(1)

Fil-21 ta’ Frar 2019, il-Kummissjoni Ewropea bdiet investigazzjoni anti-dumping fir-rigward tal-importazzjonijiet fl-Unjoni ta’ ċerti materjali tal-fibra tal-ħġieġ minsuġa u/jew meħjuta (“GFF”) li joriġinaw mir-Repubblika tal-Poplu taċ-Ċina (“ir-RPĊ”) u mill-Eġittu (flimkien imsejħa “l-pajjiżi kkonċernati”) skont l-Artikolu 5 tar-Regolament bażiku. Hija ppubblikat Notifika ta’ Bidu f’Il-Ġurnal Uffiċjali tal-Unjoni Ewropea (2) (“in-Notifika ta’ Bidu”).

(2)

Il-Kummissjoni nediet l-investigazzjoni wara li fit-8 ta’ Jannar 2019 Tech-Fab Europe (“l-ilmentatur”) ressqet ilment f’isem il-produtturi li jirrappreżentaw aktar minn 25 % tal-produzzjoni totali tal-Unjoni tal-GFF. L-ilment kien fih evidenza ta’ dumping u ta’ dannu materjali riżultanti, u dan kien biżżejjed biex il-bidu tal-investigazzjoni jkun iġġustifikat.

(3)

Fis-16 ta’ Mejju 2019, il-Kummissjoni bdiet investigazzjoni antisussidji separata fir-rigward tal-importazzjonijiet fl-Unjoni tal-GFF li joriġinaw mir-RPĊ u mill-Eġittu u bdiet investigazzjoni separata. Hija ppubblikat Notifika ta’ Bidu f’Il-Ġurnal Uffiċjali tal-Unjoni Ewropea (3).

(4)

Fil-31 ta’ Lulju 2019, l-ilmentatur ippreżenta talba għar-reġistrazzjoni tal-importazzjonijiet tal-GFF li joriġinaw mill-pajjiżi kkonċernati skont l-Artikolu 14(5) tar-Regolament bażiku. L-ilmentatur argumenta li wara l-perjodu ta’ investigazzjoni, l-importazzjonijiet tal-GFF żdiedu sostanzjalment u l-ħażna fl-Unjoni laħqu skala li thedded li tfixkel l-effett ta’ rimedju tal-miżuri anti-dumping potenzjali.

(5)

Produttur esportatur wieħed, utent wieħed u l-Kamra tal-Kummerċ taċ-Ċina għall-Importazzjoni u għall-Esportazzjoni ta’ Prodotti Industrijali Ħfief u Prodotti tal-Artiġjanat (“CCCLA”) opponew it-talba għar-reġistrazzjoni. Dawn il-partijiet argumentaw li t-talba ma pprovdietx biżżejjed evidenza kif mitlub mill-Artikolu 14(5) tar-Regolament bażiku. Huma argumentaw ukoll li d-data dwar l-importazzjonijiet mir-RPĊ u mill-Eġittu jenħtieġ li tiġi analizzata separatament u li, fi kwalunkwe każ, l-importazzjonijiet inkwistjoni x’aktarx li ma jfixklux serjament l-effett ta’ rimedju tad-dazju anti-dumping definittiv billi l-prezz medju tal-bejgħ tal-importazzjonijiet kien żdied mill-2018 sal-2019.

(6)

Kif spjegat fil-premessi (48) u (50), il-Kummissjoni ddeċidiet li ma timponix miżuri proviżorji f’dan il-każ. Għalhekk, it-talba għar-reġistrazzjoni ma baqgħetx meħtieġa u, għalhekk, l-analiżi ulterjuri tagħha, flimkien mal-analiżi tal-kummenti miġbura fil-qosor fil-premessa (5), ma baqgħetx neċessarja.

(7)

Fin-Notifika ta’ Bidu, il-Kummissjoni stiednet lill-partijiet interessati jagħmlu kuntatt magħha sabiex jipparteċipaw fl-investigazzjoni. Barra minn hekk, il-Kummissjoni għarrfet speċifikament lill-ilmentatur, lill-produtturi l-oħra magħrufa tal-Unjoni, lill-produtturi esportaturi magħrufa u lill-awtoritajiet taċ-Ċina u tal-Eġittu, lill-importaturi u lill-utenti magħrufa dwar il-bidu tal-investigazzjoni u stednithom jipparteċipaw.

(8)

Il-partijiet interessati kellhom l-opportunità jikkummentaw dwar il-bidu tal-investigazzjoni u jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(9)

L-intervent tal-Uffiċjal tas-Seduta intalab minn Zhejiang Hengshi Fiberglass Fabrics Co. Ltd. Is-seduta saret fit-28 ta’ Ottubru 2019. L-aġenda tas-seduta kienet l-applikazzjoni proposta tal-Artikolu 18 tar-Regolament bażiku għal dik il-kumpanija. Il-Kummissjoni analizzat il-punti mqajma u indirizzathom fir-rivelazzjoni finali. Ma kien hemm l-ebda azzjoni ta’ segwitu speċifika rrakkomandata mill-Uffiċjal tas-Seduta.

(10)

Kif imsemmi fil-premessa (48), il-Kummissjoni ċċarat l-ambitu tal-prodott matul l-investigazzjoni u tat lill-partijiet interessati kkonċernati mill-kjarifika, jew li setgħu ma ppreżentawx ruħhom minħabba li kienu jemmnu li ma kinux ikkonċernati mill-proċediment, l-opportunità li jippreżentaw lilhom infushom u li jitolbu kwestjonarju fi żmien limitat. L-ebda parti addizzjonali ma ppreżentat ruħha.

(11)

Fin-Notifika ta’ bidu tagħha, il-Kummissjoni ddikjarat li tista’ tieħu kampjun tal-partijiet interessati skont l-Artikolu 17 tar-Regolament bażiku.

(12)

Fin-Notifika ta’ Bidu, il-Kummissjoni ddikjarat li kienet iddeċidiet li tillimita l-investigazzjoni għal għadd raġonevoli ta’ produtturi tal-Unjoni billi tapplika l-proċedura tal-kampjunar. Hija żiedet li kienet għażlet proviżorjament kampjun ta’ produtturi tal-Unjoni fuq il-bażi tal-volum ta’ produzzjoni rrapportat tal-prodott simili fl-Unjoni bejn Ottubru 2017 u Settembru 2018 u filwaqt li qieset ukoll il-firxa ġeografika. Dan il-kampjun kien jikkonsisti fi tliet produtturi tal-Unjoni li jirrappreżentaw aktar minn 40 % tal-produzzjoni totali stmata tal-GFF fl-Unjoni. Il-Kummissjoni stiednet lill-partijiet interessati biex jikkummentaw dwar il-kampjun proviżorju.

(13)

Produttur tal-Unjoni wieħed biss ikkummenta, u ssuġġerixxa l-inklużjoni tar-raba’ kumpanija fil-kampjun biex jitkabbru r-rappreżentanza ġeografika, il-volum tal-produzzjoni u t-tipi ta’ prodotti koperti.

(14)

Sabiex tagħmel ħilitha bl-għan li tieħu kampjun tal-akbar volum rappreżentattiv ta’ produzzjoni, il-Kummissjoni ddeċidiet li tkabbar il-kampjun għal erba’ kumpaniji. Il-produtturi finali tal-Unjoni fil-kampjun kienu jirrappreżentaw aktar minn 40 % tal-produzzjoni totali stmata tal-GFF fl-Unjoni. Il-kampjun huwa rappreżentattiv tal-industrija tal-Unjoni.

(15)

Biex tiddeċiedi jekk kienx meħtieġ kampjunar u, jekk iva, biex tagħżel kampjun, il-Kummissjoni talbet importaturi mhux relatati sabiex jipprovdu l-informazzjoni speċifikata fin-Notifika ta’ Bidu.

(16)

Importatur mhux relatat wieħed biss (Euroresins UK Ltd.) ipprovda l-informazzjoni mitluba u qabel li jkun inkluż fil-kampjun. Minħabba l-ammont żgħir, il-Kummissjoni ddeċidiet li ma kienx meħtieġ li jittieħed kampjun.

(17)

Sabiex tiddeċiedi jekk kienx hemm il-ħtieġa li jittieħed kampjun u, jekk iva, biex tagħżel kampjun, il-Kummissjoni talbet lill-produtturi esportaturi magħrufa kollha fir-RPĊ sabiex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-Missjoni tar-Repubblika tal-Poplu taċ-Ċina għall-Unjoni Ewropea sabiex tidentifika u/jew tikkuntattja lil produtturi esportaturi oħrajn, jekk hemm, li jistgħu jkunu interessati jipparteċipaw fl-investigazzjoni.

(18)

Kien hemm disa’ produtturi esportaturi jew gruppi ta’ produtturi esportaturi fir-RPĊ li ppreżentaw l-informazzjoni mitluba u qablu li jkunu inklużi fil-kampjun. Skont l-Artikolu 17(1) tar-Regolament bażiku, il-Kummissjoni għażlet kampjun ta’ żewġ gruppi ta’ produtturi esportaturi abbażi tal-ikbar volum rappreżentattiv ta’ esportazzjonijiet lejn l-Unjoni li jista’ jiġi investigat b’mod raġonevoli fiż-żmien disponibbli. Il-gruppi fil-kampjun ta’ produtturi esportaturi kienu jirrappreżentaw 79 % tal-esportazzjonijiet irrapportati tal-GFF mir-RPĊ lejn l-Unjoni matul il-perjodu ta’ investigazzjoni.

(19)

Il-kampjun tal-produtturi esportaturi jew gruppi ta’ produtturi esportaturi huwa li ġej:

(20)

Skont l-Artikolu 17(2) tar-Regolament bażiku, il-produtturi esportaturi magħrufin u kkonċernati kollha, u l-awtoritajiet tar-RPĊ ġew ikkonsultati dwar l-għażla tal-kampjun.

(21)

Waslu kummenti dwar l-għażla tal-kampjun minn produttur esportatur wieħed mhux fil-kampjun, minn produttur esportatur wieħed fil-kampjun u mis-CCCLA.

(22)

Il-produttur esportatur mhux fil-kampjun sostna li ż-żewġ gruppi ta’ produtturi esportaturi fil-kampjun għandhom proċess ta’ produzzjoni integrat vertikalment, li kien differenti mill-proċess ta’ manifattura tiegħu stess (mhux integrat) u, għalhekk, huwa qies li l-gruppi ta’ produtturi esportaturi fil-kampjun ma kinux jirrappreżentaw is-sitwazzjoni tiegħu. Bl-istess mod, is-CCCLA sostniet li ż-żewġ gruppi fil-kampjun ta’ produtturi esportaturi kienu integrati vertikalment u, għalhekk, il-kampjun ma kienx rappreżentattiv tal-industrija Ċiniża tat-tessut tal-fibra tal-ħġieġ li kienet tinkludi wkoll produtturi mhux integrati.

(23)

Skont l-Artikolu 17(1) tar-Regolament bażiku, l-għażla tal-kampjun jenħtieġ li tkun ibbażata fuq l-akbar volum rappreżentattiv ta’ produzzjoni, bejgħ jew esportazzjonijiet li jista’ jiġi investigat b’mod raġonevoli fiż-żmien disponibbli. Kif iddikjarat fil-premessa (18), il-gruppi tal-kampjun ta’ produtturi esportaturi kienu jirrappreżentaw 79 % tal-esportazzjonijiet irrapportati mir-RPĊ lejn l-Unjoni matul il-perjodu ta’ investigazzjoni u dawn tqiesu li kienu rappreżentattivi. Fi kwalunkwe każ, iż-żewġ gruppi ta’ produtturi esportaturi inklużi fil-kampjun kienu jinkludu kemm entitajiet integrati vertikalment kif ukoll entitajiet mhux integrati u l-analiżi tal-Kummissjoni tqis dan l-element b’mod xieraq. Fil-fatt, il-maġġoranza tal-esportazzjonijiet lejn l-UE saru minn entitajiet mhux integrati. Għaldaqstant, l-affermazzjoni ġiet irrifjutata.

(24)

Barra minn hekk, il-produtturi esportaturi kollha mhux fil-kampjun kellhom l-opportunità li jitolbu eżami individwali skont l-Artikolu 17(3) tar-Regolament bażiku. Kif iddikjarat fil-premessa (39), l-ebda wieħed mill-produtturi esportaturi ma talab eżami individwali.

(25)

Is-CCCLA sostniet ukoll li bl-għażla ta’ żewġ gruppi biss ta’ produtturi esportaturi, dan kien qiegħed jirriskja li jaffettwa materjalment l-eżitu tal-investigazzjoni skont l-Artikolu 17(4) tar-Regolament bażiku, jekk wieħed mill-gruppi magħżula ma jibqax jikkoopera jew jiddeċiedi li jirtira mill-investigazzjoni.

(26)

Is-CCCLA argumentat li f’xenarju bħal dan, ir-rata tad-dazju għall-produtturi esportaturi Ċiniżi li kkooperaw u mhux fil-kampjun, jekk ikun hemm, tkun ibbażata fuq id-dazju stabbilit għall-bqija tal-grupp fil-kampjun u li l-kampjun ma jibqax rappreżentattiv. Għalhekk, is-CCCLA talbet lill-Kummissjoni testendi l-kampjun billi tinkludi produttur esportatur wieħed ieħor.

(27)

Kif iddikjarat fil-premessa (19), il-gruppi ta’ produtturi esportaturi inklużi fil-kampjun kienu jinkludu ħames entitajiet produtturi esportaturi. Barra minn hekk, kif iddikjarat fil-premessa (18) il-kampjun kien ikopri 79 % tal-esportazzjonijiet irrapportati mir-RPĊ lejn l-Unjoni u kien meqjus bħala rappreżentattiv. Għalhekk, il-Kummissjoni ddeċidiet li ma testendix il-kampjun billi dan kien ikun jipprevjeni milli jiġu investigati l-entitajiet kollha fi ħdan it-termini tal-investigazzjoni. Madankollu, kif imsemmi fil-premessa (24), il-kumpaniji li kkooperaw u mhux inklużi fil-kampjun kellhom l-opportunità li jitolbu eżami individwali skont l-Artikolu 17(3) tar-Regolament bażiku, iżda l-ebda wieħed mill-produtturi esportaturi ma talab eżami individwali.

(28)

Fir-rigward tal-grupp CNBM, filwaqt li Jushi u Hengshi ma kkontestawx il-fatt li kienu kumpaniji relatati, huma sostnew li ma kinux relatati ma’ Taishan. Jushi affermat li l-Kummissjoni ma setgħetx tiddependi b’mod mekkaniku fuq l-Artikolu 127(1)(d) jew (f) tar-Regolament ta’ Implimentazzjoni tal-Kummissjoni (UE) 2015/2447 tal-24 ta’ Novembru 2015 (4) (l-“Att ta’ Implimentazzjoni tal-Kodiċi Doganali”) għat-trattament ta’ Hengshi, Jushi u Taishan bħala entità waħda. B’appoġġ għal din id-dikjarazzjoni, Jushi rreferiet għall-Bord tad-WTO fil-Korea – Ċerta Karta (5) u l-Linji Gwida għal tranżazzjonijiet relatati ta’ kumpaniji elenkati fil-Borża ta’ Shanghai.

(29)

Taishan ikkontestat ukoll il-fatt li kellha x’taqsam ma’ Jushi u Hengshi u argumentat li (i) ma kinux sidien diretti tal-ishma ta’ xulxin, (ii) ma kellhom l-ebda parteċipazzjoni azzjonarja diretta komuni, (iii) kellhom proċessi ta’ teħid ta’ deċiżjonijiet u istituzzjonijiet ta’ ġestjoni differenti, (iv) ma kienx hemm duplikazzjoni fil-membri tal-bordijiet tagħhom, (v) ma kien hemm ebda tranżazzjoni relatata bejn Hengshi/Jushi u Taishan, (vi) kienu kompetituri fis-suq, u (vii) kienu jinsabu ġeografikament ’il bogħod minn Jushi u Hengshi. Fl-aħħar nett, Taishan iddikjarat li f’sitwazzjoni simili f’investigazzjoni anti-dumping preċedenti li tikkonċerna l-importazzjonijiet ta’ moduli fotovoltajċi tas-siliċju kristallin u komponenti ewlenin li joriġinaw mir-RPĊ (6), il-kumpaniji ma kinux ġew ittrattati bħala relatati.

(30)

L-investigazzjoni żvelat li China National Building Materials (“CNBM”) hija intrapriża Ċiniża tal-Istat, proprjetà diretta u indiretta sa 41,27 % ta’ CNBM Parent, li hija proprjetà tal-Kummissjoni Statali għas-Superviżjoni u għall-Amministrazzjoni tal-Kunsill tal-Istat (“SASAC”) kollha kemm hi. CNBM għandha sehem ta’ 26,97 % f’China Jushi Co., Ltd. (“China Jushi”), li hija l-uniku azzjonist tal-Grupp Jushi (7).

(31)

F’Settembru 2017, CNBM daħlet fi Ftehim ta’ Fużjoni (8) ma’ Sinoma li ġie ffinalizzat f’Mejju 2018. Sinoma, permezz tas-sussidjarja tagħha Sinoma Science & Technology Co., kienet is-sid ta’ Taishan. Wara l-fużjoni, Sinoma ġiet fuża f’CNBM u ġiet assorbita minnha. Bħala konsegwenza, CNBM għandha sehem ta’ 26,97 % f’China Jushi (l-uniku azzjonist ta’ Jushi) u ta’ 60,24 % f’Sinoma Science & Technology Co., Ltd. (l-uniku azzjonist ta’ Taishan).

(32)

L-Artikolu 127(d) tal-Att ta’ Implimentazzjoni tal-Kodiċi Doganali jistabbilixxi li żewġ persuni għandhom jitqiesu li jkunu relatati jekk: parti terza tkun tippossjedi jew tikkontrolla jew iżżomm direttament jew indirettament 5 % jew aktar tal-istokk jew l-ishma li jivvutaw jew iż-żewġ kondizzzjonijiet. CNBM għandha sehem ta’ 26,97 % f’China Jushi (l-uniku azzjonist ta’ Jushi) u ta’ 60,24 % f’Sinoma Science & Technology Co., Ltd. (l-uniku azzjonist ta’ Taishan). Għalhekk, instab li l-kumpaniji kienu relatati.

(33)

Barra minn hekk, skont rapport tal-kumpanija mill-kumpanija ta’ senserija Ċiniża Guotai Junan Securities mill-2019 (9), CNBM ilha torganizza mill-ġdid l-entitajiet operatorji tagħha sabiex ittejjeb il-koordinazzjoni reġjonali u telimina l-kompetizzjoni orizzontali fost is-sussidjarji elenkati mill-2017. Barra minn hekk, CNBM biħsiebha ssolvi kwistjonijiet ta’ kompetizzjoni orizzontali sal-2020. Skont l-informazzjoni disponibbli pubblikament fir-rapport, CNBM ippjanat li tibda dan il-proċess billi tikkonsolida n-negozju tagħha tal-fibra tal-ħġieġ permezz ta’ injezzjonijiet ta’ assi bejn China Jushi u Sinoma Science & Technology (azzjonist uniku ta’ Taishan). Għalhekk, l-evidenza miġbura matul l-investigazzjoni ma tappoġġjax l-argument tal-kumpaniji li l-parteċipazzjoni azzjonarja komuni ma għandha l-ebda implikazzjoni prattika u li l-kumpaniji joperaw b’mod indipendenti. Għall-kuntrarju, dik l-evidenza tissuġġerixxi li lil hinn mis-sempliċi parteċipazzjoni azzjonarja (li waħidha hija determinanti għall-konklużjoni li l-kumpaniji huma relatati), it-tliet kumpaniji jistgħu wkoll jinfluwenzaw b’mod sinifikanti d-deċiżjonijiet kummerċjali ta’ xulxin, u li l-kumpanija li tikkontrollahom (CNBM) għandha l-għan li tal-anqas tikkoordina, jekk mhux tintegra, l-operazzjonijiet tagħhom (“issolvi l-kwistjonijiet ta’ kompetizzjoni orizzontali”). Għalhekk, il-Kummissjoni rrifjutat l-affermazzjoni li l-konklużjoni tagħha li tqis it-tliet kumpaniji bħala relatati kienet tinjora realtajiet fattwali u ekonomiċi.

(34)

Fir-rigward tal-argument li l-Kummissjoni ma setgħetx tittratta lil Hengshi, Jushi u Taishan bħala grupp wieħed, l-Artikolu 9(5) tar-Regolament bażiku jippermetti lill-Kummissjoni tistabbilixxi dazju anti-dumping individwali uniku meta jeżistu rabtiet korporattivi bejn il-fornituri. Dan biex jiġi żgurat li l-awtoritajiet doganali jkunu jistgħu jinfurzaw miżuri b’mod effettiv, filwaqt li jiġi evitat li kumpaniji relatati jgħaddu l-esportazzjonijiet tagħhom permezz tal-kumpanija bl-anqas dazju. Barra minn hekk, l-Artikolu 2(1) tar-Regolament bażiku li jittratta l-valur normali jiddikjara li, meta jiġi ddeterminat jekk żewġ partijiet humiex relatati, il-Kummissjoni tista’ tqis l-Artikolu 127 tal-Att ta’ Implimentazzjoni Kodiċi Doganali. Ma hemm l-ebda raġuni għaliex il-Kummissjoni tapplika standards differenti għall-produtturi esportaturi fil-kuntest tal-valur normali u meta tistabbilixxi jekk humiex relatati jew le għall-fini tal-Artikolu 9(5) tar-Regolament bażiku. Għalhekk, il-Kummissjoni konsistentement tuża l-kriterji stipulati fl-Artikolu 127 tal-Att ta’ Implimentazzjoni tal-Kodiċi Doganali meta tapplika l-Artikolu 9(5) tar-Regolament bażiku. Minbarra dan, din il-prattika konsistenti kienet ikkomunikata lill-partijiet kollha fin-Notifika ta’ Bidu fil-bidu tal-proċediment. Il-każ tad-WTO (10) msemmi minn Jushi fil-premessa (28) ma jappoġġax id-dikjarazzjoni tal-kumpanija. Fil-fatt, għall-kuntrarju ta’ dak li Jushi u Hengshi jippruvaw jinferu, il-Bord tad-WTO f’dak il-każ ikkonferma li, għall-fini ta’ determinazzjonijiet ta’ dumping f’investigazzjonijiet anti-dumping, ir-regola fl-Artikolu 6.10 tal-Ftehim dwar l-Anti-dumping tad-WTO (fejn marġni ta’ dumping jenħtieġ li jiġi kkalkulat għal kull produttur esportatur) mhux neċessarjament tipprekludi li entitajiet ġuridiċi distinti jiġu ttrattati bħala esportatur jew produttur uniku. Il-Bord innota li dan it-trattament ikun permess “fejn ir-relazzjoni strutturali u kummerċjali bejn il-kumpaniji inkwistjoni tkun suffiċjentement qrib li tiġi kkunsidrata bħala esportatur uniku” (11). Bl-applikazzjoni ta’ din il-konsiderazzjoni, il-Bord ma stabbilixxiex il-kriterji li l-awtoritajiet investigattivi jenħtieġ li japplikaw biex jivvalutaw jekk il-kumpaniji humiex relatati. Il-Bord sempliċiment ikkunsidra l-elementi speċifiċi (bħall-parteċipazzjoni azzjonarja, bord tad-diretturi, kanali ta’ bejgħ) li kienu quddiem l-awtorità investigattiva f’dak il-każ. Il-korp tal-Appell f’KE – Qfieli (Fasteners) ikkonferma l-possibbiltà li jiġu ttrattati għadd ta’ esportaturi bħala entità waħda, u elenka wkoll elementi li jistgħu jkunu rilevanti, (i) bħall-eżistenza ta’ rabtiet korporattivi u strutturali bejn l-esportaturi, bħall-kontroll, il-parteċipazzjoni azzjonarja u l-ġestjoni komuni; (ii) l-eżistenza ta’ rabtiet korporattivi u strutturali bejn l-Istat u l-esportaturi, bħall-kontroll, il-parteċipazzjoni azzjonarja u l-ġestjoni komuni; u (iii) kontroll jew influwenza materjali mill-Istat fir-rigward tal-ipprezzar u l-output (12). F’dan ir-rigward, mill-elementi legali u fattwali ta’ dan il-każ, ma tistax tkun ikkontestata l-eżistenza ta’ rabtiet korporattivi bejn Jushi, Hengshi u Taishan. Għalhekk, il-Kummissjoni tista’ tittrattahom bħala entità waħda skont it-tifsira tal-Artikolu 9(5) tar-Regolament bażiku.

(35)

Fir-rigward tad-dikjarazzjoni li saret minn Taishan li f’sitwazzjoni simili f’investigazzjoni anti-dumping preċedenti (13), ċerti kumpaniji ma kinux ġew ittrattati bħala relatati, il-Kummissjoni nnotat li ma kien hemm l-ebda kwistjoni relatata mar-relazzjoni fl-investigazzjoni indikata minn Taishan. Għalhekk, ma setgħetx tifhem kif dak il-każ jgħin lil Taishan fid-dikjarazzjoni tagħha dwar ir-relazzjoni tagħha ma’ Jushi u Hengshi. Fi kwalunkwe każ, is-sitwazzjoni f’dan il-każ ġiet ivvalutata abbażi tal-merti tagħha stess, fid-dawl tal-qafas legali applikabbli.

(36)

Fuq il-bażi ta’ dan ta’ hawn fuq, il-Kummissjoni kkonkludiet li dawn kienu kumpaniji relatati għall-fini ta’ din l-investigazzjoni u, għalhekk, l-affermazzjonijiet kollha f’dan ir-rigward ġew irrifjutati.

(37)

Wara li rċeviet id-Dokument ta’ Rivelazzjoni Ġenerali fid-19 ta’ Diċembru 2019 (“ir-rivelazzjoni finali”), Taishan iddikjarat li s-CNBM kellha biss kontroll limitat ħafna fuq id-deċiżjonijiet kummerċjali u ta’ operazzjoni ta’ Jushi jew Hengshi. Huma tennew li Taishan u Hengshi/Jushi kienu kompetituri fis-suq u nnotaw li preċedentament huma kienu ppreżentaw evidenza b’appoġġ għal dawn id-dikjarazzjonijiet kif iddikjarat fil-premessa (29). Barra minn hekk, Taishan iddikjarat li għalkemm kienet relatata ma’ Hengshi/Jushi permezz ta’ sjieda komuni tal-istat, ftit li xejn kellha interess li tikkoordina l-attivitajiet tal-esportazzjoni tagħha ma’ Hengshi/Jushi wara l-impożizzjoni ta’ miżuri. Taishan offriet impenn li effettivament tnaqqas kwalunkwe rabta kummerċjali bejn Taishan u Hengshi/Jushi u għalhekk ma tippermettix;li kwalunkwe esportazzjoni tal-GFF lejn l-Unjoni minn Hengshi/Jushi tgħaddi minn Taishan. Għalhekk, ma jkunx hemm bżonn li jiġi impost dazju anti-dumping uniku fuq il-grupp kollu.

(38)

Kif deskritt fil-premessa (33), l-investigazzjoni żvelat li permezz tal-azzjonisti komuni tagħhom, it-tliet kumpaniji huma kapaċi jinfluwenzaw b’mod sinifikanti d-deċiżjonijiet kummerċjali ta’ xulxin. L-evidenza fil-fajl turi li l-kumpaniji jinsabu fil-proċess li jikkonsolidaw u jikkoordinaw operazzjonijiet fil-fibra tal-ħġieġ. Ma ġiet ipprovduta l-ebda informazzjoni jew evidenza ġdida li tista’ tinvalida dawn is-sejbiet. Fil-fatt, Taishan ma kkontestatx il-pjanijiet tal-azzjonist ewlieni tagħha li jkun ikkonsolidat in-negozju tal-fibra tal-ħġieġ tagħha. Tali pjanijiet huma f’kontradizzjoni ċara ma’ kwalunkwe impenn biex jitnaqqsu r-rabtiet kummerċjali bejn Taishan u Hengshi/Jushi. Barra minn hekk, u mingħajr ma tieħu pożizzjoni dwar jekk il-Kummissjoni setgħetx taċċetta impenn bħal dan, jidher ċar li l-kumpanija mhijiex f’pożizzjoni li tidħol f’xi tip ta’ impenn mingħajr l-endorsjar tal-kontrolluri finali tagħha. Għalhekk, l-affermazzjonijiet u l-impenn ta’ Taishan ġew irrifjutati.

(39)

Seba’ mill-produtturi esportaturi Ċiniżi li bagħtu lura l-formola tal-kampjunar informaw lill-Kummissjoni bl-intenzjoni tagħhom li jitolbu eżami individwali skont l-Artikolu 17(3) tar-Regolament bażiku. Il-Kummissjoni għamlet il-kwestjonarju disponibbli online fil-jum tal-bidu. Barra minn hekk, il-Kummissjoni informat lill-produtturi esportaturi mhux inklużi fil-kampjun li kienu meħtieġa jipprovdu tweġiba għall-kwestjonarju jekk kienu jixtiequ li jiġu eżaminati individwalment. Madankollu, l-ebda waħda mill-kumpaniji ma pprovdiet tweġiba għall-kwestjonarju.

(40)

Il-Kummissjoni bagħtet kwestjonarju dwar l-eżistenza ta’ distorsjonijiet sinifikanti fir-RPĊ fis-sens tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”). Il-kwestjonarji għall-produtturi, għall-importaturi, għall-utenti tal-Unjoni, u għall-produtturi esportaturi fir-RPĊ u fl-Eġittu kienu disponibbli online (14) fil-jum tal-bidu.

(41)

Il-Kummissjoni rċeviet tweġibiet għall-kwestjonarju mill-erba’ produtturi tal-Unjoni fil-kampjun, minn ħames utenti, minn importatur mhux relatat wieħed, mill-produtturi esportaturi kollha fil-kampjun fir-RPĊ u minn żewġ produtturi esportaturi fl-Eġittu li jappartjenu għall-istess grupp (CNBM). Il-GTĊ ma weġibx għall-kwestjonarju dwar l-eżistenza ta’ distorsjonijiet sinifikanti fir-RPĊ.

(42)

Il-Kummissjoni fittxet u vverifikat l-informazzjoni kollha li hija qieset bħala neċessarja sabiex jiġu stabbiliti d-dumping, id-dannu li jirriżulta u l-interess tal-Unjoni. Iż-żjarat ta’ verifika skont l-Artikolu 16 tar-Regolament bażiku saru fil-bini tal-partijiet li ġejjin:

(43)

Żewġ produtturi esportaturi Ċiniżi inklużi fil-kampjun (Jushi u Hengshi), parti mill-grupp CNBM, naqsu milli jikkooperaw fl-investigazzjoni. Għal din ir-raġuni, il-Kummissjoni ddeċidiet li tibbaża s-sejbiet fuq il-fatti disponibbli skont l-Artikolu 18(1) tar-Regolament bażiku, kif spjegat fid-dettalji fit-Taqsima 3.1. Barra minn hekk, il-Kummissjoni aċċettat informazzjoni minn parti kummerċjali relatata tal-grupp CNBM (CNBM International Corporation (“CNBM International”)), li pprovdiet parzjalment l-informazzjoni meħtieġa fi stadju tard, skont l-Artikolu 18(3) tar-Regolament bażiku (ara l-premessi (85) - (87)).

(44)

Il-produtturi esportaturi Jushi u Hengshi talbu trattament kunfidenzjali ta’ waħda mis-sottomissjonijiet tagħhom. Minkejja diversi talbiet għal dan, il-kumpaniji ma setgħux jiġġustifikaw għaliex l-informazzjoni speċifika għandha tiġi ttrattata bħala kunfidenzjali. B’mod partikolari, ta’ min jinnota li virtwalment l-istess informazzjoni kienet diġà ġiet ippreżentata minn parti interessata oħra fuq bażi mhux kunfidenzjali u kienet disponibbli għal partijiet interessati oħra fil-fajl miftuħ. Għalhekk, it-talba għal trattament kunfidenzjali ma setgħetx tkun aċċettata. Minħabba li l-kumpaniji kienu għadhom ma ridux jipprovdu s-sottomissjoni fuq bażi mhux kunfidenzjali, il-Kummissjoni ddeċidiet li ma tiżvelax dawk il-kummenti f’dan ir-Regolament.

(45)

Fi kwalunkwe każ, peress li dik il-parti interessata l-oħra pprovdiet kważi l-istess kummenti/informazzjoni fuq bażi mhux kunfidenzjali, is-sustanza tal-argumenti ta’ Jushi u Hengshi hija indirizzati bis-sħiħ f’dan ir-Regolament.

(46)

L-investigazzjoni tad-dumping u tad-dannu kopriet il-perjodu bejn l-1 ta’ Jannar 2018 u l-31 ta’ Diċembru 2018 (“il-perjodu ta’ investigazzjoni”). L-eżami tax-xejriet rilevanti għall-valutazzjoni tad-dannu kopriet il-perjodu mill-1 ta’ Jannar 2015 sat-tmiem tal-perjodu ta’ investigazzjoni (“il-perjodu kkunsidrat”).

(47)

Kemm l-investigazzjoni anti-dumping kif ukoll antisussidji kurrenti msemmija fil-premessa (3) għandhom l-istess perjodu ta’ investigazzjoni u l-istess perjodu kkunsidrat

(48)

Matul l-investigazzjoni, deher ċar li xi operaturi ekonomiċi setgħu ma ppreżentawx ruħhom abbażi ta’ fehim żbaljat tad-definizzjoni tal-prodott investigat. Għal dik ir-raġuni, fit-18 ta’ Settembru 2019, il-Kummissjoni ċċarat il-kliem tad-deskrizzjoni tal-ambitu tal-prodott inkluż fin-Notifika ta’ Bidu billi ppubblikat Avviż (“Avviż ta’ Kjarifika”) (15). L-Avviż ta’ Kjarifika ta wkoll il-possibbiltà li l-partijiet jippreżentaw ruħhom f’terminu stipulat biex jippreżentaw irwieħhom u jitolbu kwestjonarju, jekk kienu jixtiequ hekk. L-ebda parti interessata ma bagħtet kummenti dwar l-Avviż ta’ Kjarifika u lanqas ma talbet kwestjonarju.

(49)

Minħabba l-prospettiva li jippreżentaw irwieħhom partijiet ġodda u l-ħtieġa konsegwenti li jirrispettaw bis-sħiħ id-drittijiet proċedurali tagħhom għad-difiża, il-Kummissjoni ddeċidiet li tkompli l-investigazzjoni mingħajr ma timponi miżuri proviżorji.

(50)

Fis-26 ta’ Settembru 2019, skont l-Artikolu 19a(2) tar-Regolament bażiku, il-Kummissjoni infurmat lill-partijiet interessati bl-intenzjoni tagħha li ma timponix miżuri proviżorji u li tkompli bl-investigazzjoni.

(51)

Wara l-pubblikazzjoni tan-Notifika ta’ Kjarifika u fl-investigazzjoni sussegwenti, ġie kkonfermat li l-ebda operatur ekonomiku ma kien naqas milli jippreżenta ruħu minħabba n-nuqqas ta’ ftehim possibbli fid-definizzjoni tal-prodott ikkonċernat fin-Notifika ta’ Bidu.

(52)

Il-prodott ikkonċernat (16) huwa materjali tar-raden u/jew tal-faxex tal-fibra tal-ħġieġ bil-filament kontinwu, minsuġa u/jew meħjuta, flimkien ma’ elementi oħrajn jew mingħajrhom, minbarra prodotti li jiġu impregnati jew impregnati minn qabel (prepreg), u minbarra materjali b’nisġa miftuħa b’ċelloli ta’ daqs ta’ aktar minn1,8 mm kemm fit-tul kif ukoll fil-wisa’ u b’piż ta’ aktar minn 35 g/m2 (“GFF”), li joriġinaw mir-RPĊ u mill-Eġittu, li attwalment jaqgħu taħt il-kodiċijiet NM ex 7019 39 00, ex 7019 40 00, ex 7019 59 00 u ex 7019 90 00 (il-kodiċijiet TARIC 7019390080, 7019400080, 7019590080 u 7019900080) (“il-prodott ikkonċernat”).

(53)

Il-GFF jintuża f’firxa wiesgħa ta’ applikazzjonijiet, pereżempju, għall-produzzjoni ta’ xfafar għal turbini eoliċi, fil-produzzjoni ta’ tagħmir tad-dgħajjes, tat-trakkijiet u tal-isport, kif ukoll fis-sistema tar-riabilitazzjoni tal-pajpijiet.

(54)

Wara r-rivelazzjoni finali, is-CCCLA qalet li l-ambitu tal-prodott ma kienx ċar u li jenħtieġ li jiġi ċċarat jekk il-prodotti li jaqgħu fi ħdan il-kodiċijiet NM 7019 59 00 u 7019 90 00 kinux inklużi fl-ambitu tal-investigazzjoni.

(55)

Il-Kummissjoni tfakkar li, kif iddikjarat fin-Notifika ta’ Bidu, il-prodott investigat huwa definit mid-definizzjoni tal-prodott u mhux mill-kodiċijiet NM jew TARIC (li jingħataw għall-informazzjoni biss). Il-Kummissjoni ddefinixxiet b’mod ċar il-prodott ikkonċernat fin-Notifika ta’ Bidu. Dan kien ikkonfermat mill-fatt li wara li l-Kummissjoni ħarġet in-Notifika ta’ Kjarifika dwar l-ambitu tal-prodott imsemmi fil-premessa (48), ħadd mill-partijiet interessati ma ppreżenta ruħu. Għalhekk, l-affermazzjoni li l-ambitu tal-prodott mhux ċar, ġiet irrifjutata.

(56)

L-investigazzjoni wriet li dawn il-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(57)

Il-Kummissjoni ddeċidiet li dawn il-prodotti huma għaldaqstant prodotti simili skont l-Artikolu 1(4) tar-Regolament bażiku.

(58)

Produttur esportatur minnhom u l-Ministeru tal-Kummerċ tar-Repubblika Għarbija tal-Eġittu sostnew li l-kittijiet tal-GFF maqtugħa minn qabel jenħtieġ li ma jkunux koperti mill-ambitu tal-investigazzjoni. Huma argumentaw li l-kittijiet tal-GFF maqtugħa minn qabel ikunu prodott downstream u jeħtieġu passi addizzjonali ta’ produzzjoni u b’differenzi fil-karatteristiċi fiżiċi, li għandhom daqs ferm iżgħar. Dan jiġi f’forom u f’imballaġġ differenti, li jikkonsistu f’diversi biċċiet iżgħar ta’ drappijiet meħjutin flimkien. Kien argumentat ukoll li ma jkun hemm l-ebda riskju ta’ ċirkomvenzjoni billi jiġu esklużi l-kittijiet peress li l-proċess ta’ qtugħ ikun irriversibbli u li l-prodott ma jkunx interkambjabbli mal-GFF mhux maqtugħ.

(59)

L-ilmentatur argumenta li l-kittijiet tal-GFF maqtugħa minn qabel u l-GFF mhux maqtugħ għandhom l-istess karatteristiċi bażiċi u użi finali. Peress li l-GFF huwa materjal ta’ rinforz, il-qtugħ skont il-forma huwa meħtieġ sabiex jiġi adattat għall-forma tal-prodott li jeħtieġ li jissaħħaħ, iżda ma jbiddilx il-karatteristiċi bażiċi tiegħu bħala tali. Il-proċess ta’ qtugħ jista’ jitwettaq mill-produttur tal-GFF, minn qattiegħ industrijali indipendenti jew mill-klijent innifsu. Hija operazzjoni sempliċi ħafna u b’kost baxx. L-ilmentatur argumenta wkoll li l-utenti ma jipperċepux il-GFF maqtugħ minn qabel b’mod differenti minn GFF ieħor peress li l-GFF ġeneralment jiġi prodott skont l-ispeċifikazzjonijiet tal-utenti. Li kieku l-proċess ta’ qtugħ jibdel il-karatteristiċi tal-GFF, irendih inutilizzabbli għall-klijent speċifiku.

(60)

L-investigazzjoni wriet li l-proċessi ta’ qtugħ minn qabel u tqegħid f’kittijiet ma jbiddlux il-karatteristiċi fiżiċi, tekniċi jew kimiċi bażiċi tal-GFF jew tal-użi finali bażiċi tagħhom. Il-klijenti taż-żewġ prodotti huma fil-parti l-kbira l-istess u t-tnejn jinbiegħu permezz tal-istess kanali ta’ distribuzzjoni.

(61)

L-investigazzjoni kkonfermat ukoll li għall-biċċa l-kbira tal-applikazzjonijiet GFF jiġi prodott skont l-ispeċifikazzjonijiet tal-klijenti. Il-kittijiet tal-GFF maqtugħ minn qabel jikkostitwixxu sempliċiment speċifikazzjoni addizzjonali fl-ordni tal-klijent. Dawk il-kittijiet tal-GFF maqtugħ minn qabel jirċievu imballaġġ differenti u ma jbiddlux il-karatteristiċi. Billi l-GFF jiġi ordnat dejjem aktar fil-forma ta’ kittijiet tal-GFF maqtugħ minn qabel u s-servizzi ta’ qattiegħa esterni qed jintużaw dejjem aktar, ikun hemm riskju kbir ta’ ċirkomvenzjoni jekk il-GFF maqtugħ minn qabel jiġi eskluż mill-ambitu tal-investigazzjoni. Għalhekk, il-Kummissjoni kkonkludiet li ma jkunx xieraq li jiġi eskluż il-GFF maqtugħ minn qabel mill-ambitu tal-investigazzjoni.

(62)

Wara r-rivelazzjoni finali, is-CCCLA u l-Gvern Eġizzjan (“il-Gvern EG”) qalu li l-kittijiet tal-GFF maqtugħ minn qabel għandhom jiġu esklużi mill-ambitu tal-prodott minħabba li huma prodotti downstream li jeħtieġu passi ta’ produzzjoni addizzjonali u b’karatteristiċi fiżiċi differenti li jkollhom impatt apprezzabbli fuq il-kostijiet u l-prezzijiet. Iż-żewġ partijiet argumentaw li lanqas ma jkun hemm riskju ta’ ċirkomvenzjoni, jekk il-kittijiet tal-GFF maqtugħ minn qabel ikunu esklużi mill-ambitu tal-miżuri, b’mod partikolari minħabba l-kost addizzjonali involut u l-fatt li l-proċess ta’ qtugħ ikun irriversibbli.

(63)

Il-Kummissjoni ma tistax taċċetta din id-dikjarazzjoni. Kif spjegat fil-premessa (61) il-qtugħ u l-kitting ma joħolqux prodott downstream, iżda speċifikazzjoni addizzjonali fl-ordni tal-klijent. Għaldaqstant, l-affermazzjoni ġiet irrifjutata.

(64)

Produttur esportatur ieħor argumenta li r-raden tal-fibra tal-ħġieġ jenħtieġ li jitqiesu esklużi mill-ambitu tal-investigazzjoni. Dan il-produttur esportatur argumenta li r-raden tal-fibra tal-ħġieġ ma kienx imsemmi b’mod espliċitu fil-kwestjonarju, fl-ilment jew fin-Notifika ta’ Bidu, li jkun jindika li mhumiex koperti mill-ambitu tal-prodott. Huwa kompla jargumenta li l-GFF minn raden ma setax jiġi kklassifikat taħt il-karatteristiċi tan-numru ta’ kontroll tal-prodott (“PCN”), li l-GFF minn raden ikun importat taħt il-kodiċijiet NM differenti minn dawk imsemmija fl-ilment u li r-raden tal-fibra tal-ħġieġ ukoll ma jkunux koperti mill-miżuri kontra l-faxex tal-fibra tal-ħġieġ fi proċedimenti oħra.

(65)

L-ilmentatur u produttur ieħor tal-Unjoni (mhux parti għall-ilment) argumentaw li l-GFF minn raden tal-fibra tal-ħġieġ mhux mibrumin (magħrufa wkoll bħala raden tal-fibra tal-ħġieġ mingħajr brim) jenħtieġ li jkun kopert mill-investigazzjoni, filwaqt li raden mibrumin jistgħu jiġu esklużi mill-ambitu tal-investigazzjoni. L-ilmentatur argumenta li r-raden tal-fibra tal-ħġieġ mhux mibrumin għandhom il-karatteristiċi tal-faxex tal-fibra tal-ħġieġ hekk kif huma magħmulin minn grupp ta’ filamenti jew ħjut mhux mibrumin u jintużaw ukoll għall-istess skopijiet bħall-faxex u tipikament ikollhom dijametru ta’ 13-24 mikrometru u jkollhom tex ta’ 300-4800.

(66)

Rigward l-inklużjoni tal-GFF mir-raden tal-fibra tal-ħġieġ, l-Avviż ta’ Bidu ddefinixxa l-prodott investigat bħala “materjali tar-raden u/jew tal-faxex tal-fibra tal-ħġieġ bil-filament kontinwu, […]” (17). L-investigazzjoni wriet li r-raden tal-fibra tal-ħġieġ mhux mibruma għandhom l-istess karatteristiċi bażiċi bħall-faxex tal-fibra tal-ħġieġ, jiġifieri jikkonsistu fi grupp ta’ filamenti jew ħjut mhux mibruma, u jintużaw ukoll għall-istess skopijiet. It-tnejn tipikament ikollhom dijametru ta’ 13-24 mikrometru u jkollhom tex ta’ 300-4800. Għalhekk, ma jkunx xieraq li dawn it-tipi ta’ prodotti jiġu esklużi mill-ambitu tal-investigazzjoni.

(67)

Fir-rigward tal-GFF magħmul prinċipalment minn raden tal-fibra tal-ħġieġ mibrumin, il-Kummissjoni tinnota li dan il-prodott, li għandu karatteristiċi bażiċi differenti u huwa wkoll soġġett għal użi finali differenti, eż. bords taċ-ċirkwiti stampati, qatt ma kien parti mill-prodott ikkonċernat. Il-Kummissjoni ċċarat dan il-punt b’mod espliċitu fin-Nota ta’ Kjarifika.

(68)

Kif imsemmi fil-premessa (43), Jushi u Hengshi naqsu milli jikkooperaw fl-investigazzjoni. Il-Kummissjoni aċċettat informazzjoni minn kumpanija terza relatata, li pprovdiet l-informazzjoni meħtieġa fi stadju tard. Is-sitwazzjoni tat-tliet kumpaniji u l-kummenti tagħhom huma indirizzati f’din it-taqsima.

(69)

Jushi, produttur esportatur integrat vertikalment, naqas milli jipprovdi informazzjoni essenzjali li tirrifletti l-proċess ta’ manifattura tiegħu fit-tweġiba għall-kwestjonarju u l-ittra ta’ nuqqasijiet li ġejja. L-informazzjoni nieqsa kienet essenzjali għad-determinazzjoni tal-valur normali tal-kumpanija skont l-Artikolu 2(6a) tar-Regolament bażiku, li jenħtieġ li jirrifletti l-proċess ta’ manifattura ta’ kumpanija integrata vertikalment. Il-Kummissjoni talbet tagħrif dwar il-kostijiet tal-manifattura għal kull PCN. Dan kien jinkludi l-volum u l-valur tal-fatturi kollha tal-produzzjoni użati għall-manifattura tal-GFF minn Jushi għal kull PCN. Madankollu, Jushi rrifjutat li tipprovdi l-informazzjoni meħtieġa għal ċerti fatturi tal-produzzjoni bħad-dettalji tat-taħlita tat-teħid tad-daqs użata għall-manifattura tal-faxxi tal-fibra tal-ħġieġ (GFR), il-materja prima ewlenija biex jiġi prodott il-GFF, għal kull PCN. Minkejja diversi talbiet mill-Kummissjoni għal dik l-informazzjoni, appoġġjati bi spjegazzjonijiet dwar għalfejn it-tagħrif kien meħtieġ, Jushi irrifjutat li tipprovdi l-informazzjoni. B’riżultat ta’ dan, il-Kummissjoni għarrfet lil Jushi bl-intenzjoni tagħha li tapplika l-fatti disponibbli skont l-Artikolu 18 tar-Regolament bażiku b’rabta mad-determinazzjoni tal-valur normali.

(70)

Barra minn hekk, il-kumpanija ġiet informata li, minħabba r-rifjut ta’ kooperazzjoni, l-ebda informazzjoni dwar il-valur normali ma kienet se tiġi aċċettata matul iż-żjara ta’ verifika. L-analiżi ta’ dik l-informazzjoni qabel iż-żjara ta’ verifika kienet essenzjali biex tiġi żgurata żjara ta’ verifika fuq il-post effettiva u sinifikanti, sa fejn kienet ikkonċernata d-determinazzjoni tal-valur normali skont l-Artikolu 2(6a) tar-Regolament bażiku. Barra minn hekk, minħabba l-iskadenzi statutorji applikabbli għall-investigazzjoni u ż-żmien u l-opportunitajiet abbundanti mogħtija lill-produttur esportatur biex jipprovdi l-informazzjoni meħtieġa, il-Kummissjoni ma kinitx għadha f’pożizzjoni li taċċetta kwalunkwe informazzjoni ġdida rigward il-valur normali.

(71)

Jushi argumentat li l-Kummissjoni xorta tista’ tasal għal sejba raġonevoli billi tittrattaha bħala produttur integrat mhux vertikalment, jiġifieri, billi jiġu stabbiliti l-fatturi tagħha tal-produzzjoni u tal-kostijiet tal-produzzjoni fuq il-bażi tal-GFR, il-materja prima ewlenija għall-produzzjoni tal-GFF. Hija argumentat li l-informazzjoni rilevanti kienet preżentata sal-iskadenzi u kienet verifikabbli. Il-produttur esportatur sostna li aġixxa skont l-aħjar ħila tiegħu billi żvela lill-Kummissjoni l-informazzjoni kollha li ma kienx iqis bħala informazzjoni kummerċjali kunfidenzjali. Il-produttur esportatur allega li ma setax jipprovdi l-kost tal-produzzjoni tiegħu tal- GFR b’mod partikolari fir-rigward tat-taħlita tad-daqs, li kienet taħlita ta’ diversi kimiċi unika għall-kumpanija u, għalhekk, informazzjoni kummerċjali kunfidenzjali.

(72)

L-informazzjoni nieqsa (id-dettalji tat-taħlita tad-daqs għal kull PCN għall-kostijiet tal-manifattura tal-GFR), madankollu, kienet essenzjali għad-determinazzjoni tal-valur normali fil-każ tal-applikazzjoni tal-Artikolu 2(6a) tar-Regolament bażiku, billi għandha tirrifletti l-proċess tal-manifattura tal-produttur esportatur. Barra minn hekk, il-produttur esportatur ma weriex kif il-Kummissjoni setgħet tasal għal sejba raġonevoli minkejja l-fatt li ma żvelax l-informazzjoni meħtieġa rigward il-kost sħiħ tal-manifattura tiegħu.

(73)

Il-Kummissjoni ċċarat ukoll li l-informazzjoni kummerċjali kunfidenzjali kollha pprovduta fil-proċediment anti-dumping tiġi ttrattata bħala strettament kunfidenzjali skont l-Artikolu 19 tar-Regolament bażiku u li l-ebda waħda mill-partijiet interessati l-oħra ma jkollha aċċess għal din l-informazzjoni.

(74)

Għalhekk, il-Kummissjoni rrifjutat l-argumenti mressqa mill-produttur esportatur u ddeċidiet li tibbaża s-sejbiet fuq il-fatti disponibbli skont l-Artikolu 18(1) tar-Regolament bażiku.

(75)

Hengshi, kumpanija mhux integrata oħra tal-grupp CNBM, ipprovdiet informazzjoni falza u qarrieqa matul iż-żjara ta’ verifika, kif ukoll fixklet serjament il-proċess ta’ verifika billi żammet informazzjoni importanti u ttardjat il-proċess ta’ verifika bla bżonn u ripetutament. B’mod partikolari, l-informazzjoni pprovduta dwar il-PCN, il-metodi tal-allokazzjoni użati għall-kalkolu tal-volum tal-konsum tal-elettriku, ix-xogħol u l-ispejjeż ġenerali fil-kost tal-produzzjoni għal kull PCN, il-bilanċ tagħha ta’ tqabbil preliminari għall-2018 u l-istruttura tal-azzjonisti tqieset mhux affidabbli u ma setgħetx tintuża għad-determinazzjoni tal-marġni tad-dumping ta’ dak il-produttur esportatur.

(76)

Għalhekk, il-Kummissjoni informat lill-kumpanija kkonċernata bl-intenzjoni tagħha li tapplika l-fatti disponibbli skont l-Artikolu 18(1) tar-Regolament bażiku f’dak li għandu x’jaqsam mal-kalkolu tal-valur normali f’każ li l-investigazzjoni tikkonkludi li jenħtieġ li japplika l-Artikolu 2(6a) tar-Regolament bażiku. Skont l-Artikolu 18(4) tar-Regolament bażiku, il-parti interessata ġiet mgħarrfa bir-raġunijiet għaliex l-informazzjoni pprovduta ġiet imwarrba u ngħatat l-opportunità li tipprovdi spjegazzjonijiet ulterjuri.

(77)

Hengshi kkummentat dwar l-intenzjoni tal-Kummissjoni li tibbaża s-sejbiet fuq il-fatti disponibbli skont l-Artikolu 18 tar-Regolament bażiku u talbet seduta mal-Uffiċjal tas-Seduta fil-proċedimenti kummerċjali, li saret fit-28 ta’ Ottubru 2019. Il-kumpanija ddikjarat li hija ma ttardjatx u ma waqqfitx il-progress tal-investigazzjoni apposta u li hija kienet aġixxiet bl-aħjar mod li setgħet. B’mod partikolari, il-kumpanija ddikjarat li l-informazzjoni ppreżentata ma kinitx falza jew qarrieqa u li, matul iż-żjara ta’ verifika, hija ppreżentat verżjoni kważi kompletament korretta tat-tabella tal-PCN. Hija pprovdiet tabella tal-PCN korretta għalkollox fl-investigazzjoni antisussidji parallela fis-seħħ li ġiet ivverifikata fil-kuntest ta’ dik l-investigazzjoni antisussidji u li din jenħtieġ li tintuża f’dan il-proċediment bħala fatti disponibbli. Barra minn hekk, il-kumpanija sostniet li l-metodi tal-allokazzjoni ppreżentati għall-kost tal-produzzjoni għal kull PCN kienu koeffiċjenti użati storikament għal skopijiet ta’ ġestjoni u kontabbiltà tal-kostijiet u użati mill-kumpanija kuljum. Il-kumpanija insistiet li dawn il-metodi ta’ allokazzjoni rriflettew b’mod oġġettiv il-kostijiet reali tal-produzzjoni. Fir-rigward tal-bilanċ ta’ tqabbil preliminari għall-2018, il-kumpanija spjegat li meta pprovdiet dokumenti ta’ sostenn matul iż-żjara ta’ verifika, hija ma rrealizzatx li dawn l-aġġustamenti ma kinux evidenti f’dawk id-dokumenti minħabba limitazzjonijiet tekniċi fis-sistema tagħha. Ġie spjegat li dan kien dovut għal tranżizzjoni għal sistema kontabilistika ġdida fl-1 ta’ Jannar 2019, fatt li qabel ma kienx ġie żvelat lill-Kummissjoni. Il-kumpanija kkontestat li n-nuqqas ta’ żvelar tal-eżistenza ta’ din is-sistema ġdida kien ittardja l-verifika bla bżonn. Il-produttur esportatur iddikjara wkoll li r-rapportar żbaljat tal-perċentwal ta’ wieħed mill-azzjonisti kien minħabba żball tipografiku li ġie kkoreġut matul iż-żjara ta’ verifika fuq il-post. Għalhekk, tali żball jenħtieġ li ma jiġix ikkwalifikat bħala informazzjoni “qarrieqa” li tagħti lok għall-applikazzjoni tal-Artikolu 18 tar-Regolament bażiku. Fl-aħħar nett, il-produttur esportatur ikkontesta li huwa impedixxa l-proċess ta’ verifika f’diversi okkażjonijiet, b’mod partikolari billi naqas milli jipprovdi (i) spjegazzjonijiet dwar ċertu dokument (kunfidenzjali) ipprovdut fil-kwestjonarju tiegħu u (ii) skedi ta’ ħidma riveduti.

(78)

L-ewwel nett, il-PCN li Hengshi ssottomettiet f’din l-investigazzjoni ma kienx korrett minkejja d-diversi opportunitajiet mogħtija lill-produttur esportatur biex jirrevedi l-PCNs matul iż-żjara ta’ verifika ta’ sitt ijiem. Abbażi tal-informazzjoni pprovduta, il-Kummissjoni ma setgħetx tiddetermina prezzijiet medji tal-bejgħ affidabbli għal kull PCN u, għalhekk, l-informazzjoni pprovduta kellha tittwarrab.

(79)

It-tieni, l-investigazzjoni żvelat li l-kodiċi tal-allokazzjoni użat mill-produttur esportatur ma jirriflettix b’mod korrett il-volum tal-elettriku, il-kostijiet lavorattivi u l-ispejjeż ġenerali tal-kostijiet għal kull PCN. Dan kien minħabba li meta stabbiliet il-metodi tal-allokazzjoni, il-kumpanija ma kkunsidratx il-ħin ta’ inattività tal-magni tal-produzzjoni. Dan iwassal għal allokazzjoni żejda tal-volum ta’ elettriku u tal-ispejjeż ġenerali kkonsmati fil-proċess tal-manifattura għal prodotti mmanifatturati f’volum żgħir u sottoallokazzjoni tal-istess partiti għal prodotti mmanifatturati f’volumi kbar. Il-metodi tal-allokazzjoni użati mill-produttur esportatur iwasslu wkoll għal allokazzjoni erratika tal-għadd ta’ sigħat tax-xogħol għal kull PCN. Il-produttur esportatur irrikonoxxa dan l-iżball fl-ittra tiegħu lis-servizzi tal-Kummissjoni fit-22 ta’ Lulju 2019. Barra minn hekk, matul iż-żjara ta’ verifika, it-tim ripetutament enfasizza r-riżultati inkonsistenti meta uża l-metodi tal-allokazzjoni ssuġġeriti mill-kumpanija, iżda l-kumpanija rrifjutat li tanalizzahom. Anki jekk il-produttur esportatur preċedentement uża dawn il-metodi tal-allokazzjoni, dawn ma jirriflettux b’mod korrett il-volum ta’ elettriku, il-kostijiet lavorattivi u l-ispejjeż ġenerali għal kull PCN. Fuq dik il-bażi, il-Kummissjoni sabet li l-kodiċijiet tal-allokazzjonijiet użati ma stabbilixxewx b’mod affidabbli l-kostijiet tal-manifattura tal-kumpanija għal kull PCN. Bħala riżultat, anki dik l-informazzjoni kellha tiġi injorata.

(80)

It-tielet, il-Kummissjoni ma taqbilx li dan il-produttur esportatur ma impedixxiex il-proċess ta’ verifika billi ma żvelax l-eżistenza tas-sistema kontabilistika l-ġdida. Il-valutazzjoni tal-impatt ta’ din is-sistema l-ġdida fuq l-informazzjoni pprovduta mill-kumpanija tieħu aktar żmien milli kien meħtieġ. Il-fatt li l-maniġer finanzjarju tal-kumpanija, preżenti matul iż-żjara ta’ verifika, ma żvelax minnufih din l-informazzjoni lit-tim, huwa wkoll sorprendenti. Kieku dan il-fatt ma nżammx mit-tim ta’ investigazzjoni, ma kienx ikun neċessarju li jiġi vverifikat jekk is-sistema l-ġdida kellhiex impatt fuq id-data rrapportata għall-2018. Iż-żmien addizzjonali kien ikun jista’ jintuża għall-verifika ta’ partijiet aktar essenzjali tal-kwestjonarju. Il-Kummissjoni tinnota li minkejja li t-tim estenda ż-żjara ta’ verifika għal jum addizzjonali, xorta ma setax jikkonkludi b’mod sodisfaċenti l-verifika tad-data pprovduta mill-kumpanija fiż-żmien (żejjed) disponibbli.

(81)

Barra minn hekk, l-iżball fir-rapportar tal-azzjonist kellu impatt sostanzjali u kien deċiżiv fid-determinazzjoni ta’ jekk dan il-produttur esportatur kienx relatat ma’ produttur esportatur ieħor (u għalhekk parti mill-istess grupp, li rċieva dazju anti-dumping wieħed). Għalhekk, dan l-iżball kien meqjus bħala serju u qarrieqi, kemm jekk l-informazzjoni żbaljata ġiet ipprovduta b’mod intenzjonali kif ukoll jekk le.

(82)

Fl-aħħar nett, il-Kummissjoni ssostni li l-kumpanija xekklet il-proċess ta’ verifika f’diversi okkażjonijiet. Fir-rigward tan-nuqqas ta’ spjegazzjonijiet għad-dokument kunfidenzjali mogħti mat-tweġiba għall-kwestjonarju, il-Kummissjoni tinnota li matul il-verifika fuq il-post, it-tim ma ngħatax informazzjoni kruċjali u din ġiet ipprovduta biss wara dewmien twil, kif imsemmi fir-rapport tal-missjoni pprovdut lill-kumpanija (18). Barra minn hekk, matul iż-żjara ta’ verifika, il-Kummissjoni talbet informazzjoni biex tivverifika jekk l-istruttura tal-PCN tal-prodott ikkonċernat kinitx korretta. Madankollu, Hengshi pprovdiet informazzjoni li tagħti dettalji dwar l-istruttura tal-PCN biss wara li l-PCN instab li ma kienx korrett. Barra minn hekk, matul iż-żjara ta’ verifika, il-kumpanija ma wrietx fajl rivedut dwar il-PCN sakemm it-tim tal-każ induna b’aktar żbalji fil-fajl ipprovdut. F’dak il-punt, it-tim tal-każ diġà kien qatta’ żmien konsiderevoli jipprova jivverifika l-PCNs u kien ta lill-kumpanija l-opportunità li tipprovdi fajls ta’ ħidma u terġa’ tibda l-verifika tal-PCNs. Din l-imġiba ċertament xekklet l-investigazzjoni minħabba li żammet lill-uffiċjali tal-Kummissjoni milli jiffinalizzaw il-verifika tal-PCN ipprovdut. Għalhekk, il-Kummissjoni ma tistax taqbel li l-kumpanija ma impedixxietx serjament il-proċess ta’ verifika.

(83)

Minħabba n-nuqqasijiet sinifikanti fl-informazzjoni pprovduta minn dan il-produttur esportatur kif deskritt, il-Kummissjoni ddeċidiet li tinjora din l-informazzjoni (il-PCNs kollha u l-kost tal-produzzjoni għal kull PCN) u bbażat is-sejbiet tagħha fuq il-fatti disponibbli skont l-Artikolu 18(1) tar-Regolament bażiku (19).

(84)

Billi l-kummenti magħmula mill-kumpanija u fis-seduta mal-Uffiċjal tas-Seduta ma biddlux il-fatti u l-konklużjonijiet stabbiliti, il-Kummissjoni kkonfermat l-użu tal-fatti disponibbli skont l-Artikolu 18(1) tar-Regolament bażiku fir-rigward ta’ dan il-produttur esportatur fir-rigward tal-prezz tal-esportazzjoni u l-valur normali.

(85)

Fl-aħħar nett, CNBM International, parti tan-negozju ralatata mill-grupp CNBM, ma ppreżentatx kif meħtieġ tweġiba għall-Anness I tal-kwestjonarju. Madankollu, l-investigazzjoni żvelat li l-informazzjoni meħtieġa dwar il-bejgħ tal-GFF kienet nieqsa u l-Kummissjoni talbet lil CNMB International tirrapporta dan il-bejgħ u tiċċara għalfejn ma kienx ġie rrapportat qabel.

(86)

CNBM International ssottomettiet l-informazzjoni mitluba dwar il-bejgħ u argumentat li saret konxja minn dan il-bejgħ biss meta kienet qed tħejji t-tweġiba għall-ittra ta’ nuqqasijiet tal-Kummissjoni fl-investigazzjoni antisussidji parallela msemmija fil-premessa (3).

(87)

Madankollu, l-informazzjoni sottomessa fi stadju daqshekk tard setgħet tiġi vverifikata biss parzjalment. Minħabba l-volum żgħir involut, bħala eċċezzjoni, il-Kummissjoni ddeċidiet li taċċetta l-informazzjoni relatata ma’ dawn it-tranżazzjonijiet tal-bejgħ u tuża l-fatti disponibbli għal ċerta informazzjoni bħall-ispejjeż tal-bejgħ, ġenerali u amministrattivi tan-negozjant relatat skont l-Artikolu 18(3) tar-Regolament bażiku.

(88)

Fid-dawl tal-evidenza suffiċjenti disponibbli fil-bidu tal-investigazzjoni li indikat l-eżistenza ta’ distorsjonijiet sinifikanti fis-suq domestiku fir-RPĊ fis-sens tal-punt (b) tal-Artikolu 2(6a) tar-Regolament bażiku, il-Kummissjoni qieset li kien xieraq li tiftaħ investigazzjoni rigward ir-RPĊ skont l-Artikolu 2(6a) tar-Regolament bażiku.

(89)

Konsegwentement, sabiex tiġbor id-data meħtieġa għall-applikazzjoni possibbli tal-Artikolu 2(6a) tar-Regolament bażiku, fin-Notifika ta’ Bidu l-Kummissjoni stiednet lill-produtturi esportaturi kollha tar-RPĊ sabiex jipprovdu l-informazzjoni mitluba fl-Anness III tan-Notifika ta’ Bidu rigward l-inputs użati għall-produzzjoni tal-GFF. Disa’ produtturi esportaturi fir-RPĊ li jkopru t-totalità tal-esportazzjonijiet tal-GFF lejn l-Unjoni matul il-PI ressqu l-informazzjoni rilevanti.

(90)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti fis-suq domestiku fir-RPĊ fis-sens tal-punt (b) tal-Artikolu 2(6a) tar-Regolament bażiku, il-Kummissjoni bagħtet ukoll kwestjonarju lill-GTĊ. Ma waslet l-ebda tweġiba mingħand il-GTĊ. Sussegwentement, il-Kummissjoni informat lill-GTĊ li kienet sejra tuża l-fatti disponibbli fis-sens tal-Artikolu 18 tar-Regolament bażiku għad-determinazzjoni tal-eżistenza tad-distorsjonijiet sinifikanti fir-RPĊ. Il-GTĊ ma weġibx.

(91)

Fin-Notifika ta’ Bidu, il-Kummissjoni stiednet ukoll lill-partijiet interessati kollha jressqu l-fehmiet tagħhom, jippreżentaw informazzjoni u jipprovdu evidenza ta’ sostenn fir-rigward tal-adegwatezza tal-applikazzjoni tal-Artikolu 2(6a) tar-Regolament bażiku fir-rigward taċ-Ċina fi żmien 37 jum mid-data tal-pubblikazzjoni tan-Notifika f’Il-Ġurnal Uffiċjali tal-Unjoni Ewropea. Hengshi, Jushi u CCCLA għamlu kumment dwar l-eżistenza ta’ distorsjonijiet sinifikanti fiċ-Ċina li huwa indirizzat fil-premessi (106) u (107).

(92)

Fin-Notifika ta’ Bidu, il-Kummissjoni speċifikat ukoll li, fid-dawl tal-evidenza disponibbli, jista’ jkollha bżonn tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku biex jiġi ddeterminat il-valur normali għall-produttur esportatur fir-RPĊ fuq il-bażi ta’ prezzijiet jew ta’ valuri referenzjarji mhux distorti.

(93)

Fis-27 ta’ Marzu 2019, il-Kummissjoni għamlet disponibbli tal-partijiet interessati l-ewwel nota għall-fajl (“in-Nota ta’ Marzu 2019”) biex tikseb l-opinjonijiet tagħhom dwar is-sorsi rilevanti li l-Kummissjoni tista’ tuża għad-determinazzjoni tal-valur normali għall-produtturi esportaturi fir-RPĊ, skont it-tieni inċiż tal-Artikolu 2(6a)(e) tar-Regolament bażiku. F’din in-nota, il-Kummissjoni pprovdiet lista tal-fatturi tal-produzzjoni kollha, bħall-materjali, l-enerġija, ix-xogħol lavorattiv u l-iskart użati fil-produzzjoni tal-prodott ikkonċernat mill-produtturi esportaturi. Barra minn hekk, abbażi tal-kriterji li jiggwidaw l-għażla tal-prezzijiet jew tal-valuri referenzjarji mingħajr distorsjoni, il-Kummissjoni identifikat numru ta’ pajjiżi rappreżentattivi possibbli, jiġifieri l-Brażil, il-Messiku, il-Federazzjoni Russa u t-Turkija.

(94)

Il-Kummissjoni tat lill-partijiet interessati kollha l-opportunità li jikkummentaw. Il-Kummissjoni rċeviet kummenti mingħand Taishan, Jushi, Hengshi u mingħand l-ilmentatur. Il-GTĊ ma pprovda l-ebda kumment.

(95)

Il-Kummissjoni indirizzat il-kummenti li rċeviet dwar in-Nota ta’ Marzu 2019 fit-tieni nota fil-fajl dwar is-sorsi għad-determinazzjoni tal-valur normali tal-4 ta’ Settembru 2019 (“in-Nota ta’ Settembru 2019”). Il-Kummissjoni pprovdiet ukoll il-lista riveduta ta’ fatturi tal-produzzjoni u kkonkludiet li, f’dak l-istadju, it-Turkija kienet meqjusa pajjiż rappreżentattiv skont l-ewwel inċiż tal-Artikolu 2(6a)(a) tar-Regolament bażiku. Il-Kummissjoni ddeterminat ukoll il-lista ta’ kodiċijiet użati mit-Turkija u għamlet disponibbli l-istatistika doganali rilevanti Torka fil-fajl miftuħ. Il-Kummissjoni stiednet lill-partijiet interessati jikkummentaw. Il-Kummissjoni rċeviet kummenti minn żewġ produtturi esportaturi Ċiniżi parti mill-grupp CNBM. Dan ir-Regolament jindirizza dawk il-kummenti fil-premessi (106), (177), minn (207) sa (211).

(96)

Skont l-Artikolu 2(1) tar-Regolament bażiku, “il-valur normali għandu normalment ikun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(97)

Madankollu, skont l-Artikolu 2(6a)(a) tar-Regolament bażiku, “f’każ li jiġi stabbilit […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza ta’ distorsjonijiet sinifikanti f’dak il-pajjiż fis-sens tal-punt (b), il-valur normali għandu jinħadem b’mod esklużiv abbażi tal-kostijiet tal-produzzjoni u tal-bejgħ li jirrifletti prezzijiet jew valuri referenzjarji mhux distorti”, u “għandu jinkludi ammont mhux distort u raġonevoli ta’ kostijiet amministrattivi, tal-bejgħ u ġenerali u għall-profitti” . Kif spjegat aktar fid-dettall hawn taħt, f’din l-investigazzjoni l-Kummissjoni kkonkludiet li, abbażi tal-evidenza disponibbli, u fid-dawl tan-nuqqas ta’ kooperazzjoni mill-GTĊ, kien applikabbli l-Artikolu 2(6a) tar-Regolament bażiku.

(98)

L-Artikolu 2(6a)(b) tar-Regolament bażiku jiddefinixxi “distorsjonijiet sinifikanti bħala dawk id-distorsjonijiet li jseħħu meta l-prezzijiet jew il-kostijiet irrapportati, inklużi l-kostijiet tal-materja prima u tal-enerġija, ma jkunux ir-riżultat ta’ forzi tas-suq ħieles peress li dawn jiġu affettwati minn intervent sostanzjali tal-gvern. Meta tkun valutata l-eżistenza ta’ distorsjonijiet sinifikanti għandha tingħata attenzjoni, inter alia, lill-impatt potenzjali ta’ element wieħed jew aktar mis-segwenti:

(99)

Skont l-Artikolu 2(6a)(b) tar-Regolament bażiku, il-valutazzjoni tal-eżistenza ta’ distorsjonijiet sinifikanti fis-sens tal-Artikolu 2(6a)(a) għandha tqis, fost l-oħrajn, il-lista mhux eżawrjenti ta’ elementi. Skont l-Artikolu 2(6a)(b) tar-Regolament bażiku, fil-valutazzjoni tal-eżistenza tad-distorsjonijiet sinifikanti, għandu jitqies l-impatt potenzjali ta’ wieħed jew ta’ aktar minn dawn l-elementi fuq il-prezzijiet u l-kostijiet fil-pajjiż esportatur tal-prodott ikkonċernat. Fil-fatt, billi dik il-lista mhijiex kumulattiva, m’hemmx bżonn li jitqiesu l-elementi kollha biex ikun hemm sejba ta’ distorsjonijiet sinifikanti. Barra minn hekk, l-istess ċirkostanzi fattwali jistgħu jintużaw biex juru l-eżistenza ta’ element wieħed jew aktar tal-lista. Madankollu, kwalunkwe konklużjoni dwar distorsjonijiet sinifikanti fis-sens tal-Artikolu 2(6a)(a) trid issir fuq il-bażi tal-evidenza kollha disponibbli. Il-valutazzjoni globali dwar l-eżistenza ta’ distorsjonijiet tista’ tqis ukoll il-kuntest ġenerali u s-sitwazzjoni fil-pajjiż esportatur, b’mod partikolari fejn l-elementi fundamentali tal-istruttura ekonomika u amministrattiva tal-pajjiż esportatur jipprovdu lill-gvern b’setgħat sostanzjali biex jintervjeni fl-ekonomija b’tali mod li l-prezzijiet u l-kostijiet ma jkunux ir-riżultat tal-iżvilupp ħieles tal-forzi tas-suq.

(100)

L-Artikolu 2(6a)(c) tar-Regolament bażiku jipprevedi li “[f]ejn il-Kummissjoni jkollha indikazzjonijiet fondati sew tal-eżistenza potenzjali ta’ distorsjonijiet sinifikanti kif imsemmija fil-punt (b) f’ċertu pajjiż jew f’ċertu settur f’dak il-pajjiż, u fejn ikun xieraq għall-applikazzjoni effettiva ta’ dan ir-Regolament, il-Kummissjoni għandha tipproduċi, tippubblika u taġġorna regolarment rapport li jiddeskrivi ċ-ċirkostanzi tas-suq imsemmija fil-punt (b) f’dak il-pajjiż jew settur”.

(101)

Skont din id-dispożizzjoni, il-Kummissjoni ħarġet rapport tal-pajjiż dwar ir-RPĊ (“ir-Rapport”) (20), li juri l-eżistenza ta’ intervent sostanzjali tal-gvern f’ħafna livelli tal-ekonomija, inklużi distorsjonijiet speċifiċi f’bosta fatturi ewlenin ta’ produzzjoni (bħall-art, l-enerġija, il-kapital, il-materja prima u x-xogħol) kif ukoll f’setturi speċifiċi (bħall-azzar u s-sustanzi kimiċi). Ir-Rapport tqiegħed fil-fajl tal-investigazzjoni fl-istadju tal-bidu. Il-partijiet interessati kienu mistiedna biex jirribattu, jikkummentaw jew jissupplimentaw l-evidenza li kienet inkluża fil-fajl tal-investigazzjoni fil-mument tal-bidu. L-ilment kien fih ukoll xi evidenza rilevanti li tikkomplementa r-Rapport.

(102)

B’mod partikolari, l-ilment kien fih informazzjoni li l-industriji Ċiniżi tal-GFF u tal-GFR huma promossi ħafna mill-GTĊ. Skont l-ilmentatur, it-12-il Pjan ta’ Ħames Snin taċ-Ċina enfasizza l-importanza tal-industrija tal-materjali l-ġodda, li tinkludi l-GFF, bħala “industrija emerġenti strateġika” u jistipula li jenħtieġ li din tiġi żviluppata f’“pilastru ewlieni tal-industrija” permezz ta’ appoġġ u gwida ta’ politika komprensivi. Barra minn hekk, it-13-il Pjan ta’ Ħames Snin għandu l-għan li jiżviluppa industriji oħra tal-materjali l-ġodda billi jsaħħaħ ir-riċerka u l-iżvilupp u jtejjeb il-kapaċità ta’ innovazzjoni tal-industrija tal-manifattura (21).

(103)

L-ilment jiddikjara wkoll li l-industrija tal-materjali l-ġodda hija wkoll industrija mħeġġa bl-inizjattiva Made in China 2025, u għalhekk hija eliġibbli li tibbenefika minn finanzjament statali konsiderevoli. L-ilment jelenka għadd ta’ fondi maħluqa biex jappoġġjaw l-inizjattiva Made in China 2025 u b’hekk indirettament l-industrija tal-GFF (22).

(104)

Fl-aħħar nett, l-ilment jinnota li t-13-il Pjan ta’ Ħames Snin għall-Industrija tal-Materjali tal-Bini jitlob li tiġi ottimizzata l-istruttura industrijali billi, fost l-oħrajn, jespandi industriji emerġenti bħal materjali bbażati fuq il-ħġieġ, ċeramika industrijali, lenti intraokulari, fibri u kompożiti ta’ prestazzjoni għolja, u materjali tal-grafen u modifikati. Dan għandu jinkiseb permezz ta’ politiki ta’ finanzjament mill-gvern, ta’ tassazzjoni, finanzjarji, tal-ipprezzar, tal-enerġija, u tal-ħarsien tal-ambjent, u appoġġ għall-kapital għall-parteċipazzjonijiet fil-fużjonijiet, fl-akkwiżizzjonijiet u fir-ristrutturar tal-intrapriżi tal-materjali tal-bini permezz ta’ mezzi varji, inkluż is-self (23).

(105)

Kif speċifikat fil-premessa (41), il-GTĊ la kkummenta u lanqas ma pprovda evidenza li tappoġġa jew li tirribatti l-evidenza eżistenti dwar il-fajl tal-każ, inkluż ir-Rapport u l-evidenza addizzjonali li ġiet ipprovduta mill-ilmentatur, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku għall-każ inkwistjoni.

(106)

Waslu kummenti dwar id-distorsjonijiet ġejjin minn Hengshi, Jushi u CCCLA, li ddikjaraw li l-Unjoni hija marbuta bil-liġi tad-WTO sabiex tistabbilixxi l-kostijiet għall-bini tal-valur normali bl-għan li jiġu riflessi l-kondizzjonijiet prevalenti fir-RPĊ skont l-Artikolu 2 tal-Ftehim dwar l-Anti-dumping u rreferew għar-Rapport DS 473 tal-Korp tal-Appell tad-WTO UE – Bijodiżil (l-Arġentina).

(107)

Għall-finijiet ta’ din l-investigazzjoni, il-Kummissjoni kkonkludiet fil-premessa (161) li huwa xieraq li jiġi applikat l-Artikolu 2(6a) tar-Regolament bażiku. Għalhekk, il-Kummissjoni tqis li l-Artikolu 2(6a) huwa applikabbli. Barra minn hekk, il-Kummissjoni tqis li din id-dispożizzjoni hija konsistenti mal-obbligi tad-WTO tal-Unjoni Ewropea. Hija l-fehma tal-Kummissjoni li, kif iċċarat f’DS473 UE-Bijodiżil (l-Arġentina), id-dispożizzjonijiet tar-Regolament bażiku li japplikaw b’mod ġenerali fir-rigward tal-Membri kollha tad-WTO, b’mod partikolari l-Artikolu 2(5), it-tieni subparagrafu tar-Regolament bażiku, jippermettu l-użu ta’ data minn pajjiż terz, aġġustata kif xieraq meta tali aġġustament ikun meħtieġ u sostanzjat. Il-Kummissjoni fl-aħħar fakkret li t-tilwima DS473 UE-Bijodiżil (l-Arġentina) ma kinitx tikkonċerna l-applikazzjoni tal-Artikolu 2(6a) tar-Regolament bażiku, li huwa l-bażi ġuridika rilevanti għad-determinazzjoni tal-valur normali f’din l-investigazzjoni. Għalhekk il-Kummissjoni rrifjutat din l-affermazzjoni.

(108)

Il-Kummissjoni eżaminat jekk kienx xieraq li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti fis-sens tal-punt (b) tal-Artikolu 2(6a) tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza inkluża fir-Rapport, li tiddependi fuq sorsi disponibbli għall-pubbliku. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ inġenerali, iżda anke s-sitwazzjoni speċifika tas-suq fis-settur rilevanti, inkluż il-prodott ikkonċernat.

(109)

Is-sistema ekonomika Ċiniża hija bbażata fuq il-kunċett ta’ “ekonomija tas-suq soċjalista”. Dak il-kunċett huwa inkorporat fil-Kostituzzjoni Ċiniża u jiddetermina l-governanza ekonomika tar-RPĊ. Il-prinċipju ewlieni huwa s-“sjieda pubblika soċjalista tal-mezzi tal-produzzjoni, jiġifieri s-sjieda min-nies kollha u s-sjieda kollettiva mill-persuni li jaħdmu”. L-ekonomija tal-Istat hija “l-forza mexxejja tal-ekonomija nazzjonali” u l-Istat għandu l-mandat “li jiżgura l-konsolidazzjoni u t-tkabbir tagħha” (24). Konsegwentement, l-istruttura ġenerali tal-ekonomija Ċiniża mhux biss tippermetti interventi sostanzjali tal-gvern fl-ekonomija, iżda li tali interventi jsiru b’mod espliċitu. Il-kunċett ta’ supremazija tas-sjieda pubblika fuq is-sjieda privata hu mifrux fis-sistema legali sħiħa u hu enfasizzat bħala prinċipju ġenerali fil-partijiet fundamentali kollha tal-leġiżlazzjoni. Il-liġi Ċiniża fil-qasam tal-proprjetà hija eżempju ċarissimu: din tirreferi għall-istadju primarju tas-soċjaliżmu u tafda lill-Istat bil-ħarsien tas-sistema ekonomika bażika li skontha s-sjieda pubblika għandha rwol dominanti. Forom oħra ta’ sjieda huma tollerati, fejn il-liġi tippermettilhom jiżviluppaw spalla ma’ spalla mas-sjieda tal-Istat (25).

(110)

Barra minn hekk, skont il-leġiżlazzjoni Ċiniża, l-ekonomija tas-suq soċjalista hija żviluppata taħt it-tmexxija tal-Partit Komunista Ċiniż (“CCP”). L-istruttura tal-Istat Ċiniż u tas-CCP huma marbutin ma’ xulxin f’kull livell (legali, istituzzjonali, personali), u jiffurmaw superstruttura li fiha ma tkunx tista’ ssir distinzjoni bejn ir-rwoli tas-CCP u tal-Istat. Wara emenda tal-Kostituzzjoni Ċiniża f’Marzu 2018, ir-rwol ewlieni tas-CCP ingħata prominenza saħansitra akbar billi ġie affermat mill-ġdid fit-test tal-Artikolu 1 tal-Kostituzzjoni. Wara l-ewwel sentenza diġà eżistenti tad-dispożizzjoni: “is-sistema soċjalista hija s-sistema bażika tar-Repubblika Popolari taċ-Ċina”, iddaħħlet it-tieni sentenza ġdida li tinqara: “[il-]karatteristika li tiddefinixxi s-soċjaliżmu b’karatteristiċi Ċiniżi hi t-tmexxija tal-Partit Komunista taċ-Ċina.” (26) Dan juri l-kontroll mhux ikkontestat u dejjem akbar tas-CCP fuq is-sistema ekonomika tar-RPĊ. Dawn it-tmexxija u l-kontroll huma inerenti għas-sistema Ċiniża u jmorru ferm lil hinn mis-sitwazzjoni abitwali fil-pajjiżi l-oħra fejn il-gvernijiet jeżerċitaw kontroll makroekonomiku ġenerali li fil-limitazzjonijiet tiegħu hemm forzi tas-suq ħieles.

(111)

L-Istat Ċiniż iwettaq politika ekonomika intervenzjonista biex isegwi għanijiet li jikkoinċidu mal-aġenda politika stipulata mis-CCP, minflok ma jirrifletti l-kondizzjonijiet ekonomiċi prevalenti f’suq ħieles (27). L-għodod ekonomiċi intervenzjonisti li jintużaw mill-awtoritajiet Ċiniżi jinqasmu f’diversi friegħi, inklużi s-sistema tal-ippjanar industrijali, is-sistema finanzjarja, kif ukoll fil-livell tal-ambjent regolatorju.

(112)

L-ewwel, fil-livell ta’ kontroll amministrattiv globali, id-direzzjoni tal-ekonomija Ċiniżi hija rregolata minn sistema kumplessa ta’ ppjanar industrijali li jaffettwa l-attivitajiet ekonomiċi kollha fil-pajjiż. Dawn il-pjanijiet kollha jkopru matriċi komprensiva u kumplessa ta’ setturi u politiki trażversali u huma preżenti fil-livelli kollha tal-gvern. Il-pjanijiet fil-livell provinċjali huma dettaljati filwaqt li l-pjanijiet nazzjonali jistabbilixxu miri usa’. Il-pjanijiet jispeċifikaw ukoll il-mezzi biex jiġu appoġġjati l-industriji/is-setturi rilevanti kif ukoll il-perjodi ta’ żmien li fihom jeħtieġ li jintlaħqu l-objettivi. Xi pjanijiet għadhom jinkludu miri espliċiti tal-output, filwaqt li din kienet karatteristika regolari fiċ-ċikli tal-ippjanar preċedenti. Skont il-pjanijiet, is-setturi u/jew il-proġetti industrijali individwali qed jiġu identifikati bħala prijoritajiet (pożittivi jew negattivi) skont il-prijoritajiet tal-gvern u l-għanijiet ta’ żvilupp speċifiċi attribwiti lilhom (aġġornament industrijali, espansjoni industrijali, eċċ.). L-operaturi ekonomiċi, privati u tal-Istat kollha kemm huma għandhom jaġġustaw b’mod effettiv l-attivitajiet kummerċjali tagħhom skont ir-realtajiet imposti mis-sistema tal-ippjanar. Dan mhuwiex biss minħabba n-natura vinkolanti tal-pjanijiet iżda anke minħabba l-fatt li l-awtoritajiet Ċiniżi rilevanti fil-livelli kollha tal-gvern jaderixxu mas-sistema ta’ pjanijiet u jużaw is-setgħat mogħtija lilhom skont kif ikun meħtieġ, u b’hekk jisfurzaw lill-operaturi ekonomiċi jikkonformaw mal-prijoritajiet stabbiliti fil-pjanijiet (ara wkoll it-taqsima 3.3.1.5) (28).

(113)

It-tieni nett, fil-livell tal-allokazzjoni tar-riżorsi finanzjarji, is-sistema finanzjarja tar-RPĊ hija ddominata mill-banek kummerċjali tal-Istat. Dawk il-banek, meta jkunu qed jistabbilixxu u jimplementaw il-politika tas-self tagħhom, jeħtieġ li jallinjaw ruħhom mal-objettivi tal-politika industrijali tal-gvern minflok ma primarjament jivvalutaw il-merti ekonomiċi ta’ proġett partikolari (ara wkoll it-taqsima 3.3.1.8) (29). L-istess japplika għall-komponenti l-oħra tas-sistema finanzjarja Ċiniża, bħas-swieq tal-istokks, is-swieq tal-bonds, is-swieq tal-ekwità privata, eċċ. Barra minn hekk, dawn il-partijiet tas-settur finanzjarju għajr is-settur bankarju huma istituzzjonalment u operazzjonalment stabbiliti b’mod li mhuwiex xprunat biex itejjeb il-funzjonament effiċjenti tas-swieq finanzjarji iżda biex jiżgura l-kontroll u jippermetti l-intervent mill-Istat u mis-CCP (30).

(114)

It-tielet, fil-livell tal-ambjent regolatorju, l-interventi mill-Istat fl-ekonomija jieħdu għadd ta’ forom. Pereżempju, ir-regoli tal-akkwist pubbliku jintużaw regolarment sabiex jintlaħqu għanijiet ta’ politika għajr l-effiċjenza ekonomika, u b’hekk idgħajfu l-prinċipji bbażati fuq is-suq fil-qasam. Il-leġiżlazzjoni applikabbli tipprevedi b’mod speċifiku li l-akkwist pubbliku għandu jsir sabiex jiġi ffaċilitat l-ilħuq tal-għanijiet imfassla mill-politiki tal-Istat. Madankollu, in-natura ta’ dawn l-għanijiet għadha mhix iddefinita, u b’hekk tħalli marġni wiesa’ ta’ apprezzament għall-korpi tat-teħid ta’ deċiżjonijiet (31). Bl-istess mod, fil-qasam tal-investiment, il-GTĊ iżomm kontroll u influwenza sinifikanti fuq id-destinazzjoni u fuq id-daqs tal-investiment tal-Istat u wkoll dak privat. L-iskrinjar tal-investiment, kif ukoll diversi inċentivi, restrizzjonijiet, u projbizzjonijiet relatati mal-investiment jintużaw mill-awtoritajiet bħala għodda importanti biex jiġu appoġġjati l-għanijiet tal-politika industrijali bħaż-żamma tal-kontroll tal-Istat fuq setturi ewlenin jew it-tisħiħ tal-industrija domestika (32).

(115)

Fil-qosor, il-mudell ekonomiku Ċiniż huwa bbażat fuq ċerti assjomi bażiċi, li jipprevedu u jħeġġu diversi interventi tal-gvern. Tali interventi sostanzjali tal-gvern huma f’kunflitt mal-azzjoni libera tal-forzi tas-suq, u dan iwassal għad-distorsjoni tal-allokazzjoni effettiva tar-riżorsi skont il-prinċipji tas-suq (33).

(116)

Fir-RPĊ, l-intrapriżi li joperaw taħt is-sjieda, il-kontroll u/jew is-superviżjoni politika jew il-gwida tal-Istat jirrappreżentaw parti essenzjali mill-ekonomija.

(117)

Il-GTĊ u s-CCP iżommu strutturi li jiżguraw il-kontinwazzjoni tal-influwenza tagħhom fuq l-intrapriżi, u b’mod partikolari fuq l-intrapriżi tal-Istat (State-owned enterprises, SOEs). L-Istat (u f’ħafna aspetti anke s-CCP) mhux biss jifformula u jissorvelja b’mod attiv l-implimentazzjoni tal-politiki ekonomiċi ġenerali minn SOEs individwali, iżda jeżerċita wkoll id-drittijiet tiegħu li jipparteċipa fit-teħid ta’ deċiżjonijiet operazzjonali fl-SOEs. Tipikament dan isir permezz tar-rotazzjoni ta’ uffiċjali tal-partit (cadres) bejn l-awtoritajiet tal-gvern u l-SOEs, permezz tal-preżenza ta’ membri tal-partit fuq il-korpi eżekuttivi tal-SOEs u ta’ ċelloli tal-partit fil-kumpaniji (ara wkoll it-taqsima 3.3.1.4 hawn taħt), kif ukoll permezz tat-tfassil tal-istruttura korporattiva tas-settur tal-SOEs (34). Inkambju, l-SOEs igawdu status partikolari fl-ekonomija Ċiniża, li jinvolvi għadd ta’ benefiċċji ekonomiċi, b’mod partikolari ħelsien mill-kompetizzjoni u aċċess preferenzjali għal inputs rilevanti, inklużi l-finanzi (35).

(118)

Speċifikament fis-setturi tal-GFF u tal-GFR, għad hemm grad sostanzjali ta’ sjieda mill-GTĊ. L-Istat għandu ishma sinifikanti fiż-żewġ gruppi ta’ produtturi fil-kampjun, il-Grupp CNBM u l-Grupp Yuntianhua, li huma l-akbar produtturi tal-GFF u tal-GFR fiċ-Ċina. Dawn il-kumpaniji jkopru madwar 68 % tal-kapaċità totali tal-produzzjoni fiċ-Ċina tal-industrija tal-fibra tal-ħġieġ li tkopri kemm il-GFF kif ukoll il-GFR (36).

(119)

Minħabba l-livell għoli ta’ intervent mill-gvern fl-industrija tal-GFF u sehem kbir ta’ SOEs fis-settur, anki l-produtturi privati ma jitħallewx joperaw skont il-kondizzjonijiet tas-suq. Fil-fatt, kemm l-intrapriżi pubbliċi kif ukoll dawk privati fis-settur tal-GFF huma soġġetti wkoll għal superviżjoni u gwida politika kif stabbilit fit-taqsima 3.3.1.5. L-istess jgħodd għas-settur tal-GFR, li jipproduċi l-materja prima ewlenija għall-GFF.

(120)

Minbarra li jeżerċita kontroll fuq l-ekonomija permezz tas-sjieda ta’ SOEs u mezzi oħra, il-GTĊ huwa f’pożizzjoni li jinterferixxi mal-prezzijiet u mal-kostijiet permezz tal-preżenza tal-Istat fid-ditti. Filwaqt li d-dritt għall-ħatra u t-tneħħija ta’ membri kruċjali tal-maniġment fl-SOEs mill-awtoritajiet rilevanti tal-Istat, kif previst fil-leġiżlazzjoni Ċiniża, jista’ jitqies li jirrifletti d-drittijiet ta’ sjieda korrispondenti, (37) iċ-ċelloli tas-CCP fl-intrapriżi, kemm dawk tal-Istat kif ukoll dawk privati, jirrappreżentaw mezz importanti ieħor li permezz tiegħu l-Istat jista’ jinterferixxi fid-deċiżjonijiet tan-negozju. Skont il-liġi tal-kumpaniji tar-RPĊ, f’kull kumpanija għandha tiġi stabbilita organizzazzjoni tas-CCP (li jkollha mill-anqas tliet membri tas-CCP kif speċifikat fil-Kostituzzjoni tas-CCP (38)) u l-kumpanija għandha tipprovdi l-kondizzjonijiet meħtieġa għall-attivitajiet tal-organizzazzjoni tal-partit. Fil-passat, jidher li dan ir-rekwiżit mhux dejjem ġie segwit jew infurzat b’mod strett. Madankollu, minn tal-inqas l-2016, is-CCP saħħaħ il-pretensjonijiet tiegħu li jikkontrolla d-deċiżjonijiet kummerċjali fl-SOEs bħala kwistjoni ta’ prinċipju politiku. Huwa rrapportat ukoll li s-CCP teżerċita pressjoni fuq il-kumpaniji privati biex tqiegħed il-“patrijottiżmu” bħala prijorità u ssegwi d-dixxiplina tal-partit (39). Fl-2017, ġie rrapportat li kienu jeżistu ċelloli tal-partiti f’70 % ta’ madwar 1,86 miljun kumpanija bi sjieda privata, li rriżulta fi pressjoni dejjem akbar biex l-organizzazzjonijiet tas-CCP ikollhom l-aħħar kelma fir-rigward tad-deċiżjonijiet kummerċjali fil-kumpaniji rispettivi tagħhom (40). Dawn ir-regoli għandhom applikazzjoni ġenerali fl-ekonomija Ċiniża kollha, fost is-setturi kollha, inkluż għall-produtturi tal-GFF u għall-fornituri tal-inputs tagħhom.

(121)

Speċifikament fis-settur tal-GFF, kif diġà ġie indikat, ħafna mill-produtturi tal-GFF huma proprjetà tal-Istat. Hemm ukoll evidenza fil-fajl kunfidenzjali li hemm preżenza tal-Istat fil-produtturi esportaturi fil-kampjun li tista’ teżerċita influwenza fuq id-deċiżjonijiet tal-kumpanija u fl-aħħar mill-aħħar tinterferixxi fil-prezzijiet jew il-kostijiet. Minħabba li hemm elementi ta’ sostenn speċifiċi preżenti fl-Artikoli ta’ Assoċjazzjoni tal-kumpanija jew dokumenti oħra li huma ta’ natura kunfidenzjali, dawn ġew divulgati separatament lill-parti kkonċernata.

(122)

Il-preżenza u l-intervent tal-Istat fis-swieq finanzjarji (ara wkoll it-taqsima 3.3.1.8 hawn taħt) kif ukoll fil-provvista ta’ materja prima u ta’ inputs għandhom effett ta’ distorsjoni addizzjonali fuq is-suq (41). B’hekk, il-preżenza tal-Istat f’ditti, inklużi SOEs, fis-settur tal-GFF u f’setturi oħrajn (bħas-settur finanzjarju u dak tal-input) tippermetti lill-GTĊ jinterferixxi fir-rigward tal-prezzijiet u tal-kostijiet.

(123)

Id-direzzjoni tal-ekonomija Ċiniża hija ddeterminata f’livell sinifikanti minn sistema elaborata ta’ ppjanar li tistabbilixxi prijoritajiet u tippreskrivi l-għanijiet li l-gvernijiet ċentrali u lokali għandhom jiffokaw fuqhom. Jeżistu pjanijiet rilevanti fil-livelli kollha tal-gvern u dawn ikopru virtwalment is-setturi ekonomiċi kollha. L-objettivi stabbiliti mill-istrumenti tal-ippjanar huma ta’ natura vinkolanti u l-awtoritajiet f’kull livell amministrattiv jimmonitorjaw l-implimentazzjoni tal-pjanijiet mil-livell korrispondenti aktar baxx tal-gvern. B’mod ġenerali, is-sistema tal-ippjanar fir-RPĊ tirriżulta fis-sitwazzjoni fejn ir-riżorsi jintbagħtu lejn setturi ddeżinjati bħala strateġiċi jew inkella politikament importanti mill-gvern, minflok ma jkunu allokati skont il-forzi tas-suq (42).

(124)

L-industrija tal-GFF titqies bħala industrija importanti appoġġata mill-GTĊ. Dan huwa kkonfermat f’għadd ta’ pjanijiet għall-iżviluppi tal-industrija, bħat-13-il Pjan ta’ Ħames Snin għall-Iżvilupp Ekonomiku u Soċjali tar-RPĊ jew l-inizjattiva Made in China 2025 (43).

(125)

Barra minn hekk, sikwit issir referenza għall-GFF taħt l-umbrella ta’ “materjali ġodda”. Il-Pjan Direzzjonali Made in China 2025 (44) jiddeskrivi s-settur 9 “materjali ġodda” u s-sottokategoriji tiegħu, inklużi materjali fundamentali avvanzati (il-punt 9.1), materjali strateġiċi ewlenin (il-punt 9.2) inklużi fibri ta’ prestazzjoni għolja u materjali komposti, materjali ġodda tal-enerġija (45).

(126)

Barra minn hekk, wara l-Pjan Direzzjonali Made in China 2025, f’Novembru 2016, il-lista ta’ 10 setturi strateġiċi ġiet irfinata f’Katalogu ta’ Erba’ Elementi Essenzjali ppubblikati mill-Kumitat Konsultattiv Nazzjonali dwar l-Istrateġija tal-Manifattura (NMSAC), grupp konsultattiv għall-Grupp Nazzjonali Żgħir ta’ Tmexxija dwar il-Bini tas-Saħħa tal-Manifattura Nazzjonali. F’dan il-katalogu, kull wieħed mill-10 setturi strateġiċi huwa maqsum f’erba’ kapitoli: (i) spare parts ċentrali essenzjali, (ii) materjali essenzjali ewlenin, (iii) proċessi/teknoloġiji essenzjali avvanzati u (iv) pjattaformi tat-teknoloġija industrijali. Il-fibra tal-ħġieġ tista’ tinstab fis-settur 7: tagħmir elettriku, il-punt II materjal essenzjali ewlieni: is-subpunt 16 bords tal-iżolament tal-fibra tal-ħġieġ u s-settur 9: materjali ġodda, il-punt II materjali essenzjali ewlenin, is-subpunt 10. Materjali tal-fibra ta’ prestazzjoni għolja, monomeri u komposti u 24. Materjali abbażi ta’ ħġieġ.

(127)

It-13-il Pjan ta’ Ħames Snin għall-Iżvilupp Ekonomiku u Soċjali tar-RPĊ isemmi l-materjali l-ġodda f’xi każijiet: “Aħna se nħaffu l-pass biex nagħmlu rivoluzzjonijiet f’teknoloġiji ewlenin f’oqsma bħall-informazzjoni u l-komunikazzjoni tal-ġenerazzjoni li jmiss, l-enerġija l-ġdida, il-materjali l-ġodda […]” (46). Il-pjan barra minn hekk jipprevedi li se jitwettqu proġetti relatati mar-riċerka, l-iżvilupp u l-applikazzjoni ta’ materjali ġodda ewlenin (47).

(128)

Il-Pjan Direzzjonali Made in China 2025 jelenka 10 setturi strateġiċi li huma l-industriji ewlenin għall-GTĊ. Materjali ġodda, li huma wieħed mill-10 setturi strateġiċi, jibbenefikaw mill-vantaġġi li jirriżultaw mill-mekkaniżmi ta’ appoġġ elenkati fid-dokument, inklużi, fost l-oħrajn, Politiki ta’ Appoġġ Finanzjarju, Politika Fiskali u tat-Tassazzjoni, Sorveljanza u Appoġġ mill-Kunsill tal-Istat (48).

(129)

Il-prodotti tal-fibra huma wkoll imsemmija espliċitament fil-Katalogu ta’ Gwida għall-Aġġustament tal-Istruttura tal-Industrija (NDRC) edizzjoni tal-2011, dokument li jelenka l-industriji eliġibbli għal finanzjament preferenzjali fil-kapitoli dwar il-materjali tal-bini u t-tessuti, kif ġej:

“Materjali tal-bini:

(…)

Tessuti:

(…)

(…)

(…)

(130)

Barra minn hekk, “Il-Katalogu ta’ Gwida għall-Aġġustament tal-Istruttura tal-Industrija 2011” (id-Deċiżjoni Nru 9) isemmi b’mod espliċitu bħala industrija mħeġġa: “Ġbid tal-fibra tal-ħġieġ-E fl-ifran[…], l-iżvilupp u l-produzzjoni ta’ fibra tal-ħġieġ ta’ prestazzjoni għolja u l-prodott tagħha.”

(131)

Il-GFF u l-GFR huma wkoll koperti mill-Pjan ta’ Żvilupp tal-Industrija tal-Kostruzzjoni 2016-2020, li jipprevedi, fost l-oħrajn, it-tranżizzjoni tal-industrija tal-materjali tal-kostruzzjoni “minn industrija kbira għal industrija b’saħħitha” u l-ottimizzazzjoni tal-istrutturi tas-settur tal-kostruzzjoni, it-titjib tas-sigurtà tal-provvista ta’ materjali ewlenin, iż-żieda fil-livell ta’ konċentrazzjoni fl-industrija kif ukoll it-titjib tal-kompetittività internazzjonali (49). Il-pjan jipprovdi għal miri kwantitattivi ta’ żvilupp, kontroll governattiv fuq il-kapaċità ta’ produzzjoni, miri dettaljati tal-produzzjoni, distribuzzjoni ġeografika tal-industriji fost il-provinċji fir-RPĊ, sigurtà tal-provvista, żvilupp ta’ industriji speċifiċi, kontroll tal-gvern u influwenza fuq l-intrapriżi u miżuri ta’ appoġġ għall-industrija (50). Dan juri l-preżenza u l-intervent qawwija tal-Istat fl-industrija tal-fibri tal-ħġieġ.

(132)

It-13-il Pjan ta’ Ħames Snin għall-Industrija tal-Materjali tal-Fibra u Komposti (51) huwa pjan immirat b’mod speċifiku lejn l-industrija tal-materjali tal-fibra. Huwa jiggwida b’mod ċar l-iżvilupp tas-settur, pereżempju t-Taqsima III.3 tistabbilixxi l-għan li:

“ Jintegra u jaġġorna b’mod attiv il-lati upstream u downstream tal-katina tal-industrija sabiex iżomm l-iżvilupp f’saħħtu u stabbli tal-industrija tal-materjali tal-fibra u komposti: Iħeġġeġ lill-intrapriżi ta’ fran għat-tidwib fuq skala kbira biex jimplimentaw b’mod kostanti l-istrateġija ta’ żvilupp “go global” u jimplimentaw mudelli ta’ kapaċità tal-produzzjoni globali. Fuq din il-bażi: - iżżomm livell baxx ta’ kontroll fuq ir-rata tat-tkabbir tal-volum tal-produzzjoni tal-fibra tal-ħġieġ domestika; - fl-istess ħin, inaqqas il-proporzjon tal-esportazzjoni tal-fibra tal-ħġieġ u l-prodotti domestiċi; - jaġġusta b’mod attiv l-istrutturi tal-prodotti; […] - jaġġusta b’mod attiv l-istruttura tal-prodotti u jiggwida l-intrapriżi biex jimplimentaw żvilupp differenzjat, jiżviluppaw b’mod vigoruż l-ipproċessar f’livell għoli ta’ prodotti tal-fibra tal-ħġieġ, jespandu d-daqs tas-suq tal-fibra u prodotti ta’ materjali komposti f’kampi ta’ applikazzjoni ta’ livell medju sa għoli, u jtejbu l-kwalità tal-prodott u l-valur miżjud. Jiżgura li r-rata ta’ tkabbir annwali tad-dħul ewlieni min-negozju tal-industrija tal-fibra u tal-materjali komposti tkun ogħla mir-rata ta’ tkabbir tal-PDG nazzjonali b’madwar 5 sa 6 punti perċentwali, jiġifieri, mill-2020, id-dħul totali tal-intrapriżi akbar mid-daqs indikat se jilħaq il-500 biljun yuan, jiġifieri li jirdoppja meta mqabbel mas-sitwazzjoni prevalenti fi tmiem it-12-il Pjan ta’ Ħames Snin. ”  (52)

(133)

Barra minn hekk, it-taqsima IV.3.4 ta’ dak il-pjan tistabbilixxi l-bażi għall-gwida governattiva tal-intrapriżi u l-industrija sħiħa:

“Gwida għad-diversi tipi ta’ impriżi biex jinvolvu ruħhom f’operazzjonijiet differenzjati billi jitqiesu l-vantaġġi individwali tagħhom u s-segmenti speċifiċi tas-suq. B’mod partikolari, huwa meħtieġ li l-intrapriżi żgħar u ta’ daqs medju jiġu ggwidati biex isegwu l-perkors tat-tkabbir li tikkonsisti fl-indirizzar ta’ lakuni speċifiċi, fil-komplimentarjetà tal-intrapriżi ż-żgħar għal dawk kbar, u fil-kunsiderazzjoni tal-ispeċjalizzazzjoni bħala t-triq għas-suċċess. Bis-saħħa ta’ operazzjonijiet differenzjati, il-kompetizzjoni fuq skala kbira bejn intrapriżi kbar tiġi evitata, u l-kompetizzjoni bejn intrapriżi simili tiġi evitata, u b’hekk jiġi eliminat is-suq tal-kompetizzjoni b’kost baxx. Fl-istess ħin, bi produzzjoni speċjalizzata, intrapriżi żgħar u ta’ daqs medju jistgħu wkoll jiksbu r-rispett u l-attenzjoni ta’ intrapriżi kbar, jistabbilixxu relazzjonijiet ta’ kooperazzjoni mill-qrib ma’ intrapriżi kbar, u jappoġġaw u jippromwovu b’mod effettiv l-iżvilupp ta’ intrapriżi kbar.”

(134)

Kif spjegat fir-Rapport, l-assoċjazzjonijiet tal-industrija huma marbuta mill-qrib mal-Istat, l-aktar permezz tal-importanza tal-bini tas-CCP f’dawk l-assoċjazzjonijiet (53). Għalhekk, id-dispożizzjonijiet tat-taqsima IV.3.6 tal-istess pjan jindikaw ukoll intervent mill-Istat fil-produzzjoni tal-fibra, inkluż is-settur tal-GFF:

“[L-Assoċjazzjoni għandha]

(135)

Ir-RPĊ ippromwoviet b’mod attiv l-industriji tal-GFF u tal-GFR fuq livelli differenti tal-gvern, eżempju ta’ inizjattiva lokali li tkopri waħda mill-kumpaniji fil-kampjun jista’ jinstab fit-13-il Pjan ta’ Ħames Snin tal-Belt tal-Jiujiang għall-iżvilupp ekonomiku u soċjali:

Taqsima III 2.2 L-implimentazzjoni effettiva ta’ pjan ta’ żvilupp għal industriji strateġiċi u emerġenti

(136)

Fir-rigward tal-materja prima, għall-produttur li kkoopera mhux integrat vertikalment, il-materja prima ewlenija hija l-GFR, li tirrappreżenta ’l fuq minn 70 % tal-kost totali tal-produzzjoni. Diġà kien stabbilit fl-investigazzjoni antisussidji preċedenti fil-GFR li din l-industrija hija ssussidjata b’mod sinifikanti mill-GTĊ u, għalhekk, hija distorta. Ġie stabbilit li l-industrija tal-GFR tibbenefika minn self preferenzjali, tnaqqis tat-taxxa fl-iskema tal-“Impriża tat-Teknoloġija Avvanzata u Ġdida”, Programmi tat-Taxxa Indiretta u tat-Tariffa ta’ Importazzjoni u l-provvista tad-drittijiet tal-użu tal-art (55).

(137)

Il-produtturi integrati vertikalment jużaw numru kbir ta’ fatturi ta’ produzzjoni, li huma wkoll imfixkla. Bħala eżempju, il-gass, wieħed mill-fatturi importanti tal-produzzjoni huwa prodott primarjament minn SOEs (96 % tal-gass naturali huwa kkontrollat miċ-China National Petroleum Corporation (“CNPC”), China Petroleum & Chemical Corporation (“Sinopec”) u China National Offshore Oil Corporation (“CNOOC”)) u l-prezzijiet tal-gass tagħha huma rregolati mill-Kummissjoni Nazzjonali għall-Iżvilupp u r-Riforma (“NDRC”) (56). Il-kwarz, il-kawlina u l-fluworit, materja prima importanti oħra fil-produzzjoni tal-GFF, huma koperti mit-13-il Pjan ta’ Ħames Snin għar-Riżorsi minerali u, barra minn hekk, il-kwarz u l-kawlina huma inklużi fit-13-il Pjan ta’ Ħames Snin għall-Industrija tal-Materjali tal-Bini. Dawk iż-żewġ pjanijiet jistabbilixxu kontroll governattiv fuq l-industrija b’mod ġenerali, jistabbilixxu standards ta’ volum tal-estrazzjoni applikabbli fost oħrajn speċifikament għall-kwarz, iħeġġu r-riforma tal-SOEs, jipprevedu għadd ta’ miżuri ta’ appoġġ u intervent governattiv f’inizjattivi privati. Instab li l-ossidu tal-aluminju kien soġġett għal intervent governattiv fil-provinċja ta’ Hebei, fejn kien parti mil-lista ta’ proġetti ewlenin ta’ investiment u tal-Pjan ta’ Żvilupp tal-Industrija tal-Materjali Ġodda tal-2016 ta’ Hebei li kien jistipula l-appoġġ tal-Istat biex tinkiseb produzzjoni definita (57). Il-karbonat tas-sodju huwa kopert mit-13-il Pjan ta’ Ħames Snin għall-Industrija Petrokimika u Kimika, fejn huwa stabbilit li l-Istat jenħtieġ li jżomm kontroll fuq il-kapaċità tal-produzzjoni: “kontroll strett fuq iż-żidiet ġodda fil-kapaċità fis-setturi tal-kapaċità żejda bħal […], il-karbonat tas-sodju, […].” (58). Id-dolomit huwa fattur ieħor tal-produzzjoni soġġett għall-appoġġ mill-Istat fir-RPĊ, pereżempju huwa wieħed mill-industriji mħeġġa għar-Reġjun Awtonomu tal-Mongolja Interna fil-Katalogu tal-Investiment Barrani taċ-Ċina Ċentrali u tal-Punent. Il-polipropilen ukoll jirċievi appoġġ mill-gvern, u huwa msemmi fil-Katalogu ta’ Gwida tal-NDRC għall-Aġġustament tal-Istruttura tal-Industrija: “il-kostruzzjoni l-ġdida tal-unitajiet ta’ produzzjoni tal-polipropilen bi produzzjoni annwali ta’ inqas minn 70000 tunnellata (permezz ta’ proċess kontinwu u proċess bil-lott” (59) u fil-provinċja ta’ Hebei, it-13-il Pjan Petrokimiku ta’ Ħames Snin: “Ottimizzazzjoni tal-industrija: Sal-2020, [Hebei għandha] […] tiżgura l-feġġa ta’ raggruppamenti tal-industrija tal-materjali sintetiċi li jiffokaw fuq il-PVC, il-kaprolattam (najlon), it-TDI, l-MDI (poliuretan), il-polipropilen, […]” (60).

(138)

Fil-qosor, il-GTĊ għandu miżuri fis-seħħ biex iħeġġeġ lill-operaturi jikkonformaw mal-objettivi tal-ordni pubbliku li jappoġġaw lill-industriji mħeġġa, inkluża l-produzzjoni tal-GFR bħala l-materja prima ewlenija li tintuża fil-manifattura tal-prodott ikkonċernat għall-manifatturi mhux integrati vertikalment kif ukoll numru ta’ materja prima użata għall-manifattura tal-GFF mill-produtturi integrati vertikalment. Tali miżuri jimpedixxu lill-forzi tas-suq milli joperaw b’mod normali.

(139)

Skont l-informazzjoni fil-fajl, is-sistema Ċiniża tal-falliment ipproduċiet riżultati inadegwati fl-ilħuq tal-objettivi ewlenin tagħha stess, bħal dawk ta’ saldu ġust tal-pretensjonijiet u tad-djun u ta’ salvagwardja tad-drittijiet u tal-interessi legali tal-kredituri u tad-debituri. Dan jidher li huwa msejjes fil-fatt li filwaqt li l-liġi Ċiniża dwar il-falliment tistrieħ formalment fuq prinċipji simili għal dawk li jiġu applikati f’liġijiet korrispondenti f’pajjiżi oħra minbarra l-RPĊ, is-sistema Ċiniża hija karatterizzata minn nuqqas ta’ infurzar sistematiku. L-għadd ta’ fallimenti jibqa’ magħruf li huwa baxx meta mqabbel mad-daqs tal-ekonomija tal-pajjiż, mhux l-inqas minħabba li l-proċedimenti ta’ insolvenza jbatu minn għadd ta’ nuqqasijiet, li effettivament jiffunzjonaw bħala diżinċentiv għall-preżentazzjonijiet ta’ fallimenti. Barra minn hekk, ir-rwol tal-Istat fil-proċedimenti ta’ insolvenza għadu wieħed b’saħħtu u attiv, li spiss ikollu influwenza diretta fuq l-eżitu tal-proċedimenti (61).

(140)

Barra minn hekk, in-nuqqasijiet tas-sistema tad-drittijiet ta’ proprjetà huma partikolarment evidenti fir-rigward tas-sjieda tal-art u d-drittijiet għall-użu tal-art fir-RPĊ (62). L-art kollha hi proprjetà tal-Istat Ċiniż (art rurali ta’ proprjetà kollettiva u art urbana tal-Istat). L-allokazzjoni tagħha għadha tiddependi biss fuq l-Istat. Hemm dispożizzjonijiet legali li għandhom l-għan li jallokaw id-drittijiet għall-użu tal-art b’mod trasparenti u li huma mmirati lejn il-prezzijiet tas-suq, pereżempju bl-introduzzjoni ta’ proċeduri ta’ offerti. Madankollu, dawn id-dispożizzjonijiet ma jiġux irrispettati b’mod regolari, fejn ċerti akkwirenti jiksbu l-art tagħhom mingħajr ħlas jew b’rati aktar baxxi mir-rati tas-suq (63). Barra minn dan, l-awtoritajiet spiss isegwu għanijiet politiċi speċifiċi, inkluż l-implimentazzjoni tal-pjanijiet ekonomiċi, meta jkunu qed jallokaw l-art (64).

(141)

L-istess bħas-setturi l-oħra fl-ekonomija Ċiniża, il-produtturi tal-GFF huma soġġetti għar-regoli ordinarji dwar il-liġijiet Ċiniżi dwar il-falliment, dwar il-liġi tal-kumpaniji u dwar il-proprjetà. L-effett ta’ dan huwa li anke dawn il-kumpaniji huma soġġetti għad-distorsjonijiet minn fuq għal isfel li jirriżultaw mill-applikazzjoni diskriminatorja jew mill-infurzar inadegwat tal-liġijiet dwar il-falliment u l-proprjetà. L-investigazzjoni attwali ma żvelat xejn li jqajjem dubji dwar dawn is-sejbiet. Għalhekk, il-Kummissjoni kkonkludiet b’mod preliminari li l-liġijiet Ċiniżi dwar il-fallimenti u l-proprjetà ma jaħdmux kif suppost, u b’hekk iwasslu għal distorsjonijiet meta jiġu miżmuma ħajjin ditti insolventi u meta jiġu allokati d-drittijiet għall-użu tal-art fir-RPĊ. Dawk il-kunsiderazzjonijiet, ibbażati fuq l-evidenza disponibbli, jidhru li huma applikabbli bis-sħiħ ukoll fis-settur tal-GFF.

(142)

Fid-dawl ta’ dan ta’ hawn fuq, il-Kummissjoni kkonkludiet li kien hemm applikazzjoni diskriminatorja jew infurzar inadegwat tal-liġijiet dwar il-falliment u l-proprjetà fis-settur tal-GFF, inkluż fir-rigward tal-prodott ikkonċernat.

(143)

Mhuwiex possibbli li fir-RPĊ tiżviluppa bis-sħiħ sistema ta’ pagi bbażata fuq is-suq peress li d-drittijiet ta’ organizzazzjoni kollettiva tal-ħaddiema u tal-impjegaturi huma mxekkla. Ir-RPĊ ma rratifikax għadd ta’ konvenzjonijiet essenzjali tal-Organizzazzjoni Internazzjonali tax-Xogħol (“ILO”), b’mod partikolari dwar il-libertà ta’ assoċjazzjoni u dwar in-negozjar kollettiv (65). Skont il-liġi nazzjonali, organizzazzjoni waħda biss tat-trade unions hija attiva. Madankollu, din l-organizzazzjoni mhijiex indipendenti mill-awtoritajiet tal-Istat u l-involviment tagħha fin-negozjar kollettiv u fil-protezzjoni tad-drittijiet tal-ħaddiema għadu rudimentali (66). Barra minn dan, il-mobbiltà tal-forza tax-xogħol Ċiniża hija ristretta mis-sistema tar-reġistrazzjoni tal-unitajiet domestiċi, li tillimita l-aċċess għall-firxa sħiħa tal-benefiċċji tas-sigurtà soċjali u oħrajn lir-residenti lokali ta’ żona amministrattiva partikolari. Dan tipikament jirriżulta f’ħaddiema li ma jkollhomx ir-reġistrazzjoni tar-residenza lokali li jsibu ruħhom f’pożizzjoni ta’ impjieg vulnerabbli u jirċievu introjtu aktar baxx mid-detenturi tar-reġistrazzjoni tar-residenza (67). Dawk is-sejbiet iwasslu għad-distorsjoni tal-kostijiet lavorattivi fir-RPĊ.

(144)

Il-ħaddiema jikkostitwixxu fattur importanti tal-produzzjoni fil-GFF. Matul l-investigazzjoni ġie stabbilit li l-ħaddiema jirrappreżentaw bejn 5 % u 25 % tal-kost totali tal-produzzjoni.

(145)

Ma ġiet ippreżentata l-ebda evidenza li turi li s-settur tal-GFF mhuwiex soġġett għas-sistema Ċiniża dwar il-liġi tax-xogħol deskritta. Għalhekk is-settur tal-GFF huwa affettwat mid-distorsjonijiet tal-kostijiet lavorattivi kemm direttament (fil-produzzjoni tal-prodott ikkonċernat jew tal-materja prima ewlenija għall-produzzjoni tiegħu) kif ukoll indirettament (f’termini ta’ aċċess għall-kapital jew għal inputs minn kumpaniji soġġetti għall-istess sistema tax-xogħol fir-RPĊ).

(146)

L-aċċess għall-kapital għal atturi korporattivi fir-RPĊ huwa soġġett għal diversi distorsjonijiet.

(147)

L-ewwel nett, is-sistema finanzjarja Ċiniża hija karatterizzata mill-pożizzjoni b’saħħitha tal-banek tal-Istat (68), li, meta jagħtu aċċess għal finanzjament, iqisu kriterji oħra għajr il-vijabbiltà ekonomika ta’ proġett. B’mod simili għall-SOEs mhux finanzjarji, il-banek jibqgħu marbutin mal-Istat mhux biss permezz tas-sjieda iżda wkoll permezz ta’ azzjonijiet personali (l-ogħla eżekuttivi tal-istituzzjonijiet finanzjarji tal-Istat fl-aħħar mill-aħħar jinħatru mis-CCP) (69) u, għal darb’oħra eżatt bħal fil-każ tal-SOEs mhux finanzjarji, il-banek jimplimentaw b’mod regolari ordnijiet pubbliċi mfassla mill-gvern. Meta jagħmlu dan, il-banek jikkonformaw ma’ obbligu legali espliċitu li jmexxu n-negozju tagħhom f’konformità mal-ħtiġijiet tal-iżvilupp ekonomiku u soċjali nazzjonali u skont il-gwida tal-politiki industrijali tal-Istat (70). Dan jiġi amplifikat permezz ta’ regoli eżistenti addizzjonali, li jmexxu l-finanzi f’setturi li l-gvern jagħżel bħala mħeġġa jew li b’xi mod ieħor huma importanti (71).

(148)

Filwaqt li huwa rikonoxxut li diversi dispożizzjonijiet legali jirreferu għall-ħtieġa li jiġu rrispettati l-imġiba bankarja normali u r-regoli prudenzjali bħall-ħtieġa li tiġi eżaminata l-affidabbiltà kreditizja tal-mutwatarju, l-evidenza massiva, inklużi s-sejbiet li saru fl-investigazzjonijiet tad-difiża tal-kummerċ, tissuġġerixxi li dawn id-dispożizzjonijiet għandhom biss rwol sekondarju fl-applikazzjoni tad-diversi strumenti legali.

(149)

Barra minn hekk, il-klassifikazzjonijiet tal-bonds u tal-kreditu ta’ spiss huma distorti għal diversi raġunijiet, inkluż il-fatt li l-valutazzjoni tar-riskju tiġi influwenzata mill-importanza strateġika tad-ditta għall-GTĊ u mis-saħħa ta’ kull garanzija impliċita mill-gvern. L-istimi jissuġġerixxu b’mod qawwi li l-klassifikazzjonijiet tal-kreditu Ċiniżi jikkorrispondu għal klassifikazzjonijiet internazzjonali aktar baxxi (72).

(150)

Dan jiġi amplifikat permezz ta’ regoli eżistenti addizzjonali, li jmexxu l-finanzi f’setturi li l-gvern jagħżel bħala mħeġġa jew li b’xi mod ieħor huma importanti (73). Dan jirriżulta fi preġudizzju għas-self lil SOEs, ditti privati kbar u konnessi tajjeb u ditti f’setturi industrijali ewlenin, li jimplika li d-disponibbiltà u l-kost tal-kapital mhumiex ugwali għall-atturi kollha fis-suq.

(151)

It-tieni, il-kostijiet tas-self inżammu baxxi b’mod artifiċjali biex jiġi stimolat it-tkabbir tal-investiment. Dan wassal għall-użu eċċessiv tal-investiment kapitali b’redditi dejjem aktar baxxi fuq l-investiment. Dan jintwera mit-tkabbir riċenti fl-ingranaġġ korporattiv fis-settur tal-istat minkejja tnaqqis kbir fil-profitabbiltà, li jissuġġerixxi li l-mekkaniżmi li jitħaddmu fis-sistema bankarja ma jsegwux tweġibiet kummerċjali normali.

(152)

It-tielet nett, minkejja li f’Ottubru 2015 inkisbet liberalizzazzjoni tar-rata tal-imgħax nominali, is-sinjali tal-prezzijiet għadhom mhumiex ir-riżultat ta’ forzi tas-suq ħieles, iżda huma influwenzati minn distorsjonijiet ikkawżati mill-gvern. Tabilħaqq, is-sehem ta’ self bir-rata ta’ referenza jew taħtha għadu jirrappreżenta 45 % tas-self kollu u r-rikors għal kreditu immirat jidher li żdied, billi dan is-sehem żdied notevolment mill-2015, minkejja l-kondizzjonijiet ekonomiċi li sejrin għall-agħar. Rati tal-imgħax baxxi b’mod artifiċjali jirriżultaw fi prezz aktar baxx, u sussegwentement fl-użu eċċessiv tal-kapital.

(153)

It-tkabbir kumplessiv tal-kreditu fir-RPĊ jindika deterjorament tal-effiċjenza tal-allokazzjoni tal-kapital mingħajr ebda sinjal ta’ restrizzjoni kreditizja li tkun mistennija f’ambjent tas-suq mingħajr distorsjoni. Bħala riżultat, is-self improduttiv żdied b’mod rapidu fis-snin riċenti. Quddiem sitwazzjoni ta’ żieda tad-dejn f’riskju, il-GTĊ għażel li jevita l-inadempjenzi. Konsegwentement, il-kwistjonijiet ta’ dejn mitluf ġew ittrattati permezz ta’ rifinanzjament tad-dejn, biex b’hekk inħolqu l-hekk imsejħa kumpaniji “zombie”, jew permezz tat-trasferiment tas-sjieda tad-dejn (pereżempju permezz ta’ fużjonijiet jew skambju ta’ dejn ma’ ekwità), mingħajr neċessarjament ma titneħħa l-problema kumplessiva tad-dejn jew ma jiġu indirizzati l-kawżi prinċipali tagħha.

(154)

Essenzjalment, minkejja l-passi reċenti li ttieħdu biex is-suq jiġi liberalizzat, is-sistema tal-kreditu korporattiv fil-r-RPĊ hija affettwata minn distorsjonijiet sinifikanti bħala riżultat tar-rwol pervażiv kontinwu tal-istat fis-swieq kapitali.

(155)

Ma ġiet sottomessa l-ebda evidenza li tgħid li s-settur tal-GFF ser ikun eżentat mill-intervent tal-gvern deskritt hawn fuq fis-sistema finanzjarja. Fil-fatt, is-sejbiet mill-investigazzjoni antisussidji f’GFR, li fil-biċċa l-kbira tagħha tkopri wkoll il-produtturi tal-GFF li huma integrati vertikalment, urew li l-produtturi ta’ GFR fir-RPĊ ibbenefikaw minn self preferenzjali, kemm minn banek tal-Istat kif ukoll minn banek privati (74). Għalhekk, l-intervent sostanzjali tal-gvern fis-sistema finanzjarja jwassal biex il-kondizzjonijiet tas-suq jiġu affettwati b’mod sever fil-livelli kollha. Il-produtturi esportaturi inklużi fil-kampjun jissellfu ammonti sinifikanti minn banek u għalhekk potenzjalment jibbenefikaw mill-politiki preferenzjali u dan it-tfixkil.

(156)

Il-Kummissjoni nnotat li d-distorsjonijiet deskritti fir-Rapport kienu karatteristiċi għall-ekonomija Ċiniża. L-evidenza disponibbli turi li l-fatti u l-karatteristiċi tas-sistema Ċiniża kif deskritt hawn fuq fit-Taqsimiet minn 3.3.1.1 sa 3.3.1.5 kif ukoll fil-Parti A tar-Rapport japplikaw fil-pajjiż kollu u fis-setturi kollha tal-ekonomija. L-istess japplika għad-deskrizzjoni tal-fatturi tal-produzzjoni kif stabbilit hawn fuq fit-Taqsimiet minn 3.3.1.6 sa 3.3.1.8. hawn fuq u fil-Parti B tar-Rapport.

(157)

Il-Kummissjoni tfakkar li sabiex jiġi prodott il-GFF, hemm bżonn firxa wiesgħa ta’ inputs. Skont l-evidenza fil-fajl, il-produtturi esportaturi inklużi fil-kampjun kisbu aktar minn 96 % tal-inputs tagħhom fir-RPĊ. Meta l-produtturi tal-GFF jixtru/jikkuntrattaw dawn l-inputs, il-prezzijiet li jħallsu (u li huma rreġistrati bħala l-kostijiet tagħhom) huma kjarament esposti għall-istess distorsjonijiet sistemiċi msemmija qabel. Pereżempju, il-fornituri tal-inputs iħaddmu manodopera li hija soġġetta għad-distorsjonijiet. Jistgħu jissellfu flus li jkunu soġġetti għad-distorsjonijiet fuq is-settur finanzjarju/l-allokazzjoni tal-kapital. Barra minn hekk, huma soġġetti għas-sistema ta’ ppjanar li tapplika fil-livelli kollha tal-gvern u fis-setturi kollha.

(158)

Bħala konsegwenza, mhux biss il-prezzijiet tal-bejgħ domestiku tal-GFF mhumiex xierqa għall-użu skont it-tifsira tal-Artikolu 2(6a)(a) tar-Regolament bażiku, iżda l-kostijiet kollha tal-input (inklużi l-materja prima, l-enerġija, l-art, il-finanzjament, ix-xogħol, eċċ.) huma wkoll ivvizzjati minħabba li l-formazzjoni tal-prezzijiet tagħhom hija affettwata minn intervent sostanzjali tal-gvern, kif deskritt fil-Partijiet A u B tar-Rapport. Tabilħaqq, l-interventi tal-gvern deskritti fir-rigward tal-allokazzjoni tal-kapital, l-art, il-manodopera, l-enerġija u l-materja prima huma preżenti fir-RPĊ kollha. Dan ifisser, pereżempju, li input li ġie prodott fir-RPĊ permezz tal-kombinazzjoni ta’ firxa ta’ fatturi tal-produzzjoni huwa espost għal distorsjonijiet sinifikanti. L-istess japplika għall-input, lejn l-input u l-bqija. F’din l-investigazzjoni la l-GTĊ u lanqas il-produtturi esportaturi ma ppreżentaw ebda evidenza jew argument li juri l-kuntrarju.

(159)

Produttur esportatur minnhom inkluż fil-kampjun sostna li x-xiri tal-materjal u x-xiri tal-enerġija għall-produzzjoni tal-GFF kif ukoll prodotti oħra ma kinux distorti fiċ-Ċina, minħabba li l-prezzijiet tagħhom kienu determinati mill-forzi tas-suq. L-istess produttur esportatur talab lill-Kummissjoni biex jew tuża l-kostijiet reali tax-xiri tal-materjali u l-enerġija biex tibni valur normali jew tibbaża l-valur normali fuq il-prezzijiet attwali tal-bejgħ domestiku tal-GFF fiċ-Ċina.

(160)

Il-produttur esportatur ma bagħat l-ebda evidenza biex juri li l-materjal u x-xiri tal-enerġija tiegħu għall-produzzjoni tal-GFF ma kinux distorti. Għalhekk, fid-dawl tas-sejbiet tal-investigazzjoni msemmija fil-premessi minn (98) sa (162), din l-affermazzjoni ġiet irrifjutata.

(161)

L-analiżi stabbilita fit-taqsimiet 3.3.1.2. sa 3.3.1.9., li tinkludi eżami tal-evidenza kollha disponibbli relatata mal-intervent tar-RPĊ fl-ekonomija tagħha b’mod ġenerali kif ukoll fis-settur tal-GFF uriet li l-prezzijiet jew il-kostijiet tal-prodott ikkkonċernat, inklużi l-kostijiet tal-materja prima, tal-enerġija u tax-xogħol, mhumiex ir-riżultat ta’ forzi tas-suq ħieles għax huma affettwati minn intervent sostanzjali tal-gvern skont it-tifsira tal-Artikolu 2(6a)(b) tar-Regolament bażiku kif muri mill-impatt attwali jew potenzjali ta’ wieħed jew aktar mill-elementi rilevanti elenkati fih. Abbażi ta’ dak, u fin-nuqqas ta’ kwalunkwe kooperazzjoni mill-GTĊ, il-Kummissjoni kkonkludiet li mhuwiex xieraq li jintużaw prezzijiet u kostijiet domestiċi biex jiġi stabbilit il-valur normali f’dan il-każ.

(162)

Konsegwentement, il-Kummissjoni pproċediet biex tibni l-valur normali esklussivament abbażi tal-kostijiet tal-produzzjoni u tal-bejgħ li jirriflettu l-prezzijiet jew il-valuri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u tal-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif stabbilit fit-taqsima li ġejja.

(163)

Wara r-rivelazzjoni finali, Taishan qalet li ma kienet ġiet stabbilita l-ebda distorsjoni sinifikanti tas-suq fir-rigward tal-prodott li qed jiġi investigat peress li ma kien hemm l-ebda kapitolu separat li jiddeskrivi t-tessuti tal-fibra tal-ħġieġ u s-setturi tal-fibra tal-ħġieġ fir-Rapport. Din il-parti ddikjarat ukoll li l-evidenza fir-Rapport kienet tmur lura għal Diċembru 2017 u sadanittant ma kien hemm l-ebda aġġornament tar-Rapport.

(164)

Il-Kummissjoni nnotat li l-eżistenza ta’ distorsjonijiet sinifikanti li tagħti lok għall-applikazzjoni tal-Artikolu 2 (6a) tar-Regolament bażiku mhijiex marbuta mal-eżistenza ta’ kapitolu settorjali speċifiku li jkopri l-prodott li qed jiġi investigat. Ir-rapport jiddeskrivi tipi differenti ta’ distorsjonijiet preżenti fir-RPĊ li huma trasversali u applikabbli fl-ekonomija Ċiniża kollha u li jaffettwaw il-prezzijiet u/jew il-materja prima u l-kostijiet tal-produzzjoni tal-prodott investigat. Kif spjegat fit-taqsima 3.3.1.5 hawn fuq, l-industrija tal-fibra tal-ħġieġ hija soġġetta għal numru ta’ interventi governattivi deskritti fir-Rapport (kopertura mill-Pjanijiet ta’ Ħames Snin u dokumenti oħra, distorsjonijiet fil-materja prima, distorsjonijiet finanzjarji, eċċ.), li huma espliċitament elenkati u referenzjati f’dan ir-Regolament. Barra minn hekk, il-premessi minn (124) sa (138) ta’ dan ir-Regolament għandhom ukoll għadd ta’ distorsjonijiet applikabbli għas-settur tal-fibra tal-ħġieġ u/jew għall-materji primi u l-inputs tiegħu lil hinn mid-distorsjoni sinifikanti li diġà tinsab fir-Rapport. Iċ-ċirkostanzi tas-suq u l-politiki u l-pjanijiet sottostanti li jwasslu għal distorsjonijiet sinifikanti għadhom applikabbli għas-settur tal-fibra tal-ħġieġ u għall-kostijiet tal-produzzjoni tiegħu, minkejja li r-Rapport kien rilaxxat f’Diċembru 2017. L-ebda parti ma ressqet xi evidenza li turi l-kuntrarju. Barra minn hekk, l-evidenza addizzjonali ta’ distorsjonijiet sinifikanti li jinsabu fil-premessi minn (98) sa (160) għadhom applikabbli u l-ebda parti ma ressqet xi evidenza li turi l-kuntrarju. Għalhekk, dawn l-affermazzjonijiet ġew irrifjutati.

(165)

Waqt seduta li saret wara r-rivelazzjoni finali, il-grupp Yuntianhua sostna li ma kien hemm l-ebda evidenza ta’ distorsjonijiet sinifikanti fir-rigward tiegħu. Il-kumpanija sostniet li l-Artikolu 2(6a) tar-Regolament bażiku kien jeħtieġ li l-Kummissjoni tagħmel valutazzjoni separata tal-eżistenza ta’ distorsjonijiet sinifikanti għal kull kumpanija. Hija argumentat ukoll li bħala produttur integrat vertikalment il-proċess ta’ produzzjoni tiegħu ma tibdiex bil-GFR, iżda bil-materja prima għall-produzzjoni tal-GFR. Għalhekk, il-Kummissjoni kien imissha qieset dawn il-materji primi meta ħadmet il-valur normali.

(166)

Il-produttur esportatur ma ppreżenta l-ebda evidenza li turi li l-prezzijiet jew il-kostijiet tiegħu tal-GFF, inklużi l-kostijiet tal-materji primi, tal-enerġija u tax-xogħol ma kinux distorti. Barra minn hekk, il-Kummissjoni tinnota li l-eżistenza ta’ distorsjonijiet sinifikanti li jagħtu lok għall-applikazzjoni tal-Artikolu 2(6a) tar-Regolament bażiku hija stabbilita fuq livell nazzjonali. Jekk tiġi stabbilita l-eżistenza ta’ distorsjonijiet sinifikanti, allura d-dispożizzjonijiet tal-Artikolu 2(6a) japplikaw għall-produtturi esportaturi kollha fir-RPĊ. Fi kwalunkwe każ, l-istess dispożizzjoni tar-Regolament bażiku tippermetti li l-produtturi esportaturi juru li l-kostijiet domestiċi tagħhom stess mhumiex affettwati minn distorsjonijiet sinifikanti, f’liema każijiet jintużaw għall-kalkolu tal-valur normali. Għalhekk, fid-dawl tas-sejbiet tal-investigazzjoni msemmija fil-premessi minn (98) sa (162), u fin-nuqqas ta’ kwalunkwe evidenza li dawn is-sejbiet ma japplikawx għall-kostijiet domestiċi ta’ dan il-produttur esportatur, din l-affermazzjoni ġiet irrifjutata. Fi kwalunkwe każ, l-investigazzjoni stabbilixxiet l-eżistenza ta’ distorsjonijiet trażversali sinifikanti li jaffettwaw il-produzzjoni tal-prodott ikkonċernat u/jew l-inputs tiegħu, u għalhekk huma fi kwalunkwe każ affettwati minn dawn id-distorsjonijiet sinifikanti irrispettivament minn jekk il-produtturi jibdewx il-produzzjoni mill-GFR jew għandhomx produzzjoni kompletament integrata.

(167)

Għalhekk, il-konklużjoni meħuda fil-premessa (162) ġiet ikkonfermata.

(168)

L-għażla tal-pajjiż rappreżentattiv kienet ibbażata fuq il-kriterji li ġejjin:

(169)

Kif spjegat fil-premessi minn (93) sa (95), il-Kummissjoni għamlet żewġ noti għall-fajl (77) dwar is-sorsi għad-determinazzjoni tal-valur normali disponibbli għall-partijiet interessati.

(170)

Fis-sottomissjoni tiegħu tat-8 ta’ April 2019, produttur esportatur wieħed fil-kampjun iddikjara li l-Kummissjoni jenħtieġ li ma tibdiex tfittex sorsi alternattivi biex tiddetermina l-valur normali tal-produtturi esportaturi Ċiniżi billi kien għadu ma ġiex muri li jeżistu distorsjonijiet sinifikanti tal-kostijiet u l-prezzijiet għall-produzzjoni u l-bejgħ tal-GFF fir-RPĊ.

(171)

L-ilment kien fih biżżejjed evidenza li kellha t-tendenza tixhed l-eżistenza ta’ distorsjonijiet sinifikanti fir-RPĊ skont l-Artikolu 5(9) flimkien mal-Artikolu 2(6a)(a), (b) u (e) tar-Regolament bażiku. Għalhekk, skont l-Artikolu 2(6a)(e), il-Kummissjoni hija meħtieġa tiġbor is-sorsi tagħha li jikkonċernaw il-pajjiżi rappreżentattivi possibbli, jekk id-distorsjonijiet sinifikanti jiġu kkonfermati li jeżistu bħala riżultat tal-investigazzjoni. Għaldaqstant, l-affermazzjoni ġiet irrifjutata.

(172)

Fin-Nota ta’ Marzu 2019, il-Kummissjoni identifikat id-disa’ pajjiżi li ġejjin: il-Brażil, il-Messiku, il-Federazzjoni Russa u t-Turkija, li huma meqjusa mill-Bank Dinji bħala pajjiżi b’livell simili ta’ żvilupp ekonomiku bħar-RPĊ, jiġifieri kollha huma kklassifikati bħala pajjiżi b’“introjtu medju superjuri” abbażi tal-introjtu nazzjonali gross (“ING”).

(173)

Fis-sottomissjoni tiegħu tat-8 ta’ April 2019, produttur esportatur wieħed fil-kampjun innota li skont il-bażi tad-data tal-Bank Dinji dwar l-ING, kemm il-Brażil kif ukoll il-Messiku kienu eqreb lejn ir-RPĊ f’termini tal-ING (introjtu gross nazzjonali) per capita. Barra minn hekk, huwa nnota li l-ING tat-Turkija huwa ferm ogħla mill-erba’ pajjiżi l-oħra (inkluża r-RPĊ) u l-Federazzjoni Russa għandha ING per capita ogħla mir-RPĊ iżda inqas mit-Turkija. Għalhekk, skont dan il-produttur esportatur inkluż fil-kampjun, il-Brażil u l-Messiku dehru li kienu għażliet aħjar għal dan il-kriterju mill-Federazzjoni Russa u mit-Turkija.

(174)

Meta jkun qed jinbena l-valur normali f’każ ta’ pajjiżi b’distorsjonijiet sinifikanti, l-Artikolu 2(6a)(a) tar-Regolament bażiku jistabbilixxi li l-Kummissjoni tista’ tuża pajjiż rappreżentattiv b’livell simili ta’ żvilupp ekonomiku bħala l-pajjiż esportatur. Il-Kummissjoni tista’ tuża wkoll prezzijiet, kostijiet jew parametri referenzjarji internazzjonali mingħajr distorsjoni jew informazzjoni xierqa oħra. Sabiex jiġi definit liema pajjiżi huma f’livell simili ta’ żvilupp ekonomiku bħall-pajjiż esportatur f’kull każ, il-Kummissjoni tuża pajjiżi kklassifikati fl-istess kategorija ta’ introjtu mill-Bank Dinji. Din il-bażi tad-data ppermettiet lill-Kummissjoni jkollha għadd suffiċjenti ta’ pajjiżi potenzjalment xierqa b’livell simili ta’ żvilupp biex tagħżel pajjiż rappreżentattiv xieraq skont l-Artikolu 2(6a)(a) tar-Regolament bażiku.

(175)

Ir-Regolament bażiku ma jirrikjedix li l-pajjiż rappreżentattiv jkun l-eqreb tal-ING attwali tal-pajjiż esportatur. Għalhekk, il-fatt li pajjiż jista’ jkollu ING per capita eqreb għal dak tar-RPĊ minn ieħor mhuwiex fattur deċiżiv fl-għażla tal-pajjiż rappreżentattiv xieraq. F’dan il-każ, il-kategorija rilevanti tal-Bank Dinji kienet dik tal-pajjiżi b’introjtu medju superjuri, fejn ir-RPĊ hija kklassifikata. Filwaqt li huwa minnu li t-Turkija għandha l-ogħla ING, l-erba’ pajjiżi kollha għandhom livell simili ta’ żvilupp ekonomiku għar-RPĊ u tqiesu li jissodisfaw il-kriterju stabbilit fl-ewwel inċiż tal-Artikolu 2(6a)(a) tar-Regolament bażiku. Għaldaqstant, din l-affermazzjoni ġiet irrifjutata.

(176)

Għalhekk, il-Kummissjoni kkunsidrat li l-erba’ pajjiżi rappreżentattivi possibbli identifikati kollha kienu komparabbli bl-istess mod f’termini ta’ żvilupp ekonomiku mar-RPĊ, kif iddikjarat fin-Nota ta’ Settembru 2019.

(177)

Fis-sottomissjoni tiegħu tas-16 ta’ Settembru 2019, l-istess produttur esportatur inkluż fil-kampjun tenna l-argumenti tiegħu deskritti fil-premessa (173) u, barra minn hekk, semma żewġ investigazzjonijiet anti-dumping preċedenti li jikkonċernaw importazzjonijiet ta’ planki tal-azzar illaminati bis-sħana mir-RPĊ u importazzjonijiet ta’ ċerti prodotti tal-azzar miksija b’materjal organiku mir-RPĊ (78) li fihom il-Kummissjoni kellha l-ħsieb li tagħżel pajjiżi b’ING per capita f’livell simili għal dak tar-RPĊ.

(178)

Ma hemm l-ebda differenza fil-metodoloġija użata bejn l-investigazzjoni kurrenti u ż-żewġ investigazzjonijiet preċedenti li għalihom jirreferi l-produttur esportatur. Fil-każijiet kollha, l-istandard applikat kien dak deskritt fl-Artikolu 2(6a)(a) tar-Regolament bażiku, jiġifieri li l-Kummissjoni tista’ tuża pajjiż rappreżentattiv b’livell simili ta’ żvilupp ekonomiku bħala l-pajjiż esportatur. Kif imsemmi fil-premessa (175), ir-Regolament bażiku ma jirrikjedix li l-pajjiż rappreżentattiv ikollu ING simili għall-pajjiż esportatur iżda li għandu livell simili ta’ żvilupp ekonomiku. Għalhekk, il-fatt li pajjiż jista’ jkollu ING eqreb minn ieħor ma jistax ikun fattur deċiżiv fl-għażla tal-pajjiż rappreżentattiv xieraq jekk ikunu fl-istess kategorija ta’ pajjiżi b’livell simili ta’ żvilupp ekonomiku bħal dak tar-RPĊ. Għaldaqstant, l-affermazzjoni ġiet irrifjutata.

(179)

Fin-Nota ta’ Marzu 2019, il-Kummissjoni indikat li l-produzzjoni tal-GFF kienet magħrufa li sseħħ fil-Brażil, fil-Messiku, fil-Federazzjoni Russa u fit-Turkija. Il-Kummissjoni investigat ukoll x’data finanzjarja disponibbli pubblikament għal dawk l-erba’ pajjiżi. Il-Kummissjoni stiednet lill-partijiet interessati sabiex jidentifikaw produtturi oħra tal-prodott investigat.

(180)

Rigward il-Brażil, wara n-Nota ta’ Marzu 2019, fejn il-Kummissjoni indikat li ma kienet sabet l-ebda informazzjoni finanzjarja disponibbli pubblikament għall-kumpaniji Brażiljani, l-ilmentatur issottometta r-rapport annwali awditjat ta’ Owens Corning Fiberglas A.S. Ltda. għall-2017 u rapport tal-introjtu ta’ Saertex Tecidos Brasil Ltda allegatament estratt mir-rapport annwali tagħha. Dawn id-dokumenti kienu disponibbli fil-fajl mhux kunfidenzjali tal-investigazzjoni. Fuq dik il-bażi, l-ilmentatur talab lill-Kummissjoni tikkunsidra mill-ġdid lill-Brażil bħala pajjiż rappreżentattiv xieraq.

(181)

Il-Kummissjoni qieset il-limitu tal-informazzjoni pprovduta mill-ilmentatur u wettqet riċerka addizzjonali fir-rigward tal-Brażil. Madankollu, ma nstabet l-ebda informazzjoni finanzjarja disponibbli pubblikament addizzjonali fil-bażi tad-data ta’ Orbis, Bloomberg jew sorsi pubbliċi oħra fir-rigward tal-produtturi Brażiljani tal-GFF jew prodotti relatati ma’ GFF. Wara li identifikat ċerti kwistjonijiet dwar il-fatturi tal-produzzjoni kif speċifikati fil-premessi minn (196) sa (198), u wara li qieset lit-Turkija bħala pajjiż rappreżentattiv xieraq fuq il-bażi tal-fatturi rilevanti kollha kif speċifikati fil-premessa (211), il-Kummissjoni qieset li ma kienx meħtieġ li tieħu pożizzjoni dwar il-possibbiltà li tintuża informazzjoni li ma tkunx disponibbli għall-pubbliku kollu iżda li tkun disponibbli għall-partijiet interessati kollha fil-fajl mhux kunfidenzjali.

(182)

Il-Kummissjoni indikat fin-Nota ta’ Marzu 2019 li lanqas il-Messiku ma seta’ jitqies bħala pajjiż rappreżentattiv potenzjali minħabba n-nuqqas ta’ informazzjoni finanzjarja suffiċjenti għaż-żewġ kumpaniji identifikati (Oscar Alberto Torres Aguilar u Plásticos Reforzados de México, S.A).

(183)

Madankollu, aktar riċerka mwettqa wara li nħarġet din in-nota żvelat l-eżistenza ta’ żewġ produtturi addizzjonali tal-GFF u/jew tal-materja prima prinċipali tiegħu, il-GFR, fil-Messiku, jiġifieri Saint-Gobain Mexico S.A de C.V u Owens Corning Mexico S.A de C.V. Madankollu, il-Kummissjoni ma setgħetx issib informazzjoni disponibbli għall-pubbliku dwar l-indikaturi finanzjarji rilevanti għal xi wieħed minn dawk il-produtturi. Il-Kummissjoni lanqas ma setgħet issib informazzjoni finanzjarja addizzjonali dwar Oscar Alberto Torres Aguilar u Plásticos Reforzados de México, S.A.

(184)

Fir-rigward tal-Federazzjoni Russa, il-Kummissjoni indikat fin-Nota ta’ Marzu 2019 li identifikat tliet produtturi tal-GFF (P-D Tatneft-Alabuga Steklovolokno LLC (P-D Tatneft), OCV Steklovolokno OJSC (OC Russia), u Steklonit JSC (Steklonit)), li għalihom id-data tal-2017 kienet disponibbli fil-bażi ta’ data ta’ Orbis. Sadanittant, il-bażi ta’ data ta’ Orbis ipprovdiet data tal-2018 għal Steklonit, filwaqt li d-data finanzjarja għall-2018 għal P-D Tatneft u OC Russia kienet għadha mhix disponibbli (fil-bażi ta’ data ta’ Orbis jew kwalunkwe sors ieħor disponibbli pubblikament). Madankollu, kif spjegat fil-premessa (199), il-Kummissjoni identifikat ċerti kwistjonijiet li jikkonċernaw il-fatturi tal-produzzjoni.

(185)

Fl-aħħar nett, fir-rigward tat-Turkija, fin-Nota ta’ Marzu 2019, il-Kummissjoni indikat li kienet identifikat tmien produtturi tal-GFF. Riċerka addizzjonali mwettqa mill-Kummissjoni wriet li, minn dawn it-tmien produtturi, Metyx biss kienet produttur tal-GFF u li Cam Elyaf kienet produttur tal-GFR. Aktar riċerka kixfet ukoll li l-informazzjoni finanzjarja msemmija fin-Nota ta’ Marzu 2019 għal Metyx kienet fil-fatt ta’ kumpanija relatata, li ma kinitx timmanifattura l-GFF. Id-data finanzjarja ta’ Metyx ma kinitx disponibbli fil-bażi ta’ data ta’ Orbis, Bloomberg jew kwalunkwe sors ieħor disponibbli pubblikament għal kwalunkwe sena finanzjarja. Fil-każ ta’ Cam Elyaf, id-data finanzjarja għall-2018 kienet disponibbli fuq is-sit web tal-kumpanija f’forma konsolidata għall-Grupp Sisecam, li minnu tagħmel parti Cam Elyaf (79). Id-data finanzjarja tkopri s-segment tal-“Operat kimiku” tal-grupp, li jinkludi l-GFR. Barra minn hekk, skont prospett finanzjarju (80) ppubblikat mill-Grupp Sisecam, Cam Elyaf biegħet 28 985 tunnellata GFR fl-2018. Il-volumi tal-bejgħ fit-Turkija u barra minnha ammontaw għal 21 033 tunnellata u 7 952 tunnellata, rispettivament, fl-2018. Fl-2018, Cam Elyaf iġġenerat bejgħ ta’ TRY 190 miljun u EBITDA ta’ TRY 39 miljun. Għalhekk, fin-Nota ta’ Settembru 2019, il-Kummissjoni informat ukoll lill-partijiet interessati li, biex jiġu stabbiliti l-SG&A u l-profitt mingħajr distorsjoni, hija kienet se tuża d-data finanzjarja tas-segment tal-Operat Kimiku tal-grupp Tork Sisecam għall-2018, li jinkludi l-GFR.

(186)

Wara n-Nota ta’ Settembru 2019, wieħed mill-produtturi esportaturi inklużi fil-kampjun argumenta li peress li Cam Elyaf, il-parti tal-produtturi tal-GFR tal-grupp Sisecam, ma tipproduċix u lanqas ma tbigħ il-GFF, iżda l-GFR, l-informazzjoni finanzjarja ta’ din il-kumpanija ma tistax titqies affidabbli fir-rigward tal-GFF. Barra minn hekk, fis-sottomissjoni tagħhom tat-13 ta’ Settembru 2019, is-CCCLA u produttur esportatur ieħor fil-kampjun sostnew li l-Kummissjoni jenħtieġ li ma tużax id-data finanzjarja tas-segment tal-Operat Kimiku tal-grupp Sisecam peress li l-produzzjoni tal-GFR tirrappreżenta biss parti żgħira mill-attività tagħhom u ma kienx ċert jekk in-negozju tal-GFR kienx profittabbli. Ġie ddikjarat ukoll li fl-2017 Cam Elyaf ippreżentat ilment anti-dumping lill-awtoritajiet Torok li jindika li kienet qed iġġarrab dannu kkawżat minn importazzjonijiet tal-GFR oġġett ta’ dumping mill-Eġittu u, għalhekk, tista’ tkun inqas profittabbli mis-settur Kimiku kollu tal-grupp Sisecam. Is-CCCLA u l-produttur esportatur issuġġerew li l-Kummissjoni jenħtieġ li tuża d-data finanzjarja ta’ produtturi Torok oħra tal-GFF bħal Setex, il-Grupp Kivanc, Dost Kimya u Aytu Teknik. Ġie argumentat ukoll li l-Kummissjoni ma spjegatx fin-Nota ta’ Settembru 2019 għaliex iddeċidiet li teskludi lil Istanbul Teknik u Sonmez Holding bħala sorsi possibbli għall-istabbiliment ta’ SG&A u profitt mingħajr distorsjoni peress li anki huma jipproduċu prodotti relatati mal-fibra tal-ħġieġ.

(187)

Kif iddikjarat fil-premessa (205), l-ebda informazzjoni finanzjarja tal-produtturi tal-GFF fit-Turkija ma kienet faċilment disponibbli. Barra minn hekk, la s-CCCLA u lanqas il-produttur esportatur ma ssottomettew xi informazzjoni finanzjarja għal kwalunkwe wieħed mill-produtturi tal-GFF fit-Turkija kif mitlub fl-Anness I tan-Nota ta’ Marzu 2019 biex jidentifikaw il-produtturi tal-prodott taħt investigazzjoni. Barra minn hekk, il-Kummissjoni ma setgħetx issib informazzjoni finanzjarja pubblikament disponibbli fil-bażi ta’ data ta’ Orbis, Bloomberg jew sorsi pubbliċi oħra għall-produtturi tal-GFF speċifikati mis-CCCLA u l-produttur esportatur fil-premessa (186). Barra minn hekk, fir-rigward ta’ Istanbul Teknik (81) u Sonmez Holding (82), skont l-informazzjoni fuq is-sit web tal-kumpanija tagħhom, dawn mhumiex qed jimmanifatturaw il-GFR jew prodotti relatati mal-GFF iżda prodotti tal-fibra tal-poliester. Għaldaqstant, l-affermazzjonijiet kollha li saru f’dan ir-rigward ġew irrifjutati. Skont l-Artikolu 2(6a)(a) tar-Regolament bażiku, il-Kummissjoni kkunsidrat li d-data finanzjarja għall-produtturi tal-GFR, li tirrappreżenta aktar minn 70 % tal-kost totali tal-produzzjoni tal-GFF, tista’ titqies bħala rappreżentattiva wkoll għall-produtturi tal-GFF.

(188)

Fl-aħħar nett, il-Kummissjoni irrifjutat ukoll l-affermazzjoni ta’ Jushi/Hengshi li Cam Elyaf tkun inqas profittabbli mis-settur tal-operazzjonijiet kimiċi kollha tal-grupp ta’ Sisecam minħabba li CAM Elyaf fl-2017 ressqet ilment anti-dumping kontra l-importazzjonijiet mill-Eġittu li jallega li hija kienet sofriet dannu materjali. L-evidenza ppreżentata minn Jushi/Hengshi fil-fatt ikkontradixxiet l-affermazzjoni tagħha li l-importazzjonijiet Eġizzjani kienu jnaqqru l-profitti ta’ CAM Eslyaf. Skont din l-evidenza, l-awtoritajiet Torok sabu li CAM Elyaf ma sofrietx dannu materjali u temmet l-investigazzjoni. Għalhekk, is-sottomissjoni ta’ Jushi/Hengshi kienet fattwalment inkorretta u għandha tkun irrifjutata.

(189)

Fuq il-bażi tal-informazzjoni sottomessa mill-partijiet interessati u informazzjoni rilevanti oħra disponibbli fil-fajl, il-Kummissjoni stabbiliet lista inizjali tal-fatturi tal-produzzjoni u tas-sorsi relatati mal-GFF li kellha l-ħsieb li tuża għall-fatturi kollha tal-produzzjoni bħall-materjali, l-enerġija u l-manodopera użati fil-produzzjoni tal-prodott taħt investigazzjoni mill-produtturi esportaturi. Minbarra l-informazzjoni u l-evidenza li waslet mingħand il-produtturi esportaturi inklużi fil-kampjun li kkooperaw, xi wħud mill-kodiċijiet tas-Sistema Armonizzata (“kodiċijiet SA”) ippubblikati fin-Nota ta’ Marzu 2019 ġew riveduti (f’xi każijiet il-kodiċi SA oriġinali nżamm u ġie kompletat b’kodiċijiet SA addizzjonali filwaqt li f’każijiet oħra ġie ssostitwit b’kodiċi SA ġdid, ġew identifikati wkoll fatturi ġodda ta’ produzzjoni). Il-lista aġġornata tal-fatturi tal-produzzjoni u kodiċijiet SA ġiet ipprovduta fin-Nota ta’ Settembru 2019.

(190)

Fis-sottomissjoni tiegħu tat-8 ta’ April 2019, produttur esportatur wieħed li kkoopera inkluż fil-kampjun innota li l-Kummissjoni elenkat kull materja prima fin-Nota ta’ Marzu 2019 fil-livell ta’ kodiċi SA b’sitt ċifri biss, li x’aktarx li kienet tkopri firxa wiesgħa ta’ prodotti għajr il-materja prima speċifika li għaliha jeħtieġ li jiġi stabbilit valur. Għalhekk, sabiex titjieb il-preċiżjoni tad-data, dan il-produttur esportatur issuġġerixxa li minflok il-Kummissjoni jenħtieġ li tuża kodiċijiet tal-prodott bi tmien ċifri. Il-Kummissjoni nnotat li huwa biss ladarba jintgħażel il-pajjiż rappreżentattiv, li jkunu jistgħu jiġu ddeterminati kodiċijiet tal-prodott tajba li jmorru lil hinn minn sitt ċifri bl-użu tal-kodiċijiet speċifiċi tal-pajjiż. Dan sar fin-Nota ta’ Settembru 2019, meta ġew ipprovduti kodiċijiet tal-prodott Torok li jinkludu sa 12-il ċifra fejn disponibbli.

(191)

L-istess produttur esportatur fis-sottomissjoni tiegħu tat-8 ta’ April 2019 iddikjara li d-data tal-importazzjoni tal-fatturi tal-produzzjoni ma tkunx sinifikattiva, billi l-prezzijiet tal-importazzjoni f’pajjiż terz la jirriflettu l-prezzijiet domestiċi attwali u lanqas il-prezzijiet tax-xiri f’dak il-pajjiż. Il-produttur esportatur inkwistjoni ddikjara li l-livell tal-prezzijiet tal-importazzjoni huwa affettwat minn fatturi bħall-kwantità tal-prodott importat, it-tip ta’ prodott, u d-disponibbiltà ta’ tali prodott fil-pajjiż importatur kif ukoll fil-pajjiż esportatur. Għalhekk, għal ċerti prodotti, il-prezz tal-importazzjoni mir-RPĊ kien aktar baxx mill-bqija tad-dinja, filwaqt li għal prodotti oħra dan kien l-oppost. Fir-rigward tal-Federazzjoni Russa, il-prezzijiet tal-importazzjoni mir-RPĊ kienu sistematikament ogħla mill-bqija tad-dinja. Barra minn hekk, l-istess produttur esportatur iddikjara li r-ramel tas-siliċe kien disponibbli b’mod naturali fil-biċċa l-kbira tal-pajjiżi u għalhekk il-prezzijiet tal-importazzjoni jenħtieġ li jkunu simili għall-pajjiżi kollha. Minn dan joħroġ li kwalunkwe differenza bejn il-prezzijiet mir-RPĊ u dawk mill-bqija tad-dinja tista’ tiġi spjegata mid-differenzi fil-kwalità u l-grad tal-prodott. Għalhekk, il-produttur esportatur issuġġerixxa li l-Kummissjoni jenħtieġ li tuża l-prezz domestiku ta’ kull fattur ta’ produzzjoni f’kull pajjiż rappreżentattiv potenzjali u li, f’każ li ma jkunx hemm biżżejjed informazzjoni dwar il-prezzijiet domestiċi, il-Kummissjoni fi kwalunkwe każ jenħtieġ li tinjora l-prezzijiet ta’ importazzjoni “għoljin b’mod anormali”.

(192)

L-Artikolu 2(6a)(a) tar-Regolament bażiku jippreskrivi l-użu ta’ data korrispondenti f’pajjiż rappreżentattiv xieraq “sakemm id-data rilevanti tkun disponibbli fil-pront.” Il-Kummissjoni m’għandhiex għad-dispożizzjoni tagħha data dwar il-prezzijiet domestiċi fil-pajjiżi rappreżentattivi possibbli, u data bħal din mhijiex disponibbli fil-pront. B’kuntrast, id-data dwar il-prezzijiet tal-importazzjoni hija disponibbli faċilment u l-Kummissjoni tuża l-Global Trade Atlas (GTA) bħala s-sors ta’ din id-data. Jekk l-evidenza miġbura tikkonferma l-bażi għall-applikazzjoni tal-metodoloġija stabbilita fl-Artikolu 2(6a)(a) tar-Regolament bażiku, il-Kummissjoni taġġusta l-prezzijiet tal-importazzjoni (eż. billi żżid id-dazji doganali rilevanti) biex tasal għal indikatur raġonevoli li jirrappreżenta prezz domestiku mingħajr distorsjoni fil-pajjiż rappreżentattiv magħżul. Il-Kummissjoni vverifikat ukoll li hemm biżżejjed kwantitajiet rappreżentattivi mingħajr distorsjoni ta’ dawn l-importazzjonijiet sabiex il-prezz medju użat inaqqas l-impatt ta’ kwalunkwe prezz potenzjalment anormali fil-limitu inferjuri u ogħla tal-firxa. Għalhekk, il-prezzijiet aġġustati ta’ ċertu input jirriflettu taħlita ta’ kwalitajiet differenti u d-disponibbiltà tagħha fis-swieq ikkonċernati. Fl-aħħar nett, il-Kummissjoni eskludiet wkoll id-data dwar l-importazzjonijiet minn pajjiżi li mhumiex membri tad-WTO elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (“ir-Regolament (UE) 2015/755”) (83). Dment li l-kwantitajiet tal-importazzjonijiet tal-fatturi tal-produzzjoni jkunu rappreżentattivi biżżejjed u ma jkun hemm l-ebda ċirkustanza speċifika oħra li tagħmilhom mhux rappreżentattivi jew mhux xierqa, ma hemm l-ebda raġuni oġġettiva għaliex għandha tiġi eskluża data bħal din mill-analiżi. Barra minn hekk, dan il-produttur esportatur ma indika l-ebda sors għall-prezzijiet domestiċi għall-ebda wieħed mill-pajjiżi rappreżentattivi potenzjali. Għalhekk, fin-nuqqas ta’ kwalunkwe evidenza li turi li d-data użata ma tkunx rappreżentattiva, il-Kummissjoni rrifjutat din l-affermazzjoni.

(193)

Fis-sottomissjoni tiegħu tal-4 ta’ April 2019, produttur esportatur ieħor inkluż fil-kampjun argumenta li l-prezzijiet tal-elettriku fit-Turkija kienu disponibbli fuq is-sit web tal-Istitut Statistiku Tork, filwaqt li l-prezzijiet għall-elettriku tar-Russja ppubblikati mis-Servizz Federali Russu tal-Istatistika tal-Istat ma ġewx aġġornati għal bosta snin.

(194)

Il-Kummissjoni wettqet riċerka addizzjonali dwar il-prezzijiet tal-elettriku fil-Federazzjoni Russa. Din ir-riċerka kkonfermat li d-data disponibbli pubblikament rigward il-prezzijiet tal-elettriku fil-Federazzjoni Russa kienet skaduta. B’riżultat ta’ dan, kien hemm disponibbiltà aħjar ta’ data pubblika għall-prezzijiet tal-elettriku fit-Turkija milli fil-Federazzjoni Russa, minħabba li l-prezzijiet tal-elettriku tat-Turkija huma aktar riċenti.

(195)

L-istess produttur esportatur inkluż fil-kampjun u l-ilmentatur enfasizzaw li l-prezz tal-gass naturali, sors ta’ enerġija użat fil-produzzjoni tal-GFR u l-GFF, kien distort fil-Federazzjoni Russa. F’dan ir-rigward, l-ilmentatur, filwaqt li argumenta li r-Russja ma kinitx pajjiż rappreżentattiv xieraq, irrefera għal investigazzjoni anti-dumping preċedenti dwar l-importazzjonijiet tan-nitrat tal-ammonju li joriġinaw mill-Federazzjoni Russa (84) u investigazzjoni anti-dumping dwar importazzjonijiet tas-siliċju li joriġinaw mir-RPĊ (85). Il-gass naturali huwa sors importanti ta’ enerġija użat fil-produzzjoni tal-GFF, li jirrappreżenta bejn 6 % sa 10 % tal-kost tal-produzzjoni tal-produttur esportatur integrat vertikalment inkluż fil-kampjun li kkoopera. Għalhekk, fuq din il-bażi, u meta wieħed iqis li l-prezzijiet tal-gass naturali jidhru distorti fil-Federazzjoni Russa, id-data dwar il-prezzijiet tal-gass naturali fil-Federazzjoni Russa ma tkunx adattata biex jiġi stabbilit xi parametru referenzjarju.

(196)

Peress li l-Kummissjoni ma sabet l-ebda informazzjoni disponibbli dwar data finanzjarja għall-produtturi Messikani, kif indikat fin-Nota ta’ Settembru 2019, il-Kummissjoni wettqet analiżi tad-data tal-importazzjoni għall-fatturi kollha tal-produzzjoni għall-Brażil, il-Federazzjoni Russa u t-Turkija biss. Id-data dwar l-importazzjoni ġiet estratta bl-aktar kodifikazzjoni dettaljata tal-prodott disponibbli f’kull pajjiż rispettiv. Id-data dwar l-importazzjonijiet fil-pajjiż rappreżentattiv mir-RPĊ u minn dawk li mhumiex membri tad-WTO elenkati fl-Anness 1 tar-Regolament (UE) 2015/755 ġiet eskluża wkoll.

(197)

Abbażi ta’ dik l-analiżi, il-Kummissjoni sabet li fir-rigward tal-Brażil, GFR (il-materja prima ewlenija għall-produzzjoni tal-GFF) kienet prinċipalment importata mir-RPĊ. Mill-importazzjonijiet totali tal-GFR, 9,35 % biss kienu ġejjin minn sorsi oħra u kienu mingħajr distorsjoni. Għalhekk, ir-rappreżentattività ta’ dan l-input u l-valur sottostanti tiegħu ġew imminati b’mod sinifikanti. Il-Kummissjoni tinnota li l-GFR jirrappreżenta aktar minn 70 % mill-kost tal-produzzjoni għal GFF ta’ produtturi integrati mhux vertikalment, u għalhekk huma input sostanzjali li jaffettwa sehem sinifikanti tal-valur normali. Barra minn hekk, 50 % tal-importazzjonijiet tar-raden tal-fibra tal-ħġieġ, li jirrappreżentaw madwar 2 % tal-kost tal-produzzjoni għal GFF ta’ produtturi integrati mhux vertikalment, huma importati mir-RPĊ ukoll, u għalhekk ir-rappreżentattività ta’ dan l-input u l-valur sottostanti tiegħu huma mminati wkoll.

(198)

Għal dawn ir-raġunijiet kollha, u kif iddikjarat fin-Nota ta’ Settembru 2019, il-Kummissjoni kkonkludiet li l-Brażil ma kienx jidher li huwa pajjiż rappreżentattiv xieraq skont it-tifsira tal-Artikolu 2(6a)(a) tar-Regolament bażiku.

(199)

Barra minn hekk, fir-rigward tal-Federazzjoni Russa, is-sehem ta’ importazzjonijiet mingħajr distorsjoni mill-importazzjonijiet totali għall-fatturi ta’ produzzjoni kollha kien l-aktar wieħed baxx mit-tliet pajjiżi analizzati u, għalhekk, il-valuri ta’ importazzjoni tqiesu li huma influwenzati b’mod sinifikanti minn importazzjonijiet distorti mir-RPĊ u mill-pajjiżi elenkati fl-Anness 1 tar-Regolament (UE) 2015/755. Fl-2018, f’termini ta’ volum, 2,32 % biss ta’ pirofilite (materja prima ewlenija użata minn produtturi integrati vertikalment, li tirrappreżenta aktar minn 5 % tal-kost tal-produzzjoni), 11,23 % ta’ GFR (il-materja prima ewlenija użata minn produtturi integrati mhux vertikalment, li tirrappreżenta aktar minn 70 % tal-kost tal-produzzjoni) u 39,78 % tar-raden sintetiċi (li jirrappreżenta madwar 2 % tal-kost tal-produzzjoni) kienu importati minn pajjiżi bi swieq mingħajr distorsjoni. Barra minn hekk, kif spjegat fil-premessa (194), ma hemmx statistika aġġornata dwar il-prezzijiet tal-elettriku tar-Russja, u investigazzjonijiet reċenti jissuġġerixxu li l-prezzijiet tal-gass jistgħu jiġu distorti fil-Federazzjoni Russa.

(200)

Fir-rigward tat-Turkija, il-maġġoranza l-kbira tal-importazzjonijiet ta’ GFR u pirofilite (75,07 % u 81,96 % rispettivament mill-importazzjonijiet totali) ma kinux distorti. B’mod ġenerali, is-sehem ta’ inputs importati mingħajr distorsjoni kien ta’ 97,97 %. Għalhekk, ir-rappreżentattività ta’ importazzjonijiet mingħajr distorsjoni fit-Turkija kienet għolja.

(201)

Fis-sottomissjoni tiegħu tal-10 ta’ April 2019, l-ilmentatur iddikjara li d-deprezzament tar-rublu Russu kontra l-euro bejn l-2014 u l-2018 kellu effett distorsiv fuq il-kost tal-produzzjoni fil-Federazzjoni Russa. L-evoluzzjoni tar-rublu kontra l-euro indikata mill-ilmentatur mhijiex speċifikament rilevanti għall-perjodu ta’ investigazzjoni u lanqas ma kien rilevanti l-effett tagħha fuq il-kost tal-produzzjoni fil-Federazzjoni Russa sostanzjata b’kull forma ta’ evidenza. Għaldaqstant, din l-affermazzjoni ġiet irrifjutata.

(202)

Barra minn hekk, fis-sottomissjoni tiegħu tat-8 ta’ April 2019, produttur esportatur wieħed inkluż fil-kampjun ikkontesta l-affidabbiltà tad-data konvertita f’euro fir-rigward tal-prezzijiet tal-importazzjoni, il-kost tal-produzzjoni u l-marġnijiet ta’ profitt għal pajjiżi bi żvalutazzjonijiet qawwija, b’mod partikolari l-lira Torka u r-rublu Russu bejn l-1 ta’ Jannar 2017 u l-1 ta’ Jannar 2019.

(203)

Meta jiġu stabbiliti l-parametri referenzjarji abbażi tal-prezzijiet tal-importazzjoni għall-kalkolu tal-valur normali skont l-Artikolu 2(6a)(a) tar-Regolament bażiku, il-valuri tal-importazzjoni fil-pajjiżi rappreżentattivi finalment jiġu kkonvertiti fil-munita tal-pajjiż esportatur. Il-Kummissjoni tinnota li l-produttur esportatur ma wriex jekk u kif id-devalwazzjoni tal-munita fil-Federazzjoni Russa u/jew fit-Turkija fis-snin 2017-2019 fil-fatt affettwat il-kostijiet tal-produzzjoni u l-marġnijiet tal-profitt għal dawn il-pajjiżi. Il-Kummissjoni sabet li din l-affermazzjoni ma kinitx sostanzjata u għalhekk, irrifjutata.

(204)

Fir-rigward tal-Federazzjoni Russa, fuq il-bażi tal-elementi stabbiliti fil-premessa (199), il-Kummissjoni kkonkludiet li l-ammont limitat ta’ importazzjonijiet mingħajr distorsjoni fil-Federazzjoni Russa b’mod ġenerali, u l-fatt li l-għadd ta’ materja prima ewlenija, li jirrappreżenta sehem sinifikanti mill-kostijiet tal-produzzjoni, kienu distorti (jiġifieri l-gass) jew li għalihom ma kienet disponibbli l-ebda informazzjoni aġġornata (jiġifieri l-elettriku), jagħmilhom rappreżentattivi b’mod insuffiċjenti għall-kalkolu tal-valur normali. Għalhekk, il-Federazzjoni Russa ma tqisitx bħala pajjiż rappreżentattiv xieraq skont it-tifsira tal-Artikolu 2(6a)(a) tar-Regolament bażiku.

(205)

Minħabba d-disponibilità limitata ta’ data ta’ importazzjoni rappreżentattiva fil-Brażil u l-Federazzjoni Russa b’kuntrast mal-kwalità għolja ta’ data dwar fatturi tal-produzzjoni disponibbli fit-Turkija kif spjegat fil-premessa (200), il-Kummissjoni qieset ukoll id-disponibbiltà ta’ data finanzjarja pubblika ta’ kumpaniji li jipproduċu prodotti fl-istess kategorija ġenerali u/jew settur tal-prodott taħt investigazzjoni fit-Turkija. Kif spjegat fil-premessa (185), id-data disponibbli pubblikament tal-produtturi tal-GFF ma kinitx disponibbli. Speċifikament, il-Kummissjoni ffokat fuq il-produtturi ta’ GFR, peress li l-investigazzjoni wriet li GFR jirrappreżentaw aktar minn 70 % mill-kost totali tal-produzzjoni tal-GFF. Għalhekk, skont l-Artikolu 2(6a)(a) tar-Regolament bażiku, kien ikkunsidrat li d-data finanzjarja għall-produtturi ta’ GFR tista’ titqies bħala rappreżentattiva wkoll għall-produtturi tal-GFF.

(206)

Fid-dawl tal-fatturi kollha msemmija hawn fuq, u kif iddikjarat fin-Nota ta’ Settembru 2019, il-Kummissjoni ddeċidiet li tagħżel lit-Turkija bħala l-pajjiż rappreżentattiv xieraq għal din l-investigazzjoni skont l-Artikolu 2(6a)(a) tar-Regolament bażiku.

(207)

Produttur esportatur wieħed inkluż fil-kampjun tenna l-kummenti tiegħu kif diġà ddikjarat fil-premessa (191), iżda mingħajr ma pprovda informazzjoni ġdida. Għalhekk, il-kummenti pprovduti ma ġewx aċċettati għall-istess raġunijiet kif deskritt fil-premessa (192).

(208)

L-istess produttur esportatur tenna wkoll it-talba tiegħu stipulata fil-premessa (202). Barra minn hekk, il-fatt li l-iżvalutazzjoni ta’ kważi 35 % tal-Lira Torka matul il-perjodu ta’ investigazzjoni jkollha impatt kbir fuq il-kost u l-fatturat ta’ kumpanija fit-Turkija speċjalment minħabba li ħafna mill-prodotti importati tħallsu f’USD jew il-munita tal-pajjiż esportatur. Barra minn hekk, il-produttur esportatur argumenta li r-rata tal-kambju għandha impatt dirett fuq il-marġni tal-profitt finali ta’ kumpanija u rrefera għal żewġ investigazzjonijiet anti-dumping preċedenti fuq importazzjonijiet ta’ GFR mir-RPĊ (86) u fuq importazzjonijiet ta’ drappijiet b’malja miftuħa mir-RPĊ (87) fejn il-Kummissjoni użat mira ta’ profitt ta’ 5 % u 12 % rispettivament.

(209)

F’dan ir-rigward, id-dikjarazzjoni ta’ dan il-produttur esportatur hija purament spekulattiva, minħabba li ma kinitx appoġġjata minn evidenza ta’ sostenn u la fuq il-munita tax-xiri tal-prodotti importati mill-kumpanija li ntużat biex jiġi ddeterminat il-livell tal-ispejjeż tal-bejgħ, amministrattivi ġenerali (“SG&A”) u l-profitt, u lanqas l-impatt allegat fuq iċ-ċifri tal-kostijiet u l-fatturat jew il-profitt tal-kumpanija. Barra minn hekk, dan il-produttur esportatur ma indikax jekk l-iżvalutazzjoni għandhiex impatt b’mod pożittiv jew negattiv fuq il-kostijiet, il-fatturat u l-profitt. Instab li din l-affermazzjoni ma kinitx ċara u ma kinitx sostanzjata u, għalhekk, ġiet irrifjutata.

(210)

F’dak li għandu x’jaqsam mal-investigazzjonijiet anti-dumping preċedenti msemmija fil-premessa (208), jenħtieġ li jiġi nnotat li, il-profitt fil-mira u l-profitt fil-pajjiż rappreżentattiv mhumiex komparabbli peress li jirreferu għal kunċetti differenti u għal pajjiżi differenti. B’mod partikolari, il-profitt mira li għalih tirreferi l-parti huwa l-profitt miksub mill-industrija tal-Unjoni għall-bejgħ domestiku fl-Unjoni taħt kondizzjonijiet normali ta’ kompetizzjoni u jintuża biex jiġi kkalkolat il-marġni ta’ ħsara. Il-profitt fil-pajjiż rappreżentattiv jintuża fil-kalkolu tal-valur normali b’referenza għall-pajjiż rappreżentattiv xieraq skont l-Artikolu 2(6a)(a) tar-Regolament bażiku. Dan il-profitt irid jirrifletti l-profitt miksub minn kumpanija li tipproduċi l-prodott taħt investigazzjoni jew prodott simili, f’pajjiż rappreżentattiv. Billi dawn iż-żewġ profitti differenti mhumiex komparabbli, u d-dikjarazzjoni hija bbażata fuq il-profitt użat f’kuntest differenti mill-kostruzzjoni fuq valur normali skont l-Artikolu 2(6a) tar-Regolament bażiku, din id-dikjarazzjoni kienet irrilevanti u, għalhekk, ma ġietx aċċettata.

(211)

Konsegwentement, il-Kummissjoni kkonkludiet li t-Turkija kienet pajjiż rappreżentattiv xieraq għal din l-investigazzjoni skont l-Artikolu 2(6a)(a) tar-Regolament bażiku.

(212)

Wara r-rivelazzjoni finali, Taishan iddikjarat li l-Kummissjoni naqset milli tanalizza l-akkuratezza u r-realtà kummerċjali tad-data tal-importazzjoni. Pereżempju, għad-data tal-importazzjoni użata biex ikun ikkalkulat il-valur ta’ referenza għal pyrophylitte, ma kienx possibbli li jiġi identifikat liema proporzjon ta’ importazzjonijiet taħt il-kodiċi tal-prodott Tork rispettiv kien rilevanti għal pyrophylitte. Barra minn hekk, hija żiedet li għal dan il-fattur ta’ produzzjoni, it-Turkija importat merkanzija taħt il-kodiċi tal-prodott rispettiva minn 33 pajjiż differenti u l-prezzijiet ta’ unità varjaw minn EUR 0,13/tunnellata għal EUR 207/tunnellata. Barra minn hekk, il-parametru referenzjarju użat mill-Kummissjoni għall-pyrophylitte kien ta’ 3,89 CNY/kg li kien kważi 10 darbiet ogħla mill-prezz reali tax-xiri għal kull unità.

(213)

Kif spjegat fil-premessa (192), il-Kummissjoni tuża l-GTA bħala sors ta’ data tal-importazzjoni biex tibni l-parametri referenzjarji meta l-investigazzjoni tistabbilixxi l-eżistenza ta’ distorsjonijiet sinifikanti li jiskattaw l-applikazzjoni tal-metodoloġija stabbilita fl-Artikolu 2(6a)(a) tar-Regolament bażiku. F’dawn il-każijiet, il-Kummissjoni tivverifika wkoll li hemm biżżejjed kwantitajiet rappreżentattivi mingħajr distorsjoni ta’ dawn l-importazzjonijiet sabiex il-prezz medju użat ma jkunx materjalment affettwat minn prezzijiet potenzjalment anormali fil-limitu inferjuri u ogħla tal-medda. Dan jiżgura li l-prezzijiet medji ta’ ċertu input jirriflettu t-taħlita ta’ kwalitajiet differenti u d-disponibbiltà tagħha fis-swieq ikkonċernati. Dment li l-kwantitajiet tal-importazzjonijiet tal-fatturi tal-produzzjoni jkunu rappreżentattivi biżżejjed u ma jkun hemm l-ebda ċirkustanza speċifika oħra li tagħmilhom mhux affidabbli jew mhux xierqa, ma hemm l-ebda raġuni oġġettiva għaliex għandha tiġi eskluża data mill-analiżi. Barra minn hekk, il-Kummissjoni tuża d-data fl-aktar livell iddettaljat ta’ kodifikazzjoni tal-prodott disponibbli f’kull pajjiż rispettiv sabiex tinkiseb l-eqreb tqabbil possibbli għall-fatturi ta’ produzzjoni użati minn kull produttur esportatur fil-proċess tal-manifattura tiegħu. Dan biex jiġi żgurat li l-parametri referenzjarji raġonevolment jirriflettu l-kost tal-materja prima/input. Fuq il-bażi ta’ dan ta’ hawn fuq, u fin-nuqqas ta’ kwalunkwe evidenza li turi li d-data u l-metodoloġija użati ma jkunux jirrappreżentaw il-kost mingħajr distorsjoni għal kull input, il-Kummissjoni ċaħdet din id-dikjarazzjoni.

(214)

L-istess produttur esportatur iddikjara li l-Kummissjoni naqset milli tivverifika u tikkunsidra r-realtà kummerċjali tal-parametru referenzjarju għall-profitt. B’appoġġ għat-talba tagħha, il-produttur esportatur qabbel il-parametru referenzjarju għal profitt li jammonta għal 39,26 %, mal-profitt fil-mira ta’ 6 % użat għall-kalkolu tal-prezz mhux dannuż għall-produtturi Ewropej, kif ukoll il-profitabbiltà tal-industrija tal-Unjoni matul il-perjodu kkunsidrat, li varja bejn 2,5 % u -3,4 %. Barra minn hekk, il-grupp Yuntianhua talab lill-Kummissjoni biex tuża, fil-bini tal-valur normali, marġni ta’ profitt ta’ 6 % (il-profitt fil-mira tal-industrija tal-Unjoni) minflok 39,26 % fuq il-bażi tal-pajjiż rappreżentattiv. Il-kumpanija argumentat li marġini ta’ profitt ta’ 39,26 % ma jkunx raġonevoli filwaqt li l-Artikolu 2(6a)(a) jeħtieġ li l-ammont ta’ profitt ikun raġonevoli.

(215)

Kif spjegat fil-premessa (210), il-profitt fil-mira, il-profitt tal-industrija tal-Unjoni u l-profitt fil-pajjiż rappreżentattiv huma kunċetti differenti u jirreferu għal pajjiżi differenti u, għalhekk, mhumiex komparabbli. Il-profitt fil-mira huwa l-profitt miksub mill-industrija tal-Unjoni għall-bejgħ domestiku fl-Unjoni f’kondizzjonijiet normali ta’ kompetizzjoni. Dan jintuża biex jiġi kkalkulat il-marġni tad-dannu. Il-marġni ta’ profitt tal-industrija tal-Unjoni huwa l-profitt irreġistrat mill-industrija tal-Unjoni matul il-perjodu kkunsidrat (jiġifieri, profitt affettwat minn importazzjonijiet oġġett ta’ dumping mir-RPĊ u mill-Eġittu). Huwa wieħed mill-indikaturi tad-dannu u użat fl-analiżi tas-sitwazzjoni tal-industrija tal-Unjoni. Fl-aħħar nett, il-profitt fil-pajjiż rappreżentattiv huwa l-profitt reali ta’ kumpanija li nstab li kienet indikatur xieraq ta’ marġni ta’ profitt mhux distort għall-prodott ikkonċernat fil-pajjiż investigat. Għaldaqstant, u biex jiġi żgurat l-użu ta’ parametru referenzjarju xieraq, il-pajjiż rappreżentattiv irid ikun fl-istess livell ta’ żvilupp tal-pajjiż investigat kif previst fl-Artikolu 2(6a) tar-Regolament bażiku. Aktar importanti minn hekk, il-produttur esportatur naqas milli juri kif il-marġini ta’ profitt tal-kumpanija fil-pajjiż rappreżentattiv xieraq mhuwiex raġonevoli, u jekk iva, għaliex. Il-Kummissjoni fakkret li ma kien hemm xejn fil-fajl li jappoġġa n-nuqqas ta’ raġonevolezza tal-profitt ta’ din il-kumpanija. Fuq din il-bażi, dawn il-pretensjonijiet tqiesu bħala mhux sostanzjati u ġew miċħuda.

(216)

Barra minn hekk, Taishan iddikjarat li l-Kummissjoni għandha tiċċekkja u tivverifika t-talba rigward l-iżvalutar tal-munita fil-premessa (202). Il-kumpanija kkontestat iċ-ċaħda tat-talba fuq il-bażi li l-produttur esportatur ma kienx wera jekk u kif l-iżvalutar tal-munita fit-Turkija fis-snin 2017-2019 fil-fatt affettwa l-kostijiet tal-produzzjoni u l-marġnijiet tal-profitt għal dawn il-pajjiżi.

(217)

Għandu jiġi nnotat li żvalutazzjoni tal-munita tista’ taffettwa l-kost u l-profitt ta’ kumpanija b’mod pożittiv jew negattiv. Jekk l-istess munita tintuża fit-tranżazzjonijiet kollha, meta l-kostijiet jiġu affettwati b’mod negattiv, li tiżdied, il-kost tal-oġġetti mibjugħa u l-SG&A se jiżdied u, bħala konsegwenza, il-profitt se jonqos fir-rapporti finanzjarji tiegħu. Meta l-kostijiet jiġu affettwati b’mod pożittiv, iseħħ l-oppost. F’dan il-każ, il-produttur esportatur ma weriex kif l-iżvalutar tal-munita fil-fatt affettwa l-kost u/jew il-komponent tal-profitt fir-rapporti finanzjarji tiegħu, iżda sempliċiment ippreżenta dikjarazzjoni ġenerali ma kinitx sostanzjata. Għalhekk, mhuwiex korrett li wieħed jikkonkludi b’mod ġenerali li kwalunkwe varjazzjoni jkollha effett rilevanti u ovvju fl-affidabilità ta’ sett ta’ data. Għal din ir-raġuni, il-Kummissjoni ssostni l-konklużjoni li, fin-nuqqas ta’ talba komprensiva li turi kif l-iżvalutar tal-munita kien jaffettwa s-SG& u l-profitt biex b’hekk iwassal sabiex dawn ma jkunux xierqa għall-kostruzzjoni tal-valur normali fuq il-bażi tal-Artikolu 2(6a) tar-Regolament bażiku, it-talba għandha tiġi miċħuda.

(218)

Peress li ġie stabbilit li t-Turkija kienet pajjiż rappreżentattiv xieraq fuq il-bażi tal-elementi kollha msemmija hawn fuq, ma kienx hemm bżonn li ssir valutazzjoni tal-livell ta’ protezzjoni soċjali u ambjentali skont l-aħħar sentenza tal-ewwel inċiż tal-Artikolu 2(6a)(a) tar-Regolament bażiku.

(219)

Fid-dawl tal-analiżi t’hawn fuq, it-Turkija ssodisfat il-kriterji stabbiliti fl-ewwel inċiż tal-Artikolu 2(6a)(a) tar-Regolament bażiku, sabiex titqies bħala pajjiż rappreżentattiv xieraq.

(220)

Wara r-rivelazzjoni finali, Jushi/Hengshi sostnew li l-Kummissjoni ma kellhiex teskludi lil Kivanc Group, Dost Kimya, Istanbul Teknik u Sonmez Holding mill-konsiderazzjoni tagħha bħala sorsi possibbli għall-istabbiliment ta’ SG&A u profitt mhux distort kif iddikjarat fil-premessi (186) u (187) peress li huma produtturi tal-GFF jew prodotti relatati u d-data finanzjarja hija disponibbli pubblikament. Ġie ddikjarat li r-rapporti finanzjarji ta’ Kivanc Group li jkopru l-perjodu mill-2010 sal-2018 kif ukoll dawk ta’ Dost Kimya li jkopru l-perjodu mill-2008 sal-2015 kienu disponibbli fil-bażi tad-data Orbis. Barra minn hekk, ġie ddikjarat li Sonmez Holding ipproduċiet prodotti relatati mal-fibra tal-ħġieġ u Instabul Tekknik użat prodotti tal-fibra tal-ħġieġ biex timmanifattura prodotti oħra, li jfisser li l-firxa ta’ produzzjoni taż-żewġ kumpaniji għandha titqies bħala “relatata mill-qrib” skont it-tifsira tal-Artikolu 2(6a) tar-Regolament bażiku.

(221)

Għalkemm il-produttur esportatur sostna li d-data finanzjarja ta’ dawk il-produtturi tal-GFF kienet disponibbli fil-bażi tad-data Orbis ma ssottomettietx din id-data, la bil-kummenti tagħha għar-rivelazzjoni finali u lanqas bin-Nota ta’ Marzu 2019, li talbet lill-partijiet biex jidentifikaw il-produtturi tal-prodott investigat f’pajjiżi rappreżentattivi potenzjali. Wara s-sottomissjoni tal-kumpanija, madankollu, il-Kummissjoni reġgħet ikkonsultat il-bażi tad-data Orbis, sabiex tikkonferma jekk id-data msemmija minn Jushi/Hengshi kinitx disponibbli fil-bażi tad-data Orbis u għalhekk kellha tkun ikkunsidrata. Madankollu, dan il-kontroll addizzjonali (88) wera li, għall-kuntrarju ta’ dak li qalu Jushi/Hengshi, ma hemm l-ebda informazzjoni finanzjarja għal kumpanija li timmanifattura l-GFF jew prodotti simili disponibbli fil-bażi tad-data Orbis. Abbażi ta’ dan, l-affermazzjoni ġiet irrifjutata.

(222)

Wara r-rivelazzjoni finali l-istess produttur esportatur iddikjara li kien probabbli ħafna li n-negozju tal-GFR tal-grupp Sisecam opera b’telf matul l-2018 minħabba li l-bejgħ ta’ karbonat tas-sodju kien jammonta għal 86 % tal-bejgħ totali u 94 % tal-profitti operatorji (valur) tas-segment tal-operazzjonijiet kimiċi ta’ Sisecam. Lanqas il-produttur esportatur ma pprovda xi evidenza li tappoġġa din id-dikjarazzjoni.

(223)

Fid-dawl tal-informazzjoni disponibbli, ma hemm l-ebda bażi għall-konklużjoni li s-segment tan-negozju tal-GFR qed jagħmel telf. Anki jekk il-bejgħ tas-segment tal-GFR kien jirrappreżenta biss parti żgħira tal-bejgħ tas-segment tal-operazzjonijiet kimiċi u ġġenera wkoll parti żgħira mill-profitti operatorji, dan il-bejgħ seta’ fl-istess ħin ikun profittabbli b’mod sinifikanti (fil-fatt, saħansitra aktar profittabbli mill-bejgħ tal-karbonat tas-sodju). Għalhekk, l-affermazzjoni tqieset spekulattiva u ġiet irrifjutata.

(224)

Taishan iddikjarat li l-SG&A u l-profitt tas-segment ta’ operazzjonijiet kimiċi tal-grupp Sisecam ma setgħux jintużaw fil-kostruzzjoni tal-valur normali billi (i) parti biss mis-sussidjarji tal-grupp Sisecam kellha l-kapaċità li tipproduċi l-GFF, (ii) is-settur tal-fibra tal-ħġieġ tal-grupp Sisecam ġarrab kost għoli biex jibda faċilità ġdida u għalhekk il-Kummissjoni għandha tevalwa mill-ġdid il-kost, l-SG&A u l-profitt tal-prodott investigat u (iii) is-segment tal-operazzjonijiet kimiċi u s-settur tal-fibra tal-ħġieġ huma distorti minħabba għotjiet mill-gvern Tork.

(225)

Rigward l-ewwel affermazzjoni ta’ dan il-produttur esportatur, kif diġà ġie spjegat fid-dettall fil-premessa (185), fin-nuqqas ta’ kwalunkwe informazzjoni finanzjarja disponibbli pubblikament għall-produtturi tal-GFF fit-Turkija, il-Kummissjoni kkonkludiet li d-data finanzjarja tas-settur kimiku ta’ Sisecam Group għall-2018 kienet xierqa għall-fini ta’ din l-investigazzjoni. Dan għaliex fin-nuqqas ta’ data finanzjarja għall-prodott investigat, il-Kummissjoni tista’ tikkunsidra l-produzzjoni ta’ prodott fl-istess kategorija ġenerali u/jew settur tal-prodott investigat biex taħdem il-valur normali skont l-Artikolu 2(6a)(a) tar-Regolament bażiku.

(226)

Fir-rigward tal-aġġustamenti għall-kostijiet tal-istabiliment, filwaqt li tali kost jista’ jaffettwa l-SG&A u l-profittabbiltà rrapportata skont ir-regoli tal-kontabbiltà applikati, il-produttur esportatur ma kkwantifikax l-effetti allegati u lanqas ma indika kif jenħtieġ li jsir l-allegat aġġustament. Fi kwalunkwe każ, kwalunkwe kost tal-istabiliment imdaħħal fl-2018 inaqqas il-marġini ta’ profitt reali. Għalhekk, anki jekk kien hemm xi impatt fuq l-SG&A u l-profittabbiltà tal-kumpanija, l-approċċ meħud mill-Kummissjoni kien wieħed konservattiv u favur il-produtturi esportaturi. Għalhekk, il-Kummissjoni sabet li l-kostijiet kienu rappreżentattivi għall-iskop ta’ din l-investigazzjoni. Bl-istess mod, ma hemm l-ebda evidenza li l-għotjiet li l-kumpanija allegatament irċeviet irendu l-informazzjoni mhux affidabbli għall-fini ta’ din l-investigazzjoni. Il-produttur esportatur ma ta l-ebda informazzjoni dwar l-allegati għotjiet u b’liema mod kien se jkollhom effett ta’ distorsjoni. Għalhekk, il-Kummissjoni ddeċidiet li tirrifjuta l-affermazzjonijiet ta’ dan il-produttur esportatur.

(227)

Barra minn hekk, il-grupp Yuntianhua sostna li l-kalkolu tal-SG&A u tal-profitt tal-kumpanija fil-pajjiż rappreżentattiv ma għandhomx ikunu bbażati fuq id-dħul operatorju u l-ispejjeż operatorji biss iżda fuq id-dħul kollu, il-kost tal-prodotti mibjugħa (“COGS”) u l-ispejjeż. Il-produttur esportatur argumenta li l-ispejjeż tal-SG&A ġew definiti u kkwantifikati fid-dikjarazzjonijiet finanzjarji u ma jeħtieġu l-ebda żieda jew tnaqqis. Il-produttur esportatur sostna wkoll li d-dħul kien inklużiv tal-bejgħ lil partijiet relatati (“intergrupp”), filwaqt li l-SG&A u l-profitt użati biex jinħadem il-valur normali għandhom jirrigwardaw biss il-bejgħ lil partijiet mhux relatati. Fl-aħħar nett, il-produttur esportatur iddikjara li l-SG&A u l-profitt użati biex jinħadem il-valur normali għandhom ikopru biss il-bejgħ fis-suq domestiku Tork u mhux il-bejgħ totali tal-kumpanija inkwistjoni.

(228)

Meta jiġi kkunsidrat l-ewwel punt, biex jiġu stabbiliti l-SG&A u l-profitti xierqa, il-Kummissjoni ffokat fuq il-kostijiet direttament marbuta mal-produzzjoni, jiġifieri d-dħul u l-ispejjeż operatorji. Għaldaqstant, u minħabba li s-segmenti tal-operazzjonijiet kimiċi wasslu għal riżultat finanzjarju pożittiv, il-profitt finanzjarju tnaqqas mill-SG&A. Dan il-kalkolu renda SG&A u profitt affidabbli għas-segment kimiku tal-kumpanija sal-punt li ma tikkunsidraw b’mod mhux xieraq il-kostijiet li kompletament mhumiex relatati mal-produzzjoni u l-bejgħ. Għall-kuntrarju ta’ dak li sostniet il-kumpanija, l-ispejjeż ġenerali kienu disponibbli fir-rapport annwali fil-livell tal-grupp kollu u mhux fil-livell tas-segmenti tan-negozju. Filwaqt li huwa korrett li l-bejgħ irrapportat jinkludi bejgħ intragrupp, biex jiġu żgurati t-trasparenza u d-drittijiet tad-difiża tal-partijiet interessati meta l-Artikolu 2(6a) ikun invokat, ir-Regolament bażiku jeħtieġ l-użu ta’ informazzjoni disponibbli pubblikament, li mhux dejjem tiġi f’forma diżaggregata. Fl-applikazzjoni ta’ din id-dispożizzjoni, il-Kummissjoni dejjem tiżgura li l-informazzjoni użata biex jinħadem il-valur normali tkun l-aħjar fost id-data disponibbli pubblikament. Hija tikkomunika lill-partijiet interessati kmieni fil-proċediment id-data li jkollha l-intenzjoni li tuża u tippermettilhom opportunitajiet suffiċjenti biex jipprovdu kummenti u jippreżentaw data aktar dettaljata. F’din l-investigazzjoni, filwaqt li bosta partijiet ikkritikaw l-informazzjoni użata mill-Kummissjoni, l-ebda waħda mill-partijiet ma ressqet data jew metodoloġija alternattiva aħjar u aktar dettaljata. Dan jappoġġa l-fehma li l-Kummissjoni rrikorriet għall-aħjar informazzjoni disponibbli pubblikament f’dan il-kuntest. F’dan il-każ partikolari, fil-fatt, il-biċċa l-kbira tal-bejgħ (85 %) kienu lil partijiet mhux relatati u għalhekk, fil-biċċa l-kbira, jirriflettu r-riżultat tal-bejgħ lil dawn il-partijiet. Bl-istess mod, l-SG&A u l-profittabbiltà huma wkoll rappreżentattivi tal-bejgħ domestiku fil-pajjiż rappreżentattiv minħabba li 61 % sar fit-Turkija. Fuq din il-bażi, il-Kummissjoni ssostni li d-data użata biex jinħadem il-valur normali hija konformi mar-rekwiżiti tal-Artikolu 2(6a) tar-Regolament bażiku u hija l-aktar affidabbli u rappreżentattiva f’dan il-każ partikolari. Għaldaqstant, l-affermazzjonijiet dwar il-kwalità ta’ din l-informazzjoni għandhom jiġu rrifjutati.

(229)

Fin-Nota ta’ Marzu 2019, il-Kummissjoni ddikjarat li, biex tibni l-valur normali skont l-Artikolu 2(6a)(a) tar-Regolament bażiku, hi kienet se tuża l-Global Trade Atlas (“GTA”) biex tistabbilixxi l-kost mhux distort ta’ ħafna mill-fatturi tal-produzzjoni, filwaqt li għall-istabbiliment tal-kostijiet mingħajr distorsjoni tal-ħaddiema, tal-enerġija u tal-iskart, is-sors użat ser ikun jiddependi mill-pajjiż rappreżentattiv magħżul.

(230)

Barra minn hekk, abbażi tad-deċiżjoni li t-Turkija tintuża bħala l-pajjiż rappreżentattiv kif iddikjarat fin-Nota ta’ Settembru 2019, il-Kummissjoni informat lill-partijiet interessati li hija kienet se tuża l-GTA biex tistabbilixxi l-kostijiet mingħajr distorsjoni tal-fatturi tal-produzzjoni, u l-Istitut tal-Istatistika tat-Turkija biex tistabbilixxi l-kostijiet tal-ħaddiema u l-enerġija mingħajr distorsjoni.

(231)

Barra minn hekk, l-istess produttur esportatur iddikjara li, jekk il-Kummissjoni tiddetermina li x-xiri ta’ materjali u enerġija fir-RPĊ jinbidel ma’ prezzijiet ta’ referenza, jenħtieġ li tuża l-prezzijiet attwali tax-xiri għal ħames tipi ta’ materja prima importati matul il-perjodu ta’ investigazzjoni minħabba li dawk il-prezzijiet ma kinux distorti skont it-tielet inċiż tal-Artikolu 2(6a)(a) tar-Regolament bażiku. Dan il-produttur esportatur talab ukoll lill-Kummissjoni biex tuża dawn il-prezzijiet tal-importazzjoni bħala l-prezz ta’ referenza wkoll għall-materjali li xtrat fir-RPĊ.

(232)

Il-produttur esportatur ipprovda evidenza ta’ sostenn (jiġifieri fatturi tax-xiri, dokumenti tal-importazzjoni u kuntratti) għall-ħames tipi ta’ materja prima msemmija fil-premessa (231). Ix-xiri sar f’USD u mis-swieq fejn ma kien hemm l-ebda evidenza tal-eżistenza ta’ distorsjonijiet. Fid-dawl tal-fatt li l-investigazzjoni ma żvelat l-ebda distorsjoni fir-rigward tal-importazzjonijiet ta’ din il-materja prima fir-RPĊ għal dan il-produttur esportatur partikolari matul il-perjodu ta’ investigazzjoni partikolari, il-Kummissjoni aċċettat din id-dikjarazzjoni. Madankollu, għall-materjali mixtrija fir-RPĊ, il-Kummissjoni ma setgħetx taċċetta l-affermazzjoni tal-kumpanija. Kif imsemmi fil-premessa (219), it-Turkija ġiet stabbilita bħala l-pajjiż rappreżentattiv f’dan il-każ u, għalhekk, il-kostijiet mingħajr distorsjoni tal-fatturi ta’ produzzjoni jridu jkunu bbażati fuq il-prezzijiet ta’ importazzjoni korrispondenti mingħajr distorsjoni fit-Turkija.

(233)

L-istess produttur esportatur sostna li f’każ li l-Kummissjoni tiddetermina li għandhom jintużaw il-prezzijiet ta’ referenza, fi kwalunkwe każ jenħtieġ li l-Kummissjoni teskludi l-prezzijiet “anormali” kollha; bħal (i) il-prezzijiet għal kategorija ta’ oġġetti mhux użati mill-produttur esportatur, (ii) il-prezzijiet għall-materjali li ma kellhomx l-istess grad/purità/karatteristiċi fiżiċi bħall-materjali użati mill-produttur esportatur, jew (iii) il-prezzijiet li huma bbażati fuq volumi partikolarment baxxi ta’ bejgħ/importazzjoni. Barra minn hekk, il-produttur esportatur iddikjara li għall-aktar materjali bażiċi, bħar-ramel/trab tas-silika jew minerali oħra, jenħtieġ li l-Kummissjoni ma tużax data dwar l-importazzjoni tal-pajjiż rappreżentattiv magħżul. Il-produttur esportatur argumenta li dawn il-materjali tipikament ikunu importati biss għal għanijiet speċifiċi ħafna bi prezzijiet għoljin. F’dawn il-każijiet, il-prezzijiet domestiċi fil-pajjiż ta’ referenza jirriflettu b’mod aktar preċiż il-livell attwali tal-prezzijiet.

(234)

Il-Kummissjoni pprovdiet fil-fajl mhux kunfidenzjali tal-investigazzjoni l-volum u l-valuri tal-importazzjoni mill-GTA għall-fatturi kollha tal-produzzjoni tat-Turkija. Il-Kummissjoni vverifikat ukoll li kien hemm biżżejjed kwantitajiet rappreżentattivi mingħajr distorsjoni ta’ dawn l-importazzjonijiet sabiex il-prezz medju użat inaqqas l-impatt ta’ kwalunkwe prezz potenzjalment anormali fil-limitu inferjuri u ogħla tal-medda. Għalhekk, il-prezzijiet aġġustati ta’ ċertu input jirriflettu taħlita ta’ kwalitajiet differenti u d-disponibbiltà tagħha fis-swieq ikkonċernati. Barra minn hekk, ma tressqet l-ebda evidenza li turi li l-prezzijiet li huma bbażati fuq volumi baxxi ta’ bejgħ/importazzjoni mhumiex adattati u, għalhekk, il-Kummissjoni ma għandha l-ebda raġuni oġġettiva biex teskludi din id-data mill-analiżijiet. Barra minn hekk, fir-rigward tad-dikjarazzjoni li tirreferi għar-ramel tas-silika u l-minerali, ta’ min jinnota li din il-materja prima mhijiex inkluża fil-lista ta’ fatturi tal-produzzjoni stabbilita fil-premessa (242). Għalhekk, l-affermazzjoni fi premessa (233) ġiet irrifjutata.

(235)

Kif imsemmi fil-premessa (185) biex jiġu stabbiliti l-SG&A u l-profitt mingħajr distorsjoni, il-Kummissjoni kienet se tuża d-data finanzjarja tas-segment tal-Operat Kimiku tal-grupp Tork Sisecam għall-2018, li jinkludi GFR.

(236)

Wara r-rivelazzjoni finali, Taishan tenniet l-affermazzjoni tagħha deskritta fil-premessa (231) li jenħtieġ li l-Kummissjoni tuża l-prezzijiet tal-importazzjoni tal-ħames materji primi importati minn sorsi mhux distorti peress li l-prezz ta’ referenza wkoll għall-istess materjal mixtri fir-RPĊ.

(237)

Il-produttur esportatur naqas milli jissostanzja din l-affermazzjoni skont l-istandard legali meħtieġ jiġifieri sal-punt li huwa stabbilit b’mod pożittiv li mhumiex distorti. Il-produttur esportatur ma ssottometta l-ebda evidenza li l-prezz tal-importazzjoni (anki jekk meqjus bħala mhux distort) seta’ jkun rappreżentattiv bħala punt ta’ riferiment mhux distort. Għaldaqstant, l-affermazzjoni ġiet irrifjutata.

(238)

Kif intqal fil-premessa (93), fin-Nota ta’ Marzu 2019, il-Kummissjoni fittxet li tistabbilixxi lista inizjali tal-fatturi tal-produzzjoni u tas-sorsi relatati mal-GFF li kienu intenzjonati li jintużaw għall-fatturi kollha tal-produzzjoni bħall-materjali, l-enerġija u l-manodopera użati fil-produzzjoni tal-GFF mill-produtturi esportaturi.

(239)

Barra minn hekk, kif iddikjarat fil-premessa (95), fin-Nota ta’ Settembru 2019, il-Kummissjoni pprovdiet lista riveduta ta’ fatturi tal-produzzjoni u stabbiliet il-kodiċijiet tal-prodotti Torok li jikkorrispondu għall-fatturi tal-produzzjoni użati fil-manifattura tal-GFF fit-Turkija, il-pajjiż rappreżentattiv.

(240)

Il-Kummissjoni ma rċeviet l-ebda kumment dwar il-lista ta’ fatturi tal-produzzjoni wara n-Nota ta’ Marzu 2019 jew wara n-Nota ta’ Settembru 2019.

(241)

Il-Kummissjoni lanqas ma rċeviet xi kummenti dwar il-kodiċijiet tal-prodotti Torok speċifikati fin-Nota ta’ Settembru 2019. Madankollu, il-Kummissjoni għamlet riċerka addizzjonali sabiex tipprovdi tqabbil aħjar tal-kodiċijiet tal-prodotti Torok mal-fatturi tal-produzzjonijiet użati mill-produtturi esportaturi li kkooperaw u rrevediet il-kodiċijiet tal-prodotti Torok għal pirofilite u ħajt tal-poliester f’dan ir-rigward. Barra minn hekk, wieħed mill-produtturi esportaturi qed juża gass naturali likwifikat fil-proċess ta’ manifattura tiegħu. Madankollu, ma kien hemm l-ebda importazzjoni ta’ gass naturali likwifikat fit-Turkija fil-perjodu ta’ investigazzjoni. Għalhekk, għall-bini ta’ parametru referenzjajru għall-gass naturali likwifikat, fin-nuqqas ta’ statistika tal-importazzjoni dwar il-gass naturali likwifikat, il-Kummissjoni minflok użat l-importazzjonijiet tal-propan likwifikat. Barra minn hekk, l-isem tal-materja prima rrapportata minn wieħed mill-produtturi esportaturi bl-isem aġent tal-akkoppjar tas-silan inbidel għal “prodotti tas-siliċju” sabiex tiġi żgurata l-konformità man-Nomenklatura Doganali.

(242)

Meta titqies l-informazzjoni kollha sottomessa mill-partijiet interessati u miġbura waqt iż-żjarat ta’ verifika, fejn applikabbli, ġew identifikati l-fatturi tal-produzzjoni u l-kodiċijiet tal-prodotti Torok li ġejjin:

Tabella 1

(243)

Matul iż-żjarat ta’ verifika tagħha għand il-produtturi tal-GFF, il-Kummissjoni vverifikat il-materja prima użata u r-ruttam iġġenerat fil-manifattura tal-GFF.

(244)

Għall-materja prima kollha, fin-nuqqas ta’ informazzjoni dwar is-suq tal-pajjiż rappreżentattiv, il-Kummissjoni qagħdet fuq il-prezzijiet tal-importazzjoni. Prezz ta’ importazzjoni fil-pajjiż rappreżentattiv ġie ddeterminat bħala medja ponderata tal-prezzijiet unitarji tal-importazzjonijiet mill-pajjiżi terzi kollha eskluża r-RPĊ u pajjiżi b’ekonomija mhux tas-suq kif stipulat fil-premessa (196). Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li kkonkludiet kif stipulat fil-premessi minn (98) sa (162) li mhuwiex xieraq li jintużaw il-prezzijiet u l-kostijiet domestiċi fir-RPĊ minħabba l-eżistenza ta’ distorsjonijiet sinifikanti skont l-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsuba għall-esportazzjoni, il-Kummissjoni kkunsidrat li l-istess distorsjonijiet affettwaw il-prezzijiet tal-esportazzjoni. Barra minn hekk, jidher li l-prezz tal-importazzjoni tal-materja prima ewlenija esportata mir-RPĊ lejn it-Turkija huwa aktar baxx minn importazzjonijiet oħra. Wara l-esklużjoni tal-importazzjonijiet lejn it-Turkija mir-RPĊ u minn pajjiżi b’ekonomija mhux tas-suq, il-Kummissjoni sabet li l-importazzjonijiet minn pajjiżi terzi oħra baqgħu rappreżentattivi, minn 43 % sa 100 % tal-volumi totali importati lejn it-Turkija.

(245)

Il-Kummissjoni fittxet li tistabbilixxi l-prezz mingħajr distorsjoni tal-materja prima użata fil-produzzjoni tal-GFF, kif ikkonsenjati fil-fabbrika tal-produttur esportatur kif meħtieġ mill-ewwel inċiż tal-Artikolu 2(6a)(a) tar-Regolament bażiku. Biex tagħmel dan, hija applikat id-dazju tal-importazzjoni tal-pajjiż rappreżentattiv għal kull pajjiż tal-oriġini rispettiv u żiedet il-kostijiet tat-trasport domestiku mal-prezz tal-importazzjoni. Il-kostijiet tat-trasport domestiku għall-materja prima kollha ġew stmati fuq il-bażi tad-data vverifikata pprovduta mill-produtturi esportaturi li kkooperaw u mhumiex inklużi fil-parametri referenzjarji msemmija fit-Tabella 1.

(246)

L-iskart/ir-ruttam prinċipali rrapportat mill-produtturi esportaturi li kkooperaw kien ir-ruttam iġġenerat waqt il-proċess tal-manifattura ta’ GFR. Ir-ruttam inbiegħ mill-produtturi esportaturi fis-suq domestiku bi prezz li jirrappreżenta madwar 15 % tal-kost tal-manifattura ta’ GFR. Għalhekk, il-prezz mingħajr distorsjoni għar-ruttam kien stmat għal 15 % tal-prezz mingħajr distorsjoni ta’ GFR.

(247)

L-Istitut Tork tal-Istatistika jippubblika informazzjoni ddettaljata dwar il-pagi f’setturi ekonomiċi differenti fit-Turkija. Il-Kummissjoni użat il-pagi rrapportati fis-settur tal-manifattura tat-Turkija għall-2016, għall-attività ekonomika C.23 (Manifattura ta’ prodotti minerali mhux metalliċi oħra) (89) skont il-klassifikazzjoni NACE Rev.2 (90). Il-valur medju ta’ kull xahar tal-2016 ġie aġġustat kif xieraq għall-inflazzjoni bl-użu tal-indiċi tal-prezzijiet tal-produtturi domestiċi (91) kif ġie ppubblikat mill-Istitut Statistiku Tork.

(248)

Wara r-rivelazzjoni finali, produttur esportatur wieħed u s-CCCLA sostnew li l-valur tal-parametru referenzjarju għall-kost tax-xogħol fit-Tabella 1 ma kienx realistiku. Waqt seduta li saret fit-16 ta’ Jannar 2020, il-Kummissjoni ċċarat li d-Dokument ta’ Rivelazzjoni Ġenerali kien jinkludi żball ċar rigward il-kejl tal-unità tax-xogħol, jiġifieri “CNY/kg” minflok “CNY/siegħa”. In-Nota għall-fajl tad-19 ta’ Diċembru 2019 bil-kalkoli tal-parametri kollha stabbiliti fit-Tabella 1, inkluż ix-xogħol, uriet l-unità korretta ta’ kejl, jiġifieri “CNY/siegħa”.

(249)

Biex tistabbilixxi parametru referenzjarju għall-elettriku u l-gass naturali, il-Kummissjoni użat l-istatistiki tal-prezzijiet tal-elettriku u tal-gass ippubblikati mill-Istitut tal-Istatistika Tork (92) fl-istqarrijiet għall-istampa regolari tiegħu. Minn dawn l-istatistiki, il-Kummissjoni użat id-data dwar il-prezzijiet industrijali tal-elettriku u tal-gass fil-faxxa ta’ konsum korrispondenti f’Kuruș/kWh li tkopri l-perjodu ta’ investigazzjoni.

(250)

Il-kostijiet mingħajr distorsjoni tal-elettriku fit-Tabella 1 huma pprovduti bħala medda peress li tariffi differenti japplikaw għall-konsumaturi individwali skont il-konsum tagħhom.

(251)

Minħabba l-għadd kbir ta’ fatturi tal-produzzjoni tal-produtturi esportaturi li kkooperaw inklużi fil-kampjun, xi materja prima li kellha biss ponderazzjoni negliġibbli fil-kost totali tal-produzzjoni tal-produttur esportatur kif ukoll fil-livell tal-PCN ġiet miġbura taħt l-oġġetti konsumabbli.

(252)

Il-Kummissjoni kkalkolat il-perċentwal tal-oġġetti konsumabbli fuq il-kost totali tal-materja prima u applikat dan il-perċentwal għall-kost ikkalkolat mill-ġdid tal-materja prima meta jintużaw il-prezzijiet stabbiliti mingħajr distorsjoni.

(253)

Wara r-rivelazzjoni finali, il-produttur esportatur li jesporta u s-CCCLA talbu lill-Kummissjoni biex tiżvela l-metodoloġija ta’ kalkolu għall-parametri referenzjarji fit-Tabella 1.

(254)

Matul seduta ta’ smigħ li saret fis-16 ta’ Jannar 2020, il-Kummissjoni ġibdet l-attenzjoni ta’ dawn il-partijiet li fil-jum ta’ rivelazzjoni, id-19 ta’ Diċembru 2019, żdidet Nota għall-fajl fil-fajl mhux kunfidenzjali tal-investigazzjoni li tispjega l-metodoloġija tal-kalkolu għall-parametri referenzjarji fit-Tabella 1. Il-partijiet interessati kollha ġew innotifikati bid-dokument il-ġdid dwar il-fajl awtomatikament permezz ta’ TRON fil-jum tar-rivelazzjoni finali. Peress li l-informazzjoni mitluba kienet diġà disponibbli għall-partijiet, ma kienet meħtieġa l-ebda rivelazzjoni addizzjonali.

(255)

L-ispejjeż ġenerali tal-manifattura mġarrba mill-produtturi esportaturi li kkooperaw kienu espressi bħala sehem mill-kostijiet tal-manifattura li effettivament iġġarrbu mill-produtturi esportaturi. Dan il-perċentwal ġie applikat għall-kostijiet tal-manifattura mingħajr distorsjoni.

(256)

Għall-SG&A u l-profitt, il-Kummissjoni użat id-data finanzjarja tas-segment tal-operat kimiku tal-grupp Tork Sisecam għall-2018 kif imħabbar fin-Nota ta’ Settembru 2019 u ddikjarat fil-premessa (185).

(257)

Wara r-rivelazzjoni finali, il-grupp Yuntianhua stqarr li l-Kummissjoni ma sabet l-ebda distorsjoni sinifikanti għall-kostijiet tal-SG&A tagħha u b’hekk injorat b’mod mhux xieraq il-valuri reali tal-SG&A rrapportati mill-kumpanija fuq il-bażi tal-Artikolu 2(6a)(a). Il-kumpanija sostniet li l-użu tal-SG&A reali huwa konformi mal-metodoloġija użata għall-istabbiliment tal-parametru referenzjarju għal skart/ruttam, prodotti konsumabbli u spejjeż ġenerali, li għalihom il-kumpanija ddikjarat li ntużaw valuri reali fil-forma ta’ proporzjonijiet tal-kostijiet reali tagħha. Il-kumpanija sostniet ukoll li din il-metodoloġija hija konformi mat-tielet inċiż tal-Artikolu 2(6a)(a) tar-Regolament bażiku dwar l-użu tal-kostijiet domestiċi reali stabbiliti b’mod pożittiv u mhux distorti.

(258)

Il-Kummissjoni tinnota mill-bidu nett li, għall-kuntrarju tal-fehim ta’ dan il-produttur esportatur, il-kostijiet li jikkonċernaw l-iskart/ir-ruttam, prodotti konsumabbli u spejjeż ġenerali ma kinux meqjusa bħala mhux distorti skont it-tielet inċiż tal-Artikolu 2(6a)(a) tar-Regolament bażiku. Kif spjegat fil-premessi minn (251) sa (255) u fir-rivelazzjoni speċifika pprovduta lill-produtturi esportaturi inkwistjoni, il-proporzjonijiet ikkalkulati għal konsumabbli u għal spejjeż ġenerali bbażati fuq il-kostijiet reali tal-produttur esportatur ġew imbagħad espressi fuq il-kostijiet mingħajr distorsjoni fil-pajjiż rappreżentattiv. Din il-metodoloġija kienet applikata minħabba li d-data disponibbli ma kinitx tinkludi informazzjoni dwar l-ispejjeż ġenerali u minħabba l-impatt limitat tal-konsumabbli fil-kost kumplessiv. Rigward l-iskart/ir-ruttam, dawn ġew raggruppati taħt konsumabbli għall-kumpaniji li fihom kellhom biss piż negliġibbli fil-kost totali tal-produzzjoni, kif spjegat fil-premessa (251). Inkella l-Kummissjoni użat il-parametru referenzjarju elenkat fit-Tabella 1 u fil-premessa (246).

(259)

Il-Kummissjoni nnotat ukoll li ladarba l-eżistenza ta’ distorsjonijiet sinifikanti għall-pajjiż esportatur hija stabbilita skont l-Artikolu 2(6a)(b) tar-Regolament bażiku, il-valur normali huwa maħdum b’referenza għal prezzijiet jew punti ta’ riferiment mingħajr distorsjoni f’pajjiż rappreżentattiv xieraq għal kull produttur esportatur skont l-Artikolu 2(6a)(a). Il-Kummissjoni enfasizzat li din id-dispożizzjoni teħtieġ b’mod speċifiku wkoll li l-valur normali maħdum jinkludi ammont raġonevoli għall-kostijiet tal-SG&A mingħajr distorsjoni f’pajjiż rappreżentattiv xieraq. Ladarba l-Kummissjoni stabbiliet l-eżistenza ta’ distorsjonijiet sinifikanti li jaffettwaw il-prodott investigat fil-pajjiż esportatur, ma tħallietx tuża l-kostijiet realis tal-SG&A ta’ produtturi esportaturi individwali peress li, b’riżultat ta’ dan, instab li dawn kienu distorti. Fl-aħħar nett, il-produttur esportatur naqas milli jissostanzja din l-affermazzjoni skont l-istandard legali meħtieġ. Għaldaqstant, din l-affermazzjoni ġiet irrifjutata.

(260)

Sabiex tistabbilixxi l-valur normali maħdum, il-Kummissjoni segwiet il-passi li ġejjin.

(261)

L-ewwel, il-Kummissjoni stabbiliet il-kostijiet mingħajr distorsjoni tal-manifattura tal-GFF. Applikat il-kostijiet unitarji mingħajr distorsjoni għall-konsum effettiv tal-fatturi individwali tal-produzzjoni ta’ kull produttur esportatur li kkoopera.

(262)

It-tieni, biex waslet għall-kostijiet tal-produzzjoni mingħajr distorsjoni l-Kummissjoni żiedet l-ispejjeż ġenerali tal-manifattura taL- GFF determinati kif deskritt fil-premessa (255) mal-kostijiet tal-produzzjoni mingħajr distorsjoni.

(263)

Fl-aħħar nett, għall-kostijiet tal-produzzjoni mingħajr distorsjoni stabbiliti kif deskritt fil-premessa (261), il-Kummissjoni applikat l-SG&A u l-profitt tas-segment tal-Operat kimiku tal-grupp Tork Sisecam għall-2018 kif spjegat fil-premessa (185).

(264)

L-SG&A, espressi bħala perċentwal tal-Kostijiet tal-Prodotti Mibjugħa (Costs of Goods Sold, “COGS”) u applikati għall-kostijiet tal-produzzjoni mingħajr distorsjoni, laħqu l-20,57 %.

(265)

Il-profitt espress bħala perċentwal tal-COGS u applikat għall-kostijiet tal-produzzjoni mingħajr distorsjoni laħaq il-39,26 %.

(266)

Abbażi ta’ dak, il-Kummissjoni fasslet il-valur normali għal kull tip ta’ prodott fuq bażi ta’ kif joħroġ mill-fabbrika, f’konformità mal-Artikolu 2(6a)(a) tar-Regolament bażiku.

(267)

Kif spjegat fil-premessi minn (68) sa (87), għall-produtturi esportaturi Hengshi u Jushi, parti mill-grupp CNBM, il-Kummissjoni ddeċidiet li tapplika l-fatti disponibbli skont l-Artikolu 18(1) tar-Regolament bażiku f’dak li għandu x’jaqsam mal-kalkolu tal-valur normali.

(268)

B’mod partikolari, għal Hengshi, kif spjegat fil-premessi (275) u (276), il-Kummissjoni ddeċidiet b’mod eċċezzjonali li taċċetta l-PCN mill-investigazzjoni kontra s-sussidji ddikjarata fil-premessa (3) bħala fatti disponibbli skont l-Artikolu 18(1) tar-Regolament bażiku. Madankollu, il-valur normali ma setax ikun ibbażat fuq id-data tal-kumpanija stess billi nstab li ma kienx korrett kif spjegat fil-premessi minn (75) sa (83). Għalhekk, għaż-żewġ produtturi esportaturi, Jushi u Hengshi, il-valur normali għal kull PCN jew simili għall-PCNs mill-produtturi esportaturi inklużi fil-kampjun li kkooperaw ma’ proċessi tal-manifattura simili (integrazzjoni vertikali jew mhux vertikali) intużaw biex jiġi ddeterminat il-valur normali tagħhom. Fin-nuqqas ta’ PCN li jaqbel tal-produttur esportatur inkluż fil-kampjun li kkoopera ma’ proċess tal-manifattura simili, intużat id-data tal-produttur esportatur l-ieħor li kkoopera bi proċess tal-manifattura differenti. Fin-nuqqas ta’ PCN li jaqbel ta’ kwalunkwe wieħed miż-żewġ produtturi esportaturi li kkooperaw, intuża l-aktar PCN simili mill-produtturi esportaturi inklużi fil-kampjun li kkooperaw bi proċess tal-manifattura simili. Il-Kummissjoni ma rċeviet l-ebda kumment minn xi partijiet interessati dwar l-approċċ segwit.

(269)

Il-grupp inkluż fil-kampjun ta’ produtturi esportaturi esportaw lejn l-Unjoni jew direttament lil klijenti indipendenti jew permezz ta’ kumpaniji relatati li jaġixxu bħala esportatur jew importatur.

(270)

Il-prezz tal-esportazzjoni għall-bejgħ magħmul direttament lil klijenti indipendenti fl-Unjoni u permezz ta’ kumpaniji tan-negozjar kien il-prezz attwalment imħallas jew li jrid jiġi mħallas għall-prodott ikkonċernat meta jkun mibjugħ għall-esportazzjoni lejn l-Unjoni, b’konformità mal-Artikolu 2(8) tar-Regolament bażiku.

(271)

Il-prezz tal-esportazzjoni għall-bejgħ permezz tal-importaturi relatati ġie stabbilit fuq il-bażi tal-prezz li bih il-prodott importat reġa’ nbiegħ għall-ewwel darba lil klijenti indipendenti fl-Unjoni, skont l-Artikolu 2(9) tar-Regolament bażiku. F’dan il-każ, l-aġġustamenti fil-prezz saru għall-kostijiet kollha mġarrba bejn l-importazzjoni u l-bejgħ mill-ġdid, inklużi l-ispejjeż SG&A, u profitt raġonevoli.

(272)

Negozjant mhux relatat wieħed biss li importa kwantitajiet negliġibbli biss tal-GFF matul il-perjodu ta’ investigazzjoni kkoopera fl-investigazzjoni. Għalhekk, il-marġni tal-profitt tiegħu ma tqiesx rappreżentattiv. Fin-nuqqas ta’ kwalunkwe informazzjoni oħra, il-marġni ta’ profitt ta’ negozjant indipendenti attiv fis-settur tal-GFF kien stmat li hu ta’ 5 %.

(273)

Kif iddikjarat fil-premessi minn (75) sa (84), parti mill-produtturi esportaturi tal-grupp CNBM ma kkooperatx fl-investigazzjoni u l-Kummissjoni ddeċidiet li tistabbilixxi l-prezz tal-esportazzjoni bbażat fuq il-fatti disponibbli skont l-Artikolu 18(1) tar-Regolament bażiku.

(274)

Fil-kummenti tiegħu għall-applikazzjoni tal-Artikolu 18 tar-Regolament bażiku, il-produttur esportatur talab li, fir-rigward tal-prezz tal-esportazzjoni, il-Kummissjoni jenħtieġ li tuża l-informazzjoni (jiġifieri l-PCN) sottomessa fl-investigazzjoni parallela kontra s-sussidji msemmija fil-premessa (3).

(275)

Madankollu, skont l-Artikolu 19(6) tar-Regolament bażiku, l-informazzjoni rċevuta għandha tintuża biss għall-għan li għalih intalbet. L-Artikolu 29(6) tar-Regolament (UE) 2016/1037 tal-Parlament Ewropew u tal-Kunsill (93) fih l-istess limitazzjoni. Għalhekk, id-data miġbura fil-kuntest ta’ investigazzjoni anti-dumping jew antisussidji ma tistax tintuża għal skop differenti minn dak li għalih intalbet.

(276)

F’dan il-każ partikolari, żewġ investigazzjonijiet dwar il-prodott ikkonċernat kienu qed jitwettqu b’mod parallel, u waħda minnhom kienet bdiet madwar tliet xhur qabel l-oħra. Hengshi speċifikament talbet li l-informazzjoni korretta miġbura matul l-investigazzjoni antisussidji tintuża bħala l-aħjar informazzjoni disponibbli f’din l-investigazzjoni. Hengshi b’mod espliċitu rrinunzjat għall-garanzija prevista fl-Artikolu 19(6) tar-Regolament bażiku u fl-Artikolu 29(6) tar-Regolament (UE) 2016/1037 li l-informazzjoni sottomessa fl-investigazzjonijiet tad-difiża tal-kummerċ se tintuża biss għall-iskop li għalih tkun inġabret. Barra minn hekk, f’dan il-każ, il-Kummissjoni ma imponietx miżuri anti-dumping proviżorji kif iddikjarat fil-premessi (54) sa (56) u, għalhekk, it-twaqqit taż-żewġ investigazzjonijiet ippermetta għall-ġbir u l-verifika tal-informazzjoni dwar il-prezz tal-esportazzjoni sottomessa fl-investigazzjoni antisussidji qabel l-impożizzjoni ta’ dazji anti-dumping definittivi. B’riżultat ta’ dan, eċċezzjonalment il-Kummissjoni xorta kellha biżżejjed żmien biex tikkunsidra din l-informazzjoni f’din l-investigazzjoni mingħajr ma taffettwa d-drittijiet tal-partijiet interessati l-oħra u mingħajr ma tipperikola l-proċess intern tagħha għat-teħid ta’ deċiżjonijiet. Għalhekk, il-Kummissjoni ddeċidiet, eċċezzjonalment, li tuża d-data tal-PCN miġbura matul l-investigazzjoni antisussidji msemmija fil-premessa (3) bħala fatti disponibbli skont l-Artikolu 18(1) tar-Regolament bażiku. B’riżultat ta’ dan, ikkalkolat prezz tal-esportazzjoni għal kull PCN ibbażat fuq id-data tal-produttur esportatur stess bl-użu tal-metodoloġija deskritta fil-premessi (269) sa (272).

(277)

Għaż-żewġ produtturi esportaturi l-oħra tal-grupp CNBM, il-prezz tal-esportazzjoni kien ikkalkolat kif iddikjarat fil-premessi minn (269) sa (272).

(278)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi li kkooperaw fuq bażi ta’ prezz mill-fabbrika.

(279)

Meta dan kien iġġustifikat mill-ħtieġa li jiġi żgurat tqabbil ġust, il-Kummissjoni aġġustat il-prezz tal-esportazzjoni għal differenzi li jaffettwaw il-prezzijiet u l-komparabilità tal-prezzijiet, skont l-Artikolu 2(10) tar-Regolament bażiku. Saru aġġustamenti, ibbażati fuq iċ-ċifri reali tal-kumpanija li kkooperat, għat-trattament tal-imposti, il-merkanzija, il-kostijiet tal-imballaġġ, il-kostijiet tal-kreditu, it-tariffi bankarji, id-dazji doganali, il-kummissjonijiet, u t-tariffi tal-importazzjoni u taxxi indiretti. Sar ukoll aġġustament skont l-Artikolu 2(10)(i) għall-bejgħ permezz ta’ kumpaniji kummerċjali relatati. Instab li l-funzjonijiet tan-negozjanti f’Hong Kong kienu simili għal dawk ta’ aġent. Dawk l-operaturi tas-suq kienu qed ifittxu klijenti u stabbilew kuntatt magħhom. Huma ġarrew ir-responsabbiltà tal-proċess tal-bejgħ u rċevew mark-up għas-servizzi tagħhom. L-aġġustament kien jikkonsisti mill-SG&A tal-kumpaniji kummerċjali u profitt ta’ 5 %. Dan il-marġini ta’ profitt tqies raġonevoli fin-nuqqas ta’ kwalunkwe informazzjoni oħra.

(280)

Wara r-rivelazzjoni finali, il-grupp Yuntianhua sostna li t-tqabbil bejn il-prezz tal-esportazzjoni tiegħu u l-valur normali maħdum ikun inġust. Il-grupp sostna li, filwaqt li l-Kummissjoni għamlet aġġustamenti għall-prezz tal-esportazzjoni għall-ispejjeż diretti kollha tal-bejgħ, bħall-kostijiet tat-trasport u t-tariffi bankarji, l-SG&A tal-grupp Tork Sisecam, użata biex jinħadem il-valur normali, preżumibbilment inkluda xi spejjeż diretti tal-bejgħ li saru fis-suq domestiku tat-Turkija, bl-introduzzjoni ta’ assimetrija fil-paragun bejn il-prezz tal-esportazzjoni u l-valur normali.

(281)

Dan il-produttur esportatur ma pprovda l-ebda evidenza ta’ sostenn li tindika li kull spiża diretta ta’ bejgħ kienet inkluża fl-SG&A użata biex jinħadem il-valur normali jew li d-data użata ma kinitx rappreżentattiva.

(282)

Huwa mfakkar li l-Artikolu 2(6a) tar-Regolament bażiku jeħtieġ l-użu ta’ data disponibbli faċilment. Il-Kummissjoni tfittex li tiżgura li l-informazzjoni użata biex jinħadem il-valur normali tkun l-aħjar fost id-data disponibbli pubblikament u tagħti lill-partijiet l-opportunità li jikkummentaw u jipprovdu data alternattiva li jqisu li tkun aktar rappreżentattiva. F’dan il-każ partikolari, il-Kummissjoni ddivulgat l-SG&A li kellha l-intenzjoni tuża fin-Nota ta’ Settembru 2019, iżda ma rċeviet l-ebda kumment jew data alternattiva aktar dettaljata. Għalhekk din l-affermazzjoni ġiet irrifjutata

(283)

L-istess produttur esportatur iddikjara li, għalkemm il-valur normali ġie aġġustat għat-taxxa fuq il-valur miżjud tal-esportazzjoni (“VAT”) mhux rimborżabbli, il-Kummissjoni ma wrietx li l-produtturi Torok iġarrbu VAT li tista’ titħallas lura kollha fuq il-bejgħ fis-suq domestiku. Għalhekk tali aġġustament ikun illegali.

(284)

Il-Kummissjoni għamlet aġġustament skont l-Artikolu 2(10)(b) tar-Regolament bażiku għad-differenza fit-taxxi indiretti bejn il-bejgħ tal-esportazzjoni mir-RPĊ lejn l-Unjoni u l-valur normali fejn ġew esklużi taxxi indiretti bħall-VAT. Il-Kummissjoni ma għandhiex għalfejn turi li l-produtturi Torok fil-fatt iġarrbu VAT li tista’ tkun rimborżata kompletament fuq il-bejgħ fis-suq domestiku hekk kif il-produttur esportatur qed jissuġġerixxi, peress li dan huwa irrilevanti. Il-valur normali li nħadem kif stipulat fil-premessi minn (260) sa (266) ma kienx jinkludi l-VAT, minħabba li għall-kalkolu tal-valur normali fil-pajjiż esportatur nett mit-trattament tal-VAT tagħhom, jintużaw il-valuri mhux distorti fil-pajjiż rappreżentattiv. Is-sitwazzjoni reali li tikkonċerna t-trattament tal-VAT tal-bejgħ fis-suq domestiku u fil-mument tal-esportazzjoni sseħħ kollha kemm hi fir-RPĊ. L-investigazzjoni kkonkludiet li fir-RPĊ, il-produtturi esportaturi jġarrbu obbligazzjoni ta’ VAT ta’ 17 % jew 16 % mal-esportazzjoni, filwaqt li 5 % jew 10 % ikunu rifużi.

(285)

Għaldaqstant, f’konformità mal-Artikolu 2(10)(b) tar-Regolament bażiku, id-differenza fit-tassazzjoni indiretta, f’dan il-każ il-VAT li hija parzjalment rifuża fir-rigward ta’ bejgħ bl-esportazzjoni, il-Kummissjoni aġġustat kif xieraq biss il-valur normali. Għaldaqstant, l-affermazzjoni ġiet irrifjutata.

(286)

Għall-produtturi esportaturi inklużi fil-kampjun li kkooperaw, il-Kummissjoni qabblet il-medja ponderata tal-valur normali ta’ kull tip ta’ prodott simili mal-medja ponderata tal-prezz tal-esportazzjoni tat-tip korrispondenti tal-prodott ikkonċernat, skont l-Artikolu 2(11) u 2(12) tar-Regolament bażiku.

(287)

Fuq dik il-bażi, il-marġni medju ponderat tad-dumping definittiv espress bħala perċentwal tal-prezz CIF fil-fruntiera tal-Unjoni, bid-dazju mhux imħallas, huwa kif ġej:

(288)

Kif spjegat fil-premessa (43), wieħed mill-gruppi ta’ produtturi esportaturi fil-kampjun, jiġifieri l-grupp CNBM, ma kkooperax. Għalhekk ma kienx possibbli li jiġi stabbilit marġni medju ponderat tad-dumping għall-produtturi esportaturi li kkooperaw li ma kinux inklużi fil-kampjun skont l-Artikolu 9(6) tar-Regolament bażiku. Għalhekk, il-marġni tad-dumping għall-produtturi esportaturi l-oħra kollha li kkooperaw u li ma ntgħażlux fil-kampjun kien stabbilit fl-istess livell tal-marġni tad-dumping tal-uniku grupp ta’ produtturi esportaturi inklużi fil-kampjun li kkooperaw (Grupp Yuntianhua).

(289)

Għall-produtturi esportaturi potenzjali l-oħrajn kollha fir-RPĊ, il-Kummissjoni stabbilixxiet il-marġini tad-dumping fuq il-bażi tal-fatti disponibbli skont l-Artikolu 18 tar-Regolament bażiku. Fid-dawl tal-kooperazzjoni għolja tal-produtturi esportaturi, li tkopri t-totalità tal-esportazzjonijiet tal-GFF mir-RPĊ lejn l-Unjoni abbażi tal-istatistika ta’ importazzjoni tal-Eurostat, il-Kummissjoni kkunsidrat l-ogħla marġni tad-dumping tal-produtturi/gruppi ta’ produtturi esportaturi fil-kampjun, jiġifieri l-grupp CNBM, li għandu jkun rappreżentattiv biex jiġi stabbilit il-livell tal-marġni tad-dumping residwu.

(290)

Il-marġnijiet tad-dumping definittivi, mogħtija bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(291)

L-investigazzjoni żvelat li kien hemm grupp wieħed ta’ produtturi esportaturi fl-Eġittu li jirrappreżentaw 100 % tal-esportazzjonijiet matul il-perjodu ta’ investigazzjoni. Din kienet tikkonsisti f’żewġ produtturi esportaturi relatati: Jushi Egypt for Fiberglass Industry S.A.E (Jushi Egypt) u Hengshi Egypt Fiberglass Fabrics S.A.E. (“Hengshi Egypt”). Iż-żewġ kumpaniji huma parti mill-grupp CNBM u kkooperaw fl-investigazzjoni.

(292)

L-ilmentatur iddikjara li l-valur normali għall-Eġittu jenħtieġ li jinbena abbażi tal-kostijiet tal-produzzjoni u l-bejgħ li jirriflettu prezzijiet jew parametri referenzjarji mingħajr distorsjoni skont l-Artikolu 2(6a)(a) tar-Regolament bażiku. Huwa allega li kien hemm distorsjonijiet sinifikanti skont l-Artikolu 2(6a)(b) ta’ dak ir-Regolament għar-raġunijiet li ġejjin: il-produtturi esportaturi kienu jinsabu f’żona ekonomika speċjali stabbilita taħt ftehim formali bejn il-gvernijiet taċ-Ċina u tal-Eġittu, amministrati u kkontrollati minn aġenzija tal-gvern Ċiniż (China-Africa TEDA Investment Co. Ltd). Barra minn hekk, skont l-ilmentatur, iż-żewġ produtturi esportaturi fl-Eġittu rċevew sussidji sostanzjali mill-gvern bis-saħħa tal-istabbiliment tagħhom f’din iż-żona ekonomika speċjali.

(293)

Bi tweġiba għal din it-talba, iż-żewġ produtturi esportaturi ddikjaraw li l-allegazzjonijiet ta’ distorsjonijiet tas-suq fl-Eġittu ma kinux sottomessi skont ir-rekwiżiti tar-Regolament bażiku u, jekk aċċettati, ikunu jiksru d-drittijiet tad-difiża tal-produtturi esportaturi. B’mod aktar speċifiku, il-produtturi esportaturi argumentaw li l-ilment ma għamel l-ebda allegazzjoni u ma ppreżenta l-ebda evidenza li tissuġġerixxi li l-ekonomija Eġizzjana hija affettwata minn distorsjonijiet sinifikanti skont it-tifsira tal-Artikolu 2(6a). Il-produtturi esportaturi ddikjaraw ukoll li, fi kwalunkwe każ, l-allegazzjonijiet ma kinux biżżejjed biex jissodisfaw l-istandard meħtieġ ta’ prova stabbilit biex tiġi stabbilita l-eżistenza ta’ distorsjonijiet sinifikanti fir-Regolament bażiku.

(294)

Kif jirriżulta mill-Artikolu 2(6a)(d) u (e) tar-Regolament bażiku, kwalunkwe evidenza dwar l-eżistenza ta’ distorsjonijiet sinifikanti fil-pajjiż esportatur jenħtieġ li tiġi sottomessa mill-ilmentatur meta jippreżenta l-ilment. Imbagħad il-Kummissjoni tkun tista’ tivvaluta jekk l-evidenza mressqa hijiex fil-fatt biżżejjed biex tiġġustifika l-valutazzjoni tal-allegazzjoni ta’ distorsjonijiet sinifikanti u biex tasal għall-konklużjonijiet xierqa matul l-investigazzjoni.

(295)

Madankollu, id-dikjarazzjoni dwar l-eżistenza ta’ distorsjonijiet sinifikanti fl-Eġittu ġiet sottomessa biss diversi xhur wara l-pubblikazzjoni tan-Notifika ta’ Bidu, meta l-iskadenza għat-tweġiba għall-kwestjonarji għall-partijiet interessati kienet skadiet u l-ġbir tad-data kien fi stadju avvanzat.

(296)

Bħala konklużjoni, it-talba għall-applikazzjoni tal-metodoloġija għall-bini tal-valur normali skont l-Artikolu 2(6a) tar-Regolament bażiku għall-Eġittu ġiet irrifjutata.

(297)

Il-Kummissjoni l-ewwel eżaminat jekk il-volum totali ta’ bejgħ domestiku ta’ kull produttur esportatur li kkoopera kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku jitqies rappreżentattiv jekk il-volum totali tal-bejgħ domestiku tal-prodott simili lil klijenti indipendenti fis-suq domestiku għal kull produttur esportatur ikun jirrappreżenta mill-inqas 5 % tal-volum tal-bejgħ totali tiegħu għall-esportazzjoni tal-prodott ikkonċernat lejn l-Unjoni matul il-perjodu ta’ investigazzjoni.

(298)

Fuq dik il-bażi, il-Kummissjoni stabbiliet li l-bejgħ totali minn Jushi Egypt tal-prodott simili fis-suq dometstiku kien rappreżentattiv. Il-produttur esportatur l-ieħor, Hengshi Egypt ma kellu l-ebda bejgħ domestiku.

(299)

Il-Kummissjoni sussegwentement identifikat għall-produttur esportatur b’bejgħ domestiku rappreżentattiv b’mod ġenerali (Jushi Egypt) dawk it-tipi ta’ prodott mibjugħa domestikament li kienu identiċi jew simili ħafna għat-tipi ta’ prodott mibjugħa għall-esportazzjoni lejn l-Unjoni.

(300)

Il-Kummissjoni mbagħad eżaminat jekk il-bejgħ domestiku ta’ dak il-produttur esportatur fis-suq domestiku tiegħu għal kull tip ta’ prodott li huwa identiku jew komparabbli ma’ tip ta’ prodott mibjugħ għall-esportazzjoni lill-Unjoni kienx rappreżentattiv, skont l-Artikolu 2(2) tar-Regolament bażiku. Il-bejgħ domestiku ta’ tip ta’ prodott huwa rappreżentattiv jekk il-volum totali tal-bejgħ domestiku ta’ dak it-tip ta’ prodott lil konsumaturi indipendenti matul il-perjodu ta’ investigazzjoni jirrappreżenta mill-inqas 5 % tal-volum totali tal-bejgħ b’esportazzjoni tal-prodott identiku jew komparabbli lejn l-Unjoni.

(301)

Imbagħad, il-Kummissjoni ddefinixxiet il-proporzjon tal-bejgħ bi profitt ta’ Jushi Egypt lill-konsumaturi indipendenti fis-suq domestiku għal kull tip ta’ prodott matul il-perjodu ta’ investigazzjoni biex tiddeċiedi jekk tużax il-bejgħ domestiku reali għall-kalkolu tal-valur normali, skont l-Artikolu 2(4) tar-Regolament bażiku.

(302)

Il-valur normali kien ibbażat fuq il-prezz domestiku effettiv skont it-tip ta’ prodott, irrispettivament minn jekk dak il-bejgħ kienx profittabbli jew le, meta:

(303)

Il-valur normali huwa l-prezz domestiku effettiv għal kull tip ta’ prodott tal-bejgħ domestiku bi profitt tat-tipi ta’ prodotti biss matul il-perjodu ta’ investigazzjoni, jekk:

(304)

Għal dawk it-tipi ta’ prodott li ma kellhom ebda bejgħ tal-prodott simili fis-suq domestiku, il-Kummissjoni bniet il-valur normali f’konformità mal-Artikolu 2(3) u (6) tar-Regolament bażiku.

(305)

Il-valur normali nbena billi ingħadd dan li ġej mal-kost medju tal-manifattura tal-prodott simili tal-produtturi esportaturi matul il-perjodu ta’ investigazzjoni:

(306)

Il-Kummissjoni oriġinarjament stabbiliet li, għal Jushi Egypt, f’każ ta’ ħames tipi ta’ prodotti minn tmienja, it-tipi ta’ prodotti esportati kienu identiċi jew simili ħafna għat-tipi ta’ prodotti mibjugħa fi kwantitajiet rappreżentattivi fis-suq domestiku.

(307)

Wara r-rivelazzjoni finali, Jushi Egypt oġġezzjonat għall-mod kif il-Kummissjoni kienet ikkunsidrat tipi differenti ta’ klijenti fit-tqabbil bejn il-valur normali u l-prezz tal-esportazzjoni. Wara analiżi ulterjuri, il-Kummissjoni kkonfermat li ma kienx hemm differenza konsistenti u distinta fil-funzjonijiet tal-bejjiegħ għad-diversi livelli ta’ kummerċ fis-suq domestiku Eġizzjan li jiġġustifikaw distinzjoni fit-tip ta’ klijent. B’riżultat ta’ dan, hija aċċettat it-talba tal-kumpanija u kkalkulat mill-ġdid il-marġnijiet tagħha mingħajr ma għamlet distinzjoni bejn it-tipi ta’ klijenti. Konsegwentement, il-Kummissjoni rrevediet ukoll il-valur normali maħdum ta’ Hengshi Egypt.

(308)

L-analiżi tal-bejgħ domestiku ta’ Jushi Egypt għal kull tip ta’ prodott (b’bejgħ rappreżentattiv) kompliet turi li aktar minn 80 % tal-bejgħ domestiku kollu ħalla profitt u li l-prezz tal-bejgħ medju ponderat kien ogħla mill-kost tal-produzzjoni. Għaldaqstant, il-valur normali għal dawn it-tipi ta’ prodott kien ikkalkolat bħala medja ponderata tal-prezzijiet tal-bejgħ domestiku kollu matul il-perjodu ta’ investigazzjoni. Għat-tip ta’ prodott pendenti mingħajr bejgħ domestiku, il-valur normali nbena skont l-Artikolu 2(3) u (6) tar-Regolament bażiku kif deskritt hawn fuq fil-premessa (305).

(309)

It-tieni produttur esportatur, Hengshi Egypt biegħ il-produzzjoni tal-GFF tiegħu esklussivament għall-esportazzjoni u, għalhekk, ma kellu l-ebda bejgħ domestiku. Għalhekk, billi ma kien hemm ebda bejgħ ta’ prodott simili fis-suq domestiku, il-Kummissjoni bniet il-valur normali skont l-Artikolu 2(3) u l-Artikolu 2(6) tar-Regolament bażiku.

(310)

Matul il-perjodu ta’ investigazzjoni, Hengshi Egypt xtrat il-materja prima ewlenija (GFR) użata fil-produzzjoni tal-GFF minn Jushi Egypt u minn fornitur relatat ieħor.

(311)

F’dan il-kuntest, il-produtturi esportaturi ddikjaraw li fid-dawl tal-profitt miksub minn Jushi Egypt mill-bejgħ tagħha ta’ GFR lil Hengshi Egypt, it-tranżazzjonijiet jenħtieġ li jiġu kkunsidrati bħala li jsiru skont il-prezzijiet tas-suq. Il-produtturi rreferew ukoll għall-ġurisprudenza eżistenti, (94) li abbażi tagħha l-użu tad-data inkluża fir-rekords tal-kumpanija li qed tiġi investigata tikkostitwixxi r-regola, u l-adattament jew is-sostituzzjoni ta’ dik id-data huma l-eċċezzjoni. Huma rreferew ukoll għan-nuqqas ta’ miżuri governattivi distortivi, għall-fatt li l-kostijiet tal-produzzjoni kienu riflessi b’mod korrett fir-rekords ta’ Hengshi Egypt u li dawn ir-rekords jenħtieġ li jintużaw sabiex jiġu stabbiliti l-kost tal-produzzjoni u l-valur normali mibni sussegwenti ta’ Hengshi Egypt.

(312)

Għall-kuntrarju ta’ dak li jargumentaw il-produtturi esportaturi, ul-prezzijiet li bihom Hengshi Egypt xtrat GFR mingħand jushi Egypt instabu li ma kinux isiru f’kondizzjonijiet ta’ kompetizzjoni ġusta minħabba li kienu konsistentement u sostanzjalment anqas mill-prezzijiet mitluba minn Jushi Egypt lil klijenti indipendenti fis-suq domestiku Eġizzjan għall-istess prodott. Minħabba d-differenza sinifikanti bejn dawn il-prezzijiet, il-Kummissjoni kkonkludiet li l-prezzijiet imħallsa minn Hengshi Egypt lil Jushi Egypt ma setgħux jitqiesu bħala f’kondizzjonijiet ta’ kompetizzjoni ġusta. Minkejja l-fatt li dawk il-prezzijiet kienu profittabbli, dawn ma kinux jirriflettu l-prezzijiet tas-suq fl-Eġittu u, fin-nuqqas ta’ affiljazzjoni korporattiva, Hengshi Egypt kien ikollha tħallas prezz ħafna ogħla għal GFR. Barra minn hekk, ir-referenza għan-nuqqas ta’ miżura governattiva distortiva fl-iffissar tal-prezzijiet tal-materja prima nstabet li hija irrilevanti peress li, hija l-analiżi distakkata li hija deċiżiva f’dan il-każ.

(313)

Fit-tweġiba tagħhom għar-rivelazzjoni finali, Jushi/Hengshi Egypt tennew l-affermazzjoni tagħhom li l-prezzijiet tal-GFR mitluba minn Jushi Egypt lil Hengshi Egypt kienu f’kondizzjonijiet ta’ kompetizzjoni ġusta, u argumentaw li l-bejgħ bejn il-partijiet relatati kellu marġnijiet ta’ profitt komparabbli mal-profitt fil-mira ddeterminat mill-ilmentatur fl-ilment bħala suffiċjenti biex “jopera b’mod sostenibbli fit-tul fis-suq”. Il-Kummissjoni tinnota li l-profitt fil-mira huwa l-profitt li l-industrija tal-Unjoni tista’ tikseb b’mod raġonevoli fis-suq tal-Unjoni fin-nuqqas ta’ importazzjonijiet li huma l-oġġett ta’ dumping u għalhekk mhuwiex parametru referenzjarju xieraq sabiex jiġi vvalutat jekk il-prezz miftiehem bejn il-partijiet relatati huwiex skont il-prinċipju ta’ kompetizzjoni ġusta. Il-kriterji rilevanti f’din il-valutazzjoni huma marbuta mal-livell tal-prezz li jista’ jinkiseb fl-Eġittu fin-nuqqas tar-relazzjoni. L-investigazzjoni wriet li l-livelli tal-prezzijiet (u tal-profitt) fis-suq Eġizzjan kienu tabilħaqq ogħla minn dak mitlub bejn dawn il-kumpaniji relatati.

(314)

Minħabba dak li ntqal hawn fuq u għar-raġunijiet spjegati fil-premessa (312), l-affermazzjoni li l-prezzijiet kienu f’kondizzjonijiet ta’ kompetizzjoni ġusta ġiet irrifjutata.

(315)

Jushi/Hengshi Egypt sostnew ukoll li l-metodoloġija tal-Kummissjoni kif deskritta fil-premessi minn (309) sa (311) tmur kontra l-Artikolu 2(5) tar-Regolament bażiku li għandu jiġi interpretat b’mod strett, filwaqt li tirreferi wkoll għall-ġurisprudenza tal-Qrati tal-UE u tad-WTO. Skont Jushi/Hengshi Egypt, il-prezz tax-xiri tal-GFR bejn Hengshi Egypt u Jushi Egypt ma jistax jiġi injorat sempliċement minħabba li ma jkunx f’kondizzjonijiet ta’ kompetizzjoni ġusta. Jushi/Hengshi Egypt sostnew li, barra minn hekk, il-Kummissjoni kellha turi sa liema punt ir-rekords ta’ Hengshi Egypt ma kinux jirriflettu b’mod raġonevoli l-kostijiet assoċjati mal-produzzjoni u l-bejgħ tal-GFF.

(316)

Il-Kummissjoni ma taqbilx ma’ din l-interpretazzjoni u tqis li l-ebda wieħed mill-każijiet ikkwotati minn Jushi/Hengshi Egypt ma jinvalida s-sejbiet tal-Kummissjoni f’dan il-każ. Fil-fatt, il-korpi tad-WTO (95) konsistentement iddeċidew li r-rekords tal-produtturi esportaturi jistgħu jinstabu li ma jirriflettux b’mod raġonevoli l-kostijiet assoċjati mal-produzzjoni u l-bejgħ tal-prodott ikkonsidrat fejn, pereżempju l-produttur ikun parti minn grupp ta’ kumpaniji (li huwa l-każ ta’ Jushi u Hengshi Egypt) u fejn it-tranżazzjonijiet li jinvolvu inputs assoċjati mal-produzzjoni u l-bejgħ tal-prodott ikkunsidrat ma jkunx f’kondizzjonijiet ta’ kompetizzjoni ġusta. Bħala konsegwenza, din l-allegazzjoni kellha tiġi rrifjutata.

(317)

Jushi/Hengshi Egypt iddikjaraw ukoll li, b’referenza għall-ġurisprudenza, (96) il-metodoloġija tal-Kummissjoni fil-valutazzjoni ta’ jekk il-prezz tax-xiri tal-GFR kienx f’kondizzjonijiet ta’ kompetizzjoni ġusta ma kinitx korretta. Jushi/Hengshi Egypt sostnew li l-Kummissjoni ma qabblitx prezzijiet komparabbli u li l-Kummissjoni kellha tqis il-fatturi rilevanti kollha relatati mal-bejgħ inkwistjoni, u b’mod aktar speċifiku: (i) termini tal-kunsenja; (ii) id-dazji doganali tal-importazzjoni fuq il-materja prima; (iii) kwantitajiet mhux komparabbli; (iv) il-politika li tistabbilixxi l-prezzijiet ta’ Jushi Egypt għal tranżazzjonijiet relatati.

(318)

Wara li analizzat l-elementi fil-fajl, il-Kummissjoni aċċettat it-talba għal aġġustament minħabba d-differenzi fit-termini ta’ konsenja u naqqset il-kostijiet tat-trasport mill-prezz tal-bejgħ tal-GFR fejn xieraq. Il-kostijiet tat-trasport ġew stmati abbażi tal-kost reali tat-trasport għall-GFF kif verifikat mill-Kummissjoni.

(319)

Wara r-rivelazzjoni finali addizzjonali Jushi/Hengshi Egypt affermaw li l-kostijiet tal-kreditu kellhom jitnaqqsu mill-kostijiet tat-trasport. Fir-rigward tal-allowance tal-kost tal-kreditu mitlub, tali kost imġarrab minn bejjiegħ huwa fil-fatt element intrinsiku tat-tranżazzjonijiet imwettqa f’suq miftuħ fuq il-bażi tal-kondizjonijiet ta’ kompetizzjoni ġusta. Għalhekk tali affermazzjoni għandha tiġi rrifjutata mill-Kummissjoni.

(320)

Fir-rigward tad-dazji fuq l-importazzjoni, mingħajr ma tittieħed pożizzjoni dwar jekk ikunx meħtieġ aġġustament f’din is-sitwazzjoni, ma hemm l-ebda evidenza fil-fajl li d-dazji tħallsu minn Jushi Egypt jew inġabru mill-awtoritajiet Eġizzjani. Il-kumpanija ma ppreżentat l-ebda evidenza fis-sottomissjoni tagħha li turi li hija ħallset dawk id-dazji u, fil-fatt, iddikjarat li d-dazju doganali jkun “normalment applikabbli” u “li Jushi Egypt għandha tħallas [dan]”. F’dak li għandu x’jaqsam mal-kwantitajiet, il-kumpaniji ma setgħux jipprovdu xi evidenza ta’ politika ta’ skont applikata b’mod ġenerali li tkun tista’ ssostni l-asserzjoni tagħhom li d-differenza fil-prezzijiet misjuba bejn il-partijiet relatati u dawk mhux relatati kienet dovuta għal skontijiet ta’ kwantità. Fil-fatt, l-uniku dokument ipprovdut mill-kumpanija jispjega li l-prezz mitlub mill-Jushi Egypt lil Hengshi Egypt huwa bbażat fuq il-prezz medju mitlub minn Jushi Egypt għall-klijenti mhux relatati fis-sena ta’ qabel, miżjud b’perċentwali partikolari skont it-tip ta’ faxxa tal-fibra. Ir-realtà tas-suq u differenzi konsiderevoli fil-prezzijiet lil Hengshi Egypt u klijent mhux relatati rispettivament juru, madankollu, li Jushi Egypt naqset milli timplimenta l-politika ta’ ffissar tal-prezzijiet imsemmija hawn fuq. Konsegwentement, il-politika tal-iffissar tal-prezzijiet ta’ Jushi Egypt ma tirriflettix il-prezz reali mħallas mill-parti relatata (Hengshi Egypt). Għalhekk, l-affermazzjonijiet li l-prezzijiet tal-bejgħ tal-GFR għandhom jiġu aġġustati b’dawn l-elementi ġew irrifjutati.

(321)

Bl-istess mod, wara r-rivelazzjoni finali, il-Gvern tal-Eġittu qal li meta jiġi kkunsidrat jekk ir-rekords tal-esportaturi humiex f’kondizzjonijiet ta’ kompetizzjoni ġusta, il-prezz huwa biss wieħed mit-termini u l-kondizzjonijiet ta’ tranżazzjoni u li r-rivelazzjoni finali ma kienx fiha xi evidenza li l-Kummissjoni kkunsidrat dawk it-termini u l-kondizzjonijiet l-oħra tat-tranżazzjonijiet inkwistjoni. Il-Gvern tal-Eġittu sostna wkoll li l-Kummissjoni aġixxiet b’mod inkonsistenti mal-ewwel sentenza tal-Artikolu 2.2.1.1 tal-Ftehim dwar l-anti-dumping tad-WTO billi injorat data dwar il-kost li kienet tissodisfa ż-żewġ rekwiżiti stabbiliti fid-dispożizzjoni ta’ dak l-Artikolu, jiġifieri, “f’konformità mal-prinċipji tal-kontabbiltà ġeneralment aċċettati” u “raġonevolment tirrifletti l-kostijiet”.

(322)

Kif imsemmi fil-premessi (318) u (319), il-Kummissjoni għamlet aġġustament għall-kost tat-trasport. Madankollu, abbażi tal-fatti ta’ dan il-każ, hija stabbiliet li l-ebda aġġustament ma kien ġustifikat għal elementi oħra u, għalhekk, irrilevanti għall-valutazzjoni ta’ jekk il-prezzijiet kinux f’kondizzjonijiet ta’ kompetizzjoni ġusta. Barra minn hekk, kif stabbilit fil-premessa (312), il-Kummissjoni sabet li l-prezzijiet li bihom Hengshi Egypt xtrat il-GFR minn Jushi Egypt kienu b’mod konsistent u sostanzjali taħt il-prezzijiet mitluba minn Jushi Egypt lil klijenti indipendenti fis-suq domestiku Eġizzjan għall-istess prodott, anke wara l-aġġustamenti meħtieġa. Minħabba d-differenza sinifikanti bejn dawn il-prezzijiet, il-Kummissjoni kkonkludiet li ma setgħux jitqiesu bħala f’kondizzjonijiet ta’ kompetizzjoni ġusta. Bħala konsegwenza, il-Kummissjoni kkonkludiet li ma kinux raġonevolment jirriflettu l-kostijiet assoċjati mal-produzzjoni u l-bejgħ tal-prodott ikkunsidrat skont l-Artikolu 2(5) tar-Regolament bażiku li għandu l-istess kliem bħall-Artikolu 2.2.1.1. tal-Ftehim dwar l-Anti-dumping tad-WTO. Għaldaqstant, iż-żewġ argumenti ġew irrifjutati.

(323)

Barra minn hekk, Jushi/Hengshi Egypt sostnew li meta jitqiesu l-kodiċijiet tal-prodott interni tal-kumpanija għall-GFR, ir-riżultat tat-tqabbil bejn il-kwantitajiet mibjugħa lil klijenti relatati u mhux relatati fis-suq domestiku ma jkunx rappreżentattiv. Jushi/Hengshi Egypt minflok ipproponew tqabbil ibbażat fuq l-istruttura tal-PCN (Numru ta’ Kontroll tal-Prodott) stabbilita mill-Kummissjoni f’investigazzjoni anti-dumping oħra li tkopri prodotti tal-fibra tal-ħġieġ bil-filament kontinwu li joriġinaw fil-Bahrain u fl-Eġittu (97). Il-kumpaniji sostnew li dan l-approċċ iwassal għal riżultat aktar rappreżentattiv. Huma argumentaw ukoll li peress li l-PCNs tqiesu adegwati biex jitqabblu l-prezzijiet għall-fini tal-kalkoli tal-marġini tad-dumping u tad-dannu, dawn għandhom jitqiesu wkoll bħala xierqa biex jitqabblu l-prezzijiet tal-GFR mitluba minn Jushi Egypt lil Hengshi Egypt minn naħa waħda u lil konsumaturi mhux relatati fis-suq domestiku min-naħa l-oħra.

(324)

L-approċċ applikat mill-Kummissjoni ppermetta li jitqabbel il-bejgħ lil Hengshi Egypt ma’ dak lil partijiet mhux relatati abbażi ta’ kodiċijiet ta’ prodotti interni li jaqblu b’mod preċiż, li ppermetta tqabbil preċiż tat-tipi ta’ prodotti rilevanti mibjugħa liż-żewġ tipi ta’ klijenti. Jushi/Hengshi Egypt naqsu milli juru kif tqabbil skont il-PCNs maħluqa għal skop differenti jrendi tqabbil aktar xieraq minn dak li jirriżulta mit-tqabbil tal-prezzijiet tal-istess prodott eżatt. Il-Kummissjoni fil-fatt ikkonkludiet li l-approċċ alternattiv issuġġerit mill-Jushi/Hengshi Egypt jwassal għal riżultat inqas preċiż u rrifjutat it-talba.

(325)

Konsegwentement, il-Kummissjoni kkonfermat is-sejba li l-kostijiet tal-GFR kif irreġistrati fil-kontijiet tal-kumpanija ma kinux jirriflettu b’mod raġonevoli l-kostijiet ta’ Hengshi Egypt assoċjati mal-produzzjoni tal-GFF. Għalhekk, meta nħadem il-valur normali, dawn il-kostijiet kellhom jiġu aġġustati għal-livell tal-prezzijiet mitluba lil klijenti mhux relatati fis-suq domestiku, f’konformità mal-Artikolu 2(5) tar-Regolament bażiku.

(326)

Kif imsemmi fil-premessa (548), fl-10 ta’ Frar 2020, il-Kummissjoni ħarġet rivelazzjoni finali addizzjonali u stiednet lill-kumpaniji biex jikkummentaw dwar il-kontenut ta’ din l-informazzjoni addizzjonali. Jushi/Hengshi ssottomettew kummenti fit-13 ta’ Frar 2020, li madankollu ma kinux relatati mal-kontenut tar-rivelazzjoni finali addizzjonali. Minflok, il-kumpaniji tennew mill-ġdid l-oppożizzjoni tagħhom għall-metodoloġija tal-Kummissjoni meta ħadmet il-valur normali ta’ Hengshi, speċifikament l-affermazzjonijiet li ma ġewx aċċettati mill-Kummissjoni.

(327)

Il-Kummissjoni tenfasizza li din is-sottomissjoni, li kienet tirreferi għall-informazzjoni pprovduta lill-kumpanija fid-dokument ta’ rivelazzjoni ġenerali, ġiet wara l-iskadenza għall-kummenti għar-rivelazzjoni finali (jiġifieri, id-9 ta’ Jannar 2020). Fi kwalunkwe każ, il-Kummissjoni ddeċidiet li tindirizzahom f’dan ir-Regolament.

(328)

L-ewwel nett, Jushi/Hengshi sostnew li huma jiffurmaw entità ekonomika waħda minħabba li l-prodotti li jipproduċu ma jikkoinċidux u li jinsabu fl-istess żona. It-tieni, huma sostnew li l-Kummissjoni qiegħda tikser l-Artikolu 2(5) tar-Regolament bażiku minħabba li dan l-artikolu ma jippermettix li l-Kummissjoni twettaq test għal kondizzjonijiet ta’ kompetizzjoni ġusta. Huma rreferew għal diversi panels u rapporti tal-Korp tal-Appell li allegatament jappoġġaw din id-dikjarazzjoni. Waqt seduta, ir-rappreżentanti tal-kumpanniji ddikjaraw li l-profitti ma setgħux jitqiesu bħala kost. Fl-aħħar nett, huma tennew id-dikjarazzjonijiet tagħhom li bl-użu tal-prezz tas-suq għall-GRF fl-Eġittu (ibbażat fuq il-bejgħ mhux relatat minn Jushi fis-suq Eġizzjan), il-Kummissjoni rduppjat l-SG&A u l-profitt għal GFR.

(329)

Fir-rigward tal-ewwel talba, il-Kummissjoni tista’ biss tikkunsidra kumpaniji bħala entità ekonomika waħda meta l-informazzjoni fil-fajl turi li huma joperaw flimkien fl-aspetti kollha. Fin-nuqqas ta’ elementi oħra, il-post u t-tipi ta’ produzzjoni mhumiex indikattivi li l-kumpaniji joperaw bħala entità ekonomika waħda. Għalhekk, il-Kummissjoni ssostni li, filwaqt li Jushi u Hengshi huma parti mill-istess grupp, l-evidenza fil-fajl turi li ż-żewġ entitajiet legali joperaw b’mod indipendenti u għalhekk ma jistgħux jitqiesu li jikkostitwixxu entità ekonomika waħda.

(330)

Fir-rigward tat-tieni talba, l-Artikolu 2(5) tar-Regolament bażiku jistabbilixxi li, meta l-kostijiet assoċjati mal-produzzjoni u l-bejgħ tal-prodott investigat ma jkunux riflessi b’mod raġonevoli fir-reġistri tal-parti kkonċernata, dawn għandhom jiġu aġġustati. Il-Kummissjoni tqis li prezz ta’ trasferiment jista’ jitqies li ma jirriflettix il-kost assoċjat mal-produzzjoni tal-prodott li qed jiġi investigat meta ma jkunx f’kondizzjonijiet ta’ kompetizzjoni ġusta. Dan il-fehim ġie kkonfermat mill-Korp tal-Appell tad-WTO (98). Il-ġurisprudenza tad-WTO, li ttieħdet barra mill-kuntest minn Jushi/Hengshi fis-sottomissjoni tagħhom (99), fil-fatt tappoġġa l-interpretazzjoni tal-Kummissjoni f’dan il-każ. Tabilħaqq, f’dan il-kuntest, il-Korp tal-Appell ikkonferma li r-rekords li huma konsistenti mal-prinċipji tal-kontabbiltà ġeneralment aċċettati jistgħu madankollu jinstabu li ma jirriflettux b’mod raġonevoli l-kostijiet assoċjati mal-produzzjoni u l-bejgħ tal-prodott ikkunsidrat meta, pereżempju, l-esportatur jew il-produttur investigat huwa parti minn grupp ta’ kumpaniji li fih il-kostijiet ta’ ċerti inputs assoċjati mal-produzzjoni u l-bejgħ tal-prodott ikkunsidrat huma mifruxa fuq rekords ta’ kumpaniji differenti, jew fejn it-tranżazzjonijiet li jinvolvu inputs bħal dawn mhumiex f’kondizzjonijiet ta’ kompetizzjoni ġusta. Dan huwa preċiżament il-każ hawnhekk.

(331)

Dawn il-produtturi esportaturi jidhru wkoll li qed jifhmu ħażin il-kunċett ta’ kost fl-Artikolu 2(5) tar-Regolament bażiku. Dan jirreferi għall-kost għall-produttur tal-prodott investigat (u mhux għall-produttur tal-input). Mill-perspettiva ta’ xerrej, il-profitt tal-bejjiegħ huwa kost, inkorporata fil-prezz imħallas għal input. Il-Kummissjoni vvalutat b’mod korrett jekk ir-rekords ta’ Hengshi kinux jirriflettu b’mod raġonevoli l-kostijiet assoċjati mal-produzzjoni tal-GFF u sabet li l-prezzijiet ta’ trasferiment għal xiri ta’ GFR kienu mnaqqsa b’mod sostanzjali fir-rigward tal-prezz tas-suq għall-istess tipi ta’ prodott fl-Eġittu, jiġifieri, ma kinux f’kondizzjonijiet ta’ kompetizzjoni ġusta. B’riżultat ta’ dan, hija aġġustat il-kost tal-GFR fuq il-bażi tal-prezzijiet mitluba minn Jushi lil kumpaniji mhux relatati fis-suq Eġizzjan.

(332)

Fl-aħħar nett, id-dikjarazzjoni dwar l-għadd doppju hija indirizzata b’mod sħiħ fil-premessi minn (337) sa (345) ta’ dan ir-Regolament.

(333)

Fir-rigward tax-xiri ta’ GFR mill-fornitur relatat l-ieħor, dan il-fornitur ma biegħx GFR lill-klijenti indipendenti fl-Eġittu. Għalhekk, il-Kummissjoni qabblet il-prezzijiet tax-xiri ta’ GFR minn dan il-fornitur mal-prezzijiet ta’ Jushi Egypt lil partijiet mhux relatati fis-suq domestiku. B’riżultat ta’ dan, il-prezzijiet għax-xiri ta’ GFR minn Hengshi Egypt mill-fornitur relatat l-ieħor instabu li kienu konsistenti mal-prezzijiet prevalenti fis-suq miftuħ domestiku Eġizzjan u, għalhekk, dan ix-xiri ta’ GFR instab li sar skont f’kondizzjonijiet ta’ kompetizzjoni ġusta.

(334)

Rigward l-ammonti għall-SG&A u l-profitt, billi Hengshi Egypt ma kellha l-ebda bejgħ domestiku, l-ammonti għall-SG&A u l-profitt kienu bbażati fuq bejgħ domestiku tal-prodott simili, fil-perkors normali tan-negozju u oriġinarjament fl-istess livell ta’ negozju (jiġifieri għall-utenti aħħara biss), matul il-perjodu ta’ investigazzjoni magħmul minn Jushi Egypt, il-produttur esportatur l-ieħor fl-Eġittu.

(335)

Wara r-rivelazzjoni finali, Jushi/Hengshi Egypt sostnew li l-approċċ tal-Kummissjoni li tapplika l-SG&A u l-profitt għall-bejgħ ta’ Jushi Egypt għalll-utenti finali għall-fini li jinħadem il-valur normali ta’ Hengshi Egypt biss mhuwiex konformi mal-Artikolu 2(6) tar-Regolament bażiku u mhuwiex appoġġat minn xi kunsiderazzjoni fattwali. Kif imsemmi fil-premessa (306), fil-fatt ma kienx hemm evidenza ta’ differenza konsistenti u distinta fil-funzjonijiet tal-bejjiegħ għad-diversi livelli ta’ kummerċ fis-suq domestiku Eġizzjan li jiġġustifikaw distinzjoni fit-tip ta’ klijent. B’riżultat ta’ dan, il-bejgħ domestiku ta’ Jushi Egypt għall-istazzjonijiet kollha tal-bejgħ fl-andament ordinarju tal-kummerċ jikkostitwixxi bażi għall-SG&A u l-profitt li għandu jintuża meta jinbena l-valur normali għal Hengshi Egypt.

(336)

Hengshi Egypt iddikjarat li l-profitt magħmul minn Jushi Egypt fuq il-bejgħ tagħha ta’ GFR jenħtieġ li jitnaqqas meta jinbena l-valur normali għal Hengshi Egypt. Hija bbażat id-dikjarazzjoni tagħha fuq il-fatt li (i) il-kumpaniji fformaw entità ekonomika waħda, u (ii) l-inklużjoni tal-profitt miksub minn Jushi Egypt, meta jinbena l-valur normali u meta jiġu kkalkolati l-kostijiet tal-produzzjoni, tkun twassal għal sitwazzjoni ta’ għadd doppju.

(337)

Il-Kummissjoni tqis li ż-żewġ produtturi esportaturi Eġizzjani ma jifformawx entità ekonomika waħda (għalkemm huma parti mill-istess grupp korporattiv, il-grupp CNBM) peress li huma entitajiet separati b’personalitajiet ġuridiċi distinti u operazzjonijiet indipendenti ta’ produzzjoni u bejgħ.

(338)

Barra minn hekk, meta inbena l-valur normali, il-kostijiet tal-produzzjoni ta’ Hengshi Egypt ġew aġġustati skont l-Artikolu 2(5) tar-Regolament bażiku sabiex jiġu riflessi l-prezzijiet prevalenti tas-suq li jkunu f’kondizzjonijiet normali tas-suq (għalhekk jiġi injorat il-bejgħ ta’ GFR bejn partijiet relatati). Barra minn hekk, skont l-Artikolu 2(6) ta’ dak ir-Regolament, il-marġni ta’ profitt użat għall-bini tal-valur normali huwa bbażat fuq il-bejgħ domestiku tal-prodott simili (jiġifieri GFF, u mhux GFR) lil klijenti indipendenti fil-perkors ordinarju tan-negozju. Dak il-marġni ta’ profitt jirrifletti wkoll il-livell ta’ profitt li normalment ikun jista’ jinkiseb minn produttur mill-bejgħ tal-GFF fis-suq Eġizzjan. Għaldaqstant, l-affermazzjoni deskritta fil-premessa preċedenti ġiet irrifjutata.

(339)

Wara r-rivelazzjoni finali, Jushi/Hengshi Egypt tennew id-dikjarazzjoni li l-valur normali maħdum ta’ Hengshi Egypt kien minfuħ artifiċjalment b’riżultat tal-għadd doppju tal-SG&A u l-profitt fuq il-bejgħ tal-GFR ta’ Jushi Egypt. Il-kumpaniji rreferew għal żewġ investigazzjonijiet anti-dumping preċedenti fejn il-Kummissjoni naqqset l-ispejjeż SG&A mill-bejgħ ta’ prodotti nofshom lesti f’każ minnhom, u l-ispejjeż SG&A minn bejgħ minn fornitur ta’ materja prima fil-każ l-ieħor (100) waqt li affermaw li ċ-ċirkustanzi f’dawk il-każijiet kienu komparabbli ma’ dawk fl-investigazzjoni preżenti. Għalhekk, il-kumpaniji argumentaw li l-Kummissjoni, f’konformità ma’ dawn il-każijiet preċedenti, għandha tnaqqas l-ispejjeż SG&A u l-profitt ta’ Jushi Egypt għall-bejgħ tal-GFR mill-SG&A u l-profitt użati biex jinħadem il-valur normali tal-GFF ta’ Hengshi Egypt.

(340)

Iċ-ċirkostanzi tal-każijiet li għalihom irreferew Jushi/Hengshi Egypt, madankollu, huma differenti minn dawk fl-investigazzjoni kurrenti. F’każ wieħed, il-kwistjoni ma tqajmitx meta kien qed jinħadem il-valur normali skont l-Artikolu 2(6) tar-Regolament bażiku iżda meta kien qed jiġi ddeterminat jekk il-bejgħ domestiku sarx fl-andament normali tal-kummerċ abbażi tal-kost sħiħ tal-kumpanija inkwistjoni. F’dak il-każ il-kumpaniji relatati kkonċernati, it-tnejn li huma biegħu l-prodott investigat fis-suq domestiku u għalhekk l-SG&A taż-żewġ kumpaniji kienu relatati mal-bejgħ tal-prodott investigat, li mhuwiex il-każ fl-investigazzjoni attwali.

(341)

F’din l-investigazzjoni, il-prezz tal-GFR fis-suq ħieles intuża għall-kalkolu tal-kost tal-manifattura tal-GFF ta’ Hengshi Egypt. Dan il-prezz kien jinkludi l-SG&A u l-profitt (tal-bejgħ tal-GFR) u rriżulta fil-kost sħiħ tal-manifattura tal-GFF għal Hengshi Egypt. Madankollu, ma kien jinkludi l-ebda SG&A u profitt għall-bejgħ domestiku tal-GFF ta’ Hengshi Egypt peress li l-kumpanija ma kellha l-ebda bejgħ tal-GFF fis-suq domestiku. Sabiex jiġi ddeterminat il-valur normali, ġie miżjud ammont raġonevoli ta’ SG&A u profitt mal-kost tal-manifattura skont l-Artikolu 2(6) tar-Regolament bażiku. Dan l-ammont raġonevoli rrifletta l-SG&A u l-profitt miksuba għall-bejgħ domestiku tal-GFF fis-suq Eġizzjan.

(342)

F’dak li għandu x’jaqsam mat-tieni investigazzjoni msemmija mill-Jushi/Hengshi Egypt, l-affermazzjoni li tqajmet mill-produtturi esportaturi kkonċernati, jiġifieri t-tnaqqis tal-SG&A mill-fornituri tal-materja prima mill-kost tal-produzzjoni tal-produttur esportatur ġiet irrifjutata abbażi tar-raġunijiet li “kull xirja ta’ materja prima tinkludi xi kostijiet SG&A fil-prezz imħallas, iżda dawn huma kostijiet tal-fornitur, u mhux l-SG&A tal-esportatur inkwistjoni.” L-istess kien japplika għall-każ preżenti.

(343)

Meta jitqies dak li ntqal hawn fuq, dawn il-preċedenti ma jistgħux jitqiesu bħala appoġġ għall-affermazzjoni tal-produtturi esportaturi li l-każ kurrenti mhuwiex konformi ma’ investigazzjonijiet preċedenti.

(344)

Jushi/Hengshi Egypt argumentaw ukoll li Jushi Egypt hija produttur integrat li jipproduċi GFR biex ikun ipproċessat aktar għal GFF u li għalhekk il-bejgħ tagħha tal-GFF jinkludi wkoll l-SG&A u l-profitt li għandhom x’jaqsmu mal-produzzjoni tal-GFR. Għalhekk, Jushi/Hengshi Egypt ddikjaraw li l-SG&A u l-profitt li allegatament huma relatati mal-GFR għandhom jitnaqqsu mill-SG&A u l-profitt ta’ Jushi Egypt għall-bejgħ tal-GFF li għandhom jiżdiedu mal-kost tal-manifattura tal-GFF ta’ Hengshi Egypt meta jinħadem il-valur normali f’konformità mal-Artikolu 2(6) tar-Regolament bażiku. Wara r-rivelazzjoni finali, tressaq argument simili wkoll mill-Gvern tal-Eġittu.

(345)

Il-Kummissjoni tinnota li kwalunkwe allokazzjoni ta’ profitt u SG&A mill-bejgħ tal-GFF għall-GFR tkun purament spekulattiva peress li l-profitt u l-SG&A jiġġarrbu mill-bejgħ tal-prodott li jirreferu għalih u ma jistgħux jiġu konnessi ma’ inputs upstream li jsiru minnhom. Għalhekk, l-SG&A u l-profitt allokati mill-kumpanija għall-bejgħ tal-GFF ma għandhomx jinkludu kostijiet relatati ma’ prodott ieħor. Barra minn hekk, fir-rekords kontabilistiċi tagħha, Jushi Egypt stess tagħmel distinzjoni ċara fid-dħul u l-ispejjeż imġarrba għal kull segment tal-operat fi ħdan il-kumpanija, jiġifieri l-GFF u prodotti oħra. Li kieku l-affermazzjoni tal-kumpaniji kienet vera, jitfa’ dubju fuq l-affidabbiltà tal-metodoloġija użata minn Jushi Egypt biex talloka l-kostijiet għall-prodott ikkonċernat għall-għan ta’ din l-investigazzjoni.

(346)

Għalhekk, l-affermazzjoni li l-SG&A u l-profitt ta’ Jushi Egypt relatati mal-GFF inkludew ukoll SG&A u profitt relatat mal-bejgħ tagħha tal-GFR u li konsegwentement l-SG&A u l-profitt tal-GFR kienu magħduda darbtejn meta nħadem il-valur normali skont l-Artikolu 2(6) tar-Regolament bażiku kienet fattwalment inkorretta u għalhekk ġiet irrifjutata.

(347)

Barra minn hekk, il-Gvern tal-Eġittu kkunsidra li l-mod kif inħadem il-valur normali għal Hengshi Egypt wassal għall-inflazzjoni tal-marġni ta’ dumping ikkalkulat għall-grupp. Skont il-Gvern tal-Eġittu, il-Kummissjoni qieset li ż-żewġ produtturi ma kinux jiffurmaw entità ekonomika waħda u, simultanjament injorat il-prezzijiet tal-bejgħ tal- GFR bejn iż-żewġ entitajiet fuq il-bażi li ż-żewġ entitajiet kienu relatati ma’ xulxin. F’dan ir-rigward huwa rrefera għall-prattika preċedenti fejn il-profitti bejn kumpaniji li jiffurmaw entità ekonomika waħda kienu tnaqqsu.

(348)

Madankollu, il-fatt li Jushi Egypt u Hengshi Egypt kienu jappartjenu għall-istess grupp ta’ kumpaniji u kienu relatati ma’ xulxin ma kienx jikkwalifikahom li jiffurmaw entità ekonomika waħda. Kif spjegat fil-premessa (329), iż-żewġ kumpaniji kienu entitajiet separati b’personalitajiet ġuridiċi distinti, operazzjonijiet indipendenti ta’ produzzjoni u ta’ bejgħ. Dawn il-fatti qatt ma ġew ikkontestati mill-kumpaniji kkonċernati. Għaldaqstant, din l-affermazzjoni ġiet irrifjutata.

(349)

Il-produtturi esportaturi li kkooperaw esportaw lejn l-Unjoni jew direttament lil klijenti indipendenti, permezz ta’ negozjanti relatati li jinsabu barra mill-Unjoni, jew permezz ta’ importaturi relatati li jinsabu fl-Unjoni.

(350)

Fil-każ li l-produtturi esportaturi esportaw il-prodott ikkonċernat direttament lill-klijenti indipendenti fl-Unjoni jew permezz ta’ kumpanija relatata li taġixxi bħala negozjant, il-prezz tal-esportazzjoni kien il-prezz li tħallas realment jew dak pagabbli għall-prodott ikkonċernat meta nbiegħ għall-esportazzjoni lejn l-Unjoni, f’konformità mal-Artikolu 2(8) tar-Regolament bażiku.

(351)

Jekk il-produtturi esportaturi esportaw il-prodott ikkonċernat lejn l-Unjoni permezz ta’ kumpaniji relatati li jaġixxu bħala importaturi, il-prezz tal-esportazzjoni ġie stabbilit fuq il-bażi tal-prezz li bih il-prodott importat reġa’ nbiegħ għall-ewwel darba lill-konsumaturi indipendenti fl-Unjoni, skont l-Artikolu 2(9) tar-Regolament bażiku. F’dak il-każ, l-aġġustamenti fil-prezz saru għall-kostijiet kollha mġarrba bejn l-importazzjoni u l-bejgħ mill-ġdid, inklużi l-ispejjeż SG&A tal-importaturi relatati li jinsabu fl-Unjoni, u profitt raġonevoli.

(352)

Negozjant wieħed biss mhux relatat ikkoopera fl-investigazzjoni. Billi dan kien jimporta biss kwantitajiet negliġibbli tal-GFF matul il-perjodu ta’ investigazzjoni, il-marġni ta’ profitt tiegħu ma kienx ikkunsidrat rappreżentattiv. Fin-nuqqas ta’ kwalunkwe informazzjoni oħra, il-marġni ta’ profitt ta’ negozjant indipendenti attiv fis-settur tal-GFF kien stmat li hu ta’ 5 %.

(353)

Il-Kummissjoni qabblet il-valur normali u l-prezz tal-esportazzjoni tal-produtturi esportaturi li kkooperaw fuq bażi ta’ prezz mill-fabbrika.

(354)

Fejn ġustifikat mill-ħtieġa li jkun żgurat paragun ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabilità tal-prezzijiet skont l-Artikolu 2(10) tar-Regolament bażiku. F’dan il-każ saru aġġustamenti għat-trasport, l-assigurazzjoni, l-immaniġġjar, it-tagħbija u l-kostijiet anċillari, il-kost tal-kreditu, u t-tariffi tal-bank.

(355)

Barra minn hekk, matul il-perjodu ta’ investigazzjoni, iż-żewġ produtturi li kkooperaw esportaw GFF lejn l-Unjoni permezz ta’ negozjanti relatati li jinsabu barra l-Unjoni, f’Hong Kong. In-negozjanti f’Hong Kong kienu qed ifittxu klijenti u kellhom kuntatt stabbilit magħhom. Huma ġarrew ukoll ir-responsabbiltà tal-proċess tal-bejgħ u rċivew mark-up għas-servizzi tagħhom. Għalhekk, il-Kummissjoni sabet li l-funzjonijiet ta’ dawn in-negozjanti kienu simili għal dawk ta’ aġent. Konsegwentement, sar ukoll aġġustament skont l-Artikolu 2(10)(i) għall-bejgħ permezz ta’ dawk il-kumpaniji kummerċjali relatati. L-aġġustament kien jikkonsisti mit-tnaqqis tal-SG&A ta’ dawk il-kumpaniji kummerċjali u profitt ta’ 5 %. Dan il-marġini ta’ profitt tqies raġonevoli fin-nuqqas ta’ kwalunkwe informazzjoni oħra.

(356)

Sabiex jiġi stabbilit il-marġni tad-dumping għaż-żewġ produtturi esportaturi li kkooperaw, il-Kummissjoni qabblet il-valur normali medju ponderat ta’ kull tip tal-prodott simili mal-prezz tal-esportazzjoni medju ponderat tat-tip korrispondenti tal-prodott ikkonċernat, fuq bażi ta’ prezz tal-fabbrika, skont l-Artikolu 2(11) u (12) tar-Regolament bażiku.

(357)

Peress li ż-żewġ produtturi li kkooperaw kienu relatati, ġie stabbilit marġni tad-dumping uniku bbażat fuq il-medja ponderata tal-marġnijiet tad-dumping individwali tagħhom.

(358)

Wara r-rivelazzjoni finali, il-Gvern tal-Eġittu kkontesta l-mod li bih il-Kummissjoni kkalkulat il-marġni ta’ dumping għall-grupp CNBM. Il-Gvern tal-Eġittu sostna li skont l-Artikolu 6.10 tal-Ftehim tad-WTO dwar l-Anti-dumping, il-marġnijiet individwali għandhom jiġu kkalkolati għal kull produttur esportatur individwali li jikkoopera f’investigazzjoni. F’dan ir-rigward, il-prezzijiet reali tal-bejgħ domestiku ta’ Jushi Egypt kellhom jintużaw bħala bażi ta’ valur normali għall-grupp kollu tas-CNBM u l-prezz medju ponderat tal-esportazzjoni ta’ Hengshi Egypt u Jushi Egypt.

(359)

Kif imsemmi fil-premessa (34), l-Artikolu 9(5) tar-Regolament bażiku jippermetti lill-Kummissjoni tistabbilixxi dazju anti-dumping individwali uniku meta jeżistu rabtiet korporattivi bejn produtturi esportaturi. Il-fatt li Jushi Egypt u Hengshi Egypt huma kumpaniji relatati ġie stabbilit matul din l-investigazzjoni u ma ġiex ikkontestat. Għalhekk, il-Kummissjoni ikkalkulat marġini individwali tad-dumping uniku għal CNBM f’konformità mal-Artikolu 9(5) tar-Regolament bażiku. Il-marġnijiet ta’ dumping individwali tal-kumpaniji kkonċernati jiffurmaw il-bażi għall-kalkolu ta’ marġni uniku tal-grupp. F’dan ir-rigward, il-valur normali u l-prezz tal-esportazzjoni għandhom jiġu stabbiliti għal kull kumpanija individwalment skont l-Artikolu 2 u 3 tar-Regolament bażiku. L-Artikolu 2 tar-Regolament bażiku jiddeskrivi l-metodoloġija biex jiġi stabbilit il-valur normali f’każ li l-prezzijiet tal-bejgħ domestiku ma jkunux rappreżentattivi, li ma jipprevedix li l-valur normali jkun sempliċiment ibbażat fuq il-prezzijiet tal-bejgħ domestiku ta’ kumpanija oħra. Bl-istess mod, l-Artikolu 3 tar-Regolament bażiku, lanqas ma jippermetti li l-marġni ta’ dumping jiġi kkalkulat fuq il-bażi tal-prezzijiet medji ponderati tal-esportazzjoni ta’ żewġ kumpaniji jew aktar. Għaldaqstant, l-affermazzjoni li saret f’dan ir-rigward ġiet irrifjutata.

(360)

Wara r-rivelazzjoni addizzjonali finali, il-Gvern tal-Eġittu osserva li l-Kummissjoni ma indirizzatx il-biċċa l-kbira tal-kummenti u l-argumenti pprovduti minn Hengshi/Jushi Egypt wara r-rivelazzjoni finali u sostniet li dawn għandhom jiġu kkunsidrati. Il-Kummissjoni tinnota li l-kummenti kollha pprovduti minn Hengshi/Jushi Egypt wara r-rivelazzjoni finali u r-rivelazzjoni finali addizzjonali huma indirizzati bis-sħiħ f’dan ir-Regolament fil-premessi preċedenti tiegħu. Kif imsemmi wkoll fil-premessa (548), ir-rivelazzjoni addizzjonali finali kienet limitata għal fatti u kunsiderazzjonijiet li fuq il-bażi tagħhom saru determinazzjonijiet finali, li nbidlu meta mqabbla mar-rivelazzjoni finali.

(361)

Il-livell ta’ kooperazzjoni f’dan il-każ huwa għoli peress li l-produtturi esportaturi li kkooperaw mal-investigazzjoni essenzjalment kienu jirrappreżentaw it-totalità tal-importazzjonijiet tal-prodott ikkonċernat lejn l-Unjoni matul il-perjodu ta’ investigazzjoni, ibbażat fuq l-istatistiki dwar l-importazzjoni rreġistrati fil-Eurostat. Abbażi ta’ dak, il-Kummissjoni ddeċidiet li tistabbilixxi l-marġni ta’ sussidju residwu fil-livell tal-marġini ta’ dumping individwali stabbilit għall-kumpaniji li kkooperaw.

(362)

Il-marġnijiet tad-dumping definittivi, mogħtija bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(363)

Il-prodott simili kien manifatturat minn 16-il produttur fl-Unjoni matul il-perjodu ta’ investigazzjoni. Dawn jikkostitwixxu l-“industrija tal-Unjoni” fis-sens tal-Artikolu 4(1) tar-Regolament bażiku.

(364)

Il-produzzjoni totali tal-Unjoni tal-GFF matul il-perjodu ta’ investigazzjoni kienet stabbilita għal kważi 115 000 tunnellata. Il-Kummissjoni stabbiliet iċ-ċifra abbażi tat-tweġiba verifikata għall-kwestjonarju tal-ilmentatur, li ġiet kontroverifikata u, fejn xieraq, aġġornata bit-tweġibiet verifikati għall-kwestjonarju tal-produtturi tal-Unjoni fil-kampjun. Kif indikat fil-premessa (12), il-kampjun kien magħmul minn erba’ produtturi tal-Unjoni li kienu jirrappreżentaw aktar minn 40 % tal-produzzjoni totali tal-Unjoni tal-prodott simili.

(365)

Il-Kummissjoni qagħdet fuq data aġġustata tal-Eurostat sabiex tistabbilixxi l-konsum tal-Unjoni u l-volumi tal-importazzjoni, wara l-metodoloġija mhux ikkontestati suġġerita mill-ilmentatur. Abbażi tad-data TARIC, porzjon żgħir tal-inputs tneħħa mill-istatistiki dwar l-importazzjonijiet użati. Il-Kummissjoni vverifikat u kkonfermat l-istimi tal-ilmentatur fir-rigward tal-proporzjon tal-prodott ikkonċernat fil-volumi importati skont il-kodiċijiet tan-NM (101) imsemmija fin-Notifika ta’ Bidu (102) fuq il-bażi tal-informazzjoni riċevuta mill-produtturi esportaturi li kkooperaw fir-RPĊ u fl-Eġittu.

(366)

Il-volumi u l-valur tal-importazzjonijiet minn pajjiżi terzi oħrajn kienu stabbiliti matul l-investigazzjoni abbażi tal-għarfien dirett tal-kumpaniji li jipproduċu GFF f’pajjiżi terzi oħrajn u li jimportaw lejn l-Unjoni. Għall-pajjiżi terzi kollha, minbarra ċ-ċifri msemmija fl-ilment, l-ilmentatur ipprovda informazzjoni aġġornata tal-intelligence tas-suq għall-perjodu ta’ investigazzjoni.

(367)

Il-Kummissjoni stabbiliet il-konsum tal-Unjoni abbażi tal-volumi tal-bejgħ tal-industrija tal-Unjoni fis-suq tal-Unjoni flimkien mal-importazzjonijiet mill-pajjiżi terzi kollha kif irreġistrati fil-bażi ta’ data Comtext tal-Eurostat, aġġustati kif deskritt fil-premessi (365) u (366).

(368)

Il-konsum tal-Unjoni żviluppa kif ġej:

Tabella 2

Il-konsum tal-Unjoni (f’tunnellati metriċi)

(369)

Il-konsum tal-Unjoni żdied matul il-perjodu kkunsidrat minn madwar 153 000 tunnellata fl-2015 għal madwar 168 000 tunnellata fil-perjodu ta’ investigazzjoni, jiġifieri b’9,8 %.

(370)

Fil-kummenti tagħhom dwar ir-rivelazzjoni finali, Jushi/Hengshi China u s-CCCLA talbu rivelazzjoni addizzjonali biex jiċċaraw id-data sottostanti dwar l-importazzjoni u l-konsum u l-metodoloġija dettaljata użata biex tiġi stabbilita. Huma argumentaw li dan kien meħtieġ billi ċ-ċifri użati fl-ilment huma differenti għaċ-ċifri żvelati.

(371)

L-allegazzjoni li ċifri rilevanti ma ġewx rivelati hija żbaljata. Iċ-ċifri użati biex jiġi stabbilit il-konsum tal-GFF fl-Unjoni ġew żvelati lill-partijiet interessati kollha fir-rivelazzjoni finali tad-19 ta’ Diċembru 2019. Differenzi fiċ-ċifri użati fl-ilment mhumiex riżultat ta’ bidla fil-metodoloġija iżda, minn naħa, minħabba l-perjodi ta’ żmien differenti bejn l-ilment u l-investigazzjoni kif spjegat hawn fuq u, min-naħa l-oħra, minħabba d-disponibbiltà ta’ data aktar dettaljata miġbura matul l-investigazzjoni. Filwaqt li l-ilmentatur kellu jiddependi fuq l-għarfien tas-swieq biex ineħħi l-importazzjonijiet skont il-kodiċijiet NM rilevanti li ma kinux GFF, il-Kummissjoni għandha aċċess għad-data tal-importazzjoni fil-livell tat-TARIC. Kif imsemmi fil-premessa (365), il-Kummissjoni użat din id-data biex tneħħi l-prodotti li kienu importati bil-kodiċijiet TARIC għal prodotti oħra. Minbarra d-differenza fil-perjodi, il-Kummissjoni kellha aċċess għad-data reali tal-produtturi Ewropej inklużi fil-kampjun, li f’ċerti każijiet il-verifika tagħha wasslet għal reviżjonijiet taċ-ċifri rrapportati.

(372)

Il-Kummissjoni eżaminat jekk l-importazzjonijiet tal-GFF li joriġinaw mill-pajjiżi kkonċernati għandhomx jiġu vvalutati b’mod kumulattiv skont l-Artikolu 3(4) tar-Regolament bażiku.

(373)

Id-dispożizzjoni tistipula li l-importazzjonijiet minn aktar minn pajjiż wieħed iridu jiġu vvalutati b’mod kumulattiv biss jekk ikun iddeterminat li:

(374)

Il-marġnijiet tad-dumping stabbiliti b’rabta mal-importazzjonijiet mir-RPĊ u mill-Eġittu kienu ogħla mil-limiti de minimis stabbiliti fl-Artikolu 9(3) tar-Regolament bażiku. Il-volum tal-importazzjonijiet ma kienx negliġibbli skont it-tifsira tal-Artikolu 5(7) tar-Regolament bażiku. Tabilħaqq, l-ishma mis-suq fil-perjodu ta’ investigazzjoni kienu ta’ 22,3 % (37 558 tunnellata) għall-importazzjonijiet mir-RPĊ u 9,1 % (15 334 tunnellata) għall-importazzjonijiet mill-Eġittu.

(375)

Il-kondizzjonijiet tal-kompetizzjoni ta’ bejn l-importazzjonijiet oġġett ta’ dumping mir-RPĊ u l-Eġittu u bejn dawk l-importazzjonijiet u l-prodott simili fl-Unjoni kienu simili. B’mod aktar speċifiku, il-prodotti importati kienu f’kompetizzjoni ma’ xulxin u ma’ GFF prodott fl-Unjoni minħabba li jinbiegħu bl-istess mezzi ta’ bejgħ u lil kategoriji simili ta’ klijenti. Fir-rigward tal-prezzijiet tal-importazzjoni, it-tabella 4 turi li għalkemm il-livelli ġenerali tal-prezzijiet kienu differenti għal kull pajjiż ikkonċernat, ix-xejriet kienu fil-biċċa l-kbira l-istess, jiġifieri juru tnaqqis ġenerali matul il-perjodu kkunsidrat, bi stabbilizzazzjoni fl-2017 u l-perjodu ta’ investigazzjoni, bit-tnejn li huma li jwaqqgħu b’mod sinifikanti l-prezzijiet tal-bejgħ tal-industrija tal-Unjoni fis-suq tal-Unjoni.

(376)

Għalhekk, il-kriterji stabbiliti fl-Artikolu 3(4) tar-Regolament bażiku ġew issodisfati u l-importazzjonijiet mir-RPĊ u l-Eġittu kienu eżaminati b’mod kumulattiv għall-iskopijiet tad-determinazzjoni tad-dannu.

(377)

Kif spjegat fil-premessi (365) u (366) ta’ hawn fuq, il-Kummissjoni stabbiliet il-volumi u l-prezzijiet tal-importazzjonijiet fuq il-bażi ta’ data aġġustata tal-Eurostat. Is-sehem mis-suq tal-importazzjonijiet ġie stabbilit billi l-volum tal-importazzjonijiet ġie mqabbel mal-konsum tal-Unjoni.

(378)

L-importazzjonijiet fl-Unjoni mir-RPĊ u l-Eġittu żviluppaw kif ġej.

Tabella 3

Volum tal-importazzjonijiet u sehem mis-suq

(379)

L-importazzjonijiet mill-pajjiżi kkonċernati żdiedu bi 53 % matul il-perjodu kkunsidrat, minn kważi 35 000 tunnellata fl-2015 għal kważi 53 000 tunnellata fil-perjodu ta’ investigazzjoni. B’hekk, is-sehem mis-suq tal-pajjiżi kkonċernati żdied minn 22,6 % fl-2015 għal 31,4 % fil-perjodu ta’ investigazzjoni bi kważi 9 punti perċentwali. Din iż-żieda kienet kontinwa matul il-perjodu kkunsidrat, kemm f’termini assoluti kif ukoll f’termini relattivi.

(380)

Kif spjegat fil-premessa (365), il-Kummissjoni stabbiliet ix-xejriet tal-prezzijiet tal-importazzjoni fuq il-bażi tad-data tal-Eurostat.

(381)

Fuq dik il-bażi, il-prezz medju tal-importazzjonijiet fl-Unjoni mill-pajjiżi kkonċernati żviluppa kif ġej:

Tabella 4

Prezzijiet tal-Importazzjoni (EUR/kg)

(382)

Il-prezzijiet tal-importazzjoni tal-pajjiżi kkonċernati kienu dejjem taħt il-prezz medju tal-bejgħ tal-produtturi tal-Unjoni inklużi fil-kampjun, kif muri fit-Tabella 8. Il-prezzijiet medji tal-importazzjoni mill-pajjiżi kkonċernati naqsu minn 1,78 EUR/kg għal 1,54 EUR/kg fil-perjodu kkunsidrat, jiġifieri bi kważi 14 %.

(383)

Il-Kummissjoni ddeterminat ukoll it-twaqqigħ tal-prezz matul il-perjodu ta’ investigazzjoni billi qabblet:

(384)

It-tqabbil tal-prezzijiet sar abbażi tat-tipi individwali ta’ prodotti, bl-aġġustament xieraq fejn meħtieġ, u wara t-tnaqqis tar-ribassi u tal-iskontar. Ir-riżultat tat-tqabbil ġie espress bħala perċentwal tal-fatturat ipotetiku matul il-perjodu ta’ investigazzjoni. Dan jinkiseb billi l-prezz medju tal-bejgħ tal-industrija tal-Unjoni għal kull tip ta’ prodott jiġi mmoltiplikat bil-kwantitajiet tat-tip ta’ prodott komparabbli esportati lejn l-Unjoni. Dan wera marġnijiet ta’ twaqqigħ sinifikanti ta’ prezzijiet li jvarja minn 15,4 % għal 55,8 % għar-RPĊ u minn 30,5 % għal 54,9 % għall-Eġittu, li rriżulta f’marġni medju ponderat ta’ 15,4 % għall-produtturi esportaturi inklużi fil-kampjun li kkooperaw fir-RPĊ u ta’ 31,5 % għall-produtturi esportaturi fl-Eġittu li kkooperaw.

(385)

Fil-kummenti tagħhom dwar ir-rivelazzjoni finali, Jushi/Hengshi China u s-CCCLA nnotaw li l-marġni ta’ twaqqigħ tal-prezz żvelat tal-produtturi li kkooperaw (41,1 %) x’aktarx kien ħażin.

(386)

Il-Kummissjoni ħadet nota ta’ dan il-kumment u ċċarat li dan huwa dovut għal żball klerikali. Fil-fatt, il-marġni ta’ twaqqigħ tal-prezzijiet tal-produtturi li kkooperaw kien ta’ 15,4 % minflok ta’ 41,1 %.

(387)

Fil-kummenti tagħhom dwar ir-rivelazzjoni finali, Jushi/Hengshi China nnotaw li d-differenza bejn it-twaqqigħ tal-prezzijiet tagħha u l-marġnijiet ta’ bejgħ taħt il-prezz (42,4 % u 116,9 %, rispettivament) u mqabbla mad-differenza bejn dawn il-marġnijiet stabbilita għal Jushi/Hengshi Egypt (30,5 % u 61,4 %, rispettivament). Il-produttur esportatur innota wkoll li hemm differenza sostanzjali fir-riżultat ta’ dan il-paragun kemm f’termini tal-perċentwali assoluti għaż-żewġ tipi ta’ marġnijiet, kif ukoll f’termini tal-kobor taż-żieda fil-marġni ta’ bejgħ taħt il-prezz relattiv għall-marġni tat-twaqqigħ tal-prezz. Il-produttur esportatur innota li dan huwa sorprendenti, speċjalment fid-dawl li l-prezzijiet medji ponderati unitarji CIF ta’ Jushi/Hengshi China u Jushi/Hengshi Egypt huma simili.

(388)

Il-Kummissjoni nnotat li dawn id-differenzi mhumiex rari jekk il-kumpaniji inkwistjoni jbigħu taħlitiet ta’ prodotti differenti lis-suq tal-Unjoni. Jekk it-taħlita tal-prodott tkun differenti, kif inhu f’dan il-każ, is-similarità fil-prezzijiet medji unitarji CIF ma jippermettix paragun sinifikanti tal-marġnijiet ta’ twaqqigħ tal-prezzijiet jew ta’ bejgħ taħt il-prezz taż-żewġ entitajiet u d-deltas bejn dawn il-marġnijiet. Għaldaqstant, il-kumment ġie rrifjutat.

(389)

Jushi/Hengshi China u Jushi/Hengshi Egypt innotaw li l-valur CIF għall-bejgħ li sar mill-produtturi esportaturi permezz ta’ importaturi relatati ġie stabbilit abbażi tal-prezz li bih il-prodott importat inbiegħ għall-ewwel darba lil klijenti indipendenti fl-Unjoni, aġġustat għall-kostijiet kollha mġarrba bejn l-importazzjoni u l-bejgħ mill-ġdid. Il-produttur esportatur argumenta li l-użu ta’ dan il-valur CIF maħdum fil-kalkoli tal-marġnijiet tat-twaqqigħ tal-prezzijiet u tal-bejgħ taħt il-prezz imur kontra l-Artikolu 3(1) tar-Regolament bażiku billi mkien fl-Artikolu 3 tar-Regolament bażiku ma jindika li l-Kummissjoni għandha tuża prezz tal-esportazzjoni CIF maħdum biex jiġi kkalkulat il-marġni tad-dannu.

(390)

Il-produtturi esportaturi argumentaw ukoll li l-kalkolu tal-marġnijiet tat-twaqqigħ tal-prezz ibbażat fuq valur CIF maħdum huwa difettuż. Skont dawn il-produtturi esportaturi, billi naqset milli tivvaluta l-effetti tal-prezzijiet tal-importazzjonijiet li allegatament huma l-oġġett ta’ dumping fuq il-prezzijiet ta’ prodotti simili mibjugħa mill-industrija tal-Unjoni billi qabblet il-bejgħ tal-industrija tal-Unjoni mal-prezz tal-bejgħ finali tal-produtturi esportaturi lill-ewwel klijent indipendenti, il-Kummissjoni marret kontra l-Artikoli 3(2) u 3(3), u konsegwentement l-Artikoli 3(5), 3(6), 3(7) u 3(8) tar-Regolament Bażiku.

(391)

L-ewwel nett, l-Artikolu 3(2) tar-Regolament bażiku jirreferi għall-effett tal-importazzjonijiet oġġett ta’ dumping, li setgħu jikkawżaw dannu lill-industrija tal-Unjoni u mhux il-prezz tal-bejgħ mill-ġdid ta’ kumpanija (importatur relatat) fl-Unjoni lil klijent ieħor.

(392)

It-tieni nett, rigward il-marġnijiet tat-twaqqigħ tal-prezzijiet, ir-Regolament bażiku ma jipprevedix xi metodoloġija speċifika ta’ dak il-kunċett. Il-Kummissjoni għalhekk tgawdi minn marġni wiesa’ ta’ diskrezzjoni fil-valutazzjoni ta’ dan il-fattur ta’ dannu. Dan il-marġni ta’ diskrezzjoni huwa limitat mill-ħtieġa li l-konklużjonijiet ikunu bbażati fuq evidenza pożittiva u eżami oġġettiv, kif mitlub mill-Artikolu 3(2) tar-Regolament bażiku.

(393)

Fir-rigward tal-elementi kkunsidrati għall-kalkolu tal-marġnijiet tat-twaqqigħ tal-prezzijiet (b’mod partikolari l-prezz tal-esportazzjoni), il-Kummissjoni trid tidentifika l-ewwel punt li fih isseħħ (jew tista’ sseħħ) kompetizzjoni mal-industrija tal-Unjoni fis-suq tal-Unjoni. Dan il-punt huwa fil-fatt il-prezz tax-xiri tal-ewwel importatur mhux relatat għaliex il-kumpanija fil-prinċipju għandha l-għażla li tagħmel l-akkwist tagħha jew mill-industrija tal-Unjoni jew minn klijenti barranin. B’kuntrast, il-prezzijiet tal-bejgħ mill-ġdid ta’ importaturi mhux relatati ma jirriflettux il-punt li fih isseħħ il-kompetizzjoni reali. Dan huwa biss il-punt fejn l-istruttura tal-bejgħ stabbilita tal-esportatur tipprova ssib klijenti iżda diġà hija wara l-punt fejn tkun ittieħdet id-deċiżjoni li ssir l-importazzjoni. Tabilħaqq, ladarba l-produttur esportatur ikun stabbilixxa s-sistema tiegħu ta’ kumpaniji relatati fl-Unjoni, huma diġà jkunu ddeċidew li s-sors tal-merkanzija tagħhom se jkun minn barra l-pajjiż. Għalhekk, il-punt ta’ tqabbil jenħtieġ li jkun eżatt wara li l-oġġett jaqsam il-fruntiera tal-Unjoni, u mhux fi stadju aktar tard fil-katina tad-distribuzzjoni, pereżempju meta jinbiegħ lill-utent finali tal-prodott.

(394)

Dan l-approċċ jiżgura wkoll koerenza f’każijiet fejn produttur esportatur qed ibigħ il-prodotti direttament lil klijent mhux relatat (kemm jekk huwa importatur kif ukoll jekk huwa utent finali) minħabba li f’dan ix-xenarju, il-prezzijiet tal-bejgħ mill-ġdid ma jintużawx bħala regola. Approċċ differenti jista’ jwassal għal diskriminazzjoni bejn il-produtturi esportaturi abbażi biss tal-kanal tal-bejgħ li huma jużaw.

(395)

F’dan il-każ, il-prezz tal-importazzjoni ma jistax jittieħed b’mod superfiċjali peress li l-produttur esportatur u l-importatur huma relatati. Għalhekk, sabiex jiġi stabbilit b’mod affidabbli l-prezz ta’ importazzjoni fuq bażi distakkata, dan il-prezz għandu jiġi maħdum mill-ġdid bl-użu tal-prezz tal-bejgħ tal-importatur relatat bħala punt ta’ tluq. Sabiex terġa’ taħdimhom mill-ġdid, ir-regoli dwar kif jinħadem il-prezz tal-esportazzjoni kif stabbilit fl-Artikolu 2(9) tar-Regolament bażiku huma pertinenti, bħalma huma pertinenti għad-determinazzjoni tal-prezz tal-esportazzjoni għal skopijiet ta’ dumping. L-applikazzjoni tal-Artikolu 2(9) tar-Regolament bażiku tippermetti li wieħed jasal għal prezz li huwa għalkollox komparabbli għall-prezz CIF (fruntiera tal-Unjoni) li jintuża meta jiġi eżaminat il-bejgħ lil klijenti mhux relatati.

(396)

Il-Kummissjoni tinnota wkoll li f’dan il-każ partikolari l-maġġoranza tal-bejgħ kemm min-naħa tal-industrija tal-Unjoni kif ukoll min-naħa tal-produtturi esportaturi jsir direttament (jiġifieri mingħajr negozjanti jew importaturi). Dan il-bejgħ dirett jirrappreżenta aktar minn 95 % tal-bejgħ tal-industrija tal-Unjoni u aktar minn 95 % tal-bejgħ tal-produtturi esportaturi.

(397)

Filwaqt li l-Kummissjoni ssostni r-raġunament spjegat hawn fuq, għall-finijiet ta’ kompletezza għamlet kalkoli addizzjonali tal-marġnijiet tat-twaqqigħ tal-prezz.

(398)

L-ewwel wieħed qies il-klijent aħħari, u b’hekk it-tipi ta’ prodotti ġew imqabbla fuq il-bażi tat-tip ta’ klijent aħħari, b’dan tal-aħħar jiżdied bħala karatteristika għan-numru ta’ kontroll tal-prodott. Abbażi ta’ dan il-kalkolu, il-prezzijiet tal-grupp CNBM fiċ-Ċina, il-grupp CNBM fl-Eġittu u l-grupp Yuntianhua nstabu li waqqgħu l-prezzijiet tal-industrija tal-Unjoni bi 42,7 %, 32,1 % u 17,2 % rispettivament.

(399)

Fit-tieni kalkoli tal-marġnijiet tat-twaqqigħ tal-prezz, il-Kummissjoni qieset biss il-bejgħ dirett li sar mill-industrija u mill-produtturi esportaturi tal-Unjoni, li kif imsemmi hawn fuq, jirrappreżenta l-maġġoranza vasta tal-bejgħ fuq iż-żewġ naħat. Abbażi ta’ dan il-kalkolu, il-prezzijiet tal-grupp CNBM fiċ-Ċina, il-grupp CNBM fl-Eġittu u l-grupp Yuntianhua nstabu li waqqgħu l-prezzijiet tal-industrija tal-Unjoni bi 45,4 %, 30,8 % u 14,7 % rispettivament.

(400)

Bħala konklużjoni, il-marġn ta’ twaqqigħ tal-prezzijiet ma jvarjawx b’mod sinifikanti irrispettivament mill-mod kif jiġi kkalkulat. Dan mhuwiex sorprendenti meta wieħed iqis li l-industrija tal-Unjoni u l-produtturi esportaturi jbigħu tipi simili ta’ prodotti u b’mod predominanti direttament lil tipi simili ta’ klijenti. Għaldaqstant, din l-affermazzjoni ġiet irrifjutata.

(401)

Wara r-rivelazzjoni finali, il-grupp Yuntianhua talab għal rivelazzjoni addizzjonali dwar il-kalkoli dettaljati tal-marġnijiet tat-twaqqigħ tal-prezzijiet u tal-bejgħ taħt il-prezz għal kull tip ta’ prodott, fir-rigward tal-kumpanija tiegħu. Huwa talab li n-numri ta’ kontroll tal-prodott (“PCN”) mibjugħa mill-industrija tal-Unjoni għandhom jiġu żvelati lilu kif ukoll il-kwantitajiet medji mibjugħa għal kull PCN u l-prezzijiet medji tal-bejgħ. Matul is-seduta tas-17 ta’ Jannar 2020, il-grupp Yuntianhua żied, fost l-oħrajn, li ma kienx ċar mill-informazzjoni żvelata jekk il-Kummissjoni applikatx azzerar. Il-grupp Yuntianhua talab ukoll rivelazzjoni addizzjonali fuq il-kanali tal-bejgħ u d-distribuzzjoni tal-industrija tal-Unjoni fis-suq tal-Unjoni.

(402)

Il-Kummissjoni kkonfermat li l-azzerar ma ġiex applikat f’din l-investigazzjoni. Madankollu, f’konformità mal-prattika ġenerali dwar il-protezzjoni ta’ sigrieti kummerċjali, il-Kummissjoni ma setgħetx tiżvela d-data kollha mitluba għal kull tip ta’ prodott. Rivelazzjoni ta’ tali livell ta’ dettall tagħmilha possibbli li, jew b’mod dirett jew b’żieda ta’ għarfien tas-swieq, tinbena data kunfidenzjali dwar il-bejgħ jew il-produzzjoni ta’ produtturi individwali tal-Unjoni. F’konformità mal-prattika tagħha li tipproteġi informazzjoni kunfidenzjali tan-negozju, il-Kummissjoni ddeċidiet li taċċetta parzjalment it-talba tal-kumpanija u tiżvela l-informazzjoni għat-tipi ta’ prodotti mibjugħa minn tliet produtturi tal-Unjoni jew aktar fil-kampjun. Dawn ġew żvelati individwalment flimkien mar-rivelazzjoni finali addizzjonali għall-produtturi esportaturi kollha kkonċernati.

(403)

Wara t-talba tal-grupp Yuntianhua għal rivelazzjoni addizzjonali fuq il-kanali tal-bejgħ u d-distribuzzjoni tal-industrija tal-Unjoni, u fuq talba tal-Kummissjoni, il-produtturi kollha tal-Unjoni fil-kampjun ipprovdew informazzjoni addizzjonali rigward il-kanali tal-bejgħ tagħhom. Din l-informazzjoni kienet disponibbli fil-fajl għall-ispezzjoni mill-partijiet interessati ftit wara li t-talba u l-partijiet interessati ġew infurmati b’dan. Il-produtturi tal-Unjoni talbu wkoll trattament kunfidenzjali għal informazzjoni aktar dettaljata fir-rigward tal-kanali tal-bejgħ tagħhom. Il-Kummissjoni vvalutat dawn it-talbiet u kkonkludiet li kienu ġġustifikati kif xieraq, u b’hekk kien jeħtiġilhom trattament kunfidenzjali skont l-Artikolu 19 tar-Regolament bażiku.

(404)

Fil-kummenti tagħhom dwar ir-rivelazzjoni finali, il-grupp ta’ Yuntianhua argumenta li, peress li, għall-kuntrarju tal-grupp Yuntianhua, il-produtturi kollha tal-Unjoni fil-kampjun biegħu l-prodott ikkonċernat permezz ta’ negozjanti relatati fl-Unjoni, il-Kummissjoni jenħtieġ li taġġusta ’l fuq il-valur tas-CIF tal-grupp Yuntianhua għall- SG&A u marġni ta’ profitt nozzjonali tal-kumpaniji kummerċjali relatati fil-kampjun tal-produtturi tal-UE, sabiex ikun żgurat li l-paragun mal-prezzijiet tal-bejgħ tal-industrija tal-Unjoni jsir fl-istess livell ta’ kummerċ.

(405)

Kif imsemmi fil-premessa (396), aktar minn 95 % tal-bejgħ tal-industrija tal-Unjoni kien bejgħ dirett. Barra minn hekk, kif ġie nnotat fil-premessi minn (397) sa (400), il-kalkoli tal-marġnijiet tat-twaqqigħ tal-prezz ibbażati fuq il-bejgħ lill-utenti aħħara u fuq il-bejgħ dirett biss kollha juru marġnijiet tat-twaqqigħ tal-prezz għall-produtturi esportaturi kollha inkluż il-grupp Yuntianhua. Għaldaqstant, il-kumment ġie rrifjutat.

(406)

Fil-kummenti tagħhom wara wara r-rivelazzjoni addizzjonali finali, il-grupp Yuntianhua tenna l-affermazzjoni tiegħu li r-rivelazzjoni tal-kalkolu tal-marġni tad-dannu ma kinitx biżżejjed. Il-kumpanija ddikjarat li l-prezzijiet tal-bejgħ u l-kwantitajiet tat-tipi kollha tal-prodotti mibjugħa mill-industrija tal-Unjoni jenħtieġ li jkunu żvelati lilhom, irrispettivament minn kemm produtturi tal-Unjoni fil-kampjun kienu qed ibigħu PCN speċifiku. Huma warbu l-fehma tal-Kummissjoni li jekk id-data dwar il-bejgħ relatata ma’ ċertu PCN tappartjeni biss lil żewġ produtturi tal-Unjoni jew inqas, parti terza tkun tista’ ssegwi d-data lura għal produttur individwali tal-industrija tal-Unjoni. Peress li l-grupp Yuntianhua ma jkollux l-għarfien rilevanti tas-suq biex jagħmel dan, huma affermaw ulterjorment, li ma hemmx għalfejn din id-data tinżamm kunfidenzjali. Inkella, il-grupp ta’ Yuntianhua argumenta li l-Kummissjoni jenħtieġ li tal-anqas tipprovdi sommarju mhux kunfidenzjali sinifikanti tal-kalkolu tal-marġni tad-dannu billi tipprovdi firxiet ta’ data dwar il-bejgħ marbuta mal-PCNs li kienu prodotti minn żewġ produtturi tal-Unjoni jew anqas.

(407)

Il-Kummissjoni ttenni li d-data li tappartjeni għal produttur wieħed jew żewġ produtturi tal-Unjoni biss ma tistax tiġi żvelata għal raġunijiet ta’ kunfidenzjalità. L-istess trattament jingħata lill-produtturi esportaturi, li ma jkollhomx l-informazzjoni individwali tagħhom disponibbli, anki fuq bażi anonima. L-investigazzjoni wriet li s-suq GFF huwa relattivament trasparenti ma’ utenti ta’ kwantità kbira li jixtru minn numru limitat ta’ produtturi ċċertifikati fl-Unjoni u fiċ-Ċina. Għalhekk huwa raġonevoli li wieħed jassumi li l-produtturi tal-GFF fl-Unjoni u fil-pajjiżi kkonċernati ta’ spiss ikunu jafu min qed jipprovdi tip ta’ prodott partikolari. Għalhekk, l-iżvelar ta’ firxa ta’ data jkollha r-riskju għoli li jiżvela data kunfidenzjali, ta’ negozju, li l-Kummissjoni tfittex li tipproteġi. Fi kwalunkwe każ, il-Kummissjoni żvelat kalkoli dettaljati għat-tipi kollha ta’ prodotti li ġew prodotti minn tliet produtturi tal-Unjoni jew aktar li kienu jkopru madwar 70 % tal-volum mibjugħ mill-grupp Yuntianhua lejn l-Unjoni u aktar minn 70 % tal-volum ta’ tipi ta’ prodotti korrispondenti mibjugħ mill-industrija tal-Unjoni. Il-grupp Yuntianhua ma qajjem l-ebda kwistjoni fir-rigward ta’ dawn il-kalkoli. Il-kumpanija lanqas ma fittxet l-assistenza tal-Uffiċjal tas-Seduta, li offra li jwettaq il-verifiki meħtieġa fuq id-data li ma ġietx żvelata f’isem il-kumpanija. Għaldaqstant, din l-affermazzjoni ġiet irrifjutata.

(408)

Fil-kummenti tagħhom wara r-rivelazzjoni addizzjonali finali, abbażi ta’ seduta ta’ smigħ mal-Uffiċjal tas-Seduta, il-grupp Yuntianhua sostna li kull produttur tal-Unjoni inkluż fil-kampjun jispeċjalizza fil-produzzjoni ta’ tip wieħed jew aktar ta’ prodott ikkonċernat manifatturat speċifikament għal utent partikolari. Il-grupp Yuntianhua imbagħad argumenta li dawn kienu prodotti speċifiċi għall-klijenti OEM, li għalihom ma ġie stabbilit l-ebda marġni tat-twaqqigħ tal-prezz u tal-bejgħ taħt il-prezz. Skont il-grupp Yuntianhua, għalhekk jenħtieġ li jkun hemm analiżi speċifika skont is-segment tad-dumping u d-dannu u l-ebda miżura ma għandha fil-fatt tiġi imposta fuq is-segment OEM.

(409)

Is-suppożizzjoni tal-produttur esportatur hija fattwalment żbaljata. L-investigazzjoni wriet li l-GFF ma kienx prodott fuq il-bażi OEM. Kif iddikjarat fil-premessa (61) hawn fuq, il-Kummissjoni sabet li għall-biċċa l-kbira tal-applikazzjonijiet, il-GFF jiġu prodotti f’ordni skont l-ispeċifikazzjonijiet tal-klijenti u, b’riżultat ta’ dan, il-maġġoranza vasta tal-bejgħ (kemm tal-produtturi tal-Unjoni kif ukoll tal-produtturi esportaturi) issir direttament lill-klijenti aħħara indipendenti. Għalhekk, il-bejgħ skont l-ispeċifikazzjonijiet tal-klijenti huwa karatteristika tas-suq tal-GFF u bl-ebda mod ma jissuġġerixxu l-eżistenza ta’ segment OEM separat. Dan huwa wkoll viżibbli mid-data żvelata lill-grupp Yuntianhua. Madwar 70 % tal-PCNs esportati mill-grupp Yuntianhua lejn l-Unjoni ġew prodotti minn tliet jew erba’ produtturi tal-Unjoni fil-kampjun. Il-Kummissjoni tinnota wkoll li matul il-perjodu ta’ investigazzjoni kien hemm tqabbil ta’ 92 % bejn il-bejgħ tal-industrija tal-Unjoni u l-grupp Yuntianhua. Dan jikkontradixxi wkoll li jkun hemm speċjalizzazzjoni partikolari fis-suq u li l-produtturi tal-UE jipproduċu tip wieħed jew aktar għal utent partikolari. Barra minn hekk, id-dikjarazzjoni li l-prezzijiet tal-bejgħ ta’ dawk il-PCNs prodotti minn produttur wieħed biss jew minn żewġ produtturi tal-Unjoni ma kinux qed jwaqqgħu il-prezzijiet jew ibigħu taħt il-prezz tal-industrija tal-Unjoni mhux korrett. Il-Kummissjoni sabet twaqqigħ fil-prezz għal erbgħa mis-seba’ PCNs li għalihom il-kalkolu dettaljat ma setax jiġi żvelat minħabba kwistjonijiet ta’ kunfidenzjalità. Dan ifisser li, mit-18-il PCNs li jaqblu, erbgħa biss (li jammontaw għal perċentwal baxx tal-volumi tal-esportazzjonijiet tal-grupp Yuntianhua) instabu li ma jwaqqgħux il-prezz tal-bejgħ tal-industrija tal-Unjoni. Ovvjament, l-istabbiliment ta’ twaqqigħ tal-prezz fil-livell tal-PCN huwa biss pass intermedjarju u preparatorju tal-paragun tal-prezzijiet meħtieġ mill-Artikolu 3(3) tar-Regolament bażiku, jiġifieri, id-determinazzjoni tat-twaqqigħ tal-prezz fir-rigward tal-prodott ikkonċernat fl-intier tiegħu. Fuq il-bażi ta’ dan ta’ hawn fuq, l-affermazzjoni li kellha ssir analiżi separata bbażata fuq segmenti differenti ġiet irrifjutata.

(410)

Fil-kummenti tagħhom wara r-rivelazzjoni addizzjonali finali, il-grupp Yuntianhua argumenta li l-Kummissjoni inkludiet prodotti li mhumiex prodotti kkonċernati fis-sejbiet ta’ dannu billi sostniet li wieħed mill-PCNs tagħhom kien esportat taħt Kodiċi NM li mhuwiex parti mill-investigazzjoni.

(411)

Kif ġie ddikjarat mill-Kummissjoni fl-Avviż ta’ bidu ta’ din il-proċedura “[i] n-NM u l-kodiċijiet TARIC jingħataw biss għall-informazzjoni”. Dawn ma jikkostitwixxux id-deskrizzjoni tal-prodott investigat. Tabilħaqq, f’dan il-każ partikolari, fir-Regolament ta’ Implimentazzjoni tal-Kummissjoni (UE) 2020/44 (104) kien diġà ġie nnotat li l-importazzjonijiet tal-prodott investigat, anki wara li nbeda l-proċediment ġew iddikjarati b’mod żbaljat. Barra minn hekk, matul l-investigazzjoni, il-produtturi esportaturi fil-kampjun intalbu jirrapportaw l-esportazzjonijiet tagħhom lejn l-Unjoni tal-prodott li jaqbel mad-deskrizzjoni mogħtija fin-Notifika ta’ bidu tal-proċediment. F’dan il-qafas, il-grupp Yuntianhua rrapporta l-PCN speċifiku inkwistjoni bħala prodott ikkonċernat. Fi kwalunkwe każ, ġie vverifikat u kkonfermat matul il-verifika fuq il-post li l-PCNs kollha rrapportati fil-kwestjonarju kienu jaqgħu fl-ambitu tal-investigazzjoni. L-użu ta’ dan il-PCN fid-dumping, u fil-kalkoli tad-dannu ġew żvelati wkoll lill-grupp Yuntianhua fid-19 ta’ Diċembru 2019. Dan ma ġiex ikkontestat mill-grupp Yuntianhua. Għaldaqstant, din l-affermazzjoni ġiet irrifjutata.

(412)

B’konformità mal-Artikolu 3(5) tar-Regolament bażiku, l-analiżi tal-impatt li għandhom l-importazzjonijiet li huma l-oġġett ta’ dumping fuq l-industrija tal-Unjoni tinkludi evalwazzjoni tal-indikaturi ekonomiċi kollha li għandhom effett fuq l-istat tal-industrija tal-Unjoni matul il-perjodu kkunsidrat.

(413)

Kif imsemmi fil-premessa (12), intuża l-kampjunar għad-determinazzjoni tad-dannu possibbli li ġarrbet l-industrija tal-Unjoni.

(414)

Biex tiddetermina d-dannu, il-Kummissjoni għamlet distinzjoni bejn l-indikaturi tad-dannu makroekonomiċi u dawk mikroekonomiċi. Il-Kummissjoni vvalutat l-indikaturi makroekonomiċi fuq il-bażi ta’ data li kienet tinsab fl-ilment u t-tweġiba tal-ilmentaturi għal kwestjonarju speċifiku. Din id-data kienet relatata mal-produtturi kollha tal-Unjoni, u ġiet aġġornata fejn meħtieġ wara l-verifiki tal-produtturi tal-Unjoni fil-kampjun. Il-Kummissjoni vvalutat l-indikaturi makroekonomiċi abbażi tad-data inkluża fit-tweġibiet verifikati għall-kwestjonarju mill-produtturi tal-Unjoni fil-kampjun. Iż-żewġ settijiet ta’ data nstabu li kienu rappreżentattivi tas-sitwazzjoni ekonomika tal-industrija tal-Unjoni.

(415)

L-indikaturi makroekonomiċi huma: il-produzzjoni, il-kapaċità tal-produzzjoni, l-użu tal-kapaċità, il-volum tal-bejgħ, is-sehem mis-suq, it-tkabbir, l-impjiegi, il-produttività u d-daqs tal-marġnijiet tad-dumping.

(416)

L-indikaturi mikroekonomiċi huma: il-prezzijiet medji ta’ kull unità, il-kost unitarju, il-kostijiet lavorattivi, l-inventarji, il-profittabilità, il-fluss tal-flus, l-investimenti u r-redditu fuq l-investiment, u l-kapaċità ta’ ġenerazzjoni tal-kapital.

(417)

Il-produzzjoni totali tal-Unjoni, il-kapaċità ta’ produzzjoni u l-użu tal-kapaċità żviluppaw kif ġej matul il-perjodu kkunsidrat:

Tabella 5

Produzzjoni, kapaċità ta’ produzzjoni u użu tal-kapaċità

(418)

Il-produzzjoni totali tal-industrija tal-Unjoni varjat iżda naqset b’8 % matul il-perjodu kkunsidrat. Peress li l-kapaċità tal-produzzjoni nżammet kważi fl-istess livell matul il-perjodu kkunsidrat, l-użu tal-kapaċità naqas minn 63 % għal 59 %.

(419)

Il-volum tal-bejgħ u s-sehem mis-suq tal-industrija tal-Unjoni żviluppaw hekk matul il-perjodu kkunsidrat:

Tabella 6

Volum tal-bejgħ u sehem mis-suq

(420)

Il-volum tal-bejgħ tal-industrija tal-Unjoni naqas b’5 % matul il-perjodu kkunsidrat, filwaqt li l-importazzjonijiet mir-RPĊ u l-Eġittu akkumulati żdiedu bi 53 %. Meta wieħed iqis iż-żieda fil-konsum, din sarrfet fi tnaqqis tas-sehem mis-suq minn 73,7 % fl-2015 għal 63,4 % matul il-perjodu ta’ investigazzjoni, jiġifieri tnaqqis ta’ aktar minn 10 punti perċentwali għall-industrija tal-Unjoni, filwaqt li r-RPĊ u l-Eġittu żiedu s-sehem tas-suq tagħhom minn 22,6 % fl-2015 għal 31,4 % matul il-perjodu ta’ investigazzjoni, jiġifieri żieda ta’ kważi 9 punti perċentwali.

(421)

Iċ-ċifri ta’ hawn fuq fir-rigward tal-produzzjoni, il-bejgħ, il-volum u s-sehem mis-suq juru li l-industrija tal-Unjoni ma setgħetx tikber f’suq li kien qed jikber, la f’termini assoluti u lanqas fir-rigward tal-konsum, matul il-perjodu kkunsidrat.

(422)

Matul il-perjodu kkunsidrat, l-impjiegi u l-produttività żviluppaw kif ġej:

Tabella 7

Impjiegi u produttività

(423)

Matul il-perjodu kkunsidrat, l-impjiegi fl-Unjoni baqgħu relattivament stabbli b’żieda minuri biss ta’ 1 %. Tabilħaqq, it-tkabbir fil-konsum ma kienx akkumpanjat minn tkabbir korrispondenti fl-impjiegi minħabba tnaqqis fil-volumi tal-bejgħ u tal-produzzjoni. Peress li l-produzzjoni naqqset b’8 %, il-produttività tal-industrija tal-Unjoni naqset b’9 % matul il-perjodu kkunsidrat.

(424)

Il-marġnijiet kollha tad-dumping kienu ogħla b’mod sinifikanti mil-livell de minimis. L-impatt tad-daqs tal-marġnijiet attwali tad-dumping fuq l-industrija tal-Unjoni kien sostanzjali, fid-dawl tal-volum u l-prezzijiet tal-importazzjonijiet mir-RPĊ u l-Eġittu.

(425)

Il-prezzijiet medji ponderati tal-bejgħ ta’ unità tal-produtturi tal-Unjoni fil-kampjun lil klijenti fl-Unjoni żviluppaw kif ġej matul il-perjodu kkunsidrat:

Tabella 8

Prezzijiet tal-bejgħ medji fl-Unjoni (EUR/kg)

(426)

Filwaqt li l-kost tal-produzzjoni tal-industrija tal-Unjoni żdied bi 3 % matul il-perjodu kkunsidrat, l-aktar minħabba t-telf ta’ kuntratti ta’ volum għoli mill-industrija tat-turbini eoliċi, il-prezz medju tal-bejgħ ta’ kull unità tal-industrija tal-Unjoni lil konsumaturi mhux relatati fl-Unjoni naqas b’7 % matul il-perjodu ta’ investigazzjoni. Dan juri t-trażżin sever tal-prezzijiet ikkawżat mill-volum li dejjem jiżdied b’mod sinifikanti fl-importazzjonijiet tal-prodott ikkonċernat. Kif spjegat fil-premessi (431) u (439), dan kellu impatt sinifikanti fuq il-qagħda finanzjarja tal-industrija tal-Unjoni li kienet qed tagħmel it-telf matul il-perjodu ta’ investigazzjoni.

(427)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu kkunsidrat:

Tabella 9

Kostijiet lavorattivi medji għal kull impjegat (EUR)

(428)

Bejn l-2015 u l-perjodu ta’ investigazzjoni, il-kostijiet lavorattivi medji għal kull impjegat tal-produtturi tal-Unjoni fil-kampjun żdiedu b’6 %.

(429)

Il-livelli tal-istokkijiet tal-produtturi tal-Unjoni żviluppaw kif ġej matul il-perjodu kkunsidrat:

Tabella 10

Inventarji

(430)

Minkejja l-fatt li f’kondizzjonijiet normali tas-suq, GFF huwa prodott l-aktar skont l-ordni u ma jinħażinx, kien hemm żieda qawwija ta’ 26 % fl-istokk matul il-perjodu kkunsidrat. Din hija spjegata mill-fatt li l-industrija tal-Unjoni kienet imġiegħla tikkumpensa għat-telf ta’ ordnijiet ta’ volum għoli għall-kompetituri tagħha mill-pajjiżi kkonċernati. F’tentattiv sabiex iżżomm il-kost unitarju medju f’livelli aktar baxxi, l-industrija tal-Unjoni żammet il-perjodi ta’ inattività tal-magni għall-minimu possibbli u pproduċiet GFF li ma setax jinbiegħ immedjatament lill-klijenti.

(431)

Il-profittabilità, il-fluss tal-flus, l-investimenti u r-redditu fuq l-investimenti tal-produtturi tal-Unjoni fil-kampjun żviluppaw kif ġej tul il-perjodu kkunsidrat:

Tabella 11

Il-profittabbiltà, il-fluss tal-flus, l-investimenti u r-redditu fuq l-investimenti

(432)

Il-Kummissjoni stabbiliet il-profittabbiltà tal-produtturi tal-Unjoni fil-kampjun billi esprimiet il-profitt nett qabel it-taxxa tal-bejgħ tal-prodott simili lil konsumaturi mhux relatati fl-Unjoni bħala perċentwal tal-fatturat ta’ dak il-bejgħ. Il-profittabilità segwiet xejra ta’ tnaqqis matul il-perjodu kkunsidrat u saret negattiva matul il-perjodu ta’ investigazzjoni.

(433)

Il-fluss tal-flus nett huwa l-kapaċità tal-produtturi tal-Unjoni li jiffinanzjaw l-attivitajiet tagħhom huma stess. Ix-xejra fil-flussi tal-flus netti żviluppat b’mod negattiv matul il-perjodu kkunsidrat. Dan juri deterjorament kostanti, b’mod partikolari lejn l-aħħar tal-perjodu ta’ investigazzjoni.

(434)

L-investimenti żdiedu bi ftit b’10 % matul il-perjodu kkunsidrat, iżda juru xejriet li jinbidlu matul il-perjodu kkunsidrat. Ħafna mill-investiment kien jittratta l-manutenzjoni tal-linja tal-produzzjoni. Ma kien hemm l-ebda investiment f’kapaċità tal-GFF ġdida, li jirrifletti s-sehem mis-suq li qed jonqos.

(435)

Ir-redditu fuq l-investimenti huwa l-profitt espress bħala perċentwal tal-valur kontabilistiku nett tal-investimenti. Dan żviluppa b’mod negattiv matul il-perjodu kkunsidrat u rriżulta f’valur negattiv fil-perjodu ta’ investigazzjoni.

(436)

Fil-kummenti tagħhom dwar ir-rivelazzjoni finali, Jushi/Hengshi China talbu lill-Kummissjoni biex tispjega d-diskrepanza bejn il-profittabbiltà u l-prezzijiet tal-bejgħ tal-industrija tal-Unjoni fl-ilment u fir-rivelazzjoni finali.

(437)

Is-sejbiet tal-Kummissjoni, li ġew żvelati lill-partijiet, huma bbażati fuq data mikroekonomika preċiża tal-produtturi fil-kampjun, ivverifikata fuq il-post mill-Kummissjoni. Min-naħa l-oħra, l-ilment, kif innotat mill-produtturi esportaturi fil-kummenti tagħhom dwar ir-rivelazzjoni finali, fil-fatt “ma jkoprix l-PI u lanqas mhuwa suġġett għall-istess livell ta’ obbligi ta’ evidenza u ta’ rivelazzjoni”. Elementi oħra li x’aktarx iwasslu għad-differenza huma reviżjonijiet tad-data tal-bejgħ wara ż-żjarat ta’ verifika, u l-inklużjoni fil-kampjun ta’ produtturi tal-Unjoni ta’ kumpanija li ma pparteċipatx fil-preparazzjoni tal-ilment.

(438)

L-indikaturi ewlenin kollha tad-dannu wrew xejra negattiva matul il-perjodu kkunsidrat. Il-volum tal-produzzjoni u l-volum tal-bejgħ naqsu b’madwar 8 % u 5 %, rispettivament. Meta wieħed iqis iż-żieda fil-konsum, it-telf fil-volum tal-bejgħ issarraf fi tnaqqis tas-sehem mis-suq minn 73,7 % fl-2015 għal 63,4 % matul il-perjodu ta’ investigazzjoni, jiġifieri tnaqqis ta’ aktar minn 10 punti perċentwali.

(439)

Bl-istess mod, l-indikaturi finanzjarji ewlenin urew ukoll tendenza negattiva li tirrifletti t-trażżin sinifikanti tal-prezzijiet fis-suq tal-Unjoni kif rifless fit-Tabella 8. Għalhekk, matul il-perjodu kkunsidrat, il-prezzijiet tal-bejgħ għal kull unità naqsu b’7 %, filwaqt li fl-istess ħin il-kost għal kull unità tal-produzzjoni tal-industrija tal-Unjoni żdied bi 3 %. Iż-żieda fil-kost unitarju medjukienet dovuta għat-tnaqqis fil-volum tal-produzzjoni minħabba li x-xiri, speċjalment dak ta’ volumi għoljin mill-industrija tat-turbini eoliċi,intilefgħall-produtturi Ċiniżi u Eġizzjani. B’riżultat ta’ dan, il-profittabbiltà tal-industrija tal-Unjoni nbidlet minn profitt ta’ 2,5 % fl-2015 għal telf ta’ -3,4 % fil-perjodu ta’ investigazzjoni. Effetti negattivi simili jidhru fil-fluss tal-flus u fir-redditu fuq l-investiment.

(440)

Fuq din il-bażi, aħna nikkonkludu li huwa ċar li l-industrija tal-Unjoni ġarrbet dannu materjali.

(441)

Skont l-Artikolu 3(6) tar-Regolament bażiku, il-Kummissjoni eżaminat jekk l-importazzjonijiet oġġett ta’ dumping mir-RPĊ u l-Eġittu kkawżawx dannu materjali lill-industrija tal-Unjoni. Skont l-Artikolu 3(7) tar-Regolament bażiku, il-Kummissjoni eżaminat ukoll jekk fatturi magħrufin oħrajn setgħux fl-istess ħin għamlu dannu lill-industrija tal-Unjoni. Il-Kummissjoni żgurat li kwalunkwe dannu possibbli kkawżat minn fatturi oħrajn minbarra l-importazzjonijiet oġġett ta’ dumping mir-RPĊ u l-Eġittu ma jiġix attribwit għall-importazzjonijiet oġġett ta’ dumping. Dawn il-fatturi kienu importazzjonijiet minn pajjiżi terzi oħrajn, tnaqqis fid-domanda tal-GFF fil-perjodu mill-2017 sal-2018, l-iżvilupp tal-kostijiet tal-materja prima, dannu kkawżat mill-industrija stess minħabba nuqqas ta’ flessibbiltà fil-provvista, u tnaqqis fl-installazzjoni ta’ turbini eoliċi bejn l-2017 u l-2018.

(442)

Il-volum tal-importazzjonijiet mir-RPĊ u mill-Eġittu u s-sehem tas-suq akkumulat tagħhom żdied bi 53 % u 39 %, rispettivament, matul il-perjodu kkunsidrat. Din iż-żieda taqbeż b’mod sostanzjali ż-żieda fil-konsum matul l-istess perjodu, li kienet kważi 9 %. Fl-istess ħin, l-industrija tal-Unjoni tilfet aktar minn 5 % tal-volum tal-bejgħ tagħha u aktar minn 10 punti perċentwali tas-sehem mis-suq. Barra minn hekk, il-prezzijiet tal-importazzjonijiet mir-RPĊ u l-Eġittu bħala medja naqsu bi kważi 14 % matul il-perjodu kkunsidrat, u waqqgħu l-prezzijiet tal-industrija tal-Unjoni, matul il-perjodu ta’ investigazzjoni, b’bejn 15,4 % u 55,8 % u b’medja ta’ 32,3 %. Dawn il-prezzijiet baxxi tal-importazzjonijiet flimkien mal-volumi dejjem jiżdiedu tal-importazzjonijiet mir-RPĊ u l-Eġittu eżerċitaw pressjoni sinifikanti fuq il-prezzijiet matul il-perjodu ta’ investigazzjoni, li ma ppermettietx lill-industrija tal-Unjoni żżid il-prezzijiet tagħhom aktar mill-kost medju tal-produzzjoni. Għall-kuntrarju, l-impjiegi tal-industrija tal-Unjoni naqsu bi kważi 7 % matul il-perjodu kkunsidrat. Konsegwentement, il-profittabilità tal-industrija tal-Unjoni kienet qed tonqos b’mod kostanti u laħqet telf ta’ -3,4 % matul il-perjodu ta’ investigazzjoni.

(443)

L-analiżi tal-indikaturi tad-dannu fil-premessi minn (363) sa (440) turi li s-sitwazzjoni ekonomika tal-industrija tal-Unjoni marret għall-agħar matul il-perjodu kkunsidrat u dan ikkoinċida ma’ żieda fl-importazzjonijiet oġġett ta’ dumping mir-RPĊ u l-Eġittu, li nstabu li kienu jwaqqgħu l-prezzijiet tal-industrija tal-Unjoni matul il-perjodu ta’ investigazzjoni.

(444)

Utent minnhom sostna li ma hemm l-ebda koinċidenza fiż-żmien bejn id-dannu materjali mġarrab mill-industrija tal-Unjoni u ż-żieda tal-importazzjonijiet mill-pajjiżi kkonċernati. Dak l-utent argumenta li meta s-sitwazzjoni tal-industrija tal-Unjoni marret għall-agħar bejn l-2017 u l-perjodu ta’ investigazzjoni, il-volum tal-importazzjonijiet mill-pajjiżi kkonċernati u s-sehem mis-suq tagħhom fil-fatt naqas.

(445)

Madankollu, kif jidher fit-Tabella 3 fil-premessa (378), l-importazzjonijiet mill-pajjiżi kkonċernati żdiedu minn 50 370 tunnellata għal 52 892 tunnellata u s-sehem tagħhom fis-suq minn 27,8 % għal 31,4 % mill-2017 sal-perjodu ta’ investigazzjoni. Għaldaqstant, din l-affermazzjoni ġew irrifjutati.

(446)

Il-volum ta’ importazzjonijiet minn pajjiżi terzi oħrajn żviluppa matul il-perjodu kkunsidrat kif ġej:

Tabella 12

Importazzjonijiet minn pajjiżi terzi

(447)

L-importazzjonijiet minn pajjiżi terzi oħra kienu l-aktar minn żewġ pajjiżi, jiġifieri l-Indja u r-Russja. Dawn iż-żewġ pajjiżi individwalment kellhom sehem mis-suq ogħla minn 1 % matul il-perjodu ta’ investigazzjoni, filwaqt li f’livell individwali, l-importazzjonijiet tal-pajjiżi terzi li kien fadal kienu jirrappreżentaw sehem mis-suq ta’ anqas minn 1 % u, flimkien, kienu jirrappreżentaw 1,9 %.

(448)

L-esportaturi Indjani huma relatati mal-industrija tal-Unjoni. Is-sehem mis-suq tal-importazzjonijiet mill-Indja gradwalment żdied matul il-perjodu kkunsidrat minn 0,7 % għal 1,8 %; madankollu, dan il-bejgħ fi ħdan il-kumpanniji ma xeħitx pressjoni fuq il-prezzijiet tal-Unjoni peress li sar fil-livell tal-prezz tat-trasferiment. L-importazzjonijiet inkwistjoni huma prodotti nofshom lesti li jintużaw fil-manifattura tal-prodott finali, fuq il-bażi ta’ teknoloġija ta’ produttur speċifiku Ewropew u mhumiex mibjugħa fis-suq miftuħ. Għalhekk, il-Kummissjoni kkonkludiet li dawn l-importazzjonijiet ma kkontribwewx għad-dannu mġarrab mill-industrija tal-Unjoni.

(449)

Is-sehem mis-suq tal-importazzjonijiet Russi baqa’ stabbli matul il-perjodu kkunsidrat u saħansitra naqas bejn l-2015 u l-2017, qabel ma laħaq livelli simili fil-perjodu ta’ investigazzjoni bħal fl-2015. Għalkemm il-prezzijiet tal-importazzjonijiet mir-Russja kienu qed iwaqqgħu l-prezzijiet tal-produtturi tal-Unjoni, meta jitqies is-sehem globali tas-suq u t-tendenza, huwa improbabbli li dawn kellhom xi impatt fuq id-dannu mġarrab. Minflok, il-prezzijiet kienu reazzjoni għall-pressjoni tal-prezzijiet mir-RPĊ u l-Eġittu. Għalhekk, l-importazzjonijiet Russi ma kkontribwewx għat-telf tal-ishma mis-suq mill-industrija tal-Unjoni matul il-perjodu kkunsidrat. Barra minn hekk, l-investigazzjoni sabet li l-esportaturi Russi huma kumpaniji relatati mal-industrija tal-Unjoni u, għalhekk, dawn l-importazzjonijiet ma jixħtu l-ebda pressjoni fuq il-prezzijiet tal-Unjoni peress li dawn kienu bejgħ intern għall-kumpaniji bi prezzijiet tat-trasferiment.

(450)

Għalhekk, l-importazzjonijiet minn pajjiżi terzi oħra ma kinux is-sors tad-dannu deskritt fil-premessi minn (412) sa (440) ta’ hawn fuq.

(451)

Utent wieħed iddikjara li d-dannu tal-industrija tal-Unjoni kienet ikkawżata mit-tnaqqis fil-konsum bejn l-2017 u l-perjodu ta’ investigazzjoni u utent ieħor iddikjara li d-dannu kien ikkawżat mit-tnaqqis fl-installazzjonijiet tat-turbini eoliċi matul dan l-istess perjodu. It-tnaqqis ta’ -7,3 % fil-konsum mill-2017 sal-2018 ma jispjegax it-telf ta’ -13,3 % fil-volum tal-bejgħ tal-produtturi tal-Unjoni fl-istess perjodu, speċjalment meta jitqies li l-importazzjonijiet mill-pajjiżi kkonċernati żdiedu b’5 % minn 50 370 tunnellata għal 52 892 tunnellata u s-sehem tagħhom mis-suq niżel minn 27,8 % għal 31,4 % fl-istess perjodu bejn l-2017 u l-perjodu ta’ investigazzjoni.

(452)

Il-fatt li d-dannu ma ġiex ikkawżat minn tnaqqis fil-konsum fl-2018 jidher aktar biċ-ċar meta wieħed iħares lejn il-perjodu kkunsidrat kollu u mhux biss meta wieħed iqabbel l-aħħar sentejn. Il-konsum fl-Unjoni żdied matul il-perjodu kkunsidrat, filwaqt li s-sehem mis-suq tal-industrija tal-Unjoni naqas kontinwament matul l-istess perjodu u l-ishma mis-suq tal-pajjiżi kkonċernati żdiedu kontinwament. L-industrija tal-Unjoni ma setgħetx tibbenefika miż-żieda ġenerali fil-konsum minħabba l-importazzjonijiet oġġett ta’ dumping mill-pajjiżi kkonċernati li kienu konsistentement u sostanzjalment qed iwaqqgħu l-prezzijiet tal-bejgħ tal-industrija tal-Unjoni. Filwaqt li l-industrija tal-Unjoni bdiet tagħmel it-telf biss fil-perjodu ta’ investigazzjoni, is-snin l-oħra diġà kienu wrew tnaqqis kontinwu fil-profitti tagħha matul is-snin mill-2015-2017 kif muri fil-premessa (431).

(453)

Għaldaqstant, dawn l-affermazzjonijiet ġew irrifjutati.

(454)

Iż-żewġ utenti li kkooperaw argumentaw li ż-żieda fil-kost tal-materja prima ewlenija (GFR) importata mir-RPĊ billi jiġu imposti dazji kumpensatorji definittivi fuq dawn il-prodotti kif ukoll iż-żieda fil-kost tal-enerġija kienu l-kawża għad-dannu. Il-kost unitarju medju tal-industrija tal-Unjoni żdied biss bi ftit bi 3 % matul il-perjodu kkunsidrat, filwaqt li l-prezzijiet tal-importazzjoni mill-pajjiżi kkonċernati naqsu bi kważi 14 % u waqqgħu l-prezzijiet tal-Unjoni bi 32,3 %. Għalhekk, id-dannu mġarrab ma jistax jiġi attribwit għaż-żieda fil-kost iżda għall-pressjoni eżerċitata mill-importazzjonijiet oġġett ta’ dumping li żammew lill-industrija tal-Unjoni milli żżid il-prezzijiet tagħha fid-dawl taż-żieda fil-kostijiet.

(455)

Għaldaqstant, dawn l-affermazzjonijiet ġew irrifjutati.

(456)

L-utenti argumentaw li l-industrija tal-Unjoni għandha nuqqas ta’ flessibbiltà u tipprovdi biss kwantitajiet kbar fuq impenji fit-tul li, madankollu, iġibu magħhom riskji finanzjarji sinifikanti għall-utenti (l-industrija eolika) li għażlu fornituri oħrajn minflok. Madankollu, l-investigazzjoni sabet li l-industrija eolika għandha politika ta’ diversifikazzjoni tal-provvista tagħha u dejjem tintegra l-produtturi tal-GFF tal-Unjoni fil-katina ta’ provvista tagħha. L-investigazzjoni wriet ukoll li huwa possibbli għal produttur tal-enerġija eolika li jkollu strateġija ta’ b’diversi fornituri mal-produtturi tal-GFF tal-Unjoni biss. Dan juri li hemm produtturi tal-GFF tal-Unjoni li jipprovdu lill-industrija eolika bil-kwalità tal-prodott fil-kondizzjoni li teħtieġ l-industrija eolika kif elaborat aktar fil-premessa (471).

(457)

Għaldaqstant, dawn l-argumenti ġew irrifjutati.

(458)

Kien hemm koinċidenza ċara fiż-żmien bejn iż-żieda sostanzjali tal-importazzjonijiet mill-pajjiżi kkonċernati u d-deterjorament tal-qagħda tal-industrija tal-Unjoni.

(459)

Il-Kummissjoni investigat ukoll fatturi oħra ta’ dannu u ma sabet l-ebda fattur ieħor li kkontribwixxa għad-dannu materjali mġarrab mill-industrija tal-Unjoni. Fil-fatt, l-ebda wieħed mill-fatturi l-oħra eżaminati, individwalment jew kollettivament, ma xeħet f’dubju li hemm relazzjoni ġenwina u sostanzjali bejn l-importazzjonijiet oġġett ta’ dumping mir-RPĊ u l-Eġittu u d-dannu materjali li ġarrbet l-industrija tal-Unjoni.

(460)

Fil-kummenti tagħhom dwar ir-rivelazzjoni finali, il-Gvern tal-Eġittu u s-CCCLA sostnew fuq bażi ġenerali, li d-dannu materjali mġarrab mill-industrija tal-Unjoni kien ikkawżat minn importazzjonijiet minn pajjiżi terzi oħra, it-tnaqqis fil-konsum bejn l-2017 u l-PI, l-iżvilupp tal-kostijiet tal-materja prima, in-nuqqas ta’ flessibbiltà tal-industrija tal-Unjoni rigward il-provvista u t-tnaqqis fl-installazzjoni tat-turbini eoliċi bejn l-2017 u l-2018, mingħajr, madankollu, ma ġie pprovdut l-ebda raġunament jew kwalunkwe informazzjoni jew evidenza biex issostni din id-dikjarazzjoni. Barra minn hekk, l-ebda waħda mis-sejbiet speċifiċi kif spjegat fid-dettall hawn fuq fil-premessi minn (442) sa (458) ma kienet ikkontestata. Għaldaqstant, din l-affermazzjoni ġiet irrifjutata.

(461)

F’konformità mal-Artikolu 21 tar-Regolament bażiku, il-Kummissjoni eżaminat jekk setgħetx tikkonkludi biċ-ċar li ma kienx fl-interess tal-Unjoni li tadotta miżuri f’dan il-każ, minkejja li ġie ddeterminat dumping dannuż. Id-determinazzjoni tal-interess tal-Unjoni kienet ibbażata fuq apprezzament tad-diversi interessi involuti, inklużi dawk tal-industrija tal-Unjoni, tal-importaturi, tal-utenti, tal-fornituri u tal-industrija anċillari, jiġifieri cutters/kitters.

(462)

L-investigazzjoni wriet li l-industrija tal-Unjoni qed iġġarrab dannu materjali minħabba l-effetti tal-importazzjonijiet oġġett ta’ dumping li jwaqqgħu l-prezzijiet tal-Unjoni u jeżerċitaw pressjoni fuq il-prezzijiet filwaqt li jikkawżaw telf sinifikanti fis-sehem mis-suq u jwasslu għal telf matul il-perjodu ta’ investigazzjoni, kif elaborat fil-premessi minn (412) sa (458) ta’ hawn fuq.

(463)

L-industrija tal-Unjoni se tibbenefika mill-miżuri, li probabbilment ikunu jipprevjenu żieda oħra fl-importazzjonijiet mir-RPĊ u l-Eġittu bi prezzijiet baxxi ħafna. Mingħajr miżuri, il-produtturi Ċiniżi u Eġizzjani ser ikomplu jdaħħlu GFF oġġett ta’ dumping fis-suq tal-Unjoni u jeżerċitaw pressjoni ulterjuri fuq il-prezzijiet, b’tali mod li jipprevjenu lill-industrija tal-Unjoni milli tbigħ GFF bi profitt adegwat u, b’hekk, jikkawżaw aktar dannu materjali lill-industrija tal-Unjoni.

(464)

Il-produtturi tat-turbini eoliċi huma l-akbar utenti tal-GFF hekk kif jirrappreżentaw madwar 60 - 70 % tad-domanda għal GFF fl-Unjoni. L-utenti l-oħra jinkludu l-produtturi tal-bastimenti (madwar 11 %), tat-trakkijiet (madwar 8 %) u tat-tagħmir sportiv (madwar 2 %), kif ukoll il-fornituri tas-sistemi tar-riabilitazzjoni tal-pajpijiet (madwar 8 %).

(465)

Għall-ewwel ġew ikkuntattjati 25 utent magħruf fl-Unjoni u dawn ġew mistiedna jikkooperaw. Żewġ produtturi tat-turbini eoliċi ppreżentaw ruħhom kontra miżuri potenzjali fuq GFF. Tliet produtturi tat-turbini eoliċi ippreżentaw ruħhom iżda ma esprimewx il-fehmiet tagħhom, minkejja li ġew mistiedna jagħmlu dan fin-notifika ta’ bidu u fil-kwestjonarji tal-utenti, li huma kineu wieġbu. Iż-żewġ produtturi tat-turbini eoliċi li jopponu l-miżuri kienu appoġġati minn assoċjazzjoni li tirrappreżenta l-industrija Ewropea tal-enerġija eolika. Madankollu, wieħed mill-membri tagħha, assoċjazzjoni Franċiża tal-enerġija eolika, esprima b’mod espliċitu li jibqa’ newtrali fir-rigward tad-dazji potenzjali.

(466)

Wara r-rivelazzjoni finali, l-assoċjazzjoni li tirrappreżenta lill-industrija tal-enerġija eolika Ewropea ddikjarat b’mod ċar li bħala assoċjazzjoni hija topponi l-impożizzjoni ta’ miżuri. Huma ċċaraw ukoll li kienu qed jirrappreżentaw iż-żewġ produtturi ta’ turbini eoliċi li kkooperaw. Iż-żewġ produtturi tat-turbini eoliċi pprovdew tweġiba għall-kwestjonarju. It-tielet produttur tat-turbini eoliċi ddikjara li jġib GFF esklussivament minn diversi produtturi tal-Unjoni. Produtturi varji tat-tagħmir tal-iskijjar u kumpaniji varji tal-kitting ippreżentaw ruħhom favur il-miżuri potenzjali.

(467)

Żewġ tipi ewlenin ta’ turbini eoliċi huma (i) fuq il-baħar, li ġeneralment ikunu ikbar u maħsuba biex joperaw ’il barra mil-linji kostali, u (ii) fuq l-art, li huma maħsuba biex joperaw fuq l-art.

(468)

Il-proġetti tal-parks eoliċi fl-Unjoni tradizzjonalment jitwettqu mill-iżviluppaturi tal-proġetti, li jkunu jew kumpaniji tal-enerġija jew investituri, u mhux mill-produtturi tat-turbini eoliċi nfushom. Billi oriġinarjament l-Istati Membri kienu jiggarantixxu prezz “feed-in” għall-enerġija prodotta mill-parks eoliċi, mill-2014 l-appoġġ mexa lejn proġetti bbażati fuq sejħiet għall-offerti, li fihom jikkompetu diversi żviluppaturi ta’ proġetti, l-aktar reċentement fuq bażi newtrali f’termini ta’ enerġija (jiġifieri l-enerġija eolika tista’ tikkompeti mal-enerġija solari).

(469)

Iż-żewġ utenti li kkooperaw huma fost l-akbar produtturi tat-turbini eoliċi fl-Unjoni, u flimkien jikkonsmaw aktar minn 20 % tad-domanda kollha tal-Unjoni tal-GFF. Flimkien jimportaw aktar minn 30 % tal-importazzjonijiet kollha mill-pajjiżi kkonċernati. Iż-żewġ kumpaniji għamlu diversi dikjarazzjonijiet, jiġifieri rigward (i) it-telf tal-istabbiltà tal-provvista; (ii) it-telf tal-kompetittività tal-industrija tal-enerġija eolika; (iii) ir-riskju tar-rilokazzjoni ta’ parti mill-produzzjoni tagħhom, u (iv) il-kompatibbiltà mal-miri tal-Unjoni għall-enerġija rinnovabbli, f’każ li jiġu imposti l-miżuri.

(470)

Il-produtturi tat-turbini eoliċi argumentaw li GFF użat fil-pali tat-turbini jgħaddu minn proċess ta’ ċertifikazzjoni sofistikat, b’fażijiet ta’ ttestjar intensi u twal. L-utenti argumentaw ukoll li l-produtturi Ċiniżi tal-GFF biss jistgħu jipprovdu volumi għoljin ta’ kwalità omoġenja fi żmien qasir minħabba l-integrazzjoni vertikali tagħhom. Huma argumentaw ukoll li l-volum tal-produzzjoni tal-produtturi tal-Unjoni mhuwiex biżżejjed peress li huwa inqas mill-konsum totali tal-Unjoni. Skont l-utenti, għal dawn ir-raġunijiet, l-industrija tat-turbini eoliċi ma tistax tbiddel malajr il-fornituri u anki li kieku tista’, ma jkunx hemm biżżejjed GFF prodott fl-Unjoni.

(471)

Filwaqt li l-maġġoranza tal-produtturi tal-Unjoni mhijiex integrata vertikalment, l-investigazzjoni wriet li, biex jiġu evitati diffikultajiet fil-provvista, il-produtturi tat-turbini eoliċi normalment ikollhom strateġija b’diversi fornituri, li jixtru regolarment l-istess tip tal-GFF minn produttur tal-Unjoni u produttur Ċiniż jew Eġizzjan. Madankollu, il-Kummissjoni rċeviet ukoll data mingħand produttur terz ta’ turbini eoliċi, li juża diversi fornituri li huma esklussivament produtturi tal-Unjoni. Il-fatt li d-diversi fornituri tal-GFF speċifiku jinkludu regolarment produtturi tal-Unjoni, kemm integrati vertikalment kif ukoll mhux integrati, juri li l-produtturi mhux integrati jistgħu jipprovdu bl-istess mod GFF meħtieġ għall-produzzjoni tat-turbini eoliċi.

(472)

Fir-rigward tal-kapaċità tal-produzzjoni fl-Unjoni, kif muri fit-tabella 5, filwaqt li l-produzzjoni tal-Unjoni bħalissa hija aktar baxxa mill-konsum kif muri fit-tabella 2, il-kapaċità totali tal-produzzjoni tal-Unjoni taqbeż din il-kapaċità. L-investigazzjoni wriet li bħalissa hemm kapaċità żejda għolja disponibbli ta’ aktar minn 40 %, li hija dovuta għaż-żieda ta’ importazzjonijiet oġġett ta’ dumping u bi prezz baxx mir-RPĊ u l-Eġittu li ħadu sehem mis-suq mill-industrija tal-Unjoni. Dik il-kapaċità żejda hija mifruxa bejn 16-il produttur tal-Unjoni, u b’hekk l-Unjoni ssir suq kompetittiv b’sorsi interni varji ta’ provvista. Barra minn hekk, il-kapaċità addizzjonali tista’ tinbena faċilment peress li jkunu meħtieġa biss investimenti baxxi. L-industrija tal-Unjoni diġà qed tforni lill-industrija tat-turbini eoliċi u, għalhekk, diġà hija fornitur iċċertifikat, u għalhekk faċilment tista’ żżid il-provvista tagħha f’kondizzjonijiet tas-suq ġusti.

(473)

Barra minn hekk, fit-terminu medju sa fit-tul, il-produtturi tat-turbini eoliċi jkunu jistgħu jiċċertifikaw produtturi addizzjonali tal-GFF mill-Unjoni jew minn sorsi oħra mhux oġġett ta’ dumping. Kif imsemmi fil-premessa (465), wieħed mill-produtturi tat-turbini eoliċi żviluppa strateġija b’diversi fornituri bbażata fuq diversi produtturi tal-Unjoni. Barra minn hekk, hemm biżżejjed kapaċità żejda fl-Unjoni biex isir hekk fuq skala meħtieġa minn produtturi kbar tat-turbini eoliċi.

(474)

Wara r-rivelazzjoni finali, wieħed mill-produtturi tat-turbini eoliċi sostna li l-Kummissjoni ma waslitx għall-konsegwenzi tal-proċess ta’ ċertifikazzjoni u li kkonkludiet ħażin li jkun possibbli li wieħed jaqleb faċilment bejn il-fornituri tal-GFF. L-istess produttur tat-turbini eoliċi wera li l-kapaċità żejda tal-produtturi tal-Unjoni hija mifruxa bejn 16-il produttur tal-Unjoni, u li ma jkunx fattibbli li s-16-il produttur tal-Unjoni kollha jiġu ċċertifikati. L-istess parti argumentat li minħabba l-proċess twil u għali ta’ ċertifikazzjoni u l-fatt li l-industrija tal-Unjoni mhijiex kapaċi tipprovdi kwantitajiet kbar tal-prodott bi kwalità omoġenja, ma tkunx kummerċjalment vijabbli li tibdel il-fornituri jew li tixtri biss minn produtturi tal-Unjoni. Dan il-produttur tat-turbini eoliċi argumenta wkoll li l-utenti ma setgħux jiddependu fuq il-fatt li l-kapaċità addizzjonali tista’ tinbena faċilment mill-produtturi tal-Unjoni.