(1)

Fil-konklużjonijiet tal-20 ta’ Novembru 2007, il-Kunsill u r-rappreżentanti tal-gvernijiet tal-Istati Membri mlaqqgħin fi ħdan il-Kunsill, laqgħu l-komunikazzjoni tal-Kummissjoni dwar il-futur tar-relazzjonijiet bejn l-Unjoni Ewropea u r-Repubblika tal-Kap Verde. B’mod partikolari, il-Kunsill laqgħa l-approfondiment tar-relazzjonijiet bejn l-Unjoni u Cabo Verde permezz tal-implimentazzjoni ta’ Pjan ta’ Azzjoni għall-iżvilupp ta’ “sħubija speċjali” bejn iż-żewġ partijiet. Barra minn hekk, dik il-Kumunikazzjoni tipprovdi li l-għan ta’ dik is-“sħubija speċjali” huwa li jiġi żviluppat djalogu miftuħ, kostruttiv u pragmatiku u li tkun prijorità strateġika kondiviża li tiġi ttrattata l-immigrazzjoni illegali.

(2)

Fl-1 ta’ Diċembru 2014, daħal fis-seħħ il-Ftehim bejn l-Unjoni Ewropea u r-Repubblika tal-Kap Verde dwar l-iffaċilitar tal-ħruġ ta’ viżi għal żjarat qosra għal ċittadini tar-Repubblika tal-Kap Verde u tal-Unjoni Ewropea (1) (“il-Ftehim tal-2014”).

(3)

Mill-1 ta’ Diċembru 2014, il-leġiżlzzjoni tal-Unjoni u dik ta’ Cabo Verde evolviet, bir-reviżjoni tal-Kodiċi dwar il-Viżi permezz tar-Rgolament (UE) 2019/1155 tal-Parlament Ewropew u tal-Kunsill (2) u d-deċiżjoni ta’ Cabo Verde li teżenta liċ-ċittadini tal-Unjoni minn rekwiżit ta’ viża għal żjarat sa 30 jum. Fid-dawl ta’ dawk il-bidliet u fid-dawl tal-valutazzjoni mwettqa mill-Kumitat Konġunt stabbilit skont l-Artikolu 10 tal-Ftehim tal-2014 u inkarigat bil-monitoraġġ tal-implimentazzjoni tal-Ftehim tal-2014, xi wħud mid-dispożizzjonijiet li jiffaċilitaw il-ħruġ ta’ viżi liċ-ċittadini ta’ Cabo Verde u, fuq il-bażi ta’ reċiproċità, tal-Unjoni, għal żjara intenzjonata ta’ mhux aktar minn 90 jum fi kwalunkwe perjodu ta’ 180 jum, jenħtieġ li jiġi aġġustat u kkumplimentat bi Ftehim emendatorju.

(4)

Fid-29 ta’ Ottubru 2019, il-Kunsill awtorizza lill-Kummissjoni biex tiftaħ negozjati ma’ Cabo Verde għal Ftehim bejn l-Unjoni Ewropea u r-Repubblika ta’ Cabo Verde li jemenda l-Ftehim bejn l-Unjoni Ewropea u r-Repubblika tal-Kap Verde dwar l-iffaċilitar tal-ħruġ ta’ viżi għal żjarat qosra għal ċittadini tar-Repubblika tal-Kap Verde u tal-Unjoni Ewropea (‘il-Ftehim emendatorju’). In-negozjati ġew konklużi b’suċċess fit-30 ta’ Jannar 2020 u l-Ftehim emendatorju ġie inizjalat permezz ta’ skambju ta’ emails fl-24 ta’ Lulju 2020.

(5)

Din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen li fihom l-Irlanda mhix qed tieħu sehem, f’konformità mad-Deċiżjoni tal-Kunsill 2002/192/KE (3). Għalhekk l-Irlanda mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew suġġetta għall-applikazzjoni tagħha.

(6)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka mhijiex qed tieħu sehem fl-adozzjoni ta’ din id-Deċiżjoni u mhijiex marbuta biha jew suġġetta għall-applikazzjoni tagħha.

(7)

Il-Ftehim emendatorju jenħtieġ li jiġi ffirmat f’isem l-Unjoni, soġġett għall-konklużjoni tiegħu f’data aktar tard, u d-Dikjarazzjonijiet Konġunti mehmuża miegħu jenħtieġ li jiġu approvati,