(1)

Minn mindu faqqgħet il-kriżi epidemjoloġika kkawżata mill-coronavirus SARS-CoV-2, il-marda assoċjata miegħu, il-COVID-19, bdiet tinfirex b’mod rapidu madwar id-dinja, u laħqet ukoll it-territorju tal-Unjoni. Skont iċ-Ċentru Ewropew għall-Prevenzjoni u l-Kontroll tal-Mard, ir-riskju assoċjat mal-infezzjonijiet tal-COVID-19 għall-persuni fl-Unjoni bħalissa jitqies bħala moderat għal għoli, abbażi tal-probabbiltà tat-trażmissjoni u l-impatt tal-marda. Il-virus jinfirex malajr fl-Unjoni, u jista’ jkollu impatt enormi fuq is-saħħa pubblika b’eżiti fatali sostanzjali fi gruppi b’riskju għoli u bi tfixkil sinifikanti fl-ekonomija u fis-soċjetà.

(2)

F’dan il-kuntest, il-ħtieġa għal tagħmir ta' protezzjoni personali, kif dettaljat fl-Anness 1, diġà żdiedet b’mod sinifikanti. Minħabba n-natura tiegħu u ċ-ċirkostanzi prevalenti, dan it-tip ta’ tagħmir huwa prodott essenzjali billi huwa meħtieġ biex jiġi evitat it-tixrid ulterjuri tal-marda, u biex tiġi salvagwardjata s-saħħa tal-persunal mediku li jittratta l-pazjenti infettati.

(3)

F’konformità mal-Konklużjonijiet tal-Kunsill tal-Kunsill tal-Ministri tas-Saħħa fit-13 ta’ Frar 2020, tnediet proċedura ta’ akkwist għat-tagħmir ta’ protezzjoni personali fi ħdan il-Ftehim ta’ Akkwist Konġunt għal kontromiżuri mediċi. Skont skeda taż-żmien indikattiva u skont is-sitwazzjoni tas-suq, tista’ tiġi ffinalizzata sa mill-bidu ta’ April.

(4)

Id-domanda għal tagħmir ta’ protezzjoni mediku ġiet aggravata fl-aħħar jiem u mistennija tkompli tiżdied b’mod sinifikanti fil-futur imminenti u fl-istess waqt jiżviluppaw skarsezzi f’diversi Stati Membri. Jeżistu restrizzjonijiet fis-suq uniku kollu tal-UE biex tiġi sodisfatta d-domanda tal-klijenti għat-Tagħmir ta’ Protezzjoni Personali rilevanti, b’mod partikolari l-maskri tal-protezzjoni tal-ħalq. F’dan il-mument, qed isiru sforzi kontinwi biex jiżdiedu l-kapaċitajiet ta’ manifattura. Dan jista’ jikkontribwixxi għal rieżami tal-miżura kif meħtieġ u hekk kif tevolvi s-sitwazzjoni.

(5)

Il-produzzjoni ta’ tagħmir ta’ protezzjoni personali bħall-maskri tal-protezzjoni tal-ħalq fl-Unjoni bħalissa hija kkonċentrata f’għadd limitat ta’ Stati Membri, jiġifieri r-Repubblika Ċeka, Franza, il-Ġermanja u l-Polonja. Minkejja l-fatt li ġiet imħeġġa ż-żieda fil-produzzjoni, il-livell attwali tal-produzzjoni tal-Unjoni u tal-istokkijiet eżistenti mhux se jkun biżżejjed biex tiġi ssodisfata d-domanda fl-Unjoni. Dan huwa partikolarment il-każ hekk kif din id-domanda qed tiżdied minħabba s-sitwazzjoni epidemika u t-tagħmir ta’ protezzjoni personali jista’ jiġi esportat mingħajr restrizzjoni lejn partijiet oħra tad-dinja.

(6)

Xi pajjiżi terzi diġà ddeċidew b’mod uffiċjali li jirrestrinġu l-esportazzjonijiet ta’ tagħmir ta’ protezzjoni. Jidher li oħrajn ħadu azzjonijiet simili fuq bażi aktar informali. Xi wħud minn dawn il-pajjiżi huma wkoll fornituri tradizzjonali għas-suq tal-Unjoni u dan qed ikompli jagħmel pressjoni fuq is-suq tal-Unjoni.

(7)

Sabiex tiġi rimedjata u evitata sitwazzjoni kritika, huwa fl-interess tal-Unjoni li l-Kummissjoni tieħu azzjoni immedjata ta’ tul ta’ żmien limitat sabiex jiġi żgurat li l-esportazzjonijiet ta’ tagħmir ta’ protezzjoni personali jkunu soġġetti għal awtorizzazzjoni biex tiġi żgurata l-adegwatezza tal-provvista fl-Unjoni sabiex tintlaħaq id-domanda vitali.

(8)

L-esportazzjonijiet ta’ ċerti kwantitajiet ta’ prodotti speċifiċi jistgħu jiġu awtorizzati f’ċirkostanzi speċifiċi sabiex tiġi żgurata assistenza pprovduta lil pajjiżi terzi, u skont il-ħtiġijiet tal-Istati Membri. Il-modalitajiet amministrattivi għal dawn l-awtorizzazzjonijiet jenħtieġ li jitħallew għad-diskrezzjoni tal-Istati Membri matul iż-żmien ta’ dawn il-miżuri temporanji.

(9)

Hemm ħtiġijiet vitali għal tagħmir protettiv fl-Unjoni fir-rigward tal-isptarijiet, tal-pazjenti, tal-ħaddiema fuq il-post u tal-awtoritajiet tal-protezzjoni ċivili. Ħtiġijiet vitali bħal dawn huma mmonitorjati b’mod kostanti permezz tal-mekkaniżmu ta’ protezzjoni ċivili tal-Unjoni.

(10)

Billi fil-preżent din il-miżura tapplika għal tagħmir ta’ protezzjoni personali, kif deskritt fl-Anness 1, jista’ jinqala’ l-bżonn li jsir rieżami tal-kamp ta’ applikazzjoni tal-Anness u tal-prodotti koperti b’dan ir-Regolament.

(11)

Minħabba l-urġenza tas-sitwazzjoni, iġġustifikata mit-tixrid rapidu tal-infezzjoni COVID-19, il-miżuri previsti f’dan ir-Regolament jenħtieġ li jittieħdu f’konformità mal-Artikolu 3(3) tar-Regolament (UE) 2015/479.

(12)

Sabiex jiġi evitat it-tnaqqis tal-istokkijiet minħabba spekulazzjoni, dan ir-Regolament ta’ Implimentazzjoni jenħtieġ li jidħol fis-seħħ fil-jum tal-pubblikazzjoni tiegħu. F’konformità mal-Artikolu 5(5) tar-Regolament (UE) 2015/479, dawn il-miżuri jenħtieġ li jibqgħu għaddejjin għal sitt ġimgħat,