’ Lulju 2022 għandhom jiġu estiżi sal-31 ta’ Diċembru 2022.

(3)

Ir-Regolament tal-Kunsill (UE, Euratom) 2020/2093 (4) jistabbilixxi limitu massimu annwali għall-Fond Agrikolu Ewropew ta’ Garanzija (“FAEG”). Fi ħdan dak il-livell massimu, dak il-fond se jiffinanzja l-kontribuzzjoni tal-Unjoni għall-programmi tal-apikultura, b’effett mill-2021. L-ammont totali previst fil-qafas finanzjarju pluriennali fir-rigward tal-FAEG jinkludi żieda ta’ EUR 60 miljun fis-sena għall-programmi tal-apikultura.

(4)

Jenħtieġ li l-Istati Membri jimmodifikaw il-programmi nazzjonali tagħhom sabiex jitqiesu l-estensjoni taż-żmien u ż-żieda fil-baġit għas-settur tal-apikultura. Huma jenħtieġ li jinnotifikaw lill-Kummissjoni bil-programmi mmodifikati li għandhom bżonn approvazzjoni sal-15 ta’ Marzu 2021.

(5)

Sabiex tiġi żgurata l-kontinwità fil-pagamenti, dawk marbuta mal-miżuri implimentati mill-1 ta’ Awwissu 2022 sal-31 ta’ Diċembru 2022 jenħtieġ li jintbagħtu lill-benefiċjarji bejn is-16 ta’ Ottubru 2022 u l-15 ta’ Ottubru 2023.

(6)

Għalhekk, jenħtieġ li r-Regolament ta’ Implimentazzjoni (UE) 2015/1368 jiġi emendat skont dan.

(7)

Il-miżuri previsti f’dan ir-Regolament huma f’konformità mal-opinjoni tal-Kumitat għall-Organizzazzjoni Komuni tas-Swieq Agrikoli,

(1)

Fl-Artikolu 3, it-tieni paragrafu li ġej jiġi miżjud:

“Sal-15 ta’ Marzu 2021, l-Istati Membri għandhom jinnotifikaw lill-Kummissjoni bl-emenda għall-programmi nazzjonali tagħhom skont it-tieni subparagrafu tal-Artikolu 55(1) tar-Regolament (UE) Nru 1308/2013. Din l-emenda għandha tqis il-kontribuzzjoni miżjuda tal-Unjoni mill-2021.”;

(2)

fl-Artikolu 5(1) jiżdied it-tieni subparagrafu li ġej:

“L-emendi tal-programmi tal-apikultura skont it-tieni paragrafu tal-Artikolu 3 għandhom jiġu approvati mill-Kummissjoni, skont il-punt (c) tal-ewwel paragrafu tal-Artikolu 57 tar-Regolament (UE) Nru 1308/2013, sal-15 ta’ Ġunju 2021.”;

(3)

fl-Artikolu 7, jiddaħħal it-tielet paragrafu li ġej:

“B’deroga mit-tieni paragrafu, il-pagamenti marbuta mal-miżuri implimentati mill-1 ta’ Awwissu 2022 sal-31 ta’ Diċembru 2022 għandhom isiru bejn is-16 ta’ Ottubru 2022 u l-15 ta’ Ottubru 2023.”.