(1)

F’konformità mal-Artikolu 13 tad-Direttiva 2009/48/KE tal-Parlament Ewropew u tal-Kunsill (2), il-ġugarelli li jkunu konformi ma’ standards armonizzati jew ma’ partijiet minnhom, li r-referenzi tagħhom ikunu ġew ippubblikati f’Il-Ġurnal Uffiċjali tal-Unjoni Ewropea, għandhom ikunu preżunti konformi mar-rekwiżiti koperti minn dawk l-istandards jew partijiet minnhom, stabbiliti fl-Artikolu 10 tad-Direttiva 2009/48/KE u fl-Anness II ta’ dik id-Direttiva.

(2)

Id-Direttiva 2009/48/KE tistabbilixxi, fil-Parti III tal-Anness II tagħha, rekwiżiti speċifiċi sabiex jiġi żgurat li ma jkun hemm l-ebda riskju ta’ effetti avversi fuq is-saħħa tal-bniedem minħabba l-esponiment għas-sustanzi jew għat-taħlitiet kimiċi li l-ġugarelli jkunu magħmula minnhom jew li jkun fihom. Fil-Parti IV tal-Anness II tagħha, id-Direttiva 2009/48/KE tistabbilixxi wkoll rekwiżiti speċifiċi sabiex jiġi żgurat livell għoli ta’ sikurezza tal-ġugarelli fir-rigward ta’ perikli elettriċi.

(3)

Bl-ittra M/445 (3) tad-9 ta’ Lulju 2009, il-Kummissjoni ressqet talba quddiem il-Kumitat Ewropew għall-Istandardizzazzjoni (CEN) u l-Kumitat Ewropew għall-Istandardizzazzjoni Elettroteknika (Cenelec) għall-abbozzar ta’ standards armonizzati ġodda u għar-reviżjoni tal-istandards armonizzati eżistenti b’appoġġ għad-Direttiva 2009/48/KE.

(4)

Abbażi tat-talba M/445 tad-9 ta’ Lulju 2009, is-CEN irreveda l-istandard armonizzat EN 71-7:2014+A2:2018 “Sigurtà ta’ ġugarelli — Parti 7: Żebgħat li jitpinġew bis-swaba’ — Rekwiżiti u metodi ta’ ttestjar”, li r-referenza għalih ġiet ippubblikata bid-Deċiżjoni ta’ Implimentazzjoni tal-Kummissjoni (UE) 2019/1728 (4). Dan irriżulta fl-adozzjoni tal-istandard armonizzat EN 71-7:2014+A3:2020.

(5)

L-istandard armonizzat EN 71-7:2014+A3:2020 jipprevedi referenza aġġornata għal-leġiżlazzjoni applikabbli tal-Unjoni fir-rigward tal-użu ta’ għadd ta’ koloranti elenkati fit-tabelli A.1 u A.2 tal-Anness A ta’ dak l-istandard, filwaqt li jitqiesu l-iktar speċifikazzjonijiet u kriterji tal-purità reċenti li huma stabbiliti fir-Regolament tal-Kummissjoni (UE) Nru 231/2012 (5). Il-lista ta’ preservattivi permessi biex jintużaw fiż-żebgħat li jitpinġew bis-swaba’, stabbilita fit-tabella B.1 tal-Anness B tal-istandard armonizzat EN 71-7:2014+A3:2020, tnaqqas il-konċentrazzjoni massima permessa tal-klimbażolu għal 0,2 % f’konformità mal-iktar parir xjentifiku reċenti pprovdut fl-addendum tal-opinjoni tal-Kumitat Xjentifiku dwar is-Sikurezza tal-Konsumatur (6).

(6)

Abbażi tat-talba M/445 tad-9 ta’ Lulju 2009, is-CEN irreveda l-istandard armonizzat EN 71-12:2013 “Sigurtà ta’ ġugarelli — Parti 12: Sustanzi N-nitrosamini u N-nitrosazjabbli”, li r-referenza għalih ġiet ippubblikata bid-Deċiżjoni ta’ Implimentazzjoni (UE) 2019/1728. Dan irriżulta fl-adozzjoni tal-istandard armonizzat EN 71-12:2016.

(7)

L-istandard armonizzat EN 71-12:2016 jipprevedi metodi ta’ ttestjar imtejba għas-sustanzi N-nitrosamini u N-nitrosazjabbli fl-elastomeri, b’mod partikolari fir-rigward tal-kapaċità li jiġu individwati N-nitrosamini (li spiss ikunu karċinoġeniċi) anke f’livelli baxxi, kif ukoll fir-rigward tad-dettalji prattiċi ta’ ttestjar, u b’hekk iwassal għal applikazzjoni iktar konsistenti tal-metodu ta’ ttestjar. L-istandard jinkludi wkoll modi alternattivi biex kwalunkwe N-nitrosamina potenzjalment preżenti f’ċerti ġugarelli titkejjel u tiġi identifikata. Barra minn hekk, il-kamp ta’ applikazzjoni tal-istandard ġie estiż fir-rigward tal-materjali li għandhom jiġu ttestjati u t-tul ta’ żmien tal-pass tal-migrazzjoni għall-elastomeri, li huwa l-qofol tal-metodu ta’ ttestjar relatat għal dawk il-materjali tal-ġugarelli.

(8)

Abbażi tat-talba M/445 tad-9 ta’ Lulju 2009, is-Cenelec irreveda l-istandard armonizzat EN 62115:2005 “Ġugarelli elettriċi — Sigurtà” u l-emendi relatati tiegħu, li r-referenzi għalih ġew ippubblikati bid-Deċiżjoni ta’ Implimentazzjoni (UE) 2019/1728. Dan irriżulta fl-adozzjoni tal-istandard armonizzat EN IEC 62115:2020 u tal-emenda EN IEC 62115:2020/A11:2020 tiegħu.

(9)

L-istandard rivedut EN IEC 62115:2020 u l-emenda EN IEC 62115:2020/A11:2020 tiegħu jipprevedu ż-żieda ta’twissijiet ulterjuri biex tiġi żgurata informazzjoni aħjar għall-konsumatur dwar il-perikli assoċjati jekk jinbelgħu batteriji li jkollhom l-għamla ta’ munita. Jaġġorna r-rekwiżiti ta’ aċċessibbiltà għall-batteriji li jkollhom għamla ta’ munita u ta’ buttuna, sabiex jiġi żgurat livell ogħla ta’ protezzjoni, u jżid rekwiżiti ġodda għal ġugarelli konnessi ma’ apparati domestiċi, inkluż kompjuters, sabiex jipproteġi lill-utenti minn xokk elettriku. Jimmodifika iktar il-kriterji għal ittestjar imnaqqas biex jippermetti rekwiżiti simplifikati għal ġugarelli elettriċi b’livelli baxxi ta’ enerġija, u jipprevedi iktar rekwiżiti għas-sikurezza tal-LEDs fil-ġugarelli sabiex jitnaqqas ir-riskju ta’ korriment fl-għajnejn. Iżid rekwiżiti ġodda biex jiġu indirizzati l-perikli assoċjati mal-użu ta’ ġugarelli elettriċi li jintrikbu u li jiġu kkontrollati mill-bogħod. Jispeċifika wkoll it-tip ta’ batteriji li għandhom jintużaw għall-ittestjar ta’ ġugarelli elettriċi li jiġu pprovduti mingħajr batteriji, sabiex tittejjeb ir-riproduċibbiltà tal-ittestjar, minħabba ż-żieda fit-tipi ta’ batteriji disponibbli. Jipprevedi wkoll il-kategorizzazzjoni tal-kundizzjonijiet ġenerali għat-testijiet biex jiġi żgurat li l-kundizzjonijiet tat-testijiet ikunu xierqa għal kull tip ta’ ġugarell u għall-provvista tal-enerġija tiegħu.

(10)

Il-Kummissjoni, flimkien mas-CEN, ivvalutat jekk l-istandard armonizzat EN 71-7:2014+A3:2020 abbozzat mis-CEN jikkonformax mat-talba M/445 tad-9 ta’ Lulju 2009. L-istandard armonizzat EN 71-7:2014+A3:2020 jissodisfa r-rekwiżiti li għandu l-għan li jkopri u li huma stabbiliti fid-Direttiva 2009/48/KE. Għalhekk, jixraq li r-referenza ta’ dak l-istandard tiġi ppubblikata f’Il-Ġurnal Uffiċjali tal-Unjoni Ewropea.

(11)

L-istandard armonizzat EN 71-7:2014+A3:2020 jissostitwixxi l-istandard armonizzat EN 71-7:2014+A2:2018. Għalhekk, jeħtieġ li r-referenza ta’ dak l-istandard tiġi rtirata minn Il-Ġurnal Uffiċjali tal-Unjoni Ewropea. Sabiex il-manifatturi tal-ġugarelli jkollhom biżżejjed żmien biex jadattaw il-prodotti tagħhom għall-ispeċifikazzjonijiet riveduti fl-istandard armonizzat EN 71-7:2014+A3:2020, jeħtieġ li l-irtirar tar-referenza tal-istandard armonizzat EN 71-7:2014+A2:2018 jiġi ddifferit.

(12)

Il-Kummissjoni, flimkien mas-CEN, ivvalutat jekk l-istandard armonizzat EN 71-12:2016 abbozzat mis-CEN jikkonformax mat-talba M/445 tad-9 ta’ Lulju 2009. L-istandard armonizzat EN 71-12:2016 jissodisfa r-rekwiżiti li għandu l-għan li jkopri u li huma stabbiliti fid-Direttiva 2009/48/KE. Madankollu, il-punt a) tat-tabella 2 tal-istandard armonizzat EN 71-12:2016 imur lil hinn mir-rekwiżiti stabbiliti fil-punt 8 tal-Parti III tal-Anness II ta’ dik id-Direttiva, billi jipprevedi valur limitu għal N-nitrosamini ta’ 0,01 mg/kg minflok 0,05 mg/kg, u valur limitu għal sustanzi N-nitrosazjabbli ta’ 0,1 mg/kg minflok 1 mg/kg. Minħabba li l-valuri limitu stabbiliti fid-Direttiva 2009/48/KE huma l-valuri limitu li għandu jkun hemm konformità magħhom, jeħtieġ li tiżdied nota informattiva f’dan ir-rigward meta jiġi ppubblikat l-istandard EN 71-12:2016.

(13)

L-istandard armonizzat EN 71-12:2016 jissostitwixxi l-istandard armonizzat EN 71-12:2013. Għalhekk, jeħtieġ li r-referenza ta’ dak l-istandard tiġi rtirata minn Il-Ġurnal Uffiċjali tal-Unjoni Ewropea. Sabiex il-manifatturi tal-ġugarelli jkollhom biżżejjed żmien biex jadattaw il-prodotti tagħhom għall-ispeċifikazzjonijiet riveduti fl-istandard armonizzat EN 71-12:2016, jeħtieġ li l-irtirar tar-referenza tal-istandard armonizzat EN 71-12:2013 jiġi ddifferit.

(14)

Il-Kummissjoni, flimkien mas-Cenelec, ivvalutat jekk l-istandard armonizzat EN IEC 62115:2020 u l-emenda EN IEC 62115:2020/A11:2020 tiegħu abbozzat mis-Cenelec, jikkonformawx mat-talba M/445 tad-9 ta’ Lulju 2009. L-istandards armonizzati EN IEC 62115:2020 u EN IEC 62115:2020/A11:2020 jissodisfaw ir-rekwiżiti li għandhom l-għan li jkopru u li huma stabbiliti fid-Direttiva 2009/48/KE. Għalhekk jixraq li r-referenza ta’ dawk l-istandards tiġi ppubblikata f’Il-Ġurnal Uffiċjali tal-Unjoni Ewropea.

(15)

L-istandard armonizzat EN IEC 62115:2020 u l-emenda EN IEC 62115:2020/A11:2020 tiegħu jissostitwixxu l-istandard armonizzat EN 62115:2005 u l-emendi relatati tiegħu. Għalhekk jeħtieġ li r-referenza tal-istandard EN 62115:2005 u tal-emendi relatati tiegħu jiġu rtirati minn Il-Ġurnal Uffiċjali tal-Unjoni Ewropea. Sabiex il-manifatturi tal-ġugarelli jkollhom biżżejjed żmien biex jadattaw il-prodotti tagħhom għall-ispeċifikazzjonijiet riveduti fl-istandard armonizzat EN IEC 62115:2020 u l-emenda EN IEC 62115:2020/A11:2020 tiegħu, jeħtieġ li l-irtirar tar-referenza tal-istandard armonizzat EN 62115:2005 u tal-emendi relatati tiegħu jiġi ddifferit.

(16)

Fl-interessi taċ-ċarezza, tar-razzjonalità u tas-simplifikazzjoni, jenħtieġ li lista sħiħa ta’ referenzi tal-istandards armonizzati abbozzati b’appoġġ għad-Direttiva 2009/48/KE u li jissodisfaw ir-rekwiżiti li għandhom l-għan li jkopru tiġi ppubblikata f’att uniku. Ir-referenzi tal-istandards armonizzati abbozzati b’appoġġ għad-Direttiva 2009/48/KE huma ppubblikati attwalment bid-Deċiżjoni ta’ Implimentazzjoni (UE) 2019/1728. Konsegwentement, jeħtieġ li d-Deċiżjoni (UE) 2019/1728 tiġi sostitwita b’deċiżjoni ġdida.

(17)

Il-konformità ma’ standard armonizzat tikkonferixxi preżunzjoni ta’ konformità mar-rekwiżiti essenzjali korrispondenti stabbiliti fil-leġiżlazzjoni tal-Unjoni dwar l-armonizzazzjoni mid-data tal-pubblikazzjoni tar-referenza ta’ tali standard f’Il-Ġurnal Uffiċjali tal-Unjoni Ewropea. Għalhekk, jenħtieġ li din id-Deċiżjoni tidħol fis-seħħ fid-data tal-pubblikazzjoni tagħha,