DIRETTIVA TA’ IMPLIMENTAZZJONI TAL-KUMMISSJONI (UE) 2021/746

tas-6 ta’ Mejju 2021

li temenda d-Direttivi 2003/90/KE u 2003/91/KE fir-rigward tal-protokolli għall-eżami ta’ ċerti varjetajiet ta’ speċijiet ta’ pjanti agrikoli u ta’ speċijiet ta’ ħxejjex, u li temenda d-Direttiva 2003/90/KE fir-rigward ta’ ċerti ismijiet botaniċi ta’ pjanti

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 2002/53/KE tat-13 ta’ Ġunju 2002 dwar il-varjetajiet komuni ta’ katalgi ta’ speċi ta’ pjanti agrikoli (1), u b’mod partikolari l-Artikolu 7(2)(a) u (b) tagħha,

Wara li kkunsidrat id-Direttiva tal-Kunsill 2002/55/KE tat-13 ta’ Ġunju 2002 dwar il-marketing ta’ żrieragħ tal-ħxejjex (2), u b’mod partikolari l-Artikolu 7(2)(a) u (b) tagħha,

Billi:

(1)

Id-Direttivi tal-Kummissjoni 2003/90/KE (3) u 2003/91/KE (4) għandhom l-għan li jiżguraw li l-varjetajiet ta’ speċijiet ta’ pjanti agrikoli u ta’ speċijiet ta’ ħxejjex li l-Istati Membri jinkludu fil-katalgi nazzjonali tagħhom jikkonformaw mal-protokolli stabbiliti mill-Uffiċċju Komunitarju tal-Varjetajiet tal-Pjanti (Community Plant Variety Office/CPVO). B’mod partikolari, dawk id-Direttivi għandhom l-għan li jiżguraw konformità mar-regoli li jikkonċernaw il-karatteristiċi li għandhom jiġu koperti bħala minimu mill-eżami u mill-kondizzjonijiet minimi għall-eżami ta’ ċerti varjetajiet ta’ speċijiet ta’ pjanti agrikoli u ta’ ħxejjex. Għall-ispeċijiet mhux koperti mill-protokolli tas-CPVO, dawk id-Direttivi għandhom l-għan li jiżguraw konformità mal-linji gwida tal-Unjoni Internazzjonali għall-Protezzjoni ta’ Varjetajiet Ġodda tal-Pjanti (UPOV).

(2)

Is-CPVO u l-UPOV stabbilew protokolli u linji gwida ulterjuri u aġġornaw dawk eżistenti, b’mod partikolari fir-rigward tal-piżelli, in-nevew, il-qoton, il-ħafur, it-timothy, il-mustarda kannella, il-brokkoli li qed inibbet, il-bżar, il-bettieħ, il-qaqoċċ, it-tadam, il-piżelli, l-ispinaċi u s-selvaġġ tat-tadam. Jenħtieġ li d-Direttivi 2003/90/KE u 2003/91/KE jiġu adattati sabiex jirriflettu dawk l-iżviluppi.

(3)

Id-Direttiva ta’ Implimentazzjoni tal-Kummissjoni (UE) 2021/415 (5) emendat id-Direttivi tal-Kunsill 66/401/KEE (6) u 66/402/KEE (7) fir-rigward ta’ ċerti ismijiet botaniċi tal-qamħ taż-żwien iebes tal-ġeneru Festuca, tal-qamħ durum, tal-qamħ spelt, tas-sorgu u tal-ħaxix tas-Sudan sabiex tirrifletti l-iżvilupp tal-għarfien xjentifiku. Jenħtieġ li d-Direttiva 2003/90/KE tiġi adattata skont dan biex tirrifletti dawk l-emendi.

(4)	Għalhekk, jenħtieġ li d-Direttivi 2003/90/KE u 2003/91/KE jiġu emendati skont dan.

(5)

Għal ċerti varjetajiet li ma ġewx aċċettati għall-inklużjoni fil-Katalgu Komuni tal-varjetajiet ta’ pjanti agrikoli jew ta’ speċijiet ta’ ħxejjex, inbdew l-eżamijiet uffiċjali qabel l-1 ta’ Jannar 2022 f’konformità mad-dispożizzjonijiet tal-protokolli tas-CPVO jew tal-linji gwida tal-UPOV elenkati fl-Anness rispettiv tad-Direttiva 2003/90/KE jew 2003/91/KE kif kienu qabel ma ġew emendati b’din id-Direttiva. Sabiex dawk l-eżamijiet ma jiġux imfixkla, jixraq li għal dawk l-eżamijiet l-Istati Membri japplikaw id-dispożizzjonijiet nazzjonali li jittrasponu d-Direttivi 2003/90/KE u 2003/91/KE kif kienu qabel ma ġew emendati b’din id-Direttiva.

(6)	Il-miżuri previsti f’din id-Direttiva huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DIN ID-DIRETTIVA:

Artikolu 1

Emendi għad-Direttiva 2003/90/KE

L-Annessi I u II tad-Direttiva 2003/90/KE huma sostitwiti bit-test stipulat fil-parti A tal-Anness ta’ din id-Direttiva.

Artikolu 2

Emendi għad-Direttiva 2003/91/KE

L-Annessi tad-Direttiva 2003/91/KE huma sostitwiti bit-test stipulat fil-parti B tal-Anness ta’ din id-Direttiva.

Artikolu 3

Traspożizzjoni

1. L-Istati Membri għandhom jadottaw u jippubblikaw il-liġijiet, ir-regolamenti u d-dispożizzjonijiet amministrattivi meħtieġa sabiex ikunu konformi ma’ din id-Direttiva sa mhux aktar tard mill-31 ta’ Diċembru 2021. Huma għandhom jikkomunikaw it-test ta’ dawk id-dispożizzjonijiet lill-Kummissjoni minnufih. Huma għandhom japplikaw dawk id-dispożizzjonijiet mill-1 ta’ Jannar 2022.

Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.

2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li huma jadottaw fil-qasam kopert minn din id-Direttiva.

Artikolu 4

Miżuri tranżizzjonali

Għall-eżamijiet tal-varjetajiet mibdija qabel l-1 ta’ Jannar 2022, l-Istati Membri għandhom japplikaw id-dispożizzjonijiet nazzjonali li jittrasponu d-Direttivi 2003/90/KE u 2003/91/KE kif kienu qabel ma ġew emendati b’din id-Direttiva.

Artikolu 5

Dħul fis-seħħ

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

Artikolu 6

Destinatarji

Din id-Direttiva hija indirizzata lill-Istati Membri.

Magħmul fi Brussell, is-6 ta’ Mejju 2021.

Għall-Kummissjoni

Il-President

Ursula VON DER LEYEN

(1) ĠU L 193, 20.7.2002, p. 1.

(2) ĠU L 193, 20.7.2002, p. 33.

(3) Id-Direttiva tal-Kummissjoni 2003/90/KE tas-6 ta’ Ottubru 2003 li tistabbilixxi miżuri ta’ implimentazzjoni għall-iskopijiet tal-Artikolu 7 tad-Direttiva tal-Kunsill 2002/53/KE fir-rigward tal-karatteristiċi li għandhom jiġu koperti bħala minimu mill-eżami u l-kondizzjonijiet minimi għall-eżami ta’ ċerti varjetajiet ta’ speċi ta’ pjanti agrikoli (ĠU L 254, 8.10.2003, p. 7).

(4) Id-Direttiva tal-Kummissjoni 2003/91/KE tas-6 ta’ Ottubru 2003 li twaqqaf il-miżuri ta’ implimentazzjoni għall-għanijiet ta’ Artikolu 7 tad-Direttiva tal-Kunsill 2002/55/KE rigward il-karatteristiċi li għandhom jiġu inklużi bħala minimu ottenut mill-eżami u l-kondizzjonijiet minimi għall-eżami ta’ ċerti varjetajiet ta’ speċi ta’ ħaxix (ĠU L 254, 8.10.2003, p. 11).

(5) Id-Direttiva ta’ Implimentazzjoni tal-Kummissjoni (UE) 2021/415 tat-8 ta’ Marzu 2021 li temenda d-Direttivi tal-Kunsill 66/401/KEE u 66/402/KEE sabiex tadatta l-gruppi tassonomiċi u l-ismijiet ta’ ċerti speċi ta’ żrieragħ u ħaxix ħażin għall-evoluzzjoni tal-għarfien xjentifiku u tekniku (ĠU L 81, 9.3.2021, p. 65).

(6) Id-Direttiva tal-Kunsill 66/401/KEE tal-14 ta’ Ġunju 1966 dwar it-tqegħid fis-suq ta’ żerriegħa ta’ pjanti tal-għalf (ĠU 125, 11.7.1966, p. 2298).

(7) Id-Direttiva tal-Kunsill 66/402/KEE tal-14 ta’ Ġunju 1966 dwar il-marketing taż-żerriegħa tal-ġwież (ĠU 125, 11.7.1966, p. 2309).

ANNESS

Parti A — Emendi tal-Annessi I u II tad-Direttiva 2003/90/KE

“ANNESS I

Lista ta’ speċijiet li hemm referenza għalihom fl-Artikolu 1(2)(a), li jridu jikkonformaw mal-protokolli tekniċi tas-CPVO (*)

Isem xjentifiku	Isem komuni	Protokoll tas-CPVO
Festuca arundinacea Schreb.	Żwien tar-ragħa	TP 39/1 tal-1.10.2015
Festuca filiformis Pourr.	Żwien tan-nagħaġ tal-werqa fina	TP 67/1 tat-23.6.2011
Festuca ovina L.	Żwien tan-nagħaġ	TP 67/1 tat-23.6.2011
Festuca pratensis Huds.	Żwien tal-mergħat	TP 39/1 tal-1.10.2015
Festuca rubra L.	Fescue aħmar	TP 67/1 tat-23.6.2011
Festuca trachyphylla (Hack.) Hack.	Żwien iebes tal-ġeneru Festuca	TP 67/1 tat-23.6.2011
Lolium multiflorum Lam.	Sikrana Taljana	TP 4/2 tad-19.3.2019
Lolium perenne L.	Sikrana perenni	TP 4/2 tad-19.3.2019
Lolium x hybridum Hausskn.	Sikrana ibrida	TP 4/2 tad-19.3.2019
Pisum sativum L. (partim)	Piżelli	TP 7/2 Rev. 3 tas-6.3.2020
Poa pratensis L.	Mellieġ taz-zokk lixx	TP 33/1 tal-15.3.2017
Vicia faba L.	Favetta	TP 8/1 tad-19.3.2019
Vicia sativa L.	Ġulbiena komuni	TP 32/1 tad-19.4.2016
Brassica napus L. var. napobrassica (L.) Rchb.	Nevew	TP 89/1 tal-11.3.2015
Raphanus sativus L. var. oleiformis Pers.	Ravanell għall-għalf	TP 178/1 tal-15.3.2017
Brassica napus L. (partim)	Kolza	TP 36/3 tal-21.4.2020
Cannabis sativa L.	Qanneb	TP 276/1 Rev. Parzjali tal-21.3.2018
Glycine max (L.) Merr.	Fażola tas-sojja	TP 80/1 tal-15.3.2017
Gossypium spp.	Qoton	TP 88/2 tal-11.12.2020
Helianthus annuus L.	Ġirasol	TP 81/1 tal-31.10.2002
Linum usitatissimum L.	Kittien/Żerriegħa tal-kittien	TP 57/2 tad-19.3.2014
Sinapis alba L.	Mustarda bajda	TP 179/1 tal-15.3.2017
Avena nuda L.	Ħafur għerwien żgħir, ħafur mingħajr buq	TP 20/3 tas-6.3.2020
Avena sativa L. (tinkludi A. byzantina K. Koch)	Ħafur u Ħafur aħmar	TP 20/3 tas-6.3.2020
Hordeum vulgare L.	Xgħir	TP 19/5 tad-19.3.2019
Oryza sativa L.	Ross	TP 16/3 tal-1.10.2015
Secale cereale L.	Segala	TP 58/1 tal-31.10.2002
Sorghum bicolor (L.) Moench subsp. bicolor	Ħaxix tas-Sorgu	TP 122/1 tad-19.3.2019
Sorghum bicolor (L.) Moench subsp. drummondii (Steud.) de Wet ex Davidse	Ħaxix tas-Sudan	TP 122/1 tad-19.3.2019
Sorghum bicolor (L.) Moench subsp. bicolor x Sorghum bicolor (L.) Moench subsp. drummondii (Steud.) de Wet ex Davidse	Ibridi li jirriżultaw mill-inkroċjar ta’ Sorghum bicolor subsp. bicolor u Sorghum bicolor subsp. drummondii	TP 122/1 tad-19.3.2019
xTriticosecale Wittm. ex A. Camus	Ibridi li jirriżultaw mill-inkroċjar ta’ speċi tal-ġeneru Triticum ma’ speċi tal-ġeneru Secale	TP 121/2 Rev. 1 tas-16.2.2011
Triticum aestivum L. subsp. aestivum	Qamħ	TP 3/5 tad-19.3.2019
Triticum turgidum L. subsp. durum (Desf.) van Slageren	Qamħ durum	TP 120/3 tad-19.3.2014
Zea mays L. (partim)	Qamħirrum	TP 2/3 tal-11.3.2010
Solanum tuberosum L.	Patata	TP 23/3 tal-15.3.2017

ANNESS II

Lista ta’ speċijiet li hemm referenza għalihom fl-Artikolu 1(2)(b) li jridu jikkonformaw mal-linji gwida tal-ittestjar tal-UPOV (*)

Isem xjentifiku	Isem komuni	Linja gwida tal-UPOV
Beta vulgaris L.	Pitravi tal-għalf	TG/150/3 tal-4.11.1994
Agrostis canina L.	Ħaxix iebes bellusi	TG/30/6 tat-12.10.1990
Agrostis gigantea Roth	Agrostide ġganta	TG/30/6 tat-12.10.1990
Agrostis stolonifera L.	Agrostide rampikanti	TG/30/6 tat-12.10.1990
Agrostis capillaris L.	Agrostide komuni	TG/30/6 tat-12.10.1990
Bromus catharticus Vahl	Ħurtan Perenni	TG/180/3 tal-4.4.2001
Bromus sitchensis Trin.	Ħaxix brome tal-Alaska	TG/180/3 tal-4.4.2001
Dactylis glomerata L.	Deqquqa	TG/31/8 tas-17.4.2002
xFestulolium Asch. et Graebn.	Ibridi li jirriżultaw mill-inkroċjar ta’ speċi tal-ġeneru Festuca ma’ speċi tal-ġeneru Lolium	TG/243/1 tad-9.4.2008
Phleum nodosum L.	Mustaċċ il-qattus	TG/34/7 tas-17.12.2020
Phleum pratense L.	Denb il-qattus	TG/34/7 tas-17.12.2020
Lotus corniculatus L.	Qrempuċ tal-mogħoż	TG 193/1 tad-9.4.2008
Lupinus albus L.	Lupina bajda	TG/66/4 tal-31.3.2004
Lupinus angustifolius L.	Lupina b’weraq dojoq	TG/66/4 tal-31.3.2004
Lupinus luteus L.	Lupina safra	TG/66/4 tal-31.3.2004
Medicago doliata Carmign.	Nefel tal-fergħa dritta	TG/228/1 tal-5.4.2006
Medicago italica (Mill.) Fiori	Nefel tal-midalja	TG/228/1 tal-5.4.2006
Medicago littoralis Rohde ex Loisel.	Nefel tax-xtut	TG/228/1 tal-5.4.2006
Medicago lupulina L.	Nefel iswed	TG/228/1 tal-5.4.2006
Medicago murex Willd.	Nefel tal-globu	TG/228/1 tal-5.4.2006
Medicago polymorpha L.	Nefel komuni	TG/228/1 tal-5.4.2006
Medicago rugosa Desr.	Nefel imkemmex	TG/228/1 tal-5.4.2006
Medicago sativa L.	Xnien	TG/6/5 tas-6.4.2005
Medicago scutellata (L.) Mill.	Nefel tal-bebbux	TG/228/1 tal-5.4.2006
Medicago truncatula Gaertn.	Nefel tal-fosdqa	TG/228/1 tal-5.4.2006
Medicago x varia T. Martyn	Xnien ir-ramel	TG/6/5 tas-6.4.2005
Trifolium pratense L.	Silla ħamra	TG/5/8 tas-17.12.2020
Trifolium repens L.	Silla bajda	TG/38/7 tad-9.4.2003
Trifolium subterraneum L.	Silla sotterranja	TG/170/3 tal-4.4.2001
Phacelia tanacetifolia Benth.	Kampanella ta’ Kalifornja	TG/319/1 tal-5.4.2017

Arachis hypogaea L.	Karawett	TG/93/4 tad-9.4.2014
Brassica juncea (L.) Czern	Mustarda kannella	TG/335/1 tas-17.12.2020
Brassica rapa L. var. silvestris (Lam.) Briggs	Rapa tan-nevew	TG/185/3 tas-17.4.2002
Carthamus tinctorius L.	Għosfor	TG/134/3 tat-12.10.1990
Papaver somniferum L.	Peprina	TG/166/4 tad-9.4.2014

”

Parti B — Emendi tal-Annessi tad-Direttiva 2003/91/KE

“ANNESS I

Lista ta’ speċijiet li hemm referenza għalihom fl-Artikolu 1(2)(a), li jridu jikkonformaw mal-protokolli tekniċi tas-CPVO (*)

Isem xjentifiku	Isem komuni	Protokoll tas-CPVO
Allium cepa L. (il-grupp tas-Cepa)	Basal u Echalion	TP 46/2 tal-1.4.2009
Allium cepa L. (il-grupp tal-Aggregatum)	Xallotta	TP 46/2 tal-1.4.2009
Allium fistulosum L.	Basal tal-għenieqed (Japanese bunching onion jew Welsh onion)	TP 161/1 tal-11.3.2010
Allium porrum L.	Kurrat	TP 85/2 tal-1.4.2009
Allium sativum L.	Tewm	TP 162/1 tal-25.3.2004
Allium schoenoprasum L.	Kurrat selvaġġ	TP 198/2 tal-11.3.2015
Apium graveolens L.	Karfus	TP 82/1 tat-13.3.2008
Apium graveolens L.	Karfusa liftija	TP 74/1 tat-13.3.2008
Asparagus officinalis L.	Spraġ	TP 130/2 tas-16.2.2011
Beta vulgaris L.	Pitravi inkluż il-pitrava Cheltenham	TP 60/1 tal-1.4.2009
Beta vulgaris L.	Pitravi tal-ispinaċi jew Chard	TP 106/1 tal-11.3.2015
Brassica oleracea L.	Kaboċċa mberfla	TP 90/1 tas-16.2.2011
Brassica oleracea L.	Pastard	TP 45/2 Rev. 2 tal-21.3.2018
Brassica oleracea L.	Brokkli li qed inibbet jew Kalabriż	TP 151/2 Rev. 2 tal-21.4.2020
Brassica oleracea L.	Kaboċċi ta’ Brussell/kaboċċi taz-zokk	TP 54/2 rev. tal-15.3.2017
Brassica oleracea L.	Ġidra	TP 65/1 rev. tal-15.3.2017
Brassica oleracea L.	Kaboċċa mfelfla (savoy), Kaboċċa bajda u Kaboċċa ħamra	TP 48/3 rev. tal-15.3.2017
Brassica rapa L.	Kaboċċa Ċiniża	TP 105/1 tat-13.3.2008
Capsicum annuum L.	Bżar aħmar jew Bżar ieħor	TP 76/2 Rev. 2 tal-21.4.2020
Cichorium endivia L.	Indivja tal-werqa mibruma u Indivja tal-werqa sempliċi	TP 118/3 tad-19.3.2014
Cichorium intybus L.	Ċikwejra industrijali	TP 172/2 tal-1.12.2005
Cichorium intybus L.	Ċikwejra tal-weraq	TP 154/1 rev. tad-19.3.2019
Cichorium intybus L.	Ċikwejra Witloof	TP 173/2 tal-21.3.2018
Citrullus lanatus (Thunb.) Matsum. et Nakai	Dulliegħ	TP 142/2 tad-19.3.2014
Cucumis melo L.	Bettieħ	TP 104/2 Rev. tal-21.4.2020
Cucumis sativus L.	Ħjar u Ħjar żgħir	TP 61/2 Rev. 2 tad-19.3.2019
Cucurbita maxima Duchesne	Qara’ aħmar	TP 155/1 tal-11.3.2015
Cucurbita pepo L.	Qarabagħli jew Zukkini	TP 119/1 Rev. tad-19.3.2014
Cynara cardunculus L.	Qaqoċċ u Kardun	TP 184/2 Rev. tal-6.3.2020
Daucus carota L.	Karrotti u Karrotti għall-għalf	TP 49/3 tat-13.3.2008
Foeniculum vulgare Mill.	Bużbież	TP 183/1 tal-25.3.2004
Lactuca sativa L.	Ħass	TP 13/6 rev. tal-15.2.2019
Solanum lycopersicum L.	Tadam	TP 44/4 Rev. 4 tal-21.4.2020
Petroselinum crispum (Mill.) Nyman ex A. W. Hill	Tursin	TP 136/1 tal-21.3.2007
Phaseolus coccineus L.	Fażola ta’ Spanja	TP 9/1 tal-21.3.2007
Phaseolus vulgaris L.	Fażola żgħira ta’ Franza u Fażola tixxeblek ta’ Franza	TP 12/4 tas-27.2.2013
Pisum sativum L. (partim)	Piżelli mkemmxa, Piżelli tonda u Piżelli ħelwa (sugar pea)	TP 7/2 Rev. 3 tas-6.3.2020
Raphanus sativus L.	Ravanell, Ravanell iswed	TP 64/2 Rev. Corr. tal-11.3.2015
Rheum rhabarbarum L	Rabarbru	TP 62/1 tad-19.4.2016
Scorzonera hispanica L.	Scorzonera jew Salsafja sewda	TP 116/1 tal-11.3.2015
Solanum melongena L.	Brunġiel	TP 117/1 tat-13.3.2008
Spinacia oleracea L.	Spinaċi	TP 55/5 Rev. 3 tal-6.3.2020
Valerianella locusta (L.) Laterr.	Insalata tal-qamħ jew Ħass tal-ħaruf	TP 75/2 tal-21.3.2007
Vicia faba L. (partim)	Ful	TP 206/1 tal-25.3.2004
Zea mays L. (partim)	Qamħirrum ħelu u Popcorn	TP 2/3 tal-11.3.2010
Solanum habrochaites S. Knapp & D.M. Spooner; Solanum lycopersicum L. x Solanum habrochaites S. Knapp & D.M. Spooner; Solanum lycopersicum L. x Solanum peruvianum (L.) Mill.; Solanum lycopersicum L. x Solanum cheesmaniae (L. Ridley) Fosberg; Solanum pimpinellifolium L. x Solanum habrochaites S. Knapp & D.M. Spooner	Selvaġġ tat-tadam	TP 294/1 Rev. 4 tal-21.4.2020
Cucurbita maxima Duchesne x Cucurbita moschata Duchesne	L-ibridi interspeċifiċi tal-Cucurbita maxima Duch. x Cucurbita moschata Duch. għal użu bħala selvaġġ (rootstocks)	TP 311/1 tal-15.3.2017

ANNESS II

Lista ta’ speċijiet li hemm referenza għalihom fl-Artikolu 1(2)(b) li jridu jikkonformaw mal-linji gwida tal-ittestjar tal-UPOV (*)

Isem xjentifiku	Isem komuni	Linja gwida tal-UPOV
Brassica rapa L.	Nevew	TG/37/10 tal-4.4.2001

”

(*) It-test ta’ dawn il-protokolli jinsab fuq is-sit web tas-CPVO (www.cpvo.europa.eu).

(*) It-test ta’ dawn il-linji gwida jinsab fuq is-sit web tal-UPOV (www.upov.int)

(*) It-test ta’ dawn il-protokolli jinsab fuq is-sit web tas-CPVO (www.cpvo.europa.eu).

(*) It-test ta’ dawn il-linji gwida jinsab fuq is-sit web tal-UPOV (www.upov.int).