(1)

L-impatt devastanti tal-pandemija COVID-19 attwali fuq l-avjazzjoni ċivili internazzjonali u Ewropea qed jillimita bil-kbir il-kapaċità tal-Istati Membri u tal-Unjoni Ewropea kollha li jkollhom katina tal-provvista effettiva u effiċjenti. Is-servizzi tal-merkanzija kontinwi u mingħajr interruzzjoni għandhom importanza strateġika essenzjali għall-Unjoni u jaqdu rwol fundamentali fit-twassil tal-oġġetti essenzjali, fosthom il-mediċini, it-tagħmir mediku, u sustanzi u komoditajiet oħra.

(2)

Ir-reġim tal-Unjoni fil-qasam tas-sigurtà tal-merkanzija u tal-posta bl-ajru lejn l-UE, kif stabbilit fil-punt 6.8 tal-Anness tar-Regolament ta’ Implimentazzjoni tal-Kummissjoni (UE) 2015/1998 (2), jeżiġi li t-trasportaturi bl-ajru li jġorru merkanzija u posta fl-Unjoni Ewropea jiġu ddeżinjati kull ħames snin bħala “Trasportatur tal-Merkanzija jew tal-Posta bl-Ajru li jopera fl-Unjoni minn Pajjiż Terz” (ACC3) u li l-fornituri tagħhom tas-servizzi fl-art jiġu ddeżinjati kull tliet snin bħala “aġent regolat u validat tas-sigurtà tal-avjazzjoni tal-UE minn pajjiż terz” (RA3) jew “speditur magħruf validat tas-sigurtà tal-avjazzjoni tal-UE minn pajjiż terz” (KC3).

(3)

Bħala parti mill-proċess tal-validazzjoni tas-sigurtà tal-avjazzjoni tal-UE għad-deżinjazzjoni ta’ ACC3, RA3 u KC3, trid issir żjara fuq il-post fl-istabbiliment tal-operatur minn validatur tas-sigurtà tal-avjazzjoni tal-UE biex tkun konfermata l-implimentazzjoni effettiva tal-miżuri.

(4)

Waqt il-pandemija attwali tal-COVID-19, it-twettiq taż-żjarat fuq il-post għad-deżinjazzjoni u għad-deżinjazzjoni mill-ġdid tat-trasportaturi bl-ajru u tal-operaturi tal-merkanzija fil-pajjiżi terzi ntlaqat u/jew ixxekkel bil-kbir minħabba raġunijiet oġġettivi, lil hinn mir-responsabbiltà jew mill-kontroll ta’ dawk it-trasportaturi jew l-operaturi.

(5)

Għadd kbir ta’ deżinjazzjonijiet bħala ACC3, RA3 u KC3 waslu biex jiskadu fix-xhur li ġejjin jew diġà skadew, mingħajr il-possibbiltà li ssir iż-żjara tal-validazzjoni meħtieġa fuq il-post. Fin-nuqqas tal-istatus rilevanti tal-Unjoni, dawn l-operaturi ma jistgħux jibqgħu joperaw fil-katina tal-provvista sigura lejn l-Unjoni, u b’hekk ma jkunux jistgħu jitkomplew l-operazzjonijiet essenzjali f’dawn iż-żminijiet kritiċi.

(6)

Hu meħtieġ li jiġu adottati miżuri urġenti li jistabbilixxu l-bażi ġuridika xierqa biex jitwettaq proċess alternattiv u mħaffef għall-validazzjonijiet tas-sigurtà tal-avjazzjoni tal-UE tal-operaturi tal-katina tal-provvista lejn l-Unjoni li ntlaqtu mis-sitwazzjoni attwali.

(7)

Ir-Regolamenti ta’ Implimentazzjoni (UE) 2019/103 (3) u (UE) 2019/1583 (4), li jemendaw ir-Regolament ta’ Implimentazzjoni (UE) 2015/1998, introduċew rekwiżiti regolatorji applikabbli mill-31 ta’ Diċembru 2020 fl-oqsma tal-kontroll tal-isfond għall-persunal tal-avjazzjoni ċivili u ċ-ċibersigurtà, rispettivament. Il-kapaċità tal-awtoritajiet u tal-operaturi li jħejju l-implimentazzjoni fil-ħin ta’ dawk ir-rekwiżiti qed tintlaqat serjament mill-effetti tar-restrizzjonijiet imposti minħabba l-pandemija COVID-19, sal-punt li jeħtieġ tiġi posposta d-data tal-applikazzjoni.

(8)

Il-punt 12.4.2.2 tal-Anness tar-Regolament ta’ Implimentazzjoni (UE) 2015/1998 jistabbilixxi l-1 ta’ Settembru 2020 bħala d-data tal-iskadenza għat-tagħmir b’sistemi għad-detezzjoni tal-isplussivi (l-EDS) tal-istandard 2. Il-kapaċità ta’ għadd ta’ ajruporti fl-Unjoni li jlestu l-proċess tal-installazzjoni u tal-attivazzjoni tat-tagħmir tas-sistema għad-detezzjoni tal-isplussivi (l-EDS) tal-istandard 3 qed tintlaqat serjament mill-effetti tar-restrizzjonijiet imposti minħabba l-pandemija COVID-19, sal-punt li jeħtieġ tiġi posposta d-data tal-applikazzjoni. It-tagħmir tal-EDS tal-istandard 3 joffri kapaċità akbar ta’ prestazzjoni u ta’ detezzjoni li tista’ tgħin biex tiżdied is-sigurtà, u għalhekk il-Kummissjoni u l-Istati Membri jibqgħu kommessi li jlestu l-implimentazzjoni ta’ din it-teknoloġija mingħajr aktar dewmien.

(9)

Il-punt 12.6.3 tal-Anness tar-Regolament ta’ Implimentazzjoni (UE) 2015/1998 jistabbilixxi l-1 ta’ Lulju 2020 bħala d-data sa meta l-awtorità xierqa tista’ tippermetti li jissokta l-użu tat-tagħmir għad-detezzjoni ta’ traċċi tal-isplussivi (l-ETD) li ma jkunx konformi mad-Dokument Mehmuż 12-L. Il-kapaċità ta’ għadd ta’ ajruporti fl-Unjoni li jlestu l-proċess tal-installazzjoni tat-tagħmir il-ġdid tad-detezzjoni ta’ traċċi tal-isplussivi (l-ETD) qed tintlaqat serjament mill-effetti tar-restrizzjonijiet imposti minħabba l-pandemija COVID-19, sal-punt li jeħtieġ tiġi posposta d-data ta’ hawn fuq ħalli jkunu evitati l-konsegwenzi legali, b’mod li jpoġġix is-sigurtà tal-avjazzjoni f’riskju żejjed.

(10)

Għalhekk jenħtieġ li r-Regolamenti ta’ Implimentazzjoni (UE) 2015/1998, (UE) 2019/103 u (UE) 2019/1583 jiġu emendati skont dan.

(11)

L-istatus tal-Unjoni ta’ xi operaturi ACC3, RA3 u KC3 diġà skada fl-ewwel fażi tal-pandemija attwali tal-COVID-19, jew eżattament qabel faqqgħet meta kellu jitnieda u jitwettaq il-proċess tal-validazzjoni tas-sigurtà tal-avjazzjoni tal-UE rilevanti, u għalhekk dan ir-Regolament jenħtieġ jipproduċi l-effetti tiegħu b’mod retroattiv, u jippermetti li dawk l-operaturi li skadielhom l-istatus tagħhom jibbenefikaw mill-miżuri previsti fih.

(12)

Il-miżuri previsti f’dan ir-Regolament ma jaffettwawx l-interessi u d-drittijiet leġittimi, jew ma jillimitawx l-aspettattiva ta’ trasportaturi tal-ajru, operaturi, entitajiet jew Stati oħra.

(13)

Biex l-Istati Membri jingħataw il-bażi ġuridika ħalli jniedu minnufih il-proċess alternattiv u mħaffef tal-validazzjoni u tad-deżinjazzjoni tal-operaturi tal-katina tal-provvista lejn l-Unjoni, tant meħtieġa biex jitkomplew l-operazzjonijiet tal-merkanzija lejn l-Unjoni, dan ir-Regolament jenħtieġ jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(14)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 19 tar-Regolament (KE) Nru 300/2008,