IR-REGOLAMENT TAL-KUNSILL (UE) 2020/2132

tas-17 ta’ Diċembru 2020

li jemenda r-Regolament (UE) 2020/123 fir-rigward ta’ opportunitajiet tas-sajd għall-merluzz tan-Norveġja fl-2020

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43(3) tiegħu,

Wara li kkunsidra l-proposta tal-Kummissjoni Ewropea,

Billi:

(1)

Ir-Regolament tal-Kunsill (UE) 2020/123 (1) jistabbilixxi l-opportunitajiet tas-sajd għall-2020 għal ċerti stokkijiet tal-ħut u gruppi ta’ stokkijiet tal-ħut applikabbli fl-ilmijiet tal-Unjoni u, fil-każ ta’ bastimenti tal-Unjoni, f’ċerti ilmijiet mhux tal-Unjoni. Huwa stabbilixxa opportunitajiet tas-sajd sal-31 ta’ Ottubru 2020 għall-merluzz tan-Norveġja u qabdiet aċċessorji assoċjati fl-ilmijiet tad-diviżjoni 3a tal-Kunsill Internazzjonali għall-Esplorazzjoni tal-Baħar (ICES) u fl-ilmijiet tal-Unjoni tad-diviżjoni 2a tal-ICES u tas-subżona 4 tal-ICES.

(2)

Ir-Regolament tal-Kunsill (UE) 2020/1579 (2) emenda r-Regolament (UE) 2020/123 biex jistabbilixxi opportunitajiet preliminari tas-sajd li jkopru l-perjodu mill-1 ta’ Novembru 2020 sal-31 ta’ Diċembru 2020 għall-merluzz tan-Norveġja u qabdiet aċċessorji assoċjati fl-ilmijiet tad-diviżjoni 3a tal-ICES u fl-ilmijiet tal-Unjoni tad-diviżjoni 2a tal-ICES u tas-subżona 4 tal-ICES (‘opportunitajiet tas-sajd preliminari’).

(3)	Billi l-opportunitajiet tas-sajd preliminari jkopru biss xahrejn tas-sena tas-sajd, li tibda fl-1 ta’ Novembru u tispiċċa fil-31 ta’ Ottubru, dawn ġew stabbiliti ferm taħt il-parir dwar il-qbid annwali ipprovdut mill-ICES.

(4)

L-istaġun tas-sajd għall-merluzz tan-Norveġja normalment jestendi minn Settembru sa Jannar b’quċċata minn Ottubru sa Diċembru. L-aktar data reċenti dwar il-qabdiet li ġiet ippreżentata lill-Kummissjoni tindika li f’Ottubru 2020 nqabdu aktar minn 21 000 tunnellata ta’ merluzz tan-Norveġja. L-istrapolazzjoni ta’ dawk in-numri skont ix-xejriet storiċi tas-sajd tal-merluzz tan-Norveġja tindika li l-opportunitajiet tas-sajd preliminari aktarx li dalwaqt jiġu eżawriti u għalhekk ma jkunux suffiċjenti biex ikopru l-attività tas-sajd sa tmiem is-sena, huwa għaldaqstant xieraq li jiġu aġġustati l-opportunitajiet tas-sajd preliminari skont l-aktar stimi riċenti, filwaqt li jiġi rispettat bis-sħiħ il-parir tal-ICES.

(5)	Għalhekk, jenħtieġ li r-Regolament (UE) 2020/123 jiġi emendat skont dan.

(6)	Jenħtieġ li l-opportunitajiet tas-sajd preliminari aġġustati japplikaw mill-1 ta’ Novembru. Tali applikazzjoni retroattiva ma taffettwax il-prinċipji taċ-ċertezza legali u tal-protezzjoni tal-aspettattivi leġittimi billi l-opportunitajiet tas-sajd ikkonċernati żdiedu.

(7)	Billi dawk l-opportunitajiet tas-sajd prelminari jkopru l-perjodu mill-1 ta’ Novembru sal-31 ta’ Diċembru 2020, jenħtieġ li dan ir-Regolament jidħol fis-seħħ immedjatament wara l-pubblikazzjoni tiegħu.

(8)	Ir-Renju Unit ġie kkonsultat f’konformità mal-Artikolu 130(1) tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (3),

ADOTTA DAN IR-REGOLAMENT:

Artikolu 1

Emenda għar-Regolament (UE) 2020/123

Ir-Regolament (UE) 2020/123 huwa emendat f’konformità mal-Anness għal dan ir-Regolament.

Artikolu 2

Dħul fis-seħħ u perjodu ta’ applikazzjoni

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Novembru 2020 sal-31 ta’ Diċembru 2020.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-17 ta’ Diċembru 2020.

Għall-Kunsill

Il-President

S. SCHULZE

(1) Ir-Regolament tal-Kunsill (UE) 2020/123 tas-27 ta’ Jannar 2020 li jistabbilixxi għall-2020 l-opportunitajiet tas-sajd għal ċerti stokkijiet tal-ħut u ċerti gruppi ta’ stokkijiet tal-ħut, applikabbli fl-ilmijiet tal-Unjoni u, għal bastimenti tas-sajd tal-Unjoni, f’ċerti ilmijiet mhux tal-Unjoni (ĠU L 25, 30.1.2020, p. 1).

(2) Ir-Regolament tal-Kunsill (UE) 2020/1579 tad-29 ta’ Ottubru 2020 li jistabbilixxi l-opportunitajiet tas-sajd għall-2021 għal ċerti stokkijiet ta’ ħut u gruppi ta’ stokkijiet ta’ ħut applikabbli fil-Baħar Baltiku u li jemenda r-Regolament (UE) 2020/123 fir-rigward ta’ ċerti opportunitajiet ta’ sajd f’ilmijiet oħra (ĠU L 362, 30.10.2020, p. 3).

(3) ĠU L 29, 31.1.2020, p. 7.

ANNESS

Fl-Anness IA għar-Regolament (UE) 2020/123, it-tabella tal-Opportunitajiet tas-sajd għall-Merluzz tan-Norveġja u qabdiet aċċessorji assoċjati fid-diviżjoni3a tal-ICES u l-ilmijiet tal-Unjoni tad-diviżjoni 2a tal-ICES u s-subżona 4 tal-ICES hija sostitwita b’dan li ġej:

“Speċi:	Il-merluzz tan-Norveġja u l-qabdiet aċċessorji assoċjati				Żona:	3a; l-ilmijiet tal-Unjoni taż-żoni 2a u 4
	Trisopterus esmarkii				Żona:	(NOP/2A3A4)
Perjodu	1 ta’ Novembru 2019–31 ta’ Ottubru2020		1 ta’ Novembru 2020–31 ta’ Diċembru 2020			TAC analitiku
Danimarka	72 433	(()) ((**))	49 953	(()) ((*****))		L-Artikolu 3 tar-Regolament (KE) Nru 847/96 ma għandux japplika
Ġermanja	14	(()) (()) ((**))	10	(()) (()) ((*****))		L-Artikolu 4 tar-Regolament (KE) Nru 847/96 ma għandux japplika
Netherlands	53	(()) (()) ((**))	37	(()) (()) ((*****))
Unjoni	72 500	(()) ((**))	50 000	(()) ((*****))
Norveġja	14 500	((****))	pm
Gżejjer Faeroe	5 000	((*****))	pm
TAC	Mhux rilevanti		Mhux rilevanti

((*)) Sa 5 % mill-kwota jista’ jikkonsisti minn qabdiet aċċessorji tal-merluzz tal-linja sewda u tal-merlangu (OT2/*2A3A4). Qabdiet aċċessorji ta’ merluzz tal-linja sewda u merlangu magħduda mal-kwota ta’ din id-dispożizzjoni u qabdiet aċċessorji ta’ speċi magħduda mal-kwota skont l-Artikolu 15(8) tar-Regolament (UE) Nru 1380/2013 flimkien, m’għandhomx jaqbżu 9 % tal-kwota.

((**)) Il-kwota tista’ tinqabad biss fl-ilmijiet tal-Unjoni taż-żoni 2a, 3a u 4 tal-ICES.

((***)) Il-kwota tal-Unjoni tista’ tinqabad biss mill-1 ta’ Novembru 2019 sal-31 ta’ Ottubru 2020.

((****)) Għandu jintuża għarbiel.

((*****)) Għandu jintuża għarbiel. Din il-kwota tinkludi ammont massimu ta’ 15 % ta’ qabdiet inċidentali li ma jistgħux jiġu evitati (NOP/*2A3A4) u li jridu jingħaddu ma’ din il-kwota.

((******)) Il-kwota tal-Unjoni tista’ tiġi mistada mill-1 ta’ Novembru 2020 sal-31 ta’ Diċembru 2020.”