(1)

Ġie żviluppat numru ta’ apparat akustiku biex igerrex iċ-ċetaċji mit-tagħmir tas-sajd, u rnexxielu jnaqqas il-qabda inċidentali ta’ speċi ta’ ċetaċji f’meded tas-sajd bi xbieki statiċi. L-użu ta’ apparat bħal dan huwa meħtieġ f’żoni u f’żoni tas-sajd fejn huwa magħruf jew prevedibbli li jkun hemm livelli għoljin ta’ qabdiet ta’ ċetaċji, kif stabbilit fil-Punt 1.1 tal-Part A tal-Anness XIII tar-Regolament (UE) 2019/1241.

(2)

Ir-Regolament (UE) 2019/1241 jissimplifika l-qafas legali eżistenti għall-miżuri tekniċi ta’ konservazzjoni fl-Unjoni Ewropea, li kien sar kumpless ħafna matul is-snin. Bħala parti mis-simplifikazzjoni, ir-Regolament (UE) 2019/1241 ħassar ir-Regolament tal-Kunsill (KE) Nru 812/2004 (2), li jistabbilixxi miżuri li jikkonċernaw qabdiet inċidentali ta’ ċetaċji fiż-żoni tas-sajd, u kopra biss il-miżuri tekniċi ewlenin biex jitnaqqsu l-qabdiet inċidentali ta’ ċetaċji, bħar-rekwiżit li l-irkaptu tas-sajd jintuża f’żoni speċifiċi b’apparat akustiku deterrenti biex jitnaqqsu l-qabdiet inċidentali taċ-ċetaċji.

(3)

L-ispeċifikazzjonijiet tekniċi dettaljati għall-effiċjenza tal-apparat akustiku deterrenti li kienu stabbiliti fl-Artikolu 3 u fl-Anness II tar-Regolament tal-Kunsill (KE) Nru 812/2004 ma ġewx koperti bir-Regolament (UE) 2019/1241. Għaldaqstant, jenħtieġ li dan ir-Regolament jistabbilixxi fid-dettall dawn l-ispeċifikazzjonijiet tekniċi jew il-kundizzjonijiet għall-użu ta’ apparat akustiku deterrenti li issa huma meħtieġa skont il-Punt 1.1 tal-Parti A tal-Anness XIII tar-Regolament (UE) 2019/1241, b’mod simili għal dawk li qabel kienu speċifikati fl-Artikolu 3 u fl-Anness II tar-Regolament (KE) Nru 812/2004.

(4)

Madankollu, skont il-parir tal-Kumitat Xjentifiku, Tekniku u Ekonomiku għas-Sajd (STECF) (3), jenħtieġ li l-iżvilupp ta’ apparat akustiku deterrenti ġdid ma jiġix ristrett minn speċifikazzjonijiet tekniċi. Għalhekk, għall-finijiet ta’ dan ir-Regolament, jenħtieġ li l-Istati Membri jkunu jistgħu jawtorizzaw l-użu ta’ apparat akustiku deterrenti li jkun għadu kemm ġie żviluppat u tipi effiċjenti tiegħu li ma jkunx konformi mal-ispeċifikazzjonijiet tekniċi stipulati f’dan ir-Regolament, dment li jkun hemm evidenza li tal-anqas dan l-apparat ikun effettiv biex inaqqas il-qabdiet inċidentali taċ-ċetaċji daqs dak stabbilit fir-Regolament (UE) 2019/1241 (inklużi r-regoli ulterjuri ta’ implimentazzjoni adottati skont dan ir-Regolament). Għalhekk huwa xieraq li jiġu stabbiliti l-kundizzjonijiet li skonthom l-Istati Membri jistgħu jawtorizzaw l-użu ta’ apparat akustiku deterrenti li jissodisfa tali speċifikazzjonijiet tekniċi jew kundizzjonijiet alternattivi.

(5)

Fid-dawl tan-nuqqasijiet enfasizzati fir-rapporti dwar il-kontroll u l-implimentazzjoni tad-dispożizzjonijiet dwar l-ispeċifikazzjonijiet tekniċi għall-użu ta’ apparat akustiku deterrenti li rċeviet il-Kummissjoni sa issa, jenħtieġ li dan ir-Regolament jikkjarifika li l-apparat akustiku deterrenti hemm bżonn ikun jiffunzjona tul id-durata kollha tal-operazzjoni tas-sajd, u mhux biss fil-mument meta x-xbieki jiġu ssettjati.

(6)

Il-miżuri previsti f’dan ir-Regolament huma skont l-opinjoni tal-Kumitat għas-Sajd u l-Akkwakultura,