(1)

Ir-Regolament tal-Kummissjoni (UE) Nru 142/2011 (2) jistabbilixxi miżuri ta’ implimentazzjoni għar-regoli tas-saħħa tal-pubbliku u tal-annimali tar-Regolament (KE) Nru 1069/2009, inkluż ir-rekwiżiti li jikkonċernaw l-użu ta’ prodotti sekondarji tal-annimali u ta’ prodotti derivati bħala karburant f’impjanti tal-kombustjoni.

(2)

It-taħlita ta’ laħam u għadam mitħuna (MBM) hija l-proteina tal-annimali derivata mill-ipproċessar ta’ materjali tal-Kategorija 1 jew tal-Kategorija 2. Għal dawn l-aħħar għexieren ta’ snin, l-MBM kienet tintrema’ bħala skart bl-inċinerazzjoni jew bil-koinċinerazzjoni f’konformità mal-Artikolu 12(a) jew (b) tar-Regolament (KE) Nru 1069/2009. Għall-użu sostenibbli ta’ sorsi tal-enerġija, l-industrija żviluppat teknoloġija għall-użu tal-MBM bħala karburant f’apparati tal-kombustjoni f’konformità mal-Artikolu 12(e) ta’ dak ir-Regolament, sabiex tuża s-sħana ġġenerata minn dik il-kombustjoni.

(3)

L-Artikolu 6 tar-Regolament (UE) Nru 142/2011 jipprevedi r-regoli għall-approvazzjoni ta’ impjanti ta’ kombustjoni li jużaw id-demel tal-annimali mrobbijin fi rziezet bħala karburant għall-kombustjoni. Jeħtieġ li dak l-Artikolu jiġi emendat sabiex jinkludi regoli li jikkonċernaw l-użu tal-MBM bħala karburant għall-kombustjoni.

(4)

Il-Kapitolu V tal-Anness III tar-Regolament (UE) Nru 142/2011 jistabbilixxi r-regoli dwar it-tipi ta’ impjanti u ta’ karburanti li jistgħu jintużaw għall-kombustjoni u r-rekwiżiti speċifiċi għal tipi partikolari ta’ impjanti. Jixraq li jiġu previsti regoli li jikkonċernaw l-impjanti ta’ kombustjoni li fihom l-MBM tintuża bħala karburant għall-kombustjoni, inkluż il-limiti ta’ emissjoni u r-rekwiżiti ta’ monitoraġġ. Sabiex jiġu ssodisfati l-istandards ambjentali rilevanti, jenħtieġ li l-limiti tal-emissjonijiet u r-rekwiżiti ta’ monitoraġġ li japplikaw għall-impjanti ta’ kombustjoni li jużaw id-demel tat-tjur bħala karburant, japplikaw ukoll għall-impjanti ta’ kombustjoni b’input termiku nominali totali ta’ mhux aktar minn 50 MW li jużaw l-MBM bħala karburant.

(5)

Jenħtieġ li dan ir-Regolament ikun mingħajr preġudizzju għall-obbligi tad-Direttiva 2010/75/UE tal-Parlament Ewropew u tal-Kunsill (3) li tipprevedi sett komprensiv ta’ regoli dwar il-prevenzjoni u l-kontroll integrati tat-tniġġis li jirriżulta minn attivitajiet industrijali. Din id-Direttiva tippreskrivi wkoll regoli maħsuba għall-prevenzjoni jew, meta dan ma jkunx prattiku, għat-tnaqqis tal-emissjonijiet fl-arja, fl-ilma u fl-art u għall-prevenzjoni tal-ġenerazzjoni tal-iskart, sabiex jinkiseb livell għoli ta’ protezzjoni tal-ambjent globalment. L-installazzjonijiet li jittrattaw il-prodotti sekondarji tal-annimali jaqgħu fil-kamp ta’ applikazzjoni ta’ dik id-Direttiva diment li l-kapaċità tat-trattament tagħhom taqbeż l-10 tunnellati kuljum. Id-Direttiva tobbliga lill-installazzjonijiet kollha li jaqgħu fil-kamp ta’ applikazzjoni tagħha li jkunu detenturi ta’ permess li għandu jkun ibbażat fuq l-aqwa tekniki disponibbli (BAT). Il-konklużjonijiet tal-BAT, li huma parti mid-dokumenti ta’ referenza tal-BAT ippubblikati mill-Kummissjoni Ewropea, huma r-referenza biex tiġi stabbilita l-kundizzjoni tal-permess (4).

(6)

Id-Direttiva (UE) 2015/2193 tal-Parlament Ewropew u tal-Kunsill (5) introduċiet valuri ta’ limitu tal-emissjonijiet għal ċerti sustanzi niġġiesa fl-arja minn impjanti tal-kombustjoni medji b’qawwa termika (input termiku) nominali totali li ma taqbiżx il-50 MW, li jkopru t-tipi kollha ta’ karburanti solidi. Barra minn hekk, ir-Regolament (UE) Nru 142/2011 jiddetermina b’mod komprensiv il-miżuri u l-kundizzjonijiet għall-kombustjoni ta’ prodotti sekondarji tal-annimali speċifiċi f’impjanti bħal dawn. Madankollu, dak iż-żmien il-miżuri u l-kundizzjonijiet għall-użu ta’ prodotti sekondarji tal-annimali jew ta’ prodotti derivati għajr id-demel tat-tjur fl-azjenda agrikola bħala karburant f’impjanti tal-kombustjoni ma kinux stabbiliti. Għalhekk, jeħtieġ li jiġu stabbiliti regoli u rekwiżiti, inklużi valuri ta’ limitu tal-emissjonijiet speċifiċi, għall-użu tal-MBM bħala karburant f’impjanti tal-kombustjoni b’input termiku nominali totali li ma taqbiżx l-50 MW fil-qafas tal-leġiżlazzjoni dwar il-prodotti sekondarji tal-annimali.

(7)

Ir-rekwiżiti stabbiliti fir-Regolament (UE) Nru 142/2011 jenħtieġ li jkunu stretti biżżejjed biex jikkonformaw mal-limiti tal-emissjonijiet għal karburanti solidi oħrajn fid-Direttiva (UE) 2015/2193. Dan ir-Regolament jiżgura wkoll li l-impatti negattivi possibbli fuq l-ambjent jew fuq is-saħħa tal-bniedem li jirriżultaw mill-ħruq tal-MBM ma jkunux akbar minn dawk li jirriżultaw mill-kombustjoni tal-iskart.

(8)

Il-valuri ta’ limitu tal-emissjonijiet għall-użu ta’ materjali differenti bħala karburant f’impjanti tal-kombustjoni b’kapaċità termali kklassifikata (input termiku nominali) totali li taqbeż il-50 MW huma stabbiliti fid-Direttiva 2010/75/UE, li tapplika f’każ tal-użu ta’ prodotti sekondarji tal-annimali u ta’ prodotti derivati, inkluż l-MBM, bħala karburant f’dawn l-impjanti ta’ kombustjoni.

(9)

Għalhekk, jenħtieġ li l-Artikolu 6 tar-Regolament (UE) Nru 142/2011 u l-Anness III tiegħu jiġu emendati skont dan.

(10)

B’mod simili, dan ir-Regolament għandu jippermetti lill-awtoritajiet kompetenti li jagħtu perjodu ta’ tranżizzjoni lill-impjanti tal-kombustjoni eżistenti biex jikkonformaw mar-rekwiżiti dwar iż-żieda kkontrollata tat-temperatura tal-gass tal-egżost, diment li dawk l-emissjonijiet ma jkunux ta’ riskju għas-saħħa pubblika u tal-annimali jew tal-ambjent. Il-leġiżlazzjoni dwar il-prodotti sekondarji tal-annimali ma twaqqafx lill-Istati Membri milli japplikaw ir-regoli ta’ kalkolu rilevanti għal valuri ta’ limitu tal-emissjonijiet, stabbiliti fid-Direttiva (UE) 2015/2193, meta l-MBM tinħaraq flimkien ma’ karburanti jew skart ieħor.

(11)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,