(1)

Id-Direttiva 2008/72/KE tistabbilixxi dispożizzjonijiet dwar it-tqegħid fis-suq fl-Unjoni ta’ materjal tal-propagazzjoni tal-ħxejjex minbarra ż-żerriegħa.

(2)

Id-Direttiva 2008/90/KE tistabbilixxi dispożizzjonijiet dwar il-kummerċjalizzazzjoni fl-Unjoni tal-materjal tal-propagazzjoni tal-pjanti tal-frott u tal-pjanti tal-frott maħsuba għall-produzzjoni tal-frott.

(3)

Ir-Renju Unit ittraspona u implimenta dawk id-Direttivi b’mod effettiv.

(4)

Id-dritt tal-Unjoni, inklużi d-Direttivi 2008/72/KE u 2008/90/KE, huwa applikabbli għar-Renju Unit u fih, matul perjodu ta’ tranżizzjoni li jintemm fil-31 ta’ Diċembru 2020 f’konformità mal-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (il-Ftehim dwar il-Ħruġ), u b’mod partikolari mal-Artikoli 126 u 127(1).

(5)

Fid-dawl tat-tmiem tal-perjodu ta’ tranżizzjoni previst fil-Ftehim dwar il-Ħruġ, ir-Renju Unit issottometta lill-Kummissjoni talba għar-rikonoxximent tal-ekwivalenza tal-materjal tat-tħawwil u tal-propagazzjoni tal-ħxejjex minbarra ż-żerriegħa, kif ukoll għar-rikonoxximent tal-ekwivalenza tal-materjal tal-propagazzjoni tal-pjanti tal-frott u tal-pjanti tal-frott maħsuba għall-produzzjoni tal-frott prodott fir-Renju Unit mal-materjal rispettiv prodott fl-Unjoni u li jikkonforma mad-Direttivi 2008/72/KE u 2008/90/KE.

(6)

Ir-Renju Unit informa lill-Kummissjoni li l-leġiżlazzjoni tiegħu li ttrasponiet dawk id-Direttivi mhijiex se tinbidel u se tkompli tapplika mill-1 ta’ Jannar 2021.

(7)

Il-Kummissjoni eżaminat il-leġiżlazzjoni rilevanti tar-Renju Unit u kkonkludiet li l-materjal tat-tħawwil u tal-propagazzjoni tal-ħxejjex, minbarra ż-żerriegħa, prodott fir-Renju Unit u konformi mal-leġiżlazzjoni msemmija hawn fuq tar-Renju Unit, huwa ekwivalenti għall-materjal tat-tħawwil u tal-propagazzjoni tal-ħxejjex prodott fl-Unjoni u konformi mad-Direttiva 2008/72/KE, peress li jagħti l-istess garanziji fir-rigward tal-obbligi fuq il-fornitur, tal-identità, tal-karatteristiċi, tas-saħħa tal-pjanti, tal-materjal għat-tkabbir, tal-imballaġġ, tal-arranġamenti ta’ spezzjoni, tal-immarkar u tal-issiġillar, bħall-materjal rispettiv prodott fl-Unjoni.

(8)

Għalhekk, jenħtieġ li jiġi deċiż li l-materjal tat-tħawwil u tal-propagazzjoni tal-ħxejjex minbarra ż-żerriegħa prodott fir-Renju Unit huwa ekwivalenti f’dawk l-aspetti għall-materjal tat-tħawwil u tal-propagazzjoni tal-ħxejjex prodott fl-Unjoni u konformi mad-Direttiva 2008/72/KE, dment li l-materjal tat-tħawwil u tal-propagazzjoni tal-ħxejjex prodott fir-Renju Unit jibqa’ konformi ma’ dik id-Direttiva u mal-atti ta’ implimentazzjoni tagħha wara li jintemm il-perjodu ta’ tranżizzjoni previst fil-Ftehim dwar il-Ħruġ.

(9)

Il-Kummissjoni eżaminat il-leġiżlazzjoni rilevanti tar-Renju Unit u kkonkludiet li l-materjal tal-propagazzjoni tal-pjanti tal-frott u l-pjanti tal-frott maħsuba għall-produzzjoni tal-frott prodotti fir-Renju Unit huma ekwivalenti għall-materjal tal-propagazzjoni tal-pjanti tal-frott u għall-pjanti tal-frott maħsuba għall-produzzjoni tal-frott prodotti fl-Unjoni u konformi mad-Direttiva 2008/90/KE, peress li joffru l-istess garanziji fir-rigward tal-obbligi fuq il-fornitur, tal-identità, tal-karatteristiċi, tas-saħħa tal-pjanti, tal-materjal għat-tkabbir, tal-imballaġġ, tal-arranġamenti ta’ spezzjoni, tal-immarkar u tal-issiġillar, bħall-materjal rispettiv prodott fl-Unjoni f’konformità ma’ dik id-Direttiva.

(10)

Għalhekk, jenħtieġ li jiġi deċiż li l-materjal tal-propagazzjoni tal-pjanti tal-frott u l-pjanti tal-frott maħsuba għall-produzzjoni tal-frott prodotti fir-Renju Unit huma ekwivalenti għall-materjal tal-propagazzjoni tal-pjanti tal-frott u għall-pjanti tal-frott maħsuba għall-produzzjoni tal-frott prodotti fl-Unjoni f’konformità mad-Direttiva 2008/90/KE dment li dak il-materjal tal-propagazzjoni tal-pjanti tal-frott kif ukoll il-pjanti tal-frott maħsuba għall-produzzjoni tal-frott prodotti fir-Renju Unit jibqgħu jikkonformaw ma’ dik id-Direttiva u mal-atti ta’ implimentazzjoni tagħha wara li jintemm il-perjodu ta’ tranżizzjoni previst fil-Ftehim dwar il-Ħruġ.

(11)

Din id-deċiżjoni hija mingħajr preġudizzju għall-applikazzjoni tad-dritt tal-Unjoni għar-Renju Unit u fih, fir-rigward tal-Irlanda ta’ Fuq f’konformità mal-Artikolu 5(4) tal-Protokoll dwar l-Irlanda/l-Irlanda ta’ Fuq tal-Ftehim dwar il-Ħruġ flimkien mal-Anness 2 ta’ dak il-Protokoll.

(12)

Billi l-perjodu ta’ tranżizzjoni previst fil-Ftehim dwar il-Ħruġ jintemm fil-31 ta’ Diċembru 2020, jenħtieġ li din id-Deċiżjoni tapplika mill-1 ta’ Jannar 2021.

(13)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,