(1)

Ir-Regolament tal-Kummissjoni (KE) Nru 798/2008 (3) jistabbilixxi r-rekwiżiti dwar iċ-ċertifikazzjoni veterinarja għall-importazzjonijiet fl-Unjoni u t-tranżitu minnha, inkluż il-ħżin waqt it-tranżitu, tat-tjur u tal-prodotti tat-tjur (“il-prodotti”). Jipprevedi li jistgħu jsiru importazzjoni u tranżitu mill-Unjoni tal-prodotti mill-pajjiżi terzi, mit-territorji, miż-żoni u mill-kumpartimenti elenkati fil-kolonni 1 u 3 tat-tabella fil-Parti 1 tal-Anness I tiegħu.

(2)

Ir-Regolament (KE) Nru 798/2008 jistabbilixxi wkoll il-kundizzjonijiet biex pajjiż terz, territorju, żona jew kumpartiment ikunu jistgħu jitqiesu ħielsa mill-influwenza tat-tjur b’patoġeniċità għolja (HPAI).

(3)

L-Istati Uniti tal-Amerka huma elenkati fil-Parti 1 tal-Anness I tar-Regolament (KE) Nru 798/2008 bħala pajjiż terz li minnu jistgħu jiġu impurtati prodotti fl-Unjoni u jgħaddu minnha bi tranżitu, mingħajr restrizzjoni minħabba l-preżenza tal-HPAI.

(4)

Il-Ftehim bejn il-Komunità Ewropea u l-Istati Uniti tal-Amerka dwar miżuri sanitarji li jipproteġu s-saħħa pubblika u s-saħħa tal-annimali fil-kummerċ tal-annimali ħajjin u tal-prodotti tal-annimali (“il-Ftehim”) (4), approvat bid-Deċiżjoni tal-Kunsill 98/258/KE (5), jipprovdi għal rikonoxximent reċiproku tal-miżuri ta’ reġjonalizzazzjoni fil-każ ta’ tifqigħat ta’ mard fl-Unjoni jew fl-Istati Uniti tal-Amerka.

(5)

Fit-8 ta’ April 2020, l-Istati Uniti tal-Amerka kkonfermaw il-preżenza tal-HPAI tas-sottotip H7N3 f’azjenda tat-tjur fil-kontea ta’ Chesterfield fl-Istat ta’ South Carolina. Wara li faqqgħet l-HPAI, l-awtoritajiet veterinarji tal-Istati Uniti tal-Amerka poġġew żona ta’ kontroll ta’ 10 km madwar l-azjenda milquta, li kienet tinkludi partijiet ta’ Chesterfield, ta’ Lancaster u ta’ Kershaw fl-Istat ta’ South Carolina u implimentat politika ta’ qerda biex tikkontrolla l-HPAI u tillimita t-tixrid ta’ dik il-marda.

(6)

Bl-adozzjoni tar-Regolament ta’ Implimentazzjoni tal-Kummissjoni (UE) 2020/544 (6), il-Kummissjoni poġġiet restrizzjonijiet fuq l-introduzzjoni fl-Unjoni tal-prodotti tat-tjur miż-żona fl-Istat ta’ South Carolina affettwata mill-HPAI, li l-awtoritajiet veterinarji tal-Istati Uniti tal-Amerka kienu poġġew f’restrizzjonijiet minħabba t-tifqigħa tal-HPAI.

(7)

L-Istati Uniti tal-Amerka ppreżentaw informazzjoni aġġornata dwar il-qagħda epidemjoloġika fit-territorju tagħhom u dwar il-miżuri meħuda għall-prevenzjoni ta’ aktar tixrid tal-HPAI, li issa ġiet evalwata mill-Kummissjoni. Barra minn hekk, l-Istati Uniti tal-Amerka rrapportaw it-tlestija ta’ miżuri ta’ tindif u ta’ diżinfettar fis-7 ta’ Mejju 2020 wara l-politika ta’ qerda fl-azjenda agrikola tat-tjur fejn it-tifqigħa tal-HPAI kienet ġiet konfermata f’April 2020.

(8)

Abbażi tal-evalwazzjoni tal-informazzjoni pprovduta mill-Istati Uniti tal-Amerka, jixraq li fil-Parti 1 tal-Anness I tar-Regolament (KE) Nru 798/2008 tiġi indikata d-data tal-5 ta’ Awwissu 2020, jiġifieri 90 jum mit-tlestija tal-politika ta’ qerda u tal-miżuri ta’ tindif u ta’ diżinfettar, bħala data meta dak il-pajjiż terz jista’ jerġa’ jitqies, skont l-Artikolu 9 tar-Regolament (KE) Nru 798/2008, bħala ħieles mill-HPAI u minn meta l-importazzjonijiet fl-Unjoni u t-tranżitu minnha ta’ ċerti prodotti tat-tjur li joriġinaw f’dak il-pajjiż terz jenħtieġ jerġgħu jiġu awtorizzati.

(9)

Għaldaqstant, jenħtieġ tiġi emendata l-entrata għall-Istati Uniti tal-Amerka fit-tabella stabbilita fil-Parti 1 tal-Anness I tar-Regolament (KE) Nru 798/2008 biex titqies l-eradikazzjoni tal-HPAI f’dak il-pajjiż terz. Għalhekk, jenħtieġ li l-Anness I tar-Regolament (KE) Nru 798/2008 jiġi emendat kif xieraq.

(10)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,