(1)

Minn meta faqqgħet il-pandemija tal-COVID-19, il-miżuri straordinarji ta’ prevenzjoni u ta’ trażżin meħuda mill-Istati Membri, bħall-kwarantina, l-implimentazzjoni ta’ politiki ta’ xogħol mill-bogħod, kif ukoll restrizzjonijiet jew projbizzjonijiet fuq il-moviment u l-ivvjaġġar, għamluha impossibbli jew diffiċli ħafna għall-membri tal-Kumitat Ekonomiku u Soċjali Ewropew (“il-Kumitat”) u s-supplenti tagħhom (li flimkien jissejħu “il-benefiċjarji”) biex jivvjaġġaw bil-ħsieb li jattendu l-laqgħat fiżikament.

(2)

Fid-dawl ta’ dawk iċ-ċirkostanzi eċċezzjonali, u sabiex jiġi ggarantit li l-attivitajiet tal-Kumitat jistgħu jseħħu b’mod xieraq u sostenibbli f’kull ħin biex tiġi żgurata l-kontinwità istituzzjonali, jeħtieġ li jkun hemm deroga temporanja mill-Artikoli 2, 3 u 4 tad-Deċiżjoni tal-Kunsill 2013/471/UE (1) fir-rigward tal-ħlas ta’ allowances ta’ kuljum u r-rimborż tal-ispejjeż tal-ivvjaġġar lill-benefiċjarji. Jenħtieġ li din id-deroga tapplika biss għall-perijodu ta’ diffikultajiet tal-ivvjaġġar jew restrizzjonijiet sanitarji li jippersistu għal laqgħat fiżiċi kkawżati mill-pandemija tal-COVID-19 fl-Unjoni.

(3)

L-ispejjeż amministrattivi reali mġarrba minn benefiċjarju li jattendi laqgħa mill-bogħod b’mezzi elettroniċi huma aktar baxxi mir-rata tal-allowances ta’ kuljum attwalment applikabbli għall-attendenza ta’ laqgħat bi preżenza fiżika, filwaqt li l-ħin li jitqatta’ minn benefiċjarju jibqa’ l-istess. Għalhekk huwa xieraq li l-allowance ta’ kuljum imħallas lill-benefiċjarji li jattendu laqgħat mill-bogħod b’mezzi elettroniċi jiġi adattat kif xieraq.

(4)

Fejn xieraq, jenħtieġ li jiġu stabbiliti mill-Kumitat regoli dettaljati relatati mal-għoti tal-allowance ta’ kuljum għall-attendenza mill-bogħod. Jenħtieġ li dawk ir-regoli b’mod partikolari jidentifikaw il-każijiet li fihom diffikultajiet tal-ivvjaġġar b’rabta mal-COVID-19 jew ma’ miżuri restrittivi relatati jikkompromettu l-possibbiltà li jiġu organizzati jew li jkun hemm attendenza b’mod fiżiku għal-laqgħat.

(5)

Jenħtieġ li l-Kumitat jippreżenta lill-Kunsill rapporti regolari dwar l-applikazzjoni ta’ din id-Deċiżjoni sabiex il-Kunsill ikun jista’ jevalwa l-impatt tagħha u l-eżistenza li tippersisti tal-kondizzjonijiet li jiġġustifikaw id-deroga. Abbażi ta’ dawk ir-rapporti, jenħtieġ li l-Kunsill jikkunsidra l-adozzjoni ta’ miżuri xierqa, b’mod partikolari fil-qafas ta’ reviżjoni komprensiva futura tad-Deċiżjoni 2013/471/UE, li għandha titwettaq qabel it-tmiem tal-mandat attwali tal-Kumitat,