(1)

Bid-dħul fis-seħħ tar-Regolament (UE) 2019/2155 tal-Bank Ċentrali Ewropew (BĊE/2019/37) (2), li jemenda r-Regolament (UE) Nru 1163/2014 tal-Bank Ċentrali Ewropew (BĊE/2014/41) (3), il-Bank Ċentrali Ewropew (BĊE) ma jeħtieġx aktar ħlas bil-quddiem tat-tariffi superviżorji annwali, li jibda mill-perjodu tariffarju tal-2020. It-tariffi jiġu imposti biss wara t-tmiem tal-perjodu tariffarju rilevanti meta jkunu ġew iddeterminati l-ispejjeż annwali attwali.

(2)

Skont l-Artikolu 5(1) u (2) tar-Regolament (UE) Nru 1163/2014 (BĊE/2014/41) it-tariffi superviżorji annwali li għandhom jiġu imposti fuq l-entitajiet taħt superviżjoni huma kkalkulati fuq il-bażi tal-ispejjeż annwali tal-BĊE. L-ammont tal-ispejjeż annwali jiġi ddeterminat abbażi tal-ammont tan-nefqa annwali li jikkonsisti fi kwalunkwe spiża mġarrba mill-BĊE fil-perjodu tariffarju rilevanti li tkun relatata direttament jew indirettament mal-kompiti superviżorji tiegħu.

(3)

Skont l-Artikolu 8 tar-Regolament (UE) Nru 1163/2014 (BĊE/2014/41),sabiex jiġu kkalkulati t-tariffi superviżorji annwali pagabbli fir-rigward ta’ entitajiet sinifikanti taħt superviżjoni u gruppi sinifikanti taħt superviżjoni, u entitajiet inqas sinifikanti taħt superviżjoni u gruppi inqas sinifikanti taħt superviżjoni, l-ispejjeż annwali għandhom jinqasmu fuq il-bażi tal-ispejjeż allokati għall-funzjonijiet rilevanti li jwettqu s-superviżjoni diretta tal-entitajiet sinifikanti taħt superviżjoni u tal-gruppi sinifikanti taħt superviżjoni u s-superviżjoni indiretta ta’ entitajiet inqas sinjifikanti taħt superviżjoni u ta’ gruppi inqas sinifikanti taħt superviżjoni.

(4)

Skont l-Artikolu 5(3) tar-Regolament (UE) Nru 1163/2014 (BĊE/2014/41), ammonti tariffarji relatati mal-perijodi tariffarji preċedenti li ma kinux għall-ġbir, ħlasijiet ta’ imgħax riċevuti skont l-Artikolu 14 u ċerti ammonti oħra riċevuti jew rifużi skont l-Artikolu 7(3) ta’ dak ir-Regolament, jekk hemm, għandhom jittieħdu inkunsidrazzjoni wkoll meta jiġu ddeterminati l-ispejjeż annwali. Skont l-arranġamenti tranżitorji għall-perjodu tariffarju tal-2020 stabbiliti fl-Artikolu 17a tar-Regolament (UE) Nru 1163/2014 (BĊE/2014/41), kwalunkwe bilanċ pożittiv jew defiċit mill-perjodu tariffarju tal-2019, iddeterminat billi jitnaqqsu l-ispejjeż annwali attwali mġarrba fir-rigward ta’ dak il-perjodu tariffarju mill-ispejjeż annwali stmati imposti għal dak il-perjodu tariffarju, jitqiesu fid-determinazzjoni tal-ispejjeż annwali għall-perjodu tariffarju 2020.

(5)

Skont l-Artikolu 5(4) tar-Regolament (UE) Nru 1163/2014 (BĊE/2014/41), fi żmien erba’ xhur wara t-tmiem ta’ kull perjodu tariffarju, l-ammont totali tat-tariffi superviżorji annwali għal kull kategorija ta’ entitajiet taħt superviżjoni u gruppi taħt superviżjoni għal dak il-perjodu tariffarju għandu jiġi ppubblikat fuq is-sit elettroniku tal-BĊE,