(1)

Id-Deċiżjoni ta’ Implimentazzjoni tal-Kunsill (UE) 2018/1493 (2), tawtorizza lill-Ungerija biex, sal-31 ta’ Diċembru 2021, tapplika miżura speċjali li tikkonsisti minn naħa waħda li tillimita sa 50 % id-dritt għat-tnaqqis tat-taxxa fuq il-valur miżjud (VAT) fuq infiq relatat ma-karozzi tal-passiġġieri li ma jintużawx biss għal skopijiet professjonali, b’deroga mill-Artikoli 168 u 168a tad-Direttiva 2006/112/KE u min-naħa l-oħra li ma tittrattax bħala forniment ta’ servizzi bi ħlas l-użu mhux kummerċjali ta’ vettura tal-passiġġieri inkluża fl-assi ta’ impriża ta’ persuna taxxabbli, meta dik il-vettura kienet soġġetta għal limitazzjoni awtorizzata skont l-Artikolu 1 ta’ dik id-Deċiżjoni ta’ Implimentazzjoni, b’deroga mill-punt (a) tal-Artikolu 26(1), ta’ dik id-Direttiva (“il-miżura speċjali”).

(2)

Permezz ta’ ittra, rreġistrata mal-Kummissjoni fil-25 ta’ Frar 2021, l-Ungerija talbet awtorizzazzjoni biex tkompli tapplika l-miżura speċjali (“it-talba għal estensjoni”).

(3)

F’konformità mat-tieni subparagrafu tal-Artikolu 395(2) tad-Direttiva 2006/112/KE, il-Kummissjoni bagħtet it-talba għal estensjoni lill-Istati Membri l-oħra permezz tal-ittri ddatati s-7 ta’ April 2021. Permezz ta’ ittra ddatata t-8 ta’ April, 2021, il-Kummissjoni nnotifikat lill-Ungerija li kellha l-informazzjoni kollha meħtieġa sabiex tikkunsidra t-talba għal estensjoni.

(4)

Skontl-Artikolu 5 tad-Deċiżjoni ta’ Implimentazzjoni (UE) 2018/1493, l-Ungerija, flimkien mat-talba għal estensjoni, ippreżentat rapport li jinkludi rieżami tal-perċentwal stabbilit għat-tnaqqis mill-VAT. Abbażi tal-informazzjoni attwalment disponibbli, jiġifieri l-esperjenza miksuba minn awditi tat-taxxa u d-data statistika b’rabta mal-użu privat tal-karozzi tal-passiġġieri, fit-talba għal estensjoni l-Ungerija tikkonferma li l-limitu ta’ 50 % għadu ġustifikabbli u xieraq. Barra minn hekk, billi tissimplifika l-ġbir tal-VAT, il-miżura speċjali kienet effettiva fit-tnaqqis tal-piż amministrattiv minn fuq l-impriżi u l-awtoritajiet tat-taxxa. Fl-istess ħin, hija tipprevjeni l-evażjoni tat-taxxa permezz ta’ żamma skorretta ta’ rekords. Għalhekk, jenħtieġ li l-Ungerija tkun awtorizzata tkompli tapplika l-miżura speċjali.

(5)

Jenħtieġ li l-estensjoni tal-miżuri speċjali jkollha limitu taż-żmien biex tkun tista’ ssir evalwazzjoni tal-effettività tagħha u tal-perċentwal xieraq. Għalhekk, jenħtieġ li l-Ungerija tkun awtorizzata tkompli tapplika l-miżura speċjali għal perjodu limitat ulterjuri sal-31 ta’ Diċembru 2024.

(6)

Fil-każ li l-Ungerija tikkunsidra li estensjoni tal-awtorizzazzjoni lil hinn mill-2024 tkun neċessarja, jenħtieġ li tibgħat rapport lill-Kummissjoni li jinkludi rieżami tal-limitu tal-perċentwal applikat flimkien mat-talba għal estensjoni, sa mhux aktar tard mill-31 ta’ Marzu 2024.

(7)

Il-miżura speċjali se jkollha biss effett negliġibbli fuq l-ammont globali tad-dħul mit-taxxa miġbur fl-istadju tal-konsum finali u mhux se jkollha effett negattiv fuq ir-riżorsi proprji tal-Unjoni li jinġabru mit-taxxa fuq il-VAT.

(8)

Għaldaqstant, jenħtieġ li d-Deċiżjoni ta’ Implimentazzjoni (UE) 2018/1493 tiġi emendata skont dan,