28.12.2020 |
MT |
Il-Ġurnal Uffiċjali tal-Unjoni Ewropea |
L 437/1 |
REGOLAMENT (UE) 2020/2220 TAL-PARLAMENT EWROPEW U TAL-KUNSILL
tat-23 ta’ Diċembru 2020
li jistabbilixxi ċerti dispożizzjonijiet tranżizzjonali għall-appoġġ mill-Fond Agrikolu Ewropew għall-Iżvilupp Rurali (FAEŻR) u mill-Fond Agrikolu Ewropew ta’ Garanzija (FAEG) fis-snin 2021 u 2022 u li jemenda r-Regolamenti (UE) Nru 1305/2013, (UE) Nru 1306/2013 u (UE) Nru 1307/2013 fir-rigward tar-riżorsi u l-applikazzjoni fis-snin 2021 u 2022 u r-Regolament (UE) Nru 1308/2013 fir-rigward tar-riżorsi u d-distribuzzjoni ta’ tali appoġġ fir-rigward tas-snin 2021 u 2022
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-Artikolu 43(2) tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz tal-att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew (1),
Wara li kkonsultaw lill-Kumitat tar-Reġjuni,
Wara li kkunsidraw l-opinjoni tal-Qorti tal-Awdituri (2),
Filwaqt li jaġixxu skont il-proċedura leġiżlattiva ordinarja (3),
Billi:
(1) |
Il-proposti leġiżlattivi tal-Kummissjoni dwar il-politika agrikola komuni (PAK) lil hinn mill-2020 kellhom l-għan li jistabbilixxu qafas sod tal-Unjoni li huwa essenzjali biex jiġi żgurat li l-PAK tibqa’ politika komuni b’kundizzjonijiet ekwi, filwaqt li l-Istati Membri jingħataw aktar responsabbiltà fir-rigward ta’ kif jissodisfaw l-objettivi u jilħqu l-miri stabbiliti. Għaldaqstant, l-Istati Membri għandhom ifasslu pjanijiet strateġiċi tal-PAK u jimplimentawhom wara li jiġu approvati mill-Kummissjoni. |
(2) |
Il-proċedura leġiżlattiva rigward il-proposti leġiżlattivi tal-Kummissjoni dwar il-PAK lil hinn mill-2020 ma ġietx konkluża fil-ħin biex tippermetti lill-Istati Membri u lill-Kummissjoni jħejju l-elementi kollha meħtieġa biex japplikaw il-qafas legali l-ġdid u l-pjanijiet strateġiċi tal-PAK mill-1 ta’ Jannar 2021, kif kien propost inizjalment mill-Kummissjoni. Dak id-dewmien ħoloq inċertezza u riskji għall-bdiewa fl-Unjoni u għas-settur agrikolu tal-Unjoni kollu kemm hu. Sabiex tittaffa dik l-inċertezza u tinżamm il-vitalità taż-żoni u r-reġjuni rurali kif ukoll biex jingħata kontribut għas-sostenibbiltà ambjentali, jenħtieġ li dan ir-Regolament jipprevedi t-tkomplija tal-applikazzjoni tar-regoli tal-qafas attwali tal-PAK li jkopri l-perijodu mill-2014 sal-2020 (“il-qafas attwali tal-PAK”) u l-pagamenti mingħajr interruzzjonijiet lill-bdiewa u lil benefiċjarji oħra, u b’hekk jipprovdi prevedibbiltà u stabbiltà matul il-perijodu tranżizzjonali fis-snin 2021 u 2022 (“perijodu tranżizzjonali”) sad-data tal-applikazzjoni tal-qafas legali l-ġdid li jkopri l-perijodu li jibda mill-1 ta’ Jannar 2023 (“qafas legali ġdid”). |
(3) |
Peress li l-proċedura leġiżlattiva rigward il-proposti leġiżlattivi tal-Kummissjoni dwar il-PAK lil hinn mill-2020 għad trid tiġi konkluża u l-pjanijiet strateġiċi tal-PAK għadhom iridu jiġu żviluppati mill-Istati Membri, u jeħtieġ li jiġu kkonsultati l-partijiet ikkonċernati, il-qafas attwali tal-PAK jenħtieġ li jkompli japplika għall-perijodu addizzjonali ta’ sentejn. L-għan tal-perijodu tranżizzjonali huwa li jiffaċilita tranżizzjoni bla xkiel għall-benefiċjarji għal perijodu ta’ programmazzjoni ġdid u li jipprevedi l-possibbiltà li titqies il-Komunikazzjoni tal-Kummissjoni tal-11 ta’ Diċembru 2019 dwar il-Patt Ekoloġiku Ewropew (“Patt Ekoloġiku Ewropew”). |
(4) |
Sabiex jiġi żgurat li jista’ jingħata appoġġ lill-bdiewa u lil benefiċjarji oħra mill-Fond Agrikolu Ewropew ta’ Garanzija (FAEG) u mill-Fond Agrikolu Ewropew għall-Iżvilupp Rurali (FAEŻR) fis-snin 2021 u 2022, jenħtieġ li l-Unjoni tkompli tagħti tali appoġġ matul il-perijodu tranżizzjonali skont il-kundizzjonijiet tal-qafas attwali tal-PAK. Il-qafas attwali tal-PAK ġie stabbilit, b’mod partikolari, bir-Regolamenti (UE) Nru 1303/2013 (4), (UE) Nru 1305/2013 (5), (UE) Nru 1306/2013 (6), (UE) Nru 1307/2013 (7) u (UE) Nru 1308/2013 (8) tal-Parlament Ewropew u tal-Kunsill. |
(5) |
Jenħtieġ li dan ir-Regolament jagħti lill-Istati Membri żmien biżżejjed biex iħejju l-pjanijiet strateġiċi rispettivi tagħhom dwar il-PAK, kif ukoll jiffaċilita l-ħolqien ta’ strutturi amministrattivi meħtieġa biex il-qafas legali l-ġdid jiġi implimentat b’suċċess, b’mod partikolari billi jippermetti żieda fl-assistenza teknika. Jenħtieġ li l-pjanijiet strateġiċi kollha tal-PAK ikunu lesti biex jidħlu fis-seħħ ladarba jintemm il-perijodu tranżizzjonali sabiex tiġi pprovduta stabbiltà u ċertezza tant meħtieġa għas-settur tal-biedja. |
(6) |
Fid-dawl tal-fatt li jenħtieġ li l-Unjoni tkompli tappoġġa l-iżvilupp rurali matul il-perijodu tranżizzjonali, jenħtieġ li l-Istati Membri jkollhom il-possibbiltà li jiffinanzjaw il-programmi estiżi tagħhom tal-iżvilupp rurali mill-allokazzjoni baġitarja korrispondenti għas-snin 2021 u 2022. Il-programmi estiżi jenħtieġ li jiżguraw tal-inqas l-istess sehem globali tal-kontribuzzjoni tal-FAEŻR tiġi riżervata għall-miżuri msemmija fl-Artikolu 59(6) tar-Regolament (UE) Nru 1305/2013, f’konformità mal-ambizzjonijiet il-ġodda stabbiliti fil-Patt Ekoloġiku Ewropew. |
(7) |
Ir-Regolament (UE) Nru 1303/2013 jistabbilixxi regoli komuni applikabbli għall-FAEŻR u għal fondi oħrajn li joperaw taħt qafas komuni. Dak ir-Regolament jenħtieġ li jkompli japplika għall-programmi appoġġati mill-FAEŻR għall-perijodu ta’ programmazzjoni 2014–2020 u għas-snin ta’ programmazzjoni 2021 u 2022. |
(8) |
L-iskadenzi stabbiliti fir-Regolament (UE) Nru 1303/2013 fir-rigward tar-rapporti ta’ implimentazzjoni, tal-laqgħat annwali ta’ rieżami, tal-evalwazzjonijiet ex post u tar-rapporti ta’ sinteżi, tal-eliġibbiltà tan-nefqa u d-diżimpenn kif ukoll tal-impenji baġitarji huma limitati għall-perijodu ta’ programmazzjoni 2014-2020. Dawk l-iskadenzi jenħtieġ li jiġu adattati sabiex jitqies it-tul ta’ żmien estiż tal-perijodu li matulu jenħtieġ li jiġu implimentati l-programmi relatati mal-appoġġ mill-FAEŻR. |
(9) |
Ir-Regolament (UE) Nru 1310/2013 tal-Parlament Ewropew u tal-Kunsill (9) u r-Regolament Delegat tal-Kummissjoni (UE) Nru 807/2014 (10) jipprevedu li n-nefqa għal ċerti impenji fit-tul meħuda skont ċerti regolamenti li taw appoġġ għall-iżvilupp rurali qabel ma kien applikabbli r-Regolament (UE) Nru 1305/2013 jenħtieġ li, taħt ċerti kundizzjonijiet, tibqa’ titħallas mill-FAEŻR fil-perijodu ta’ programmazzjoni 2014-2020. Dik in-nefqa jenħtieġ li tkompli tkun eliġibbli wkoll għat-tul tal-impenn legali rispettiv tagħhom bl-istess kundizzjonijiet fis-snin ta’ programmazzjoni 2021 u 2022. Għal raġunijiet ta’ ċarezza u ċertezza legali, jenħtieġ li jiġi ċċarat ukoll li l-impenji legali meħuda taħt miżuri preċedenti li jikkorrispondu għall-miżuri tar-Regolament (UE) Nru 1305/2013, li għalihom tapplika s-sistema integrata ta’ amministrazzjoni u kontroll, jenħtieġ li jkunu soġġetti għal dik is-sistema integrata ta’ amministrazzjoni u kontroll u li l-pagamenti relatati ma’ dawk l-impenji legali jenħtieġ li jsiru fil-perijodu mill-1 ta’ Diċembru sat-30 ta’ Ġunju tas-sena kalendarja ta’ wara. |
(10) |
Il-FAEŻR jenħtieġ li jkun jista’ jappoġġa l-ispejjeż tat-tisħiħ tal-kapaċitajiet u azzjonijiet preparatorji li jappoġġaw it-tfassil u l-implimentazzjoni futura tal-istrateġiji tal-iżvilupp lokali mmexxija mill-komunità taħt il-qafas legali l-ġdid. |
(11) |
Fl-2015, fl-allokazzjoni tad-drittijiet għall-pagament jew fil-kalkolu mill-ġdid tad-drittijiet għall-pagamenti għall-Istati Membri li jżommu d-drittijiet eżistenti skont ir-Regolament (UE) Nru 1307/2013, xi Stati Membri għamlu żbalji fl-istabbiliment tan-numru jew tal-valur tad-drittijiet għall-pagament. Ħafna minn dawn l-iżbalji, anke meta dawn seħħew fir-rigward ta’ bidwi wieħed, jinfluwenzaw il-valur tad-drittijiet għall-pagament għall-bdiewa kollha u għas-snin kollha. Xi Stati Membri anke għamlu żbalji wara l-2015, meta allokaw drittijiet mir-riżerva, pereżempju fil-kalkolu tal-valur medju. Normalment, tali nuqqas ta’ konformità jkun soġġett għal korrezzjoni finanzjarja sakemm jittieħdu miżuri korrettivi mill-Istat Membru kkonċernat. Fid-dawl taż-żmien li għadda mill-ewwel allokazzjoni, l-isforzi li għamlu l-Istati Membri biex jistabbilixxu, u fejn rilevanti, jikkoreġu d-drittijiet, u anke fl-interess taċ-ċertezza legali, l-għadd u l-valur tad-drittijiet għall-pagament jenħtieġ li jitqiesu bħala legali u regolari b’effett minn ċerta data. |
(12) |
Skont l-Artikolu 24(6) tar-Regolament (UE) Nru 1307/2013, l-Istati Membri ngħataw l-għażla li japplikaw għall-allokazzjoni ta’ drittijiet għall-pagament koeffiċjent ta’ tnaqqis għall-ettari eliġibbli li jikkonsistu fi bwar permanenti li jinsabu f’żoni b’kundizzjonijiet klimatiċi diffiċli. Il-mergħat tal-Alpi spiss jiġu ġestiti b’mod kollettiv u għalhekk iż-żoni huma assenjati fuq bażi annwali, u b’hekk jinħoloq livell sinifikanti ta’ inċertezza fost il-bdiewa fl-Istati Membri kkonċernati. L-implimentazzjoni ta’ dik is-sistema wriet li hija partikolarment kumplessa speċjalment fir-rigward tad-definizzjoni eżatta taż-żoni kkonċernati. Peress li l-valur tad-drittijiet għall-pagament f’żoni fejn il-koeffiċjent ta’ tnaqqis ma jiġix applikat jiddependi mis-somma tad-drittijiet għall-pagament fiż-żoni speċifikati, dik l-inċertezza sussegwentement taffettwa lill-bdiewa kollha fl-Istati Membri kkonċernati. Sabiex tiġi stabbilizzata s-sistema attwalment applikata f’dawk l-Istati Membri, u bil-ħsieb li tiġi żgurata ċ-ċertezza legali għall-bdiewa kollha fl-Istati Membri kkonċernati kmieni kemm jista’ jkun, jenħtieġ li l-Istati Membri kkonċernati jkunu jistgħu jqisu bħala legali u regolari l-valur u n-numru tad-drittijiet kollha allokati lill-bdiewa kollha qabel l-1 ta’ Jannar 2020. Jenħtieġ li l-valur ta’ dawk id-drittijiet, bla ħsara għal kwalunkwe rimedju legali disponibbli għall-benefiċjarji individwali, ikun il-valur għas-sena kalendarja 2019 validu fil-31 ta’ Diċembru 2019. |
(13) |
Il-konferma tad-drittijiet għall-pagament ma tirrappreżentax eżenzjoni mir-responsabbiltà tal-Istati Membri taħt il-ġestjoni kondiviża tal-FAEG biex jiżguraw il-protezzjoni tal-baġit tal-Unjoni minn infiq irregolari. Għalhekk, il-konferma tad-drittijiet għall-pagament allokati lill-bdiewa qabel l-1 ta’ Jannar 2021 jew, bħala deroga, qabel l-1 ta’ Jannar 2020, jenħtieġ li ma tippreġudikax is-setgħa tal-Kummissjoni li tieħu d-deċiżjonijiet imsemmija fl-Artikolu 52 tar-Regolament (UE) Nru 1306/2013 b’rabta ma’ pagamenti irregolari mogħtija fir-rigward ta’ kwalunkwe sena kalendarja sal-2020 inkluża jew, bħala deroga sal-2019 inkluża, li jirriżultaw minn żbalji fl-għadd jew fil-valur ta’ dawn id-drittijiet għall-pagament. |
(14) |
Fid-dawl tal-fatt li l-qafas legali l-ġdid għall-PAK għadu ma ġiex adottat, jenħtieġ li jkun ċar li arranġamenti tranżizzjonali jenħtieġ li jiġu stabbiliti biex jirregolaw it-tranżizzjoni minn skemi ta’ appoġġ eżistenti mogħtija fuq bażi pluriennali għall-qafas legali l-ġdid. |
(15) |
Sabiex jiġi limitat trasferiment sinifikanti ta’ impenji mill-perijodu ta’ programmazzjoni attwali għall-iżvilupp rurali lejn il-pjanijiet strateġiċi tal-PAK, iż-żmien kemm idumu l-impenji pluriennali l-ġodda fir-rigward tal-klima agroambjentali, tal-biedja organika u tat-trattament xieraq tal-annimali jenħtieġ li, bħala regola ġenerali, ikun limitat għal perijodu massimu ta’ tliet snin. Mill-2022, jenħtieġ li l-estensjoni tal-impenji eżistenti tkun limitata għal sena. |
(16) |
L-Artikolu 31(5) tar-Regolament (UE) Nru 1305/2013 kien jipprevedi arranġamenti tranżizzjonali biex tiġi ffaċilitata t-tneħħija gradwali ta’ pagamenti f’żoni li, minħabba l-applikazzjoni ta’ kriterji ġodda ta’ delimitazzjoni, ma jibqgħux jitqiesu bħala żoni li qed jiffaċċjaw restrizzjonijiet naturali. Tali pagamenti kellhom jitħallsu sal-2020 u għal perijodu massimu ta’ erba’ snin. Ir-Regolament (UE) 2017/2393 tal-Parlament Ewropew u tal-Kunsill (11) estenda l-iskadenza inizjali għad-delimitazzjoni l-ġdida ta’ dawn iż-żoni sal-2019. Għall-bdiewa fl-Istati Membri li stabbilixxew id-delimitazzjoni fl-2018 u fl-2019, it-tneħħija gradwali tal-pagamenti ma setgħetx tilħaq il-massimu ta’ erba’ snin. Sabiex ikomplu t-tneħħija gradwali tal-pagamenti, l-Istati Membri jenħtieġ li jitħallew ikomplu jħallsuhom fis-snin 2021 u 2022, fejn applikabbli. Sabiex jiġi żgurat livell adegwat ta’ pagamenti għal kull ettaru, f’konformità mal-Artikolu 31(5) tar-Regolament (UE) Nru 1305/2013, jenħtieġ li l-livell tal- pagamenti fis-snin 2021 u 2022 jiġi ffissat għal EUR 25 għal kull ettaru. |
(17) |
Peress li l-bdiewa huma esposti għal riskji ekonomiċi u ambjentali li qed jiżdiedu bħala konsegwenza tat-tibdil fil-klima u l-volatilità akbar tal-prezzijiet, ir-Regolament (UE) Nru 1305/2013 jipprevedi miżura ta’ ġestjoni tar-riskji biex tgħin lill-bdiewa jindirizzaw dawk ir-riskji. Dik il-miżura tinkludi kontribuzzjonijiet finanzjarji għal fondi mutwi u għodda għall-istabbilizzazzjoni tal-introjtu. Ġew previsti kundizzjonijiet speċifiċi għall-għoti ta’ appoġġ skont dik il-miżura sabiex jiġi żgurat li l-bdiewa jirċievu trattament ugwali madwar l-Unjoni, il-kompetizzjoni ma tkunx imfixkla u jkun hemm konformità mal-obbligi internazzjonali tal-Unjoni. Sabiex ikompli jiġi promoss l-użu ta’ dik il-miżura għall-bdiewa tas-setturi kollha, jenħtieġ li l-Istati Membri jingħataw il-possibbiltà li jnaqqsu l-limitu ta’ 30 % li jiskatta l-kumpens tal-bdiewa għat-tnaqqis fil-produzzjoni jew l-introjtu applikabbli għall-għodda rispettiva, għalkemm għal mhux inqas minn 20 %. |
(18) |
Il-bdiewa u n-negozji rurali ġew affettwati mill-konsegwenzi tat-tifqigħa tal-COVID-19 b’mod bla preċedent. L-estensjoni ta’ restrizzjonijiet estensivi fuq il-moviment stabbilit fl-Istati Membri, kif ukoll għeluq obbligatorju ta’ ħwienet, swieq fil-beraħ, ristoranti u stabbilimenti oħra ta’ ospitalità, ħolqu tfixkil ekonomiku fis-settur agrikolu u fil-komunitajiet rurali u wasslu għal problemi ta’ likwidità u tal-fluss ta’ flus kontanti -għall-bdiewa u għal negozji żgħar attivi fl-ipproċessar, il-kummerċ jew l-iżvilupp ta’ prodotti agrikoli. Sabiex jirrispondi għall-impatt tal-kriżi li tirriżulta mit-tifqigħa tal-COVID-19, it-tul tal-miżura msemmija fl-Artikolu 39b tar-Regolament (UE) Nru 1305/2013 għandu jiġi estiż biex jiġu indirizzati l-problemi ta’ likwidità li għaddejjin li jpoġġu f’riskju il-kontinwità ta’ attivitajiet tal-biedja u ta’ negozji żgħar attivi fl-ipproċessar, il-kummerċ jew l-iżvilupp ta’ prodotti agrikoli. L-appoġġ għal dik il-miżura jenħtieġ li jkun iffinanzjat b’sa 2 % tal-fondi tal-FAEŻR allokati lill-Istati Membri fil-perjodu tal-programmazzjoni 2014-2020. |
(19) |
Sabiex tiġi evitata sitwazzjoni fejn il-fondi għal żvilupp lokali mmexxi mill-komunità fis-snin ta’ programmazzjoni 2021 u 2022 ma jintefqux, jenħtieġ li l-Istati Membri li jagħmlu użu mill-possibbiltà li jittrasferixxu ammonti mill-pagamenti diretti għall-iżvilupp rurali jkunu jistgħu japplikaw l-allokazzjoni minima ta’ 5 %, u fil-każ tal-Kroazja 2,5 %, għal żvilupp lokali mmexxi mill-komunità fil-każ biss tal-kontribuzzjoni tal-FAEŻR għall-iżvilupp rurali estiża sal-31 ta’ Diċembru 2022 ikkalkulata qabel ma jkun sar it-trasferiment ta’ ammonti mill-pagament dirett. |
(20) |
F’konformità mar-Regolament tal-Kunsill (UE) 2020/2094 (12) li jistabbilixxi Strument tal-Unjoni Ewropea għall-Irkupru (‘EURI’) biex jappoġġa l-irkupru wara l-kriżi tal-COVID-19 (‘ir-Regolament EURI’), jenħtieġ li jsiru disponibbli riżorsi addizzjonali għas-snin 2021 u 2022 biex jiġi indirizzat l-impatt tal-kriżi tal-COVID-19 u l-konsegwenzi tagħha għas-settur tal-agrikoltura u ż-żoni rurali tal-Unjoni. |
(21) |
Minħabba l-isfidi bla preċedent li s-settur agrikolu u ż-żoni rurali tal-Unjoni qed jiffaċċjaw kaġun tal-kriżi tal-COVID-19, ir-riżorsi addizzjonali pprovduti mill-EURI jenħtieġ li jintużaw biex jiffinanzjaw miżuri skont ir-Regolament (UE) Nru 1305/2013, li jwittu t-triq għal irkupru ekonomiku reżiljenti, sostenibbli u diġitali f’konformità mal-objettivi tal-impenji ambjentali u klimatiċi tal-Unjoni u mal-ambizzjonijiet il-ġodda stabbiliti fil-Patt Ekoloġiku Ewropew. |
(22) |
L-Istati Membri għalhekk jenħtieġ li ma jnaqqsux l-ambizzjoni ambjentali tal-programmi għall-iżvilupp rurali eżistenti tagħhom. Jenħtieġ li jiżguraw l-istess sehem globali għar-riżorsi addizzjonali bħas-sehem li rriżervaw fil-programmi għall-iżvilupp rurali tagħhom għal miżuri li huma partikolarment ta’ benefiċċju għall-ambjent u l-klima taħt il-kontribuzzjoni tal-FAEŻR (“il-prinċipju ta’ nonrigressjoni”). Barra minn hekk, mill-inqas 37 % tar-riżorsi addizzjonali pprovduti mill-EURI jentħieġ li jkunu ddedikati għal miżuri li huma partikolarment ta’ benefiċċju għall-ambjent u l-klima, kif ukoll għat-trattament xieraq tal-annimali u LEADER. Apparti dan, mill-inqas 55 % ta’ dawk ir-riżorsi addizzjonali jenħtieġ li jkunu ddedikati għal miżuri li jippromwovu żvilupp ekonomiku u soċjali fiż-żoni rurali, jiġifieri għal investimenti f’assi fiżiċi, l-iżvilupp tal-azjendi agrikoli u tan-negozju, l-appoġġ għal servizzi bażiċi u t-tiġdid tal-irħula f’żoni rurali u l-kooperazzjoni. |
(23) |
Fil-każ li l-Istati Membri b’xi mod ieħor ma jkunux jistgħu jikkonformaw mal-prinċipju ta’ nonrigressjoni, jenħtieġ li jkollhom il-possibbiltà li jidderogaw mill-obbligu li jallokaw mill-inqas 55 % tar-riżorsi addizzjonali mill-EURI għal miżuri li jippromwovu żvilupp ekonomiku u soċjali fiż-żoni rurali, u preferibbilment jenħtieġ li jappoġġaw miżuri li huma partikolarment ta’ benefiċċju għall-ambjent u l-klima. Madankollu, sabiex l-Istati Membri jingħataw biżżejjed flessibbiltà, jenħtieġ li l-Istati Membri jkollhom ukoll il-possibbiltà li jidderogaw mill-prinċipju ta’ nonrigressjoni fir-rigward ta’ dawk ir-riżorsi addizzjonali sal-punt meħtieġ biex jikkonformaw ma’ dak l-obbligu ta’ 55 %. |
(24) |
Ir-riżorsi addizzjonali mill-EURI huma soġġetti għal kondizzjonijiet speċifiċi. Dawk ir-riżorsi addizzjonali għalhekk jenħtieġ li jiġu pprogrammati u mmonitorjati b’mod separat mill-appoġġ tal-Unjoni għall-iżvilupp rurali, filwaqt li jiġu applikati, bħala regola ġenerali, ir-regoli stabbiliti fir-Regolament (UE) Nru 1305/2013. Għaldaqstant, dawk ir-riżorsi addizzjonali jenħtieġ li jiġu implimentati permezz tar-Regolament (UE) Nru 1305/2013 u jitqiesu fil-qafas ta’ dak ir-Regolament bħala ammonti li jiffinanzjaw il-miżuri taħt il-FAEŻR. B’konsegwenza ta’ dan, ir-regoli stabbiliti fir-Regolament (UE) Nru 1305/2013, inkluż ir-regoli dwar l-emendi tal-programmi għall-iżvilupp rurali, ir-Regolament (UE) Nru 1306/2013, inkluż ir-regoli dwar id-diżimpenn awtomatiku, u r-Regolament (UE) Nru 1307/2013 jenħtieġ li, japplikaw, ħlief fejn dan ir-Regolament jipprevedi mod ieħor. |
(25) |
Jenħtieġ li tiġi stabbilita rata massima speċifika ta’ kofinanzjament tal-Unjoni, kif ukoll żieda fir-rata ta’ appoġġ għall-investimenti li jikkontribwixxu għal irkupru ekonomiku reżiljenti, sostenibbli u diġitali, u għajnuna ta’ appoġġ għall-bdiewa żgħażagħ sabiex jiġi żgurat l-effett ta’ ingranaġġ adegwat tar-riżorsi addizzjonali pprovduti mill-EURI. |
(26) |
Sabiex tiġi żgurata l-kontinwità matul il-perijodu tranżizzjonali, jenħtieġ li tinżamm ir-riżerva għall-kriżijiet fis-settur agrikolu għas-snin 2021 u 2022. L-ammont rilevanti tar-riżerva għas-snin 2021 u 2022 jenħtieġ li jkun inkluż f’dik ir-riżerva. |
(27) |
Fir-rigward tal-arranġamenti ta’ prefinanzjament mill-FAEŻR, jenħtieġ li jiġi ċċarat li la l-estensjoni sal-31 ta’ Diċembru 2022 ta’ programmi appoġġati mill-FAEŻR f’konformità ma’ dan ir-Regolament u lanqas ir-riżorsi addizzjonali li jsiru disponibbli abbażi tar-Regolament dwar l-EURI ma jenħtieġ li jwasslu għal xi prefinanzjament addizzjonali mogħti għall-programmi kkonċernati. |
(28) |
L-Artikolu 11 tar-Regolament (UE) Nru 1307/2013 bħalissa jipprevedi biss l-obbligu ta’ notifika għall-Istati Membri fir-rigward tad-deċiżjonijiet tagħhom meħuda f’konformità ma’ dak l-Artikolu u l-prodott stmat relatat mat-tnaqqis tal-parti tal-ammont ta’ pagamenti diretti li għandhom jingħataw lil bidwi għal sena kalendarja partikolari li jaqbeż EUR 150 000 għas-snin 2015 sal-2020. Bil-għan li tiġi żgurata kontinwazzjoni tas-sistema eżistenti, jenħtieġ li l-Istati Membri jinnotifikaw ukoll id-deċiżjonijiet tagħhom meħuda f’konformità ma’ dak l-Artikolu u l-prodott stmat relatat mat-tnaqqis għas-snin kalendarji 2021 u 2022. |
(29) |
L-Artikolu 14 tar-Regolament (UE) Nru 1307/2013 jippermetti lill-Istati Membri jittrasferixxu fondi bejn il-pagamenti diretti u l-iżvilupp rurali fir-rigward tas-snin kalendarji 2014 sal-2020. Sabiex jiġi żgurat li l-Istati Membri jkunu jistgħu jsegwu l-istrateġija tagħhom stess, il-flessibbiltà bejn il-pilastri jenħtieġ li ssir disponibbli wkoll għas-sena kalendarja 2021 (is-sena finanzjarja 2022) u s-sena kalendarja 2022 (is-sena finanzjarja 2023). |
(30) |
Sabiex il-Kummissjoni tkun tista’ tistabbilixxi l-limiti massimi baġitarji skont l-Artikolu 22(1), l-Artikolu 36(4), l-Artikolu 42(2), l-Artikolu 49(2), l-Artikolu 51(4) u l-Artikolu 53(7) tar-Regolament (UE) Nru 1307/2013, huwa meħtieġ li l-Istati Membri jinnotifikaw id-deċiżjonijiet tagħhom dwar l-allokazzjonijiet finanzjarji skont l-iskema għas-sena kalendarja 2021 sad-19 ta’ Frar 2021 u għas-sena kalendarja 2022 sal-1 ta’ Awwissu 2021. |
(31) |
L-Artikolu 22(5) tar-Regolament (UE) Nru 1307/2013 jipprevedi aġġustament lineari tal-valur tad-drittijiet għall-pagament f’każ ta’ bidla fil-limitu massimu għall-iskema ta’ pagament bażiku minn sena għall-oħra minħabba ċerti deċiżjonijiet meħuda mill-Istati Membri u li jaffettwaw il-limitu massimu għall-iskema ta’ pagament bażiku. L-estensjoni tal-Anness II għal dak ir-Regolament dwar il-limiti massimi nazzjonali wara s-sena kalendarja 2020 u l-bidliet annwali possibbli minn dik id-data jista’ jkollhom impatt fuq il-limitu massimu għall-iskema ta’ pagament bażiku. Għalhekk, biex l-Istati Membri jkunu jistgħu jirrispettaw l-obbligu li t-total tal-valur tad-drittijiet għall-pagament u r-riżerva/i jkun ugwali għal-limitu massimu għall-iskema ta’ pagament bażiku stipulata fl-Artikolu 22(4) ta’ dak ir-Regolament, huwa xieraq li jiġi previst aġġustament lineari biex jadatta għall-estensjoni ta’ jew l-emendi għall-Anness II għal dak ir-Regolament matul il-perijodu tranżizzjonali. Barra minn hekk, sabiex tiġi pprovduta lill-Istati Membri flessibbiltà akbar, jidher li huwa xieraq li huma jitħallew jadattaw il-valur tad-drittijiet għall-pagament jew tar-riżerva, possibbilment b’rati differenti ta’ aġġustament. |
(32) |
F’konformità mal-qafas legali attwali, l-Istati Membri fl-2014 innotifikaw id-deċiżjonijiet tagħhom sas-sena kalendarja 2020 dwar id-diviżjoni tal-limitu massimu nazzjonali annwali għall-iskema ta’ pagament bażiku bejn ir-reġjuni u l-modifiki progressivi annwali possibbli għall-perijodu kopert mir-Regolament (UE) Nru 1307/2013. Huwa meħtieġ li l-Istati Membri jinnotifikaw ukoll dawk id-deċiżjonijiet għas-snin kalendarji 2021 u 2022. |
(33) |
Il-mekkaniżmu ta’ konverġenza interna huwa l-proċess ewlieni għal distribuzzjoni aktar ekwa ta’ appoġġ dirett għall-introjtu fost il-bdiewa. Differenzi individwali sinifikanti bbażati fuq referenzi storiċi antiki jsiru dejjem aktar diffiċli biex jiġu ġġustifikati. Fir-Regolament (UE) Nru 1307/2013, il-mudell bażiku ta’ konverġenza interna jikkonsisti fl-applikazzjoni mill-Istati Membri ta’ rata fissa uniformi għad-drittijiet għall-pagament kollha, fil-livell nazzjonali jew reġjonali, mill-2015. Madankollu, sabiex tiġi żgurata tranżizzjoni aktar bla xkiel għal valur uniformi, ġiet stabbilita deroga li tippermetti lill-Istati Membri jiddifferenzjaw il-valuri tad-drittijiet għall-pagament billi japplikaw konverġenza parzjali, li tissejjaħ ukoll il-“mudell mina”, bejn l-2015 u l-2019. Xi Stati Membri għamlu użu minn dik id-deroga. Sabiex jitkompla l-proċess lejn distribuzzjoni aktar ekwa tal-pagamenti diretti, l-Istati Membri jenħtieġ li jkunu jistgħu jikkonverġu aktar lejn medja nazzjonali jew reġjonali wara l-2019 minflok ma jmorru għal rata fissa uniformi jew iżommu l-valur tad-drittijiet fil-livell tagħhom tal-2019. Jenħtieġ li dik il-possibbiltà għall-Istati Membri tapplika mill-1 ta’ Jannar 2021. Jenħtieġ li l-Istati Membri jinnotifikaw lill-Kummissjoni fuq bażi annwali dwar id-deċiżjoni tagħhom għas-sena ta’ wara. |
(34) |
Jenħtieġ li d-dispożizzjonijiet tar-Regolament (UE) Nru 1307/2013 dwar l-aġġustament tad-drittijiet għall-pagament kollha li qed jiġu emendati b’dan ir-Regolament japplikaw b’mod retroattiv mill-1 ta’ Jannar 2020 sabiex jiġi ċċarat li l-Istati Membri setgħu kkonverġew wara l-2019. |
(35) |
L-Artikolu 30 tar-Regolament (UE) Nru 1307/2013 jipprevedi modifiki progressivi annwali fil-valur tad-drittijiet għall-pagament allokati mir-riżerva biex jirriflettu l-passi annwali tal-limitu massimu nazzjonali stabbilit fl-Anness II għal dak ir-Regolament, li jirriflettu ġestjoni pluriennali tar-riżerva. Dawk ir-regoli jenħtieġ li jiġu adattati sabiex jirriflettu li huwa possibbli li jiġu emendati kemm il-valur tad-drittijiet għall-pagament allokati kollha kif ukoll tar-riżerva biex jaġġustaw għal bidla fl-ammont fl-Anness II għal dak ir-Regolament bejn sentejn. Fl-Istati Membri li jiddeċiedu li jkomplu bil-konverġenza interna, dik il-konverġenza interna tiġi implimentata fuq bażi annwali. Għas-snin kalendarji 2020, 2021 u 2022, huwa biss il-valur tad-dritt għall-pagament tas-sena attwali li jeħtieġ jiġi ddeterminat fis-sena tal-allokazzjoni. Il-valur tal-unità tad-drittijiet għall-pagament li jridu jiġu allokati mir-riżerva f’sena partikolari jenħtieġ li jiġi kkalkulat wara aġġustament possibbli tar-riżerva f’konformità mal-Artikolu 22(5) ta’ dak ir-Regolament. Fi kwalunkwe sena sussegwenti, il-valur tad-drittijiet għall-pagament allokati mir-riżerva jenħtieġ li jiġi adattat f’konformità mal-Artikolu 22(5) ta’ dak ir-Regolament. |
(36) |
L-Artikolu 36 tar-Regolament (UE) Nru 1307/2013 jipprevedi l-applikazzjoni tal-iskema ta’ pagament uniku skont l-erja sal-31 ta’ Diċembru 2020. Huwa xieraq li tkun permessa l-estensjoni tal-iskema ta’ pagament uniku skont l-erja fis-snin 2021 u 2022. |
(37) |
Billi l-emenda, stabbilita f’dan ir-Regolament, għall-Anness II għar-Regolament (UE) Nru 1307/2013 ser tidħol fis-seħħ tard wisq biex l-Istati Membri josservaw l-iskadenza oriġinali għal ċerti obbligi ta’ notifika fl-2020, huwa meħtieġ li tiġi posposta l-iskadenza għall-Istati Membri biex jieħdu d-deċiżjoni li jintroduċu għall-ewwel darba l-pagament ridistributtiv mill-2021 jew l-2022, u n-notifika ta’ dik id-deċiżjoni lill-Kummissjoni. Huwa xieraq li dik l-iskadenza tiġi stabbilita fl-istess żmien bħall-iskadenza għad-deċiżjonijiet dwar il-flessibbiltà bejn il-pilastri. |
(38) |
Skont l-Artikolu 37 tar-Regolament (UE) Nru 1307/2013, l-Istati Membri li japplikaw l-iskema ta’ pagament uniku skont l-erja jistgħu jiddeċiedu li jagħtu għajnuna nazzjonali tranżizzjonali fil-perijodu 2015-2020 biex jiġi evitat tnaqqis f’daqqa u sostanzjali ta’ appoġġ f’dawk is-setturi li bbenefikaw minn għajnuna nazzjonali tranżizzjonali sal-2014. Sabiex jiġi żgurat li, matul il-perijodu tranżizzjonali, tali għajnuna tkompli taqdi r-rwol tagħha fl-appoġġ tal-introjtu tal-bdiewa f’dawk is-setturi speċifiċi, jenħtieġ li tkun prevista l-kontinwazzjoni ta’ dik l-għajnuna taħt l-istess kundizzjonijiet u limitazzjonijiet bħal fil-perijodu 2015-2020. |
(39) |
Għall-finijiet ta’ ċertezza legali, jenħtieġ li jiġi ċċarat li l-Artikoli 41 u 42 tar-Regolament (UE) Nru 1307/2013 jippermettu lill-Istati Membri jirrieżaminaw, fuq bażi annwali, id-deċiżjonijiet tagħhom dwar il-pagament ridistributtiv. L-iskadenza għar-reviżjoni applikabbli fl-2021 u fl-2022 jenħtieġ li tiġi stabbilita fl-istess ħin li tiġi stabbilita l-iskadenza għad-deċiżjonijiet dwar il-flessibbiltà bejn il-pilastri. |
(40) |
L-Artikolu 52(10) tar-Regolament (UE) Nru 1307/2013 jagħti s-setgħa lill-Kummissjoni tadotta atti delegati li jippermettu lill-Istati Membru jiddeċiedu li l-appoġġ akkoppjat volontarju jista’ jkompli jitħallas sal-2020 fuq il-bażi tal-unitajiet tal-produzzjoni li għalihom ingħata tali appoġġ f’perijodu ta’ referenza fl-imgħoddi. Dik lis-setgħa għandha l-għan li jiżgura l-akbar konsistenza possibbli bejn l-iskemi tal-Unjoni mmirati lejn setturi li jistgħu jintlaqtu mill-iżbilanċi strutturali fis-suq. Għalhekk huwa xieraq li dik is-setgħa tingħata għal aktar żmien sabiex tkopri wkoll is-snin 2021 u 2022. |
(41) |
Billi l-emenda, stabbilita f’dan ir-Regolament għall-Anness II għar-Regolament (UE) Nru 1307/2013 ser tidħol fis-seħħ tard wisq biex l-Istati Membri josservaw l-iskadenza oriġinali għal ċerti obbligi ta’ notifika fl-2020, huwa meħtieġ li tiġi posposta l-iskadenza għall-Istati Membri biex jieħdu d-deċiżjoni li jintroduċu għall-ewwel darba l-appoġġ akkoppjat volontarju mill-2021 jew l-2022 u n-notifika ta’ dik id-deċiżjoni lill-Kummissjoni. Huwa xieraq li dik l-iskadenza tiġi stabbilita fl-istess żmien bħall-iskadenza għad-deċiżjonijiet dwar il-flessibbiltà bejn il-pilastri. Bl-istess mod, l-iskadenza għal deċiżjoni tal-Istati Membri li jkomplu jew jieqfu jagħtu appoġġ akkoppjat volontarju fis-snin 2021 u 2022, u n-notifika ta’ dik id-deċiżjoni lill-Kummissjoni, jenħtieġ li jiġu posposti għall-istess data. |
(42) |
L-Artikolu 54 tar-Regolament (UE) Nru 1307/2013 jistabbilixxi l-elementi tan-notifiki tal-Istati Membri dwar l-appoġġ akkoppjat volontarju. Huwa xieraq li jiġi ċċarat li dawk in-notifiki għas-snin kalendarji 2021 u 2022 jenħtieġ li jinkludu l-perċentwal tal-limitu massimu nazzjonali użat biex jiffinanzja dak l-appoġġ għas-snin 2021 u 2022. |
(43) |
Ir-Regolament (UE) Nru 1308/2013 jistipula regoli għall-organizzazzjoni komuni tas-swieq agrikoli u jinkludi ċerti skemi ta’ għajnuna. Il-proposti leġiżlattivi tal-Kummissjoni dwar il-PAK wara l-2020 ipprovdew li dawk l-iskemi ta’ għajnuna jiġu integrati fil-pjanijiet strateġiċi futuri tal-PAK tal-Istati Membri. Sabiex tiġi żgurata integrazzjoni bla xkiel ta’ dawk l-iskemi ta’ għajnuna fil-PAK futura, jenħtieġ li jiġu stabbiliti regoli dwar it-tul ta’ żmien ta’ kull waħda minn dawk l-iskemi ta’ għajnuna meta jridu jiġu mġedda matul il-perijodu tranżizzjonali. Għalhekk, fir-rigward tal-iskema ta’ għajnuna fis-settur taż-żejt taż-żebbuġa u taż-żebbuġ tal-mejda, il-programmi ta’ ħidma eżistenti mfassla għall-perijodu li jibda mill-1 ta’ April 2018 sal-31 ta’ Marzu 2021 jenħtieġ li jiġu segwiti minn programmi ta’ ħidma ġodda għall-perijodu mill-1 ta’ April 2021 sal-31 ta’ Diċembru 2022. Il-programmi operazzjonali eżistenti fis-settur tal-frott u l-ħaxix li ma laħqux it-tul ta’ żmien massimu tagħhom ta’ ħames snin jistgħu jiġu estiżi biss sal-31 ta’ Diċembru 2022. Jenħtieġ li l-programmi operazzjonali l-ġodda fis-settur tal-frott u l-ħaxix jiġu approvati biss għal tul ta’ żmien massimu ta’ tliet snin. Jenħtieġ li l-programmi nazzjonali eżistenti għas-settur tal-apikultura mfassla għall-perijodu mill-1 ta’ Awwissu 2019 sal-31 ta’ Lulju 2022 jiġu estiżi sal-31 ta’ Diċembru 2022. |
(44) |
Minħabba l-kriżi kkawżata mill-pandemija tal-COVID-19, il-vitikulturi li jkollhom awtorizzazzjonijiet għat-taħwil ta’ taħwil ġdid jew għat-taħwil mill-ġdid li jiskadu fl-2020, fil-biċċa l-kbira ma setgħux jagħmlu l-użu ppjanat ta’ dawk l-awtorizzazzjonijiet matul l-aħħar sena tal-validità tagħhom. Sabiex jiġi evitat it-telf ta’ dawk l-awtorizzazzjonijiet u jitnaqqas ir-riskju tad-deterjorament tal-kundizzjonijiet li fihom ikun meħtieġ li jsir it-taħwil, huwa meħtieġ li tkun permessa estensjoni tal-validità tal-awtorizzazzjonijiet għat-taħwil għal taħwil ġdid jew għat-taħwil mill-ġdid li jiskadu fl-2020. Jenħtieġ għalhekk li l-awtorizzazzjonijiet kollha għat-taħwil ta’ taħwil ġdid jew għat-taħwil mill-ġdid li jiskadu fl-2020 jiġu estiżi sal-31 ta’ Diċembru 2021. Barra minn hekk, meta jitqiesu l-bidliet fil-perspettivi tas-suq, jenħtieġ li d-detenturi tal-awtorizzazzjonijiet għat-taħwil li jiskadu fl-2020 ikollhom il-possibbiltà li ma jużawx l-awtorizzazzjonijiet tagħhom mingħajr ma jkunu soġġetti għall-penali amministrattivi. |
(45) |
Id-dispożizzjoni tar-Regolament (UE) Nru 1308/2013 dwar l-awtorizzazzjonijiet għat-taħwil ta’ taħwil ġdid jew għat-taħwil mill-ġdid li kienu ser jiskadu fl-2020, li ġiet emendata minn dan ir-Regolament, jenħtieġ li, minħabba t-tfixkil kkawżat mill-pandemija tal-COVID-19 u d-diffikultajiet li kkawżat fir-rigward tal-użu ta’ dawk l-awtorizzazzjonijiet għat-taħwil, tapplika b’mod retroattiv mill-1 ta’ Jannar 2020 |
(46) |
Fl-2013, ġew stabbiliti dispożizzjonijiet tranżizzjonali sabiex tiġi żgurata tranżizzjoni bla xkiel mis-sistema preċedenti tad-drittijiet għat-taħwil tal-għeneb tal-inbid għall-iskema l-ġdida ta’ awtorizzazzjonijiet għat-taħwil, b’mod partikolari sabiex jiġi evitat it-taħwil eċċessiv qabel il-bidu ta’ dik l-iskema l-ġdida. L-aħħar skadenza għall-preżentazzjoni tat-talbiet għal konverżjoni tad-drittijiet għat-taħwil f’awtorizzazzjonijiet tintemm fil-31 ta’ Diċembru 2020. Madankollu, l-awtorizzazzjonijiet iridu jintużaw mill-applikant u mhumiex negozjabbli bħalma kienu d-drittijiet għat-taħwil ta’ qabel. Barra minn hekk, l-applikanti għal awtorizzazzjonijiet jistgħu jintalbu li jkollhom żona tal-vinji korrispondenti, li jista’ jwassal għal sitwazzjonijiet fejn id-detenturi tad-drittijiet għat-taħwil ikunu għadhom ma rnexxilhomx jakkwistaw iż-żoni tal-vinji korrispondenti biex jużaw l-awtorizzazzjonijiet li jirriżultaw mill-konverżjoni tad-drittijiet għat-taħwil tagħhom. L-impatt ekonomiku qawwi tal-pandemija tal-COVID-19 fuq is-settur tal-inbid wassal għal problemi ta’ likwidità għall-vitikulturi u wkoll għal inċertezza dwar id-domanda futura għall-inbid. Jenħtieġ li l-vitikulturi li għad għadhom d-drittijiet għat-taħwil ma jiġux imġiegħla jiddeċiedu jekk iridux jikkonvertu d-drittijiet għat-taħwil tagħhom f’awtorizzazzjonijiet waqt li jkunu qed jiffaċċjaw diffikultajiet eċċezzjonali minħabba fil-kriżi kkawżata mill-pandemija tal-COVID-19, speċjalment minħabba li dawn ikunu soġġetti għal penali amministrattiva jekk ma jużawx l-awtorizzazzjonijiet għat-taħwil tagħhom li jirriżultaw mill-konverżjoni. Jenħtieġ għalhekk li dawk l-Istati Membri li ppermettew lill-vitikulturi jissottomettu t-talbiet tagħhom għall-konverżjoni ta’ drittijiet għat-taħwil sal-31 ta’ Diċembru 2020 ikunu jistgħu jestendu l-iskadenza għas-sottomissjoni ta’ tali talbiet sal-31 ta’ Diċembru 2022. Konsegwentement, l-aħħar data għall-validità ta’ tali awtorizzazzjonijiet konvertiti jenħtieġ li tiġi adattata u jenħtieġ li tintemm fil-31 ta’ Diċembru 2025. |
(47) |
L-Artikolu 214a tar-Regolament (UE) Nru 1308/2013 ippermetta lill-Finlandja tagħti, taħt ċerti kundizzjonijiet, għajnuna nazzjonali fin-Nofsinhar tal-Finlandja sal-2020, soġġetta għall-awtorizzazzjoni tal-Kummissjoni. Sabiex tkun żgurata l-kontinwità tal-pagamenti ta’ dik l-għajnuna matul il-perijodu tranżizzjonali, jeħtieġ li l-għotja ta’ dik l-għajnuna nazzjonali tibqa’ tiġi permessa bl-istess kundizzjonijiet u bl-istess ammonti bħal fl-2020. |
(48) |
Sabiex jittejjeb l-operat tas-suq għaż-żejt taż-żebbuġa, jenħtieġ li l-Istati Membri jkunu jistgħu jiddeċiedu dwar l-implimentazzjoni ta’ regoli ta’ kummerċjalizzazzjoni biex jirregolaw il-provvista. Madankollu, jenħtieġ li l-kamp ta’ applikazzjoni ta’ deċiżjonijiet bħal dawn jeskludi prattiki li jistgħu joħolqu distorsjoni tal-kompetizzjoni. |
(49) |
Avvenimenti reċenti wrew li l-bdiewa qed jiffaċċjaw dejjem aktar riskji ta’ volatilità tal-introjtu, parzjalment minħabba l-espożizzjoni tas-suq u parzjalment minħabba avvenimenti estremi tat-temp u kriżijiet sanitarji u fitosanitarji frekwenti li jaffettwaw il-popolazzjoni tal-bhejjem u l-assi agronomiċi tal-Unjoni. Sabiex jittaffew l-effetti tal-volatilità tal-introjtu billi l-bdiewa jitħeġġu jagħmlu riżervi fis-snin tajbin biex ilaħħqu mas-snin il-ħżiena, jenħtieġ li l-miżuri nazzjonali tat-taxxa fejn il-bażi tat-taxxa fuq l-introjtu applikata lill-bdiewa tiġi kkalkulata fuq il-bażi ta’ perijodu pluriennali jiġu eżentati mill-applikazzjoni ta’ regoli dwar l-għajnuna mill-Istat. |
(50) |
Minħabba li l-għan ta’ dan ir-Regolament, jiġifieri li jipprovdi għat-tkomplija tal-applikazzjoni tar-regoli tal-qafas attwali tal-PAK u għal pagamenti mingħajr interruzzjonijiet lill-bdiewa u lil benefiċjarji oħra, u b’hekk jipprovdi prevedibbiltà u stabbiltà matul il-perijodu tranżizzjonali, ma jistax jinkiseb b’mod suffiċjenti mill-Istati Membri iżda jista’ pjuttost, minħabba l-iskala u l-effetti tal-azzjoni, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dawk l-għan. |
(51) |
Ir-regoli finanzjarji orizzontali adottati mill-Parlament Ewropew u l-Kunsill abbażi tal-Artikolu 322 tat-Trattat dwar il-Funzjonament tal-Unjoni Ewropea (“TFUE”) japplikaw għal dan ir-Regolament. Dawk ir-regoli huma stabbiliti fir-Regolament (UE Euratom) 2018/1046 tal-Parlament Ewropew u tal-Kunsill (13) u jiddeterminaw b’mod partikolari l-proċedura għall-istabbiliment u l-implimentazzjoni tal-baġit permezz ta’ għotjiet, akkwist, premjijiet, implimentazzjoni indiretta u jipprovdu għal verifiki dwar ir-responsabbiltà tal-atturi finanzjarji. Ir-regoli adottati abbażi tal-Artikolu 322 tat-TFUE jinkludu wkoll reġim ġenerali ta’ kondizzjonalità għall-protezzjoni tal-baġit tal-Unjoni. |
(52) |
Għalhekk, jenħtieġ li r-Regolamenti (UE) Nru 1305/2013, (UE) Nru 1306/2013, (UE) Nru 1307/2013 u (UE) Nru 1308/2013 jiġu emendati skont dan. |
(53) |
Sabiex jiġi żgurat li r-riżorsi addizzjonali disponibbli abbażi tar-Regolament dwar l-ERI jkunu disponibbli mill-1 ta’ Jannar 2021, id-dispożizzjonijiet dwar l-appoġġ tal-EURI f’dan ir-Regolament jenħtieġ li japplikaw b’mod retroattiv minn dik id-data. |
(54) |
Minħabba l-ħtieġa imperattiva li tiġi żgurata ċ-ċertezza legali għas-settur tal-agrikoltura fiċ-ċirkostanzi attwali, jenħtieġ li dan ir-Regolament jidħol fis-seħħ b’urġenza fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea, |
ADOTTAW DAN IR-REGOLAMENT:
TITOLU I
DISPOŻIZZJONIJIET TRANŻIZZJONALI
KAPITOLU I
L-estensjoni ta’ ċerti perijodi fl-ambitu tar-Regolamenti (UE) Nru 1303/2013 u (UE) Nru 1310/2013 u t-tkomplija tal-applikazzjoni tar-Regolament (UE) Nru 1303/2013 għas-snin ta’ programmazzjoni 2021 u 2022
Artikolu 1
Estensjoni tal-perijodu għat-tul ta’ żmien tal-programmi appoġġati mill-Fond Agrikolu Ewropew għall-Iżvilupp Rurali
1. Għall-programmi appoġġati mill-Fond Agrikolu Ewropew għall-Iżvilupp Rurali (FAEŻR), il-perijodu mill-1 ta’ Jannar 2014 sal-31 ta’ Diċembru 2020 stabbilit fl-Artikolu 26(1) tar-Regolament (UE) Nru 1303/2013 huwa b’dan estiż sal-31 ta’ Diċembru 2022.
2. L-estensjoni tal-perijodu għat-tul ta’ żmien tal-programmi appoġġati mill-FAEŻR, imsemmija fil-paragrafu 1 ta’ dan l-Artikolu, għandha tkun mingħajr preġudizzju għall-ħtieġa li titressaq talba biex jiġu emendati programmi ta’ żvilupp rurali għall-perijodu tranżizzjonali kif imsemmi fil-punt (a) tal-Artikolu 11 tar-Regolament (UE) Nru 1305/2013. Din l-emenda għandha tiżgura li tal-anqas l-istess sehem ġenerali tal-kontribuzzjoni tal-FAEŻR hija riżervata għall-miżuri msemmija fl-Artikolu 59(6) ta’ dak ir-Regolament.
Artikolu 2
Tkomplija tal-applikazzjoni tar-Regolament (UE) Nru 1303/2013 għall-programmi appoġġati mill-FAEŻR
1. Ir-Regolament (UE) Nru 1303/2013 għandu jkompli japplika għal programmi appoġġati mill-FAEŻR skont il-perijodu ta’ programmazzjoni 2014–2020 u estiżi f’konformità mal-Artikolu 1 ta’ dan ir-Regolament.
2. Għall-programmi estiżi f’konformità mal-Artikolu 1 ta’ dan ir-Regolament, ir-referenzi għall-perijodi taż-żmien jew l-iskadenzi fl-Artikolu 50(1), l-Artikolu 51(1), l-Artikolu 57(2) u l-Artikolu 65(2) u (4), u l-ewwel paragrafu tal-Artikolu 76 tar-Regolament (UE) Nru 1303/2013, għandhom jiġu estiżi b’sentejn.
3. Għal programmi estiżi f’konformità mal-Artikolu 1 ta’ dan ir-Regolament, l-Istati Membri għandhom jemendaw il-miri tagħhom stabbiliti fil-kuntest tal-qafas ta’ prestazzjoni stabbilit fl-Anness II għar-Regolament (UE) Nru 1303/2013 biex jistabbilixxu l-miri għall-2025. Għal dawk il-programmi, ir-referenzi għall-miri għall-2023 stabbiliti fl-atti ta’ implimentazzjoni adottati f’konformità mal-Artikolu 22(7) tar-Regolament (UE) Nru 1303/1303 jew l-Artikolu 8(3), l-Artikolu 67, l-Artikolu 75(5) jew l-Artikolu 76(1) tar-Regolament (UE) Nru 1305/2013 għandhom jinqraw bħala referenzi għall-miri għall-2025.
4. Id-data finali sa meta l-Kummissjoni trid tipprepara rapport ta’ sinteżi li jispjega l-konklużjonijiet ewlenin tal-evalwazzjonijiet ex post tal-FAEŻR previst fl-Artikolu 57(4) tar-Regolament (UE) Nru 1303/2013 għandha tkun il-31 ta’ Diċembru 2027.
Artikolu 3
Eliġibbiltà ta’ ċerti tipi ta’ nfiq matul il-perijodu tranżizzjonali
Mingħajr preġudizzju għall-Artikolu 2(2) ta’ dan ir-Regolament, għall-Artikolu 65(2) tar-Regolament (UE) Nru 1303/2013 u għall-Artikolu 38 tar-Regolament (UE) Nru 1306/2013, in-nefqa msemmija fl-Artikolu 3(1) tar-Regolament (UE) Nru 1310/2013 u fl-Artikolu 16 tar-Regolament Delegat (UE) Nru 807/2014 għandha tkun eliġibbli għal kontribuzzjoni tal-FAEŻR mill-allokazzjoni tal-2021 u 2022 għal programmi appoġġati mill-FAEŻR li ġew estiżi f’konformità mal-Artikolu 1 ta’ dan ir-Regolament, soġġett għall-kundizzjonijiet li ġejjin:
(a) |
tali nefqa tkun prevista fil-programm rispettiv tal-iżvilupp rurali għas-snin koperti mill-perijodu tranżizzjonali; |
(b) |
hija applikabbli r-rata ta’ kontribuzzjoni tal-FAEŻR tal-miżura korrispondenti skont ir-Regolament (UE) Nru 1305/2013, kif stabbilita fl-Anness I għar-Regolament (UE) Nru 1310/2013 u fl-Anness I għar-Regolament Delegat (UE) Nru 807/2014; |
(c) |
is-sistema msemmija fl-Artikolu 67(2) tar-Regolament (UE) Nru 1306/2013 tapplika għall-impenji legali meħuda taħt miżuri li jikkorrispondu għall-appoġġ mogħti skont il-punti (a) u (b) tal-Artikolu 21(1) u l-Artikoli 28 sa 31, 33, 34 u 40 tar-Regolament (UE) Nru 1305/2013 u l-operazzjonijiet rilevanti jiġu identifikati b’mod ċar; u |
(d) |
il-pagamenti għall-impenji legali msemmija fil-punt (c) ta’ dan l-Artikolu jsiru fil-perijodu stabbilit fl-Artikolu 75 tar-Regolament (UE) Nru 1306/2013. |
KAPITOLU II
Preparazzjoni ta’ strateġiji futuri tal-iżvilupp lokali mmexxija mill-komunità fis-snin ta’ programmazzjoni 2021 u 2022
Artikolu 4
Żvilupp lokali mmexxi mill-komunità
Għall-programmi estiżi f’konformità mal-Artikolu 1 ta’ dan ir-Regolament, il-FAEŻR jista’ jappoġġja l-ispejjeż tal-bini tal-kapaċità u tal-azzjonijiet preparatorji li jappoġġjaw it-tfassil u l-implimentazzjoni futura ta’ strateġija tal-iżvilupp lokali mmexxija mill-komunità taħt il-qafas legali l-ġdid.
KAPITOLU III
Drittijiet għall-pagament għal pagamenti diretti lill-bdiewa
Artikolu 5
Drittijiet għall-pagament definittivi
1. Id-drittijiet għall-pagament allokati lill-bdiewa qabel l-1 ta’ Jannar 2020 għandhom jitqiesu legali u regolari mill-1 ta’ Jannar 2021. Il-valur ta’ dawn id-drittijiet li għandhom jitqiesu bħala legali u regolari għandu jkun il-valur għas-sena kalendarja 2020 validu fil-31 ta’ Diċembru 2020.
2. B’deroga mill-paragrafu 1 ta’ dan l-Artikolu, Stat Membru li jkun għamel użu mill-għażla prevista fl-Artikolu 24(6) tar-Regolament (UE) Nru 1307/2013 jista’, filwaqt li jirrispetta l-aspettattivi leġittimi tal-bdiewa, jiddeċiedi li d-drittijiet kollha għall-pagamenti allokati qabel l-1 ta’ Jannar 2020 għandhom jitqiesu bħala legali u regolari minn dik id-data. F’dak il-każ, il-valur ta’ dawk id-drittijiet li għandhom jitqiesu bħala legali u regolari għandu jkun il-valur għas-sena kalendarja 2019 validu fil-31 ta’ Diċembru 2019.
3. Il-paragrafi 1 u 2 ta’ dan l-Artikolu għandhom japplikaw mingħajr preġudizzju għad-dispożizzjonijiet rilevanti tal-liġi tal-Unjoni, b’mod partikolari l-Artikolu 22(5) u l-Artikolu 25(12) tar-Regolament (UE) Nru 1307/2013, fir-rigward tal-valur tad-drittijiet għal pagament għas-sena kalendarja 2020 u ’l quddiem.
4. Il-paragrafi 1 u 2 ma għandhomx japplikaw għal drittijiet għall-pagament allokati lill-bdiewa abbażi ta’ applikazzjonijiet fattwalment skorretti, ħlief f’każijiet fejn l-iżball ma setax jiġi raġonevolment identifikat mill-bidwi.
5. Il-paragrafi 1 u 2 ta’ dan l-Artikolu ma għandhomx jippreġudikaw s-setgħa tal-Kummissjoni li tieħu d-deċiżjonijiet imsemmija fl-Artikolu 52 tar-Regolament (UE) Nru 1306/2013 b’rabta man-nefqa mġarrba għall-pagamenti mogħtija fir-rigward tas-snin kalendarji sal-2020, b’tali sena inkluża, meta japplika l-paragrafu 1 ta’ dan l-Artikolu, jew sal-2019, b’tali sena inkluża, meta japplika l-paragrafu 2 ta’ dan l-Artikolu.
KAPITOLU IV
Dispożizzjonijiet tranżizzjonali relatati mal-iżvilupp rurali
Artikolu 6
Eliġibbiltà tan-nefqa mġarrba skont ir-Regolament (UE) Nru 1305/2013, u ċerti tipi ta’ nefqa mġarrba skont ir-Regolamenti (KE) Nru 1698/2005 u (KE) Nru 1257/1999
In-nefqa relatata ma’ impenji legali għal benefiċjarji mġarrba skont ir-Regolament (UE) Nru 1305/2013, u ċerti tipi ta’ nefqa mġarrba skont ir-Regolamenti tal-Kunsill (KE) Nru 1698/2005 (14) u (KE) Nru 1257/1999 (15) tista’ tkun eliġibbli għal kontribuzzjoni mill-FAEŻR fil-perijodu 2023-2027 mill-1 ta’ Jannar 2023, soġġett għall-kundizzjonijiet li għandhom jiġu determinati f’konformità mal-qafas legali tal-PAK applikabbli fil-perijodu 2023-2027.
TITOLU II
EMENDI
Artikolu 7
Emendi għar-Regolament (UE) Nru 1305/2013
Ir-Regolament (UE) Nru 1305/2013 huwa emendat kif ġej:
(1) |
il-punt (h) tal-Artikolu 8(1) huwa emendat kif ġej:
|
(2) |
fl-Artikolu 28(5), jiżdiedu s-subparagrafi li ġejjin: “Sabiex jittieħdu impenji ġodda mill-2021, l-Istati Membri għandhom jiddeterminaw perijodu iqsar ta’ bejn sena u tliet snin fil-programmi ta’ żvilupp rurali tagħhom. Jekk l-Istati Membri jipprevedu estensjoni annwali tal-impenji wara t-terminazzjoni tal-perijodu inizjali f’konformità mal-ewwel subparagrafu, mill-2022 l-estensjoni ma għandhiex iddum aktar minn sena. B’deroga mit-tieni subparagrafu, fir-rigward ta’ impenji ġodda li għandhom jittieħdu fl-2021 u l-2022, l-Istati Membri jistgħu jiddeterminaw perijodu itwal minn tliet snin fil-programmi ta’ żvilupp rurali tagħhom abbażi tan-natura tal-impenji u l-objettivi ambjentali u dawk relatati mal-klima mfittxija.”; |
(3) |
fl-Artikolu 29(3), jiżdiedu s-subparagrafi li ġejjin: “Sabiex jittieħdu impenji ġodda mill-2021, l-Istati Membri għandhom jiddeterminaw perijodu iqsar ta’ bejn sena u tliet snin fil-programmi ta’ żvilupp rurali tagħhom. Jekk l-Istati Membri jipprevedu estensjoni annwali għaż-żamma tal-biedja organika wara t-terminazzjoni tal-perijodu inizjali f’konformità mal-ewwel subparagrafu, mill-2022 l-estensjoni ma għandhiex iddum aktar minn sena. B’deroga mit-tieni subparagrafu, fir-rigward ta’ impenji ġodda li għandhom jittieħdu fl-2021 u l-2022, fejn jingħata appoġġ għall-konverżjoni għal biedja organika, l-Istati Membri jistgħu jiddeterminaw perijodu itwal minn tliet snin fil-programmi ta’ żvilupp rurali tagħhom.”; |
(4) |
fl-Artikolu 31(5), it-tieni subparagrafu huwa sostitwit b’dan li ġej: “Fis-snin 2021 u 2022, għall-programmi estiżi skont l-Artikolu 1 tar-Regolament (UE) 2020/2220 tal-Parlament Ewropew u tal-Kunsill (*), fejn il-pagamenti digressivi ma ngħatawx mill-Istati Membri għall-perijodu massimu ta’ erba’ snin sal-2020, dawk l-Istati Membri jistgħu jiddeċiedu li jkomplu dawk il-pagamenti sal-aħħar tal-2022 iżda għal mhux aktar minn erba’ snin b’kollox. F’dak il-każ, il-pagamenti fis-snin 2021 u 2022 ma għandhomx jaqbżu l-EUR 25 għal kull ettaru. (*) Ir-Regolament (UE) 2020/2220 tal-Parlament Ewropew u tal-Kunsill tat-23 ta’ Diċembru 2020 li jistabbilixxi ċerti dispożizzjonijiet tranżizzjonali għall-appoġġ mill-Fond Agrikolu Ewropew għall-Iżvilupp Rurali (FAEŻR) u mill-Fond Agrikolu Ewropew ta’ Garanzija (FAEG) fis-snin 2021 u 2022 u li jemenda r-Regolamenti (UE) Nru 1305/2013, (UE) Nru 1306/2013 u (UE) Nru 1307/2013 fir-rigward tar-riżorsi u applikazzjoni fis-snin 2021 u 2022 u r-Regolament (UE) Nru 1308/2013 fir-rigward tar-riżorsi u d-distribuzzjoni ta’ tali appoġġ fir-rigward tas-snin 2021 u 2022 (ĠU L 437, 28.12.2020, p.1).”;" |
(5) |
fl-Artikolu 33(2), jiżdiedu s-subparagrafi li ġejjin: “Sabiex jittieħdu impenji ġodda sa mill-2021, l-Istati Membri għandhom jiddeterminaw perijodu iqsar ta’ bejn sena u tliet snin fil-programmi ta’ żvilupp rurali tagħhom. Jekk l-Istati Membri jipprovdu tiġdid annwali għall-impenji wara t-terminazzjoni tal-perijodu inizjali f’konformità mat-tieni subparagrafu, sa mill-2022 it-tiġdid ma għandux idum aktar minn sena. B’deroga mi-tielet subparagrafu, fir-rigward ta’ impenji ġodda li għandhom jittieħdu fl-2021 u l-2022, l-Istati Membri jistgħu jiddeterminaw perijodu itwal minn tliet snin fil-programmi ta’ żvilupp rurali tagħhom abbażi tan-natura tal-impenji u l-benefiċċji mixtieqa tat-trattament xieraq tal-annimali.”; |
(6) |
fl-Artikolu 38(3), it-tieni subparagrafu huwa sostitwit b’dan li ġej: “L-appoġġ skont il-punt (b) tal-Artikolu 36(1) għandu jingħata biss biex ikopri t-telf ikkawżat minn avvenimenti klimatiċi negattivi, mard tal-annimali jew tal-pjanti, infestazzjoni ta’ organiżmi ta’ ħsara, jew miżuri adottati skont id-Direttiva 2000/29/KE biex jinqerdu jew jiġu kkontrollati mard tal-pjanti jew organiżmi ta’ ħsara jew inċident ambjentali, li jeqirdu iżjed minn 30 % tal-produzzjoni annwali medja tal-bidwi fil-perijodu preċedenti ta’ tliet snin jew medja ta’ tliet snin ibbażata fuq il-perijodu preċedenti ta’ ħames snin, esklużi l-ogħla entrata u dik l-iktar baxxa. L-indiċijiet jistgħu jintużaw sabiex tiġi kkalkulata l-produzzjoni annwali tal-bidwi. Il-metodu tal-kalkolu użat għandu jippermetti li jiġi ddeterminat it-telf reali ta’ bidwi individwali f’sena partikolari. L-Istati Membri jistgħu jiddeċiedu li jnaqqsu dak il-perċentwal ta’ 30 %, madankollu, għal mhux inqas minn 20 %.”; |
(7) |
fl-Artikolu 39, il-paragrafu 1 huwa sostitwit b’dan li ġej: “1. L-appoġġ taħt il-punt (c) tal-Artikolu 36(1) għandu jingħata biss fejn it-tnaqqis fl-introjtu jeċċedi 30 % tal-introjtu annwali medju tal-bidwi individwali fil-perijodu preċedenti ta’ tliet snin jew medja ta’ tliet snin ibbażata fuq il-perijodu preċedenti ta’ ħames snin esklużi l-ogħla entrata u dik l-iktar baxxa. L-introjtu għall-finijiet tal-punt (c) tal-Artikolu 36(1) għandu jirreferi għas-somma tad-dħul li l-bidwi jirċievi mis-suq, inkluż kwalunkwe forma ta’ appoġġ pubbliku, wara li jitnaqqsu l-ispejjeż tal-produzzjoni. Il-pagamenti mill-fond mutwu lill-bdiewa għandhom jikkumpensaw għal anqas minn 70 % tal-introjtu mitluf fis-sena li fiha l-produttur isir eliġibbli li jirċievi din l-assistenza. L-indiċijiet jistgħu jintużaw sabiex jiġi kkalkulat it-telf annwali ta’ introjtu tal-bidwi. L-Istati Membri jistgħu jiddeċiedu li jnaqqsu dak il-perċentwal ta’ 30 %, madankollu, għal mhux inqas minn 20 %.”; |
(8) |
fl-Artikolu 39b, il-paragrafu 4 huwa sostitwit b’dan li ġej: “4. L-appoġġ għandu jingħata bħala somma f’daqqa li għandha titħallas sal-31 ta’ Diċembru 2021, abbażi tal-applikazzjonijiet għal appoġġ approvati mill-awtorità kompetenti sat-30 ta’ Ġunju 2021. Ir-rimborż sussegwenti mill-Kummissjoni għandha ssir skont l-approprjazzjonijiet tal-baġit u suġġett għad-disponibblita’ ta’ fondi. Il-livell tal-pagament jista’ jvarja minn kategorija ta’ benefiċjarji għall-oħra, skont kriterji oġġettivi u mhux diskriminatorji.” |
(9) |
fl-Artikolu 42, il-paragrafu 1 huwa sostitwit b’dan li ġej: “1. Minbarra l-kompiti msemmija fl-Artikolu 34 tar-Regolament (UE) Nru 1303/2013 u fl-Artikolu 4 tar-Regolament (UE) 2020/2220, gruppi ta’ azzjoni lokali jistgħu wkoll iwettqu kompiti addizzjonali ddelegati lilhom mill-Awtorità ta’ Ġestjoni u/jew l-aġenzija tal-pagamenti.” |
(10) |
fl-Artikolu 51(2), jiżdied is-subparagrafu li ġej: “B’deroga mill-ewwel subparagrafu, l-Istati Membri li għalihom l-ammont totali ta’ appoġġ tal-Unjoni għall-iżvilupp rurali għas-snin 2014-2020 kif stabbilit fl-Anness I għal dan ir-Regolament huwa inqas minn EUR 1 800 miljun jistgħu, wara l-estensjoni tal-programmi tagħhom f’konformità mal-Artikolu 1 tar-Regolament (UE) 2020/2220, jiddeċiedu li jiddedikaw 5 % tal-ammont totali ta’ kull programm ta’ żvilupp rurali għall-kompiti msemmija fl-Artikolu 59 tar-Regolament (UE) Nru 1303/2013.”; |
(11) |
l-Artikolu 58 huwa emendat kif ġej:
|
(12) |
jiddaħħal Artikolu li ġej: “Artikolu 58a Riżorsi għall-irkupru tas-settur agrikolu u ż-żoni rurali tal-Unjoni 1. Il-punt (g) tal-Artikolu 1(2) tar-Regolament tal-Kunsill (UE) 2020/2094 (“ir-Regolament EURI”) (*) għandu jiġi implimentat f’konformità ma’ dan l-Artikolu permezz ta’ miżuri li huma eliġibbli taħt il-FAEŻR u li huma diretti lejn l-indirizzar tal-impatt tal-kriżi tal-COVID-19, b’ammont ta’ EUR 8 070 486 840 fi prezzijiet kurrenti tal-ammont imsemmi fil-punt (vi) tal-Artikolu 2(2)(a) ta’ dak ir-Regolament, soġġett għall-Artikolu 3(3), (4) u (8) tiegħu. Dak l-ammont ta’ EUR 8 070 486 840 fi prezzijiet kurrenti għandu jikkostitwixxi dħul assenjat estern skont l-Artikolu 21(5) tar-Regolament (UE, Euratom) 2018/1046 tal-Parlament Ewropew u tal-Kunsill (**). Dan għandu jsir disponibbli bħala riżorsi addizzjonali għall-impenn baġitarju taħt il-FAEŻR għas-snin 2021 u 2022, flimkien mar-riżorsi totali stabbiliti fl-Artikolu 58 ta’ dan ir-Regolament kif ġej:
Għall-fini ta’ dan ir-Regolament u r-Regolamenti (UE) Nru 1306/2013 u (UE) Nru 1307/2013, dawk ir-riżorsi addizzjonali għandhom jitqiesu bħala ammonti ta’ miżuri ta’ finanzjament taħt il-FAEŻR. Għandhom jitqiesu bħala parti mill-ammont totali tal-appoġġ tal-Unjoni għall-iżvilupp rurali, kif imsemmi fl-Artikolu 58(1) ta’ dan ir-Regolament, li miegħu għandhom jiżdiedu meta ssir referenza għall-ammont totali tal-appoġġ tal-Unjoni għall-iżvilupp rurali. L-Artikolu 14 tar-Regolament (UE) Nru 1307/2013 ma għandux japplika għar-riżorsi addizzjonali msemmija f’dan il-paragrafu u fil-paragrafu 2 ta’ dan l-Artikolu. 2. It-tqassim għal kull Stat Membru tar-riżorsi addizzjonali msemmija fil-paragrafu 1 ta’ dan l-Artikolu, wara tnaqqis tal-ammont imsemmi fil-paragrafu 7 ta’ dan l-Artikolu, huwa stabbilit fl-Anness Ia. 3. Il-livelli limiti perċentwali tal-kontribuzzjoni totali tal-FAEŻR għall-programm għall-iżvilupp rurali msemmi fl-Artikolu 59(5) u (6) ta’ dan ir-Regolament ma għandhomx japplikaw għar-riżorsi addizzjonali msemmija fil-paragrafu 1 ta’ dan l-Artikolu. Madankollu, l-Istati Membri għandhom jiżguraw li mill-inqas l-istess sehem globali tal-kontribuzzjoni tal-FAEŻR, inkluż ir-riżorsi addizzjonali msemmija fil-paragrafu 2 ta’ dan l-Artikolu, ikun riżervat f’kull programm għall-iżvilupp rurali għall-miżuri msemmija fl-Artikolu 59(6) ta’ dan ir-Regolament, f’konformità mal-Artikolu 1(2) tar-Regolament (UE) 2020/2220. 4. Mill-inqas 37 % tar-riżorsi addizzjonali msemmija fil-paragrafu 2 ta’ dan l-Artikolu għandhom ikunu riżervati f’kull programm għall-iżvilupp rurali għall-miżuri msemmija fl-Artikolu 33 u l-Artikolu 59(5) u (6), u b’mod partikolari għal:
5. Mill-inqas 55 % tar-riżorsi addizzjonali msemmija fil-paragrafu 2 ta’ dan l-Artikolu għandhom ikunu riżervati f’kull programm għall-iżvilupp rurali għall-miżuri msemmija fl-Artikoli 17, 19, 20 u 35, dment li l-użu deżinjat ta’ tali miżuri fil-programmi għall-iżvilupp rurali jippromwovi l-iżvilupp ekonomiku u soċjali fiż-żoni rurali, u jikkontribwixxi għal irkupru ekonomiku reżiljenti, sostenibbli u diġitali f’konformità, fost l-oħrajn, mal-objettivi agroambjentali klimatiċi segwiti skont dan ir-Regolament, u b’mod partikolari:
Meta jallokaw ir-riżorsi addizzjonali msemmija fil-paragrafu 2 ta’ dan l-Artikolu, l-Istati Membri jistgħu jiddeċiedu li jidderogaw mil-livell limitu perċentwali stabbilit fl-ewwel subparagrafu ta’ dan il-paragrafu sa fejn ikun meħtieġ biex jikkonformaw mal-prinċipju ta’ nonrigressjoni stabbilit fl-Artikolu 1(2) tar-Regolament (UE) 2020/2220. Madankollu, l-Istati Membri jistgħu minflok jiddeċiedu li jidderogaw minn dak il-prinċipju ta’ nonrigressjoni sal-punt meħtieġ biex jikkonformaw mal-livell limitu perċentwali stabbilit fl-ewwel subparagrafu ta’ dan il-paragrafu. 6. Sa 4 % tar-riżorsi addizzjonali totali msemmija fil-paragrafu 2 ta’ dan l-Artikolu jistgħu jiġu allokati lill-assistenza teknika, fuq l-inizjattiva tal-Istati Membri, għall-programmi għall-iżvilupp rurali skont l-Artikolu l-Artikolu 51(2). Dak il-limitu ta’ perċentwal jista’ jkun ta’ 5 % għal dawk l-Istati Membri li għalihom japplika r-raba’ subparagrafu tal-Artikolu 51(2). 7. Sa 0,25 % tar-riżorsi addizzjonali totali msemmija fil-paragrafu 1 ta’ dan l-Artikolu jistgħu jiġu allokati għall-assistenza teknika skont l-Artikolu 51(1). 8. L-impenji baġitarji relatati mar-riżorsi addizzjonali msemmija fil-paragrafi 1 u 2 ta’ dan l-Artikolu għandhom f’kull programm għall-iżvilupp rurali jsiru separatament mill-allokazzjoni msemmija fl-Artikolu 58(4). 9. L-Artikoli 20, 21 u 22 tar-Regolament (UE) Nru 1303/2013 ma għandhomx japplikaw għar-riżorsi addizzjonali totali msemmija fil-paragrafu 1 u 2 ta’ dan l-Artikolu. (*) Ir-Regolament (UE) 2020/2094 tal-14 ta’ Diċembru 2020 li jistabbilixxi Strument tal-Unjoni Ewropea għall-Irkupru biex jappoġġa l-irkupru wara l-kriżi tal-COVID-19 (ĠU L 433, 22.12.2020, p. 23)." (**) Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li tħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).”;" |
(13) |
l-Artikolu 59 huwa emendat kif ġej:
|
(14) |
l-Artikolu 75, il-paragrafu 1 huwa sostitwit b’dan li ġej: “1. Sat-30 ta’ Ġunju 2016 u sat-30 ta’ Ġunju ta’ kull sena sussegwenti sa u inkluż l-2026, l-Istat Membru għandu jippreżenta lill-Kummissjoni r-rapport annwali ta’ implimentazzjoni dwar l-implimentazzjoni tal-programm ta’ żvilupp rurali fis-sena kalendarja preċedenti. Ir-rapport ippreżentat fl-2016 għandu jkopri s-snin kalendarji 2014 u 2015.”; |
(15) |
l-Artikolu 78 huwa sostitwit b’dan li ġej: “Fl-2026, rapport ta’ evalwazzjoni ex post għandu jiġi mħejji mill-Istati Membri għal kull wieħed mill-programmi ta’ żvilupp rurali tagħhom. Dak ir-rapport għandu jiġi ppreżentat lill-Kummissjoni sal-31 ta’ Diċembru 2026.”; |
(16) |
l-Anness I huwa emendat f’konformità mal-Anness I għal dan ir-Regolament; |
(17) |
Jiddaħħal Anness Ia ġdid kif stabbilit fl-Anness II għal dan ir-Regolament; |
(18) |
L-Anness II huwa emendat kif ġej:
|
Artikolu 8
Emendi għar-Regolament (UE) Nru 1306/2013
Ir-Regolament (UE) Nru 1306/2013 huwa emendat kif ġej:
(1) |
fl-Artikolu 25, jiżdied is-subparagrafu li ġej: “Għal kull waħda mis-snin 2021 u 2022, l-ammont tar-riżerva għandu jkun EUR 400 miljun (bil-prezzijiet tal-2011) u għandu jiġi inkluż taħt l-Intestatura 3 tal-Qafas Finanzjarju Pluriennali kif stipulat fl-Anness għar-Regolament tal-Kunsill (UE) 2020/2093 (*) [QFP]. (*) Ir-Regolament tal-Kunsill (UE) 2020/2093 tas-17 ta’ Diċembru 2020 li jistabbilixxi l-qafas finanzjarju pluriennali għas-snin 2021 sal-2027 (ĠU L 433, 22.12.2020, p. 11).”;" |
(2) |
l-Artikolu 33 huwa sostitwit b’dan li ġej: “Artikolu 33 Impenji tal-baġit Fir-rigward tal-impenji tal-baġit tal-Unjoni għall-programmi ta’ żvilupp rurali, għandu japplika l-Artikolu 76 tar-Regolament (UE) Nru 1303/2013 u fejn applikabbli flimkien mal-Artikolu 2(2) tar-Regolament (UE) 2020/2220 tal-Parlament Ewropew u tal-Kunsill (*). (*) Ir-Regolament (UE) 2020/2220 tal-Parlament Ewropew u tal-Kunsill tat-23 ta’ Diċembru 2020 li jistabbilixxi ċerti dispożizzjonijiet tranżizzjonali għall-appoġġ mill-Fond Agrikolu Ewropew għall-Iżvilupp Rurali (FAEŻR) u mill-Fond Agrikolu Ewropew ta’ Garanzija (FAEG) fis-snin 2021 u 2022 u li jemenda r-Regolamenti (UE) Nru 1305/2013, (UE) Nru 1306/2013 u (UE) Nru 1307/2013 fir-rigward tar-riżorsi u l-applikazzjoni fis-snin 2021 u 2022 u r-Regolament (UE) Nru 1308/2013 fir-rigward tar-riżorsi u d-distribuzzjoni ta’ tali appoġġ fir-rigward tas-snin 2021 u 2022 (ĠU L437, 28.12.2020, p.1).”;" |
(3) |
fl-Artikolu 35, jiżdied il-paragrafu li ġej: “5. Għall-programmi estiżi f’konformità mal-Artikolu 1 tar-Regolament (UE) 2020/2220 ma għandu jingħata ebda prefinanzjament għall-allokazzjoni għall-2021 u l-2022 jew għar-riżorsi addizzjonali msemmija fl-Artikolu 58a(1) u (2) tar-Regolament (UE) Nru 1305/2013.”; |
(4) |
fl-Artikolu 36(3), jiżdied is-subparagrafu li ġej: “Il-punt (b) tal-ewwel subparagrafu għandu japplika, mutatis mutandis, għar-riżorsi addizzjonali msemmija fl-Artikolu 58a tar-Regolament (UE) Nru 1305/2013.”; |
(5) |
fl-Artikolu 37, il-paragrafu 1 huwa sostitwit b’dan li ġej: “1. Wara li tirċievi l-aħħar rapport ta’ progress annwali dwar l-implimentazzjoni ta’ programm ta’ żvilupp rurali, il-Kummissjoni għandha tħallas il-bilanċ, soġġett għad-disponibbiltà ta’ riżorsi, abbażi tal-pjan finanzjarju fis-seħħ, tal-kontijiet annwali għall-aħħar sena ta’ eżekuzzjoni għall-programm ta’ żvilupp rurali rilevanti u tad-deċiżjoni ta’ approvazzjoni korrispondenti. Dawk il-kontijiet għandhom jiġu ppreżentati lill-Kummissjoni mhux aktar tard minn sitt xhur wara d-data finali ta’ eliġibbiltà tal-infiq kif imsemmija fl-Artikolu 65(2) tar-Regolament (UE) Nru 1303/2013, u fejn applikabbli flimkien mal-Artikolu 2(2) tar-Regolament (UE) 2020/2220, u għandhom ikopru l-infiq magħmul mill-aġenzija tal-pagamenti sal-aħħar data ta’ eliġibbiltà tal-infiq.”; |
(6) |
fl-Artikolu 38, il-paragrafu 2 huwa sostitwit b’dan li ġej: “2. Il-parti tal-impenji tal-baġit li tkun għadha miftuħa fl-aħħar data ta’ eliġibbiltà tal-infiq kif imsemmi fl-Artikolu 65(2) tar-Regolament (UE) Nru 1303/2013, u fejn applikabbli flimkien mal-Artikolu 2(2) tar-Regolament (UE) 2020/2220, li dwarha ma tkunx saret dikjarazzjoni ta’ nfiq fi żmien sitt xhur wara dik id-data għandha tiġi diżimpenjata awtomatikament.”. |
Artikolu 9
Emendi għar-Regolament (UE) Nru 1307/2013
Ir-Regolament (UE) Nru 1307/2013 huwa emendat kif ġej:
(1) |
fl-Artikolu 11(6), jiżdied is-subparagrafu li ġej: “L-Istati Membri għandhom jinnotifikaw lill-Kummissjoni bid-deċiżjonijiet meħuda skont dan l-Artikolu u bi kwalunkwe prodott stmat tat-tnaqqis għas-sena 2021 sad-19 ta’ Frar 2021 u għas-sena 2022 sal-1 ta’ Awwissu 2021.”; |
(2) |
l-Artikolu 14 huwa emendat kif ġej:
|
(3) |
l-Artikolu 22 huwa emendat kif ġej:
|
(4) |
fl-Artikolu 23(6), jiżdied is-subparagrafu li ġej: “ L-Istati Membri li japplikaw l-ewwel subparagrafu tal-paragrafu 1 għandhom jinnotifikaw lill-Kummissjoni għas-sena kalendarja 2021 sad-19 ta’ Frar 2021 u għas-sena kalendarja 2022 sal-1 ta’ Awwissu 2021 bid-deċiżjonijiet imsemmija fil-paragrafi 2 u 3.”; |
(5) |
fl-Artikolu 25, jiżdiedu l-paragrafi li ġejjin: “11. Wara li jkunu applikaw l-aġġustament imsemmi fl-Artikolu 22(5), l-Istati Membri li jkunu użaw id-deroga prevista fil-paragrafu 4 ta’ dan l-Artikolu jistgħu jiddeċiedu li d-drittijiet għall-pagament li kellhom il-bdiewa fil-31 ta’ Diċembru 2019 li jkollhom valur aktar baxx mill-valur tal-unità nazzjonali jew reġjonali fl-2020 kif ikkalkulat f’konformità mat-tieni subparagrafu ta’ dan il-paragrafu jiżdidilhom il-valur ta’ unità tagħhom għall-valur ta’ unità nazzjonali jew reġjonali għall-2020. Iż-żieda għandha tiġi kkalkulata skont il-kundizzjonijiet li ġejjin:
12. Għas-snin kalendarji 2021 u 2022, l-Istati Membri jistgħu jiddeċiedu li japplikaw aktar konverġenza interna billi japplikaw il-paragrafu 11 għas-sena kkonċernata.”; |
(6) |
fl-Artikolu 29, jiżdied il-paragrafu li ġej: “Għas-snin kalendarji 2020 u 2021, l-Istati Membri għandhom jinnotifikaw lill-Kummissjoni bid-deċiżjonijiet tagħhom imsemmija fl-Artikoli 25(11) u (12) sad-19 ta’ Frar 2021. Għas-sena kalendarja 2022, l-Istati Membri għandhom jinnotifikaw lill-Kummissjoni bid-deċiżjoni tagħhom imsemmija fl-Artikolu 25(12) sal-1 ta’ Awwissu 2021.”; |
(7) |
fl-Artikolu 30(8), jiżdied is-subparagrafu li ġej: “Għal allokazzjonijiet mir-riżerva nazzjonali jew riżervi reġjonali fl-2021 u l-2022, l-ammont tar-riżerva nazzjonali jew riżervi reġjonali li għandhom jiġu esklużi skont it-tieni subparagrafu ta’ dan il-paragrafu għandu jiġi aġġustat skont it-tieni subparagrafu tal-Artikolu 22(5). Għal allokazzjonijiet mir-riżerva nazzjonali jew riżervi reġjonali fl-2021 u l-2022, it-tielet subparagrafu ta’ dan il-paragrafu ma għandux japplika.”; |
(8) |
l-Artikolu 36 huwa emendat kif ġej:
|
(9) |
l-Artikolu 37(1) huwa emendat kif ġej:
|
(10) |
fl-Artikolu 41, il-paragrafu 1 huwa sostitwit b’dan li ġej: “1. L-Istati Membri jistgħu jiddeċiedu sal-1 ta’ Awwissu ta’ kwalunkwe sena partikolari, li jagħtu, mis-sena ta’ wara, pagament annwali lill-bdiewa li huma intitolati għal pagament taħt l-iskema ta’ pagament bażiku msemmi fit-Taqsimiet 1, 2, 3 u 5 tal-Kapitolu 1 jew taħt l-iskema ta’ pagament uniku skont l-erja msemmija fit-Taqsima 4 tal-Kapitolu 1 (“il-pagament ridistributtiv”). L-Istati Membri jistgħu jieħdu tali deċiżjoni sad-19 ta’ Frar 2021 għas-sena kalendarja 2021 u sal-1 ta’ Awwissu 2021 għas-sena kalendarja 2022. L-Istati Membri li diġà qed japplikaw il-pagament ridistributtiv jistgħu jagħmlu reviżjoni tad-deċiżjoni tagħhom li jagħtu tali pagament jew id-dettalji tal-iskema sad-19 ta’ Frar 2021 għas-sena kalendarja 2021 u sal-1 ta’ Awwissu 2021 għas-sena kalendarja 2022. L-Istati Membri għandhom jinnotifikaw lill-Kummissjoni bi kwalunkwe deċiżjoni ta’dan it-tip sad-data rilevanti msemmija fl-ewwel subparagrafu.”; |
(11) |
fl-Artikolu 42(1), jiżdied is-subparagrafu li ġej: “L-Istati Membri għandhom jinnotifikaw lill-Kummissjoni bil-perċentwal imsemmi fl-ewwel subparagrafu sad-19 ta’ Frar 2021 għas-sena kalendarja 2021 u sal-1 ta’ Awwissu 2021 għas-sena kalendarja 2022.”; |
(12) |
fl-Artikolu 49(1), jiżdied is-subparagrafu li ġej: “L-Istati Membri li jagħtu pagamenti f’konformità mal-Artikolu 48 fis-sena kalendarja 2020 għandhom jinnotifikaw lill-Kummissjoni bil-perċentwal imsemmi fl-ewwel subparagrafu sad-19 ta’ Frar 2021 għas-sena kalendarja 2021 u sal-1 ta’ Awwissu 2021 għas-sena kalendarja 2022.”; |
(13) |
fl-Artikolu 51(1), l-ewwel subparagrafu huwa sostitwit b’dan li ġej: “1. Sabiex jiffinanzjaw il-pagament tal-bdiewa żgħażagħ, l-Istati Membri għandhom jużaw perċentwal, li ma għandux ikun ogħla minn 2 % tal-limitu massimu nazzjonali annwali stabbilit fl-Anness II. L-Istati Membri għandhom jinnotifikaw lill-Kummissjoni, sal-1 ta’ Awwissu 2014, bl-istima tal-perċentwal meħtieġ biex jiffinanzjaw dak il-pagament. Sad-19 ta’ Frar 2021, l-Istati Membri għandhom jinnotifikaw lill-Kummissjoni bil-perċentwal stmat meħtieġ għall-finanzjament ta’ dak il-pagament għas-snin kalendarji 2021 u 2022.”; |
(14) |
fl-Artikolu 52, il-paragrafu 10 huwa sostitwit b’dan li ġej: “10. Il-Kummissjoni għandha s-setgħa li tadotta atti delegati f’konformità mal-Artikolu 70 li jissupplimentaw dan ir-Regolament fir-rigward ta’ miżuri sabiex jiġi evitat li l-benefiċjarji ta’ appoġġ akkoppjat volontarju jsofru minn żbilanċi strutturali tas-suq f’settur. Dawk l-atti delegati jistgħu jippermettu lill-Istati Membru jiddeċiedu li tali appoġġ jista’ jkompli jitħallas sal-2022 fuq il-bażi tal-unitajiet tal-produzzjoni li għalihom ingħata appoġġ akkoppjat volontarju f’perijodu ta’ referenza fl-imgħoddi.”; |
(15) |
l-Artikolu 53 huwa emendat kif ġej:
|
(16) |
l-Artikolu 54, il-paragrafu 1 huwa sostitwit b’dan li ġej: “1. L-Istati Membri għandhom jinnotifikaw lill-Kummissjoni bid-deċiżjonijiet msemmija fl-Artikolu 53 sad-dati msemmija f’dak l-Artikolu. Ħlief għad-deċiżjoni msemmija fil-punt (c) tar-raba’ subparagrafu tal-Artikolu 53(6), in-notifika għandha tinkludi informazzjoni dwar ir-reġjuni mmirati, it-tipi ta’ biedja jew setturi magħżulin, u l-livell ta’ appoġġ li għandu jingħata. In-notifiki tad-deċiżjonijiet imsemmija fl-Artikolu 53(1) tad-deċiżjoni msemmija fit-tielet subparagrafu tal-Artikolu 53(6) għandhom jinkludu wkoll il-perċentwal tal-limitu massimu nazzjonali msemmi fl-Artikolu 53 għas-sena kalendarja rilevanti.”; |
(17) |
fl-Artikolu 58, il-paragrafu 3 huwa sostitwit b’dan li ġej: “3. L-ammont tal-pagament speċifiku għall-għelejjel għall-qoton għal kull ettaru ta’ erja eliġibbli għandu jkun ikkalkulat għall-2020 billi r-rendimenti stabbiliti fil-paragrafu 2 jiġu mmultiplikati bl-ammonti ta’ referenza li ġejjin:
L-ammont tal-pagament speċifiku għall-għelejjel għall-qoton għal kull ettaru ta’ erja eliġibbli għandu jkun ikkalkulat għall-2021 u l-2022 billi r-rendimenti stabbiliti fil-paragrafu 2 jiġu mmultiplikati bl-ammonti ta’ referenza li ġejjin:
|
(18) |
l-Annessi II u III huma emendati f’konformità mal-Anness III għal dan ir-Regolament. |
Artikolu 10
Emendi għar-Regolament (UE) Nru 1308/2013
Ir-Regolament (UE) Nru 1308/2013 huwa emendat kif ġej:
(1) |
l-Artikolu 29 huwa emendat kif ġej:
|
(2) |
fl-Artikolu 33(1), jiżdiedu s-subparagrafi li ġejjin: “Il-programmi operazzjonali li għalihom estensjoni f’konformità mal-perijodu massimu ta’ ħames snin imsemmi fl-ewwel subparagrafu trid tiġi approvata wara d-29 ta’ Diċembru 2020 jistgħu jiġu estiżi biss sal-31 ta’ Diċembru 2022. B’deroga mill-ewwel subparagrafu, il-programmi operazzjonali ġodda li jiġu approvati wara d-29 ta’ Diċembru 2020 għandu jkollhom tul ta’ żmien massimu ta’ tliet snin.”; |
(3) |
fl-Artikolu 55(1), jiżdied is-subparagrafu li ġej: “B’deroga mill-ewwel subparagrafu, il-programmi nazzjonali mfassla għall-perijodu mill-1 ta’ Awwissu 2019 sal-31 ta’ Lulju 2022 għandhom jiġu estiżi sal-31 ta’ Diċembru 2022. L-Istati Membri għandhom jimmodifikaw il-programmi nazzjonali tagħhom biex jieħdu kont ta’ dik l-estensjoni u għandhom jinnotifikaw il-programmi modifikati lill-Kummissjoni għall-approvazzjoni tagħhom.”; |
(4) |
fl-Artikolu 58, il-paragrafu 2 huwa sostitwit b’dan li ġej: “2. Il-finanzjament tal-Unjoni għall-għajnuna lill-organizzazzjonijiet tal-produtturi previst fil-paragrafu 1 għall-2020 għandu jkun EUR 2 277 000 għall-Ġermanja. Il-finanzjament tal-Unjoni għall-għajnuna lill-organizzazzjonijiet tal-produtturi previst fil-paragrafu 1 għal kull waħda mis-snin 2021 u 2022 għandu jkun EUR 2 188 000 għall-Ġermanja.”; |
(5) |
fl-Artikolu 62(3), jiżdiedu s-subparagrafi li ġejjin: “B’deroga mill-ewwel subparagrafu, il-validità tal-awtorizzazzjonijiet mogħtija skont l-Artikolu 64 u l-Artikolu 66(1), li tiskadi fis-sena 2020, hija estiża sal-31 ta’ Diċembru 2021. Il-produtturi li jkollhom awtorizzazzjonijiet skont l-Artikolu 64 u l-Artikolu 66(1) ta’ dan ir-Regolament, li jiskadu fl-2020, ma għandhomx, b’deroga mill-ewwel subparagrafu ta’ dan il-paragrafu, ikunu soġġetti għall-penali amministrattiva msemmija fl-Artikolu 89(4) tar-Regolament (UE) Nru 1306/2013 dment li jinfurmaw lill-awtoritajiet kompetenti sat-28 ta’ Frar 2021 li ma għandhomx l-intenzjoni li jagħmlu użu mill-awtorizzazzjoni tagħhom u ma jixtiqux jibbenefikaw mill-estensjoni tal-validità tagħhom kif imsemmi fit-tieni subparagrafu ta’ dan il-paragrafu.”; |
(6) |
l-Artikolu 68 huwa emendat kif ġej:
|
(7) |
l-Artikolu li ġej jiddaħħal fl-aħħar tat-Titolu II, Kapitolu III, Taqsima 4: “Artikolu 167a Regoli għall-kummerċjalizzazzjoni biex itejbu u jistabbilizzaw l-operazzjoni tas-suq komuni fiż-żjut taż-żebbuġa 1. Sabiex tittejjeb u tiġi stabbilizzata l-operazzjoni tas-suq komuni fiż-żjut taż-żebbuġa, inkluż iż-żebbuġ li minnhom jiġu ż-żjut, l-Istati Membri produtturi jistgħu jistabbilixxu regoli tal-kummerċjalizzazzjoni biex jirregolaw il-provvista. Dawn ir-regoli għandhom ikunu proporzjonati għall-objettiv segwit u ma għandhomx:
2. Ir-regoli previsti fil-paragrafu 1 għandhom jinġiebu għall-attenzjoni tal-operaturi permezz tal-pubblikazzjoni kompluta tagħhom f’pubblikazzjoni uffiċjali tal-Istat Membru kkonċernat. 3. L-Istati Membri għandhom jinnotifikaw lill-Kummissjoni bi kwalunkwe deċiżjoni meħuda skont dan l-Artikolu.”; |
(8) |
fl-Artikolu 211, jiżdied il-paragrafu li ġej: “3. B’deroga mill-paragrafu 1 ta’ dan l-Artikolu, l-Artikoli 107, 108 u 109 TFUE ma għandhomx japplikaw għall-miżuri fiskali nazzjonali fejn l-Istati Membri jiddeċiedu li jiddevjaw mir-regoli fiskali ġenerali billi jippermettu li l-bażi tat-taxxa fuq l-introjtu applikata għall-bdiewa tiġi kkalkolata fuq il-bażi ta’ perijodu pluriennali bil-ħsieb li tiġi bbilanċjata l-bażi tat-taxxa fuq ċertu numru ta’ snin.”; |
(9) |
fl-Artikolu 214a, jiżdied il-paragrafu li ġej: “Fl-2021 u l-2022, il-Finlandja tista’ tkompli tagħti l-għajnuniet nazzjonali msemmija fl-ewwel paragrafu soġġett għall-istess kundizzjonijiet u ammonti kif awtorizzati mill-Kummissjoni għall-2020.”; |
(10) |
l-Anness VI huwa sostitwit bit-test stabbilit fl-Anness IV għal dan ir-Regolament. |
TITOLU III
DISPOŻIZZJONIJIET FINALI
Artikolu 11
Dħul fis-seħħ u applikazzjoni
Dan ir-Regolament għandu jidħol fis-seħħ fil- jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Il-punt 5 tal-Artikolu 9 (dwar l-Artikolu 25(11) tar-Regolament (UE) Nru 1307/2013) u l-punt (5) tal-Artikolu 10 (dwar l-Artikolu 62(3) tar-Regolament (UE) Nru 1308/2013) għandhom japplikaw mill-1 ta’ Jannar 2020.
B’deroga mill-ewwel paragrafu ta’ dan l-Artikolu, il-punt 12, il-punt (a) tal-punt 13 u l-punti 17 u 18 tal-Artikolu 7 għandhom jidħlu fis-seħħ fid-data tad-dħul fis-seħħ tar-Regolament EURI. Il-punt 12, il-punt (a) tal-punt 13 u l-punti 17 u 18 għandhom japplikaw mill-1 ta’ Jannar 2021.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-23 ta’ Diċembru 2020.
Għall-Parlament Ewropew
Il-President
D. M. SASSOLI
Għall-Kunsill
Il-President
M. ROTH
(1) ĠU C 232, 14.7.2020, p. 29.
(3) Il-Pożizzjoni tal-Parlament Ewropew tas-16 ta’ Diċembru 2020 (għadha ma ġietx ippubblikata f’Il-Ġurnal Uffiċjali) u d-Deċiżjoni tal-Kunsill tat-22 ta’ Diċembru 2020.
(4) Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Ewropew għall-Affarijiet Marittimi u s-Sajd u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (ĠU L 347, 20.12.2013, p. 320).
(5) Ir-Regolament (UE) Nru 1305/2013 tal-Parlament Ewropew u tal-Kunsill tas-17 ta’ Diċembru 2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u li jħassar ir-Regolament tal-Kunsill (KE) Nru 1698/2005 (ĠU L 347, 20.12.2013, p. 487).
(6) Ir-Regolament (UE) Nru 1306/2013 tal-Parlament Ewropew u tal-Kunsill tas-17 ta’ Diċembru 2013 dwar il-finanzjament, il-ġestjoni u l-monitoraġġ tal-politika agrikola komuni u li jħassar ir-Regolamenti tal-Kunsill (KEE) Nru 352/78, (KE) Nru 165/94, (KE) Nru 2799/98, (KE) Nru 814/2000, (KE) Nru 1290/2005 u (KE) Nru 485/2008 (ĠU L 347, 20.12.2013, p. 549).
(7) Ir-Regolament (UE) Nru 1307/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi regoli għal pagamenti diretti lill-bdiewa taħt skemi ta’ appoġġ fil-qafas tal-politika agrikola komuni u li jħassar ir-Regolament tal-Kunsill (KE) Nru 637/2008 u r-Regolament tal-Kunsill (KE) Nru 73/2009 (ĠU L 347, 20.12.2013, p. 608).
(8) Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, p. 671).
(9) Ir-Regolament (UE) Nru 1310/2013 tal-Parlament Ewropew u tal-Kunsill 17 ta’ Diċembru 2013 li jistabbilixxi ċerti dispożizzjonijiet tranżizzjonali dwar l-appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR), li jemenda r-Regolament (UE) Nru 1305/2013 tal-Parlament Ewropew u tal-Kunsill rigward ir-riżorsi u d-distribuzzjoni tagħhom fir-rigward tas-sena 2014 u li jemenda r-Regolament tal-Kunsill (KE) Nru 73/2009 u r-Regolamenti (UE) Nru 1307/2013, (UE) Nru 1306/2013 u (UE) Nru 1308/2013 tal-Parlament Ewropew u tal-Kunsill fir-rigward tal-applikazzjoni tagħhom fis-sena 2014 (ĠU L 347, 20.12.2013, p. 865).
(10) Ir-Regolament Delegat tal-Kummissjoni (UE) Nru 807/2014 tal-11 ta’ Marzu 2014 li jissupplimenta r-Regolament (UE) Nru 1305/2013 tal-Parlament Ewropew u tal-Kunsill dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) u li jintroduċi dispożizzjonijiet tranżizzjonali (ĠU L 227, 31.7.2014, p. 1).
(11) Ir-Regolament (UE) 2017/2393 tal-Parlament Ewropew u tal-Kunsill tat-13 ta’ Diċembru 2017 li jemenda r-Regolamenti (UE) Nru 1305/2013 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR), (UE) Nru 1306/2013 dwar il-finanzjament, il-ġestjoni u l-monitoraġġ tal-politika agrikola komuni, (UE) Nru 1307/2013 li jistabbilixxi regoli għal pagamenti diretti lill-bdiewa taħt skemi ta’ appoġġ fil-qafas tal-politika agrikola komuni, (UE) Nru 1308/2013 li jistabbilixxi organizzazzjoni komuni tas-swieq fi prodotti agrikoli u (UE) Nru 652/2014 li jistabbilixxi dispożizzjonijiet għall-ġestjoni tan-nefqa marbuta mal-katina alimentari, mas-saħħa tal-annimali u mat-trattament xieraq tal-annimali, u marbuta mas-saħħa tal-pjanti u mal-materjal riproduttiv tal-pjanti (ĠU L 350, 29.12.2017, p. 15).
(12) Ir-Regolament tal-Kunsill (UE) 2020/2094 tal-14 ta’ Diċembru 2020 li jistabbilixxi Strument tal-Unjoni Ewropea għall-Irkupru biex jappoġġa l-irkupru wara l-kriżi tal-COVID-19 (ĠU L 433, 22.12.2020, p. 23).
(13) Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).
(14) Regolament tal-Kunsill (KE) Nru 1698/2005 tal-20 ta’ Settembru 2005 dwar appoġġ għall-iżvilupp rurali mill-Fond Agrikolu Ewropew għall-Iżvilupp Rurali (FAEŻR) (ĠU L 277, 21.10.2005, p. 1).
(15) Ir-Regolament tal-Kunsill (KE) Nru 1257/1999 tas-17 ta’ Mejju 1999 dwar is-sostenn għal żvilupp rurali mill-Fond Agrikolu Ewropew għall-Gwida u Garanzija (FAEGG) u jemenda u jħassar ċerti Regolamenti (ĠU L 160, 26.6.1999, p. 80).
ANNESS I
L-Anness I għar-Regolament (UE) Nru 1305/2013 huwa emendat kif ġej:
(1) |
it-titolu huwa sostitwit b’dan li ġej: “ L-EWWEL PARTI: TQASSIM TAL-APPOĠĠ TAL-UNJONI GĦALL-IŻVILUPP RURALI (2014 SA 2020) ”; |
(2) |
jiżdiedu t-titolu u t-tabella li ġejjin: “ IT-TIENI PARTI: TQASSIM TAL-APPOĠĠ TAL-UNJONI GĦALL-IŻVILUPP RURALI (2021 U 2022) (prezzijiet kurrenti f’EUR)
|
ANNESS II
Anness Ia għar-Regolament (UE) Nru 1305/2013 huwa mdaħħal kif ġej:
“ANNESS Ia
TQASSIM TAR-RIŻORSI ADDIZZJONALI GĦAL KULL STAT MEMBRU KIF IMSEMMI FL-ARTIKOLU 58 A
(prezzijiet kurrenti, f’EUR)
|
2021 |
2022 |
Belġju |
14 246 948 |
33 907 737 |
Bulgarija |
59 744 633 |
142 192 228 |
Ċekja |
54 879 960 |
130 614 305 |
Danimarka |
16 078 147 |
38 265 991 |
Ġermanja |
209 940 765 |
499 659 020 |
Estonja |
18 636 494 |
44 354 855 |
Irlanda |
56 130 739 |
133 591 159 |
Greċja |
108 072 886 |
257 213 470 |
Spanja |
212 332 550 |
505 351 469 |
Franza |
256 456 603 |
610 366 714 |
Kroazja |
59 666 188 |
142 005 526 |
Italja |
269 404 179 |
641 181 947 |
Ċipru |
3 390 542 |
8 069 491 |
Latvja |
24 878 226 |
59 210 178 |
Litwanja |
41 393 810 |
98 517 267 |
Lussemburgu |
2 606 635 |
6 203 790 |
Ungerija |
88 267 157 |
210 075 834 |
Malta |
2 588 898 |
6 161 577 |
Netherlands |
15 513 719 |
36 922 650 |
Awstrija |
101 896 221 |
242 513 006 |
Polonja |
279 494 858 |
665 197 761 |
Portugall |
104 599 747 |
248 947 399 |
Rumanija |
204 761 482 |
487 332 328 |
Slovenja |
21 684 662 |
51 609 495 |
Slovakkja |
48 286 370 |
114 921 561 |
Finlandja |
61 931 116 |
147 396 056 |
Żvezja |
44 865 170 |
106 779 104 |
Total UE-27 |
2 381 748 705 |
5 668 561 918 |
Assistenza Teknika (0,25 %) |
5 969 295 |
14 206 922 |
Total |
2 387 718 000 |
5 682 768 840 |
ANNESS III
L-Annessi II u III għar-Regolament (UE) Nru 1307/2013 huma emendati kif ġej:
(1) |
fl-Anness II, jiżdiedu l-kolonni li ġejjin:
|
(2) |
fl-Anness III, jiżdiedu l-kolonni li ġejjin:
|
ANNESS IV
L-Anness VI għar-Regolament (UE) Nru 1308/2013 huwa sostitwit b’dan li ġej:
“ANNESS VI
LIMITI BAĠITARJI GĦALL-PROGRAMMI TA’ APPOĠĠ IMSEMMIJA FL-ARTIKOLU 44(1)
f’eluf ta’ euro kull sena tal-baġit |
|||||
|
2014 |
2015 |
2016 |
2017-2020 |
mill-2021 ’il quddiem |
Bulgarija |
26 762 |
26 762 |
26 762 |
26 762 |
25 721 |
Ċekja |
5 155 |
5 155 |
5 155 |
5 155 |
4 954 |
Ġermanja |
38 895 |
38 895 |
38 895 |
38 895 |
37 381 |
Greċja |
23 963 |
23 963 |
23 963 |
23 963 |
23 030 |
Spanja |
353 081 |
210 332 |
210 332 |
210 332 |
202 147 |
Franza |
280 545 |
280 545 |
280 545 |
280 545 |
269 628 |
Kroazja |
11 885 |
11 885 |
11 885 |
10 832 |
10 410 |
Italja |
336 997 |
336 997 |
336 997 |
336 997 |
323 883 |
Ċipru |
4 646 |
4 646 |
4 646 |
4 646 |
4 465 |
Litwanja |
45 |
45 |
45 |
45 |
43 |
Lussemburgu |
588 |
— |
— |
— |
— |
Ungerija |
29 103 |
29 103 |
29 103 |
29 103 |
27 970 |
Malta |
402 |
— |
— |
— |
— |
Awstrija |
13 688 |
13 688 |
13 688 |
13 688 |
13 155 |
Portugall |
65 208 |
65 208 |
65 208 |
65 208 |
62 670 |
Rumanija |
47 700 |
47 700 |
47 700 |
47 700 |
45 844 |
Slovenja |
5 045 |
5 045 |
5 045 |
5 045 |
4 849 |
Slovakkja |
5 085 |
5 085 |
5 085 |
5 085 |
4 887 |
Renju Unit |
120 |
— |
— |
— |
— |