(1)

L-Artikolu 2(1) tar-Regolament ta’ Implimentazzjoni tal-Kummissjoni (UE) Nru 801/2014 (2) jipprevedi li sabiex jibbenefikaw mill-ammont addizzjonali, il-persuni kkonċernati jridu jkunu ġew effettivament risistemati mill-bidu tal-perjodu kkonċernat u sa sitt xhur wara t-tmiem ta’ dak il-perjodu.

(2)

Madankollu, l-pandemija tal-COVID-19 kellha impatt bħal qatt qabel fuq l-isforzi ta’ risistemazzjoni tal-Unjoni li saru mill-Istati Membri. Il-kriżi obbligat lill-Istati Membri jissospendu l-operazzjonijiet tagħhom ta’ risistemazzjoni u jimponu restrizzjonijiet fuq id-dħul fit-territorju tagħhom.

(3)

Barra minn hekk, l-Aġenzija tan-Nazzjonijiet Uniti għar-Rifuġjati (UNHCR) u l-Organizzazzjoni Internazzjonali għall-Migrazzjoni (IOM), l-imsieħba ewlenin tal-Istati Membri għar-risistemazzjoni, issospendew b’mod temporanju l-operazzjonijiet tagħhom fid-dawl tal-pandemija tal-COVID-19. Barra minn hekk, minħabba l-projbizzjonijiet fuq l-ivvjaġġar li ħarġu ħafna pajjiżi tal-ewwel ażil, fiċ-ċirkostanzi attwali l-Istati Membri ma jistgħux iwettqu missjonijiet ta’ għażla għar-risistemazzjoni.

(4)

L-impatt tal-pandemija tal-COVID-19 għandu implikazzjonijiet serji mhux biss fuq l-implimentazzjoni tal-wegħdi ta’ risistemazzjoni, iżda wkoll fuq il-kapaċità ta’ assorbiment fl-ambitu tal-Fond għall-Ażil, il-Migrazzjoni u l-Integrazzjoni.

(5)

Sabiex jiġi onorat l-impenn qawwi tal-Istati Membri favur l-azzjonijiet ta’ risistemazzjoni, jenħtieġ li jiġi żgurat li s-sostenn finanzjarju korrispondenti jintuża b’mod flessibbli u effettiv.

(6)

Għal dan il-għan, huwa xieraq li l-iskadenza tal-implimentazzjoni għall-perjodu ta’ risistemazzjoni li jkopri s-snin 2018, 2019 u 2020 tiġi estiża mit-30 ta’ Ġunju 2021 sal-31 ta’ Diċembru 2021.

(7)

L-Irlanda hija marbuta bir-Regolament (UE) Nru 516/2014 u konsegwentement hija marbuta b’dan ir-Regolament.

(8)

Ir-Renju Unit huwa marbut bir-Regolament (UE) Nru 516/2014 u konsegwentement huwa marbut b’dan ir-Regolament. F’konformità mal-Artikolu 138 tal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (3), il-liġi applikabbli tal-Unjoni, inklużi r-regoli dwar il-korrezzjonijiet finanzjarji u dwar l-approvazzjoni tal-kontijiet, se tkompli tapplika għar-Renju Unit wara l-31 ta’ Diċembru 2020 sal-għeluq ta’ dawn il-programmi u attivitajiet tal-Unjoni.

(9)

Id-Danimarka mhijiex marbuta bir-Regolament (UE) Nru 516/2014, jew b’dan ir-Regolament.

(10)

Minħabba l-urġenza tas-sitwazzjoni marbuta mal-pandemija tal-COVID-19, huwa xieraq li dan ir-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(11)

Għaldaqstant, jenħtieġ li r-Regolament (UE) Nru 801/2014 jiġi emendat skont dan,