|
7.8.2020 |
MT |
Il-Ġurnal Uffiċjali tal-Unjoni Ewropea |
L 258/9 |
REGOLAMENT TA’ IMPLIMENTAZZJONI TAL-KUMMISSJONI (UE) 2020/1165
tas-6 ta’ Awwissu 2020
li jemenda r-Regolament ta’ Implimentazzjoni (UE) 2020/353 li jimponi dazju antidumping definittiv u jiġbor b’mod definittiv id-dazju provviżorju impost fuq l-importazzjonijiet ta’ roti tat-triq tal-azzar li joriġinaw mir-Repubblika tal-Poplu taċ-Ċina
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2016/1036 tal-Parlament Ewropew u tal-Kunsill tat-8 ta’ Ġunju 2016 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Unjoni Ewropea (1), u b’mod partikolari l-Artikolu 9(4) tiegħu,
Billi:
|
(1) |
Permezz tar-Regolament ta’ Implimentazzjoni tal-Kummissjoni (UE) 2020/353 (2), ġew imposti dazji antidumping definittivi u nġabru b’mod definittiv id-dazji provviżorji fuq l-importazzjonijiet ta’ roti tat-triq tal-azzar li joriġinaw mir-Repubblika tal-Poplu taċ-Ċina. |
|
(2) |
L-Artikolu 4 tar-Regolament ta’ Implimentazzjoni (UE) 2020/353 jgħid: “Fejn tiġi ppreżentata dikjarazzjoni għal rilaxx għal ċirkolazzjoni libera fir-rigward tal-prodotti msemmija fl-Artikolu 1, l-ammont ta’ biċċiet tal-prodotti importati għandu jiddaħħal fil-parti rilevanti ta’ dik id-dikjarazzjoni”. Is-servizzi tal-Kummissjoni rċevew kummenti mingħand l-Istati Membri u l-operaturi tas-suq rigward l-oriġini tal-prodotti impurtati. |
|
(3) |
Jenħtieġ li jiġi ċċarat li l-ammont ta’ biċċiet jenħtieġ li jiġi ddikjarat għall-importazzjonijiet ta’ roti tat-triq tal-azzar, irrispettivament mill-oriġini tagħhom, u jenħtieġ li l-Istati Membri jinfurmaw il-Kummissjoni bl-ammont ta’ biċċiet impurtati. |
|
(4) |
F’dan ir-rigward, il-Kummissjoni ddeċidiet li temenda l-Artikolu 4 tar-Regolament ta’ Implimentazzjoni (UE) 2020/353. |
|
(5) |
It-terminu “biċċiet” jiġi sostitwit b’“oġġetti” għall-konsistenza mal-unità supplimentari “għadd ta’ oġġetti”, definita fin-Nomenklatura Magħquda (3). |
|
(6) |
Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 15(1) tar-Regolament (UE) 2016/1036, |
ADOTTAT DAN IR-REGOLAMENT:
Artikolu 1
Il-premessa (88) tar-Regolament ta’ Implimentazzjoni (UE) 2020/353 hija sostitwita b’dan li ġej:
|
“(88) |
L-istatistika tal-SRW ħafna drabi tiġi espressa f’għadd ta’ oġġetti. Madankollu, ma hemm l-ebda unità supplimentari bħal din għal SRW speċifikata fin-Nomenklatura Magħquda stabbilita fl-Anness I tar-Regolament tal-Kunsill (KEE) Nru 2658/87 (11). Għalhekk hemm bżonn li fid-dikjarazzjoni għal rilaxx għal ċirkolazzjoni libera ma jingħatax biss il-piż f’kg jew f’tunnellati iżda anke l-għadd ta’ oġġetti għall-importazzjonijiet tal-prodott ikkonċernat. Jenħtieġ li jiġu indikati l-oġġetti għall-kodiċijiet TARIC 8708701080, 8708701085, 8708709920, 8708709980, 8716909095 u 8716909097.” |
Artikolu 2
L-Artikolu 1(3) tar-Regolament ta’ Implimentazzjoni (UE) 2020/353 huwa sostitwit b’dan li ġej:
“3. L-applikazzjoni tar-rati ta’ dazju individwali speċifikati għall-kumpaniji msemmija fil-paragrafu 2 għandha tkun soġġetta għall-preżentazzjoni ta’ fattura kummerċjali valida lill-awtoritajiet doganali tal-Istati Membri, li fuqha għandha tidher dikjarazzjoni datata u ffirmata minn uffiċjal tal-entità li tkun ħarġet tali fattura, identifikat b’ismu u l-kariga, abbozzata kif ġej: ‘Jien, is-sottoskritt, niċċertifika li l-(għadd ta’oġġetti) tal-(prodott ikkonċernat) mibjugħa għall-esportazzjoni lejn l-Unjoni Ewropea koperti minn din il-fattura ġew prodotti minn (isem u indirizz tal-kumpanija) (kodiċi addizzjonali TARIC) fi [pajjiż ikkonċernat]. Jiena niddikjara li l-informazzjoni mogħtija f’din il-fattura hija sħiħa u korretta.’ Jekk ma tiġix ippreżentata din il-fattura, għandu japplika d-dazju applikabbli għall-kumpaniji l-oħra kollha.”
Artikolu 3
L-Artikolu 4 tar-Regolament ta’ Implimentazzjoni (UE) 2020/353 huwa sostitwit b’dan li ġej:
“Artikolu 4
Fejn tiġi ppreżentata dikjarazzjoni għal rilaxx għal ċirkolazzjoni libera fir-rigward tal-prodotti msemmija fl-Artikolu 1(1), irrispettivament mill-oriġini tagħhom, l-għadd ta’ oġġetti tal-prodotti importati għandu jiddaħħal fil-parti rilevanti ta’ dik id-dikjarazzjoni.
Fuq bażi ta’ kull xahar, l-Istati Membri għandhom jinfurmaw lill-Kummissjoni bl-għadd ta’ oġġetti importati taħt il-kodiċijiet TARIC 8708701080, 8708701085, 8708709920, 8708709980, 8716909095 u 8716909097, u bl-oriġini tagħhom.”
Artikolu 4
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-6 ta’ Awwissu 2020.
Għall-Kummissjoni
Il-President
Ursula VON DER LEYEN
(1) ĠU L 176, 30.6.2016, p. 21.
(2) Ir-Regolament ta’ Implimentazzjoni tal-Kummissjoni (UE) 2020/353 tat-3 ta’ Marzu 2020 li jimponi dazju antidumping definittiv u jiġbor b’mod definittiv id-dazju provviżorju impost fuq l-importazzjonijiet ta’ roti tat-triq tal-azzar li joriġinaw mir-Repubblika tal-Poplu taċ-Ċina. ĠU L 65, 4.3.2020, p. 9.
(3) Ir-Regolament tal-Kunsill (KEE) Nru 2658/87 tat-23 ta’ Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta’ Dwana (ĠU L 256, 7.9.1987, p. 1).