DEĊIŻJONI TA’ IMPLIMENTAZZJONI TAL-KUNSILL (PESK) 2021/2198

tat-13 ta’ Diċembru 2021

li timplimenta d-Deċiżjoni (PESK) 2015/1333 dwar miżuri restrittivi fid-dawl tas-sitwazzjoni fil-Libja

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea, u b'mod partikolari l-Artikolu 31(2) tiegħu,

Wara li kkunsidra d-Deċiżjoni tal-Kunsill (PESK) 2015/1333 tal-31 ta' Lulju 2015 dwar miżuri restrittivi fid-dawl tas-sitwazzjoni fil-Libja, u li tħassar id-Deċiżjoni 2011/137/PESK (1), u b'mod partikolari l-Artikolu 12(2) tagħha,

Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta' Sigurtà,

Billi:

(1)	Fil-31 ta' Lulju 2015, il-Kunsill adotta d-Deċiżjoni (PESK) 2015/1333.

(2)	Fl-14 ta' Ottubru 2020, il-Kunsill adotta d-Deċiżjoni ta' Implimentazzjoni (PESK) 2020/1483 (2), li ddeżinjat persuna waħda involuta f'atti li jheddu l-paċi, is-sigurtà jew l-istabbiltà tal-Libja, u li għandha rabtiet mill-qrib, inkluż finanzjarji, mal-Grupp Wagner.

(3)

Fil-konklużjonijiet tiegħu tal-24 u l-25 ta' Ġunju 2021, il-Kunsill Ewropew ikkonferma l-impenn tiegħu għall-proċess ta' stabbilizzazzjoni tal-Libja taħt l-awspiċji tan-Nazzjonijiet Uniti, u appella għal progress fid-djalogu politiku inklużiv u definit mil-Libjani u għall-irtirar mingħajr dewmien tal-forzi barranin u tal-merċenarji kollha.

(4)	Il-Kunsill jibqa' mħasseb dwar is-sitwazzjoni fil-Libja u b'mod partikolari dwar atti li jheddu l-paċi, is-sigurtà jew l-istabbiltà tal-pajjiż.

(5)	F'dan il-kuntest, jenħtieġ li persuna waħda involuta f'tali atti tinżdied mal-listi ta' persuni u entitajiet soġġetti għall-miżuri restrittivi li jinsabu fl-Annessi II u IV għad-Deċiżjoni (PESK) 2015/1333.

(6)	Għalhekk l-Annessi II u IV għad-Deċiżjoni (PESK) 2015/1333 jenħtieġ li jiġu emendati skont dan,

ADOTTA DIN ID-DEĊIŻJONI:

Artikolu 1

L-Annessi II u IV għad-Deċiżjoni (PESK) 2015/1333 huma emendati f'konformità mal-Anness għal din id-Deċiżjoni.

Artikolu 2

Din id-Deċiżjoni għandha tidħol fis-seħħ fid-data tal-pubblikazzjoni tagħha f'Il-Ġurnal Uffiċjali tal-Unjoni Ewropea.

Magħmul fi Brussell, it-13 ta’ Diċembru 2021.

Għall-Kunsill

Il-President

J. BORRELL FONTELLES

(1) ĠU L 206, 1.8.2015, p. 34.

(2) Id-Deċiżjoni ta' Implimentazzjoni tal-Kunsill (PESK) 2020/1483 tal-14 ta' Ottubru 2020 li timplimenta d-Deċiżjoni (PESK) 2015/1333 dwar miżuri restrittivi fid-dawl tas-sitwazzjoni fil-Libja (ĠU L 341, 15.10.2020, p. 16).

ANNESS

(1)

Fl-Anness II għad-Deċiżjoni (PESK) 2015/1333, taħt l-intestatura “A. Persuni”, tinżdied l-entrata li ġejja:

Isem

Informazzjoni ta' identifikazzjoni

Raġunijiet

Data tal-elenkar

“20.

KUZNETSOV, Aleksandr (Alexander) Sergeevich

(Александр Сергеевич КУЗНЕЦОВ)

Pożizzjoni(jiet): Kmandant tal-Ewwel Kumpanija ta' Attakk u Rikonjizzjoni tal-Grupp Wagner

Sinjal tas-sejħa: Ratibor

Data tat-twelid: 8 ta' Ottubru 1977

Post tat-twelid: Nikolskolye, ex USSR (ex Unjoni tar-Repubbliki Soċjalisti Sovjetiċi) (issa l-Federazzjoni Russa)

Nazzjonalità: Russa

ID tal-Grupp Wagner: M-0271

Ġeneru: maskil

Aleksandr Sergeevich Kuznetsov jappartjeni għall-istruttura ta' kmand tal-Grupp Wagner, entità militari privata mhux inkorporata bbażata fir-Russja. Ħa l-kmand tal-Ewwel Kumpanija ta' Attakk u Rikonjizzjoni tal-Grupp Wagner fl-2014. Huwa ndarab f'Settembru 2019 fil-Libja waqt li kien qed jiġġieled flimkien mal-Armata għal-Liberazzjoni Nazzjonali Libjana (NLA) bħala kmandant tal-aġenti militari tal-Grupp Wagner. Permezz tal-pożizzjoni u l-azzjonijiet tiegħu, Kuznetsov huwa responsabbli għall-attivitajiet tal-Grupp Wagner li jheddu l-paċi, l-istabbiltà u s-sigurtà tal-Libja.

13.12.2021”

(2)

Fl-Anness IV għad-Deċiżjoni (PESK) 2015/1333, taħt l-intestatura "A. Persuni", tinżdied l-entrata li ġejja: