(1)

Il-pandemija tal-COVID-19 u r-restrizzjonijiet estensivi fuq il-moviment li daħħlu l-Istati Membri u l-pajjiżi terzi fil-forma ta’ miżuri nazzjonali jikkostitwixxu sfida eċċezzjonali u bla preċedent għall-Istati Membri u għall-operaturi b’rabta mat-twettiq tal-kontrolli kif speċifikat fir-Regolament tal-Kunsill (KE) Nru 834/2007 u fir-Regolamenti tal-Kummissjoni (KE) Nru 889/2008 (2) u (KE) Nru 1235/2008 (3).

(2)

Abbażi tal-informazzjoni li bagħtu l-Istati Membri, jeħtieġ li jkun hemm deroga minn ċerti dispożizzjonijiet tar-Regolamenti (KE) Nru 889/2008 u (KE) Nru 1235/2008.

(3)

F’dak li għandu x’jaqsam mal-kontrolli uffiċjali u ma’ attivitajiet uffiċjali oħra li jidħlu fil-kamp ta’ applikazzjoni tar-Regolament (UE) 2017/625 tal-Parlament Ewropew u tal-Kunsill (4), ir-Regolament ta’ Implimentazzjoni tal-Kummissjoni (UE) 2020/466 (5) jippermetti lill-Istati Membri japplikaw miżuri temporanji sal-1 ta’ Awwissu 2020 biex jiġu limitati r-riskji għas-saħħa tal-bniedem, tal-annimali u tal-pjanti u għat-trattament xieraq tal-annimali fis-sitwazzjoni speċifika marbuta mal-COVID-19.

(4)

B’mod partikulari, għadd ta’ Stati Membri u ta’ partijiet ikkonċernati avżaw lill-Kummissjoni li dawn ir-restrizzjonijiet u t-tfixkil li wasslu għalih xekklu l-kapaċità tagħhom li jivverifikaw l-integrità tal-prodotti organiċi. Is-soltu, il-persunal tal-awtoritajiet kompetenti jew, meta jkun xieraq, tal-awtoritajiet ta’ kontroll u tal-korpi ta’ kontroll iridu jżuru lill-operaturi u/jew jivvjaġġaw distanzi twal biex iwettqu l-ispezzjonijiet fiżiċi għall-finijiet tal-kontrolli uffiċjali. Billi bħalissa l-ivvjaġġar u t-twettiq tal-ispezzjonijiet fiżiċi mhumiex permessi jew huma ristretti ħafna minħabba l-miżuri nazzjonali, jenħtieġ li l-awtorità kompetenti jew, meta jkun xieraq, l-awtorità ta’ kontroll jew il-korp ta’ kontroll, ikunu jistgħu jsejsu l-kontrolli tagħhom fuq il-verifika tad-dokumenti u jużaw kull mezz ta’ komunikazzjoni mill-bogħod disponibbli minflok, għal perjodu partikulari. Fil-każ tal-operaturi b’riskju baxx, kif stabbilit permezz tal-proċedura ta’ valutazzjoni tar-riskju tal-awtorità kompetenti jew, meta jkun xieraq, tal-awtorità ta’ kontroll jew tal-korp ta’ kontroll, kif iddefinit fl-Artikolu 27(3) tar-Regolament (KE) Nru 834/2007, huwa xieraq li l-ispezzjonijiet fiżiċi jiġu sostitwiti bit-tali verifiki tad-dokumenti. Barra minn hekk, ir-restrizzjonijiet fuq il-moviment wasslu għal dewmien fiż-żjarat annwali ta’ kontroll, u għamluha diffiċli għall-awtorità kompetenti jew, meta jkun xieraq, għall-awtoritajiet ta’ kontroll jew għall-korpi ta’ kontroll li jissodisfaw l-obbligi tagħhom li jwettqu żjarat addizzjonali aleatorji, spezzjonijiet għall-għarrieda u t-teħid ta’ kampjuni b’rabta ma’ ċerti operaturi bi profil partikulari.

(5)

Jenħtieġ li l-operaturi jibqgħu jkunu jistgħu jissieħbu fl-iskema tal-produzzjoni organika. Madankollu, sa ma jkunu jistgħu jerġgħu jibdew l-attivitajiet normali ta’ kontroll wara li jintemmu l-miżuri nazzjonali marbutin mal-pandemija tal-COVID-19, jenħtieġ li l-awtorità kompetenti jew, meta jkun xieraq, l-awtorità ta’ kontroll jew il-korp ta’ kontroll, jitħallew jipposponu l-ispezzjonijiet fiżiċi u jiddependu fuq il-verifiki tad-dokumenti, fosthom fuq il-verifiki li jitwettqu permezz tal-mezzi ta’ komunikazzjoni mill-bogħod disponibbli sa ma jkunu jistgħu jerġgħu jibdew jitwettqu l-attivitajiet normali.

(6)

Huwa importanti ferm li l-investigazzjonijiet dwar il-każijiet issuspettati ta’ ksur u ta’ irregolaritajiet marbutin mar-regoli tal-produzzjoni organika jkomplu jitwettqu fil-ħin. Għalhekk huwa xieraq li jiġi previst li t-tali investigazzjonijiet jitwettqu bi kwalunkwe mezz disponibbli, filwaqt li l-awtoritajiet ta’ kontroll u l-korpi ta’ kontroll jingħataw l-opportunità jwettqu l-ispezzjonijiet fiżiċi meħtieġa fi stadju iktar tard.

(7)

Ir-restrizzjonijiet fuq il-moviment li l-Istati Membri applikaw minħabba l-pandemija tal-COVID-19 bħalissa qed jipprevjenu l-komunikazzjoni fil-ħin bejn l-Istati Membri, bejn il-korpi ta’ kontroll u l-Istati Membri u bejn l-Istati Membri u l-Kummissjoni dwar l-investigazzjonijiet imwettqin biex tiġi stabbilita l-oriġini tal-ksur jew tal-irregolaritajiet li jkunu nstabu. Għalhekk jenħtieġ li ċerti skadenzi jiġu estiżi.

(8)

Ir-restrizzjonijiet fuq il-moviment li l-Istati Membri qed japplikaw bħalissa minħabba l-pandemija tal-COVID-19 jistgħu jaffettwaw ukoll il-possibbiltà li l-awtoritajiet kompetenti jwettqu l-ispezzjoni annwali tal-korpi ta’ kontroll li jkunu tqabbdu jagħmlu ċerti kompiti ta’ kontroll. Jeħtieġ jiġi ċċarat li awtorità kompetenti tista’ twettaq awditi ta’ superviżjoni b’mod temporanju minflok.

(9)

Barra minn hekk, minħabba l-miżuri li ddaħħlu biex titħares saħħet il-bniedem, ir-restrizzjonijiet serji imposti fuq it-trasport affettwaw is-servizzi tal-kurriera li kienu jwasslu l-verżjoni taċ-ċertifikat ta’ spezzjoni stampata u ffirmata bl-idejn meħtieġa għall-konsenji importati. Minħabba f’hekk, jeħtieġ ukoll li jkun hemm deroga mid-dispożizzjonijiet rilevanti tar-Regolament (KE) Nru 1235/2008 f’dak li għandu x’jaqsam mal-obbligu li wieħed ikollu verżjoni stampata taċ-ċertifikat ta’ spezzjoni.

(10)

Jenħtieġ li dan ir-Regolament japplika sa tmiem Settembru tal-2020. Madankollu, jenħtieġ li l-verifiki tad-dokumenti fil-każ tal-operaturi b’riskju baxx, kif stabbilit permezz tal-proċedura ta’ valutazzjoni tar-riskju tal-awtorità kompetenti jew, meta jkun xieraq, tal-awtorità ta’ kontroll jew tal-korp ta’ kontroll, kif iddefinit fl-Artikolu 27(3) tar-Regolament (KE) Nru 834/2007, jitħallew jieħdu post l-ispezzjonijiet fiżiċi rilevanti sa tmiem Diċembru tal-2020. Minħabba l-informazzjoni li bagħtu għadd ta’ Stati Membri, huwa xieraq li jiġi previst li dan ir-Regolament ikun japplika b’mod retroattiv mill-1 ta’ Marzu 2020 ’il quddiem. Barra minn hekk, jenħtieġ li l-għadd ta’ kampjuni li jittieħdu, ta’ żjarat addizzjonali aleatorji u ta’ spezzjonijiet għall-għarrieda jiġu kkalkulati fuq l-2020 kollha. Għalhekk, jenħtieġ li dan ir-Regolament jidħol fis-seħħ l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(11)

Wara li faqqgħet il-pandemija tal-COVID-19 fiċ-Ċina, dak il-pajjiż impona restrizzjonijiet fuq l-ivvjaġġar mill-bidu ta’ Jannar tal-2020. Minħabba f’hekk, huwa xieraq li tiġi prevista data ta’ applikazzjoni iktar bikrija għall-attivitajiet ta’ kontroll li twettqu fiċ-Ċina.

(12)

Il-miżuri previsti f’dan ir-Regolament huma skont l-opinjoni tal-Kumitat dwar il-produzzjoni organika,