(1)

Ir-Regolament (KE) Nru 1831/2003 jipprevedi l-awtorizzazzjoni ta’ addittivi għall-użu fl-għalf tal-annimali u r-raġunijiet u l-proċeduri għall-għoti u għat-tiġdid ta’ tali awtorizzazzjoni.

(2)

L-arġinina prodotta mill-Corynebacterium glutamicum ATCC 13870 ġiet awtorizzata għal 10 snin bħala addittiv fl-għalf għall-ispeċijiet kollha tal-annimali permezz tar-Regolament tal-Kummissjoni (KE) Nru 1139/2007 (2).

(3)

Skont l-Artikolu 14 tar-Regolament (KE) Nru 1831/2003, tressqet applikazzjoni għat-tiġdid tal-awtorizzazzjoni tal-L-arġinina prodotta mill-Corynebacterium glutamicum ATCC 13870 bħala addittiv fl-għalf għall-ispeċi kollha tal-annimali, bit-talba li dan l-addittiv jiġi kklassifikat fil-kategorija tal-addittivi “addittivi nutrittivi”, fil-grupp funzjonali “amminoaċidi, l-imluħa u l-analogi tagħhom”. Din l-applikazzjoni kienet akkumpanjata mid-dettalji u d-dokumenti meħtieġa skont l-Artikolu 14(2) tar-Regolament (KE) Nru 1831/2003 u kienet tinkludi talba biex tinbidel id-denominazzjoni tal-varjetà għall-Corynebacterium glutamicum NITE SD 00285.

(4)

F’konformità mal-Artikolu 7 tar-Regolament (KE) Nru 1831/2003, tressqet applikazzjoni għall-awtorizzazzjoni tal-L-arġinina prodotta mill-Corynebacterium glutamicum KCCM 80182 bħala addittiv fl-għalf għall-użu fl-għalf u fl-ilma għax-xorb għall-ispeċijiet kollha tal-annimali. Din l-applikazzjoni tikkonċerna l-awtorizzazzjoni tal-L-arġinina prodotta mill-Corynebacterium glutamicum KCCM 80182 bħala addittiv fl-għalf għall-ispeċijiet kollha tal-annimali biex jiġi kklassifikat fil-kategorija tal-addittivi “addittivi nutrittivi” il-grupp funzjonali “amminoaċidi, l-imluħ u l-analogi tagħhom” u fil-kategorija tal-addittivi “addittivi sensorji”, il-grupp funzjonali “komposti aromatizzanti”. Ma’ din l-applikazzjoni ntbagħtu d-dettalji u d-dokumenti meħtieġa skont l-Artikolu 7(3) tar-Regolament (KE) Nru 1831/2003.

(5)

Fl-opinjonijiet tagħha tat-3 ta’ April 2019 (3) u tal-14 ta’ Mejju 2019 (4), l-Awtorità Ewropea dwar is-Sigurtà tal-Ikel (“l-Awtorità”) ikkonkludiet li, fil-kundizzjonijiet tal-użu proposti, l-L-arġinina prodotta mill-Corynebacterium glutamicum NITE SD 00285 u mill-Corynebacterium glutamicum KCCM 80182 ma għandhiex effett avvers fuq is-saħħa tal-annimali, is-saħħa tal-konsumatur jew fuq l-ambjent. Iddikjarat ukoll li l-arġinina prodotta mill-Corynebacterium glutamicum NITE SD 00285 hija irritanti għall-ġilda, korrużiva għall-għajnejn u ta’ periklu għall-inalazzjoni. Dwar l-L-arġinina prodotta mill-Corynebacterium glutamicum KCCM 80182, hija ddikjarat li hija korrużiva għall-ġilda u għall-għajnejn. Għalhekk, il-Kummissjoni tqis li jenħtieġ li jittieħdu miżuri protettivi xierqa sabiex jiġu evitati effetti avversi fuq is-saħħa tal-bniedem, b’mod partikolari fir-rigward tal-utenti tal-addittiv. L-Awtorità kkonkludiet ukoll li l-addittiv huwa sors effettiv tal-amminoaċidu arġinina għall-ispeċijiet kollha tal-annimali u li biex l-L-arġinina bħala suppliment ikun effikaċi għalkollox fir-ruminanti, jenħtieġ li jiġi protett mid-degradazzjoni fil-kirxa.

(6)

Fl-opinjoni tagħha dwar l-L-arġinina prodotta mill-Corynebacterium glutamicum KCCM 80182, l-Awtorità esprimiet preokkupazzjoni dwar is-sikurezza tal-amministrazzjoni orali simultanja tal-amminoaċidu permezz tal-ilma għax-xorb u l-għalf. Madankollu, l-Awtorità ma pproponietx kontenut massimu għal-L-arġinina. Barra minn hekk, l-Awtorità tirrakkomanda s-supplimentazzjoni bl-L-arġinina f’ammonti adatti. Għalhekk, fil-każ tas-supplimentazzjoni bl-L-arġinina permezz tal-ilma għax-xorb, jixraq li l-utent jiġi allertat biex iqis il-provvista djetika bl-amminoaċidi essenzjali u kundizzjonalment essenzjali kollha.

(7)

Jenħtieġ li jiġu previsti restrizzjonijiet u kundizzjonijiet biex jippermettu kontroll aħjar tal-L-arġinina meta jintużaw bħala aromatizzanti. Għal-L-arġinina użata bħala aromatizzant, fuq it-tikketta jenħtieġ jiġi indikat il-kontentu rakkomandat. Fejn dan il-kontenut jinqabeż, fuq it-tikketta tal-pretaħlitiet jenħtieġ li tiġi indikata ċerta informazzjoni.

(8)

Fir-rigward tal-użu tal-L-arġinina bħala aromatizzant, l-Awtorità tiddikjara li ma hemmx bżonn iżjed provi tal-effikaċja tiegħu meta s-sustanza tintuża fil-livell tad-doża rakkomandata. L-użu tal-L-arġinina bħala kompost aromatizzant mhuwiex awtorizzat fl-ilma tax-xorb. Fid-doża rrakkomandata, l-L-arġinina bħala kompost aromatizzant x’aktarx li fiha l-ebda preokkupazzjoni fir-rigward tal-provvista djetika bl-amminoaċidi essenzjali u kundizzjonalment essenzjali kollha.

(9)

L-Awtorità ma tqisx li hemm bżonn ta’ rekwiżiti speċifiċi għall-monitoraġġ ta’ wara t-tqegħid fis-suq. Ivverifikat ukoll ir-rapporti dwar il-metodu ta’ analiżi tal-addittiv tal-għalf fl-għalf li ġie ppreżentat mil-Laboratorju ta’ Referenza stabbilit bir-Regolament (KE) Nru 1831/2003.

(10)

Il-valutazzjoni tal-L-arġinina prodotta mill-Corynebacterium glutamicum NITE SD 00285 u mill-Corynebacterium glutamicum KCCM 80182 turi li l-kundizzjonijiet għall-awtorizzazzjoni, kif previst fl-Artikolu 5 tar-Regolament (KE) Nru 1831/2003, huma ssodisfati. Għalhekk, l-użu ta’ dan l-addittiv jenħtieġ li jiġi awtorizzat kif speċifikat fl-Anness ta’ dan ir-Regolament.

(11)

B’konsegwenza tat-tiġdid tal-awtorizzazzjoni tal-L-arġinina prodotta mill-Corynebacterium glutamicum ATCC 13870 bħala addittiv fl-għalf bil-kundizzjonijiet stipulati fl-Anness ta’ dan ir-Regolament, jenħtieġ li jitħassar ir-Regolament (KE) Nru 1139/2007.

(12)

Billi r-raġunijiet ta’ sikurezza ma jitolbux l-applikazzjoni immedjata tal-modifiki fil-kundizzjonijiet tal-awtorizzazzjoni għal-L-arġinina prodotta mill-Corynebacterium glutamicum ATCC 13870, huwa xieraq li l-partijiet interessati jingħataw perjodu tranżizzjonali biex iħejju ruħhom ħalli jissodisfaw ir-rekwiżiti l-ġodda li jirriżultaw mit-tiġdid tal-awtorizzazzjoni.

(13)

Il-fatt li l-użu tal-L-arġinina mhuwiex awtorizzat bħala aroma fl-ilma tax-xorb ma jipprekludix l-użu tiegħu fl-għalf kompost li jiġi amministrat permezz tal-ilma.

(14)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,