(1)

Id-Direttiva tal-Kummissjoni 2003/31/KE (2) inkludiet il-beta-ċiflutrin bħala sustanza attiva fl-Anness I tad-Direttiva tal-Kunsill 91/414/KEE (3).

(2)

Is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009 u huma elenkati fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)

Kif stabbilit fil-Parti A tal-Anness tar-Regolament ta’ Implimentazzjoni (UE) Nru 540/2011, l-approvazzjoni tas-sustanza attiva beta-ċiflutrin tiskadi fil-31 ta’ Ottubru 2020.

(4)

Ġiet ippreżentata applikazzjoni għat-tiġdid tal-approvazzjoni tas-sustanza attiva beta-ċiflutrin f’konformità mal-Artikolu 1 tar-Regolament ta’ Implimentazzjoni tal-Kummissjoni (UE) Nru 844/2012 (5) fil-perjodu taż-żmien previst f’dak l-Artikolu.

(5)

L-applikanti ppreżentaw id-dossiers supplimentari meħtieġa f’konformità mal-Artikolu 6 tar-Regolament ta’ Implimentazzjoni (UE) Nru 844/2012. L-Istat Membru relatur sab li l-applikazzjoni kienet kompluta.

(6)

L-Istat Membru relatur ħejja rapport ta’ valutazzjoni tat-tiġdid b’konsultazzjoni mal-Istat Membru korelatur u ppreżentah lill-Awtorità Ewropea dwar is-Sigurtà fl-Ikel (“l-Awtorità”) u lill-Kummissjoni fit-8 ta’ Marzu 2017.

(7)

L-Awtorità bagħtet ir-rapport dwar il-valutazzjoni tat-tiġdid lill-applikanti u lill-Istati Membri għall-kummenti tagħhom u għaddiet il-kummenti li rċeviet lill-Kummissjoni. L-Awtorità għamlet id-dossier sommarju supplimentari disponibbli għall-pubbliku.

(8)

Fid-9 ta’ Awwissu 2018, l-Awtorità bagħtet lill-Kummissjoni l-konklużjoni (6) tagħha dwar jekk jistax ikun mistenni li l-beta-ċiflutrin tissodisfa l-kriterji tal-approvazzjoni previsti fl-Artikolu 4 tar-Regolament (KE) Nru 1107/2009.

(9)

L-Awtorità identifikat tħassib. B’mod partikolari, l-Awtorità identifikat riskju inaċċettabbli għall-ħaddiema li jgħabbu u li jiżirgħu ż-żrieragħ tal-pitravi ttrattati bil-beta-ċiflutrin. Barra minn hekk, għal każijiet fejn il-beta-ċiflutrin tiġi applikata fl-għelieqi tal-patata u tal-qamħ, l-Awtorità identifikat riskju għoli għar-residenti, għall-artropodi mhux fil-mira u għall-organiżmi akkwatiċi. Għall-każijiet ukoll ta’ użu fuq it-tadam fis-serer (permanenti u mhux permanenti), l-Awtorità identifikat riskju inaċċettabbli għall-operaturi u għall-ħaddiema, u fil-każ ta’ użu fuq it-tadam fis-serer mhux permanenti, għall-artropodi mhux fil-mira. Barra minn hekk, il-valutazzjoni tar-riskju tal-konsumaturi ma setgħetx tiġi ffinalizzata abbażi tad-data disponibbli.

(10)

Il-Kummissjoni stiednet lill-applikanti jippreżentaw il-kummenti tagħhom dwar il-konklużjoni tal-Awtorità. Barra minn hekk, f’konformità mat-tielet subparagrafu tal-Artikolu 14(1) tar-Regolament ta’ Implimentazzjoni (UE) Nru 844/2012, il-Kummissjoni stiednet lill-applikanti jippreżentaw il-kummenti rigward ir-rapport dwar it-tiġdid. L-applikanti ppreżentaw il-kummenti tagħhom, u dawn ġew eżaminati bir-reqqa.

(11)

Madankollu, minkejja l-argumenti li ressqu l-applikanti, it-tħassib rigward is-sustanza attiva ma setax jiġi eliminat.

(12)

B’konsegwenza ta’ dan, rigward l-użu rappreżentattiv wieħed jew aktar ta’ mill-inqas prodott wieħed tal-protezzjoni tal-pjanti, ma ġiex stabbilit li l-kriterji għall-approvazzjoni previsti fl-Artikolu 4 tar-Regolament (KE) Nru 1107/2009 huma ssodisfati. Għaldaqstant jixraq li l-approvazzjoni tas-sustanza attiva beta-ċiflutrin ma tiġġeddidx f’konformità mal-Artikolu 20(1)(b) ta’ dak ir-Regolament.

(13)

Għaldaqstant jenħtieġ li r-Regolament ta’ Implimentazzjoni (UE) Nru 540/2011 ma jiġix emendat skont dan.

(14)

L-Istati Membri jenħtieġ li jingħataw biżżejjed żmien biex jirtiraw l-awtorizzazzjonijiet għall-prodotti għall-protezzjoni tal-pjanti li fihom il-beta-ċiflutrin.

(15)

Għall-prodotti għall-protezzjoni tal-pjanti li fihom il-beta-ċiflutrin, meta l-Istati Membri jagħtu perjodu ta’ grazzja f’konformità mal-Artikolu 46 tar-Regolament (KE) Nru 1107/2009, jenħtieġ li dak il-perjodu ma jaqbiżx 12-il xahar mid-data tad-dħul fis-seħħ ta’ dan ir-Regolament.

(16)

Ir-Regolament ta’ Implimentazzjoni tal-Kummissjoni (UE) 2019/1589 (7) estenda l-perjodu ta’ approvazzjoni tal-beta-ċiflutrin sal-31 ta’ Ottubru 2020 sabiex il-proċess tat-tiġdid ikun jista’ jitlesta qabel ma jiskadi dak il-perjodu ta’ approvazzjoni. Madankollu, minħabba li d-deċiżjoni dwar in-nuqqas ta’ tiġdid tal-approvazzjoni tittieħed qabel l-iskadenza ta’ dak il-perjodu ta’ approvazzjoni estiż, dan ir-Regolament jenħtieġ li japplika mill-iktar fis.

(17)

Dan ir-Regolament ma jipprevjenix il-preżentazzjoni ta’ applikazzjoni ulterjuri għall-approvazzjoni tal-beta-ċiflutrin skont l-Artikolu 7 tar-Regolament (KE) Nru 1107/2009.

(18)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,