(1)

Ir-Regolament tal-Kummissjoni (KE) Nru 798/2008 (3) jistabbilixxi r-rekwiżiti dwar iċ-ċertifikazzjoni veterinarja għall-importazzjoni lejn l-Unjoni u t-tranżitu minnha, inkluż il-ħżin waqt it-tranżitu, tat-tjur u l-prodotti tat-tjur (“il-prodotti”). Jipprevedi li l-komoditajiet jistgħu biss jiġu importati fl-Unjoni jew jgħaddu minnha bi tranżitu, mill-pajjiżi terzi, it-territorji, iż-żoni jew il-kumpartimenti elenkati fil-kolonni 1 u 3 tat-tabella fil-Parti 1 tal-Anness I tiegħu.

(2)

Ir-Regolament (KE) Nru 798/2008 jistabbilixxi wkoll il-kundizzjonijiet biex pajjiż terz, territorju, żona jew kumpartiment ikunu jistgħu jitqiesu ħielsa mill-influwenza tat-tjur b’patoġeniċità għolja (HPAI).

(3)

Ir-Renju Unit qed jiġi elenkat fil-Parti 1 tal-Anness I tar-Regolament (KE) Nru 798/2008 bħala pajjiż terz li minnu huma awtorizzati l-importazzjoni fl-Unjoni u t-tranżitu minnha ta’ ċerti prodotti tat-tjur tal-irziezet minn ċerti partijiet tat-territorju proprju skont il-preżenza tal-HPAI. Ir-reġjonalizzazzjoni tar-Renju Unit ġiet stabbilita fil-Parti 1 tal-Anness I tar-Regolament (KE) Nru 798/2008, kif emendat bir-Regolament ta’ Implimentazzjoni tal-Kummissjoni (UE) Nru 2020/2205 (4).

(4)

Madankollu, f’Diċembru 2020 ir-Renju Unit ikkonferma aktar tifqigħat tal-HPAI tas-sottotipi H5N8 u H5N1 f’azjendi tat-tjur fit-territorju tiegħu. Minħabba dawk it-tifqigħat, reġjonalizzazzjoni ulterjuri tal-pajjiż ġiet stabbilita fl-Anness tad-Deċiżjoni ta’ Implimentazzjoni tal-Kummissjoni (UE) 2020/1742 (5), kif emendata bid-Deċiżjoni ta’ Implimentazzjoni tal-Kummissjoni (UE) 2020/2240 (6) u d-Deċiżjoni ta’ Implimentazzjoni tal-Kummissjoni (UE) 2020/2242 (7) f’konformità mal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (Ftehim dwar il-Ħruġ), mingħajr preġudizzju għall-applikazzjoni tad-dritt tal-Unjoni għar-Renju Unit u fir-Renju Unit fir-rigward tal-Irlanda ta’ Fuq f’konformità mal-Artikolu 5(4) tal-Protokoll dwar l-Irlanda/l-Irlanda ta’ Fuq għall-Ftehim dwar il-Ħruġ flimkien mal-Anness 2 ta’ dak il-Protokoll. Peress li l-miżuri għall-kontroll u l-eradikazzjoni ta’ dawk it-tifqigħat ikomplu wara l-31 ta’ Diċembru 2020, dik ir-reġjonalizzazzjoni għandha tiġi riflessa fir-Regolament (KE) Nru 798/2008.

(5)

Barra minn hekk, wara l-pubblikazzjoni tad-Deċiżjonijiet ta’ Implimentazzjoni (UE) 2020/2240 u 2020/2242, ir-Renju Unit ikkonferma aktar tifqigħat tal-HPAI fiż-żoni stabbiliti fihom, li jenħtieġ li jiġu riflessi wkoll fir-Regolament (KE) Nru 798/2008.

(6)

Għaldaqstant, l-entrata għar-Renju Unit fit-tabella fil-Parti 1 tal-Anness I tar-Regolament (KE) Nru 798/2008 jenħtieġ li tiġi emendata biex titqies il-qagħda epidemjoloġika attwali f'dak il-pajjiż terz.

(7)

Barra minn hekk, peress li r-reġjonalizzazzjoni tar-Renju Unit għal dawk it-tifqigħat ġiet stabbilita meta l-liġi tal-Unjoni kienet tapplika għal dak il-pajjiż f’konformità mal-Ftehim dwar il-Ħruġ, il-miżuri protettivi fir-rigward tat-tifqigħat tal-HPAI kkonfermati fl-2020 kienu jitneħħew 30 jum wara d-data tal-konferma. Huwa xieraq, għalhekk, li dawk id-dati jiġu indikati bħala d-dati minn meta ż-żoni taħt restrizzjoni minħabba t-tifqigħat ikkonfermati fl-2020 jistgħu jerġgħu jitqiesu bħala ħielsa mill-HPAI u l-importazzjonijiet lejn l-Unjoni u t-tranżitu minnha ta’ ċerti prodotti tat-tjur li joriġinaw f’dawk iż-żoni jeħtieġ li jerġgħu jiġu awtorizzati.

(8)

Għalhekk, jenħtieġ li l-Anness I tar-Regolament (KE) Nru 798/2008 jiġi emendat skont dan.

(9)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,