(1)

Ir-Regolament tal-Kummissjoni (KE) Nru 798/2008 (3) jistabbilixxi r-rekwiżiti dwar iċ-ċertifikazzjoni veterinarja għall-importazzjonijiet fl-Unjoni u t-tranżitu minnha, inkluż il-ħżin waqt it-tranżitu, tat-tjur u tal-prodotti tat-tjur (“il-prodotti”). Jipprevedi li tista’ ssir importazzjoni tal-prodotti jew li dawn jgħaddu mill-Unjoni bi tranżitu biss mill-pajjiżi terzi, mit-territorji, miż-żoni u mill-kumpartimenti elenkati fil-kolonni 1 u 3 tat-tabella fil-Parti 1 tal-Anness I tiegħu.

(2)

Ir-Regolament (KE) Nru 798/2008 jistabbilixxi wkoll il-kundizzjonijiet biex pajjiż terz, territorju, żona jew kumpartiment ikunu jistgħu jitqiesu ħielsa mill-influwenza tat-tjur b’patoġeniċità għolja (l-HPAI).

(3)

L-Istati Uniti tal-Amerka huma elenkati fil-Parti 1 tal-Anness I tar-Regolament (KE) Nru 798/2008 bħala pajjiż terz li minnu jistgħu jiġu impurtati prodotti fl-Unjoni u jgħaddu minnha bi tranżitu, mingħajr restrizzjoni minħabba l-preżenza tal-HPAI.

(4)

Il-Ftehim bejn il-Komunità Ewropea u l-Istati Uniti tal-Amerka dwar miżuri sanitarji li jipproteġu s-saħħa pubblika u s-saħħa tal-annimali fil-kummerċ tal-annimali ħajjin u tal-prodotti tal-annimali (“il-Ftehim”) (4), kif approvat bid-Deċiżjoni tal-Kunsill 98/258/KE (5), jipprovdi għal rikonoxximent reċiproku tal-miżuri ta’ reġjonalizzazzjoni fil-każ ta’ tifqigħat tal-marda fl-Unjoni jew fl-Istati Uniti tal-Amerka.

(5)

Fit-8 ta’ April 2020, l-Istati Uniti tal-Amerka kkonfermaw il-preżenza tal-HPAI tas-sottotip H7N3 f’azjenda tat-tjur fil-kontea ta’ Chesterfield fl-Istat ta’ South Carolina. Għaldaqstant it-territorju kollu tal-Istati Uniti tal-Amerka ma jistax jibqa’ jitqies ħieles minn dik marda.

(6)

L-awtoritajiet veterinarji tal-Istati Uniti tal-Amerka ħolqu żona ta’ kontroll ta’ 10 km madwar l-azjenda milquta, li tinkludi partijiet tal-kontej Chesterfield, Lancaster u Kershaw fl-Istat ta’ South Carolina. L-awtoritajiet veterinarji tal-Istati Uniti tal-Amerka kkonfermaw li huma ssospendew minnufih il-ħruġ taċ-ċertifikati veterinarji għall-konsenji tal-prodotti maħsuba għall-esportazzjoni lejn l-Unjoni mit-territorju kollu tal-Istati Uniti tal-Amerka u implimentaw politika ta’ eradikazzjoni biex jikkontrollaw l-HPAI u jillimitaw it-tixrid ta’ dik il-marda.

(7)

L-Istati Uniti tal-Amerka ppreżentaw informazzjoni dwar il-qagħda epidemjoloġika fit-territorju tagħhom u dwar il-miżuri li ħadu għall-prevenzjoni ta’ aktar tixrid tal-HPAI, u l-Kummissjoni evalwatha. Abbażi ta’ dik l-evalwazzjoni, kif ukoll tal-impenji stabbiliti fil-Ftehim u l-garanziji previsti mill-Istati Uniti tal-Amerka, biex l-Unjoni titħares mir-riskji għas-saħħa tal-annimali assoċjati mal-introduzzjoni ta’ prodotti fl-Unjoni li jkunu ġejjin mill-Istati Uniti tal-Amerka, hu xieraq li jsiru restrizzjonijiet fuq l-introduzzjoni ta’ prodotti fl-Unjoni miż-żona fl-Istat ta’ South Carolina affettwata mill-HPAI, li l-awtoritajiet veterinarji tal-Istati Uniti għamlulha restrizzjonijiet minħabba t-tifqigħa attwali.

(8)

Għalhekk, l-entrata għall-Istati Uniti tal-Amerka fit-tabella stabbilita fil-Parti 1 tal-Anness I tar-Regolament (KE) Nru 798/2008 jenħtieġ tiġi emendata biex tqis il-qagħda epidemjoloġika attwali f’dak il-pajjiż terz minħabba t-tifqigħa attwali tal-HPAI. Għalhekk jenħtieġ li l-Anness I tar-Regolament (KE) Nru 798/2008 jiġi emendat kif xieraq.

(9)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,