DEĊIŻJONI TAL-KUNSILL (UE) 2021/1852

tat-18 ta’ Ottubru 2021

dwar il-pożizzjoni li għandha tittieħed f’isem l-Unjoni Ewropea fi ħdan il-Kunsill ta’ Assoċjazzjoni stabbilit mill-Ftehim Ewro-Mediterranju li jistabbilixxi Assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Demokratika tal-Poplu tal-Alġerija, min-naħa l-oħra, fir-rigward tal-estensjoni tal-validità tal-prijoritajiet tas-sħubija bejn l-UE u l-Alġerija sakemm ikunu adottati prijoritajiet tas-sħubija aġġornati ġodda mill-Kunsill ta’ Assoċjazzjoni

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 217 flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)	Il-Ftehim Ewro-Mediterranju li jistabbilixxi Assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Demokratika tal-Poplu tal-Alġerija, min-naħa l-oħra (1) (“il-Ftehim”) ġie ffirmat fit-22 ta’ April 2002 u daħal fis-seħħ fl-1 ta’ Settembru 2005.

(2)	Il-prijoritajiet tas-sħubija bejn l-UE u l-Alġerija ġew adottati bid-Deċiżjoni Nru 1/2017 tal-Kunsill ta’ Assoċjazzjoni (2).

(3)	Fi skambju ta’ ittri, iż-żewġ naħat qablu li jenħtieġ li tiġi estiża l-validità tal-prijoritajiet tas-sħubija bejn l-UE u l-Alġerija.

(4)	Skont l-Artikolu 94 tal-Ftehim, il-Kunsill ta’ Assoċjazzjoni għandu s-setgħa jieħu deċiżjonijiet għall-finijiet tal-ilħuq tal-objettivi tal-Ftehim.

(5)	Il-Kunsill ta’ Assoċjazzjoni għandu jadotta deċiżjoni permezz ta’ proċedura bil-miktub biex jestendi l-validità tal-prijoritajiet tas-sħubija sakemm jadotta prijoritajiet tas-Sħubija aġġornati ġodda.

(6)	Ikun xieraq li tiġi stabbilita l-pożizzjoni li għandha tiġi adottata f’isem l-Unjoni fil-Kunsill ta’ Assoċjazzjoni, billi d-deċiżjoni tal-Kunsill ta’ Assoċjazzjoni ser ikollha effetti legali.

(7)	Il-pożizzjoni tal-Unjoni fi ħdan il-Kunsill ta’ Assoċjazzjoni għalhekk jenħtieġ li tkun ibbażata fuq l-abbozz ta’ Deċiżjoni tal-Kunsill ta’ Assoċjazzjoni,

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni fi ħdan il-Kunsill ta’ Assoċjazzjoni stabbilit mill-Ftehim Ewro-Mediterranju li jistabbilixxi Assoċjazzjoni bejn il-Komunità Ewropea u l-Istati Membri tagħha, min-naħa l-waħda, u r-Repubblika Demokratika tal-Poplu tal-Alġerija, min-naħa l-oħra, fir-rigward tal-estensjoni tal-validità tal-prijoritajiet tas-sħubija bejn l-UE u l-Alġerija sakemm jiġu adottati prijoritajiet tas-sħubija aġġornati ġodda mill-Kunsill ta’ Assoċjazzjoni, għandha tkun ibbażata fuq l-abbozz ta’ Deċiżjoni tal-Kunsill ta’ Assoċjazzjoni (3).

Artikolu 2

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fil-Lussemburgu, it-18 ta’ Ottubru 2021.

Għall-Kunsill

Il-President

J. BORRELL FONTELLES

(1) ĠU L 265, 10.10.2005, p. 2.

(2) Id-Deċiżjoni Nru 1/2017 tal-Kunsill ta’ Assoċjazzjoni UE-Alġerija tat-13 ta’ Marzu 2017 dwar il-qbil rigward il-Prijoritajiet tas-Sħubija bejn l-UE u l-Alġerija (ĠU L 82, 29.3.2017, p. 9).

(3) Ara d-dokument ST 12258/21 fuq http://register.consilium.europa.eu.