(1)

Ir-Regolament tal-Kummissjoni (KE) Nru 1881/2006 (2) jiffissa l-livelli massimi ta’ ċerti kontaminanti fl-oġġetti tal-ikel.

(2)

Fit-8 ta’ Novembru 2011, il-Bord Xjentifiku dwar Kontaminanti fil-Katina tal-Ikel (il-Bord CONTAM) tal-Awtorità Ewropea dwar is-Sigurtà fl-Ikel (“l-Awtorità”) adotta opinjoni xjentifika dwar ir-riskji għas-saħħa pubblika relatati mal-preżenza tal-alkalojdi pirroliżidiniċi fl-ikel u fl-għalf (3). Il-Bord CONTAM ikkonkluda li l-alkalojdi pirroliżidiniċi 1,2 mhux saturati jistgħu jaġixxu bħala karċinoġeni ġenotossiċi fil-bnedmin. Il-Bord CONTAM ikkonkluda li hemm tħassib possibbli dwar is-saħħa għal dawk it-trabi li telqu jimxu u għat-tfal li jikkunsmaw ħafna l-għasel. Minbarra l-għasel, hemm sorsi oħra possibbli tal-esponiment djetetiku għall-alkalojdi pirroliżidiniċi, li l-Bord CONTAM ma setax jikkwantifika minħabba n-nuqqas ta’ data. Waslet għall-konklużjoni li, għalkemm ma kienet disponibbli l-ebda data ta’ okkorrenza, l-esponiment għall-alkalojdi pirroliżidiniċi minn għabra tad-dakra, te, infużjonijiet erbali u supplimenti tad-dieta erbali jista’ potenzjalment jippreżenta riskju ta’ effetti kemm akuti kif ukoll kroniċi fil-konsumatur.

(3)

F’April 2013, l-Awtorità ppubblikat sejħa għal proposti biex jiġu investigati l-konċentrazzjonijiet tal-alkalojdi pirroliżidiniċi f’prodotti tal-ikel li joriġinaw mill-annimali inkluż il-ħalib u l-prodotti tal-ħalib, il-bajd u l-laħam u l-prodotti tal-laħam, u għal prodotti tal-ikel li joriġinaw mill-pjanti, inklużi tejiet u supplimenti tal-ikel (erbali), f’reġjuni differenti fl-Ewropa. L-eżitu tal-investigazzjonijiet ġie ppubblikat fit-3 ta’ Awwissu 2015 (4).

(4)

Fis-26 ta’ Awwissu 2016, l-Awtorità ppubblikat rapport xjentifiku dwar il-valutazzjoni tal-esponiment djetetiku għall-alkalojdi pirroliżidiniċi fil-popolazzjoni Ewropea (5), li qies data ta’ okkorrenza ġdida. Ir-rapport ikkonkluda li l-infużjonijiet erbali u tat-te huma l-kontributuri ewlenin għall-esponiment tal-bniedem għall-alkalojdi pirroliżidiniċi u li s-supplimenti bbażati fuq l-għabra tad-dakra wkoll jikkontribwixxu b’mod sinifikanti għal dak l-esponiment. Ir-rapport sab li l-esponiment għall-alkalojdi pirroliżidiniċi relatat mal-konsum tal-għasel kien iktar baxx. Ikkonkluda wkoll li s-supplimenti tal-ikel erbali jistgħu jikkontribwixxu b’mod sinifikanti għall-esponiment iżda li kien hemm nuqqas ta’ data ta’ okkorrenza suffiċjenti.

(5)

Fis-27 ta’ Lulju 2017, l-Awtorità ppubblikat id-dikjarazzjoni dwar ir-riskji għas-saħħa tal-bniedem marbuta mal-preżenza tal-alkalojdi pirroliżidiniċi fl-għasel, fit-te, fl-infużjonijiet u s-supplimenti tal-ikel erbali (6). Il-Bord CONTAM stabbilixxa punt ta’ referenza ġdid ta’ 237 μg/kg ta’ piż tal-ġisem għal kull jum biex jivvaluta r-riskji karċinoġeniċi tal-alkalojdi pirroliżidiniċi u kkonkluda li hemm tħassib possibbli għas-saħħa tal-bniedem relatat mal-esponiment għall-alkalojdi pirroliżidiniċi, b’mod partikolari għal dawk li jikkunsmaw b’mod frekwenti u kwantità kbira ta’ te u infużjonijiet erbali fil-popolazzjoni ġenerali iżda, b’mod partikolari, għall-gruppi aktar żagħżugħa tal-popolazzjoni.

(6)

Il-preżenza tal-alkalojdi pirroliżidiniċi f’dan l-ikel tista’ tiġi minimizzata jew ipprojbita bl-applikazzjoni ta’ prattiki agrikoli u ta’ ħsad tajbin. L-iffissar tal-livelli massimi jiżgura li l-prattiki agrikoli u ta’ ħsad tajbin jiġu applikati fir-reġjuni kollha tal-produzzjoni biex jiġi żgurat livell għoli ta’ protezzjoni tas-saħħa tal-bniedem. Għalhekk jixraq li jiġu ffissati livelli massimi fl-oġġetti tal-ikel li jkun fihom livelli sinifikanti tal-alkalojdi pirroliżidiniċi u li għalhekk jikkontribwixxu b’mod sinifikanti għall-esponiment tal-bniedem jew li huma ta’ rilevanza għall-esponiment ta’ gruppi vulnerabbli tal-popolazzjoni.

(7)

F’ċerti reġjuni tal-produzzjoni, prattiki agrikoli u ta’ ħsad tajbin ġew introdotti reċentement jew għad iridu jiġu implimentati, u għalhekk jixraq li jingħata perjodu raġonevoli biex ir-reġjuni kollha ta’ produzzjoni jkunu jistgħu jintroduċu prattiki bħal dawn. Huma meħtieġa żewġ staġuni ta’ tkabbir għall-implimentazzjoni sħiħa tal-prattiki agrikoli u ta’ ħsad tajbin sabiex tiġi żgurata provvista suffiċjenti għall-operaturi tan-negozju tal-ikel biex jipproduċu oġġetti tal-ikel li jikkonformaw mar-rekwiżiti l-ġodda stabbiliti f’dan ir-Regolament.

(8)

Filwaqt li jitqies li l-oġġetti tal-ikel koperti minn dan ir-Regolament għandhom żmien ta’ ħżin twil sa tliet snin, jixraq li jiġi previst perjodu tranżizzjonali twil ferm sabiex l-oġġetti tal-ikel li tqiegħdu fis-suq legalment qabel id-data ta’ applikazzjoni ta’ dan ir-Regolament ikunu jistgħu jibqgħu fis-suq għal tul ta’ żmien biżżejjed. Jixraq li jkun hemm perjodu tranżizzjonali ta’ 18-il xahar li jippermetti l-bejgħ lill-konsumatur finali tal-prodotti li kienu ġew prodotti qabel id-data tal-applikazzjoni.

(9)

Għalhekk jenħtieġ li r-Regolament (KE) Nru 1881/2006 jiġi emendat skont dan.

(10)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,